الفصل التاسع من اسيره بموافقه ابي الجزء الثاني
____________________
في شقه معتز و مازال الصراع بين معتز و محمد شغال الي اول مره في حياه محمد يكلم والده بالطريقه ديه
و يوصل لدرجه الغضب ديه
معتز بغضب :ياريت تحترم نفسك و تراعي انك بتتكلم عن بنت عمك
محمد بسخريه : اه بنت عمي ولا اقولك
قول مراتي احسن والنبي علشان انا تعبت انا مش عارف انت عملت كده ازاي والله العظيم مش عارف و لغايت دلوقتي مش مستوعب حاسس اني في حلم
لا حلم ايه ده كابوس و لازم افوق ...منه ... ازاي
خدعتني... ازاي عايزني اتجوز و انت مجوزني انت مش فاهم عملت ايه وله مش فاهم حاجه اصلا مش مستوعب حجم المصيبه وله لاا ؟؟! أنا ازاي اكون متجوز لمده ٧ سنين عارف يعني ايه سبع سنين و انا نايم بقاا و خادعني و مدام انت عملت كده علشان عمي ميزعلش و يكون معاها قسيمه طلاق و جواز حسب ما فهمت علشان تعرف تكمل حياتها سايبها كل المده ليه و ليه معرفش كل ده ... عايز افهم
معتز : عمك كان خايف تسافر برا البلد و هي متهوره اصلاا و تعيش برا حسب تهديدها له عمك كان مريض القلب و تعبان و طول عمره ضعيف ميقدرش عليهااا و هي جت فتره في حياتها بقت اسوء من قبل كده فكان انها تكون متجوزه منك فده يمنعها من السفر الا بموافقتك
محمد بسخريه : اه موافقتي انت هتقولي و هي كانت موافقه علي ام الجوازه ديه و كانت عارفه
معتز : ايوه عمك اقنعها
محمد : اه معرفش يقنعها الا بديه سبحان الله و هي اتنيلت سافرت برا ازاي
معتز : كان عمك معاها و فعلا عملنالها تصريح السفر
بالتوكيل بتاعك اللي لغايت دلوقتي معايا
محمد بسخريه: اه يحرق التوكيل و يحرق صاحبه في يوم واحد علشان ارتاح ساعتها و احنا هنخلص من المهزله ديه امته بقاا انت عارف ان موده لو عرفت كده هتبقي خربت حياتي كلها و بنت اخوك مش هتسكت كفايا انها عماله تستفز فيها ٢٤ ساعه و انا مكنتش فاهم مالها ديه مجنونه بتعمل كده ليه ازاي تلبس قدامي كده و بحاول ابرر لاسبااب تانيه خالص غير منطقيه طلعت انا اللي مغفل بصراحه
معتز : عمك مات و هي ملهاش حد غيرنا جوازك منها ديه الحاجه الوحيده اللي تضمن انها تكون معانا في نفس البيت و ديه وصيه عمك
محمد : لا لحد هنا و كفايا اعمل حسابك انها هتطلق في اقرب فرصه هلاقيها حتي لو بكرا
معتز بغضب : يعني انت مش عامل حساب لحد
مين هيقول لموده اصلا و محدش قالك اتجوزها كانها لسه بنت عمك سيب جوازك منها و خلاص علي الاقل اضمن بنت اخويا انها هتفضل جنبي ديه وصيته
محمد بغضب : لا اساسا واحده ملهاش امان انها تشيل اسمي و انت عارف كده كويس و لو حتي بالاسم فقط
مشيلهاش اسمي ثانيا موده عندي بالدنيا و استحاله
اخدعها اكتر من كده ثالثا انا هطلقها يعني هطلقها بحق كل كلمه حرقت بيها دم موده و موده هتعرف كل حاجه عاجلا ام اجلا كل حاجه بتتعرف مفيش حاجه بتستخبي
