#انت_موتي
#للكاتبه Hiba Abbass
الجزء التاسع
سمعت كلام مها و حسام
_ شكلك الليله زهجان شديد
_ انا ما كنتا عاوز اتكلم و لا اعمل مشاكل و للان ما عاوز اي مشاكل تحصل بس اقنعي اختك
_ اقنعها بشنو ؟ في شنو . اتشاكلتا انت و مياده ؟
_ حنين بت خالتو منى
قاطعته مها : هي نفسها حنين ديك صح ؟
_ اي
_ انا كنتا حاسه و بديت اشك . بس كيف يا حسام البت دي بريئه و محترمه لابعد حد
_ ما دي نفس البراءه الاتغشيت بيها
_ في ناس بوشين للدرجه دي ؟ و بت في عمرها
_ المهم خلي مياده تبعد عنها انا ما عاوز اي مشاكل و اذا شوفتا اختي معاها تاني بالجد بتحصل المشاكل
_ لا يا حسام خالتو منى طيبانه و ما تستاهل و محمد اخوها كمان زول محترم
_ ما ده هو المسكتني بس بت زي دي ممكن تلف راس مياده و الاصحاب بسهوله ممكن يأثرو على بعض
_ طيب بتفاهم انا مع مياده براحه
مياده فتحت الباب بعصبية
مياده : يعني بعد ما سبتها عشان وحده تانيه و رميتها عاوز تطلع فيها كلام و تبقيها كعبه بتبرر لنفسك كده ؟
حسام : بتقولي في شنو انتي ؟
مها : مياده ما تدخلي في الموضوع ده انتي
مياده : اول حاجه انا ما شافعه و لا صغيره و خليه يفهم انه لو جد بخاف على اخواتو خليه يتقي ربو في بنات الناس
حسام عصب و وقف : ميااااده
مياده : ما كفاك بعد ما لقيت غيرها و خليتها انت و الخنتها انت كمان بتألف و مبقيها بت كعبه ؟ . ياخي زي ما هي اتخدعت فيك امكن انا برضو اتخدع في واحد و يطلع فيني كلام ما فيني
حسام : ما شاء الله صحبتك حاكيه ليكي و مونساكي و ماليه راسك و شكلها مسممه افكارك ما بستبعد منها اي شي
مياده : ما حكت لي غير الحقيقة و غير العملته . سبتها عشان موده و لا لا ؟
حسام : طيب هي ما قالت ليكي عملت شنو ليه ؟ و ما قالت ليكي الوصلني لكده شنو ؟
مياده : مافي مبرر ببرر الخيانه
حسام بعصبيه : خيانه ؟! هي اخر وحده تتكلم عن الخيانه
مياده : جد و الله انا ما قادره اصدق انك حسام اخوي انت اتغيرتا شديد بقيت عينك قويه و صلاتك احسن تخليها لانه دي ما عمايل زول بخاف ربنا
مها : مياده قفلي
حسام عاين لمها و قال : انا لو قعدتا اكتر من كده البحصل ما حايعجب زول و لا حايعجبني انا زاتي وعي اختك و فهميها هي مصاحبه منو
و طلع و ساب ليهم الغرفه و نزل تحت و دور عربيتو و طلع
مها جرت مياده و قعدتها في الكنبه و بعصبيه : جنيتي انتي ؟ في وحده بتتكلم مع اخوها الكبير كده ؟
_ الواحد هو البفرض احترامه و بخلي الناس يحترموه
_ مياده ما تعصبيني ياخي كفايه الهو فيه ما تزيديها عليه
_ فيه شنو انتي كمان مصدقه البقولو ؟
_ يعني بتصدقيها هي و تكذبي اخوكي ؟
_ طيب مش حنين كذابه ؟ اتصلي حسي على مازن صاحب حسام و قولي ليه حصل شنو قبل 7 شهور في عيد ميلاد وحده من صحباتهم
_ عزه عارفه
_ و كمان عارفه ؟ انتو جنيتو ؟ و بعد ده مغلطاها ؟!
_ بتتكلمي عن انو حسام جاب موده صحبتو معاه و قال انهم ارتبطو ؟
_ و ده عادي يعني و فلاحه ؟
_ مياده روقي انتي ما فاهمه شي
_ فهميني طيب
_ حسام حبا حنين دي شديد و الله يا مياده و البت الوحيده العشانها قطع علاقتو باغلب البنات العرفهم و اخلص ليها و كان جادي معاها
مياده باستهزاء و هي معصبه : اي واضح
_ روقي يا بني ادمه عشان اقدر افهمك
_ اها
_ بس هي الخانتو و مع منو مع وائل ود خالي
_ نعم !!!
