#طوبى "جنة طوبى"
#جمان_فريد
#الجزء_105"كانون الأول/موسم الثلوج"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃تماديتُ في حُبكِ حتى فُتنتُ
في عينيكِ رأيتُ النجمَ والشُهبا
حاربتُ فيكِ كُل أزمنتي
فكُنتِ لقلبي الهمَ والتعبا
وغيورٌ من غريبٍ يرميكِ بحديثٍ
فو الله عاشقٌ مثلي لا يُغلبا🍃
______________________________________
في جو ساده التوتر..
مقعمزين وهما يستنوا بقلق مرواحة سدرة وطوبى..
واحد منهم قال..
المحجوب بقلق؛تبي الصراحة ياحاج قصة انه تعالج هادي مش خاشتلي راس ..
علي بعدم فهم:مالا شنو!؟
المحجوب:المعلومات اللي وصلتني انه لما كان في مصحة**** في**** تعالج ع حالة مرضيه كيف بنشرحلك عنها!!؟..مرر نظره القدام وقال..هي حاله تخلي صاحبها يهلوس بحاجات تسببله نوبات خوف وهلع تخليه يدير تصرفات هو مش واعي ليها وهو تعالج من الحاله هادي لهني تمام..لكن الجالي اللي اني عرفته ومن اللي سمعته عنه اكتشفت انه من الأصل غير سوي نفسيا..
علي بشي من القلق..
/تبي تقول انه مش ناوي ع خير..
المحجوب؛نبي نقول ان حني مفروض نقعدوا رادين بالنا منه وطوبى بالذات هو توا بيقعد يشوف بنته مرتين في الشهر لازم يكون في حد معاها تحسبا لأي شي..حد مسلح من الاخير..
سكت الحاج علي شويه بعدين قال..
/عبد الرؤوف لا..
المحجوب بهدوء..
/ياحاج علي عبد الرؤوف نادم هلبه وواجعه الحال اللي وصلتوله عطيه فرصه يصلح غلطته ويكسر الحاجز اللي درتوه بينكم وبينه..
علي الواعر:ياولدي اني مانحبش نعاود كلامي ولاندوي في الحاجه اكثر من مرة الموضوع هدا سكرته ومعاش بنفتحه مرة تانيه..وع وضع طوبى خليها عليا تو نتصرف..
المحجوب بضيق..
/اني اكثر شي مقلقني مختار متأكد انه حيستغل الموقف..
علي هز راسه وقال؛حتى اني فكرت فيها..ع العموم زي ماقتلك خليها عليا اني تو نتصرف..
سمعوا باب الحوش الخارجي انفتح..
علي:اهم روحوا..
بدي المحجوب يهز في رجله بتوتر...
سمعوا صوت السيارة وهي خاشه...وشويه وسمعوااصوات بيبانها انفتحوا وتسكروا..
نادى الحاج علي بصوت عالي..
/سدرة..طوبى..
جاه صوت سدرة وهي تقول..
"جايين ياجدي"..
شافوا الزوز للباب وهما يستنوا في خشتهم..لحظات وخشت طوبى بجنه ووراها سدرة..
طوبى لما شافت المحجوب لاحظت في عيونه نظرات خوف وضيق..
مشتله طول وقعمزت جنبه وهي تقول..
/الحمد لله عدت ع خير..
🍃هو وياها اللي عاشوه قبل في موقف شبيه خلا عندهم خوف رهيب من انه يتكرر..🍃
شاف المحجوب لجنة بإبتسامه..قرص خدها قرصه خفيفه..
طوبى مدتهاله خداها وهو يقول..
/جنو...شن جو ياجنو..
وسدرة تشوفله بنظرات حزن..
علي:شن صار؟!
تنهدت طوبى وقالت..
/شي قعد معاها ساعه بعدين روحنا..
المحجوب:ماصار شي تاني!ماطلب شى تاني!؟
طوبى وهي تمرر في نظرها بيناتهم قالت..
/لالا..
سدرة؛كيف حالك خالي!؟
شافلها وقال؛الحمد لله شن حالك انتي!؟
هزت راسها وقالت..
/الحمد لله..نبيله داخل؟
المحجوب:لا عند غرفه..
هزت سدرة راسها ومشت طلعت من حداهم..
علي؛لالا وجوهكم ماعجبتنيش..
طوبى بضيق:صار نقاش بينها وبين نسرين..
علي:شن قالتلها بنت شنيبه..
طوبى؛زي العاده تستسمح وتتعذر..
ناضت وهي تقول..
/هي تعالي جنونه نخشوا..
جنه؛لا..
ضحكوا..
طوبى برفعه حواجب..
/نعمين!
جنه ردت عليها..
"اوشي اوشي"..خشي..
ضحكوا عليها مرة تانيه والمحجوب قال..
/خلاص خشي تو ندخلها بعدين..
طوبى بإبتسامه..
/باهي..ومشت طلعت من حداهم..
علي الواعر شاف لجنه وقال..
/جرينه..
هي قالت..
"دادو"..جدو..
المحجوب بضحكه؛ربي يحفظها..
🍃وامها كيف وصلت في باب الحوش الدخلاني..سمعت صوت دق ع الباب الخارجي..
التفتت وقالت..
/شكلهم غرفه ونبيله..
جت بتمشي تفتح..لكن شافت خالها طالع للباب وجنه في حضنه..
وصل فيه وفتح طول ظنا منه انهم مرته وبنت اخته..
لكن اللي ورا الباب كان راجل وسيم متأنق ببدلة كاجوال جاكيتها عنابي وتحتها فانيله سودا رقبتها طويله ع بنطلون اسود وخافي عيونه بنظرات عسليه..وع وجهها ابتسامه مشرقه وحلوة بالمرة للكائن اللطيف اللي يشوف فيه يضحكله..
في جنبه مراة جميله مبتسمه ابتسامه لطيفه قالت..
