#طوبى "جنة طوبى"
#جمان_فريد
#الجزء_الثامن_والثمانين "سجن يوسف/صبر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃أشـعر وكـأنني إنـكسرت،
إنكـسرت بِـ طـريقه بَـشعه جِـداً🍃
__________________________________________
"رفقا بالقوارير"
وصية اجمل والطف رجال الدنيا على النساء..
الكائن الحساس اللي كسره يكون صعب ومؤلم هلبه..
المراة ع قد ماتكون قويه مرات كلمة جارحه تهدها هد...
يابالك باللي تسمع يوميا سيل من الكلام الجارح والاهانات!
اللي تتصبح بالضرب وتتمسى بالضرب وتكون الشي اللي يفرغ فيه بني آدم مريض نفسيا كل عقده..
وهي مجبرة تتحمل..اما خوف من الطلاق..او ع خاطر الصغار..او تحت تهديد ما...
من داخل تقعد تموت كل يوم..كل شي حلو في داخلها يموت وتولي بقايا انسان عايش والسلام..
🍃طوبى..تعرضت لكل انواع الآذى..النفسي والجسدي...
و اللي داره الجالي فهالليله حيقعد محفور في العقل حفر حيخلف ندبه فيها مايقدر يحولها شي لإخر العمر..
"الاغتص.اب"
فكرة ان الراجل يخلي مراة تعيش معاه غصب عنها حرام شرعا..لما ينتهي بينهم الود لابد من الطلاق..
وطوبى اختارت الطلاق بس الراجل ان صح التعبير اللي تبي تطلع من ذمته رفض هالاختيار واجبرها بأخبث الطرق انها ترجعله وتعيش معاه أسيره..
🍃سواء رفعت عليه قضيه او لا..هلبه قصص سمعنا عنها..نساء رفعوا قضايا طلاق وعندهم اطفال ازواجهم خطفوا الصغار بش يستخدموهم كوسيلة ضغط..اما للتخلي عن حقوقها او للتراجع عن الطلاق وسحب الدعوة..
وياما منهم اختاروا الرجوع وعاشوا اسوأ ايامهم وفي منهم كانت نهايتهم بشعه للغايه🍃
اغتص.ب الجالي اللي قال عنه انه حقه منها..
ضربها وآذاها ببشاعه..ماكانش طبيعي وقتها..كل ماترفضه يصفعها ويكمل حقه في اغت.صابها...
وبعدين خلاها جثه هامده مازال الروح ماطلعتش منها...
🍃ليله مرضت جميله لأنها صوت صراخ طوبى رجع مسموع وقعد مستمر..
وتعبت نفسية منيه اللي كانت بين مطرقه ضميرها وسندان خوفها ع عيلتها...
والجيران اللي حواليهم ماكانوش خير منهم..كلهم دايرين الوذن الطرشه زي مايقولوا..
وشعارهم"واحنا مالنا"
هو مرات يكون في عذر..لأن في بلاد زي بلادنا ماحد يقدر يأمن ع نفسه من الانتقام...
🍃🍃🍃
وفي نفس الوقت في مكان تاني..
فتح باب داره وطلع منها وهو حاس بوجع رهيب بصدره..
قعد يمشي بخطوات متعبه وهو متسند الحيط بيد واليد التانيه يمسح بيها ع صدره..
ورجليه اللي كانوا يمشوا بصعوبه رفعوه لدار تانيه..
وقف قدامها وبصعوبه خبط ع بابها..وكان يحاول يتماسك ع قد مايقدر..لين انفتح باب الدار..
رفع عيونه للشخص اللي واقف قدامه بدت الرؤيه تتشوش وهو حس بإلانهيار المتدرج لعند ماظلمت الدنيا في عيونه وطاح ع الارض...
🍃🍃🍃🍃
وعدت ساعات هالليله الحالكة السودا..
وبدي خيط الفجر يخترق ظلامها..والمؤذن ينادي بصوت عالي..
"الله اكبر"..
🍃وهي طلعت من الحمام بعد ماحاولت تغسل بشاعه اللي صار فيها قبل شويه بس عبث مايقدر شي ينحيه..
مشت بإنهاك للسرير..قعمزت عليه بهده..
حطت ايديها ع رجليها اللي كان مغطيهم"الديشمبر" وعيونها المتورمات من البكي مركزين بالنظر في الفراغ..
قاعده تحت الصدمه..وفي حالة عدم استيعاب للي صار معاها..
ع وجهها الجميل اثار صفعات من قوتها نزلت الدم....واثار تانيه مازال افضع كانت مخفيه...
لكن يقعد الاثر اللي في النفس اقواها وافضعها والاكثر عمقا..
"حي ع الصلاة"
استاقظت..وقعدت تسمع..
"حي ع الصلاة"..
..هيا نوضي..اقربي..بريله شن تراجي!!
هو الملجأ..والقوة...والسند..هو اللي حيخفف عليك ويطبطب ع قلبك..هو اللي حياخدلك حقك..
ماتسلميش نفسك للحزن..ردي بالك تعاودي نفس الغلطه..
🕸غير راجي..
وين ماشيه!!؟..تو انتي كان ربي معاك حق علاش ماحماكش منه..علاش خلاه يدير فيه هكي!! علاش يمكن واحد مجرم زي هدا منك! وانتي اللي تصلي وتدعي وياما مدايره من خير في حياتك..علاش وحده زيك انتي يكون هدا قدرها!!؟..
باهي علاش ع قد مادعيتي يجيك عكس اللي دعيتي بيه!!.
علاش كل ماتتمسكي بطاعه جديده فوق طاعتك حياتك تزيد تتعقد وضيق عليك اكثر واكثر مش مفروض يصير العكس!!؟
ماهو وحده من الزوز..ياإما ربي مش راضي عليك بكل..
ياإما انتي وحده منحوسه وحظك في الدنيا اسود وعمرها ماحتتعدل معاك مهما ديري🕸
نزلت عيونها وقعدت تبكي بالعبرة...الافكار السودا اللي انبخت في دماغها استغلت حاله ضعفها وحزنها الشديد وباديه تسيطر عليها..زي ماصار قبل هالمرة...
"الله أكبر...الله أكبر"
"لاإله إلا الله"...
..لوحي عنك كل الظنون السيئه اللي فكرتي فيها وتفكري بس ان الله اكبر..اكبر من انه يتخلى عنك او انه يقصد يعذب حد من خلقه يابال انتي..انتي اللي ديما معاه..
راك تنسي الانبياء اقرب خلق الله لله شافوا ماهو افضع وامر..
تفكري القصه اللي صارت مع الرسول في الهجرة للطائف..متفكره كيف كانت حالته..
كان كيف طالع من حزن فقد عمه وزوجته..كان في اضعف حالاته..كان متأمل وهو ماشي للطائف انه يلقى الفرج..
بس اللي صار العكس..متفكره شن صار فيه!! حجم الاذى النفسي والجسدي اللي تعرضله كان عظيم هلبه..
وهو بشر في النهايه..انهك وتعب وارتمي بين ايدين ربه ونجاه وهو يقول...
