■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃أنت القصة التي لا أريد أن تكون لها نهاية🍃
_______________________________________
في احدى المستشفيات العامه فالعاصمة طرابلس..
في غرفه الاسعاف والطوارئ اللي كانت مليانه بالحالات كان الجالي منهم..
حواليه ممرضات وطبيب يتفحص في وضعه..
الطبيب:طريحة باهيه..
الممرضه:اشبح من هما اللي كانوا شادينه..
فجأه انفتح الستار اللي كان مدرق الجالي وخشوا المهدي وعمر..
بنظرات صدمه والم كانوا يشوفوا لوضع خوهم الطبيب سألهم..
/تعرفوه؟
المهدي وهو يشوف للجالي بألم..
/خوي..
رفع حواجبه وقال..
/اها انتم جايين من طرف الدكتور رافع الحشاني!؟.
عمر هز راسه بإيجاب وعيونه ع خوه..
المهدي:شن وضعه يادكتور!؟
قاللهم:اطلعوا شويه وخلوني نشوف شغلي بش نعرف وضعه وبعدين نقوللكم عليه..
عمر شاف للطبيب من فوق لتحت بنظرات حاده بعدين شاف لخوه وقال..
/مفروض نطلعوه لمصحه ولاعياده..
شافوا الممرضات للطببب اللي كان يشوف لعمر بحده..
المهدي شد يد خوه وقال للطبيب..
/شوف شغلك يادكتور شوف..
وخدي خوه من يده وتباعدوا عنهم..
عمر بغضب:هدا غير عندنا واسطه!..
المهدي بضيق:مش وقتك بكل راهو..
سكت عمر وهو معصب فك يده من خوه ومشي طلع مرة وحده والمهدي قعد واقف في الحجرة يراجي فيهم..
جاه اتصال..
طلع هاتفه من جيبه ومشي طلع من الحجره شاف المتصل لقاه سدره..
فتح الخط ورد..
/ايوه..
"هاه مهدي شن صار"
المهدي بضيق:لقيناه في حالة..
"باهي انت رد بالك راك تحول الكمامه وتباعد عن التجمعات ارجوك مهدي وماتمس شي ماتمس شي بالله عليك"
غمض عيونه وفتحهم بضيق بعدين قال..
/حاضر..حاضر..بنمشي نشوف شن صار مع الدكتور ونخبرك سلام..ونهي المكالمه طول ومشي رجع للحجره..
🍃في باحة المستشفى..
كان عمر واقف مع نضال ع سيارة المهدي يحكيله..
عمر:في وحده تخدم في الخطوط**** خوها دكتور هني في الطوارئ كلمتها واتساب وحكتيلها اللي صار وقلتلها مرات اللي خطفوه يلوحوه قدام وحده من المستشفيات العامه زي ماصار مع هلبه غيره قبل....
نضال:ايه زي ماصار مع اكرم الشيباني.
عمر:ايوه..المهم بعتلها صورته واسمه تعطيهم لخوها وقلتلها تعطيه رقمي في حالة صار وجابوه للمستشفى يخبرني
سبحان الله اليوم كنت ناوي نمشي ل**** واحد نعرفه قريبه قالي نرفعك ليه وتكلمه عن خوك كيف درست قدام حوش الراجل جاني اتصال الدكتور..
نضال بضيق..
/تتوقع ترجعله حالته هديكا!؟
تنهد عمر بضيق وهو يمرر في نظره ع المكان بعدين قال..
/ومرات احرف من قبل..
نزل نضال عيونه وقال بضيق شديد..
/الله المستعان..
🍃ويوصل الخبر لمحمد شنيبه اللي كان موجود في حوش خوه ويطلعوا هو وخوه وواحد من ولاد خوه من الحوش طل متوجهين للمستشفى..
☘☘☘☘
وسط الطبيعه الحلوة..وهي تتنفس في الهوا النظيف كانت طوبى تقيم في صلاة العشاء..
لحد الآن وهي تصلي مش قادرة ترجع لحالة الخشوع اللي كانت تعيش فيها قبل اول ماتخش الصلاة..
لكن ع قد ماقدرت جاهدت بش تخلي صلاتها مقبوله..
بعد مانهتها..قعدت في مصلاها تذكر في الله..
