#طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لَيتُني فَراشةٍ لَـ أخِترتُ يدُِكَ غٌصنّاً لَي🍃
________________________________________
حطت قدامها كيس لوحده وكلاء الهواتف المشهورة وقالت..
اميمه:وهدا تليفون جاك من حسين..
طوبى بضحكه؛هدا رابع تليفون نديره..طلعت العلبه من الكيسه لما شافتها قالت بدهشه..هدا غالي هلبه يومها شفت عرض عليه واصل الف!
اميمه؛مايغلاش عليك قال هادي بنتي..
طوبى ودموعها في عيونها..
/ربي يجبر بخاطره ويعطيه ع قيس نيته..
اميمه بإبتسامه:آمين..
ضمت الكيسه والتليفون وقربتهم ليها وقالت..
/اميمه..
اميمه بإنتباه؛امم..
طوبى بشي من الارتباك..
/لو فيها كيف تشوفيلي حواليك طبيبة نفسيه كويسه..
اميمه:احسن خطوة تاخديها توقعتها منك انتي قويه وتقدري تواجهي كل شي ..
شدت طوبى دموعها وهي مبتسمه وقالت..
/إن شاء الله..
اميمه:حيفوت كله وحتعديه زي مااني عديت اللي صار معاي..توا بس ركزي مع نفسك وبنتك..فكري في مستقبلكم في احلامك الحلوة اللي كنتي تبي تحققيها روضة الاطفال نسيتي..
طوبى وعيونها يلمعوا..
/بالعكس..كبر هلبه هالحلم يااميمه مانبيهاش روضه نبيه ميتم توا..
تفاجئت وقالت؛ميتم!؟
طوبى:ايه..ونبي نسميه جنه..نبي نخليه زي الجنه للصغار اللي فقدوا العيله نبيه يطلع ناس كويسه مش مشوهه زي ماصاير توا...
اميمه؛شن خلاك فكرتي في الحاجه هادي!؟
نزلوا دموع طوبى مسحتهم وهي تقول..
/بنتي..وحال بنتي..هي حتعيش زي اليتيمه فاقده وجود اهم شخص في حياة البنت..و مع هدا هي قاعده وسط عيله تلقى من يعوضها..لكن في هلبه غيرها مافيش من يعوضهم ويحتويهم...حمحمت وقالت..هو اني مش حنقدر ندير ميتم يعيشوا فيه كل الصغار اللي ماعندهمش عائل في البلاد بس ع الاقل ندير اللي نقدر عليه..وبعدين المسح ع راس اليتيم ع كل شعره حسنات مابالك برعايتهم..!
اميمه بإبتسامه حب..
/ربي يقدرك ويوصلك للي تبيه..
تنهدت وقالت برجاء..
/يارب..ابتسمت وكملت تقول..وتوا ع قولتك لازم نركز ع قرايتي..الحق مش خايفه من النتيجه راضيه بيها كيف ماكانت المهم نصفي ونلهى بالمادتين اللي قعدوا مع المشروع ونتم ونرتاح..
اميمه؛موفقه يارب..اني متوتره ع الاخر من امتحان الزماله..
طوبى بضحكه:انتي الله يبارك ماينخافش عليك ناجحه ان شاء الله..
اميمه؛يارب..
🌿خشت عليهم نبيله وقالت..
/مجتمعين ع خير!..
اميمه بضحكه؛عطيتها التليفون الجديد..
قعمزت نبيله وقالت..
/مبارك..
طوبى:الله يبارك فيك.
نبيله؛بنقولك بنوتك ناضت وشكلها تبي تغيير..
ناضت طوبى وهي تقول..
/ياروحي..وخدت الكيسه ومشت طلعت من حداهم..
قعدوا معاها بعيونهم بعدين قالت نبيله بأسف..
/تعلقها ببنتها يوجع القلب..
اميمه؛علاش ماخلوش هداكا يتنازل ع الحضانه؟
نبيله؛حاليا مالاش حق الحضانه..هي لطوبى ومن بعدها امها وامها الله يرحمها ولو صار وطوبى تزوجت حتمشي لمغليه.
عقدت اميمه حواجبها بخوف..
نبيله؛هو مازال دوره في الحضانه لوجي نقدروا نسقطوها عنه او نخلوه يتنازل..
اميمه:الوضع قاعد يخوف..
نبيله:فعلا يخوف..لأني وبصراحه مش مستريحه من ناحية الجالي..واحد دار اللي داره مانتوقعش انه ينتازل ببساطه هكي وينسى..يعني وهكي فكرت ان الجالي انسحب بش يرجع..
زفرت اميمه بضيق..
نبيله؛نتمنى من قلبي نكون غالطه..
اميمه بضيق:يارب..حرام والله حرام..حتقعد طول عمرها مربوطه بيه مادام جنه في النص تقعد زي الحبل الملفوف ع رقبتها..
