المسلسل المغربي Love Story...
13 عام دازت باش كتبت هاد المسلسل...
و كنت كتبتو مباشرة من بعد ماكملت "الغوتة"...
و حيت كانت غير الكليكة اللي كاتقرا... الشخصيات كانوا تقريبا عندهم نفس الأسماء...
و كان أول مسلسل رومانسي كتبت... و هو اللي كان كبر الصفحة...
¶ كايحيدوا ليهم المينوط... أمير كاتجي عينو في عين ايمان... كايبتاسم ليها و هي كاتخنزر فيه...
أمير: غير بشوية... عينيك شوية ينقزوا من بلاصتهم... ها ختك غاتجي و غاتمشي من هنا...
¶ كاتعطيه بالظهر و كايجلسوا يتسناو... من بعد شي نص ساعة كايدخل بوليسي..
البوليسي: را عيطنا لختها... و جاوباتنا... و غاتجي... (كايخرج)
ايمان: (كاتنوض تقرب من الكوميسير) عافاك ماتقولش ليها منين هزيتوني... قوليها عيد ميلاد في دار و ناضت مضاربة و بغيت نفك ولا شي حاجة بحال هاكا... عافاك... الله يرحم ليك بيها الواليدين... ديرني بحال بنتك...
الكوميسير: أولا بنتي ايلا هزوها من كلوب في نصاصات الليل... غانهبطها التحت نعطيها طريحة ديال العصا عمرها تنساها... ثانيا... المحضر تكتب و هي ملي غاتسني عليه غاتقراه و غاتعرف...
ايمان: واش عرفتي ختي كيدايرة؟!؟ أكبر معقدة... و واخدة أي حاجة في هاد الحياة بجدية... واش عرفتي ايلا تعصبات آش كادير؟!؟
أمير: (كايحط يدو على كتفها) أشنو غادير؟!؟
ايمان: (و هي عاضة على سنانها) غاتهز يديك ولا عمرك غاتقدر تحط يدك على شي حاجة من بعد... حيت غانقطعها ليك... (كايحيد يدو دغيا)