احيانا تسرح رغم عنها بعدين ترجع تركز وتحاول تستعشر معاني الاذكار اللي تردد فيها..
كملت الاذكار..غمضت عيونها ورفعت راسها فوق شويه وهي تقول..
(يارب مش عارفه شن اللي قاعد يصير معاي..ياترى في ذنب درته قاعد يحول بيني وبينك!؟ ولاالحزن ياربي ضعف قلبي وروحي وخدي مني ايماني!؟..ولابالك ياربي انت تعاقب فيا ع سوء ظني بيك!؟ لكن والله ياربي مش قصدي انت عارفني شن مايجيني منك راضيه بيه وحباته لأنه منك وديما صابرة بيك ع كل شي صعب مريت بيه..ماتأخذنيش ياربي ع لحظه ضعف مريت بيها واني في اضعف حالاتي..اغفرلي ياربي اغفرلي اغفرلي..وماتخلنيش لنفسي ارجوك..)
فتحت عيونها وهي تشوف للسمي ودموعها نزلوا منها وهي تقول بنبرة مخنوقه وكلها رجاء وألم..
"ماتخلنيش"..
غمضت عيونها وخدت نفس عميق بعدين نزلتهم وفتحتهم وهي طلع في النفس..
هبت عليها نسمه بارده حلوة هلبه..رسمت ع وجهها ابتسامه خفيفه..لحظات وحست بروحها نعست..رقدت ع الصلايه وراحت في النوم...
🌠ورجعت خشت لعالم المنام بس هالمرة المنام كان مختلف..
وكأنها مقعمزة ف مكان خالي تماما مافيه ولامخلوق لكن سمعت صوت ماتعرفاش يقرا في سورة من القرآن...
"سورة الضحى"
وَالضُّحَى (1) وَاللَّيْلِ إِذَا سَجَى (2) مَا وَدَّعَكَ رَبُّكَ وَمَا قَلَى (3) وَلَلْآخِرَةُ خَيْرٌ لَكَ مِنَ الْأُولَى (4) وَلَسَوْفَ يُعْطِيكَ رَبُّكَ فَتَرْضَى (5) أَلَمْ يَجِدْكَ يَتِيمًا فَآوَى (6) وَوَجَدَكَ ضَالًّا فَهَدَى (7) وَوَجَدَكَ عَائِلًا فَأَغْنَى (8) فَأَمَّا الْيَتِيمَ فَلَا تَقْهَرْ (9) وَأَمَّا السَّائِلَ فَلَا تَنْهَرْ (10) وَأَمَّا بِنِعْمَةِ رَبِّكَ فَحَدِّثْ (11)..
🌠فتحت عيونها..حست بيد تهز فيهاوسمعت صوت ينادي بإسمها..
رفعتهم في الشخص اللي ينادي فيها كانت اريج لاحظت ع وجهها ملامح الفجعه وهي تقول..
/خلعتيني ياطوبى!..
حطت يدها ع صدرها وغمضت عيونها..
ناضت طوبى قعمزت وهي تقول بضحكه..
/سهفتني البروده للنوم..
فتحت اريج عيونها شافتلها..حضنتها بقوة بدون ماتتكلم..
ضحكت طوبى بعدين قالت..
/طلعتي تحبيني هلبه..
اريج:توا بس طلعت نحبك ياقردة..
ضحكت طوبى بعدين قالت..
/حلمت حلم يهبل..
تباعدت اريج وشافتلها وهي تقول بإبتسامه وعيونها مليانات دموع..
/شن حلمتي!؟
طوبى بإبتسامه..
/حلمت بسورة الضحى حد يقرالي فيها..
اريج:معروفه قصة السورة هادي اكيد تفسيرها ليه علاقة بقصتها..
طوبى وهي مبتسمه براحه..
/هدا علاش اني فرحانه..تنهدت وقالت..تعرفي اريج بديت نتمنى نعيش هني اول مانخش الخمس نحس بشعور اشبح كيف وكأني..ضحكت وقالت..مش عارفه كيف نوصفلك بس نحس بشي حلو هلبه..
ضحكت اريج وقالت..
/شكله بيصيرلك فيها شي حلو..
بدت ع وجهه طوبى ملامح التساؤل وهي تقول..
