ذهب
جنت صافنة واحسن واحد طگاني من ورة
تينة: جا شبي الحلو صافن
ذهب: هههه ماكو شي
دخلت نعمة باوعتلي وضحكت
نعمة: حبيبة الشيخ يگول خلي تحط شيلتهه عله راسهه دوم لا تنزعهه
ذهب: انشالله
تريگنه وگمنه عله شغلنه وانه بعدني مسطورة
جا هيج الحظ جابني وحطاني جدامة وانه خلصت ليالي اباوع ع الدرب بلجن المحنه
وشرفت ام عباس جاية من السوگ مادري بيش الساعة طالعة من الفجر يمكن
دخلت علاگتهه عله راسهه وتصيح: تينة خايبة تينة وين وليتي
راحتلهه تينة تركض تلگتهه خذت العلاگة منها والعلاليك البديها هم
ذبت عبايتهه وحجت: انتي هيي مدري شسمج عزلي المسواگ وغسلي المخضر ونظفي الثلاجة عدل وحطي الغراض بيهه
حجيهه عصبني تآمرني عبالك خدامة عدهه
حاجيتهه بنترة: اسمي ذهب
ام عباس: لا ولغسل لهالحلگ اريدن اطلعلج جنسية اشتغلي وانجبي
تينة: عوفيهن خاله انه اسويهن
ام عباس: انلصمي انتي وروحي نظفي حجرتي
طلعت تينة وانه ابدي اگومن ادوس بمصارينها جنهه الساحرة التطلع بالفارة والبزون
دفعتني وعبرت طلعت من المطبخ
فتحت العلاليك وضليت اغسل واعزل بالمسواگ
نظفت الثلاجة ورتبته بيهه
ودخلت مرة ثانية
دفعتني وضلت تباوع بالثلاجة: تميلي خل اشوف شصخمتي.. شغلج مثل وجهج
طگت روحي بعد ما تحملهه هايه
ذهب: ولله اذا ماعاجبج شغلي حركي ادياتج
ام عباس: جا محد لادج عله حلكج ع هاللسان الزفر
ذهب: احترمي لاوادم وخليهم يحترمونج
ام عباس: خايبة بالعباس اليوم اگضي بيج التوبة
گضبتني من گصيبتي وعتتني حيل وصرخت لان تعورت
ونسمع صوت من ورانه
هاشم: ام عباس
عافتني بسرعة ووخرت ووجهه اصفر: هاا.... ااا... شيخ
تگرب عليهه وعيونه تجدح: جا انتي ماتكفين من الطلايب
ام عباس: يااا جا شمسوية انه غير هي جديدة عله هالبيت وماتعرف كلت اعلمنهه جيف هي بعمر بناتي
تدنه عليهه اكثر وحجه بصوت ناصي: جا من تعلمينهه مرة ثانية علميهه من ابعيد مو اله تجرجرين براسهه
عافنه ودخل جوه وهاي ضلت ماتعرف شتسوي
جا هيج الخوف يسوي
كملنه الغدة وصبينه وجانو كلهم متجمعين ع السفرة
طلعت انه من المطبخ مستحية اباوع وين اكعد
كعدت نعمة وصاحت: تعاي ذهبه گربي يمي
جانت نعمة كاعدة گباله
تدنتلي وكعدت صرت بوجهه كلش
يمااااي شلون راح اكل
اجت سارة بته تركض وكعدت بحظنه
حضنهه حيل وباسهه: شلونهه حبيبة ابوهه
سارة: زينة
هاشم: عساج دوم يبنيتي
اجت ام عباس ودحست روحهه يمة گوه وهوه شال ساره وخلاهه بنصهم
هاشم: يلله بوية كعدي تغدي
ضلت تباوع بحقد وانه احس ماي بارد ونزل ع گلبي
ولله عيب مرة شكبرج تركضين وره رجال مايريدج
كعدنه ناكل والكل ساكت وجان يشرگ الشيخ
نعمة: ياا اسم الله خوية حبيبي