معتز بغضب :يعني ايه حتي مش عايز تنفذ وصيه عمك اللي مات الي كان بيحبك كانك ابنه علشان موده هانم متضايقش هي موده كل حياتك و انا مليش راي او خاطر عندك و لا عامل حساب لوصيه عمك للدرجه دي احنا مش مهمين عندك كل مشكلتك ان موده هانم متعرفش متعرف هتعمل ايه يعني مش فاهم
محمد :وصيه عمي علي عيني و علي راسي اني اخلي بنته وسطيناا و معانا معززه مكرمه تاخذ كامل ميراثها تشتغل في الشركه و تديرها معاانا كمان لكن وصيه عمي مش هتتنفذ علي خراب حياتي مفيش و لا دين و لا شرع يقول كده انت بتخرب بيتي و كفايا اووي الخداع اللي كنت فيه طول السنين اللي فاتت و بنت اخوك مش مكسوره دي بتتكلم بكل عين قويه و بجحه قدامي حتي مش فارق معاها حاجه و مش ديه اللي تشيل اسمي حتي لو بنت عمي و انت عارف زمان تاريخها الاسود و احب اجبهولك كله في دقيقه بس بلاش نتكلم في الماضي
انت علي عيني و علي راسي يا بابا انت و وصيه عمي لكن مش هخرب بيتي بسبب واحده متستاهلش و لما تفضل علي زمتي و يجيلها عريس نقوله استني و النبي علشان اطلقها و اجوزهالك
الغلط اللي عملته زمان يا بابا انا مش هكرره دلوقتي ... انا اسف علي كلامي معاك بالاسلوب ده بس انا مش هضيع موده مني مهما كانت الأسباب و جوازي باطل لو شرعا بقا لاني موافقتش و متشهرش و تحمد ربنا لغايت كده و لما تكون مراتي
مش ديه الحاجه الوحيده اللي تخليها تفضل في البيت تفضل معاك هنا في الشقه هي بنت اخوك و برضه بنت عمي و استحاله تاخد اي صفه تانيه و موده ديه اختيارك انت و خدعناها من الاول خالص و انا مخدوع زيها
دخلت ياسمين بعد ما خبطت و اذن لها
معتز بالدخول و كانت تحمل ابنتها نرمين
ياسمين : ايه يا جماعه صوتكم عالي في ايه
معتز : و لا حاجه بنتكلم في مشكله في الشغل
ياسمين:مممممم طيب العشاء جاهز يا جماعه ياله يا بابا ... ياله يا محمد
محمد:لا مش جعان انا طالع انام علشان الشغل
ياسمين : طيب
قام محمد و شال نرمين منهاا و قبلها من جبينها
محمد: ايه قمورتي عامله ايه
ياسمين بمزاح: بنصوت ٢٤ ساعه الحمدلله
محمد قبلها مره اخري : ياله بقاا خليها تطلع
اللي كنتي بتعمليه فياا و انتي صغيره
ياسمين: طلع قد حقك ١٠ مرات والله هههههههه
معتز:نوران جت؟!
ياسمين: اه يا بابا و دخلت اوضتها اول ما جت
محمد :طيب تصبحوا علي خير
ردوا عليه : و انت من اهله
محمد خرج بسرعه علشان يطلع لشقته قبل ما يشوف
نوران لانه مبقاش اصلا مستحمل يشوفها ... و طلع شقته و دخل الاوضه لقي موده قاعده علي السرير
بتشرب نسكافيه كالعاده و فاتحه اللاب غير محمد ملابسه ثم دخل بجانبها علي السرير و بص معاها شافها بتعمل ايه
محمد:لسه حوار الجروب ده تاني
موده:علي فكره انا مش فاهمه ليه مش عاجبك علي فكره بنتناقش في حاجات مهمه جدا جداا و معانا ناس من اماكن كتيره جدااا
محمد بتساؤل و فضول : و ايه المناقشه وله المشكله بتاعت النهارده
موده : بص يا سيدي النهارده طلبت مننا ادمن الجروب ان كل واحد يكتب مشكله طلاق حصلت ليه و له حصلت لحد يعرفه علي الصراحه و يقول اطلقوا السبب ليه كان من مين الزوجه وله الزوج و كان ايه و كده