/زي شني!؟
رفعت اريج كتافها ونزلتهم وهي تقول بضحكه..
/مش عارفه حاجه جت ع بالي وقلتهالك وخلاص..
"اريج..طوبى"
التفتوا الزوز للخلف شافوا اميمه واقفه من بعيد تأشرلهم يجو..
اريج بضحكه:بعتوني ناديك رحت معاك..نوضي تعشي نوضي
مدت طوبى يدها لأريج..
شدت اريج يدها ونهضتها حست طوبى بالدنيا لفت بيها..
ضحكت وهي تقول بشي من الوجع..
/دخت..
اريج:اكيد من النوم..هي تعالي تعالي..
طوبى:راجي نقيم الصلايه..
طبست خدت الصلايه..طوتها..بعدين تعنقت ذراع اريج ومشوا مع بعض وهما يهدرزوا ويضحكوا واميمه تشوف لطوبى كيف تضحك ابتسمت من قلبها...
☘في هديكا الليله اللي كان فيها القمر خاش في مرحلة التربيع الثاني..بوجهين نص مظلم ونص منور..
عاشت طوبى لحظات حلوة مع اهلها برغم الوجع اللي تحس بيه وهي تشوف في نظرات الخوف فعيون بنتها..
تشوف فيها كيف مرة تجي لأريج ومرة لهاديه ومرة لصفيه ومرة لغرفه لكن ماتبيش تجي جيهتها ابدا..
ع قد ماتقدر حاولت تكتم حزنها وتشد دموعها وماتحسس اللي حواليها بشي وكأن اللي قاعد يصيرطبيعي..
لكن هما كلهم كانوا شايفين كل شي وحاسين بيها..حاولوا يديروا زيها مابوش يحسسوها بشي وكأنهم مايشوفوا في شي..
واكيد مش حيقعدوا يتفرجوا لازم يديروا حاجه يردوا بيه علاقة الام ببنتها زي ماكانت واحسن..
واكثر حد كان حامل هالهم ويفكر فيه هي..غرفه...
☘☘☘☘
ثاني يوم..
الجمعه...
الرابع والعشرين من ذي الحجه..
14 اغسطس..سنة2020..
الساعه 9:30صباحا...
كانوا الصغار يلعبوا في الطبيعه الحلوة وعيون الكبار عليهم..
حسين واميمه وغرفه وفي نفس الوقت كان يدور بينهم حديث عن..
اميمه بإبتسامه..
/فكرةحلوة هلبه..
غرفه وهي تشوف بإبتسامه لجنة كيف تلعب قالت..
/والاحلى ان الام وبنتها جايين في نفس الشهر صح مش في نفس اليوم لكن عادي نديرولهم مع بعض..
حك حسين حاجبه بعدين عقده مع التاني وقال..
/تمام لكن مرات طوبى ماتبيشي الجو هدا هي توا ملتزمه بتقولك العيد ميلاد حرام..
غرفه:مش عيد ميلاد..ذكرى ميلاد وبعدين بنديروه ع سبيل البهجه مش اكثر..
رفع حاجبه وقال..
/ايوه حني ياسبيل البهجه انتي يامصطلحات من امتى وانتي مثقفه هكي وتعرفي تتكلمي!؟
ضحكت اميمه..
غرفه:مانيش راده عليك توا خل ناخد مصلحتي منك بعدين نرد عليك .
اميمه بضحكه:مصلحة شني!؟
غرفه:وصيته يشوفلي سيارة..اسمع بعد مانروحوا من هني نبيك تشقى بيها ايوه ولاخليني نكلم خالي من توا..
طنشها ومشي بإتجاه الصغار..
غرفه باحراج:شكلي كثرتها عليه تو نكلم خالي وخلاص..
اميمه:علاش ماتاخديش سيارة رؤوف الله يرحمه؟!
غرفه بشي من الضيق..
/خليتها للصغار..
هزت اميمه راسها بصمت..
كملت غرفه كلامها تقول..
/تعرفي نفكر نكمل قرايه في الدراسات العليا نبي ناخد الماجستير..
ابتسمت اميمه وهي تشوفلها..
غرفه:غير يصير من حكاية الروضه للولاد نديرلهم باص يرفع ويجيب ووقت دوامهم اني ناخد محاضراتي..وهاديه مش حتغلب في مئاب..
