#طوبى "جنة طوبى"
#جمان_فريد
#الجزء_114"يستاهل فرصة ثانيه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أدرك حين أغوص هادئاً إلى أعماق قلبي، أنني كنت على حق، على حق تماماً".🍃
_______________________________________
يستاهل فرصة تانيه !؟
الفرصة التانيه..
كل حد لازم ياخد فرصته التانيه في الحياة في انه يغير من نفسه..يصوب اخطائه..يصلح ماافسد..
لازم ياخد فرصته ينجح بعد فشل..يفرح بعد حزن..
يبدا حياته من اول وجديد..
يطيب جروح قلبه وقلوب ناس زعلهم وآذاهم ويفتح معاهم صفحة جديد..
في اللي يطلب الفرصه..وفي اللي تجيه لحد عنده..
بس يقعد السؤال الأهم هني هل كل من طلب ياخد فرصة تانيه يستاهلها!!؟..
جواب السؤال هدا ينعرف بعد ماياخد هالشخص فرصته..
ينعرف من اللي بيديره بعدها اذا كان يستاهلها ولالا..
🌼الأقحوانه صاحبة القلب الابيض..
اكانت مقعمزة في حجرة جنه في فيلا مختار شاده في يدها لعبه وتشوف للفراغ وهي سرحانه بتفكيرها والاسئله دور في عقلها..
"هل مختار كان لازم ياخد فرصة تانيه !؟
هل هو فعلا كان يستاهل فرصة تانيه!؟"
🍃ومختار في هاللحظه وقف قدام باب الحجره وهو يشوفلها..ركز بنظره ع اللعبه اللي شادتها..لعبه قطنيه ع هيئة طفله..
رد نظره ليها بسرعه بعد ماسمعها عطست..
عطسه لحقوها خواتها..وحده ورا التانيه ولما وقفت هو قال بإبتسامه ونبرة تساؤل ساخرة..
"انضربتي؟"
شافتله وقالت..
/شن صار معاك!؟
ربع ايديه واتكا بكتفه ع قفص الباب وهو يقول بإبتسامه غرور..
/معاش في كورونا..
تنهدت وقالت..
/باهي الحمد لله..قلت لفاتن..
مختار:انتي اول من خبرت..
غيرت نظرها للعبه وقالت..
/خبرها..
رد نظره للعبه وقال..
/غالبك شوقك لبنتك؟
طوبى وهي تشوف للعبه بإبتسامه وعيون مدمعه..
/ايه..ومجبوره نقعد بعيد وشكلي مازال بنطول..
شافتله وقالت..
/ع قولتك شكلي انضربت وحتى امينه نحس فيها مش مزبوطه..
مختار قعد يشوفلها وهو محتفظ بصمته..
طوبى بإبتسامه..
/قول لأقجم يرفعك للعمارة كان ماتبيش تقعد..
عدل وقفته وحط ايديه في جيوبه وهو يقول..
/مش حنخليك ديريلي جميل تعلقيني فيه من رقبتي حنردلك دينك وزيادة..
ضحكت ضحكة خفيفه وردت نظرها للعبه..
مختار:شن تحسي توا!؟
طوبى:صداع..خشمي يوجع فيا..ورقبتي تخربش..
مختار:تمام...
ومشي وخلاها..
شافت للباب بعدين ضحكت...
🍃فرصة تانيه..
احيانا البعض يرفض يعطي من يبي فرصة تانيه الحق في انه ياخدها .
يحكموا عليه حكم نهائي بسبب اخطاء ارتكبها في الماضي خلتهم يحقدوا عليه لدرجة يمنعوه حقه ياخد فرصته بش يمسح الماضي المليان ذنوب ويكتب حاضر يكفر بيهم عنه ويعيش مرتاح...
🍃🍃
"علاش يامنيه الراجل فرصة يابنتي مايتعوضش"
منية بضيق؛ماانسجمتش معاه..
مرت خوها بأسف..
/منيه انتي قاعده متأمله في قصتك مع عمر!؟
نزلت عيونها لإيديها اللي كانت تفرك فيهم ببعض..
حطت مرت خوها ايدها عليهم وقالت..
/حولي الموضوع هدا من راسك امك وبوك لو شن يصير مش حيرضوا بالذات عمي ولاخوتك يامنيه..انتي ماناقصك شي بش تاخدي واحد مطلق مرتين وعيلته ماتنفعش منيه انتي شاهده ع اللي عاناته جارتكم معقوله هدا كله ماخلاكش تصرفي نظر!؟
تنهدت بألم وقالت..
/حبيته هلبه ومش قادرة نتقبل غيره مش بيدي..
مرت خوها..
/شن شكل علاقتكم توا!؟
منيه بحزن..
/قاعده صداقه بس حسيته كأنه بادي يلمح عن موضوع الزواج..
حولت يدها وقالت..
/فوتيه يامنيه بالله عليك..هدا لاسلمت منه المراة اللي يحبها ولا بنت خاله،اهله ماداروش في بنت خاله خير شن تراجي منهم!؟ حطي عقلك في راسك يامنيه تربحي ماضيعيش روحك..
🍃منيه حبت عمر بس ماقدرتش ترتاحله ولاقدرت تبعد عنه وتنساه كانت متشتته بين قلبها وعقلها ومش عارفه رأي مني تاخد بيه..
بينما عمر كان حاس برغبه انه يبدا يعيش حياته صح يستقر ويدير عيله ويطلع من جو عيلته اللي زاد تعب نفسيته..