محمد بصلها باستغراب شويه
محمد : و انتي كتبتي ايه
موده بلامبالاه : مكتبتش
ثم اكملت مازحه :ما انا و لا اطلقت و لا اعرف حد قريب ليا اطلق بس تعرف انا استنتجت حاجه مهمه جدا جداا
محمد : ايه
موده: قريت تقريبا اكتر من نصف الكومنتات يعني باسباب مختلفه جدا جدا جدا عن بعضها
بس لقيت ان الموضوع عند كل اسره يتخلص
في الثقه ما بين الطرفين تكاد معدومه و كمان الصراحه مش موجوده نهائيا و دايما بتلاقي حد مخبي حاجه عن حد و هكذا او حد مش بيثق في الثاني
محمد في اللحظه ديه كان عايز يقولها كل حاجه بس هيقول ايه اذا كان هو نفسه لسه عارف و افكاره مش مترتبه و كمان هو مش ضامن رده فعلهاا و مش عارف
خايف يخسرها بس هو اكيد هيقولها بس علي الاقل يكون عارف هيجبهالها ازاي و كمان هو مكنش حمل انه يتخانق او يشرح حاجه بعد وقت كبير من الكلام مع ابوه محمد قام و راحلها لناحيه التانيه و هي كل ده مش ... مركزه انه قام اصلا و عماله تقرا محمد اخذ الكوبايه من ايديها
موده باستغراب: في ايه
محمد :هشششششش كفايا رغي بقا
و امسك اللاب منهاا و اغلقه و وضعه علي التسريحه و رجع لمكانه و خدها في حضنه علشان ينام
موده بغيظ :يا بني ملحقتش اكمل قرايه
محمد نظر في عينها : لا كفايا لحد كده انا عايزك دلوقتي تكوني في حضني لاني محتاجك مناقشتك مش اهم مني
مفهمتش موده حاجه بس حست انه رجع مهموم اكتر من كلامه مع والده حاولت تبرر انه يمكن يكون عندهم مشكله في الشغل خناقاه و هي عارفه مدي تعلق محمد بشغله حاولت تكدب كل حاجه حست بيها و دفنت راسها في صدره و محمد دثرهما بالغطاء
و كان حاضنهاا بتملك غير طبيعي كانه خايف تروح منه
كانت موده مستغربه اول مره يحضنها بالشكل ده ايوه بيحضنها بس مش بالطريقه ديه مش سايب ليها مجال للحركه حاضنها بتملك غير طبيعي ... حاولت تقول انه عادي و بالفعل بعد فتره غطت في النوم و لكن محمد مكنش عارف ينام كل ما يغفل يقوم تاني يبص عليها يلاقيها في حضنه بيتطمن لغايت الصبح
________________________________
في العين السخنه كان سليم نايم و فاطمه كمان نايمه و طبعا سليم علي عهده انه حاول كتير فمفكرش يحاول معاها مره تانيه امبارح لاسباب كتير منها خوفه من انه يحصل زي اللي حصل قبل كده و ميكنش في حاجه اتغيرت و السبب الثاني ان شكلها كان مجهد من السفر سليم قام علي صوت تليفونه فاخذ هاتفه علشان يتكلم براا علشان متفوقش
سليم بنعسان: الو
ابراهيم : صباح الخير
سليم : صباح النور يا عمو عاملين ايه
ابراهيم : الحمدلله انتم عاملين ايه
سليم : كويسين الحمدلله بابا عامل ايه يا عمي و قولي بكل صراحه انا كل شويه بكلمه يقولي انه كويس و خلاص بس انا حاسس انه مش كويس
ابراهيم : متقلقش يا سليم كلنا معاه و هو كويس انت عارف بس الاجهاد اللي هو فيه يعني كل يوم الضغط و السكر بينزلوا و الحمدلله ان شاء الله هيبقي احسن
سليم: باذن الله عمي معلش انا عايز اسال سؤال
ابراهيم :اتفضل يا ابني