نبيله؛فعلا..ولو اني متأكده ان حتى لو ماكانتش جنة موجوده الجالي مش حيخلي طوبى..تصرفاته واللي داره كله مالاش علاقه بمرضه هو هكي اصلا غير مرضه زاد من خطورته..
اميمه حطت يدها ع رقبتها وقالت..
/انخنقت.. كان هكي ان شاء الله يموت وتفتك منه ..
نبيله بضيق؛مافيش غير هكي..استغفر الله العظيم..
🍃🍃🍃🍃🍃
وبعيد عن الهواجس..والتوقعات المخيفه...
كان في من غارق في عالم كله تفاؤل وحب...
التارقي..اللي كان مقعمز فوق سريره في داره..
وفي يده لوحه يكتب عليها في اسم معشوقته بالخط الديواني..
يكتب..بإتقان..بتأني..وهدوء..وحب شديد..
ويامحلا ملامح ابتسامه العشق اللي باديه ع وجهه وكأنه يشوف فيها قدامه..يشوف في الموقف اللي صار بينها بينه..
نظرة عيونها الخاطفه..ملامح وجهها مش عارف علاش هالمرة شاف فيهم شي مختلف..
ويرجع عقله يكذب عيونه قلبه ويقوله انت اللي توهم فيه..
وهو اختار يعيش الوهم..
مش بيده..عاشقها...قلب صب وحبها ملكه..مش قادر يحكمه ولايتحكم فيه..
عيونها الحايره بنظرتهم اليوم زادوه على مابيه..مش قادر يحولهم من تفكيره لحظه وحده..
وقف كتابه وبدي يقول...
ﻛﻴﻒ أﻧﻬﻮﻧﻚ
ﻭﻧﺎ ﺍﻟﺤﻠﻢ ﻣﺎﻫﻮ ﺣﻠﻢ ﺣﻠﻤﻲ ﺩﻭﻧﻚ
ﻣﺎ ﺷﻔـﺖ .... في ﻫﺎﻟﻜﻮﻥ ﻛﻴﻒ أﻋﻴﻮﻧﻚ
ﻟﻠﻪ ﻓﻴﻬﻦ ﻳﺎ ﻋﺰﻳﺰ ﻋـﺠﺐ
ابتسم بعشق..بعدين رجع يكمل في كتابه اسمها بقلبه موش بس بخط اليد...
🍃🍃🍃
وهوعايش في عالم احلامه الورديه..
ماكانش عارف باللي قاعد يصير من وراه في مسقط رأسه..
الكفره...
🍃يوم الإربعاء..
30يناير...سنة 2019..
عصرا...
لمت عمته سليمه خواتها في حوشها لموضوع مهم ليه علاقه بمستقبل اغلى حفيد ع قلوب كل افراد عيلته..
:كنه عبد القيوم سليمه خوفتيني ياخيتي..
سليمه؛موضوع خير هو ماتخافيش..
وحده تانيه من خواتها قالت بفرحه..
/قولي انه يبي يزوج تربحي..
سليمه هزت راسها بالموافقه..
بدت ع وجوههم ملامح الفرح..
؛باهي ماقالكش منين يبي ياخد من هنا ولامن وين؟
سليمه؛من طرابلس.
؛عربيه؟
سليمه؛اها..
:تعرفيها شكلك..
سليمه؛نعرفها ونعرف هلها هي ماشاء الله عليها سمحه واجد وحرة ومحترمه وهلها ناس كويسين..
؛كان هك ع بركه الله..
سليمه؛ارجي ياخيتي مازلت ماكملت..هي راهي ماهيش بنت..
بدت ع وجوههم ملامح الصدمه..
سليمه توترت وقالت..
/مطلقه وعندها بنيه..
:كنه هذى انهبل ولاشنو!!؟
:شن ناقصه يامينه بش ياخد وحده مطلقه وعندها بنيه اخرى!..
:من جدك ياسليمه ناديتنا بش تاخدي راينا في حاجه كيف هذي!
سليمه؛الطلاق مش عيب وراكن كان تسمعن قصتها توجعكن..
🍃وحكتلهم قصتها كامله...
:نهار اسود!!سليمه كنك عقلك وين! مفروض ماتفكريش فيها بكل..طليقها مجرم وكان يسمع بيها ازوجت يقتل اللي ياخدها..
:وفوق هك ولد خوك بيدخل روحه في معامع ودوشه ولبز واجد..
اختهم الكبيره قالت..
/صح نحنا خليناه يعيش حياته كيف مايبي ويعيش وين مايبي بس ونحنا عارفين ومتأكدين انه مستحيل يضر روحه..حتى في احداث 2011 ماخش..ولاخش في الحروب اللي بعدها لأنه عاقل ويعرف مصلحة روحه..لكن الباين هنا انه مش بعقله رسمي..ردي بالك ياخيتي كان ماتكون ساحراته!..
؛مش بعيده..
سليمه بضيق..
