المسلسل الرومانسي المغربي "Love Story"

مسلسل "LOVE STORY" - الحلقة 17

#Love_Story
#Ep_17

 

 

            ¶ سفيان و أمير بقاو تما حتى جا الديباناج دا الطوموبيل باش تصيب... و رجعوا للشركة في طوموبيلة نادية... الطريق كاملة و سفيان كايوصي في أمير باش مايعصبش باباه و مايجاوبوش ايلا بدا يغوت... و غير كايوصلوا كايمشيوا نيشان عند ويبا...

سفيان: Re...

ويبا: على سلامتك أ خويا... ملي مشيتي و هو معصب و كايبردهم فيا...

سفيان: صافي ها هو غايبرد...

ويبا: (كاتهضر بشوية) هادا هو؟!!

سفيان: هو هادا.. وهيبة أمير... أمير وهيبة...

ويبا: (كاتوقف و تمد ليه يديها) أووووه السي أمير... مرحبا بيك... سمعنا عليك بزاف...

أمير: (كايسلم عليها) ميخسي... و عافاك بلاش هاد "السي".. غير أمير...

ويبا: هي اللي ماتعاودش... حتى أنا الناس العزاز كايقولوا لي "ويبا"..

أمير: original...

سفيان: شفتكم غاتصاحبوا...

ويبا: شو كيداير...

سفيان: ها حنا غاندخلوا... مادخليش عندنا... ما دوزي تا مكالمة و ماتعيطيش ليه... حتى نساليوا و يبرد...

ويبا: أوكي...

 

 

            ¶ كايدخلوا و كاتبدا ويبا تسمع غير الغوات ديال الشادلي بوحدو... و من بعد تقريبا نص ساعة كايخرجوا ب 3...

الشادلي: وهيبة... عيطي لسي مبشور باش يوري أمير بلاصتو... و قولي ليه را هو هادا اللي دوا ليك عليه... هو عارف أشنو غايدير...

ويبا: واخا...

الشادلي: أنا خارج.. غانمشي نشوف لوزين في الجديدة... شحال هادي ما طليت عليهم تما...

ويبا: نقول ليهم يعيطوا ليك تما و لا بلاش؟!!

الشادلي: لا بلاش... اللي سول قوليه ماجاش گاع اليوم... و را غانرجع للدار نيشان... و داكشي ديال الشركة هنا دوزيهم لسفيان... كيف ديما...