مدت ايدهه نعمة ع الماي وجان تكمز ام عباس وتاخذ لكلاص من ايدهه وتنطي هيه
ام عباس: هني هني
شرب ماي وحط الگلاص وگام
هاشم: الحمدلله.. حيدر من تخلص تعال للمضيف رايدك
حيدر: شيخ فدوة اذا طلابة اعفيني مالي دخل بهاي السوالف
هاشم: جا خل مرة وحدة ادري عدي اخو بظهري يسندني ومااعتمد ع الغريب
عافنه وطلع وكام ورا حيدر وهوه يستغفر
خلصنه غدة وطبعا لماعين طاحن براسي انه وتينة
ومرت ابو سندرلا بس تتأمر
وبناتهه الجايفات ما مدن اديهن ويانه
للعصر اجتنه خديجة وضلينه سوالف وضحك ومشه اليوم بسرعة
احله شي بهالبيت الحجية وسوالفهه
وخديجة ونعمة مثل البلسم ع الجرح
راحت خديجة قبل العشة
صار الليل وفرشنه انه ونعمة بغرفة الحجية
جاي اطلعلي ملابس اريد ابدل وفگدت دشداشتي اللابستهه البارحة من بدلت وين ضلت
لطمت عله خدي من ذكرت
عزة العزاني بس لا ناسيتهه بغرفة الشيخ
دخلت نعمة وشافتني
نعمة: شمالج فاكة الكنتور وصافنة
ذهب: ميخالف تصعدين بغرفة الشيخ
نعمة: ليش شعدج
ذهب: دشداشتي نسيتهه فوگ عيب خل انزلهه انه وياج
گعدت ع الفراش وانتجت: جا بالعباس رجليه توجعني مابيه حيل صعدي انتي
ذهب: هااا.... لا لا تولي ماريدهه
نعمة: خايبة صعدي ماكو احد الشيخ مايجي هسه بعد وكت
دخلت الحجية للغرفة جانت بالحمام وسكتنه
اشرتلي نعمة اصعد
طلعت وانه خايفة كوة صعدت الدرج
سميت باسم الله ودخلت للغرفة
فتحت الضوة وضليت ادور ماكو الدشداشة جا وين راحت ياربي
هاشم: شعدج هنا
درت وانه احسن كلبي طاح مني من الخوفة
ذهب: هااا... انا
هاشم: انه مو كلت بعد مالج صعدة هنا كعدتج يم نعمة والحجية
ذهب: لا بس جنت ادور......
تگرب عليه وعيونه بوجهي
احسن صخنت ورجليه بعد ماتشيلني
هاشم: انتي بتمن
ذهب: هااا
هاشم: شبيج انطرشتي... ابوج شسمه
ذهب
جا غير اريد الحجي يطلع مني ماكو
يمكن حته اسم ابوي نسيته
ذهب: ابوي... اسمه... حميد
ضيگ عيونه وباوعلي: حميد... وين يشتغل
دنجت وحجيت: ابوي جان يشتغل هنا فلاح وتوفه من ثمن سنين
هاشم: انتي بت الفلاح حميد
ذهب: اي
هاشم: الله يرحمه.. سمعي يابت الناس انتي امانة عدي هنا انشالله فترة وتردين لاهلج معززة مكرمة وكل حقوقج بيدج بس خل سالفة كتلة عباس تبرد وعمامي يسكتون
و الي تدورين عليه فكي الكنتور وتلگينه بس مرة ثانية انتبهي لغرضانج لا تشمرين وين ماجان
عافني وطلع وانه واگفة صافنة بمكاني
جا شگد حجة وانه مفهية بوجهه ونص الحجي ماسمعته
رحت فتحت الكنتور لگيت ثوبي اخذته وطلعت
لاكتني ام عباس نازعة الشيلة ومطلعة الشعر جنه ليفه
وتريد تدخل لغرفة الشيخ
حصرتني الضحكة عليهه جا اذا اضحك شيخلصني تكضني تسحلني هنا
ردت انزل واسمع صوت بجي جاي من الغرفة اليم الدرج