《اللَّهُمّ إنْي أَشْكُو إِلَيْكَ ضِعْف قُوَّتي وَقِلَّة حِيلَتي وَهَوَانِي عَلَى النَّاس
يَا أَرَحِم الرَّاحِمِينَ أَنْتَ رُبَّ الْمُسْتَضْعِفِينَ وَأَنْتَ رَبِّيٌّ إِلَى مَنْ تَكِلنِي إِلَى بِعِيد يَتَجَهَّمنِي أَمْ إِلَى عَدُوّ مَلِكَته أَمَرّي
إِنْ لَمْ يَكُن بِكَ غَضَب عَلِيّ فَلَا أُبَالِي وَلَكِنَّ عَافِيَتكَ هِي أوْسَع لِي
أَعَوَّذ بِنُور وَجْهكَ الَّذِي أَشْرَقَت بِهِ الظُّلْمَات وَصُلْح عَلَيْهُ أَمْر الدُّنْيَا وَالْآخِرَة مِنْ أَنْ يَحُلّ بِي غَضَبكَ أَوْ يَحُلّ عَلِيّ سُخْطكَ لَكَ العتبى حَتَّى تَرْضَى وَلَا حَوْلَ وَلَا قُوَّة إِلَّا بِكَ.》
.. إِنْ لَمْ يَكُن بِكَ غَضَب عَلِيّ فَلَا أُبَالِي
وهدا المهم ياطوبى انه مايكونش غضب مش مهم مهما ريتي..
..وَلَكِنَّ عَافِيَتكَ هِي أوْسَع لِي
ومع هدا اسأليه يعافيك ويرفع عنك..
وتفكري بعد هدا كله شن كانت النتيجه...!؟
🌾غمضت عيونها..بعدين رفعت ايديها لوجهها ومسحتهم بيه..فتحت عيونها وقالت بصوت مبحوح..
"ياحي ياقيوم لاإله إلا انت"..
وناضت من مكانها رغم الالام اللي كانت تحس بيها وولت للحمام بش تتوضا...
🍃ومن الجناح اللي هي فيه فالدور الثاني..
لصالة الدور الاول...
وسط الزينه المبعثره..الماكله المنثورة في كل مكان..
كان هو راقد فوق الكنبه ع بطنه..وغام وجهه في الوساده متاعها..ويبكي..يبكي بكتمان..والم...
نادم!!؟ ايه هو نادم..بس عنده تبرير لهالغلطه اللي دارها..تبريراته واتيه ديما..
الجالي ببكي..
/انتي اللي خلتيني ندير هكي..انتي اللي وصلتينا لهني..
!!!!!!....
🍃🍃🍃🍃🍃
حطت راسها ع الارض ساجده..
وبكل ألم بدت تدعي بدعاء محمد صلى الله عليه وسلم...
وهي حاسه كل كلمة تنطق فيها...وكانت تستشعر في نفس الموقف اللي كان فيه الرسول وقتها منهك والدم يسيل رجليه ..
وهي منهكه والاوجاع تحس بيهم في كل جزء منها...
《اللَّهُمّ إنْي أَشْكُو إِلَيْكَ ضِعْف قُوَّتي...
وَقِلَّة حِيلَتي..
وَهَوَانِي عَلَى النَّاس يَا أَرَحِم الرَّاحِمِينَ...
أَنْتَ رُبَّ الْمُسْتَضْعِفِينَ وَأَنْتَ رَبِّيٌّ...
إِلَى مَنْ تَكِلنِي !؟...
إِلَى بِعِيد يَتَجَهَّمنِي!؟ أَمْ إِلَى عَدُوّ مَلِكَته أَمَرّي!؟
إِنْ لَمْ يَكُن بِكَ غَضَب عَلِيّ فَلَا أُبَالِي...
وَلَكِنَّ عَافِيَتكَ هِي أوْسَع لِي...
عَافِيَتكَ هِي أوْسَع لِي...
عَافِيَتكَ هِي أوْسَع لِي...
وانهارت بالبكي بعد ماسألاته بيها لثالث مرة...وقعدت تبكي للحظات بعدين كملت باقي الدعاء....
أَعَوَّذ بِنُور وَجْهكَ الَّذِي أَشْرَقَت بِهِ الظُّلْمَات وَصُلْح عَلَيْهُ أَمْر الدُّنْيَا وَالْآخِرَة....
مِنْ أَنْ يَحُلّ بِي غَضَبكَ أَوْ يَحُلّ عَلِيّ سُخْطكَ لَكَ العتبى حَتَّى تَرْضَى وَلَا حَوْلَ وَلَا قُوَّة إِلَّا بِكَ
وَلَا حَوْلَ وَلَا قُوَّة إِلَّا بِكَ...
وَلَا حَوْلَ وَلَا قُوَّة إِلَّا بِكَ...
🍃🍃🍃🍃
وفي من يدعيلها وهوفي بيت من بيوت الله..
يدعيلها في سجوده من وسط قلبه..قلب يحبها بصفاء حب طاهر لأبعد حد...
"ياربي وانت عالم بنيتي..همي مش نفسي..همي هي ياربي وانت الاعلم بيا وبيها..يارب..قدرلها الفرج والراحه بعد هالعذاب يارب"
رفع راسه وهو يكبر من السجود التاني للركعه الاولى من سنة الفجر..بعدين ناض وقف وع وجهه قاعده ملامح الحزن..
التارقي...
🍃🍃🍃🍃🍃
ومر الوقت..وهي تقرا في القرآن..
من سورة لسورة..كانت تبي تسعف جروح نفسها وروحها..كانت تبي تقعد ثابته..كانت تبي تتجاوز بسرعه..
برغم ان اللي صار معاها صعب جدا تجاوزه...
طلعت الشمس وهي مازال تقرا..ماتعبتش بالعكس كانت تزيد راحتها..
لعند ما...سمعت صوت بكاها..ويفز قلب الام ..قلب الام اللي خلاها تجازف وتخاطر وتتعذب..
سكرت المصحف وناضت..ومشت وهي تحاول تسرع خطواتها للباب..
فتحاته..وطلعت متوجهه لدار بنتها...وين وصلت فيها لقاته واقف بيها يحاول يسكتها..
انفجعت..انتفضت نفض من الفجعه..وهربت..ومازال تسمع في صوت كبدها وهي تبكي..بعدها سمعت باب الدار تسكر بالمفتاح..
وقفت في مكانها والتفتت شافاته مسكر..بدت ع وجهها ملامح الألم والبكي قالت بنبرة وجع..
"جنونتي"..
سمعت صوته يقول..
"خلاص يابابا خلاص..ماتزيدنيش على مابيا"
خدت نفس بعدين ولت للدار...خشتلها لحظات وطلعت تجري وهي ناسيه كل اوجاعها..
وصلت في باب الدار..وهي ملهوفه وبايدين يرجفوا شغلت الاغنيه المفضله لبنتها اللي مجرد ماسمعتها جنه سكتت وقعدت دور عليها..دور ع امها..لانها رابطتها بيها هي..
الجالي ضم بنته وقعمز ع السرير ودموعه ينزلوا..
🍃وطوبى قعمزت قدام الباب بتليفونها وكانت تغني مع الاغنيه لكن صوتها مش طالع لأنه راح من العياط..
🍃🍃🍃
هدت جنة..بوها غيرلها..ودارلها حليب..
ومشي بيطلع من الدار..فتح الباب بالمفتاح..وطلع..
سمع صوت خطواتها وهي هاربه...ماباش يشوفلها..
رجع سكر الباب بالمفتاح..وخداه معاه ومشي نزل لوطا..
وخلاها هي تبكي ورا باب الجناح لما عرفت انه حيكمل تعذيبها ببنتها...
🍀🍀🍀🍀🍀
مر من هاليوم ثلاته ايام..
