#Love_Story
#Ep_04
السبت 31 دجنبر
الساعة: 23h50
طريق مقطوعة في كازا
¶ نجاة حاصلة في طريق مقطوعة و خاوية... من بعد ما وصلات ماماها عند خالتها في نواحي كازا... و راجعة للحفلة ديال الشركة... دازت من ديك الطريق حيت مختصرة و مافيهاش الزحام... و تفرگعات ليها الرويضة... البورطابل مديشارجي... بقات جالسة سادة عليها البيبان و كاتبكي...
نجاة: (و هي حاطة راسها على الگيدون و كاتبكي) ياااا ربي.. ايلا كنت شي نهار درت شي حسنة صافية لوجهك... عتقني بيها يا رب... (كايدق عليها شي ولد في الزاج) اواه دغيا؟!؟
الولد: نزلي الزاج...
نجاة: لا...
الولد: نزليه... ماغاناكلكش...
نجاة: لا...
الولد: يالله غير بسميه شوية... (كاتنزلو شوية) ماغاناكلكش... شوفي وجهك في المراية و غاتعرفي علاش ماغاناكلكش... الجنون ايلا شافوك غايهربوا...
¶ كاتشوف نجاة وجهها في المرايا و كاتلقاه كله تجلخ بكثرة البكا... الماكياج كله تخلط و داع ليها في وجهها...
نجاة: أوييييييلي و ماعندي باش نمسحو...
الولد: ماشي مشكل... ماتنزليش... غير حلي ليا الكوفر من عندك...
نجاة: علاش؟!؟
الولد: باش نتخشا فيه... حليه باش نبدل ليك الرويضة...
¶ كاتحل الكوفر و كاتشوفوا بالصح جبد الماتيريال و بدا كايبدل في الرويضة... كاتطماءن و كاتنزل عندو...
الولد: واش معروضة لشي بلاصة؟!؟
نجاة: كنت معروضة... صافي مابقا عندي فين نمشي بهاد الحالة... أنا عااااااااارفة زهري...
الولد: ماتقلقيش... فيها خير... و حاولي تمسحي وجهك شوية... خلينا نشوفوك...
نجاة: آش بغيتي تشوف... وجه النحس...
YOU ARE READING
المسلسل الرومانسي المغربي "Love Story"
Romanceالمسلسل المغربي Love Story... 13 عام دازت باش كتبت هاد المسلسل... و كنت كتبتو مباشرة من بعد ماكملت "الغوتة"... و حيت كانت غير الكليكة اللي كاتقرا... الشخصيات كانوا تقريبا عندهم نفس الأسماء... و كان أول مسلسل رومانسي كتبت... و هو اللي كان كبر الصفحة...