تدنيت لزگت اذاني ع الباب ولنه صوت تينه
ياا شبيهه تبجي
ردت ادخل وخفت اخافن رجلهه يمهه
خل انزل احسن
نزلت ولاگاني حيدر داخل من بره
يااا جا تينه شمالهه تبجي
گال السلام عليكم وعبر مدنج وانه من گد مانثولت حته مارديت عليه
دخلت للغرفة لكيت الحجية ونعمة نايمات حطيت راسي واحسن بالي كله يمة ونمت وانه مادري بروحي
گعدت الصبح لكيت روحي بس انه نايمة بالغرفة باوعت للساعة بالتسعة
لميت فراشي ولبست شالي وكمت غسلت وطلعت لكيت خديجة عدنه
ذهب: اصباح الخير
خديجة: اصباح العافية حبيبة
ذهب: اشلونج ام علاوي
خديجة: من اشوفن هالوجه الحلو اصيرن بخير
دخلت ام عباس وشافتني كاعدة شو هاي عاطت: ياا خوش ولله گاعدة ومنتجية گومي ولي الشغلج ويه البنات يلله
خديجة: عله كيفج ام عباس لبنية توهه كاعدة
ام عباس: اي وشترديني احطن الريوك جدامهه بناتنه كاعدات من الفجر والمسعدة توهه كاعدة
ام ناظم: خايبة انتي ليش ماتحترمين شمالج صوتج شعلوه
ام عباس: جا عمة انتي تقبلينهه توهه كاعدة والبنات يكربن من فجر الله
ام ناظم: مالج شغل ودشي كملي شغلج.. كومي يمة ذهب وي اخياتج شوفي شعدهن
هزيت راسي وكمت
وبده الكرف علينه انه وتينه
ام عباس بس تتأمر وبناتهه يمدن روسهن يباوعلنه ويشردن
كلساع اريد اهدن عليهن وتينه تگضبني
تغدينه وخلصنه والشيخ وحيدر مااجو ع الغدة اليوم
اجه وكت لماعين وكلهه ختلت وهم انه وتينه غسلنه
كلما اريدن انشدهه ليش تبجي امس يدخل واحد علينه واسكت
خلصنه اماعين واجت نهوه ذبت صينية ع السنك ودارت وجهه تريد تطلع
ذهب: تعاي وين وين
اندارت عليه وحجت: شمالج تصيحين
ذهب: ماتشوفينه تونه گضينه غسلي اماعينج وروحي لا تشمريهن هنا
نهوة: و بنات الفلح شني شغلهن اذا بنات لشيوخ يغسلن
گالت هيج وانه احس اعصاب مابقت بيه منا تعبانه من الكراب ومنا هاي داست ابطني
صحت عليهه حيل: جا گضبي لسانج لا بالعباس اجي ادوس بمصارينج
نهوة: خايبة انتي ادوسين بمصاريني اخافنج ماعرفتي نهوة بعدج
رگضت ع السنك طگت الصينية وطاحت بالكاع تكسرن لماعين وصرخت: ياااا فلك طرج شسويتي ليش هيج
اجت ام عباس تركض :شمالجن شصار
نهوة: تعاي يمة تعاي شوفي هاي الماتستحي تكسر بماعينه بس كتلهه غسليهن وياج طكتهن من ايدي وكسرتهن
ضليت صافنة ومادري شگول ماتوقعت هيج تسوي
نزعت نعالهه ام عباس وركضت عليه: جا خايبة انتي تكصرين اماعيني اليوم اله اعلمنج
كضبتني ودگ عليه بالنعال وبتهه كاضتني حته لا اشرد
اريد افك روحي منهن ماكو تطك بيه وتغلط وتفشر وصوتهه شعلوة
طلعت تينه تركض من المطبخ
وهذني يجرجرن بيه ويكفخن
اجت رجلي ع الكزاز الطايح بالكاع وانشكت رجلي وضلت تجري دم