/السلام عليكم..
المحجوب بملامح وجه متجهمه..
/وعليكم السلام..
وخر عن الباب..
خشت فاتن ومختار وراها وعيونه مايشوفوا غير جنه..
لما شافاته طوبى حست بضيق شديد..لكن بعدين حست بعصرة في قلبها وين سمعت بنتها ناداته..
"بابا"
هو ضحك وخداها من المحجوب ضمها وقال..
/ياقلب بابا..
المحجوب طول مشي للمربوعه..
لما خش شاف للحاج علي بنظرة وجع وحزن..
والحاج علي بادله بنظرة ألم..
قدم للمكان اللي كان مقعمز فيه خدي مفاتيحه وتليفونه وقال..
/ماشي لغرفه..
علي الواعر هز راسه بصمت..
المحجوب وهو ماشي طبطب ع كتف الحاج علي ..
والحاج علي شد عكازة بإيديه الزوز وع وجهه باديه ملامح الألم..
🍃طلع المحجوب بإتجاه الباب الخارجي سمع طوبى قالت..
"وين خالي"
بدون مايلتفت قال لغرفة خالي..فتح الباب وطلع وسكره وراه..
قدمت طوبى لفاتن وهي تقول بإبتسامه..
/ياهلا بفتون ياهلا ليك وحشة كبيره..
ضموا بعض وفاتن تقول بإبتسامه..
/ليكم اكثر..
تباعدت طوبى ومختار وهو يشوفلها برفعة حاجب قال..
/واني مالياش وحشه..
طوبى:لا والله للأسف..
شدت فاتن ضحكتها..
مختار شاف لجنة وقال..
/اني مااستاحشت حد غير قلبي هادي..
طوبى؛امم..خيرك ماطولت الغيبه..بش نستاحشوك يعني..
هو شاف لفاتن وقال..
/مش قتلك بيخناها معاهم وكنا رزان ع قلوبهم..
طوبى:كلا فتونه مانبيهاش تروح بكل كان نلقى تقعد معانا في دار..
رفع حاجبه وقال بإبتسامه
/واني كان تلقي معاش تخليني نخش الحوش..
ويقطع ع طوبى ردها صوت مؤذن مسجد المنطقه وهو يرفع في آذان صلاة المغرب...
طلع الحاج علي وهو يقول لطوبى..
/طالع للصلاة بنتي..
فاتن؛كيف حالك جدي؟!
علي بدون مايشوفلها..
/الحمد لله..ومشي بإتجاه الباب..
مختار وهو معاه بنظره قال..
/نبيك في موضوع مهم ياحاج..
الحاج علي:بعد مانروح..وفتح الباب وطلع ورفعه وراه بقوة..
شاف مختار لجنة لما انفجعت ضمها بقوة..
طوبى شافت لبنتها بضيق بعدين قالت..
/خشي فاتن خشي..
مشت فاتن وهي مضايقه..
اما مختار خش بجنه للمربوعه..طوبى قعدت واقفه تشوف للمربوعه شويه بعدين دعت في نفسها..
"اللهم اني استودعك اياها"..
ومشت خشت ورا فاتن..
🍃🍃🍃🍃🍃
كل من فالحوش تفرغ للصلاة الا هي..
كانت مقعمزه في دار المعيشه تتفرج ع جنه وهي تلعب..
مبتسمه لكن الابتسامه هادي شابتها ملامح الضيق..
في شي داخلها رافض كونها الوحيده اللي ماتصليش في المكان وفالوقت نفسه كان راغب الصلاة..
مرات تحس ان هالبيئة ماتناسبهاش لكن في نفس الوقت تتمنى لو عاشت فيها من صغرها..
ومرات تحس ان البيئة التانيه هي اللي مش ليها ووجودها فيها غلط..
حيرة..وتشتت هذا ماتحس فاتن حاليا ومش عارفه امتى وكيف تطلع من هالحاله..
"تشربي قهوة ولانسكافيه"
شافت لباب الدار وقالت بإبتسامه..
/قهوة سويتي هادي..
ضحكت طوبى وقالت..
/تمام..بنديروا العشي حاجتين رشدة مبكبكه وشاورما بتقولي كيف تجي بنقولك اني مانحبش الجاري..
ضحكت فاتن وقالت..
/احسبيني معاك..
طوبى:تمام..
جنه ناضت ومشت لأنها وهي تقول..
"حبيب"..حليب
طوبى:بنتي تبي حبيب..هي تعالي نديروا حليب..
ومشت طوبى طلعت وجنه تبع فيها..
وخلوا فاتن تضحك من قلبها لكن بعد ماهدت ضحك تبدلت ضحكتها لملامح ابتسامة أسف..
🍃🍃🍃
الأسف..الإحساس الوحيد المسيطر ع المهدي بعد اللي صار اليوم..
متأسف هلبه ع الحال اللي وصلوله مع جيرانهم..بالذات مع سلطانة قلبه..
هو مش قادر يلومها بروحها لام معاها نفسه لوم شديد..
شاف انه يستحق اللي سمعه منها لأنه هو اللي خلاها تفكر فيه هكي وتشوفله بهالنظره السيئة..
☘مقعمز في الجنان ..مربع ايديه ويشوف في الفراغ قاعد يشوف في اللي صار اليوم قدام عيونه ويسمع في كلام سدرة مرارا وتكرارا..
ع خشة ولده محمد للحوش لما شاف حالته ضاق صدره..
كان يبي يعرف شن صار معاه في الزيارة اللي خلاه يروح بحال غير اللي مشي عليه..
قدمله وقف عليه وقال..
/بوي..
استاقظ المهدي..رفع عيونه وحواجبه وهو يقول..
/نعم!؟
محمد:خيرك مقعمز في الصقع..
المهدي:الجو عادي ..
محمد؛بوي..شن صار؟!
