مرحبا حبايب
شلونكم
طبعا هدية تفاعلكم الحلو اليوم بارت قصير لعيونكم
اذا شفت تفاعل ع هل البارت راح اعوضكم باجر ابارت طويييل يجنن
شوفوني تعليقاتكم الحلوة
ومساع بنوته علقتلي كالت خليلنه فراغات بين الفقرات حته نكدر نعلق
وسويت مثل ماطلبت
قراءة ممتعة
*******&
نعمة: اهده خوية مو هيج فدوة اروحلك
هاشم: جا ياهو العتب عليجن وگللجن تحطنهه بحجرتي
نعمة: جا غير مرتك يا خوية
هاشم: ياهو الصخمج وگلج مرتي امشي طلعيهه لا بالعباس ادخل اسحلنهه واذبنهه جدامج
ذهب
واگفة بمكاني واسمع صياحه رج البيت مايريدني يريدني اطلع من غرفته وهاي كسرة جديدة يذهب بعد هاي الدنيا شتشوفج
دخلت عليه نعمة تمتمت بالحجي مستحية
نعمة: ذهب.. اااا… امشي نامي جوه يمنه انه والحجية عبن ...
ذهب: لا تكملين سمعت كلشي
لبست ثوبي الطويل وذبيت شالي عله شعري وطلعت وره نعمة نزلنه واشوفنه واگف يم الدرج وداير وجهه رجال طول بعرض لابس دشداشة سودة جفيته عله جتفه وعگاله بيده منطينه ظهره ومدنگ يعاين بتلفونه
ضلت عيني عليه دخلت نعمة بغرفة الحجية وصاحتلي دخلت وراهه وانه براسي الف سؤال مگفاه مو مال شايب شعره اسود شلون ام عباس مرته وشلون ذني بناته شلووون
نعمة: خايبة ذهب
كمزت عله صوتهه وحجيت: هاا
نعمة: شمالج واكفة يم الباب ماتجين تنامين
ذهب: اي
رحت يمهه جانت فارشه بالكاع والحجية نايمة عله جربايتهه مطيتنه ضهرهه وتشخر
مديت روحي ع الفراش يم نعمة وهي نامت وغمضت
بقيت اتگلب بفراشي اريد واحد يفهمني وهاي نامت بسرعة
فتحتلي تك عين وحجت: جا شمالج تتگلبين جنج وحدة مزوهرة
درت عليهه وحجيت: اريد اسأل سؤال
نعمة: سألي
ذهب: الشيخ بعده زغير مبين شلون ام عباس مرته
گامت حطت ايدهه جوه راسهه وانتجت
نعمة: مبين سهرتنه طويله اليوم اذا رايده احجيلج قصة الشيخ
گمت كعدت كبالهه وتربعت وحجيت: اي فدوة ولله بعد وكت مو مال نوم هسه
نعمة: سمعي…..