ودخلن نعمة وتينة
نعمة: يااا يااا خايبات هدنهه ام عباس تسودنتي
جرتني منهخ وام عباس فحطانه: جا كفو هاي تكصر اماعيني الخايسة
نعمة: بسج خافي الله انتي صاحبة بنيات جا هيج تسوين بيهه علمود ماعون شوفي رجلهه تجري دم
ام عباس: يطبهه مرض عساهه بابو زايد بالعباس اذا ماجريتي عدل لشوفج انجوم الظهر
ذبت نعالهه بالكاع لبسته وطلعت
وبتهه تباوعلي شمتانه بيه وطلعت وره امهه
نعمة: من عساجن لا رديتن وجوه الفگر... تكدرين تمشين يمة
هزيت براسي وانه ابجي رجلي موتتني من الوجع
گضبتني ومشيت وياهه عله تك رجل
دخلتني للحمام ووصت تينة تجيبلي هدوم
غسلتلي ولفت رجلي انطتني هدومي وطلعت خلتني ابدل
بدلت وطلعت من الحمام ماكدر ادوس عله رجلي بالكوه امشي
وصلت الغرفة الحجية
ام ناظم: ها يمة شلون رجلج
ذهب: الحمدلله
نعمة: يمة جا السالفة بعد ماينسكت عليهه لزوم نگل لشيخ يشوفله حل ويه البومة ام عباس
ام ناظم: جا كلشي نجيبه ونحطه بحلگ الشيخ
نعمة: جا نخلي لبنية تموت بديهن
ام ناظم: ماتموت انشالله احنه يمهه اخيج مافارغ لسربتة النسوان البي كافي... تعاي ليه عينيني اكوم اريدن اطلع بره اشتم هوى احسن اختنكت
راحت نعمة كومت الحجية وطلعن وانه تمددت عله جربايتهه
شويه ودخلت تينة: ها ذهب شلون صارت رجلج
ذهب
كمت وحجيت: زينة مابيه شي ..تعاي اريدنج بسالفة
دخلت وكعدت يمي: كولي آمريني
ذهب: شمالج تبجين البارحة
تينة: هااا... انا ...شوكت
ذهب: البارحة بليل عديت من يم حجرتج وسمعتج تبجين
تينة: اووووف يذهب احسن گلبي مورم ومحد حاس بيه
ذهب: جا احجي خية شمالج
تينة: مليت يذهب مليت احسن روحي لا انه بالسما ولا انه بالكاع جا لشوكت اشوفن رجلي واتحسر عليه حالي حال الغريبة
ذهب: ترى سودنتيني جا غير رجلج شمالج تتحسرين عليه
تينة: انه اگولن رجلي بس هوه مايريدني مرة يذهب انجبر عليه
ذهب: شلون انجبر ياهو الجبره
تينة: انه من عايلة فقيرة كلهه فلح ومايعرفون شغلة غير الكاع والزرع وماعدهم املاك غير كيعانهم وحلالهم... وبيوم ابوي وعمامي تعاركوا
كيعانهم جانت سوه بس وره العركة ابوي راد ياخذ حصته ويطلع منهم
بس عمامي نكروا حصته ومانطو غير شي قليل كلش وابوي حگه اكثر
حاول وياهم ومافاد
وساعته دخل عد شيخ هاشم وسولفله سالفته والشيخ ادخل بالسالفة وحلاهه ورجع حلال ابوي اله وابوي من فرحته بذيج الساعة وهبني هدية البيت الشيخ
والشيخ عيب يرد الهدية
هالسالفة گبل سنتين جان عمري بيهه 16 سنة بس انه جبيرة ابوي وجنت فرحانة جيف راح ياخذوني شيوخ
اجيت البيت الشيخ بس الشيخ مارادني وماقبل يعقد عليه وجبر اخو ياخذني
وانه من اول يوم شفت حيدر اخذ گلبي وعشگته