حرك راسه نفيا وهو يقول..
/ماصار شي..غير الموقف اثر شويه كيف لاقى عمك بنته وهكي..عارف انت مواقف زي هادي شن يصير فيها..
محمد بأسف قال..
/الله يسامحه داره بإيده..
ابتسم المهدي تهكما وهو يقول..
/صدقت البنادم مايشقيه الا فعايل ايديه..
ناض وقال..
/تخش داخل!؟
هز محمد راسه ومشي خش مع بوه للحوش..
🍃في الصاله..
كانوا مقعمزين نضال وسميرة يتكلموا في موضوع..
نضال؛زاد اليوم كلمني مرة تانيه واضح مستعجل مادابيك تمشي غدوة بإذن الله وتفتحي الموضوع..
سميره:إن شاء الله..
ع خشة المهدي وولده وهما يقولوا..
/السلام عليكم..
ردوا عليهم السلام..
قعمزوا والمهدي قال..
/وين امي؟.
نضال؛في دارها..شن صار معاكم..
المهدي؛عادي.شاف بنته وروحنا..
سميرة قعدت تسمع بصمت..
هز نضال راسه بعدين قال..
/شن عشانا؟
سميره:رز بالشاورما وكفته..
هز نضال راسه بصمت..
ع خشة مغليه قالت..
/جيتوا..
ومشت قعمزت جنب المهدي وقالت..
/خوك وين؟!
المهدي:مشي لحكيم.
بحزن قالت:شكله تأثر هلبه..
المهدي:اكيد يام..
مغليه بحسرة..
/حسبنا الله ونعم الوكيل..
رفعت سميره حاجبها وهي تشوف للشاشه بعدين غيرت نظرها لمغليه لما سمعتها قالت..
/لكن والله مايجي منه هالظلم بتحرمنا نشوفوا بنيتنا..
مافي حد رد عليها كلهم بدت ع وجوههم ملامح الضيق..
مغليه بكره
/دايرة روحها ملتزمه وتخاف ربي...
غمضت سميرة عيونها وقالت..
/معليشي عندها حق..فتحت عيونها وقالت..كلنانعرفوا شن صار قبل تبيها تجازف مرة تانيه وتبعت بنتها لمكان فيه مراة تكره امها لو منها ندير هكي..
مغليه بحده:وشن حني مهبله بش نخلوا حد يضر بنتنا!؟ وبعدين نجاة شن دارت لهديكا!؟ حد فيكم يحكيلي موقف تعدت فيه نجاة عليها هي اللي كانت تشري في المشاكل معاها شري..
ابتسمت سميرة تهكما.. المهدي بإنزعاج..
/بالله انهوا خلاص..وانتي يام كان تبي تشوفيها نهار الزياره نرفعوك معانا..
سكتت مغليه وهي تهز في رجلها بغضب..
وسميرة ناضت وهي تقول.
/خل نمشي ندير العشي..ومشت طلعت من حداهم..
اشرت مغليه ع الباب وقالت..
/اشهدوا عليها هي اللي دور في النشاف..
نضال بضيق:خلاص يام في الجديد تو نقوللها معاش تدوي خلاص..
رفعت مغليه حاجبها وشافت للشاشه..
وولادها وحفيدها مستائين ع الآخر...
🍃🍃🍃🍃🍃
ومن صالة حوش شنيبه لصالة حوش طوبى الواعر..
اللي مقعمز في صدرها مختار..
وحواليه عمته وخواته ومرته وبنت اخته وبنت عمه ونساوين عمه ومروة بنت فايزة..
مختار بإبتسامه..
/لا المرة هادي اخترتي صح..
مطيره؛شكلك سألت ع سنسافيله..
مختار:لجده السابع..جبت قرارهم كلهم..هو بالذات ماشاء الله راجل ممتاز وسمعته في كندا كويسه هلبه..
اميمه بضحكه؛سألت عليه غادي!
مختار:ياعيني والله..اصلا مفروض مانسألش عليه الا غادي في الغربه تبان معادن الرجال..
طوبى ضحكت ضحكة خفيفه..شافتها سدرة..
وهو انتبهلها بس دار روحه ماشاف شي وكمل يقول..
/التمام لخير زي مايقولوا الشوام..
هو قالها بعفويه مش قاصد منها شي..بس خلا ضحكة طوبى تختفي..
صفيه:آمين يارب العالمين..
حرك نظره لمروة وقال..
/السموحه هادي اماسنه تقرا؟
مروة بخجل:اولى ثانوي..
مختار:علمي ولاادبي؟
مروة:علمي.
ضحك وقال:اشطر من امك شكلك..
ضحكت سدرة..
مختار؛امك كانت زي حالاتي في القرايه صفر الشمال..
مطيره:كنتوا تشجعوا في بعض ع السقاط..
ضحكوا كلهم..
مختار بإبتسامه؛فايزة كانت نغشه ودمها خفيف اكثر وحده تخش القلب من بنات الشارع عكسها بنات شنيبه اثقل من دمهم ماعرفت انصدمت في ربيع كيف خدي نسرين اكثر واحد كان يتسهوك عليها..
هما يسمعوا ويضحكوا..
ماعدا سدرة اللي قالت..
/خلاص عاد..
مختار:باهي خلاص نغيروا الموضوع...تعرفي خاطري نشوف عواصف واجتياج..
ضحكوا..
ومطيره قالت بضحكه..
/خير دعوتك انت!؟
مختار برفعة حواجب..
/شي..هكي خطروا ع بالي..ضحك وقال..سدرة تتفكري في قصة علي بابا اللي كانت دير فيها عواصف..
ضحكوا..واريج بدموعها..
فاتن بضحكه؛مختار!..
شافلها وقال..
/كانت معجبه بيا عندك علم!..
والصاله ماينسمع فيها كان صوت الضحك..
هو تنهد وقال..