*****
انا هاشم شيخ هاشم ابن شيخ عذاب اليحلف السلف كله براسه
ابوي جان رجال قوي حقاني ويخاف الله وجلمته مسموعة عد الزغير والجبير والكل يهابه
اتزوج امي الي تصير بت عمه واول مانرزق بناظم اخوي الجبير وبعد ناظم اجت خديجة وبعدهه نعمة
سماهه ابوي نعمة لان اجت وره خديجة وصارن عده ثنين بنات واهل گبل يرغبون الولد اكثر من البت مااعترض عله حكم رب العالمين وگال هاي نعمة ورزق
وبعدهه اجيت انه وبالاخير صار حيدر
ولأن ناظم الجبير واجن ورا ثنين بنات ابوي جان معتمد عليه بكلشي
من زغره زرع بي روح الشيخة وكعدات الزلم والمضيف والحكمة وشلون يتعامل ويه الناس
الفرق بيني وبين ناظم عشرين سنة
امي جانت مريضة وماتگدر تحبل هواي فالفرق بيني وبين اخواني بالعمر جبير ووره ماصار حيدر شالو رحمهه وماكدرت تحبل مرة ثانية
فتحت عيوني ع الدنيا وناظم جان جبير ومزوج وطول عمري اشوفنه ابوي الثاني
جان مايختلف عن ابوي بطبعه وحته شكله هوه اكثر واحد بينه يشبه ابوي
ربانه انه وحيدر وعلمنه العلمه اله ابوي
كبرت وصار عمري عشرين سنة وحيدر 15 سنه
ناظم صار عده اثنين بنيات وجان يتمنه وليد يشيل اسمه وفعلا حبلت مرته واجا الولد
وبيوم صارت عركة جبيرة بالسلف وراح بيهه ناس هواي وصار الدم للركب وناس تكتل بناس حته تاخذ ثار ولدهه وتدخلو ابوي وناظم حته يحقنون الدم بس للاسف جان الضحية ناظم
راح برمشة عين
يوم عمري ما انسا الصريخ بكل مكان امي خواتي مرته بناته گرابتنه ابوي المايهزه اكبر شي اول مرة اشوفه يبجي واشوف دموعة
بس وراهه نهض وگال ثار ابني اخذه بيدي
خذو اهل الكاتل عطوه وحاولو يقنعون ابوي بالفلوس كلوله اخذ فصلية اي شي تطلبه احنه حاظرين بس ابوي ماطلب غير راس كتال ناظم وفعلا وره اشهر من العركة تحقق مطلب ابوي واخذ ثار ناظم وانسدت السالفة بالسلف
بس للاسف بالبيت مانسدت وتفاجئت بيوم ابوي يطلب مني اعقد عله مرت اخوي مرت ناظم الطول الوكت اباوعلهه مثل امي جانت اكبر من خواتي حته
شلون اعرس عليهه شلون
بعد عرك وتهديدات وهوسة وتهديدة الي يتبره مني وافقت بس يكون زواج عله ورق عقد بس حته لا تعوف جهالهه وتروح وفعلا تم العقد وصارت مرتي
وهي عمرهه بذاك الوكت خمسة وتلاثين سنة وانه عشرين سنة
مرن خمس سنوات وانه ملتزم بعهدي ومايوم باوعتلهه عله انهه مرتي ابد مراعيهم مهتم بجهال اخوي اشوف طلباتهم بس ولا مرة دنت نفسي عليهه
بس شفتهه استطمعت وضلت تطلب اكثر ضلت تريدني رجال بالفراش هم ضلت تدخل عليه بغرفتي بليل ضلت تحاول تغريني حاولت تجرجرني بكل الطرق وما فاد وكل مرة تحصل اهانة وتنطرد
لحد مايوم دخلت عليه واتهمتني برجولتي ساعته فقدت وماضليت اشوف گدامي گمت عليهه نهيتهه وماخليت بيهه شي سالم كتلتهه كتل مال موت
ووراهه ادنيتلهه بكل وحشية بحيث انه كرهت روحي
بس ماجنت اشوف بعيونهه نظرة الم لو انكسار ابد بالعكس جانت فرحانة وماشايلتهه الگاع
ساعتهه عرفت انه طحت باللعبة وسويت الي هي تريده