هو حاليا مرتاح لمنيه وبدي يفكر بجديه في الزواج منها وع باله ان مافيش عوائق بينهم هو هكي حس من كلام منيه وتصرفاتها معاه..
من حق عمر ياخد فرصه تانيه..لكن هل محيطه حيخلوه ياخدها زي مايتمنى!!؟🍃
🍃🍃
بس في من ماكانش يراجي في فرصة تانيه ولايبيها ولايفكر فيها..كل تركيزه واهتمامه ع حاجات تانيه اهم عنده خلاته يرفض يفكر في نفسه حتى شويه...
🌸"اميمه قالتله رد بالك تجي لحوش جدي"
غرفه:عندها الحق مفروض يكون بعيد الفترة هادي جدي كبير مايقدرش يقاوم الكورونا..
اريج بضيق:عقلي كله عند طوبى اليوم كلمتها صوتها ماعجبنيش..
غرفه بإستياء:واضح من البداية يااريج هو طلع منها زي الجن وهي الله اعلم شن يصير فيها..
اريج تنفست بخوف وقالت..
/تخيلي لو جتها الكورونا حق يلزها!؟
غرفه وعيونها تعبوا دموع قالت بنبرة غضب..
/ومش متوقعه منه غير هكي بالناقص منه اني نعانيها طوبى تجيني هني واني نعانيها..
☘وصفيه اللي كانت لاهية مع الصغار في دارهم تغدي فيهم تسمع في كلام غرفه بقلق وضيق..
🍃"مش مستوعب بجديات المراة هادي شنو بالزبط مش عارف"
المحجوب بضيق:طوبى قلبها طيب هلبه زي وردة اختي طيبتها ديما غالبتها..
حسين بضيق وشي من العصبيه..
/طبعها هدا بيودرها..
تنهد المحجوب بضيق وكان حاس بقلبه مغموم..
مسح حسين بإيديه ع وجهه بعدين قال..
/تو ندبر كيف نمشيلهم ونشوفها ويصير اللي يصير..من غير شي اميمه ماخلتنيش نخش حوش جدي امي شفتها في جنان حوش عبد الرؤوف الله يرحمه نحجر روحي هني وخلاص..
هز المحجوب راسه وقال..
/باهي شن وضع الحرب بالزبط؟
حسين:لاخلاص اعتبرها انتهت..
ابتسم المحجوب تهكما..
حسين:مامشيتيش لشارع القهوة بكل المده اللي فاتت!؟
المحجوب:مشيت مرتين ع خاطر حكاية الورث..
عقد حسين حواجبه وقال..
/ايه حقه شن صار فيه!؟
المحجوب:عبد الرؤوف الله يرحمه خلا تركه كبيرة زي ماتعرف وصغاره قاعدين صغيرين امهم توا هي الوصية عليهم..
حسين:الرزق اللي خلاه يبي من يمشي اموره..
ابتسم المحجوب وقال..
/هي توا تمشي فيه..
رفع حواجبه وع وجهه باديه ملامح المفاجأه..
المحجوب بإبتسامه..
/الله يبارك طلعت عندها خلفيه عن بعض الامور واني ساعدتها شويه وزي ماتعرف الوضع توا متأزم بسبب الكورونا في أمور استعنت بتجار نعرفهم بش نقدر نمشيهم..
حسين قعد ملتزم الصمت وهو يفكر..
المحجوب:في عنده مشروع معرض سيارات الحرب وقفاته عندك عليه خلفيه؟
حسين:ايه حكالي عليه ومشارك فيه واحد نعرفه اسمه عدنان الاشتر..
المحجوب:ايه..غرفه قالت انها تبي تكمل فيه..
ضحك حسين غصب عنه..
المحجوب بإبتسامه:خيرك!؟
مسح حسين بإيديه ع وجهه وهو يضحك بعدين قال..
/شي..بس يعني متفاجئ شويه..
المحجوب بإبتسامه.
/حتى اني في البدايه تفاجئت بس بعدين قلت لنفسي حتى هي بنت الواعر..
ابتسم حسين وهو يهز في راسه بعدين قال..
/غير ربك يفرجها موضوع المعرض هدا خليه عليا اني نعرف الراجل وتو نتفاهم معاه..
المحجوب:كويس..ناض وقف وهو يقول..هي مالا اني اسمحلي بنلحق نوصل الحوش قبل المغرب..
ناض حسين وقال..
/زي ماقتلك موضوع طوبى خليه عليا..
المحجوب:حاول ع قد ماتقدر طلعها من غادي..
هز حسين راسه وقال..
/إن شاء الله...
🍃🍃
هاليوم كان اخر يوم في شهر رمضان المبارك..
انفرض حظر اربعه وعشرين ساعه خلال ايام العيد الكورونا فهداكا العام خطفت البهجه من حياتنا وماخلتنا نحسوا بأي شي حلو مر علينا..
🍃لكن في اللي غير الكورونا منغص عليه حياته وحارمه يعيش مرتاح مهما حاولوا اللي حواليه يسعدوه..
وهدا كان حال سدرة المنتهى..سدرة من بعد الكلام اللي سمعاته من الجالي وهي فعالم تاني مابتش تقول للمهدي عنه وهو لاحظ انها مهمومه بزايد المده الأخيره وفكر ان المشكله اللي صارت بينها وبين نجاة هي السبب،كان يحاول ع قد مايقدر يغير جوها برغم انها كانت تحاول ع قد ماتقدر تكون عاديه قدامه ومع الصغار لكن ماقدرتش درق حالها عن حبيب روحها اللي يعرفها من عيونها..