سليم : هو صديق ده ايه منين كان مستجعل علي الشغل و سافرت علطول بعد العيد علي اساس اني يوم و راجع و انا جهزت كل حاجه في التصاميم و ظبطتها علي اللاب و قعادي هنا ملوش لزمه انا بفكر نرجع النهارده بليل وله حاجه لان قعادنا ملوش لزمه لانه كل يوم يكلمني في التليفون و يخترع حاجه جديده و الموضوع سهل يعني لو اديت حد مثلا سي دي او فلاشه هيتحل
ابراهيم مسرعا : لا ترجع ايه يا سليم الراجل يزعل مننا افرض مثلا في حاجه عايز يغيرها وله حاجه في اللي انت عامله متقصرش رقبتي مع الراجل انت عارف انه خادمنا كتير مش لما يطلب حاجه زي ديه بسيطه نخذله علشان بنته كانت بتولد يعني و مريضه شويه
"" فعلا كانت بنته بتولد و حصل ظرف طارق من غير حاجه يخترعها و بنته كانت تعبانه فعلا كان الظروف ساعدت ابراهيم من غير ما الراجل يكذب فانهم يتعطلوا هناك ""
سليم : ربنا يقومها بالسلامه مقلتش حاجه بس يعني انا قصدي ان كنت أفضل في القاهرة جنب بابا احسن و كمان يعني لو معجبوش حاجه ممكن نبعتله عن طريق الايميل
ابراهيم بملل و ضيق ان يفشل محططه : متقلقش علي يوسف كويس و كلنا معاه و مش سايبينه ابداا و بعدين انت لازم تفضلوا اربعه و عشرين ساعه قاعدين يعني اخرج شويه و اهي مراتك معاك يا عم فسحها علشان انت عارف انها كانت مضغوطه بسبب الدراسه
اما انت غريب يا سليم ده اخوك احمد لو بعته فين و قلتله خد هبه و النبي ليقفل تليفونه و مش هيعرفنا تاني و هينسي الشغل و هينساني ... فكها يا بني ده انت يعتبر بتغير جو انت و مراتك
فضحك سليم : حاضر هحاول افكهاا
ابراهيم : طيب سلملي علي فطوم بقاا هي نايمه ؟!
سليم: اه نايمه
ابراهيم: ماشي لما تصحي بقا هخليها تكلم سمر علشان من امبارح تليفونها مقفول
سليم : اه صح قالتله اشحنه و انا نسيت معلش هحطلها في الشاحن حالا
إبراهيم: ماشي يا حبيبي ياله اسيبك بقاا و انا هبقي اكلم الحاج صديق اشوفه وصل لايه و هيقدر يجي وله ايه و انتم اشغلوا وقتكم
سليم : حاضر مع السلامه
ابراهيم : مع السلامه
________________________
دخل سليم الغرفه و اخذ ملابسه و دخل الحمام علشان ياخذ دش كانت فاطمه صاحيه من اول ما فاق هو
بس كانت قاعده بتفكر هيمشوا النهارده وله لا و لو مشيوا هتبقي جت علي الفاضي و معملتش اي حاجه من اللي كانت بتفكر فيه و لو قعدوا هل هتعرف تتصرف فضلت تانب في نفسها لاسباب كتيره جداا ان الموضوع ده كان المفروض يخلص من بدري جداا و هي عارفه انه قالها انه مش هيحاول يقرب منها تاني
لازم هي اللي تاخذ خطوه اتعصبت جدا فقامت من النوم و بصت في المرايه
لقتها عامله شعرها ديل حصان و لابسه بيجامه
تيشرت عليها رسمه كرتونيه و بنطلون واسع كاروهات
فاطمه في نفسها : اه ما انتي لابسه دورا ده لو كان جايب جيرمين كانت هتلبس احسن من كده جايب بنت اخته ... فين تليفوني
دورت عليه لاقته في شنطتها و مقفول و هي نسيت الشاحن دورت في شنطه سليم و خدت الشاحن و حطت التلفون في الشاحن اول ما فتحت الفون لقت اتصالات كتيره من والدتها