وحظي خلاهه تحبل من اول مرة وربطتني الدنيا بيهه اكثر
وصارت عندي سارة
وهذاك يوم وهذا يوم وانه وام عباس اخوان
رجعت حاولت مرة ثانية توسلت ذلت نفسهه
زعلت وتعاركت
وكل الطرق ما فادت
مرت الايام والسنين وتوفه ابوي وما قبلوا عمامي يستلمون الشيخة من بعده
وتنازلوا عنهه الي
بذاك الوكت جان حيدر يكمل كلية ابغداد
وفعلا استلمت الشيخة وصرت شيخ هاشم
جانن امي وخواتي يتوسلن بيه ازوج
بس انه من ساعة الي شفت بيهه ام عباس كرهت الزواج وكرهت جنس النسوان
جانت مرة گوية مشاكل البيت كله منهه
ويومية مسويتلهه مصيبة
وطبعا امي وخواتي ما سلمن منهه
خاصة اختي نعمة تأذت منها هواي وجانت ام عباس السبب بخراب بيتهه
جنت مااريد ازوج واجيبن بت العالم وانه ادري كلش زين ام عباس ماراح تعوفهه بحالهه
ضليت بلا زواج هاي السنين كلهه وما لفتت نظري ولا وحدة
مرت الايام والسنين وكبرنه
حيدر خلص علام ورجع من بغداد بس ماله شغل بسوالف العشاير ومشاكل السلف
جنت ابحدي مستلم كلشي واحسن الشيخة كبرتني خمسين سنة فوك عمري
صار عمري خمسة وتلاثين سنة وام عباس دخلت بالخمسين
بس ولا يوم ملت وبطلت سوالفهه
دايما تركض وراي وتتلزك ولا جنهه مرة جبيرة وانه يوم عن يوم اكرهه اكثر
لو ما ولد اخوي ويربطني بيهه بنية جا طلكتهه من زمان
للأسف ذرية اخوي طلعت عليهه وماخذوا من اخوي شي
البنات شرانيات ووكحات ويومية مطيحاتنه بهبية
ومن وره سوالفهن حته قسمة ماجتهن
والولد ازيد وازيدين
كل السوالف لمكسرة عده
لا فاد بي رزايل ولا كتل ولا حبس ولا ابد
نركض ورا وماملحكين
لحد ما يوم جنت كاعد بالمضيف واجاني الكهوجي يركض
وگلي الخبر
عباس متعارك ومكتول ومذبوب بالبستان
ركضنه انه وزلامي ولحكو الكاتل بس دش ابيت وام البيت نكرت دخلته عدهم
وهمه متأكدين منه عدهه بس ماكدروا يدخلون عبن عرفوهه مرة وحيدة
رجعت سالفة الثار وعمامي رادو دم وماقتنعوا
بس انه ادري بالبير وغطا
وادري ابن اخوي مو ادمي ومن كل ولابد هوه الغلطان
ماقبلت بالدم وردت الم السالفة
بس فاجئوني عمامي بطلبهم لفصلية
جانوا يريدون يعقدولهه عله واحد من الفلح اليشتغلون بگيعانه حته يذلون اهلهه
بس انه رفضت وكتلهم انه اعقد عليهه
جنت ناوي بيني وبين روحي اعقد عليهه فترة بس اسكت عمامي
ونوب اطلگهه واردنهه لاهلهه حته ماتنظلم
وتم العقد وارتبطت مرة ثانية وهم مو بارادتي
جانن امي وخواتي فرحانات
عبالهن من كلت انه اخذنهه يعني وافقت ازوج
بيوم العقد ماردت ارد للبيت وبتت بالمضيف بس ثاني يوم امي سائلة علية وودتلي خبر بيد حيدر
شفتهه بعد ماترهم ولازم اردن للبيت
ورديت بليل واشوفن ضوه غرفتي مشتغل وصوت التلفزيون عالي
الباب جان مفتوح شويه
باوعت واشوف خيال وحدة كاعده ع الجرباية بالحايط
احس عقل ماضل براسي
هاي ياهو الجابهه هنا
ركضت ع الدرج وصحت عله نعمة وانه فوك
اجت تركض وسألتهه كالت احنه صعدناهه
تعاركت وياهه وكتلهه طلعيهه هسه
خليت نعمة تدخللهه ونزلت اتانيهن جوه ماريد اشوفنهه ابد