_ ايوا زي ما سامعه
_ كيف
_ حسام مره كان طلع معاها و لاقو وائل بالصدفه و سلم عليهم و عرفو على حنين الكلام ده كان قبل شهرين و لا 3 من قبل ما يسبو بعض و بعدها بفتره قصيره حسام و وائل اتشاكلو شكلتهم ديك المنها بقى ما بينهم حتى سلام تتزكريها ؟
_ اي و حتى ديك ما كان في زول عارف ليها سبب
_ انا عارفه . هم قبل الشكله ديك كان اتشاكلو شكله صغيره كده و بدت منها الحساسيات بينهم و كانت بسببك
_ سببي انا ؟!
_ اااي . كان مره في النادي حسام سمع من اصحاب وائل انو وائل معجب بيكي و كده و بعلق عليكي و انك احلويتي و شنو فحسام ساقو على جمبه و قال ليه يحترم نفسو و انو استحاله انتي تبقي في لسته بتاعت البنات البعرفهم و كده . حسام اي عصب معاه و هاج لكن ما كان حابي يعمل جوطه و شكله لانو الموضوع بخصك و انتي اختو . و بعد حكايه بتاعت اسبوعين وائل جا و اعتذر لحسام و اتأسف ليه و حسام سامحه و بعداك وائل بقى خاشي شمال في حسام و عامل فيها صحبو فمرا كان وائل جا لحسام الجامعه فجات سيرة حنين قام وائل قال لحسام انه حنين بت شافعه و صغيره و حسام اول ولد في حياتها و كده فبقدر يلف ليها راسها و هي حلوه و فرصه زي دي ما بتتفوت و كان بلمح ليه انه يستغلها و يغشها و كده و بقى بقول ليه فيها جسم مبالغه و هي صاروخ و كلامات وائل الانتي عارفاها حسام عصب و ما اتحمل فضربو و اضاربو و كانت مشكله كبيره و منها بقو سلام ما بسلمو على بعض و طبعا حسام ما قدر يحكي لزول السبب
_ اها و ده كلو حنين ذنبها فيه شنو ؟
_ اصبري انتي . بعد فتره قليله من الشكله دي حسام اكتشف انه حنين بتتكلم مع وائل من وراه و بتلاقيه كمان من وراه
_ اكتشف كيف ؟
_ من عزه صحبتو
_ عزه البت القصيرونه دي المعاه في الجامعه ؟
_ اي . يلا هي صحبت وائل برضو و مره سمعت وائل بتكلم مع حنين في التلفون و افتكرتها بت تانيه ما حنين نفسها لمن يوم شافت صورتها في تلفون وائل و مره بتتونس مع حسام لسانها فلت و قالت ليه انه حنين و وائل اصحاب و كده هي كانت قايله حسام عارف و اتفاجئت انو ما عارف لانو حنين ما جابت ليه سيرة و كان مرات بلقى تلفونها مشغول بتقول ليه مع وحده من صحباتها و لمن يلاقيها بشيل تلفونها بفتشو بس بلقاها مسحت المكالمات و الرسايل فيوم عشان نتأكد لاني قلتا ليه ما يظلمها ساي و هو زاتو ما كان مصدق انو حنين ممكن تعمل كده قلنا لعزه تجيب حاجه تثبت لينا عزه طبعا زعلت لانو كزبناها و هي صحبت حسام من سنين و صحبتو شديييد حتى من قبل ما يعرف حنين لكن عزرت وضع حسام فيوم سرقت تلفون وائل و جابتو لينا و قرينا رسايلهم مع بعض و اخر حبكانيات و تلميحات لبعض و حتى قالت ليه عاوزه لمن القى الوقت المناسب اسيب حسام و كده و انا قلتا ليه يواجهها بس يوم ورتنا عزه المسجات كنتا معاه انا . و قالت لينا لو واجها امكن تنكر و لو طلعت مظلومه او في اي شي غلط ممكن تزعل من حسام و تعتبرها عدم ثقه و حاره و كده . رغم انو مافي مبرر بعد ده لكن حسام لانو كان بثق