/لاحرام المراة ملتزمه بالدين وتخاف ربي..
:اللي هو..قوليله ينساها وكان بيسكر راسه عليها يعدي لخواله يخطبوهله..
:ماهو بيرضوله بيه خواله! تو تحقي شن يديروا كان فتح معاهم الموضوع..
:سليمه انتي اقربله وحده وديما يناديك امي..كيف ترضيله هالحال..
سليمه بضيق؛يبيها افهمن!..
:وكان يبي يزقب في النار تخليه!! كنك سليمه!؟
تنهدت بضيق وقعدت ساكته..
:الكلام اللي عندنا قلناه بيعاند يدور من يخطبهله اما بش نعزقوه ف النار بإيدينا لا والله ماهي صايره..
🍃وسليمه في الحقيقه كانت مايله لرأيهم في الموضوع لكن في نفس الوقت ولد خوها كان واجعها لأنها تعرف مدى حبه لطوبى..
🍃🍃🍃🍃🍃
والكفره..لطرابلس..
تحديدا عمارة مختار..
اليوم صابرين استضافت صغار اختها من الصبح..قضت معاهم نهار كامل هما وامينه اللي حبتهم هلبه..
🍃في الكوجينه..
كانوا مقعمزين حوالين الطاوله..
صابرين وع رجلها معاذ..وجنبها حمزة يتفرجوا ع رسوم متحركه في اللاب توب متاعها...
اما جوري فكانت تزين مع امينه في الكب كيك..
والراديو بحداهم شغال ع برنامج امينه المفضل..
"وتوا نقروا رسايلكم حبايبي المستمعين ونشوفوا طلباتكم..
هدا سيف العدل يقول..كل شي بالسيف لا حبني يابنادم اللي مايبيش نفوته سلامته مانفرض روحي ع حد..صح ياسيف كلامك مزبوط بس مرات الحب يفرض رأيه يخليك دير حاجات عقلك مش مسؤول عنها.."
صابرين؛ماغير الكذب ماعندكم حاجه..
ضحكت امينه..
"وهادي رساله تانيه من الصربي يقول..والله وعن تجربه اني قعدت ورا البنت اللي نبيها لين خديتها وخليتها معاش تقدر تعيش من غيري..والله صحه ليك"
صابرين؛وهمي هدا..
ضحكت امينه وقعدت تحرك في راسها يمين ويسار..
حط المذيع فاصل غنائي قصير ورجع يكمل قراية باقي الرسايل..
"وهادي رساله من صديق البرنامج ولد البلاد يقول فيها..رد بالك دور راي المراة كان حسيتها مياله ليك هما يحبوا الدلال المالغ..ضحك وقال..جو عليك ياولد البلاد نكملوا باقي رسالته"
قراها بعيونه بعدين ضحك وقال..
"قويه هادي..ياخوفي كان نقراها يقولوا تحرض ع العنف...نكملها!؟..نكملها وخلاص..قال هما يحبوا الدلال المالغ لهدا مادورهاش لو قالت مانبيش تزوجها غصب عنها وطلعها من حوش ماليها من شعرها..."
وقعديضحك..
صابرين بإزدراء:شن الهمجي هدا!!؟ مايبي الا الردع!..
امينه؛ده عايز الردع وغنيوه سوا..
"نوقفوا لعند هني ونسمعوا طلب حبيبنا ولد البلاد اللي خربها بكل"
وحط اغنيه "ثلج ورعد وبرق وريح"
صابرين عقدت حواجبها وهي تسمع وتفكر..
وامينه شاده ضحكتها وهي تكلم في جوري..
وفجأه...
"اوووه..كائنات لطيفه في منزلي!!؟"
شافوا كلهم للباب..
لقوا مختار يمرر في نظره ع صغار طاهر بمفاجأة..
صابرين:خبرتك قبل..
هو خش وهز راسه ..شاف لجوري ابتسم..
وقف ورا رخامه البار ومد يده..
/اسم الحلوة؟
جوري صافحاته وقالت..
/جوري..
هو طبس باس يدها وقال..
اهلا..طلق يدها وشاف لمعاذ وحمزة اللي كانوا يشوفوله..
صابرين؛حمزة ومعاذ..
ركز مختار بنظره ع يد حمزة بعدين رجع شاف لجوري وقال..
/شن حال ماما ياجوري..
امينه وخرت وطفت الراديو وهي تسرق في النظر لصابرين اللي كانت تشوف لمختار بضيق..
جوري:تعرفها ماما؟
مختار:ايه اسمها نجاه..شن حالها وحال عمو الجالي؟
جوري نزلت عيونها بحزن..
مختار؛خيرها جوري زعلانه!!؟ صايره حاجه حبيبتي!؟
جوري شافتله وقالت..
/عمو سافر وماما تبكي.
حمزة نزل عيونه وهو مضايق..
مختار:وعلاش عمو سافر!؟.