/لبسوني بيها صغار الشارع بشكل..حرك راسه يمين ويسار..
سدرة بضحكه:خلاص يابارد انهي..
مدتله مطيره طرف معمول وقالت..
/كول..
خداه منها وهو مبتسم وكيف جاي بياكل ضحك وقال..
/تفكرت شكل خالتي نجمه وين تطلعلي بعد مانعطي محي طريحه..
قلد ملامح وجهها..وهما من الضحك بطونهم وجعتهم..
طوبى بضحكه؛ماسالم منك حد ..
رفع حاجبه اليسار وهو يشوفلها بعدين كلي طرف المعمول...
وهي شافتله بإمتعاض وسدرة مركزه معاهم..
شاف لجنه اللي كانت تاكل البشكوطي"البسكويت" وقال..
/جيجي..
التفت تشوفله..
مختار اشر ع طوبى وقال..
/بري اضربيها..هكي..وقعد يرفع في يده وينزل وهو يقول..هاه...هاه..هاه..هي نوضي..
جنة شافت لأمها وامها تشوفلها وكلهم يراقبوا شن بدير جنه..
ناضت جنه ومشت لأمها ومختار يقول..
/هكي جنه..هاه هاه هاه..ودار حركة اليد مرة تانيه..
وصلت جنة في امها قعدت واقفه تشوفلها..
وطوبى تشوفلها وهي تتصنع في الزعل بطريقة طفوليه..
شافت جنه لمختار وقالت..
/لا..ومشت لأمها وضمتها..
ضحكوا كلهم ومطيره تقول..بنية امها طالعتلها..
طوبى ضمت بنتها وباستها بعدين قالت..
/بريله هداكا..اشرت عليه وقالت..اضربيه..وقلدت حركة مختار..
جنة مشتله طول وين وصلت فيه صفعاته ع وجهه..
طوبى ضحكت والباقي شدوا ضحكاتهم ماعدا سدرة اللي قالت..
/حي جرنونه..حي!!
شافتلها جنه...
هني مختار حط ايديه ع وجهه ومثل انه يبكي..
سدرة:حي! يبكي..حي..هكي ياجرنونه..
شافتله جنه وفيسع ماأثر فيها وخلاها تبكي..
انصدم حول ايديه وخداها ضمها وهو يقول بضحكه..
/لاياقلبي لا خلاص..وجنه تبكي من جدها..
امها وجعها قلبها عليها..
ناض مختار بيها وقعد يهدي فيها بعدين بدي يغني..
"طيري ياعصفورة"
طول سكتت وقعدت تسمع فيه...
مطيره:مبردكم انت وامها ولعبكم البايخ..
طوبى:هو اللي بدي..
مختار شافلها برفعة حاجب وهو يغني..
شويه ناضت سدره طلعت من الصاله وهي تقول ..
/بنبدا في العشي..
مطيره:شويه ولاحقاتك...
وطوبى تشوف للجهة اللي طلعت منها سدرة بنظرات ضيق...
🍃🍃🍃🍃🍃🍃
والضيق اللي عايشه فيه راما مخليها مش قادرة تتنفس..
طول اليوم وهي.حابسه روحها في الدار..
وامها ولااهتمت لأمرها نزلت لحوش العيله تبي تحضر لمة سلفاتها ع العصبان والشوا..
وطبعا لما سألوها عنها جاوبت الاجابه المعتاده
"تقرا.."
خديجه توا مش منشغله.غير بصفاء مليان قلبها منها وابتسام زادت النار حطب خلتها تبي تحصل فيها فرصه بش ديرلها مشكله بأي شكل..
والفرصه جتها لعندها.
تيم ولد خديجه عمره حاليا عام وشويه يقدر يمشي..
الولد من لما نزل مع امه وهو يجي لولاد ابتسام وصفاء يبي يلمسهم وامه تشد فيه عنهم..
لعند ماجي وقت تجهيز العشي النساوين كلهم انشغلوا بيه..
وفي الصاله قعدوا الصغار حدا جداهم.. نجمه بعد صلت المغرب خدتها غفوة..
في هالغفوه خش ولد خديجه للصاله وطول مشي للصغار..
نزل ع ولد عمه اشرف شده من شرشافه وجبده وقعد يكر فيه ع قد جهده..
والعيل قاعد راقد بالنوم مش واعي لشي..
🍂ولإن قلب الام يحس بضناها حتى لو كانوا في اخر الدنيا..
حست صفاء انها لازم تطلع تشوف ولدها..
وطلعت من الكوجينه ومشت لصاله..وتخشلها وتشوف مايفجعها..
عيطت ع طول حسها وقالت بفجعه..
/ولدي!..
ومشتله تجري خداته وهي تشوف فيه كان قاعد حي زي المجنونه..
صرختها فجعت ولد خديجه وخلاته يبكي..
وفجعت حناه وفيقتها من غفوتها..
/خيركم شن في!..
ضمت صفاء ولدها وهي تقول..
/الحمد لله الحمد لله..
نجمه بفجعه:خيره!؟
صفاء بغضب؛ولد خديجه الشيطان كان يكركر فيه ياعمتي..
وتخش خديجه وولدها وراها وتسمع شن قالت وبكل مافيها من مشاعر كره وغيظ ردت عليها بإنفعال..
/انتي الشيطانه ياقليلة الادب والربايه هكي تربيتي تدوي ع مراة في عمر امك!
صفاء انصدمت ومعاش قدرت تتكلم..
ردت عنها نجمه وهي تقول بصدمه وخوف..
/مش عليك يابنتي قالت ع الولد شيطان..
خديجه بصوت عالي..
/ماترقيعش ياعمتي سمعتها بوذني قالت ولد الشيطانه..
ع خشة عواطف وسميرة ووراهم باقي السلفات منهم ابتسام..