حرم الجالي ع طوبى شوفة بنتها زي ماحرم شوفتها ع نفسه لانه حبسها في الجناح...
خلاها تتعذب عذاب شديد..تسمع صوتها وماتشوفها..
قاعده عند المراة الغريبه تعاني فيها وحرم امها منها..
كان وين يمشي للشركه يتصل اكثر من مرة بالناس اللي حاطهم لحماية الفيلا متاعه..ويتصل اكثر من مرة بالمراة بش يطمن ع بنته وينبه عليها دخل لطوبى الماكله..
🍃طوبى..
وبرغم العذاب اللي هي فيه..قررت ان ماتخليش الحزن يسيطر عليها ولاتخلي الضعف يتملكها..
استعانت بالصبر والصلاه..الصلاه اللي منها الذكر وقراءة القرآن وحفظه..
وسبحان من خلا عدوه يزيد يقربها من الله..ويخليها تقعد معتكفه تلاته ايام....
🍃في الوقت اللي فيه..
رؤوف وعبد القيوم وربيع ومعاهم نسرين يراجو منها في خبر..
ربيع ونسرين كيف علموا بمخطط طوبى!!؟
اللي صار ان نسرين خشت في حالة كآبه من بعد اللي صار بالذات وان فايزة بعد ماسمعت بمكالمه طوبى لأريج من خوفها وحزنها الشديد مشت لنسرين وحطت غضبها كله فيها..وحملتها مسؤوليه اي شي يصير في طوبى بالذات وهي تعرف ان خوها فيه خلل نفسي من قبل الزواج وسكتت عنه..
وطبعا معاش خافي عن حد وضع الجالي النفسي العيله كلها عرفت بيه..
ربيع وهو يشوف في حالة مرته اللي قاعده تسوء بالذات بعد ماهملت ولدها..فضفض لاقرب اصدقائه واللي هو عبد القيوم وحكاله عن وضعها..
عبد القيوم هني قلب الموضوع في راسه يمين ويسار ووصل لنتيجه ان ممكن نسرين دير شي ينفع طوبى ويساعدها..وطول استشار عبد الرؤوف..اللي فكر في الموضوع كويس وبعدين كلم ربيع يجيه الحوش ويهدرز عليه في حضور التارقي..وحكوله كل شي وعرضوا عليه اقتراحهم وهو ماوخرش بكل..وقال..
"خلوها عليا"
وماكانش ساهل ع ربيع انه يفتح الموضوع مع نسرين..جس نبضها في البدايه ولما عرف انها مستعده دير اي شي بش تكفر عن ذنبها..سألها عن حالة خوها النفسيه..وهي بإنهيار اعترفت..بعدين سألها وين تعالج قبل ولوفي أي شي تعرفه بخصوص مرضه ادويه او اوراق فحص معينه..
وللأسف طلعت ماتعرفش اي معلومه دقيقه وحتى اسم الدوا ماتحفظاش وكانت صادقه لانها اقسمت ع كلامها..
هني هو خبرها عن كل شي..وهي ابدت استعدادها التام انها تساعد لعلها تصلح شويه من اخطائها..
وتجيها اول فرصه كانت عرس حكيم وكانت عارفه ان طوبى حتحضر..والمعلومه توصل عبد الرؤوف اللي يعطي تليفون قديم غير ملفت للإنتباه لربيع يعطيه لمرته بش توصله لطوبى وبهكي يسهل عليه التواصل معاها..
ووصل التليفون لطوبى..ومن يومها وهما يراجو اي خبر منها..ونسرين خافت ليكون خوها شد التليفون عند مرته وبدل ماتكحلها تعميها...لهذا فكرت في طريقه تخليها تقدر تشوف طوبى وتطمئن عليها...
🍃🍃🍃🍃🍃
"مش عارفه بس يعني وكأنه في بينهم مشاكل"
عمر بقلق؛منيه تكلمي بوضوح انتي شن شايفه ولاشن سامعه!؟؟
تنهدت منيه بقلق وقالت..
/كذا مرة..يعني بالك مرتين سمعنا صوت عياط..وكأنه جاي من فيلا خوك لأنه قريب هلبه..الصوت كأنه صوت مرته..
عمر بخوف:متأكده يامنيه!؟
منيه بتوتر:مش عارفه..يعني من عندهم ولامن عند حد تاني والريح تجيب الصوت مش عارفه!!
عمر غير نظره عنها وقعد يمرر فيه ع المكان بعدين هز راسه وقال..
/تمام..شافلها وقال..اني ماشي توا ماتبي شي.
منيه بخوف؛مانبيش مشاكل بس..
عمر هز راسه ومشي وهو يقول..
/سلام..
وطلع من المركز..وخلاها هي واقفه في الباحه متاعه حاسه بالندم لأنها تكلمت خوفا من العواقب...
🍃🍃🍃🍃🍃
قدام حوش عبد الرؤوف..
كانوا عبد القيوم واسكندر واقفين عليه يهدرزوا في موضوع فرح..
عبد الرؤوف؛لازم تمشي تطلبها من حوش جدودها في تاجورا..
اسكندر:العيله نجيبهم هني؟
عبد الرؤوف:اكيد وين ماقاعده امها..
هز اسكندر راسه وقال..
/تمام..
عبد القيوم بإبتسامه..
/ع البركه..
اسكندر ابتسم وقال..
/ان شاء الله..الفال ليك..
عبد القيوم؛تسلم..
عبد الرؤوف نزل نظره ليد اسكندر وقال بضحكه..
/تعود تعبي يدك كتيبه بعدين..
رفع اسكندر يده وهو يضحك وعبد القيوم يشوفلها بآستغراب.
عبد الرؤوف لاحظ استغرابه وقاله..
/نوعيته نساي شويه بالذات الطلبات الغريبه متاع النساوين كريمة مش عارف شني جبنه اشبح مني وهكذا ويجيه صداع ياصداع بعدين..
اسكندر بضحكه:ومن بعده الطلب الغريب نكتبه ع يدي بش ماننساشي..
عبد القيوم بضحكه..
/فكرة..حتى انا المده الاخيره بادي ننسى بناخدها منك..
اسكندر بضحكه:ع حسابك ياباشا..
شويه وسمعوا صوت سيارة درست قدام حوش لطفي..
شافها عبد الرؤوف بعدين التارقي واسكندر..
كانت سيارة غريبه..
شافوا وحده نزلت من الكرسي اللي جنب السواق..
ركز فيها عبد القيوم عرفها..عبير صاحبة طوبى..
دقت ع الباب واستنت لحظات بعدين انفتح وخشت وتسكر وراها الباب..
🍃🍃🍃🍃🍃
وفي مكتب الجالي...
الجالي وهو عاقد حواجبه بعصيبه..
/شن تقول انت؟
عمر:انت فاهم قصدي ياجالي..جالي ردبالك دير شي تندم عليه عمرك كله لو مش متفاهم انت والمرا طلقها وخليها تمشي في حالها..
الجالي بغضب:نوض اطلع برا..
عمر:ع الاقل فكر في بنتك..
خبط الجالي بيده ع الطاوله بقوة وقال بغضب..
/اطلع..
ناض عمر وقال..
/طالع..وانت زيد فكر في كلامي..
ومشي طلع من المكتب..
غمض الجالي عيونه وهو يهز في راسه بعدين فتحهم وقال..
/هي مافيش غيرها..
🍃🍃🍃🍃
"خديت رقمها الجديد من البنات اتصلت ليها هلبه وماردتش خفت الحق قلت نجي نطمن عليها ونعزمكم.."