جوري:مانعرفش..شافت لصابرين وقالت بعفويه اطفال..ايه ماحكيتلكش لما مشينا لحوش ابله طوبى..
مختار قعمز ع الكرسي وقال..
/شن صار غادي!!؟
صابرين زادت ضايقت بس لاتقدر تعترض ولاتقول شي.
وامينه حتى هي كانت مضايقه..
جوري:تعرف ابله طوبى!؟
مختار؛ايه نعرفها ام جنه..
جوري:ايه صح..ماما ضربتها كف..
انصدمت صابرين..
ومختار بدت ع وجهه ملامح الغضب..
صابرين بصدمه؛علاش!!
جوري؛مانعرفش علاش هي قالت بنمشي للحمام وعمو قال لابله طوبى وريها الحمام..ابله طوبى قالت هي تعرف الحوش كويس وكان تبي تساوي مكياجها تركب للدار تعرفها وين غير دار النوم تغيرت..جتها ماما ضربتها مانعرفش علاش..
تبدلت ملامح الغضب ع وجه مختار لملامح مفاجأه بعدين بدي يضحك بصوت عالي..لين وخر راسه للخلف..
وهما يشوفوله..
هدا شويه بعدين قالت..
/وطوبى بعد ضربتها شن دارت!!؟
جوري:شي بكل بكل..خدت جنه ومشت وهي تضحك..
رجع مختار ضحك مرة تانيه..
وصابرين تشوفله بعيون معبيه دموع..
وحمزه يشوف لاخته جوري بغضب وقال بحده..
/خلاص اسكتي..
جوري سكتت وهي زعلانه..
ومختار هدا ضحك شويه وقال..
/Danke جوري Danke ليا هلبه ماضحكتش من جدي هكي..
صابرين:زمان كانوا يقولوا طوبى تشبه سدره..اني الوحيده اللي كنت نشوف فيها بروحها مش ساهله بكل..ومع الوقت تأكدت من نظرتي فيها..
"طوبى تشبهك انت "..
هو كان يسمع فيها بصمت وعيونه ع الرخامه..بعدين وجه نظره ليها وهو رافع حواجبه..
وصابرين برغم خوفها قعدت تشوفله بجرأة..
نزل حواجبه وابتسم بعدين غير نظره عنها وقال لجوري.
/طوبى اختي الصغيره..
تفاجئوا حمزة وجوري..
مختار؛وانتي شكلك تحبيها هلبه..
جوري:هي طيبه ومرة عطتني قطوسه نربيها لكن راحت مني..
مختار ابتسم بعدين نزل من ع الكرسي وقال..
/ماتخليهمش يروحوا توا راجي ساعه تانيه..
ومشي طلع من حداهم...
صابرين بعصبيه..
/شن قلت ع عواد الدوة شن قلت! مش كل شي تحكيه..
جوري بزعل:هو قال يعرف ماما..
صابرين؛مرة تانيه معاش تحكي لحد بكل حتى ليا اني فاهمه..
هزت راسها بإيجاب وهي زعلانه..
مسحت امينه ع شعر جوري وقالت..
/اللي يحصل في البيت او مع اهلك ماتقوليش عنه لحد دي اسمها اسرار بيوت ياحبيبتي لازم تحفظيها وماتقوليها لحد..
جوري بضيق:حاضر..
ضمتها امينه وباستها..
وصابرين ضمت معاذ ليها وهي مضايقه ع الآخر..
🍃بعد ساعه..
كانوا الصغار جاهزين بش يروحوا..
وهما واقفين في دار المعيشه خش عليهم مختار وفي يده قفص حلو وصغيرفي قطوسه..
اندهشت جوري..
وهو جاها طبس عليها وقال..
/ردي بالك يريح منك..
جوري شافت لصابرين..
صابرين ابتسمت وهزت راسها بإيجاب..
خدت جوري القفص وهي بطير من الفرح وقالت..
/شكرا عمو..
هو وقف ع حيله وقال..
/العفو...
صابرين:هيا حبايبي..
ومشت وهما معاها وطلعوا من حداه..
هو تنهد..بعدين مشي طلع وراهم...
🍃🍃🍃🍃🍃
خشت الصاله وفي يدها سفره فيها طواسي سحلب..
فرقت ع جدها هو الاول بعدين ولد عمها وعمتها وبنت عمها..
وقعمزت حدا اختها الكبيره وحطت السفرة بيناتهم...
علي:لالامدام نقدر نمشي مانضيع ع روحي اجر المشي للجامع..اني بس فاقد للونيس..مش عارف علاش التارقي حول من هني..
نزلت الطاسه بعد ماشربت منها وانتبهت مع جدها..
حسين:هو قال يبي يسكن في حوش ملك لكن لا شكله من بعد اللي صار بينه وبين هداكا قرر يسيب الشارع..
علي:هي السكنه عندهم مايجي من وراها خير لكن ياريت قال رانا شفناله حوش قريب..