عواطف:خيركم شن في!؟
خديجه بتهكم:انشدي صاحبتك قليلة الادب ضاربه ولدي مخلياته يبكي بدموعه وقالت عليا شيطانه!..
نجمه:خديجه! مايجيش هكي يابنتي راهو اني حاضرة كلامك هدا ماصارش بكل..
خديجه بسخريه..
/بالك بتقولي غير هكي ياعمتي..
نجمه بصدمه؛تكذبي فيا!!؟
عواطف:الزمي حدك ياخديجه سكتنالك هلبه راهو..
خديجه:اني اللي سكتت هلبه ومشيت بالذات للفرخة هادي اللي ناصرينها عليها..
سميرة بحزم:صفاء قولي شن صار!
شافتلها ابتسام بطرف عينها...
صفاء بإزدراء:لاحول ولاقوة بالله..والله والله ماقلت حاجه غلط ولادرت حاجه غلط..خشيت الصاله نشوف ولدي لقيت ولدها يكركر فيه حدي عيطت بس وجيت لولدي خديته ولما نشدتني عمتي شن في قلتلها ولد خديجه الشيطان..
قاطعتها خديجه وهي تقول..
/قلتي ولد خديجه الشيطانه..
صفاء:والله ما قلتها وعمتي شاهده..
خديجه:شن تبيني نكذب وذاني ونصدق شلولحه زيك ناقصة ربايه..
صفاء بعصبيه:احترمي نفسك خلاص عاد تحشمي ع سنك الهم وانتي حاطه راسك براسي راني في عمر بنتك..
وماتسكتش الا بصفعه قويه تجيها ع غفله..
كلهم جمدوا من الصدمه..
لكن صفاء انسحبت وطلعت بولدها وهي تبكي..
عواطف بغضب..
/مالقيتيش راجل يلمك انتي...
خديجه:مالموك انتي..خليني ساكته خير..
ابتسام كانت مصدومه في خديجه كيف فقدت الكنترول ع نفسها مرة وحده..غيرت نظرها لنجمه لما سمعتها قالت..
/تعرفي يابنت مغليه الحق مش فيك الحق فيا اني الله لايسامحني..
🍃وفنفس اللحظه..
صفاء وهي طالعه بولدها تبكي متوجهه لجناحها..
يخش راجلها للحوش ويشوفها ماشيه تبكي انصدم..
مشي طول لحقها وهو يسمع في اصوات النساوين عاليه ميز صوت خديجه مع صوت امه واخته..
عقد حواجبه بغضب وقال..
/صفاء..صفاء اوقفي..
وقفت صفاء وهي ضامه ولدها اللي كان يبكي وهي تبكي معاه..
وقف عليها وقال..
/خيرك!؟
وصفاء مستمرة في بالبكي بدون ماترد..
هو ركز ع وجهها شاف اثر الصفعه فتح عيونه ع وسعهم وقال..
/ضرباتك!!؟
مشت صفاء للجناح وخشتله وسكرت الباب..
هو قعد واقف يسمع في صوت بكاها بغضب بعدين جاه صوت خديجه وهي تقول..
"الله لايسامح هداكا النهار اللي لم بيني وبينكم"
شاف يساره لقاها رافعه ولدها متوجهة لباب الحوش..
فتحاته وطلعت ورفعاته وراها بقوة..
هني اشرف توقع انها دير جوها المعتاد قلب الطاوله لهذا فكر يسبقها..طلع تليفونه واتصل بخوه..
🍃🍃🍃🍃🍃
خش مختار للمربوعه شاف جده مقعمز يراجي فيه..
مشي قعمز مقابله وهو يقول..
/حاج علي شن حالك؟
علي بصرامه:خش في الموضوع طول..
هز راسه وقال..
/حاضر..جوني زوز خطابه لطوبى..
شد علي الواعر ع راس عكازه بقوة..
مختار:تعرفهم الزوز..المحامي عدي..وولد الفاندي ايمن كلموني عليها في عرس يوسف..
علي:طوبى معاش بنعطيها بكل...
مختار:والله هدا شي يرجعلها هي..
علي:لطفي الله يرحمه وصى كان اطلقت معاش نخليها تتزوج مرة تانيه..
مختار بإستغراب شديد..
/علاش!؟
علي:مادخلكش..
🍃في الكوجينه..
طلعت منها سدرة للجنان بش تاخد نعناع..
شافت جهة المربوعه لما سمعت صوت جدها عالي شويه تفكرت ان مختار يبي يكلمه في موضوع..
مشت طول ناحية المربوعه..
🍃مختار:ياجدي تبي ولا ماتبيش نقعد ولد ولدك واكبر احفادك والاخ الوحيد لخواتي واكبرهم والمسؤول عنهم بعد غياب بوي..
علي:معاش تقول بوي ومعاش تناديني جدي..
مختار بنبرة الم..
/الله يادنيا من قال..من قال اني اللي كنت عندك زي عيونك تكرهني هالكره هدا كله..
سكت علي وهو يشوفله..وبين عيونه جت ذكرى عمرها عقدين من الزمن..
🔺️🔺️🔺️في وقت سابق🔺️🔺️🔺️
مقعمزين في جنان حوش علي ويحكوا في الموضوع اللي آرق العيله كلها هداكا العام..
مختار بضيق؛بوي مايبيش يفهمني ياجدي..
علي:بوك خايف عليك ياولدي..
مختار؛خوفه عليا مكتفني ياجدي مخليني مش قادر ندير شي
ندير شي في حياتي..
علي:مش هكي يامختار..ياولدي بوك مايبيش يوقف في وجهك وفي نفس الوقت مايبيكش تخسر وضيع..هو يشوف فيك مازال تبي..تبي تتعلم تتحمل المسؤوليه تترس وتتعب بش تحس بقيمة القرش لما يشوفك وليت هكي صدقني حيعاونك بش تطلع برا وتشوف مستقبلك..