سكتت عبير وهي تمرر في نظرها عليهم وقالت بقلق..
/صايرة حاجه؟
فردوس بضيق؛طوبى ولت لراجلها..
عبير بصدمه؛شني!!؟
مطيره وفردوس والاء اللي كانوا معاها قعدوا ساكتين وهما في قمة الضيق..
عبير بعدم استيعاب..
/فهموني كيف هكي!؟ كيف ولت!!؟ هي بروحها قالتلي لو شن يصير مانوليله شن اللي غير رايها!!؟
الاء:ولت وخلاص..
عبير بخوف:لالا مش بلاش!! تي هدا مش طبيعي راهو جاها مرة للكليه وجاي بيخطفها ولامش عارفه شن بيديرلها لولا امن الكليه الله اعلم شن صار!
هما قعدوا يشوفولها بصدمه من اللي سمعوه..
عبير بقلق بالغ؛قولولي طوبى كيف ولتله كيف!!؟
🍃🍃🍃🍃🍃
انفتح الباب وخشت عليها بسفرة الفواكه..
لقتها مقعمزه ع السرير وهي مقربه التليفون لفتها وتقرا في القرآن..
حطت السفره ع الطاوله وجت بتطلع..
وقفتها لما قالت..
/لوسمحتي..
التفتت وشافت لطوبى.
طوبى:لوسمحتي ارجوك صوريلي بنتي نشوفها..
:اسفه مانقدرش..
طوبى برجاء:مش حيعرف والله..صورهالي بس ارجوك..
المراة حركت راسها بالرفض وطلعت وسكرت الباب بالمفتاح..
غمضت طوبى عيونها بألم..بعدين فتحتهم ودموعها نزلوا..
غيرت نظرها لصونيه الفواكه..مسحت دموعها وناضت ومشت خدتها وقعدت تاكل منها..
في اليوم الاول قاطعت الماكله والشراب..بس بعدين غصبت نفسها بش تقعد واقفه ع رجليها..
كانت تاكل بدون نيه بش ماتهلكش نفسها..لازم تقوي جسمها مع روحها وعقلها بش تكمل صبر ومقاومه..
🍃وقدام سور السجن اللي هي فيه..
درست سيارة اخر عبير..نزلت عبير ورنت الجرس..
🍃المراة سمعاته لكن مابتش ترد قبل لتتصل بالجالي وتبلغه..
..والجماعه اللي حاطهم سبقوها واتصلوا بيه وبلغوه..
الجالي:مانعرفش عند سيارة زي هادي..سكر سكر..
ونهي المكالمه وين جي بيتصل بالمراة هي اللي اتصلت فتح عليها طول..
الجالي:في حد جاكم توا؟
"ايه الجرس من بكري يرن"
الجالي:شوفيها مني وخليني ع الخط..
"حاضر"..
وقعد يستنى وهو يهز في رجله بعصبيه..
بعدين سمعها تقول..
"ايوه مني....من تكوني لو سمحتي.....لحظه"
سكرت وكلمت الجالي..
"قالت صديقه مدام طوبى اسمها عبير"
الجالي؛فوتيها ..
"حاضر"
الجالي:تغدت المدام؟
"ايه اليوم احسن من قبل"
الجالي؛شن وضعها؟
"حسيت حالها افضل"
تنهد وقال..
/وجنه؟
"تلعب بحداي..عفوا استاذ فيها مشكله لو خديتلها صورة وخليت امها تشوفها"
الجالي بأنفعال؛لا..ردي بالك ديريها تندمي.
"حاضر حاضر زي ماتبي"
الجالي نهي المكالمه وهو في حالة غضب..
ركبت عبير للسيارة وهي تبكي..وخوها تحرك طول..
🍃وطوبى..
بعد ماكلت كفايتها من الفواكه..
ناضت ومشت للحمام بش تتوضى للمغرب اللي قرب وقته..
فجأوة خطرلها شي خلاها تغير طريقها..
مشت لحجرة الملابس..خشتلها وتوجهت طول للشنطه..
خدتها وقعمزت ع طاوله قدامها..
فتحت الشنطه وفتحت التليفون..
خدت نفس وبدت تسجل في رقم عبد الرؤوف..
🍃وعبد الرؤوف مع عبد القيوم وربيع في شقة التارقي..
ربيع:لو قاللها تعالي معناها الامور تمام..ولو قال لا الامور واضحه..
عبد القيوم قعد يهز في رجله بقلق..
وعبد الرؤوف كان مليان خوف وغضب..
فجأه..جاه اتصال..
قام تليفونه..فتح عيونه ع وسعهم وين شاف الرقم وقال.
/هي!..
قلب عبد القيوم قريب طلع من مكانه قعد يشوف لرؤوف بلهفه وخوف..
وربيع كان مترقب.
فتح رؤوف الخط وقعد ساكت..
/رؤوف؟
عبد الرؤوف براحه؛واخيرا..
"اسفه ماقدرتش نستعمله الايام اللي فاتوا"
عبد الرؤوف بقلق:خيره صوتك هكي!؟
عقد عبد القيوم حواجبه بخوف..
"واخده بردة..خلينا في المهم انتم شن حالكم؟"
هو قال..
/كلنا مشغولين عليك..
"كيف عرفت نسرين"
عبد الرؤوف؛قصة طويله..
"ضروري نعرفها"
رؤوف:هداكا مش في الحوش!؟
"ايه في العمل..قولي كيف صار"
تنهد رؤوف وبدي يحكيلها وهما يسمعوا فيه..
"عبد القيوم عارف!؟ من امتى!؟"
رفع رؤوف عيونه في التارقي وقال..
/من فتره..وهو صاحب اقتراح التليفون.
الجو كان مصقع عز الشتي..بس التارقي حسه روحه مقعمز في الصحرا في عز الشمس..
سكتت طوبى شويه بعدين قالت..
"تمام اني توا بنسكر لانه قريب يروح كان صار جديد تو نخبرك السلام عليكم"
وسكرت..بعدين تنهدت وردت التليفون للشنطه..وناضت وحطتها في مكانها..ومشت للحمام...
🍃🍃🍃🍃🍃
في الطريق..
الجالي:شن خطر عليك؟
"كيف شن خطر عليك!؟ ماتبنيش نجي لحوشك!؟"
الجالي:تمام..تو نعزم امي وخديجه..
"باهي زي ماتبي المهم حدد يوم"
الجالي:باهي بنسكر قاعد نسوق..سلام..
"سلام."
نهي المكالمه معاها بعدين اتصل بأمه...
نادى كذا مرة وفي الاخير ردت..
"نعم"
الجالي بضحكه؛خيرك يام..
"سلامتك ماخيرني شي"
الجالي؛يام اللي صار يومها صار من غير قصد..
"ماتغطيش ع الشومه متاعك عارفتها زين قليله الربايه اللي لادارتلي قدر ولاقيمه حتى السلام استخسراته فيا"
عقد حواجبه وقال..
/نقولك يام..نجيكم الخميس نجيبكم لحوشي انتي وخديجه وحتى نجاه ونخليها تطلب منكم السماح..
"مانبيلها سماح ولانعفسلها حوش"
الجالي:هدا حوش ولدك يعني حوشك هي الضيفه وانتي مولاته..
سكتت مغليه..
الجالي:خلاص يام..الخميس هدا عطي علم لخديجه ونجاه..