حسين؛هو قالي قبل بنقعد في الايجار لين نستقر يعني يتزوج وشكله خلاص بيتزوج..
حطت الطاسه في السفره وحطت ايديها المغطيات ع بعض..
وبنت عمها شافتلها..
علي:جديات!!
مطيره:معناها هدا علاش ماليه جايين لطرابلس غدوة!؟
حسين:حق!
مطيره؛اتصلت بيا سالمين قالت بيتسايروا في الطريق..
حسين سكت وهو يفكر في الوضع الامني والسياسي بقلق..
فردوس:ربي يطيحهم في الناس الباهيه اللي زيهم..
مطيره:ان شاء الله والله عبد القيوم راجل مافيش منه طيب وقدع ومواقفه معانا تشهدله ربي يهنيه..
علي:صدقتي يابنتي وان شاء الله ماتاخده منا الدنيا وينسانا..
شدت ايديها في بعض وهي حاسه بضيق مش عارفه شن سببه..
الكلام اللي تسمع فيه توا علاش ضايقها هكي!..
حسين استاقظ وقال.
/ينسانا ياجدي ينسى..مش حيقعد مربوط بينا..
علي؛هو مش مربوط بينا..لكن ياولدي الشاب هدا خدي مكانه عزيزه عندي مانمتنى نخسره...نشوف فيه زي رجاله الدق الاول..اصيل وولد اصل...
مطيره:ولا اني وبيي..وزي ماقلت انت هو اصيل وولد اصل ماينساش/العشره..
هز علي راسه..بعدين شاف للساعه..حط الطاسه وخدي عكازه وقال..خل ندير عليا المي..وناض وهو يذكر في الله..
ومشي طلع من حداهم..
حسين بضحكه؛التارقي حاط ع وحده سوريه..
اندهشوا مطيره وفردوس..واميمه انصدمت...
اما طوبى كانت تسمع بصمت وشعور الضيق ملازمها..
مطيره:تتسهوك!
حسين بضحكه:والله العظيم..كبست عليه في المطار الشهر اللي فات..كان ماشي معاها لمصر..
فردوس:غبارة!
حسين:فهمتي غلط..هي خطاطه وكانت دايرتله دعوة يدرب في ورشة خط..لكن اني حسيت في شي تاني..
مطيره؛لاعاد سوريه!وبنات بلاده من شن يشكوا!
حسين:كانك ع اللي ريتها وكان عندها اخت نخطبها !..
ضحكوا بإندهاش..
اميمه؛غير احلم..ساد نكبة يوسف..
حسين:نبصر ياختشه..
مطيره:ياودي ربي يسعده ويهنيه وخلاص..
ناضت طوبى ومشت طلعت من سكات..
هما استغربوا فيها شويه..بعدين فكروا انها ممكن تفكرت شي ضايقها..او ماشيه توتي في روحها للصلاة..
🍃هي خشت للدار..
حولت الملايه والقفازات علقتهم ع الشماعه..بعدين مشت وقفت ع سرير جنه تشوف فيها كيف راقده..
عقلها كان يفكر فيه بس..مش عارفه شن جاه..
ذاكرتها جابتلها كل الكلام اللي انقال عنه قدامها زمان..
تفكرت..عبير صاحبتها..خطرت عليها فجأه اول مرة شافاته عندها في المدرسه شن قالت عليه..
غمضت عيونها بشده..بعدين مسحت ع وجهها ووخرت ايدبها ع شعرها..فكاته..ونكشاته..ورجعت ضماته من جديد وهي تقول..
/اعوذ بالله من الشيطان الرجيم..
ومشت طلعت من االدار للحمام بش تتوضا...
🍃🍃🍃🍃🍃
"خير ياسليمه شغلتيني "
سليمه سكرت باب الدار وقعمزت جنبها وقالت..
/نبي نحكي في موضوع ونبيك تتفهميني الله يربحك..
عقدت سالمين حواجبها وقالت..
/احكي...
🍃وبرا صفيه واقفه حدا راجلها اللي يكلم في ولد عمتها..
"افطنوا لارواحكم الطريق مش كيف قبل"
معمر:ان شاء الله..المهم هانا خابرناك ياسمح ..
"درتوها مرة في حياتكم ياعيت الطبه..وطبعكم تردوله نعرفكم"
صفيه بضحكه؛هذي مفاجأه يللي ماتفهم..
"انتي ديما زاقبه هك!ننقانه واجعني حالك يابونسيب"
معمر بضحكه:كنه حالي ياريته حالك..دير مراة من خوفها عليك ماتخليكش تتنفس..
صفيه ؛ياربي نشوف فيه هاليوم.
ضحك راجلها..
"ترا بالله حلوا ." وسكر عليه..
وخلاهم يضحكوا عليه...
🍃🍃🍃🍃🍃
الساعه 10:00ليلا..
في دار المعيشه في حوش الصيد..