مختار بعدم اقتناع..
/لاياجدي لا..بوي مايبنيش نولي خير منه يبيني نقعد تحته..
علي:لايامختار غلط هكي حرام عليك..
مختار:باهي يخليني نعتمد ع نفسي يجربني يشوف شن يطلع مني..
علي:شن تقول يامختار هادي غربه ياولدي والغربه مش ساهله لو ماكنتش قدها ضيع..
هو بحزن قال..
/حتى انت تشوف فيا مش راجل ياجدي!
علي:راجل وسيد التريس لكن مش مشكله كان خدمت ع روحك شويه..اني ياولدي راهو نقدر نساعدك بش تسافر لكن رأيي من راي بوك نبيك تشد حيلك شويه بعدين دير ماتبي..
سكت مختار وهو مضايق ع الأخر..
طبطب جده ع ركبته وقال..
/زيد فكر سلم ولدي وحط في بالك جدك ديما معاك ووراك..
🔺️🔺️🔺️الوقت الحاضر🔺️🔺️🔺️
علي بحدة:اني معاش نستعرف بيك بكل ولا عاد تعنيلي في حاجه ووالله لولاها ماخليتك تخش حوش..
ابتسم تهكما وقال..
/طبعا هي الكل في الكل الحفيده الغاليه اللي خدت مكاني في كل شي حتى في قلبك..من يجي في غلاها سدرة..
علي الواعر بحده..
/كلامي ع طوبى هي اللي ترجتني بش خليتك تخش هني ومافي شي مخليني ساكت لتوا غيرها..
سكت مختار وهويشوف لجده بحده ودموعه في عيونه..
علي:ماتضغطش ع اعصابي اكثر من هكي..
مختار تمالك نفسه شويه بعدين قال..
/باهي سؤال واحد بس جاوبني عليه..صاير شي بينك وبين راجل غرفه لاحظت انك مواطي عليه العين واصل فيك دار شي واجعك!؟
ابتسم بتهكم وقال..
/اللي دار الموجعه انت بس..اللي حني فيه واللي صار فينا واللي قاعد يصير سببه انت بس..انت خليك اللي يسوا واللي مايسواش يتجرأ علينا..بعد كسرت والديك كسرت ظهور خواتك وخليت الناس يشوفوهم ناقصات لأنك خوهم...خوهم اللي بدال ماتعزهم سيرته ويتحاموا بيه ولى عزارهم...
علي ماكانش يقول في كلام..كان واخد معول يهد بيه في مختار من داخل..وفي الوقت نفس رفع غضبه لأعلى مستواياته...
شد ع قبضة يده بقوة وعيونه اللي كان غارقات بالدموع يشوفوا لجده وهو ماشي يقول..
/كان تبي دير خير في عمرك اخطانا..
طلع علي الواعر المربوعه وخلا مختار وسط حطام نفسه ونيران غضبه المشتعله..
وفي حالة زي هادي ديما مختار يفضل الهروب..
بسرعه طلع من المربوعه ومنها من الحوش بكل..
وقبل ليطلع بسيارته من الشارع كتب رساله لفاتن انه حيخليها تبات الليله وهو طلع لشغل ضروري..
☘ومن باب الحوش الدخلاني طلعت طوبى مع مروة تسقد فيها..
وصلوا في الباب الخارجي وطوبى تقول..
/خلاص غدوة نمشوا مع بعض بإذن الله تاخدوا اللي تبوه بعدين نمشوا للمدرسه..
مروة بإبتسامه:ان شاء الله..صحيتي بيبو..
طوبى بضحكه:سلمك ياحنه..فتحتلها الباب..
🍃مقابلهم كان محمد المهدي واقف ع عمه الجالي..
الزوز لما سمعوا الباب انفتح شافوله..
طلعت مروة بدون ماتشوف جيهتهم لكن طوبى قبل تسكر الباب شافت الجالي..انتفض قلبها من الخوف طول سكرت الباب وهي ترجف مع بعضها..
تنهد بضيق وشاف لولد خوه لقاه في عالم تاني شاف وين مايشبح..لقي مروة خاشه لحوش سدرة..
التفت لولد خوه وهو يقول بإبتسامه..
/لعند توا قاعد تشبح من بعيد!
شافله محمد وقال..
/اني حكمت ع روحي نقعد نشوف من بعيد وبس..
الكلام اللي قاله مس شي في الجالي خلاه يضايق ع الاخر مشي وخلاه وخش للحوش..
لكن محمد ولى للقهوة ومروة قاعده بين عيونه وفي قلبه..
*******
مروة:قالت غدوة نطلعوا مع بعض ناخدوا الحاجات وترفعنا للمدرسه..
ابتسمت مناسك..
فايزة؛بنزيدكم فلوس صدقه عن امي وبوي..
مروة بإبتسامه:تمام..ايه حقه ماما خالي مختار يهبل جوه مش عادي..
فايزة قالت..
/هدرز عليك؟!
مروة وهي مبتسمه..
/ايه..وقعد يحكي ع ايام زمان كيف كنتوا صحاب وتشجعوا في بعض ع السقاط..
ضحكت مناسك ضحكه خفيفه..
فايزة بإبتسامه حسرة..
/ايام معاش تولي..
مروة؛لكن تعرفي شخصيته حلوة وقنين هلبه لون عيونه يجنن زي لون عيون جنونه غير هي اغمق شوي..
مناسك بصوت مبحوح..
/شكلهم طيحوك عيونه..
مروة بضحكه؛زرق ياكبدي...
فايزة:باهي تحشمي شويه ونوضي وتي العشي..
ضحكت مروة وناضت مشت للكوجينه..
🍃🍃🍃🍃🍃
"انتي شن فهميني بشن معجونه شني!؟"
خديجه بعصبيه..