فيها شديد و ما مصدق حتى و هو بقرا في المسجات . يوم عزه عرفت ليه انو وائل حايلاقي حنين و عرفت المكان و مشى لحدي هناك و شافهم قاعدين مع بعض براهم و اتصل عليها قامت زحت بعيد و ردت و قالت ليه انها في البيت و منها خلاص كل الكلام اتأكد ليه بعد ده . حسام اتأذم شديد لابعد حد لانو ما كان متوقع منها كده نهائي و المشكله انها بعد ده كلو كانت لسه بتتصل على حسام و لمن ما يرد عليها بترسل ليه حبيبي انت وين و حسام خوفتني عليك و بتتصل على عزه عشان تطمنها فقال خلاص طالما هي عاوزه الوقت المناسب عشان تسيبو يسبها هو و يوجعها قبل ما توجعو و هي اصلا وجعتو فيوم عيد ميلاد عزه اتفق مع موده دي وحده زميلتو في الجامعه و لا حبيبتو لا شي و حسي كلام زاتز ما بتكلمو معاها بلاقيها مرات صدف في الجامعه بسلم عليها بس
_ في شي غلط استحاله حنين تكون بتكذب علي لا لا استحاله
_ مياده انتي غبيه ؟ الغلط شنو ؟ كلامها مع وائل قريتو بعيوني و حسام مشى شافهم قاعدين مع بعض و جزء من المكالمات شوفناها و الرقم رقم حنين تاني في شنو ؟
_ برضو ما قادره استوعب و لا اصدق حتى
_ و الله انا من كلام حسام ساي عنها ما قدرتا اصدق و لا استوعب
_ مها حسام من بدا يشك في الحاجه دي او من عزه ورتو انها بتتكلم مع وائل من وراه متين ؟
_ يعني زي شهر كده قبل ما يسبو بعض
_ حنين كمان قالت لي انه حسام بدا يتغير عليها قبل شهر من ما يسبو بعض
_ يا بجاحتها
_ بس هي ما ورتني انو حسام حبيبها هو نفسه اخوي
_ اكيد ما بتقدر توريكي لانك حاتعرفي انها كذابه
_ بس هي قالت ما عارفه سبب تغيرو معاها
_ ما هو حسام ما وراها اصلا انو كشفها بس نظام انو هو بخونها قبل ما تخونو و انو اصلا ما كان جادي معاها و ما حباها و نزوه زيها زي اي بت تانيه و عشان ما تعرف بانو دي كلها خطة منو عشان يوجعها قبل ما توجعو حتى مازن صحبو ما وراه لأنو حبيب صحبتها و كده اكيد حاتعرف
_ كان يواجهها برضو
_ مرات السكات حار اكتر من العتاب و حسي اكيد محروقه
_ عايني انا ماشه
_ ماشه وين ؟
_ ماشه لحنين
_ مياده حسام حذرك عليكي الله ما عاوزين مشاكل حسام لو سمع انك مشيتي ليها حاتحصل مشكله و محمد اخوها لو عرف بعمايلها حايقتلها و حرام خالتو منى ما تستاهل كده
_ ما عاوزه اعمل اي مشكله انا و لو حسام جا قولي ليه مشيت اي حته و الله يا مها في شي غلط و الله حنين دي انا ما بعرفها لي كتير لكن هي ما كده
_ مياده ما تندميني اني حكيت ليكي الحكايه دي خلصت و ليها شهور و عدت
_ ما تخافي ما حايحصل شي بس سؤال اخير . حسام اتشاكل مع وائل في شنو ؟
مها حكت لمياده الحصل كلو يوم العقد . بعداك مياده طلعت و مشت غرفتها لبست ليها طرحه و نزلت تحت قالت لامها انها ماشه تشيل من حنين ملخص حصة قبيل هي ما لخصت .
حنين كانت قاعده في غرفتها بتزاكر . الشغاله فتحت الباب لمياده و دخلت سلمت على منى و قالت ليها حنين فوق في غرفتها و الشغاله وصلت مياده لحد باب غرفت حنين . مياده خبطت الباب و دخلت
_ مياده ؟!