اميمه:معاك وندعمك بقوة..
ابتسمت غرفه وقالت .
/وبالمرة ندير ايام معينه نمشي نشوف فيهم الرزق..ضحكت وكملت تقول..كلمة عبد الرؤوف وين نسأله نقوله وين ماشي يقولي ماشي نشوف الرزق..
ضحكت اميمه..
تنهدت غرفه بإبتسامه وقالت.
/الله يرحمه ويسامحه..
"وسع وسع ياابني انت وهو "
التفتوا لقوا اريج جايه وهي شاده دراجه تمشي فيها وهاديه جايه بوحده تانيه وراها..
ووراهم طوبى وصفيه يضحكوا ومعاهم عبد المطلب يشوف لحسين وهو يلعب مع الصغار..
هاديه بضحكه:والله احلى حاجه درتيها ياغرفه..
غرفه بإبتسامه..
/اريج وصتني عليهم..
رفعت اريج عبايتها وركبت الدراجه..
وطوبى تشوفلها بإبتسامه استنكار وهي تحرك في راسها يمين ويسار..
وهاديه اللي كانت لابسه لبسه سروال ركبت ع التانيه..
اريج:تلاته اتنان واحد انطلاق..
وتنطلق اريج بالدراجه وهاديه وراها..
الصغار لما شافوهم وقفوا لعب وقعدوا يتفرجوا..
وحسين وهو يشوف لاطراف وشاح هاديه كيف يطيروا وراها وهي تجري بالدراجه قعد يضحك..
☘وقعدوا اريج وهاديه يدوروا بالدراجات وهما في قمة الاستمتاع وباقي العيله يتفرجوا ويعلقوا عليهم..
غرفه بضحكه:سهفوني..علت صوتها وهي تنادي..اريج..واشرتلها تجي..
شافلها حسين..
واريج مشت بإتجاهها لين وصلت فيها.
غرفه:انزلي بنركب..
نزلت اريج وهي تقول بضحكه..
/تعرفي!؟
غرفه:علمني رؤوف..وخدت الدراجه بتركب عليها..
قدملهم حسين وهو يقول .
/قصدك تعرفي تسوقي دراجه انتي!
ركبت غرفه وقالت..
/خير منك..
اميمه صاحت تشجيعا لغرفه..
وصفيه رفعت ايديها وهي تصفق..
اما عبد المطلب يراقب في ولده بس..
شافه ماشي بإتجاه هاديه وهو يقول..
/خير مني صار!..تمام..
وصل في هاديه وقال..ترا انزلي خالتي..
نزلت هاديه وهي تضحك..
طوبى قالت لغرفه..
/فوتي ياغرفه مانكش قد حسين..
غرفه بتحدي:قده ونص تفرجي وشوفي بس..
هو ركب الدراجه التانيه وقال..
/ورينا..
قدمتله غرفه بالدراجه وعيون الكل عليها..
نظرات ولادها ليها كانت نظرات فضول وتشويق..
هي وصلت في حسين وقفت جنبه..
حسين:ياقعادك مضحكه..
رفعت حاجبها وقالت..
/تو نشوفوا..
اريج بصوت عالي..
/هيا هي تلاته اتنان واحد..انطلاق..
ضحكوا عليها..وانطلقوا حسين وغرفه..
اميمه وطوبى واريج وصفيه كانوا يتفرجوا ع غرفه وهي تسوق في الدراجه بدهشه اما هاديه كانت تضحك وتقول..
/صحة ليها..
☘حسين وهو يشوفلها مرة مرة قال..
/تفاجئي فيا هلبه عندك علم!
غرفه:ومازال ياما تشوف من غرفه اللي هازي عليها..
وزادت السرعه ومدت ايديها افقيا وهي تصيح..
طوبى بخوف..
/حي عليا..ياواقي ياربي ياواقي..
اريج بدهشه:طلعت حريفه..
هاديه بصوت عالي..
/ايوه غرفه ايوه..وتصيح وهي تصفق..
وعبد المطلب يضحك..
وصلوا حسين وغرفه لنهايه المكان اللي هما فيه..
جو مقابلين بعض وهي تقول..
/مازال ماريت شي..وفاتت من قدامه بلمح البصر ولفت ورجعت وهو لحقها وقال..