بس جنت اشوفنه احسن مني بهواي
عبن هوه متعلم ومثغف وانه كلشي مافتهم اسمي ماعرف اكتبنه
خذاني وخلاني عده انام بس الغرفة بس انه ويا اخوان
هوه ينام ع الكرويته وانه ع الجرباية
جبرته امه وخاف من حجي العالم وخذاني
ومانعادت مرة ثانية
ورجعنه مثل اول وانه يوم عن يوم حبه يگلبي يزيد
حيدر يذهبه مو مثل زلم القرية
ماشفت زلمة مثله ابد
هادي وماله بطلايب وعازل روحه دوم
ودومه حاط راسة بالكتاب ويقره
حته من اريدن اسولف ويا ماعرف شسولف
احسن انه يمة كلشي ماكو
احسنه انظلم وياي يستاهل وحدة احسن مني
وهوه هم مايريدني
بس شسوي الگلبي الما يگدر يفارگه
مرات اضوجن واكعد ابجي واندب حظي وادعي ربي يحنن گلبه عليه
مثل امس من سمعتيني ابجي
بس من اشوفه طاب عليه كلشي بيه يروح و ارد واكولن دشته عليه تسوه الدنيا عدي
كافي كدام العالم اسمي مرت شيخ حيدر البنات السلف يتمنن اظفره
ذهب: اوووف الله يعينج يتينة شلون حاملة كل هالهم بگلبج
تينة: تعلمت يخية جا غير هوه بس شوفته ترد الروح بيه ماريدن شي كونه سالم ويمي
ذهب: سوالفج نستني وجع رجلي
تينة: هههههه عبن انه حجيتلج وجع گلبي... خل اگومن احسلي هسه الگه ام عباس گالبه البيت عليه
ذهب: وهاي الاخرى انتي شلون متحملتهه ليش مخليتهه تآمر عليج
تينة: عبنن رجلي مايحب الطلايب اتحمل الخاطرة ماريدن يومية مسويتلي هوسة
ذهب: روحي روحي مني انتي كاتلج العشگ
تينة: جا هم يجي يوم يذهبه واشوفنج كاتلج العشگ واضحك عليج
ذهب: ههههههه فال الله ولا فالج
طلعت مني وانه افكر بحجيهه
بس لا صدگ حالي يصير مثل حالهه
اوووووف هجم البيت العشك يشل الحال
صارت الساعة ب7 بليل
اجت نعمة جايبتلي العشة ودخلت وراهه خديجة
خديجة: ياا فلشهن شمسويات بيج يمة
باوستني وكعدت: فلك طرهن كون وجه الشووم
نعمة: جا خية بعد ام عباس ونزلت عليهه ضرة شتتوقعين منهه
خديجة: وشلون ضرة هيه فدوة لالله.. خايبة يذهبه كونن بيج خير وتعلكين شيخ هاشم بيج وتكسرين خشم ام عباس يماااااي يرادلهه بخت
ابتسمتلهه واحجي بگلبي
شعلگ منه واخوج يريد يردني لاهلي
بقينة كاعدين وتعشيت عله سوالف خديجة ونعمة والحجية لهناك وندك باب غرفة الحجية
وتنحنح الشيخ
لبست شيلتي بسرعة وصاحت نعمة: دش خوية دش مامش غريب
هاشم: يالله… السلام عليكم
الكل: وعليكم السلام
جنت كاعدة عله جرباية الحجية والحجية كاعدة يمي ونعمة وخديجة كاعدات بالكاع
جان لابس دشداشة بيضة وعكال
دنج باس راس الحجية وشماغه طخ بيه
اهيس روحي راحت وگلبي يخفگ بسرعة يريد يطلع من صدري وانه اشمن عطره
جا بالعباس غضب اسود مو زلمة
ام ناظم: الله يرضه عليك يبعد امك
هاشم: ام علاوي اليوم عدنه