🍃وسلفتها اللي كانت كعادتها لازم تخلي كل شي يجي لصالحها اقنعت راجلها يخليها تعيد في حوش العيله..
"ردي بالك بعدين تجي تشكي ايوه"
نجاه بضحكه:قتلك بنطنشها ونتجنبها المهم نكونوا حدا عمتي في العيد..
بلامبالاة قال..
/باهي طفي الضي وانتي طالعه..
ورقد بعد ماعطاها بالظهر مررت نظراتها عليه شويه بعدين طفت الضي وطلعت من الدار...
🍃🍃🍃🍃
ويجي العيد..وتمشي نجاة بصغارها لحوش العيله بش تعيد معاهم وزي ماتوقعت مش حتلقى سدرة غادي لكن اللي فاجئها حال خديجه كانت بكامل اناقتها وصابغه شعرها وحاطه زينه وعايشه جوها زي مانقولوا ولاكأن صار معاها شي...
حالها هدا مافاجئش سميرة اللي ولت تعرف خديجه كويس برغم قصر المده اللي عاشرتها فيها انسانه انانيه بإمتياز مافي حد يهمها اكثر من نفسها..
🍃وبأي حال عدت ياعيد ع حوش الصيد..
بعد ماعدت ايام العيد الأولى وانفك حظر 24ساعه...
تجددت احزانهم بحضور سميرة اللي اصرت ع اهلها يرفعوها تعيد ع عزوزتها..
نجمة لما لاقتها حضنتها بقوة وبكت بشده كانت عارفه مدى حب عبد الفتاح ليهاوهي ضم فيها حست انها ضم في ولدها..
بكت كل من شاف وسمع بكاهم وكأن عبد الفتاح مات اليوم..
وطبعا مستحيل تريح الفرصه هادي ع ابتسام وخوتها اللي وافقوا بدون بتردد ع طلبها لما قالت بتمشي تعيد عليهم..
ووين خشت ع نجمه بصغارها..نظر نجمه كان ع احفادها بس قعدت ضم فيهم وتشم في ريحتهم وهي تبكي بألم..
وابتسام وهي تشوف فيها برغم الدموع اللي كانت تنزل من عيونها الا عقلها كان في مكان تاني..
🍃في الكوجينه وهما يجهزوا في العشي ابتسام وهي تنزل في الدموع من عيونها..
/كل يوم ينشدوا عليك وع حناهم وجدهم هادي ندى تبكي بكي في الليل تقول نبي نرقد مع عمتي عواطف..
عواطف بشفقه ودموعها في عيونها..
/ياروحي..
"عواطف"
عواطف:محي الدين خش خش..
ساوت ابتسام وشاحها ع خشته هو وهو يقول..
/السلام عليكم..
التفتت ابتسام شافتله بإبتسامه خفيفه..
/وعليكم السلام..كل سنة وانت طيب..
هو يدوب سرقلها النظر قال..
/كل عام وانتي بخير..شن حالك وحال العيله..
ابتسام:الحمد لله..شن حالك انت؟
محي الدين:ماشي الحال..
عواطف اللي كانت تمرر في نظرها بيناتهم قالت..
/تبي حاجه؟
محي الدين:لاغير جيت بنسأل ابتسام كان الصغار محتاجين شي ولايبوا شي..
هي بإبتسامه قالت..
/بارك الله فيك...
محي الدين:اني عمهم يعني بوهم شن مامحتاجين قولي ياابتسام..
هي قالت:ربي مايحرمهم منكم والله مامحتاجين حاجه..
هز راسه وقال..
/تمام..ع العموم كان احتجتوا شي قولي لعواطف طول مايردك شي..
هزت راسها وقالت..
/ربي يحفظك..
سرقلها نظره ومشي بيطلع وهو يقول..
/السلام عليكم..
ردوا عليه واخته معاه بعيونها لين طلع بعدين شافت لإبتسام لما قالت..
/تبي نعاونك في حاجه؟
عواطف:طلعي الصفر من ورا الدولاب..
ابتسام ومشت طول للدولاب وعواطف معاها بنظرها وهي تفكر..
🍃🍃🍃🍃
"من الصبح نتصل بيها ماتردش"
غرفه بقلق:كلمي هداكا كان عندك رقمه..
اريج بقلق:اتصلت بيه لقيته مسكر..
تأففت غرفه بخوف..
🍃طوبى ليها اربعه ايام تعاني من اعراض الكورونا..
قاعده في حجرة بروحها راقده ع سرير بتعب اليوم بالذات اشتدت عليها الاعراض..
صداع..وارتفاع الحرارة..هدا غير الزكمه والكحه"السعال"
كانت حاسه بتعب وانهاك شديد فوق اللي هي فيه كان عليها العذر الشرعي زاد الوضع سوء..
وفي نفس الفيلا..
كانت امينه تعاني من اعراض الكورونا والممرضة "سوناتا" هي اللي تولت مسؤولية العنايه بيها..
🍃امينه وهي راقده في سريرها قالت بتعب..
/طوبى كويسه؟
سوناتا وهي تحط في جرعة المضاد في كيس التغديه..
/ايه كويس كويس..
لازم طمنها وان كان كذبا بش ترتاح نفسيتها وتتجاوب مع العلاج...
🍃وشن يريح نفسية سدرة بعد ماعرفت من اريج ان طوبى مرضت بالكورونا!...
اتصلت بيها ماردتش ورقم مختار مسكر عقلها كاد يطير من الخوف عليها...
