خرج المختار و خلا غالي كيحك نيفو و عنقو بطريقة هستيرية و مشا بخطوات سريعة لواحد المجر عندو تما جبد منو واحد ساشي فيها غبرة بيضة و سطرها فيديه و هو كيترعد و قرب لنيفو و ستنشقها حتى عينيه الرماديين دمعو او ولاو حمرين و كيردد الكلمات بهستيريا:نتوما متقدروش تاخدوها مني متقدروش و طاح فوق الفوطوي مرجع راسو لور و دماغو خدام كيفكر.
خرج المختار من المتكب هبط فسانسور حتى الباركينغ فين كيتسناه الشيفور و طلع معاه و كسيرا الشيفور و الوجهة هي القصر ديالو بعد مدة كانو واقفين قدام القصر، نزل المختار بخطوات واثقة و تقدم الباب و كيف حلو لقا سمية كتسناه أحر من الجمر و كيف لمحاتو تكلمات بقلق: اشنو دويتي معاه واش قبل...المختار حرك راسو بتأسف و نطق حاني راسو:تعصب بزااااف و موحال واش غيبغي ... سمية كلسات فوق الفوطوي لي كان قريب ليها و خشات وجها بين يديها كتبكي و نطقات بحزن:انا مبغيت والو هئ هئ بغيت غير نتأكد انا ديك البنت كنحس بيها مني هئ هئ انحماق والله ... المختار ضمها لصدرو و نطق و هو كيمسح على شعرها:يكون خير اسمية يكون خير ... سمية هزات فيه عويناتها الخضرين مدمعين: انا متأكدة هي بنتي هي انا ماشي حمقة و مغنرجعش نتعالج كيفما كنتو كديرو ليا ... المختار حط يدو على خدها و نطق بحنان: سمية الحبيبة ديالي حنا شحال درنا من فحص و شحال قلبنا و شحال جرينا و هادشي كولو غير حيت نتي كنتي كتحسي بكل بنت بلي راه بنتك و كنحاولو و كنديرو الفحص و مكنلقاو والو ... سمية مميلة شفايفها: علاش مكتفهمونيش علاش انا ديك البنت حسيت بيها بنتي حسيت بيها سارة ... المختار طبطب على كتفها: غادي نحاولو اسمية غادي نحاولو يكون خير ... سمية وقفات وهي كتمسح فدموعها و تكلمات بلهفة: نوض ديني نوض ديني لعندها ... المختار: سمية مديريش شي حاجة غتندمي عليها ... سمية بإصرار: الى مبغيتيش تديني انمشي راسي ... المختار تنهظ بقلة حيلة: سيري بدلي حوايجك انا كنتسناك ... مشات كتجري فدروج لبيتها و بعد خمس دقائق بالحساب نزلات لابسة جلابة مخزانية كحلة و صنيديلة و شعرها جامعاه شينيو ... سمية: ساليت يلاه نمشيو.
كانت باقا كالسة فالجردة شوية حسات بالبرد بدا كيتحرك الشي لي خلاها تنوض تلبس صنيديلتها و تدخل بخطوات رقيقة كيف دخلات كانت متوجهة السانسور باش طلع لبيتها تكلس شويا حتى كتسمع الصونيط فالباب يالاه كانت متوجهة تحلو حتى حبساتها ماجدة بيديها حلات الباب و لقات سمية و المختار ... ماجدة ببتسامة و احترام: مرحبا بيكم ... سمية: ترحب بيك الجنة ابنتي ... ميساء سمعات بزاف ديال الأصوات عقدات حجبانها بطفولة و توجهات تجاه الباب و كيف لمحاتهم بتاسمات: دخلو مرحبا بيكم ... سمية كيف شافتها ترخفو ملامحها و تلاحت عليها معنقاها ميساء هي الاخرى عنقاتها وهي متسائلة على ردة فعلها المفاجئة و الشي لي خلاها دير هاكا، حنحن المختار بحرج الشي لي خلا سمية تحس على راسها و فصلات العناق و هي كضور عينيها على وجها بحنان: لاباس عليك ابنتي ... ميساء حركات راسها بالإيجاب: لاباس اخالتي ونتوما ... المختار حاوط خصر سمية و نطق مبتاسم: الحمدالله ابنتي ... ميساء: تفضلو دخلو متبقاوش واقفين دخلاتهم ميساء الصالون البلدي لي كاين فالقصر.