تنهدت وقالت..
"باهي باهي"
الجالي:والله ماتطلعي من عندي الا انتي وراضيه ياغاليه...
🍃ونهي المكالمه مع امه لما قرب يوصل..
وين درس سيارته قدام الفيلا..شاف سيارته جاره جايه..
نزل من السيارة وقعد واقف استناه لين وقف في الباب..
رفع يده بصوت عالي وقال..
/جار...
نزل راجل جميله وشافله وهو مبتسم بتوتر...
🍃🍃🍃🍃🍃
وداخل اسوار السجن..في الجناح المحبوسه فيه الآسيرة..
كملت صلاة..وبعد ماحولت الملايه وعلقتها..
تجرأت ولاول مرة من اربعه ايام توقف قدام المرايه..
جو عيونه ع اثار جريمته البشعه..طول تفكرت اللي صار هديكا الليله ودموعها نزلوا..
اتكت بإيديها ع الزيانه ونزلت راسها..غمضت عيونها بشده ودموعها يقطروا ع الزيانه وهي تتفكر في بشاعته..بالذات وين يضرب فيها بوحشيه..
حست بالغثيان..تباوعت اكثر من مرة..بعدين فتحت عيونها ومشت تجري للحمام وقعدت ترجع...
🍃وهو كان راكب الدروج وفي حضنه جنه وشاد بيده التانيه كيسة العابها..
خش بيها لدارها وقال..
/حبيبة عمري..نحطك هني شويه نمشي نشوف امك الحرفه ونجيك..
حطها في سريرها وعطاها لعبة "الشكشاكه"بعدين طلع ومشي للجناح..
وصل فيه..خدي نفس..بعدين فتح الباب وخش..
عقد حواجبه بخوف لما سمع صوتها وهي ترجع..
جمدوا رجليه لاقدر يقدم ولاقدر يطلع...
قعد واقف في مكانه..لين طلعت من الحمام وهي تمسح في وجهها بالفوطه..لما شافاته شهقت بفجعه...
هو عقد حواجبه وقال بكبر..
/يوم الخميس بنجيب امي وخواتي ومعاهم نجاة عازمهم ع الغدي..وفي نفس الوقت جايبهم بش تعتذريلهم ع معاملتك التافهه ليهم..
هي قعدت تشوفله بنظرة خوف وحقد في نفس الوقت..
رفع حاجبه وقال..
/كان تبي تولي تشوفي بنتك زي قبل..
بدت ع وجهها ملامح الازدراء..
هو قال بحده:اصلا غصب عنك حتستقبليهم وتستمحي منهم وديرلهم عزومه خير من اللي درتيها لبوي وخوتي..فاهمه!
ماردتش عليه وهي تشوفله بنفس النظرات..
هو قربلها بيخوفها..هي طول حطت ايديها ع وذانها وغمضت عيونها وعيطت ع طول حسها..
شدها..وحط يده ع فمها وهي تفرفش بين ايديه من الذعر.
قرب لوذنها وقال..
/تعاندي معاي نعاودها...
نزلوا دموعها...
هو قال؛نحول يدي تعيطي ماتلومي الا نفسك..
حول يده..هي سكرت فمها بقوة وكانت ترعش مع بعضها..
هو قعد يشوف لحالتها هادي وقلبه يعصر فيه عصر من الالم..
طول طلع من حداها هارب وسكر الباب عليها بالمفتاح..
اما هي مشت خشت للحمام بش تغسل اثار قربه المقرف منها..
🍃🍃🍃🍃
"اني شن قلت..شن خرفت..باش تفهموا انتم قولولي"
منيه بخوف:والله ماقلت حاجه ماقلتلها شي..
بوها بانفعال؛وين تبونا نجلوا انتي وامك قوليلي وين"
سكتت منيه وهي تفرك في ايديها ببعض من الخوف التوتر..
رفع سبابته في وجهها وقال..
/لزيها..
منيه بصدمه:شني!؟
:هادي البنت قريبتها لزيها معاش تخدميها معاك ولا قسما بالله نقعمزك انتي..
منيه وهي مصدومه؛مادخلهاش البنت يابابا والله مادخلها..
:تبي نحلف عليك تقعمزي!؟
منيه نزلت راسها وهي مضايقه ع الاخر..
/حاضر..حاضر يابابا..
:مش تمشيني..اني بروحي نمشيلك غادي ونشوف بعيوني..
قعدت ع حالها وهي ساكته..
وهو مشي من قدامها وكان يقول بعصبيه..
/بتجيبوا اخرتي انتي وامك عارف..
هي بضيق مشت ركبت لدارها..
وجميله اللي كانت مقعمزة في الصاله دعت ع الجالي وهي تقول..
/الله يعطيك مايرفعك ياجالي الشياطين ويفكها منك..
🍃🍃🍃🍃🍃
واقفه ع الغاز تقلي في البطاطا للعشي وهي مرهقه..
بين القرايه وشغل الحوش والضغط النفسي المستمر..
ع صغر سنها قاعده تتحمل وتساير وتمشي ماعندها مادير...
طابت البطاطا طلعتها بالساقم المشبك وحطتها في الصونيه..
بعدين حطت الصونيه ع الرخامه..
طفت الغاز..ووين جت بتاخد الصونيه شافت يد ممدوده تاخد في طرف...التفتت وشافاته..من فرحة قلبها ماقدرتش تشد روحها..طول ضماته..
ضحك وقال:صفاء..
وخرت وحطت ايديها ع فمها وهي تضحك بخجل..بعدين نزلتهم وقالت بضحكه ودموعها نزلوا..استاحشتك..
قلبه ماتحملش يشوف دموعها طول خداها ليه...
وهني تخش عواطف..
/هدا شني!؟
وخر عنها والتفت..
عواطف؛معقوله هكي اشرف بوك قاعد في الحوش راهو!..
صفاء نزلت راسها وهي محرجه ومضايقه..
وهو كذلك كان محرج هلبه من اخته قال لمرته..
/كملي اللي في يدك وتعالي..ومشي طلع من حداهم..
عواطف شافاته تباعد غيرت نظرها لصفاء وقالت..
/تسهويك الفرخات ماديريشي هني..
صفاء قعدت منزله راسها وهي شاده ع قبضه يدها بقوة..
عواطف:جي اغبر..لاحشم لاجعره..ومشت طلعت من حداها..
صفاء بضيق شديد..
/ معاش قادرة نتحملك حسبي الله فيك وخلاص...
🍃🍃🍃🍃🍃🍃
تاني يوم...
في حوش محمد شنيبه..
تحديدا دار المعيشه...
كانوا ملتمات التلاته مغليه وخديجه ونجاه..
نجاه؛هو قال هكي!؟
مغليه:ايه هو ياحنه..
خديجه؛شكله مغلول منها..والله ماني مفوتتها هالمشيه فرصه وبنحصلها فيها هالكلبه..
ابتسمت نجاة بمكر..
مغليه؛حتى اني نراجيلها فيها كان ماريبتهاش مانتسماش مغليه..
ونجاه في سرها كانت تتوعد حتى هي..عرفت ان الجالي يبي يغيظ طوبى بيها..ماهمهاش..اللي همه انها حتحصل فرصه في طوبى...
🍀🍀🍀🍀🍀
يوم الخميس..
27ديمسبر..سنة 2018..
اليوم هدا كان ممطر..وطوبى في الكوجينه وهي تعول ع العزومه..كانت تسمع في المطر اللي خاش صوتها ع انشودة..