وكفت يم الدرج وانداريت من هيستهن نزلن سويت روحي العب بتلفوني
دخلن بغرفة امي وطبگن الباب وصعدت انه فوگ
دخلت للغرفة ذبيت دشداشتي
ودخلت للحمام سبحت
طلعت بطرگ الشورت انشف بشعري بالخاولي واشوفن ثوب طايح بالگاع
دنجت شلته جان ثوب لون ابيض وبي ورد ناعم وردي گصير وربع ردن
گربته مني شميت ريحته
ريحته طيبه كلش
استغفرت ربي وشمرته عله صفحة
ذبيت روحي ونمت بسرعة من التعب
*******
نعمة; ها يذهب جا ماتنامين اليوم
ذهب: مادري ولله بس قصته تحير شلون قبل ياخذ مرة بهالعمر وهوه بعد شاب
نعمة: جا تردينه يخالف امر ابوي
ذهب: وليش ما يخالفه
نعمة: ياااا… شلون يصير.. مايكدر عبن ابوي شيخ وجلمته تمشي ع الكل.. شلون العالم تهابه بعد اذا ابنه يعصي امره
ذهب: وليش ام عباس ما تنام يمه اذا مرته
نعمة: ههههههه…. خايبة شكد فطيرة انتي جا ليش هوه الشيخ مباوع بوجهه حته ينومهه حذاه
ذهب: ما يحبهه
نعمة: خايبة شيحب بيهه.. جا غير هوه گمر وهي طين
رفعت راسهه الحجية علينه وحجت: جا ليش ماتاكلن تبن وتنامن مو احسن
احنه سمعنه هيج وكلمن حطت راسهه ونامت وماحسنه بعد
گعدت الصبح عله كومة نعمة من يمي
ذهب: اصباح الخير
نعمة: هلا خية اصباح النور جا ليش كعدتي بعد وكت ردي نامي
ذهب: لا جا اريدن اكعد وياج
نعمة: ههههه فدوة الوجهج جا كومي غسلي خل نسوي ريوگ
كامت وكمت وراهه غسلت ودخلت للمطبخ لكيتهه واكفة ع الطباخ تطك بيض
نعمة: هلا بذهبه
ذهب: من تگليلي ذهبه اذكر امي عبن هي جانت تصيحلي ذهبه
نعمة: وين هي ميتة
ذهب: لا اسم الله عليهه عايشة ومالي غيرهه بهالدنيا
نعمة: الله يخليهه الج
اريد احجي وسمعت واحد يتنحنح وراي
التفتت واشوفنه وياريتني ماشفته
جا غير ردت يغمي عليه
هذا صدگ لو لعابه
جان لابس دشداشة سودة تلمع ولاف شماغ عله راسه
جان واكف اباب المطبخ وخازرني
انتبهت الروحي ولبست شيلتي بسرعة جنت حاطتهه عله جتفي
دخل ودنج من باب المطبخ يالله دخل راسه يطخ بالباب
دخل يعدل بشماغة وحجه: اصباح الخير
نعمة: هلا يبعد اختك اصباح العافية
اخذله زيتونه من الطاولة كلاهه والتفت عله نعمة
ما باوعلي ابد ولا التفت جني كرسي بالمطبخ
هاشم: تعاي نعمة رايدج شوية
طلع وطلعت نعمة ورا
ضليت اباوعلهم من الشباج يحجي ويأشر بيده حمقان
رفع ايده واجت عيني عله ساعته والمحبس
لا جذب… مو هوه
نفس الساعة ونفس المحبس
نفسهن اللابسهن الزلمة الشفته بالبستان
هوه اي هوه
*******
هاشم
نزلت الصبح وصلت للمطبخ واشوفن نعمة واكفة ع الطباخ ويمهه بت مطيتني ظهرهه
كصيبتهه شگره داگه لزرورها
تحجي وتضحك ويه نعمة
اتنحنحت اريدنهن ينتبهن التفتت باوعتلي وضلت صافنة
احسن شكلهه مو غريب شايفهه گبل بس وين ماجاي اذكر
وخرت عيني منهه وهي انتبهت ولبست شيلتهه
ماعجبتني وكفتهه هيج مفرعة وماخذة راحتهه
مهما يكون احنه بيت غربة عنهه ويمكن حيدر ينزل بأي وكت ويشوفهه
صحت النعمة بره وكتلهه تحذرهه وتخلي شيلتهه دايما عله راسهه ماتنزعهه
عفتهن وطلعت وانه متأكد شايفهه بس وين مادري
يتبع…… .
*********