"تبي نمشيلهم غادي!؟"
سدرة وهي تمسح في دموعها قالت بخوف..
/لالا رد بالك ديرها رد بالك حسين خوي قال بيمشيلها تو يطمنا عليها ان شاء الله..
خدي سدرة لقلبه وقعد يمسح ع شعرها وهو يقول..
/باهي هدي نفسك شويه بإذن الله زي مابري مختار هي تبرا منها...
ضماته سدرة بقوة وهي تبكي بصمت..
وهو يطبطب عليها وكله قلق وخوف..
🍃🍃🍃🍃🍃
فتح باب الدار وخش..
مشالها وهو يشوفلها بنظرات كلها قلق..
لما وصل فيها قعمز مقابلها ع السرير وهو يسمع فيها تقول..
"لاإله إلا الله..لاإله إلا الله"
وجهها شاحب شعرها الطويل كان يدوب مضموم في منه نازل ع وجهها وباله العرق..
نزل نظره ليدها اليمين اللي كانت حاطتها ع بطنها..
"يارب..يارب"
رد نظره لوجهها شافها يدوب فتحت عيونها..كانت تشوفله..
قربلها..مد يده لشعرها بعده عن وجهها وهو يقول..
"طوبى"..
بدت تبكي..هو حس بوجع في قلبه..وجع عضوي مش بس معنوي..حط يده ع مكانه وقعد يدلك فيه..بعدين زاد قربلها وحط يده ع خدها وهو يقول..
/طوبى..
هي رفعت يدها اللي كانت حاطتها ع بطنها..خدت بيها يده وشدتها بقوة وهي تبكي وتتألم وتقول..
"يارب"
ناض وقعمز جنبها وخداها في حضنه وقعد يمسح ع شعرها..
وهي شاده فيه وتبكي ومازال تردد..
"يارب"
ع جية سوناتا وفي يدها كوبايه مليسا..
مد يده مختار وهو يقول..
/هاتي هاتي..
عطاته وهو خداها وقال..
/طوبى قوي روحك شدي حيلك..طوبى..
حاولت تتماسك..تباعدت عنه شويه وهي تشوف للكوب في يده..
وسوناتا تشوفلها بنظرات كلها ألم..
مختار:هي اشربي مليسا يامليسا..
يدوب بانت ع وجهها ملامح الضحكه..
وهو ضحك وبدي يشرب فيها..
والممرضة تمرر في نظرها عليهم بإبتسامه...
🍃بعد ماشربها المليسا..وعطتها سوناتا الدواء..رقدت..
وهو قعد سهران جنبها يديرلها في الكمادات وبدون مايحس خداه النوم ورقد ع الكرسي اللي كان مقعمز عليه مقابلها..
🍃النوم اللي ماعرفش طريق في هالليله لعيون سدرة..
قعدت سهرانه للفجر في الصالون وهي تخمم وتبكي..
والمهدي كان حاس بيها وفضل يخليها ع راحتها...
🍃🍃🍃🍃
الساعه 9:40صباحا..
فتح عيونه شويه شويه...خدي نفس..مرر نظره ع السقف..
غمض عيونه وفتحهم بعدين نزل نظره للسرير لقاه فاضي..
عقد حواجبه بإستغراب..مرر نظره ع الدار بعدين ناض ومشي بيطلع..وقف لما شافها خاشه وهي تمسح في وجهها بالمنشف..
شافاته وقالت..
/صباح الخير..
ابتسم وقال..
/شكلها الامور تمام..
طوبى:حسيت روحي خير من امس..لكن مانشم في شي بكل..
مختار:تاخد وقتها وتعدي..
قعمزت ع السرير وقالت..
/قداش يعني!؟
مختار :اسبوعين هكي..
عقدت حواجبها بضيق وقالت..
/استغفر الله وكأني مش عايشه..سبحانك ربي مانحسوا بنعمك علينا الا بعد مانفقدوها..
ابتسم وقال..
/خل نمشي ناخد دوش وندير طلة ع امينه ونجيك..
طوبى:تليفوني وين!؟
اشرلها ع الزيانه بعيونه..شافاته وقالت..
/مااتصل حد!؟
مختار:اكيد اتصلوا..اني خليته صامت وسكرت تليفوني..
هي بصدمه:علاش!؟
عقد حواجبه وقال..
/عارف شن بيقولولك.. من خوفهم عليك حيلوموا ويعاتبوا ويحرقولك دمك ومش حيراعوا الوضع اللي انتي فيه..
طوبى ناضت ومشت الزيانه وهي تقول بضيق ..
/علاش مافكرتش في وضعهم هما..
هو ببرود قال..
/ع اساس هما فكروا في وضعي قبل..ومشي طلع من الدار..
تنهدت طوبى بضيق وخدت التليفون...
حاولت تفتحه لقت شحنه فاضي..استغفرت ومشت لخيط الشحن اللي كان عالق في الضي وصلاته بالتليفون..بعدين مشت للسرير تمددت عليه بتعب وغمضت عيونها..
🍃🍃🍃🍃
"ايوه سدرة بنتي كيف الحال"
سدرة:الحمد لله كيف حالك انت وكيف حال نبيله..
"الحمد لله شن حال المهدي"
سدرة:الحمدلله..خالي فاضي بعد العصر!؟
"ايه فاضي ماعندي شي"
سدرة:باهي تقدر تجي لشارع القهوة نبي نشوفك في حوش طوبى..
"علاش؟!"
سدرة؛تقدر تجي ولالا؟
"نقدر نقدر لكن علاش صاير شي!؟"
تنهدت وقالت..