كانت نجمه راقده وصفاء غافيه بحداها..
وبرا...الصيد خش للحوش وتوجه للكوجينه..
وين خش تفاجئ بسفرة ماكله قاعده من غير غسل..وهدا اكثر مايكره..
طلع منها ومشي لداره ودق ع دار عواطف..
شويه وطلعت وهي تقول..
/نعم بوي؟!
الصيد؛خيرها الكوجينه مقلوبه هكي معقوله ترقدوا عنها وتخلوها!؟
عواطف:خليت مرت ولدك دايره سفرة وتتعشا.
هو قال:لاحول ولاقوة الا بالله..بري جيبي دواي وطاسه ميه..ومشي..
رفعت عواطف حاجبها ومشت لدار المعيشه..
خشت ومشت لصفاء..قعدت تهز فيها..
لين فاقت مفجوعه..
عواطف؛تحركي للكوجينه..
قعمزت وقالت:خيرها! والله ماخليت فيها حاجه..
عواطف:نوضي شوفيها بعيونك..
ناضت صفاء وهي حاسه بشويه دوخه لكن تماسكت..
طلعت من الدار للكوجينه..وين خشت انصدمت بالسفره وبقايا الخبزة ع البساط..
خشت وراها عواطف خدت دوا بوها وطاسة ميه وقالت.
/بوي عارك هلبه..
ومشت طلعت وخلتها مصدومه..
للحظه صفاء كانت حتفقد اعصابها بس تمالكت نفسها لأخر لحظه لأنها فاهمه عواطف لشن تبي توصل..تبيها تغلط وتركبها حق..تحملت في روحها وقعدت تلم في الماعين وهي مضايقه ع الاخر ودمعتها في عينها.
فاتت عواطف من قدام الكوجينه شافتلها بمكر بعدين كملت لدارها..خشت وسكرتها عليها..
🍃🍃🍃🍃
تاني يوم..
الخميس..
31يناير...سنة 2019..
الساعه 11:30صباحا..
في باحة المدرسه الثانويه..
صفاء بضيق؛كلهم كويسين معاي الا هي كرهتني في حوشي والله مرات تندم فيا اللي تزوجت..
:كاني منك مانسكتلها ونوقفها عند حدها المعقده هادي..
صفاء بضيق؛مانقدرش اكبر من امي راهو.
:اكبر ولااصغر اللي يغلط فيك عطيه ع راسه وحطيله حد خير مايعفس عليك..
سكتت صفاء وهي تفكر في كلام صاحبتها...
🍃وبعيد عن مدرستها بمسافه بسيطه..في مدرسة البنين..
محمد بضيق:مش هاين عليا بوي مش متحمل نشوفه هكي يبان مكسور وهم الدنيا كلها ع ظهره..وهو مريض نخاف يكمد في قلبه وتصيرله حاجه لاقدر الله..
مؤيد:اللي صار مش شويه راهو..
محمد تنهد بضيق وقال..
/اهوحتى عمي نضال بيسافر السبت..ضايقه بيا ياصاحبي هلبه..
مؤيد طبطب ع كتفه وقال..
/سيورها تفراج..
شافله بحزن وسأله..
/شن تحكيلك صاحبتها عنها؟
مؤيد:والله شن بنقولك..الباين في شي بيناتهم حق..
محمد هز راسه وقعد ساكت..
مؤيد؛فيها خيره..فكر توا في القرايه وفوت الباقي..
محمد؛ماعندي اهم من بوي يامؤيد كان ماارتاحش اني مانقدر ندير شي...
🍃🍃🍃
"اعجاب ومشي ع حاله"
مناسك؛نحس فيه قاعد يحبك واضح من شبحاته لمالك وين يشوفه..
مروة:مافيش مقارنه..مالك راجل لكن هداكا عيل..
مناسك:كان نعرف علاش كارهتيه هكي..
مروة:مش كره بس معاش نحترم فيه..
مناسك:ومالك؟
نزلت راسها وهي مبتسمه بخجل. مناسك؛مالك ماكانش عاقل..لكن محمد يبان عاقل ومحترم هلبه..
مروة:مايغركش اللي تشوفيه منه العيله هادي كلهم زي بعضهم من برا شكل ومن داخل شكل..لكن مالك خوك واضح..صح عنده هلبه اخطاء..لكن قاعد يصلح من روحه وهدا الراجل الصح في نظري اللي يقدر يصلح من نفسه مش اللي يكابر ع غلطه ويزيده..
مناسك كانت حاسه بضيق شديد..وخايفه من اليوم اللي تعرف فيه مروة من يكون خوها..هي مازال ماتعرفش التفاصيل..بس خوف خوها يبين قداش هالتفاصيل المخفيه خطيره..
ومروة قاعده متحفظه ع القصه وماتبيش تحكي فيها لأنها مسببتلها ألم كبير كل ماتذكرها تتوجع اكثر فكيف لو تحكي عنها لأخت الشاب اللي خدي حيز كبير في قلبها وتخاف يعرفها منها وتخسره...!