/ماتصدقيش روحك هلبه تساهلت معاك راهو..
غرفه ضحكت بسخريه وكملت طريقها بدون ماترد عليه لين وصلت قبله..
ولادها صاحوا بفرح وهما يصفقوا..
نزلت من الدراجه وعيونها عليهم وهي تضحك بعدين رفعت يدها وحيتهم .
والنساوين صفقولها حتى هما وقعدوا يصيحوا بإسمها..
"غرفه غرفه..ياصقع انت ياصقع"
وهاديه تهتف..
/زيد تحدا زيد...
رفعت غرفه ايديها وضمتهم لبعض..
وكلهم يضحكوا عليها..
اما حسين اللي كان متكي ع الدراجه كان هايم معاها بنظراته يحس شعور حلو غامره مخليه مبتسم ابتسامه حلوة وهو يشوفلها..
تنهد..بعدين غير نظره عنها جو عيونه في عيون بوه لقاه واقف مربع ايديه ويشوفله بالابتسامه الغريبه اياها..
هو هني استاقظ..اختفت ضحكته وحلت محلها ملامح الجديه وغير نظره عنه وخلاه يضحك عليه..
🍃🍃🍃🍃
مقعمزة ع الكنبه..شاده في يدها هاتفها تتكلم مكالمة فيديو..
"وصلاتك الورقه حبي"
نجاة بإبتسامه:ايه وصلتني بس نبي نعرف شن صار فيه!؟
"بعد ماطلع من المحكمه خدوه الشباب نظموله اموره وبعدين سقدوه"
هي رفعت حاجبها وقالت..
/مليح..
"انتي المليحه اللي قاعده دوخي فيا وراك"
نجاة بضحكه مايعه..
/اصبر تلاته شهور الصبر اخرته حلوة..
"مشكلتي كبدت فيك غارق فيك لوداني"
ضحكت بنفس المياعه وقعدت ساكته..
"اسمعي ياعسل الاسبوع الجاي بنسفرك وتي روحك"
نجاة بإبتسامة غرور:ديما واتيه اني..
🍃🍃🍃
"فاق بكري لكن قال لدكتور مانبي نشوف حد"
محمد شنيبه بضيق..
/ماعلياش فيه خلاص وانت درت اللي عليك بزايد همي كله توا يخلي بنت الواعر في حالها..
المهدي هز راسه وهو يفكر بقلق..
🍃هالحديث كان يدور بين الاب وولده في المربوعه..
ومن المربوعه لدار مغليه كانت قاعده معاها سميرة تغدي فيها..
سميرة:هادي وخلاص هي كولي..
كلت منها وهي تتجنب تشوفلها..
حطت سميره الكاشيك في السفره بعدين خدتها وناضت ومشت طلعت من الدار..
وهي متوجه للكوجينه لاقتها خديجه وهي طالعه منها كانت تمشي بعصبيه لين وصلت في دارها خشتلها وخبطت الباب بقوة..
وسميرة وهي خاشه الكوجينه كانت تدعي بهمس..
/عطيك مايرفعك..
🍃🍃🍃
"لاوالله مش هكي لكن حكاية تعود وخلاص"
محي الدين وهو متكي في سرير ويتكلم بالهاتف قال..
/ابتسام..
"نعم"
قعمز كويس وقال بشي من التوتر..
/من غير لف ودوران..اساسا كبرنا ع الجو هدا حني..من الاخير اني نبي نتزوجك يابنت الناس..
حل الصمت..معاش سمع حتى نفسها..
هو بتوتر قال..
/ابتسام..
حمحمت وقالت..
"مافي حد من العيله عنده مانع!؟"
ابتسم وقال..
/غير من بيكون عنده مانع بس..
"شوفهم قبل يامحي مانبيش نكرر نفس الماساة"
هو قال بضحكه..
/ربك مايجيب مآسي..امي راضيه وهي اللي تبي ياابتسام..
"وصغارك؟"
محي الدين:الموضوع هدا مايخصهمش اصلا بعد ماناخدك بنسكنك في حوشي التاني وبنخليلهم الشقه..
رجعت التزمت الصمت..
هو قال..
/شن قلتي!؟ يبستي ريقي راهو..
ضحكت ضحكت خفيفه بعدين قالت..