الصورة
كلسو و كلسات ميساء هي الأخرى كضور عويناتها و كتحس بنوع من توثر حتى كيكسر الصمت المختاربصوت مهيب: مكاينش غالي ابنتي ... ميساء: لا اعمي يمكن فالخدمة ... سمية كتشوف فيها بحنان و عيون مدمعة و نطقات بنبرة جد حنونة: نتي ابنتي كيدايرة لاباس عليك واحد الفنكوشة د تواب ياكما كتعدبك ... ميساء بتاسمات: لا بلعكس اخالتي تواب راه فحال بنتي و ربي شاهد ... سمية: اوا الله يخليك ليها ياربي ... ميساء: امين ياربي ... فور ما سالاو شافوا البنات جايين و لي كانو هازين الضيافة بكل انواعها من مسمن و كيكة و بغرير و بريوات و العواصر و أتاي و القائمة طويلة الحاصول عمرو طابلة ... حطو داكشي و نصارفو فالصمت متوجهين الكوزينة، ميساء كل مرة كترحب بيهم و كتكبر بيهم ببتسامة عريضة ... سمعو الباب ديال الدار تحل و دخل منو غالي بخطوات واثقة وهو عينيه حمرين و كل مرة كيحك نيفو بهستيرية ... كيف دخل لقا اية واقفة ليه حدا راسو مشافش فيها و تجاهلها فحالا كاعما كاينة حتى نطقات بالزربة: السي غالي راه جات مدام سمية و السي المختار راه كالسين فالصالون البلدي مع (نطقات فوق خاطرها) لالة ميساء ... غالي غمض عينيه بفقصة و طرطق عنقو وقلب أدراجو جيهت الصالون، دخل بمشيتو الرجولية المعهودة و اول حاجة جات عليها عينيه هي لي كانت كالسة دايرة رجل فوق رجل و رجيلاتها البويض الصغار كيبانو من الصنيديلة و شعرها الذهبي ملاوح فوق السداري ... زارتهم ريحتو لي طغات على الغرفة الشي لي خلاهم يهزو فيه عينيهم ... وقفات سمية وهي متوجهة ببتسامة: ولدي لاباس عليك ... غالي قرب باس راسها بإحترام و نطق بصوت مبحوح: الحمدالله ا سمية (غمزها) شنو سبب الزيارة اليوم ... سمية توثرات من سؤالو و المختار نطق وهو هاز حاجبو فيه: كتجري علينا ... غالي قلب نضراتو ليه وهو كيرمقو بمكر: لا الواليد حاشا ... سمية شافت جيهت ميساء لي كانت كتفرك يديها الطبوزين ب توثر وهي حشمانة من الطريقة لي هضر بيها غالي: انا اولدي غير توحشت بنتي ميساء و قلت علاش لا منجيش نشوفها ... ميساء بتاسمات ليها ببرائة: ربي خليك اخالتي ... غالي ميل راسو فبتسامتها الطفولية و تمشى ببطء نحوها و كلس حداها بجلسة رجولية بإمتياز محاوط كتفها بتملك ... رجعات سمية لبلاصتها وهي كترمق غالي بنضرات كيقطعو فالقلب فحالا كترجاه على الأمر لي قاليه المختار ... كسر المختار داك الصمت موجه كلامو الميساء: بنتي ميساء واش نتي مكتقرايش ... ميساء تزيرات من سؤالو و نطقات و الغصة فحلقها: لا ... سمية عقدات حجبانها و نطقات بتساؤل: و علاش نتي مازال صغيرة ... ميساء هزات عينيها فغالي لي كان كالس و كتبان ليه غير هي مراقب حركاتها بدون ملل او كلل و نطق و هو باقي كيشوف فيها: مرتي ممحتاجاش تقرا اتبقا تبريباري فالدار ملي يوصل وقت الإمتحان رآه اتمشي دوزو ... سمية حركات راسها بتفهم ، بقاو كالسين لعدة دقائق اخرى كيهدر كل من غالي و المختار على الأمور ديال الخدمة حتى نطق المختار بعدما وقف و وقف معاه سمية: اوا اسيادنا خصنا نمشيو دابا نعاودو هاد الكلسة مرة اخرى إنشاءالله، رافقاتهم ميساء و غالي حتى الباب و فالقطة لي جات ميساء تسلم على سمية عنقاتها و بدون متلاحض ميساء دوزات سمية يديها على شعر ميساء و جراتو بشوية حتى بقات ليها زغبة فيديها.....
يتبع ❤️ ڤوط و أرائكم الزوينين 🦋