"ايقنت ان الله يجبر خاطري"..
كانت تردد مع المنشد..ودموعها ينزلوا...
ايقنت ان الله يجبر خاطري
لما بكيت ولم أجد إلاهو..
ناديت والمحراب يحضن ادمعي..
الله ياالله..ياالله..
سكتت وهي تبكي بصمت وتسمع في باقيها من المنشد..
إن لم تكن قربي وترحم خافقي..
من لي سواك يغيثني رباه..
تنهدت ورفعت عيونها فوق وغمضتهم وهي تقول من قلبها..
"يارب..قوة"
🍃🍃🍃🍃🍃
الساعه 2:00بعد الظهر..
في الطريق.. الجالي متوجه بأمه وخواته ونجاة ومعاهم جوري للفيلا متاعه.
طول الطريق وهو يهدرز ويبصر معاهم....
نسرين كانت مركزه معاه وحاسه ان كل شي باين منه حاليا مش حقيقي عيونه يبينوا العكس لان فيهم حزن واضح..
🍃وصل بيهم للفيلا..
ونزلوا مع بعض وطول طريقهم للباب وهو يشرحلهم شن دار من جديد في الفيلا..ونجاه بتموت من القهره..
فتح الباب ودخلهم...
وهما بذهول قعدوا يتفرجوا ع التغيير الي صار فيها...
مغليه؛الله يبارك!..
خديجه؛من يومك حاجتك ديما باهيه..
نسرين ركزت بنظرها ع طاوله الاكل كانوا فوقها ماعين يبانوا منسقات بطريقه حلوة..
مغليه برفعة حاجب؛مالا اللا وين!؟
الجالي:شويه ونجيبها..وهو ماشي للدروج..
يوقف في مكانه..لما يجو عيونه عليها وهي نازله..
وهما وراه يشوفوا فيها كيف كانت في قمة الاناقه باللون اللي بدت تفضل فيه..الاسود..
كانت لابسه جمبسوت اسود راقي..كمه طويل ورافعه شعرها ذيل حصان..مكياجها ناعم وكالعاده ابرزت جمال عيونه حطت احمر شفاه لونه غامق...
فيدها اليمين كانت لابسه خاتم اكسسوار لونه ذهبي ع هيئة شمس..وفي وذانها خراص"اقراط" بنفس الشكل..
وطبعا تفننت في اخفاء العيوب..او اثار الجريمه..
وصلت لوطا وقعدت تمشي بالكندرة الكعب الشاموا وع وجهها ابتسامه بشوش وتقول..
/مرحبتين مرحبتين..انستونا...انستينا عمتي..
وفاتت من قدامه وهو معاها بعيونه زي المسحور..
وصلت في مغليه حطت ايديها ع ذراعاتها وقربت كبت ع راسها وقالت..
/سامحيني عمتي..قدرك من قدر ولدك عندي..شافتله وقالت..وهو غالي عليا..
بدت ع وجهه ملامح ابتسامه فهم لتصرفاتها...
سيبت مغليه وجت لخديجه وقالت..
/وانتي في عمر امي..قربت منها وباست راسها وهي تقول..كبيرة عمر وقدر..بعدين خلتها ومشت لنسرين..
مدت يدها..وصافحتها نسرين وسلموا ع بعض بالخد..
طوبى:انستينا..
نسرين:الله يآنسك..
وخرت عنها طوبى وشافت لنجاه ابتسمتلها من بعيد وقالت..
/اهلا..
نجاه رفعت حاجبها وقلبت وجهها عنها..
جوري وهي ضامه ايديها ع بعض قالت بإبتسامه..
/واني ماشفتنيش!؟
شافت لجوري..بدلت ملامح التصنع لملامح طبيعيه وعفويه وهي تقول..
/اهلا بجوري..تعالي حبيبتي..
جتها جوري ونجاه معاها بعيونها وهي تشوفلها بحده..
وصلت جوري في طوبى طبست عليها وضمتها وهي تضحك..
جوري تباعدت وقالت..
/وين جنه؟
طوبى شافت للجالي وقالت..
/شويه وعمو ينزلها..
مغليه؛ينقعدوا واقفين هكي هلبه!..
طوبى بأبتسامه؛الحوش حوش ولدكم يعني حوشكم خودوا راحتكم..
خديجه؛عارفين بس حني نعرفوا الاصول وديما ماشيين بيها..
طوبى تجاهلتها وهي تقول..
/مرحبتين بيكم..جوري شافت لأمها نجاه نادتها بحركة عيونها طول مشتلها تجري..
طوبى ابتسمت ومشت للكوجينه وقالت..
/شويه وجايه..
وهما خشوا للصالون وقعمزوا..
والجالي لحق طوبى وعيون نجاة معاه..
🍃طوبى في الكوجينه كانت مجهزة الماعين ع حطان الحاجه فيهم بس..
بدت تسخن في الموالح وولعت النار تحت البصلة والكسكسي..
خش عليها وقال..
/في من تتحدي؟
طوبى وهي لاهيه؛حد..
الجالي؛من امتى انتي هكي! معانديه وعينك قويه..
رفعت عيونها فيه وقالت..
/من لما وليت منكم..
قربلها..هي انتفضت وبعدت..
الجالي وقف مكانه وهو يشوفلها بنظرات..
غضب..والم..وشوق..وحب..
مزيج مز المشاعر في نظره وحده..
هي ماشافتهاش كانت متباعده عنه وخايفه..
تنهد بعدين طلع وخلاها..
غمضت عيونها وخدت نفس..ورجعت فتحتهم...
وولت لتجهيز الغدي...
خشت عليها نسرين وقالت..
/ربي يعاون..
طوبى:تسلمي.
قربت منها نسرين وقالت..
/الامور تمام؟
طوبى:ايه..حاولي ماتخلي حد يركز ع شي..
نسرين؛ماتخافيش..لمحت اثر اسفل رقبتها من الخلف..
شافتلها بقلق وقالت..طوبى..الجالي مادارلك شي..
شدت دموعها بقوة وقالت..
/لا..ترا بالله طلعي هدوكا..
نسرين وهي مش مصدقتها مشت خدت الصواني اللي اشرتلها عليهم وطلعت..
طوبى للمرة التانيه تاخد نفس عميق بس تهدي نفسها..
وولت اللي كانت دير فيه..
🍃وقعدوا هي ونسرين يطلعوا في الماكله...
طوبى وهي تمشي وتجي..شافت الجالي كيف مقعمز جنب نجاة وهو محاوطها بيده ويهدرز عليها وهي تضحك..
ابتسمت تهكما وتجاهلتهم...
🍃🍃🍃🍃
"هي تفضلوا ع الغدي"
خديجه؛هيا يام..
وناضت مغليه مع بنتها..
ووراهم الجالي ونجاه وهما شادين في ايدين بعض..
وطوبى ولامعبرتهم شافت لجوري وقالت..
/تعالي جوري..جتها جوري..وقعمزتها ع كرسي..
طوبي الوحيده اللي قاعده واقفه تصب لضيوفها غداهم في الصواني..
مرت عليهم بالواحد..
ولما وصلت في الجالي..كانت قريبه عليه..
حطت صونيته قدامه..وهو بعيونه معاها..ومدت لنجاة صونيتها..
وجت بتمشي..
الجالي:زيدي كسكسي عارفتيني نحبه..
ولت وخدت الصونيه ومشت من حداه بش تنفد طلبه..
مغليه وهي تاكل..