/بدل ماتنزل تاخدلي حقي تقولي في الدوة هادي تخليهم يتمادوا ع مرتك ويهينوها وعندك عادي!
محي الدين اشر عليها وهو يقول بغضب..
/انتي اللي تجيبي في الاهانه لروحك بروحك وانتي اللي تماديتي ع امي عليتي صوتك وكذبتيها..
خديجه بسخريه..
/شحنوك شحنه باهيه..
هو بنفاد صبر..
/من الاخير اني خلاص معاش قادر نتحملك معاش عندي ليك خلاص..
خديجه؛ولااني متحملاتك ونادمه ع اليوم اللي طيحت فيه من نفسي ورضيت بواحد زيك..
ساخرا رد؛كان ماخديتكش راك قاعده حدا امك لليوم..
دمعوا عيونها وهي تقول..
/كان ماخدتنيش راك ماوليتش بنادم..
تبدلت ملامح وجهه للحده وهو يشوفلها..
وهي تشوفله بغل وكبر..
وينهار هالكبر في لحظه لما سمعاته قال..
"انتي طالق"
محي الدين..
/وريني كيف مازال تولي بنادمه توا...
ومشي لباب الشقه فتحه وطلع سكره وراه بقوة..
وخلاها تحت تأثير الصدمه ودموعها ينزلوا...
🍃وهدا كله سمعاته راما اللي كانت منهارة بالبكاء وهي غامة روحها بالغطا...
🍃🍃🍃🍃🍃
الساعه 12:30ليلا..
رقدت بنتها وطلعت برا الدار...
كل من في الحوش راقد..من الهدوء اللي فيه تسمع في صوت قطرات ميه نازلات من شيشمة"صنبور" الكوجينه..
مشتلها وخشت..شافت الباب الخارجي مفتوح..استغربت..
مشت للشيشمه سكرتها..بعدين طلعت للجنان..
شافت سدرة مقعمزة تحت شجرة الياسمين وباين عليها تبكي بصمت..
تنهدت بأسف ومشتلها..
وقفت عليها وقالت.
/سديرتي..
غمضت عيونها بألم بعدين فتحتهم ورفعتهم فيها..
طوبى بقلق:شن مطلعك في الصقع!؟
سدرة بحزن:مش حاسه بشي..
قعمزت ع الكرسي اللي جنبها وقالت..
/علاش توجعي في قلبك..علاش تعذبي فيه!؟ حرام عليك راك تتحاسبي عليه كله..ياسدرة ياقلبي الراجل يحبك وانتي تحبيه وربي عطاكم فرصه بش تكونوا مع بعض علاش ضيعي فيها مرة تانيه..
سدرة؛بعد هدا كله مازال تقولي في فرصه!
طوبى:ايه فيه وفرصه كبيره..ماتخليش اللي صار فيا يوقف بيناتكم..مانبيش نفرقكم مرتين بالله عليك..
نزلوا دموع سدرة وهي تشوفلها بألم..
طوبى:كانك ع ماليه هو ع ايام عيشه ماخلا حد يوصل فيها يابال انتي اللي عنده الدنيا في كفة وانتي في كفه..سدرة مش كل وحده تلقى راجل يحبها زي مايحبك المهدي..وحتى انتي تحبيه هلبه..عيشي حبك معاه كملوا عمركم مع بعض داو جروحكم مع بعض..صدقيني ياسدرة ماصار هدا كله الا بش تكونوا لبعض في النهايه..
نزلت سدرة عيونها وقالت..
/وجعته هلبه اليوم..
بضحكه قالت..
/ع قلبه زي العسل شن ماديري فيه راضي..يابختك ياسديرة يابختك بيه..
شافتلها لقت في عيونها حزن رغم ضحكتها قالت..
/خيرك تتكلمي هكي!؟.
طوبى بضحكه:خيرني كيف نتكلم..
سدرة بحزن..
/صدقيني ياغلاي مافي راجل يستاهلك.
ضحكت بعدين قالت..
/هي نوضي خشي صقع تو تمرضي..
ناضت سدرة..خدت طوبى لحضنها وطوبى حاوطتها من وسطها..
ومشوا مع بعض خشوا وسكرت طوبى الباب كويس...
🍃🍃🍃🍃🍃🍃🍃
وتعدي هالليله ويطل نهار اليوم اللي بعده..
مع الساعه عشرة..
طلعوا طوبى وسدرة ومعاهم مروة ومناسك لمحلات الملابس ..
اطفال وكبار...خدوا اللي يقدروا عليه..وسدرة حتى ملابس للمواليد ..مع الساعة12 كملوا وتوجهوا للمدرسه...
🍃🍃🍃🍃
وفي المدرسه كانت جايه سيارة فيها مساعدات من كل شي يحتاجوه النازحين..
جايبه المهدي ومعاه ولده محمد..
🍃عبد القيوم:بارك الله فيك ياغالي عطيت كلمة وكنت عندها وهذي عادتك..
المهدي:تسلم ياغالي..مرر نظره المبنى بعدين شاف للسطوح وقال..
/شن يديروا!؟
عبد القيوم:يركبوا في زوز خزانات..
المهدي هز راسه والتفت بيشوف للمتطوعين وهما يوزعوا ف االمساعدات ومعاهم ولده محمد..
عبد القيوم:قناة***** جايين بيصوروا تقرير..
شاف المهدي وين مايشبح عبد القيوم..
لقي مذيعه شادة مايك ومعاها مصور..شافت جيهتهم وابتسمت بعدين قدمتلهم..
وصلت فيهم وقالت..
/السلام عليكم..
"استاذ عبد القيوم"
عبد القيوم:آسف نستأذن..ومشي وخلاهم..
ضحكت المذيعه وقالت..
/قعدنا حني بس..
هو يدوب ابتسم..
ابتسمت وقالت..
/حضرتك من الناس المسؤولين ع مركز الايواء هدا؟
المهدي؛تقدري تقولي هكي..