_ حنين عاوزه اتكلم معاكي في موضوع معليش حاعطلك عن مزاكرتك
_ لا لازم اقرا ما وقتو حسي
_ حنين ما بتأجل
_ ما ينفع و انتي زاتك ارجعي لقرايتك
_ ما حاخد اكتر من ربع ساعه بالكتير
_ مياده عليكي الله امشي اسمعي كلام اخوكي و ابعدي عني الله يخليكي انا ما عاوزه مشاكل . حنين دموعها رغرغت لمن قالت لمياده الكلام ده بس مسكتهم
_ مشاكل ؟!! . صحوبيتنا و خوتنا بقت مشاكل ؟
_ اعمل شنو ما بايدي انا
_ حنين في حاجه غلط في شي ما مفهوم و ما حايتفهم الا لو انتي و حسام قعدتو مع بعض
_ مافي اي شي غلط الموضوع ده انتهى و كل شي واضح و ما عاوز توضيح
_ طيب انو حسام يقول عنك كده ده شي واضح ؟ و كونو انو يخت انك وحده كعبه ده واضح ؟
_ انا ما عارفه عملتا ليه شنو عشان يعمل كده و ليه بطلع فيني كلام كعب وصلت انو يشوه سمعتي . بس اعذريني رغم انو اخوكي لكن هو ..
_ يشوه سمعتك ؟ كيف ؟
_ مياده الله يخليكي امشي و اقفلي الموضوع ده يا مياده لو بتعزيني
_ حنين انتي لو ما اتكلمتي انا ما حامشي من هنا
_ مياده الله يخليكي عليكي الله امشي انا ما عاوزه مشاكل اخوكي قاصد الشر و انا لو الموضوع ده كبر اكتر و وصل لاخوي بقتلني عليكي الله امشي . حنين قعدت في الكرسي و دموعها نزلو و بقت بتمسح فيهم
مياده قعدت في الارض تحت حنين و مسكت ايدينها و عاينت ليها و قالت ليها : بس جاوبيني على اسئلتي و الله اوعدك تاني لو ما عاوزه خلقتي ما بوريكي ليها . حنين انتي ما كده و انا عارفه كويس انو في شي غلط خليني اثبت ليهم انتي شنو
_ اسئلة شنو ؟
_ بتعرفي وائل من وين ؟
_ عرفني عليه حسام في مره لاقيناه صدفه
_ طيب انتي كنتي عارفه انو وائل و حسام متشاكلين صح ؟
_ اي
_ و عارفه السبب ؟
_ لا حسام ما وراني بس وراني سبب شكلتهم الاولى الكانت بسببك
_ طيب و بعداك انتي كنتي بتتكلمي مع وائل ؟
_ ايوا
_ و الكلام ده من ورا حسام صح ؟
_ اي . انتي عرفتي بالكلام ده من وين ؟
_ جاوبيني اول على اسئلتي و انا بعدين بجاوبك . ليه يا حنين السبب الخلاكي تتكلمي مع وائل من ورا حسام شنو
_ وائل بعد ما اتشاكل مع حسام بفتره جاب رقمي من وين رفض يوريني و قال الاداه الرقم محلفو و قال عاوزني في موضوع مهم قال اول شي انو عاوز يتصالح مع حسام بعد ما اضاربو في الجامعه بس لمن حسام يروق شويه و قال انو ندم على عمايلو و قال لي انهم اتشاكلو لانو حسام شاكي انو وائل لسه عندو شي ليكي بس هو شال الفكره من راسو نهائي بعد ما حسام اتشاكل معاه في النادي و بقى بعتبرك اختو و حسام ابا يسمعو و فار فيه و ضربو
_ كنتا حاسه انه اللخبطه باديه من هنا . اها كملي
_ بس قال لي غير انو عاوز يتصالح مع حسام السبب الاهم الخلاه يفتش رقمي انو هو كان بحب وحده معاي في المدرسه هي صحبتي بس ما شدييييد ما كلوز شديد يعني و قال لي انا فعلا كنتا زول كعب و لعبنجي و طايش بس كفرتا عشان عاوز ابقى زول كويس ؟ حسام ابا يصدق اني اتغيرتا و اتشاكل معاي تاني و انا البت دي بعد ما سبتها ندمتا و اتغيرتا عشانها و عاوزك تساعديني ارجع ليها مافي زول ممكن يساعدني غيرك و قال كلام كتير شديد بس قال لي خلي الحكايه دي لمن تتم بيني و بينك لانو ما عاوز اعمل ليكي مشاكل مع حسام لانو اكيد حايقول ليكي ما تتكلمي معاي و فعلا خليتها بيني و بينو و اتكلمنا زي 3 و لا 4 مرات في التلفون
