المسلسل الرومانسي المغربي "Love Story"

مسلسل "LOVE STORY" - الحلقة 15

#Love_Story
#Ep_15

الساعة: 7h55 (في الشركة)

 

 

            ¶ سفيان، نادية و ايمان وصلوا.. طالعين في لاصونصوغ و باقة نادية كاتوصي في ايمان...

سفيان: زدتي فيه... بزاف... راها عارفة أشنو خاصها دير...

ايمان: هانتا تشوف... ضراتني في راسي...

نادية: انا درت بلاصتي هنا... و كلشي كايحتارموني... و هي عارفة علاش كانحكر...

ايمان: مالي غانشوهك؟!؟

نادية: وا غير للتأكيد... 8 سنين و انا هنا... ايلا كانهضر معاك را غير لمصلحتك... و باش ماطيحيش في الأخطاء اللي طحت فيها انا ملي يالله بديت...

سفيان: واو... 8 سنين!!! شرفتي معانا...

نادية: (بعصبية) كيفاش شرفت؟!؟

ايمان: يالله عرفت سفيان و فهمت أنه غير كايضحك...

نادية: واش دارك محامية؟!؟ (كايتحل لاصونصوغ) دابا غاتمشي للبيرو ديال ويبا و تسناي الحاج عبد الله... هو اللي قالها ليا...

سفيان: غير سيري نتي لبلاصتك.. أنا غانديها عند ويبا...

نادية: و تهلا فيها.. نتلاقاو من بعد.. (كاتمشي)

 

 

            ¶ كايديها سفيان عند ويبا و لكن ماكايلقاوهاش... مازال ماجات...

سفيان: تسناي نشوف واش كاين الحاج... (كايطل في البيرو ديال الحاج و كايرجع) لا مازال ماجا... هانتي.. جلسي هنا تسنايها... و ايلا الحاج قال لنادية باش تجي عندو هو الأول را غايكون علمها و شرح ليها...

ايمان: واخا... (كايمشي و كاتبقا بوحدها)

ويبا: (داخلة كاتجري) أهلا... صباح الخير...

ايمان: صباح النور...

ويبا: واش الحاج جا؟!؟

ايمان: مازال...

ويبا: الحمد لله.. ماكانحملش نلقاه جا قبل مني... الطريق غاطرطق... ياكما فيك الخلعة؟!؟