🍃في هاللحظه..
يخشوا سدرة وطوبى ومناسك ومروة..
طوبى شافت جيهتهم قالت بإبتسامه..
/جابهم الحمد لله..
شافوا وين ماتشبح..عيون سدرة ماجوش الا ع المهدي وهو مبتسم ويهدرز مع المذيعه..
رفعت حاجبها وقالت..
/شوفي بالله شوفي..كلهم زي بعض جنس نمرود..
طوبى ومروة شدوا ضحكاتهم..اما مناسك كانت تشوف لمحمد كيف واقف يشوف لمروة وهو متفاجئ..
سدرة:بالله هيا هيا..
ومشت وهي معصبه وهما وراها...
🍀ويجوا بعدهم اطباء مصحة القدس اللي من بينهم الدكتور خالد والدكتور اياد والدكتور اسامه والدكتورة اميمه ومعاهم تلاته ممرضات..
المهدي لما شاف اياد انقمص..واياد لما اضايق..
واسامه واميمه يتبادلوا في النظرات ومافيش بينهم كلام الا في الخدمه..
اما هناء وخالد بدوا يحكوا مع بعض هادي والجو بيناتهم كان لطيف بعض الشي...
🍃وفي هديكا المدرسه اللي حضنت عشرات العائلات الهاربه من ويلات الحروب..
لمت فيها كذلك القلوب المتولعه بالحب العذري النظيف الصافي..
🌼سدرة في اليوم كانت منطلقه اكثر..
تتنقل بين العائلات النازحه تهدرز عليهم وتتعرف ع واوضاعهم بشكل اعمق..لعلهم بالفضفضه يطلعوا شويه من اللي في قلوبهم..
وعيون المهدي اللي مدرقتهم النظارات تلحق فيها وين ماتمشي وولده مركز عليه
🌸من جهة تانيه كانت طوبى مع مناسك ومروة في حجرة الاطفال..
يلعبوا معاهم ويرسموا ويهدرزوا..
مناسك نفسيتها تحسنت بعض الشي بالذات بعد ماصدقت عن خوها وسدت حاجة هلبه ناس
******
مناسك:لكن حالهم يوجع هلبه
طوبى:قاعدين خير من غيرهم في اللي قعدوا بايتين في الشوارع والحمامات العامه..
بقهر قالت مناسك:الله ينزع الحروب ويخلصنا منها
الزوز أمنوا وراء دعائها..
وكملوا طريقهم وهما ماشيات في الممر..
والتارقي واقف ع واحد في اخره من ورائهم وهو يشوفلهم مرة مرة..عيونه اكثر شي ع الشاب اللي من الفريق التطوعي اللي كان واقف في اخر الممر مقابلهم وواضح جدا انه ناوي يوقف طوبى..
وفعلا هدا اللي صار..
🍃طوبى بجديه..
/تفضل..
هو بإبتسامه قال..
/سمعت انك رسامه بنطلب منك خدمه بهالخصوص..
طوبى:اللي هي !؟
هو قال:عندي بنت اختي نبي نعطيك صورة ليها ترسميها..
طلع الصورة ومدها لطوبى..
ومناسك ومروة يتفرجوا..توسعوا عيونهم ع الاخر لما فجأة شافوا التارقي بدون سابق انذار واقف قدامه وهو يقول..
/خير حبيبي شن مشكلتك قولي عليها وانا نحلها ان شاء الله..ابله طوبى ماتبيش من يصبي عليها ولايكلمها..
وحاوطه من كتفه وخداه معاه..
الشاب يبي يوضحله وهو يلتفت لطوبى لفله وجهه القدام وتباعد بيه عنهم..
مروة هني حست ان اللقطه مش طبيعيه..
اما مناسك قالت همسا في وذنها..
/يبيها!؟
مروة بتعجب:زعمه!؟
وطوبى اللي كان وجهها محمر خجلا قالت..
/قالتلك عليه مروة هدا جارنا وحني حاسبينه من العيله..
مناسك:اها..فهمت..
طوبى:هيا تعالوا..
ومشت وقلبها يدق بقوة وهما معاها...
🍃🍃🍃🍃🍃
ويرجعوا يجتمعوا في الساحه..
المهدي ومحمد حدا سيارة المساعدات وعيونهم ع مروة وسدرة وهما واقفات ع ابله شروق..
واميمه واقفه حدا المستوصف ع بنية تلملها في شعرها واسامه واقف بعيد عليها شويه يتأمل فيها..
والتارقي من جهة تانيه واقف ع استاذ فتحي يحكوا عن الحرب واخبارها..
شويه وطلعت طوبى من المبنى وفي يدها ورقه مكتوب فيها احتياجياتهم من الادويه لمرضى كبار السن..
وهي ماشيه شافت للمهدي وسدرة كيف يسرقوا في النظرات لبعض ابتسمت..
وماتندريش ع اللي قاعد يصير فوقها بالزبط..
العمال اللي يركبوا في الخزان حطوا بلوكه"طوبة" فوق السياج ماكانتش محطوطه كويس ..واحد منهم كان يمشي وهو يوخر ويهدرز وصل في السياج بيتكأ لما اتكا عليها تحركت وطاحت من فوق..
اول من شافها مرة صرخت بأعلى صوتها..
"حولي ياطوبى"
كلهم شافولها..سدرة عيطت ع طول حسها..
وفي من مشالها يجري ومنهم المهدي..
وهي من فجعتها وعدم تركيزها معاش قدرت تتحرك..
وفي لحظه حست حد خداها وبعدها بعدين سمعت صوت البلوكه طاحت..شافتها..طاحت ع رجله..
في عز رعشتها وخوفها جوها اميمه وهناء خدوها بسرعه ورفعوها للمستوصف لأنها شبه داخت...
#كانون_الاول
#طوبى
...يتبع.....
.