"بعد هكي كلامك مع خوتي مش معاي..باي.."
ونهت المكالمه وخلاته يضحك من قلبه...
🍃🍃🍃🍃
الساعه 7:00مساءا..
في شارع القهوة اللي بدي يرجع لسابق عهده زحمه وحركة ودوشه ابرزها دوشة المولدات...
قدام مقهى نضال كانوا مقعمزين يزن وواحد من صحابه ومعاهم محمد ولد عمته وحمزه ولد عمه..
بعيد عليهم شويه قدام حوش الصيد كانوا واقفين محمد ولد خديجه ومعاه ولد جيرانهم مروان وواحد من ولاد عبد الفتاح..
☘ولاد عبد الفتاح الفترة الاخيره صار بينهم وبين محمد تقارب هما بدوا بيه ونوعا ما بدي يتأثر بيهم ويحب صحبتهم ☘
وهو لاهي مع ولده عمه بالهدرزة..
كان مروان واقف يشوف لشباك شقة فايزة...
🌸وفي شقة فايزة..
كانت تاله في دارها..حاطه قدامها مذكرة الاسئله الاسترشاديه لكن ماكانتش تقرا فيها..عقلها معدي شور ولد جيرانهم اللي قاعده تحس اتجاهه بمشاعر جارفه..
هو يزن ع صغر سنه كان جذاب ومميز وصاحب حضور طاغي اكثر من خوه وخفه الدم زاداته جاذبيه..
وبنيه في عمرها كيف خاشه سن مراهقه قلبها الصغير تأثر بيه وانجذبله بقوة..
🍃وهالمشاعر اليافعه كان في ليها محفزات خارجيه..زي المسلسلات اللي تتفرج عليها..او قصص الحب اللي سمعت عنها ابرزها قصة المهدي وسدرة..او الاحاديث اللي تسمع فيها من اختها ع راجلها او من اللي تشوف فيه يصير مع اختها مروة..🍃
وهي توا حاليا تشوف ليزن ع انه فارس احلامها وتخيلت تصير بينهم قصه تشبه قصة بوه ومرت بوه...
تنهدت..وناضت..مشت طلعت من دارها وتوجهت لوسط الشقه مالقت حد..
شافت للشباك لحظات بعدين قدمتله..
وصلت فيه..شافت من ورا شباك PVC لقاته مقعمز قدام المقهى ابتسمت من قلبها اللي كان يدق بقوة..
خدت نفس بعدين فتحاته...
🍃عيونها كانوا عليه هو بس..وعيون مروان عليها..
لاحظه محمد ولد خديجه التفت شاف وين يشوف ابتسم بتهكم ورجع شافله..
🍃ويزن وهو مشغول بالهدرزة كانت تاله منسجمه معاه وناسيه نفسها مااستاقظتش الا ع صوت منبه سيارة خاطمه في الشارع..شافتلها..بعدين غيرت عيونها عنها جو في عيون مروان..
هني يزن بالصدفه قام عيونه شاف تاله واقفه في الروشن وعيونها ع حد شافله لقاه مروان بدي الدم يغلي في عروقه..
تاله شافت لمروان بحده وسكرت الشباك..
محمد محي الدين بضحكه..
/فوتها ياراجل معاش تكسر روحك نتايه..
ولد عبد الفتاح قال..
/فوت وجع الراس ياراجل..
مروان بإنزعاج غير الموضوع وهو يقول..
/نتلاقوا وقت المباراة..
ابتسم محمد محي الدين تهكما.
وولد عمه قال..
/تم..
مشي مروان طول فات من قدام يزن واللي معاه ويزن قعد معاه بعيونه لين درق بعدين رد نظره للشباك شقة فايزة وهو يشوفلها بنظرات حاده..
🍃🍃🍃🍃
في الخمس..
قاعده الاجواء محافظه ع جمالها..
لعب الاطفال واصوات ضحكاتهم معبي المكان..
ولمة النساوين ع عالة الشاهي مع الاحاديث الحلوة..
والرجاله قراب عليهم كانوا يجهزوا للشوا..
طوبى وسط هاللمه الحلوة بنظرها وقلبها وعقلها مع جنه.
مش متحمله بعد بنتها عنها وقاعده تفكر في طريقه ترضيها بيها وتحول الخوف من قلبها..