/البصله باسله شويه..
خديجه:حتى المبطن حسيت حشوته مافيهاش بنه لحم مفروم وخلاص..
نجاه:الشيش كأنه يابس شويه..
خديجه:صح..
طوبى تسمع وهي مبتسمه مشت للجالي وحطت قدامه الصونيه وقالت بصوت واطي..وكلها الشيش بيدك بش يزيد حلاوة..
ومشت وخلاته وهو يشوفلها برفعة حاجب..
نجاة لاحظتها لما همستله وانغاظت ع الاخر..
قعمزت طوبى جنب جوري وقالت..
/في حاجه ماعجباتكش..
جوري:كله حلو..
طوبى بضحكه وهي تقرص فيها من انفها:انتي الحلوة.
ضحكت جوري..
وبدت طوبى تاكل..
وعيون الجالي عليها..
مغليه؛خالاتك حرجانات منك لاعاد تسأل ولادور..
شاف لامه وقال..
/لهيت بهمي يام..تو ان شاء الله ندير يوم ونخطم عليهم..
نجاة؛ارفعني معاك مستاحشه جوهم هلبه..
خديجه؛جوكم ركب ع بعض..
نجاه بضحكه:هلبه بالذات خالتك امباركه..
مغليه؛عاد مباركه تشكر فيك وتحط قالتلي هدا وين الجالي خدي حق..
نسرين شافت لأمها..
والجالي شاف لطوبى..
وطوبى تاكل عادي جدا..
نجاه بضحكه؛سلمها ياربي..قالتهالي حتى اني..
طوبى:انتي والجالي طالعين ع بعض هلبه..
كلهم وجهوا انظارهم ليها..
وهي تاكل بدون ماتشوفلهم..
الجالي:نوضي..
رفعت عيونها وشافتله..
الجالي بحده؛خودي الصونيه ونوضي للكوجينه هداكا مكانك..
ابتسمت وخدت الصونيه بهدوء وناضت ومشت وهي تقول..
/صحتين..
وطلعت من حداهم..
الجالي بعصبيه:تغدوا..تغدوا..
قعدوا ياكلوا بالغصب..
ونجاه مركزة ع الجالي كيف عصب من كلام طوبى عنهم..
☘وطوبى في الكوجينه ..
قعمزت ورا طاولتها وحطت رجل ع رجل وقالت..
/ملا فكه..
وقعدت تاكل..شويه وتفكرت جنه..وان ممكن الجالي يتراجع ع اللي قاله بيسبب استفزازها ليه..دمعوا عيونها بعدين قالت..
/معليشي المهم معاي في نفس المكان..وهو والله مانخليه يكسرني قدامهم لو شن يصير..
🍃🍃🍃
وبعد نص ساعه..جوها الصواني مع نسرين ممسوحات مسح..
وتعانوا هي وياها عليهم..
حطوهم في غساله الماعين..وضموا ونظفوا الكوجينه..
نادى الجالي ع نسرين طلعت..
وقعدت طوبى بروحها تجهز في الفروته..
بعد ماكملت..حولت المريول علقاته..وخدت السفرة وطلعت بيها.
فرقت عليهم..بعدين جت بتولي للكوجينه.
نجاه؛معليشي جالي خليها تقعمز معانا..
مغليه؛خود بخاطر مرتك ولدي..
تنهد الجالي وقال..ع خاطر نجاة بس.. انتي..تعالي قعمزي..
طوبى تمالكت اعصابها بقوة..
حطت السفره ومشت قعمزت جنبه..
هو انصدم..
ونجاه فنصت عيونها..
وطوبى وقتها عنادها وغرور نفسها نسوها خوفها من الجالي..
المهم عندها ترد الصاع الصاعين لأي حد منهم يتمادى عليها..
ومافي حد عاجبه اللي دير فيه غير نسرين..
🍃قعدوا يهدرزوا وطوبى وسطهم مستمعه..
هدرزتهم كلها ع انجازاتهم وشكرانية الناس فيهم..
ونجاة اللي كانت ملاحظه ان الجالي مرتبك من قرب من طوبى..تجرأت وشدت يدها وقالت بهمس..
/استاحشتك..
هو من الحاله اللي كان فيها رد عليها وقال..
/حتى اني..
نجاة؛نبي نهدرزوا برواحنا شويه..
هو استاقظ لنفسه..بعدين فكر شويه وناض وخداها معاه..ومشوا قعمزوا في تركينه برواحهم بعيده شويه.
ربعت ايديها وقلبت عيونها بملل..
جتها جوري وقالت..
/نبي نشوف جنه..
مغليه:والله حتى اني استاحشنها بنيتي..
هو سمعهم وقال..
/انتي..اركبي جيبيها..
ناضت طوبى ومشت طول للدروج ..
ركبت وهي ملهوفه ع جنة ..
🍃🍃
خشتلهاالدار لقتها تلعب في سريرها..
طوبى ودموعها ينزلوا:ياروح ماما ياعيون ماما..
رفعتها وضمتها وهي تبوس وتشم في ريحتها وتقول..
/ياربي ماتحرمني منها يارب..
باستها من خدها..بعدين مسحت دموعها ومشت طلعت بيها..
خشت للحمام.
تشوف للمرايه وتقول..
/مانبي حد منهم يشوف دموعي يامامتي نبيهم ديما يشوفوني قويه كاسره عينهم..تنهدت وقالت..اللي زيهم مايبوا الا هكي يابنتي.. نبيك تتعلمي ياماما تكوني طيبه وبنت اصل مع الناس اللي تستاهل بس..ماتكونيش زي امك..
باستها ع راسها..ومشت طلعت بيها من الحمام..
🍃🍃🍃🍃
نزلت بيها لوطا..
ورفعتها طول لحناها..خدتها مغليه وقعدت تلعب فيها..
وعماتها وبنت عمها قربوا منها وشاركوها ملاعبة جنه..
قعمزت طوبى في مكانها وهي تتفرج ع جنه بشوق..
شويه جو الجالي ونجاه..
طبست نجاه ع جنه وقالت..
/الله يبارك..
طوبى قعدت تشوفلها بحده.
نجاه؛شبهك جالي..
الجالي ابتسم.
مغليه:عويناتها زرق..
نسرين:الله يبارك..طالعه لعيلة امها..
خديجه مطت شواربها بملل..
جوري:حلوة هلبه وخدودها زي المارشميلو..
ضحكوا..
طوبى بضحكه:وانتي كاب كيك..
ضحكت جوري..
خديجه:ع سيره الحلو..نبي قهيوه وحاجه حلوة..
الجالي:نوضي..
ناضت طوبى خدت السفره ولمت صواني الفروته ومشت للكوجينه...
🍃دقايق..
وجتهم بسفرة القهوة والحلو اللي معاها فاجئ الجالي..
نسرين؛اوو مبروشه..
وصلت طوبى في نجاة وقالت..
/حبيبة الجالي...
نجاه:شكرا مانبيش..
طوبى بهمس:احسن..
ونجاه لحقتها بعيونها وهي تشوفلها بحده..
طوبى جت للجالي ومدتله..
هو خدي القهوة وماباش ياخد المبروشه..
خلاته وحطت السفره ع الطاوله وقعمزت..
قعدوا يشربوا وياكلوا بصمت للحظات بعدين مغليه قالت.