/لاماصاير شي اني نبيك في موضوع ضروري.
"تمام تمام..خلاص بعد العصر نكون غادي بإذن الله"
هزت سدرة راسها وهي تقول..
/نراجي فيك..
🍃"كلمتني وقالت نبي مفتاح الحوش"
صفيه بإستغراب:زعمه علاش!؟
غرفه بتفكير..
/مرات قدرت توصل في طوبى وقنتعها تروح..
اريج:ان شاء الله يكون هكي يارب..
صفيه:معاش اتصلتوا بيها!؟
اريج بضيق..
/اتصلت الصبح عطاني مقفل..
تأففت غرفه هي تمسح بيدها ع شعرها للخلف..
وصفيه وهي تشوفلها قالت..
/يستر الله...
🍃🍃🍃🍃
ويمشي حسين لفيلا مختار ويستقبله الأقجم اللي يخبره ان مختار مايستقبل في حد الفترة هادي..
الأقجم:عارف الوضع الفيلا توا تشبه مركز العزل..
حط ايديه ورا ظهره وهو عاقد حواجبه قال بشي من الحده..
/اني نبي نعرف حال بنت عمي من هي نفسها ومش متحرك من هني لين نسمع صوتها ولانشوفها..
شاف الاقجم الاصرار في عيونه وملامح العصبيه ع وجهه خلاته يقول..
/استنى شويه..
وتباعد عنه واجرى اتصال بمختار...
لحظات...وجاه وهو يقول..
/هي حاليا راقده لاتقدر تكلمها ولاتشوفها...
مد حسين يده وقعد يحرك فيها وهو يقول..
/هات تليفونك هات..
الاقجم شافله شويه بعدين مد التليفون..
خداه حسين وخش ع سجل المكالمات اتصل بأخر رقم كلمه الأقجم..
مرر الاقجم نظره عليه وع بدلة الصاعقه اللي كان لابسها ابتسم ابتسامه خفيفه وقال في نفسه..
"واعرين ياسي"
حسين بشي العصبيه..
/المراة وين شن درتلها!؟
"يالطيف!؟ هدي هدي ياافندي خيرك راك تنسى اني خوها"
حسين:لاوالله ماناسي للأسف..
"تمام معذور من خوفك عليها لكن نطمنك اختي في عيوني ووضعها الصحي يعتبر كويس ماتخافش عليها ونعاود نقولك هي عند خوها"
حسين:بنجي مرة تانيه وبنشوفها..
ونهي المكالمه ومد التليفون للأقجم بعدين مشي طلع من الفيلا..
ضحك الأقجم ضحكه خفيفه ورجع اتصل بمختار..
🍃ومختار في هالوقت كان واقف في باب حجرة طوبى وهو يشوفلها كيف غارقه في النوم..
جاه اتصال الاقجم سكر الباب ورد عليه وهو يتباعد من قدام الدار..
مختار:مش مشكله صار خير..
"سلامته نار حمرا كان كترت معاه في الدوة راهو مد يده"
مختار:اني اللي نعرفه..اسمع برا لحوش مخلوف وشوف المدام كان محتاجه شي..
"حاضر"
نهي مختار المكالمه لما وصل في حجرة مكتبه وخشلها...
🍃🍃🍃🍃
بعد العصر..
مفرشات حصيرة في بالكونة الكوجينه ومقعمزات عليها وهما يشربوا في القهوة..
سلافه بإبتسامه..
/اتصلت فيها ع عيد وهنيتها لو سمعتيها كيف عم تحكي معي ياميوش..
ميار بإبتسامه مفاجأة..
/لالا هدا تطور خطير..
سلافه بضحكه..
/اتصلت بماما مرتين برمضان ووصتها اذا احتاجت لشي نحكي معه..
ضحكت ميار وقالت..
/جو..تعرفي في شي صاير مش بلاش عمته قاعده تبني في العلاقات..
سلافه بإبتسامه أمل..
/انا كمان تفائلت كثير حسيت انه في شي تغير بهالفترة..
تبددت ابتسامتها وحلت محلها ملامح الضيق وهي تقول..يمكن يكون احساس بالذنب مو اكثر..
ميار:ماتوصلش لهالدرجة ومااعتقدش هو حاكي لماليه شي زي هدا...
تنهدت سلافه والتزمت الصمت وهي تفكر...
🍃🍃🍃
واللي يحكوا عنه كان مقعمز في سيارته يتفرج ع فيديو اعلان نهاية الحرب في العاصمه..
الاعلان اللي بعد ماشافوه اهل العاصمه بعد حمد لله سألوه تكون الأخيره ويرجعوا يعيشوا بأمان الأمان اللي فقدوه من سنين طويله..
انتهي الاعلان..هو تنهد بعدين حط ع سجل المكالمات..
حط ع رقم مختار...اتصل بيه قبل وعرف انه شفي من المرض لكن ماقدرش يسأله عن طوبى خاف يسأل بطريقه تفضح مشاعره اللي معاش عنده قدرة يدسهم اكثر من هكي..
خدي نفس عميق...وكيف جي بيتصل..سمع صوت باب حوشها انفتح..
فز قلبه ورفع راسه طول وشافله...
لقي سدرة خاشة للحوش استغرب وفي نفس الوقت حس بشي من الفرح لما توقع ان طوبى حتروح...
رجع شاف للتليفون واتصل طول بمختار...
🍃مختار وقتها كان مقعمز مقابل السرير اللي راقده عليه طوبى ويقرا في رواية لكاتبه المفضل..