ناضت من مكانها ومشت بإتجاهها وين ماهي تلعب..
وصلت فيها لقتها تركب في قطع البازل..
خدت وحده وركبتها هي..جنه قامت راسها وشافتها بعدين نزلت عيونها بزعل..
حضنتها طوبي من الخلف وباستها من خدها بعدين جت عند وذنها وبدت تغني بصوت منخفض..
"عصفور طل من الشباك"
جنة كانت تسمع فيها بدون ماتشاركها..
وقفت طوبى غني وقالت..
/استاحشت ناكل الفراولات..عطيني وحده..
مدت جنه خدها لأمها..
طوبى بضحكه:عطيني انتي..
حطت جنه يدها ع خدها وكأنها قطفت منه فرواله حقيقيه ومدتها لامها..
خدتها طوبى وكلتها بعدين قالت..
/الله..تهبل..نبي تاني نبي..
وقعدت تلعب عليها وكانها تاكل في خدودها وجنه بدت تضحك..
🌸من بعيد شويه اريج شافتهم ابتسمت من قلبها مدت يدها ضربت ع فخد خالتها غرفه اللي كانت لاهيه بالهدرزة مع هاديه..
شافت لأريج اشرتلها اريج بعيونها عليهم شافتلهم بدت ع وجهها ابتسامه حلوة وهي تتأمل فيهم...
🍃الابتسامه اللي اختفت من وجه عبد القيوم مولي زاهد في الدنيا ومافيها..مولي يشوف فيها باهته وماليهاش طعم..
يوم عطلته هدا قضاه حبيس حجرة الهوايه متاعه..
كان يشتغل ع لوحات منها طلبات زباين ومنها اللي كان يبي يلهي نفسه بيهم..
وفي عز انشغاله جاه اتصال..حط اللي في يده وخدي الهاتف..
شاف المتصل لقاه واحد من اعضاء الجمعيه..
تنهد بعدين فتح الخط ورد..
/السلام عليكم عبد الحكم كيف حالك..
"وعليكم السلام..عاش من سمع صوتك ياسي"
يدوب ابتسم وهو يقول..
/والله انشغلت واجد الفترة اللي فاتت كيف ماتعرف بعد الحرب بدينا نخدموا في المناطق المتضررة مرات نتموا يوم كامل شغل..
"ربي يعاونكم ربي يعاونكم باهي مانحصلوش من وقتك ساعتين بكرا تجي فيهم لمقر الجمعيه في اجتماع ضروري "
سكت شويه بعدين قال..
/امتى؟
"الساعه سته بعد العصر"
مرر نظره قدامه وقال..
/تمام نشوفك بكرا ان شاء الله..
"بإذن الله..تصبح ع خير"
عبد القيوم:قدامك كل خير..
نهي المكالمه وحط الهاتف في مكانه ورجع خدي قلم البينا وكمل كتابة...
🍃🍃🍃🍃🍃
ويجي تاني يوم..
كان السبت..
الخامس والعشرين من شهر ذي الحجه..
15اغسطس..سنة 2020..
وع الساعه ستة بالضبط كان عبد القيوم واصل لمقر الجمعيه..
اول ماخشله لاقوه مجموعه من الاعضاء الشباب سلموا ع بعض وقعدوا واقفين مع بعض يتبادلوا في الاحاديث..
☘وعيون سلافه اللي نظراتها كلهم شوق ماغيرتهمش عن عبد القيوم..
ميار جتها وهي تقول..
/اهو جي او جانا..
سلافه بإبتسامه حب..
/شو اشتقتلو ياميوش اشتقتلو كثير..
ميار شافت لعبد القيوم بإبتسامه..
هو في فهاللحظه مرر نظره ع المكان جو عيونه عليهم حياهم بحركه الراس وهما ردوله التحيه بعدين غير نظره عنهم..
سلافه بهيام:دخيلوا لقلبك انا..
ضحكت ميار..
☘لحظات وخشوا قاعة الاجتماعات وبدت نفيسه الاجتماع..
وسلافه من اول مابدي وهي تسرق في النظر لعبد القيوم وهو منسجم مع الاعضاء ونقاشهم وهالمرة التزم الصمت ماكانتش عنده رغبه يشارك..