/في اللي يغرق في نعمه وهو مش مقدرها..شافت لطوبى وقالت..وانتي ماقدرتيش ولدي نعمة من ربي وبطرتي عليها..عيشك احسن عيشه سكنك في فيلا تقول قصر..خلاك تخدمي وتقري وحتى من السيارة دارهلك غيرك مش لاقي ربعه.
خديجه:وفوق اللي درتيه فيه شوفي شن قاعد يدير ع خاطرك..وين تلقي راجل يقدرك هكي قوليلي!!؟..تي هما شكارتين. نكارين متاعين بلي وشادين فيهم بإيديهم ورجليهم...وبعدين خوي شن دارلك في شن غلط فيك..نجاه وكان واخدها قبلك بالحلال..وعيشك معززة مكرمه مانقص عليك شي..غلطنا ودرقنا عليك ماهيش هديكا المشكله الكبيره في اللي رجالتهم يخونوا فيهم مع تلاته واربعه وقاعدات..
مغليه؛ظلمتي ولدي في جرتك ونكدتي عليه وماخلتيشي يفرح ببنته ويقعد متحسر ع شوفتنا وحرمتينا حتى حني منها..ودارت روحها خنقتها العبره وقعدت تبكي..
وخديجه دارت روحها تأثرت وهي طبطب عليها وتقول..
/خلاص اميمتي خلاص..
وطوبى تتفرج عليهم وع وجهها ملامح الامتعاض..
الجالي:عاجبك هكي..عاجبك اللي وصلتينا ليه ع حاجه تافهه ماتستاهلش!!..انتي قهرتيني بمعنى الكلمه وشن ماندير معاك معذور ومايقدر حد يلومني..
نجاه تسمع وهي مستحليه اللي صاير في طوبى..
ونسرين تراجي في ردة فعل منها..
مغليه ببكي:اني مش مسامحتك والله ماني مسامحه..
الجالي؛ولااني..والله واني..
تنهدت طوبى وقالت..
/ماعندي مانقول..غير ان ربي شايف كل شي وعارف كل شي وهو اللي يحكم..
مغليه:تدعي علينا!..
طوبى:لو نبي ندعي راهو دعيت طول..
مغليه؛شوفوا كيف ترد عليا!! تعرفي لو عزوز تانيه غيري راهو خلت ولدها يطلقك وقتي..
طوبى شافت للجالي وقالت..
/شن رايك؟
الجالي قعد يشوفلها بحده..
نسرين:ياجماعه حني جايين نصفوا القلوب..اللي صار وصار وراح لحاله..والناس ياما يصير بيناتهم ويولوا لبعض خير من قبل..تعوذوا من الشيطان واقلبوا هالصفحه..
كلهم قعدوا ساكتين ماحد بي يعلق..
شويه ناضت نجاه وهي تقول..
/بنمشي للحمام..
الجالي لطوبى:نوضي ارفعيها للحمام.
طوبى:مش لازم هي حافظه كل شبر فيها..
قعدت تشوفلها نجاه بحده..
طوبى:ولو تبي تعدلي مكياجك اركبي للجناح متاعي فوق تعرفيه كويس حتلقي دار النوم متغيره حتى هي مش زي ماتعرفيها..
كلهم فهموا تلميحها..
ونجاه وصلت عندها حدها منها اللي دساته من يوم حفله صفاء لليوم وتراكم ع بعضه خلاها تقدم لطوبى بإندفاع..
وتصفعها ع وجهها بكل قوة..
ضربتها جت ع اثر ضربه للجالي وانوجعت طوبى هلبه.
الجالي حط الفنجان وناض طول..جبد نجاه وهو يقول بغضب..
/كيف تضربيها قدامي!؟
نجاه بإنفعال..ماتسمعش فيها قليله الادب هادي
طوبى كانت تمسح ع شعرها ع طوله وهي مبتسمه بإستفزاز..
ومغليه وخديجه يشوفولها بكره..
اما نسرين فكانت مغلوله من نجاه..
/راجلها يحاسبها مش انتي..
الجالي بعصبيه؛هيا هي وتوا ارواحكم بنروح بيكم توا..
مغليه:اني الغالطه اللي سمعت كلامك وجيت..مش حنعفسلك حوش وهادي ع ذمتك..
خديجه؛قليلة ادب..
وطوبى ولاع بالها..ومازال مبتسمه ببرود..
ناضت لبنتها وخدتها من ع الكنبه وانسحبت من حداهم ومشت بتركب وخلتهم والعين في بعض...
🍃وروح الجالي بيهم وطول الطريق وهما يتعاركوا..
حطهم قدام الحوش..وامه قبل لتنزل عطاته قلة السماح كان ماطلقهاش..ونجاه نزلت تبكي من السياره...
هو بعد ماحطهم..روح طول..
🍃وطوبى قاعده مع جنه في الدار..
لعبت معاها لين رقدت..وقعدت مقعمزه حداها ع الكرسي تتأمل فيها لين خداها النوم..
لحظات وفاقت مفجوعه لما شافاته ينهض فيها ويجبد فيها وراه وهو يقول..
/تتحدي فيا..تعاندي فيا اني..ماتخافيش بكل انتي..
هي كانت ترجف من الخوف.
وهو وصل بيها للدروج..نزل بيها وهو يجبد فيها..
ورجليها كانت مش قادره تتحكم فيهم..لدرجة انها كانت حطيح..هو شدها ورفعها في حضنه..
وهي مغمضه عيونها بشده وشفايفها يرجفوا من الخوف ووجهها لونه مخطوف..
وهو يشوفلها بحزن..
دخلها للكوجينه..قعمزها ع الكرسي..
جاب صونيه فيها قطعة مبروشه حطها قدامها وقال بإنفعال..
/حبيبة الجالي..ولا..درتيها ع خاطري يعني..خدي الطرف وشد راسها من الخلف وقعد يوكل فيها بالغصب ويقول..
/تلعبي بمشاعري..عاجبك الجو وانتي تقهري فيا..
هي كانت تاكل وتبكي..
الجالي:والله نبكيك دم مش دموع..جنة هادي كيف ماحسرتيني عليها نحسرك عليها نخليها حداك وماتقدري تشوفيها..زي ماحرقتي قلبي حنحرق قلبك..كولي.كولي..
وهي تاكل وتبكي..لين غصت..
قعدت تكح لين دموعها نزلوا..
هو انجن من الخوف عليها..جابلها ميه..
وقال بخوف:هاك اشربي ياعمري...
هي خدت الطاسه وقعدت تشرب..بعدين حطتها ع الطاوله وهي مازال تكح بعدين قعدت تبكي..هو شد وجهها بإيديه وقعد يقول بألم..انتي اللي تخلي ندير هكي..انتي...وقعد يمسح في دموعها وهي ترعش وماتبيش تقيم عيونها فيه..
قالتله بصوت مخنوق..
/ارجوك حول ايديك..
هو بعد ايديه عنها..هي ناضت طول وطلعت تجري هاربه منه..
ركبت الدروج وهي مرعوبه في بالها انه لاحقها.
خشت تجري للجناح وسكراته عليها..وحطت راسها ع الباب وقعدت تبكي...
🍃وهو لوطا كان حاط راسه فوق ذراعه ع الطاوله ويبكي بحرقه....
🍃ادخلني حبكي سيدتي مدن الاحزان ...
وانا من قبلك لم ادخل مدن الاحزان ..
لم اعرف ابدآ ان الدمع هو الانسان ...
ان الانسان بلا حزنآ ذكرى انسان 🖤
#سجن_يوسف
#طوبى
...يتبع....