_ حصل اتكلمتو مسجات في الواتس ؟
_ لا ما حصل
_ طيب حصل رسلتي ليه صورتك ؟
_ لا طبعا ما قاعده ارسل لاولاد صوري انا
_ طيب كملي
_ كنتا بوريه بالبحصل لمن بمشي اتكلم مع لمياء البت البحبها البتقرا معاي لمن اقنعتها و قلتا ليها تديه فرصه تلاقيه و تسمع منو و ياهو يوم اتفقنا نتلاقى في منتزه بس تاني هو و لمياء رجعو لبعض و انا و وائل بقينا اصحاب شديد و جد بالنسبه لي اخوي بعمنى الكلمه و اثبت لي انو زول محترم
مياده بسخريه : محترمه انا . لمن لاقيتيه كان معاكي منو ؟
طلعنا انا و صحباتي كلنا مشينا منتزه و لمن جا وائل ضرب لي و مشيت ليه انا و ملاذ و احمد بعداك ملاذ و احمد مشو و خلونا انا كنتا بتكلم معاه في انو لمن تجي لمياء يقول ليها شنو و ده الكلام ده كان قبل ساعه من ما تجي لمياء و قعدنا نتكلم في موضوعهم لمن جات و بعداك انا مشيت خليتهم
_ طيب .عندك فكره حسام و وائل اتشاكلو ليه يوم العقد ؟
_ ايوا و ما تسأليني عن الاسباب
_ ليه انتي لازم تجاوبيني على اسئلتي كلها
_ حسام اخوكي مهما كان و انا براعي للحته دي
_ حنين بلا اخوكي بلا بطيخ الدنيا معكوكه جاوبيني
_ لمن مشينا نجيب تلفونك من العربيه لمن كنتا واقفه ليكي بعيد واحد من قرايب العروس علق علي ما بعرف اسمو منو
_ خالد
_ المهم حسام قعد يتكلم فارغ و بقى بقول اني كنتا حبيبتو و انو فعل معاي و و و . و انا في الطالعه و النازله معاه في عربيتو و بقى بقول في كلام بمسني و بمس سمعتي و لمن وائل حاول يتكلم معاه و يفهمو انو البعمل فيه ده ما صح حسام فار فيه و ضربو
مياده و هي منططه عيونها و مزهوله : الواااطي . ما قادره استوعب انا
حنين الدموعها ما وقفت و هي بتتكلم : مياده انا ما عاوزاكي تكرهي اخوكي بسببي
_ اخوكي منو . انا بتكلم عن وائل
_ وائل مالو ؟!
_ حنين ارجعي لقرايتك حسي و انا كمان في حاجات لازم اراجعها . اااااح يادوبي ارتحتا كنتا حاسه في شي لكن لسه في حاجه ناقصه
حنين و هي بتمسح في دموعها : انا ما فاهمه اترحتي من شنو و ناقصة شنو ؟
_ اقعدي اقري حسي و اغسلي وشك حبيبتي هانت خلاص و انا حامشي اقرا و بنتلاقى بكرا في الحصه
_ لا يا مياده ما تجي انا بكلم الاستاذ يجيكي براكي و شوفي اي وحده من مدرستك تدخل معاكي
_ حاجي غصب عنك انتي زاتك
_ مياده انتي ليه ما عازه تفهمي وضعي
_ فاااهمه ما تخافي حاجي بموافقة حسام زاتو . و قامت و حضنتها و قالت ليها : و الله يا حنين انا بحبك من جووووه قلبي و لازم اظهر الحقايق كلها . و بساتها في خدها و قالت ليها يلا باي و مشت
حنين الخلتها مياده ما فاهمه اي شي غير انو مياده عرفت حاجه هي ما عارفاها و على قد ما كانت خايفه كانت عاوزه بكرا يجي باسرع ما يمكن و تعرف منها الحاصل . مياده مشت بيتهم و هي بتفكر في نفسها : ياخي وائل طلعت شيطان متقززه انك ود خالي بس وائل براه ما بقدر يعمل العمايل دي كلها الرسايل ممكن يكون مفبركها و مسجل رقم اي زول باسم حنين و ورا حسام رسايلو معاه على انها رسايلو مع حنين و المكالمات بتكون ياهم ال 3 و لا 4 مكالمات القالتهم حنين لكن جاب الصوره من وين لازم يكون في طرف تاني خاشي في الحكايه دي . معقوله تكون عزه ؟ ما عارفه ما مريحاني البت دي . المشكله كيف حاقدر اثبت لحسام انو كلام حنين صح و كيف حاثبت لحنين انه كلام حسام صح .
#يتبع