غير نظره ليها بعدين ناض قربلها حط يده ع جبهتها بعدها وقال..
/كويس..
وخر ورجع للكرسي وقعمز وقبل ليولي للقرايه جاه الاتصال..
طلع التليفون من وهي يقول..
/غير علاش فتحته بس..شاف المتصل رفع حواجبه..فتح الخط ورد..
/ياهلا..
"كيف الحال"
مختار:عال العال وانت مازال ماجاتكش الكورونا..
"لعند توا مازال..نفكر نديرلك زيارة بش تجيني"
حرك مختار عيونه لطوبى لقاها تتحرك ابتسم وقال.
/شد مكانك مانبي حد يجيني..
"انا واحد بارد صحيح وجه ربع ساعه وتلقاني قدامك"
ونهي المكالمه..
بعد مختار التليفون وهو يشوفله ويضحك بتعجب..
"من كنت تكلم"
نزل التليفون وهو يشوفلها قال..
/واحد ماتعرفيشي..
غيرت نظرها عنه..بعدين ناضت قعمزت وهي تقول..
/الساعه قداش!؟
مختار:السته وربع..
فتحت عيونها ع وسعهم بصدمه وهي تقول.
/احلف!
ناض من مكانه وعطاها التليفون بش تشوف الساعه..
خداته وشافتها..ضيقت عيونها وقالت..
/معقوله رقدت هدا كله!؟
مختار:الدوا فيه منوم وانتي ليك فترة مارقدتيش كويس..
تنهدت ومدتله التليفون..خداه وهو يقول..
/شن تحسي روحك!؟
طوبى:فاشلة شويه..حاولت تقيم شعرها فوق حست بروحها مش قادرة..
نزلت ايديها وحطتهم ع رجليها وهي تتنفس بشي من الصعوبه..
مختار:داهشة؟!
طوبى بضيق:شويه..
بدت ع وجهه ملامح الاستياء حط الكتاب والتليفون ع الكامدينو بعدين قربلها رفع شعرها فوق وقعد يلف فيه ويرفع فيه وهو يقول بضحكه..
/ماشاء الله ماشاء الله..
ابتسمت بتعب.
مختار:ماعندكش حاجه نشده بيها..
مدتله يدها اليسار..شاف ع رسغ يدها سريتشا سودا لابستها..
فكها وشد بيها شعرها وهو يقول..
/جعانه!؟
طوبى:جعانه لكن مانبيش ناكل مش حنحس بشي وكأني ناكل في تراب..
وخر وقال.
/مجبورة تاكلي شويه ويجيبولك ماتاكلي..
شافتله وقالت..
/شن حال امينه..
مختار:كويسه نوعا ما..مشي بإتجاه الباب وهو يقول شويه وجاي..
تبعاته بعيونها لين طلع..نزلت من السرير ومشت لتليفونها..
وصلت فيه وخداته من الشحن..
فتحاته وولت قعمزت ع السرير وهي حاسة بشي من الدوخه..
مازال فيها الدهشه بس ماكانتش قويه هلبه..حطت يدها ع صدرها..وحطت ع رقم اريج واتصلت بيها...
🍃🍃🍃
واريج مازال في حوش غرفه حاطه جنه في حجرها ومخليتها تتفرج ع فيديو لأمها وهي تغني بدون مايبان وجهها..
جنه شاده التليفون بإيديها الزوز وهي تتفرج وتغني مع امها واريج تسمع فيها ودموعها تنزل..
انقطع صوت طوبى وحل محله اتصالها اللي فزز قلب اريج خدت التليفون بلهفه وفتحت الخط وردت..
/بيبو!..
تسمعها غرفه اللي كانت في الكوجينه تسيب كل شي في يدها وتطلع تجري للصالون..
اريج بلهفه ونبرة باكيه..
/وينك وينك ياحمارة ياقردة..
ضحكت طوبى وقالت..
"بنت احترمي نفسك مش كان اكبر مني تنسي اني خالتك"
اريج:بري عليا غادي وقوليلي شن حالك..
"معاش عرفت نسكر عليك ولانجاوبك"
بنرفزة قالت..
/خلاص عاد بلا براده قولي شن حالك..
"الحمد لله الحمد لله حالي احسن اليوم امس تعبت شويه بس اليوم كويسه."
جنه بدت تضرب في اريج ع ذراعها وهي تقول..
"هاتي"
امها سمعت صوتها قالت بلهفه..
"جنوني ياروحي"
حطت اريج التليفون ع وذن جنه..
وجنه بدت تهدرز بروحها كلمه مفهومه وعشرة لا..
"ياعمري ياروحي..ياقلبي"
غرفه كانت واقفه تشوف لجنه وتضحك ودموعها في عيونها ضحكت معاها اريج لما سمعوها تقول لأمها..
"نونو نونو"
ردت طوبى..
"حاضر حاضر تو نغنيها هي"
🍃وبدت طوبى تغني فيها وتحاول ع قد ماتقدر تغلب تعبها والدهشه اللي تحس بيها..
هو خش عليها..كان جايبلها سفرة ماكله..
سمعها تغني قعد واقف يتفرج عليها..
كلمات الأغنيه مع صوتها اللي فيه نبرة حزن..حسسوه بشعور مؤلم خلا عينه تدمع...
الكلمات جدا معبرة وحزينه...لمست جروح قلبه..لامالمستهاش فتحتها وخلتها تنزف...
