= الشخصية رقم 5: أمير...
أمير... 24 عام...
ضحوكي و نشوطي... و قلبه ابيض...
الولد الكوول و الضاصر... وحيد والديه...
بوگوص و كل البنات بتحبو كل البنات حلوين...
و هو عارف هادشي...
و اللي ماعجبهاش شكله كايعجبوها فلوسه و فلوس عائلته...
داكشي علاش حتى هو غير كايدوز الوقت...
و لكن واخا ولد الفشوش مربي و مؤدب...
كمل قرايته على برا و دخل للبلاد باش يدخل لبيزنيس عائلته...
#Love_Story
#Amir
********************
= الشخصية رقم 6: رشيد...
رشيد... 30 عام...
شاب ظريف... واخا من عائلة ميسورة و لكن متواضع بزاف...
بعقله، ثقيل و سيغڤيابل بزاف... اللي احتاجه كايلقاه...
دري واثق من نفسه و من ديما عارف شنو باغي...
ماكايبغيش التخلويض و اللف و الدوران...
ملي كايبغي حاجة كايقصدها...
و هادشي خلاه زربان باغي يتزوج...
و لكن... ماعندو زهر في الحب...
البنت اللي تلاقاها يتزعط فيها... و يقول صافي هي هادي...
و تا وحدة فيهم ماصدقات... حيت تا وحدة ماقدر يتفاهم معاها...
تا وحدة ما عرفات تتعامل مع شخصيته...
#Love_Story
#Rachid
********************
= الشخصية رقم 7: سيمو...
محمد... 30 عام... صحابو كايعيطوا ليه سيمو...
اللي ماكايعرفوش كايبان ليهم انسان غامض و معقد...
و لكن مع صحابو متواضع و ظريف...
إنسان مسؤول و جدي في أغلب أمور حياته...
مختلف بزاف على أغلب شباب هاد الأيام...
ثقيل و مرزن و قلبه كبير...
دائرة معارفه صغيرة بزاف... أكثر من القياس...
حيت عنده أزمة ثقة... صعيب بزاف يتيق في شي واحد...
و آخر حاجة كايفكر فيها هي المظاهر...
#Love_Story
#Simo
********************
= الشخصية رقم 8: سفيان
سفيان... 30 عام... عم أمير...
فراشة اجتماعية... آداب و صواب...
في الأمور الجدية كلشي كايحتارموا و كايدير بحسابه حيت صارم...
و لكن مع صحابو و الناس اللي عزاز عليه... طالقها تسرح...
معاهم ديما الضحك و النشاط...
أحسن حاجة كايبغيوها فيه صحابو... كايقاد الخواطر...
خصوصا البنات... كل نهار مع بنت في شكل...
كايبدلهم بحال كايبدل حوايجو... و لكن كاينة بنت وحدة ماكاتبدلش...
البيست فريند ديالو و صديقة طفولته... نادية...
بير أسراره و عشيرته من نهار توفاو والديه...
قريبا...
#Love_Story
#Soufiane