نفيسه:الورشه هادي حتكون في ******* وتبدا في نص شهر سبتمبر واني اخترت الاستاذ عبدالقيوم والانسه سلافه بش يكونوا مشرفين عليها..
سلافه اتفاجئت ومن داخل حست بفرحة لاتوصف..
اما هو ماكانش عنده مانع شاف لسلافه بعدين نظره لنفيسه وقال..
/ان شاء الله نكونوا عند حسن ظنك..
ابتسمت ميار بفرح وهي تشوف لسلافه اللي كانت تتجنب النظر لعبد القيوم فهاللحظات بش خوف نظراتها تفضحها
عيونها قعدوا ع نفيسه وهي تقوللها..
/شكرا كثير ع ثقتك الغاليه..
نفيسه بإبتسامه:موفقين بإذن الله..طبعا حيكون ضيفكم الخطاط الليبي المعروف **** **** فرصه وجتكم لعندكم..
ابتسم عبد القيوم..
/فعلاوالله فرصه الاستاذ **** فنان بمعنى الكلمة ليا فترة متمني نتلاقى انا وياه وجه لوجه..
سلافه:التقيت فيه مرة وحده بأول معرض خط حضرتوا هون فعلا فنان حتى بأخلاقه...
عبد الحكم:الخطاطين كلهم هكي على فكرة..
نفيسه:شكار العروس..
ضحكوا كلهم..
عقدت نفيسه حواجبها وقالت..
/الا بالله بنسألك استاذ عبد القيوم استاذ سامي ليه فترة مختفي ومعاش قدرنا نوصلوا فيه..
عبد القيوم بأسف..
/عنده حالة وفاه عمه متوفي..
نفيسه:اها الله يرحمه ويغفرله..باهي الفنانه الحلوة صاحبه الاسم الفريد طوبى مافيش اخبار عنها..
شافت ميار لسلافه لاحظت كيف لون وجهها انخطف وملامح وجهها تبدلت لغيره ممزوجه بالضيق وهي تشوف لملامح وجه عبد القيوم..
عبد القيوم اللي مجرد مابدت نفيسه كلام عن ام العيون الحايره قلبه المتعذب في حبها فر فران..طار وسط ضلوعه..
لكن الظاهر متاعه كان عكس الباطن ابتسم بالغصب وجاوبها..
/صارتلها ظروف حتى هي مرضت وبعدين توفى جدها..
نفيسه:الله يرحمه ويغفرله..مررت نظرها عليهم وقالت..المهم خلاص متفقين مع الشهر القادم بإذن الله حيرجع نشاط الجمعيه لسابق عهده وطبعا وحني زي توا رادين بالنا من رواحنا وماشيين ع اجراءات الوقايه...
☘كانوا مطبقين نظام التباعد☘
🍃🍃🍃
طلعوا من الاجتماع وسلافه شدت عبد القيوم بش تتكلم معاه عن مشروع معهد الخط...
عبد القيوم:في بالي مانسيتاش نهائي ..
سلافه بإبتسامه:بعرف هالشي منيح واعذرني ع العجله اللي عندي بالنسبه إلي هدا مشروع العمر.
عبد القيوم:وانا مش اقل حماس منك للمشروع هذى بإذن الله في القريب العاجل حنبدا فيه..
سلافه:ان شاء الله..
هو قال:هي ماتبوا شي !؟
سلافه بإبتسامه:سلامتك..
عبد القيوم:السلام عليكم..ومشي..
وهي معاه بعيونها ردت..
/وعليكم السلام...
🍀🍀🍀🍀
ويعدوا يومين..
طلع بعدهم الجالي من المصحه لحوش صاحبة حكيم رفض يشوف اي حد من اهله ورفض مساعدتهم رفضا قاطعا..
🍃الجالي:بنقعد عندك يومين لين نظم اموري..
حكيم:اقعد لأمتى ماتبي..
الجالي:لاهما يومين مش اكثر..طلعلي من فلوسي اللي عندك 5الاف..
حكيم:ع شن ناوي!؟
الجالي بغضب..
/نبي نطلع برا منها هالبلاد الوسخه معاش نبيها بكل..
حكيم بضيق..
/وين بتمشي!؟
رد عليه يقول...
/تركيا..
#منازل_القمر
#طوبى
..يتبع...