جابت قدام عيونه شريط ذكريات ماضي كان يلقى يحذفه من ذاكرة عقله وينساه طول عمره...
ماضي التشرد والضياع..
النوم في شوارع مالطا في عز الصقع...ايام الجوع اللي خلاته يتعود ع الخنبه بش يلقى ماياكل...
الاهانه والضرب والذل اللي عاش فيهم بعد ماخش السجن من المساجين وحراس السجن...
المرات اللي بات فيها في الانفرادي وتعرضه للتنمر والتعذيب ع يد واحد من افراد الشرطه في مكان حبسه...
واللي عاشه بعد ماطلع من السجن واللي شافه من صاحب البار اللي في يوم من الايام اهانه قدام الزباين لما قرر مرة يرد ع اساءة لفظيه توجهتله..
خلاه يقعمز في نص البار وصب عليه شيشة خمر كامله واصوات الضحك والسخريه والشتائم اللي يسمع فيهم من الموجودين لعند هاللحظه مش قادر ينساها...
🍃هي اللي كانت تغني بإنسجام انتبهت لوجوده ارتبكت وتفاجئت لما شافاته سرحان ودموعه تنزل..
نهت الاغنيه وهي تقول بصوت طفولي..
/تمت..ومازالوا عيونها عليه..هو استاقظ..حس انها تشوفله..
بدون مايشوفلها حط السفرة ع السرير ومشي طلع بسرعه من حداها وعيونها يلحقوا فيه....
🍃🍃
ودرست سيارة المحجوب قدام حوش طوبى..
نزل منها ومشي رن الجرس..لحظات وانفتح الباب وهو خش وسكره وراه..وعيون المهدي وهو واقف في روشن دار النوم قاعده ع باب الحوش وهو يفكر بقلق...القلق نفسه اللي طلع بيه الحاج علي الواعر من الباب الفاصل وهو متوجه لحوش طوبى..
تقابل مع المحجوب سلموا ع بعض وخشوا والمحجوب سكر الباب...
🍃وتنزل نجاة من شقتها بعد ماسكرت الباب وخلت الجالي راقد داخل...
مشت طول بإتجاه حوش العيله شافت سلفها المهدي سبقها وخش الحوش..
بدت ع وجهها ابتسامة مكر وكملت طريقها لين وصلت في باب الحوش وخشت...
🍃🍃🍃🍃
يدوب كلت طوبى لأنها مااستطعمت شي..
ناضت خدت شاربتها اللي كانت حاطتها جنبها ع السرير..
لبستها وخدت السفر وطلعت بيها للكوجينه..
🍃بعد ماحطت السفره في الكوجينه فكرت تطلع تتمشى شويه بش تشم هوا..لكن بعدين تراجعت ع الفكرة وبدلتها بغيرها..
تفتح باب الفيرندا وتوقف قدامها...
☘☘☘
"والله الامور لتوا ماشيه وربك حامينا"
عبد القيوم:دوم ان شاء الله..عقد حواجبه وقال..باهي مختار شن وضعه توا!؟
الاقجم:الله يبارك ولاكأنه كان مريض بكل لكن هو بري منها وخدوها اخته الصغيرة والشغاله المصريه..
للحظه عبد القيوم توقع ان قلبه بيوقف قعد يشوف للأقجم بنظرات صدمه حتى من لون وجهه انخطف..
استغرب فيه الاقجم لما طال صمته وقال بضحكه..
/ماتخافش ياغالي والله مافيا حاجه..
بلع عبد القيوم ريقه بصعوبه غير نظره عن الأقجم ومرره القدام وقلبه يدق بقوة من الخوف..كيف جي بيسأل عن حالها..
تبان عليه وهي تفتح في باب الفيرندا...وقفت قدامها وربعت ايديها وتبان تتفرج ع الجنان وتشم في هواء..
تبدل الخوف لراحه...وقلبه فر من الفرح والشوق..وحس وكأنه روحه رجعتله..
يااااه قد استاحشها..قداش ليه مالمحش زولها اللي يموت عليه...
العجيب ان في كل مرة يشوفها فيها يحسها وكأنها اول مرة..
وحبها مايعرفش ينقص ولامشاعره اتجاهها عرفت البرود ع قد مابعدت وغابت يزيد يحبها ويغرق في حبها...
كاد هالقلب الميتم يطلع من مكانه لما جو عيونها عليه..
فتحت عيونها الجميله الحايرة ع وسعهم..وخدودها علتهم الحمرة وتوردوا بخجل..وسريعا خشت وسكرت باب الفيرندا...
🌼اللي صار هدا كله كان في مده زمنيه ماتعدتش الدقيقه غالبا بس الاقجم ركز والتفت شاف وين يشبح التارقي شاف الباب كيف تسكر..
رجع شافله وقال..
/تارقي..اووي!!!
استاقظ وشافله بعدين قال..
/مختار..وين!
الاقجم بضحكه:في وادي الدوم..
فتح عبد القيوم عيونه ع وسعهم بصدمه..
الاقجم ضحك عليه ضحك خلا دموعه تنزل..
هو استاقظ لنفسه..انحرج احراج شديد وهو يشوف للأقجم يضحك غصب عنه ضحك معاه..
الاقجم بضحكه..
/خيرك شن جاك تفكرست مرة وجده هدا كله خوف من الكورونا..حاول يهدي ضحك وهو يقول..خلاص روح روح ومعاش تجي خلينا ع الهاتف وخلاص..
مسح بيده حوالين فمه ودقنه وهو يضحك بعدين قال..