خديجة: اي ولله خوية اجيت اشوف ذهبة عبن رجلهه سودة عليه متعورة
شمر شماغه ليوره واندار عليه: خير بوية شبيهه رجلج
بعدني ردت احجي ودخلت ام عباس: الله يساعدك شيخ
هاشم: هلا بام عباس… شبيهه رجلج يابة
ام عباس: يااا خطية طاح منهه الماعون وانكسر وداست ع الگزاز وانجرحت رجلهه…. هوه جرح زغير بس هي تدلل ماعليك بيهه
نعمة: جا الله لا يطي الماعون
هاشم: ماتشوفين شر بوية من رخصتكم
طلع وراحت تركض ورا ام عباس: وين شيخ جا ماتتعشة يابعد عيني
هاشم: رايح ابدل… نعمة حطيلي عشة
سكتت ام عباس وضلت بس تخوزر وعافتنه وراحت
خديجة: يا بعد عيني ياخوية دومك مبرد چبدي… خايبة تينة اميه بعد امج نشف ريجي من جذب الغاگة
اجت تينة تركض بيدهه الماي
شربت خديجة وحطت لگلاص بالكاع: وانتي يالمگرودة بعدج عله حالج
تينة: الحمدلله عله كل حال ام علي
خديجة: جا يمة فدوة اروحلج ماتگليلي بيش متنسية باخواني شمالهم عدوهم النسوان
ذهب: ههههههههههه
خديجة: من فدوة اروح لهالضحكة الحلوة
راحت خديجة وفرشتلنه نعمة ونزلت يمهه بالگاع
ذبت شيلتهه وتمددت يمي: شلون صارت رجلج
ذهب: اهيسهه تنگد بيه
نعمة: تصير زينة لا تخافين
ذهب: انتي مامعرسة
باوعتلي وعگدت حواجبهه: ليش… عدج رجل الي
ذهب: هههههههه… لا صدگ يعني اشوفنج حلوة وما ناقصج شي وكل من يتمناج
نعمة:اووووف اووووف خلي الطبگ مستور احسن
ذهب: يعني شني
نعمة: عوفج مني… وفتحي دماغج عدل تره ام عباس ماناويتلج عله خير ابد… كسبي گلب الشيخ يالمگرودة لا تخسرينه عبن اخوي ذهب صافي وكلهه تتمنا
ذهب: شلون اكسبه يعني
نعمة: جا اذا عدج هالحسن كله وتكولين شلون اكسبه غيرج شيكول… ولج شوفي المدهورة كريمة مرة شكبرهه وتفتر ورا وتلبيله وهوه كل فشله يفشلهه الهه ولا الثانية ولا تمل ولا تجل ولا تستحي
ذهب: ام عباس اسمهه كريمة
نعمة: لا ولسطر كون… جا صارلي ساعة اهذي مالگفتي بس اسم ام عباس
ذهب: هههههههه لا ولله بس اول مرة اسمع اسمهه
نعمة: خايبة باوعيلي… تگربي من الشيخ.. تره محد يفيدج وعلي.. واذا الشيخ تعلگ بيج معناتهه انتي ام البيت وام عباس تروح بالرجلين وماتگدر تفك حلگهه وياج عبن انتي بسد الشيخ… شوفيهه شكد تحوم علينه انه وامي وخديجة بس ماتگدر تسويلنه شي تخاف من الشيخ عبن يتخبل اذا واحد طخانه
ذهب: حجيج فر راسي
نعمة: هوه انه اريدن راسج يفتر بلكي مخج يشتغل
جانت الساعة ب12 بليل خذتنه السوالف وماحسينه بالوكت
كاعدين ونسمع دگ اباب البيت وصياح
كمزنه انه ونعمة وطلعنه من الغرفة
نعمة: يمة شني هاي ياهو هاذ
سند: ذهب طلعي… ولج ذهب… عرستي ونسيتي سند…. عبالج متحامية بالشيخ…… اليوم احرگ البيت عليج وعليه
يتبع… ..