فاتصلت بيها
فاطمه : السلام عليكم
سمر : و عليكم السلام يا فطوم عامله ايه
فاطمه : الحمدلله يا ماما و انتي
سمر:كويسه
اكملت بغضب : و انتي يا مهزقه متصلتيش بيا ليه من ساعت ما وصلتي اتصلت الساعه ٩ بليل علي سليم اخر ما زهقت قالي انك نمتي و نايمه بدري بالطريقه ديه ليه
فاطمه بحرج فهي فاهمه جيدا ما ترمي اليها والدتها: مفيش يا ماما كنت تعبانه من السفر
سمر :هو انتي كنتي مسافره الصين بتوكتوك وله ايه ده انتي رايحه العين السخنه يعني اقرب مكان
فاطمه:معرفش بقا انا كنت تعبانه
سمر:طيب انتم راجعين امته
فاطمه بلامبالاه :معرفش اساسا سليم بياخد دوش و كنت نايمه و امبارح قالي انه لسه مقابلش الراجل
سمر: طيب خلي بالكم من نفسكم و ياريت اللي اتفقنا عليه تعمليه ياله مع السلامه
فاطمه: مع السلامه يا ماما
و اغلقت الهاتف و تنهدت بملل و ضيق
فتحت شطنتها و طلعت منها المصليه و الاسدال بتاعها علشان تصلي الصبح و تستعد ان سليم يخلص و هي تتدخل علشان تتوضي فخرج سليم
سليم بابتسامه :صباح الخير
فاطمه ابتسمت :صباح النور
قبلها سليم من جبينها
سليم مازحا و كان يمشط شعره :كل النوم ده انتي كنتي هتخمري
فاطمه بحرج: معلش بقا اعمل ايه انا اصلا مبحبش السفر و السوبر جيت بيكون بطي و حاجه مقرفه
سليم مازحا: عادي و لا يهمك خمري براحتك مش اول مره يا روحي النوم هيشبه عندك التقديس والله
فاطمه بغيظ : ممممم ماشي انا جايه علشان انام هنا اصلا عندك مانع
سليم رفع حاجبه بطريقه مضحكه:طب ما تنامي هناك دبيتي المشوار علشان تنامي هنا ... بصي انتي دحيحه بس منطق مفيش ربنا مبيديش كل حاجه الحمدلله
فاطمه اتغاظت منه و احمر وجهها من الغضب : ماشي يا سليم براحتك والله انا غلطانه اني جايه علشان متكنش لوحدك و اونسك ... ديه اخرتهاا ماشي احنا هنمشي امته بقاا
سليم مازحا: لما ربنا يريد هنمشي .. لسه معرفش الراجل بنته ولدت و تعبانه و هو سافر ليهاا و ابوكي مش عايزنا نرجع غير لما اخلص الشغل اللي ورايا
ايه رايك نخرج فرفش يا ببلاوي
فاطمه بفرحه:بجد انا عايزه اخرج ياله نخرج دلوقتي
سليم :طب ناكل الأول يا حجه الساعه لسه ٨ الصبح هنخرج فين
فاطمه :تعالي نتمشي علي البحر نعمل اي حاجه انا عايزه اتفسح بقا بما ان كده كده معندكش شغل و فاضي مش انت فاضي
سليم مازحا:انا فاضي علي طول🙂🤗
فاطمه :تمام انا هصلي و البس و ننزل و انت كمان أجهز
و خدت الفوطه و دخلت الحمام
سليم :و اخرتها معاكي ايه يا بنت عم ابراهيم
________________________________________
عند موده كانت قاعده لوحدها لما محمد راح الشغل بس ده مش محمد اللي هي عرفاه هي متاكده ان في حاجه و ياسمين مشيت و راحت تشتري حاجات و سابت نرمين مع موده و هي رحبت بده جدا هي اصلا بتموت في حاجه اسمها اطفال و فضلت تهتم بيها و تاكلها لغايت ما نامت
و اتصلت بياسمين
موده : ايه يا ياسمين وصلتي لايه