/خلاص سلم ع مختار وقوله مازلت بنصحح وجهي ونجي..سلام..ولف ومشي وهو مبتسم وقلبه مفرفح فرفحه اللي شاف بعد شوق..
والاقجم معاه بعيونه وهو يقول بضحكه..
/غريب الراجل هدا لكن أصلي...
🍃🍃🍃🍃
مقعمزة في الصاله مع حماتها الصغيرة ومرت شيبانيها..
كانوا يهدرزوا حداها ومتجاهلين وجودها هي مااهتمتش هالمرة لأنها مش جاية بش تهدرز..
ناضت وهي تقول..
/خل نمشي نوض الجالي قالي نوضيني قبل المغرب..
يدوب شافولها بعدين كملوا هدرزتهم وهي طلعت من حداهم وين وصلت في الباب التفتت لقتهم مش مركزين معاها..
طلعت ومشت جهة الدروج بحذر وهي تراقب لو في حد من الصغار يطلع من اي جهة ويشوفها..
ركبت وهي تلتفت لين درقت..كملت للدور التاني..
مشت بهدوء بإتجاه جناح راجلها..طلعت المفتاح من جيبها وفتحت الباب ع وسعه..
وبسرعه مشت نزلت وهي بحذر وهدوء وهي تراقب..
لعند مامشت وفاتت بسرعه من قدام الصاله وماحد لاحظها لين طلعت من الحوش..
🍃ومن الدور التاني يطلع نضال من الدار ويتوجه للحمام..
وهو ماشيله فات من قدام جناح الجالي لاحظ ان بابه مفتوح استغرب..بس في لحظه فتح عيونه ع وسعهم لما شاف شي كاد يطلع عقله من راسه...
🍃🍃🍃🍃
مقعمزة ع السرير ومازالت تحت تأثير اللحظه اللي جمعتها بيه..
مش عارفه كيف حست روحها وكأنها معاش تشكي من شي..وكأنها تعافت تمام..
قطع عليها اللحظه الحلوة اللي كانت عايشتها صوت رنين تليفونها..
خدت نفس..بعدين خداته من ع الكامدينو..لما شافت المتصل حست بشي من الخوف.
كانت سدرة...فتحت الخط وردت تقول..
/سديرتي..
وينفجر فيها بركان غضب فجعها خلاها ترجف من الخوف..
"انتي شنو قوليلي شنو غبيه حمارة هبله بلاعقل..كيف بعد اللي داره فيك مازال تمشيله برجليك كيف!! تي هدا وصلت بيه يسلط عليك واحد مريض عاونه بش يخطف بنتك سلمكم للموت بإيديه..كيف دسي عليا حاجه زي هادي كيف! كيف تخليني ندخله للحوش مرة تانيه كيف..كيف بعد هدا كله تمشيله برجليك ياحمارة ياحمارة"
سدرة ماكانتش طبيعيه في هديكا اللحظه تتكلم بغضب وخوف وصدمه وانهيار..كانت وكأنها مجنونه تماما..
حالتها خلت طوبى تجمد حتى الترميش مارمشتش..
سمعت صوت خالها وهو يقول..
"سدرة صلي ع النبي هاتي.."
قاطعاته وهي تصرخ في وجهه وتقول..
"حول عليا حول..اسمعي جاي توا تروحي توا دبري كيف تروحي..ياتروحي اليومياإما تنسيني بكل"
وسكرت عليها الخط...
نزلت طوبى التليفون وهي ترجف ودموعها ينزلوا...
"شن قالتلك"
شافتله طول..لقاته واقف وفي يده سفرة فيها كوب ميه وفي جنبه علبه فيتامين C فوار..
ركزت ع عيونه شافت اثر الدموع..
هو كرر سؤاله وقال..
/شن قالتلك!؟
مسحت دموعها وقالت..
/شي..جيب الفيتامين جيب وخود الروايه واقرالي..
استغرب..
وهي قالت بضحكه..
/نبي نسمع صوتك وانت تقرا بالفصحى..
قدملها ومازال مستغرب وعيونه ع تليفونها..
حطاته ع الكامدينو وخدت منه السفره..
تحسس جبهتها بعدين مشي خدي الكتاب وهو يقول..
/قاعده داهشه؟!
طوبى وهي تحط في حبة الفوار وسط الميه قالت..
/خفت شويه..هيا قعمز واقرا..
قعمز ع الكرسي وقال..
/حاضر يابلهاء..
ضحكت وشربت الميه..
وهو ابتسم وفتح الكتاب وبدي يقرا...
وهي تسمع وعيونها ع اثار الدموع في عيونه..
وقف فجأه وهو يتمعن في الصفحه قدامه بعدين رجع يقرا والدموع عبوا عيونه...
"إن من بين الذكريات الذي يختزنها كل منا ، ذكريات لا نرويها إلا لأصدقائنا ، ومن بينها ذكريات أخرى لا نعترف بها حتى لأصدقائنا ، ولا نرددها إلا على أنفسنا ، بل ولا نرددها على أنفسنا إلا سراً . ولكن هناك ذكريات أخرى يرفض الإنسان حتى أن يعترف بها لنفسه "
نزلت من عينه دمعه مسحها بعدين ناض وقف وهو يقول..
/معليشي نبي نمشي نقعد في داري تو تجيك الممرضة تشوفك..
ومشي طول طلع من الدار وسكر بابها وراه ويرجعوا دموعها ينزلوا وكلام سدرة مازال يتردد ع مسامعها...
#يستاهل_فرصة_ثانيه!
#طوبى
...يتبع...