🍃🍃🍃🍃🍃
ركبت السياره وهي تقول..
/هيا..وتحرك بيهم السواق...
امينه وهي تمرر في نظرها عليها قالت.
/قمر قوي النهارده..
صابرين بغرور؛ديما....
ضحكت امينه..
🍃وطول الطريق وهما يهدرزوا..
لين وصلوا في مزرعة مختار..اللي كان عازم صحابه بنساوينهم ومعاهم عيلة خطيبة رضا..
🍃رضا اللي كان قاعد ع جمر..ايهم وجمال حاضرين..
وايهم بالذات كان باين عليه انه يراجي في صابرين..
وماهي الا لحظات وتجي فايته من قدامهم صابرين ومعاها امينه.
والعيون تعلقت فيها لين درقت عنهم..
التفت رضا لجمال وايهم لقاهم قاعدين يشوفوا للطريق اللي مشت منها..
عقد حواجبه بغضب وشرار الغيره يتناثر من عيونه..
ومختار حداهم لاهي مع باقي صحابه...
🍃جهة النساوين اللي كانوا مقعمزين في نفس المكان..
انضمولهم صابرين وامينه..
ماطولتش معاهم امينه ومشت طول للكوجينه..
وصابرين وهي مقعمزه كانت تسرق في النظر لياسمين والدبله اللي في يدها ودموعها في عيونها...
🍃🍃🍃
مر الوقت عادي..هدرزة..وغدي...ووسط هالاجواء كان مختار يتم في بعض اموره بكلمه من هدا ووعد من التاني..لازم يستغل اي فرصه تسنحله...
🍃والفرصه جت لأيهم بش يتقرب من صابرين ويعبرلها عن اعجابه بصراحه اكبر..
استغلها لما مشوا لإسطبل الخيول اللي كانت تعشقهم ياسمين لأنها خياله..
قعدوا يتفرجوا عليها كيف راكبه الخيل وتلهد بيه بإعجاب..
وصابرين تشوف لرضا كيف يتأمل فيها وهو مبتسم وقلبها والعه فيه النار..
"تحبي الخيل"
صابرين؛عادي.
ايهم؛خاطرك تركبي..
صابرين؛لالا نخاف ..
ضحك وقال:الحصان مسالم..
صابرين؛نخاف نطيح..
ابتسم وشاف لبنت اخته كيف قربت..وخطيبها جاها وساعدها تنزل..لفت صابرين وجهها عنهم وهي شاده دموعها بالسيف..بعدين شافت لأيهم وقالت..
/خلاص تو نجرب..
ضحك ومد يده وقال..
/تعالي..
شافت ليده بعدين مشت..
هو ضحك..وحطها في جيب كبوطه ولحقها.
🍃ياسمين:اركب انت تعرف..
رضا:مزاجي مش رايق..
غير نظره عنها لأيهم وصابرين فتح عيونه ع وسعهم لما شافها جايه بتركب..
🍃ايهم؛نساعدك؟
صابرين تباعدت عنه والتفتت لياسمين ونادت
/ياسمين..
ابتسمت وجتها..
صابرين؛خاطري نجرب..ساعديني نركب معليشي..
ياسمين:ولايهمك..وساعدتها تركب ع الحصان بعدين شدت زمامه ومشت بيه ..
وصابرين شاده فيه كويس وهي خايفه..
رضا حط يده في جيبه وهو يتفرج عليها..
وايهم قاعد ينجذبلها انجذاب غير عادي..
وهدا كله تحت نظر فاتن...
🍃🍃🍃🍃
ومن اسطبل الخيول..
مشوا لجهة مميزة في المزرعه كانت اشبه بالحديقه..
فيها كراسي خشب طوال..
رضا وخطيبته قعمزوا غادي وقعدوا يهدرزوا ويبانوا منسجمين هلبه..
وصابرين مقعمزه بروحها تتفرج عليهم وقلبها محروق..
ويقعمز جنبها ايهم وهو يقول..
/خيرك نحس في جوك مش تمام..
صابرين:عادي..
🍃ياسمين بضحكه:ايهم مايملش.
التفت رضا وشافهم مع بعض بعدين قال..
/قولي لخالك يخليها في حالها البنت مش لضياع الوقت..
ياسمين؛هالمره حسيته معجب حق..
رضا قعد يشوفلهم ..والجمرة اللي على يسار صدره تلهب..
🍃ايهم؛نبي نعرفك اكثر نبيك تحكيلي قصتك وطلعي اللي فداخلك..
صابرين؛علاش!
هو مد يده حطها ع يدها..جبدت يدها وقالت بغضب..
/لاانت فاهم غلط وغلط هلبه..ياريت معاش تكلمني ولاتخليني نشوفك مرة وحده..
وناضت ومشت بسرعه..