ياسمين:جبت حاجات للبيت انا مش عارفه اللي اسمها نوران ديه بتجيب ايه و مبتجبش ايه البيت يعتبر فاضي و كمان برضو مهما كان البواب بيجيب حاجات مش زي لما حد يجيب الحاجه بنفسه و كمان جبت حاجات من الصيدليه لنرمين عايزه حاجه اجبهالك
موده بتفكير: لا مش عايزه حاجه انتي خلاص هتيجي وله ايه
ياسمين :هو انا خلصت الحاجات من السوبر ماركت و اهو بحطهم في العربيه بس هروح لشقتي انا ملحقتش ساعتها اجيب هدومي كلها و في حاجات بتاعت نرمين و القطه بتاعتي نسيتها و مازن كل ما ابعتله رساله و اقوله يوديها لبابا في الشغل البيه مش معبرني كده كده النهارده عندهم اجتماع مهم في الشركه و مش هيخلص قبل الساعه ٣ و الساعه لسه ١٠ يعني اكيد مش هيكون هناك هاخذ الحاجه اجي علطول
موده:تمام
ياسمين: ايه نيمو نامت
موده بابتسامه: اه نايمه في حضني الهانم استحلت الموضوع
ياسمين:ههههههههه ديه بتنام و ترتاح معاكي اكتر مني تمام معلش تعبتك و سبتها بس مكنش هعرف اعمل كل ده و هي معايا خصوصا انها تعبانه
موده:لا ابدا انا لما بصدق تقعد معايا خلصي مشاوريك و تعالي
ياسمين : حاضر ياله سلام
موده:مع السلامه خلي بالك من نفسك
و اغلقت الخط و ركبت العربيه و ابتدت تسوق و تمشي في طريقها ..... شغلت أغنيه اليسا
خد بالك عليا دي مش معامله تعاملني بيها
وابقا افتكر ليا ايام تعبت عشانك فيها ..
ياريتك بس تفهمني وماتستهونش بوحدة
تبقى مجروحة ومابتبينش دي الوحدة
قد متضحي وتستحمل
اول ما بتفكر تنسى ما بتستأزنش
كان في حاجات نقصاك وانا كملتها
وحاجات كتير مش حلوة فيك جملتها
انا فرصة لو ضيعتها هـ تزعل عليها
ياريتك بس تفهمني وماتستهونش بوحدة
تبقى مجروحة ومابتبينش دي الوحدة
قد متضحي وتستحمل
اول ما بتفكر تنسى ما بتستأزنش
مين غيري عايشة تخاف عليك طول عمرها
مين غيري هتسيب روحها ليك لو سبتها
مين غيري لوتحتاج لها واما تلاقيها
وصلت للبيت ...
________________________________________
في الشركه عند عمرو و قاعد مخنووق
و جت سلمي و دخلت بعد لما قالتله السكرتيره
سلمي : صباح الخير
عمرو بضيق :صباح الخير
سلمي : ايه مش هتقولي اقعد وله ايه
عمرو :لا ازاي اقعدي طبعااا
سلمي قعدت و مكنتش عارفه تبدا منين
سلمي:عمرو مش بترد علي تيلفوناتي ليه
عمرو :سيبتك براحتك تفكري
سلمي:راحتي قالتلي اكلمك انت عارف كويس ان اللي حصل مكنتش اقصد انك تزعل مني بالطريقه ديه مكنتش اعرف ان تأخير الفرح هيعمل المشكله ديه ما بينا انا اسفه لو ضايقتك عرفت ان مليش قيمه من غير حبك مفيش حاجه ليها طعم من غيرك مكنش قصدي ان اضايقك او تفكر عكس كده
عمرو بغضب :يعني انتي يا سلمي عايزه لما تكلميني ابقي اكلمك علشان حضرتك متزعليش و لما متكلمنيش احترم سكوتك و الهدنه اللي تحصل انتي عايزه كل حاجه انتي عيزاها تحصل و بس مش مهم انا عندك خالص
سلمي:عمرو بابا الي قالي ان ناخذ وقت نفكر احنا الاتنين احنا عايزين ايه مش انا
عمرو : متكدبيش علي نفسك يا سلمي انت لو بتحبيني مكنتيش هتحتاجي وقت تفكري مش هتحتاجي وقت تعرفي انتي عيزاني وله لا انتي متعرفيش انتي عملتي فيا ايه انتي قولتي انك مش واثقه فيا او انك مش متاكده من حبك بطريقه غير مباشره انا حبيتك حب محدش بيحبه لوحده قدرتك كتير عصبيتي مش بسبب الفرح ينحرق الفرح علي كل حاجه انك تفكري تكملي معايا وله لا ديه صعبه صعبه اووي انتي فهمتيني حاجات مكنتش فاهمها لو كنتي فعلا بتحبيني مكنتيش هتفكري في حاجه زي ديه لان بدون تفكير كان قلبك قال لا انا اللي بقولك دلوقتي انتي مبتحبنيش
اتصدمت سلمي برده عليها جداا مكنتش هتوقع انه هيتعصب عليها بالطريقه ديه و انه شايل الفتره اللي فاتت كل ده في قلبه
سلمي: لا تفكيرك كده غلط انا بحبك يا عمرو و لو بحبك مكنتش هجيلك هنا لو ايه اللي حصل و شكرا علي معاملتك ديه و انا كنت الفتره اللي فاتت مكنتش عارفه اقابلك بخصوص تعب بابا و هبه و احمد عنده فقولت انزل ساعه و اجي علطول و عارف اني مكنتش بروح الشغل علشان بابا و كله عشانك و في الاخر تقولي اني مبحبكش
عمرو: للاسف ديه الحقيقه الوحيده اللي قدرت اوصلها طول الفتره اللي فاتت مبنامش انا بحبك بقالي اكتر من ٨ سنين انا و انتي عندنا حوالي ٢٩ سنه و احنا بناجل لاسباب غير منطقيه الفتره اللي فاتت عرفت حاجه واحده بس انك لو كنتي بتحبيني مكناش وصلنا للنقطه ديه
سلمي : انا كنت جايه علشان اصلح الي ما بينا بس واضح ان التفاهم بينا رايح و انت كنت بتتجاهلني و مبتردش علي التيلفون فقلت اجي بس شكراا
و انت عمال تتهمني و تقريبا مبقاش في حاجه نتكلم فيها انا اسفه اني جيت
و خرجت سلمي و عيونها دمعت و ركبت تاكسي و منتظرتش انه يقولها استني مستنيتش اي حاجه فضلت طول الطريق بتعيط كلامه ضايقها جداا كلامها بطريقه وحشه اول مره يكلمها كده
_______________________________________
في شقه مازن و ياسمين
ياسمين دخلت و حضنت قطتها اللي هي معاها من قبل ما تتجوز و دخلت اوضتها و فضلت تفتكر كل لحظه عاشتها هناا بحلوها و مرها و فتحت شنطه علشان تحط فيها حاجات كانت نسياها من لبسهاا و لبس بنتهاا
و حطت قطتهاا في القفص و قلعت الجاكت علشان الجو حر و دخلت المطبخ علشان تشوف الشيكولاته بتاعتها في التلاجه
ياسمين:والله مش هسيبها ليك يا مازن هاا ديه كانت جايه من برا
و خدتهاا و بصت لقت معلبات خلصانه و علب بيتزا
ياسمين: المطبخ بقا عامل كده ليه هيشلني ايه ده
و انا مالي انا هخش اكمل الحاجات اللي هاخذها علي الاقل الحق امشي لسه الساعه ١١ و نصف لسه بدري الحمدلله مش هشوفه او بكدب مش عارفه
دخلت و كانت بتاخذ اخر حاجات في الوقت ده دخل مازن و و قلع جاكت بدلته و الجزمه و قفل الباب بس ياسمين مسمعتش حاجه هو دخل و لقي التكيف شغال بتاع الريسبشن
استغرب اصلاا معقول هو ناسيه من الصبح استغرب و فك زراير قميصه و كان داخل
علشان ياخذ دش و ينام و حمد ربنا ان الاجتماع اتلغي و رجعوا بدري بس لقي القطه محطوطه في القفص و مقفول عليها اتأكد ان ياسمين هنا فدخل الاوضه و شافها واقفه قدام الدولاب و فتحاه و عماله تاخذ حاجاتها
________