وهو معاها بنظراته المعجبه..
فجأه حس بالدنيا زي اللي ظلمت..
شاف قدامه فوق لقي رضا واقف ويقول..
/اسمع ايهم..صابرين عزيزة عليا وع استاذ مختار رد بالك تغلط معاها..
ناض ايهم وشاف لبنت اخته بإبتسامه وقال..
/الباين بنودعها خلاص..ومشي وخلا رضا من غير مايرد عليه..
قربت منه ياسمين وقالت بضحكه..
/مش قتلك..
شافلها وهو عاقد حواجبه وقال..
/من هي اللي بيودعها!؟
ياسمين بضحكه؛العزوبيه..لينا فتره نلحوا عليه يتزوج وهو واخيرا وافق والفضل لصابرين..
ابتسم ع جنب تهكما ورفضا للي سمعه بعدين قال..
/مستحيل..
ياسمين؛علاش!؟
رضا:بعدين تعرفي علاش..هي تعالي..ومشي وهو قاعد ينحرق من داخل وهي وراه..
🍃🍃🍃🍃🍃
الساعه 8:00مساءا..
ويوصلوا عرب الشرق والجنوب الشرقي لحوش لطفي الواعر اللي كان زاحم بالاحباب..حتى صفاء جت..
رحبوا بيهم بحرارة..وكان السلام ع طوبى بالتهاني...
سالمين ودموعها ينزلوا..
/طيب فيك حبيبتي وربي يعوضك خير..
طوبى بإبتسامه ودموعها في عيونها..
تسلمي يارب..
وبعدها سلمت ع سليمه اللي كانت بارده معاها واكتفت بالسؤال عن الحال..
عكس بنتها اللي حضنتها وهنتها وكانت تبان فرحانه ع الاخر..
🍃بعد ماارتاحوا الضيوف شويه طول حطوا العشي..
وسط الرجاله كان عبدالقيوم عايش بحالة جديده..
كان في داخله احساس حلو وكأنه ولى واحد من العيله زيه زي عبد الرؤوف واسكندر..
🍃لكن عند النساوين..
"هديك انخطبت!؟"
الاء بضحكه؛والعريس من طرف عبد القيوم.
سليمه:كيف!؟
الاء؛خو واحد يخدم معاه اسمه عيسى..
صفيه:اها عيسى يما اللي عدينا لمزرعته في اول جيه لنا هنا..
سليمه:ايه ايه ذكرته..
صفيه بضحكه..
/انا كنت نشوف فيها كيف اللي عاجبها عبادي..
الاء؛وهادي الحقيقه..
مطيره:ياوخيتي مني اللي ماعرفش تي هو بروحه شكله عارف هدا علاش دبس خو صاحبه فيها..
قعدوا يضحكوا..
وطوبى تاكل بصمت..واميمه مركزه معاها..
سميره:نصيب حد ماياخده حد هي هادي..
سالمين:صدقتي نصيب..
مطيره:ايه حقه بتخطبوا لعبدو..
سالمين شافت لسليمه.
وصفيه قعدت تشوف لمطيره وهي متفاجئه..
سليمه بضحكه؛من قالها ؟!
مطيره؛هكي سمعنا!
سليمه؛لا الحق لعند توا مافي شي..
مطبره؛ياوخيتي هكي سمعت وقالوا سوريه..
صفيه وامها شافوا لبعض..
سالمين؛اها معناها هي نفسها الصهبا اللي حقيناه معاه في مصر..حتى ولادي قاالوها في بينهم شي..
صفيه؛ل..
قاطعتها امها وقالت..
/ايه في حاجه كيف هك..
انصدمت صفيه.
وسالمين تشوفلها برفعة حاجب..
نبيله:ماعندكمش مشكله كان تزوج اجنبيه؟
سليمه؛هو حر في حياته كان تريح معاها ماعندنا ليش نعارضوا..
هاديه؛الحق عجبني تفكيركم..
ابتسمت سليمه بمجامله..
وبنتها جنبها مصدومه فيها هلبه..
سالمين بضحكه؛راهي سمحه واجد واجد كيف الروسيات..
مطيره:الله!
سالمين؛الشعر ولاالبيوضيه ولاالنقش لاقوة الا بالله..
الاء؛يستاهل والله واخيرا طاح في وحده تليق بيه..
مطيره بضحكه؛وخطاطه حتى هي..هادم صغارهم بينزلوا بالقلم واللوحه..
ضحكوا..
سميره بضحكه:غير يولد ويسموه..
مطيره؛لاياحنه مدام اهله راضيين خلاص..هي وتوا ارواحكم العراس بالشبردق..
فردوس بضحكه؛الله يبارك..
وباقي الموجودات التزموا الصمت واولهم طوبى اللي طول هدرزتهم ع عبد القيوم والسوريه وهي مضايقه ومش قادرة تعرف السبب...
#نهوض
#طوبى
....يتبع.../
