#طوبى "جنة طوبى"
#جمان_فريد
#الجزء_103"بنت السلطان"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الإستغفار
قال الإمام ابن كثير رحمه الله؛
« من اتصف بصفة الاستغفار، يسر الله عليه رزقه، وسهل عليه أمره، وحفظ عليه شأنه وقوته »
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃ادخلني حبك سيدتي مدن الاحزان
وانا من قبلك لم ادخل مدن الاحزان
لما اعرف ابدا ان الدمع هو الانسان..وان الانسان لاحزن
ذكرى إنسان🍃
_____________________________________
توترت الاجواء..وصارت ربكه مخفيه بين رجال حوش الواعر والقريب عليهم..
الحاج علي لما سمع بمرواح الجالي ماعلقش بولا كلمه اكتفي بالصمت بس ملامح وجهه الحاده اللي اختلطت بيها ملامح الاستياء عبرت عن اللي يحس بيه..
لكن المحجوب كان يسرق في النظر لمختار بعد مالاحظ ردة فعله البارده اللامباليه...
🍃وعكس البرود كان الحريق اللي اشتعل في كل جزء من اجزاء التارقي..حس بيه في جسده وروحه..
كان يعبر ع غضبه وتوتره في محل المصور متاع سامي اللي داره مغلق..
ربيع بضيق؛كنت نعرف مابيتش نقولك بش مايصيرش فيك هكي..
عبد القيوم وهو يهز في رجله بغضب..
/باهي هو ليش مروح!؟ في شي فعقله!؟
سامي؛وارد جدا يروح ياعبد القيوم توا ولابعدين نسيت ان عنده بنت!؟
بدت ع وجهه ملامح الوجع مع الغضب وهو يقول..
/اين بنت!؟ اللي كان حيفرط في روحها بدم بارد! خسارة فيه والله حرام في واحد كيف هذى هالنعمه..
وسرعان مادارك نفسه بعد اللي قاله..غمض عيونه وبدي يستغفر..
طبطب ربيع ع كتفه وقال..
/هدي وروق بش ماتغلطش..
سامي:انت من شن خايف!؟ خايف توليله!؟مستحيله هادي..
عبد القيوم بضيق شديد والغيره واكله قلبه..
/عارفها مستحيله..لكن انا..حط قبضة يده ع فمه بعدين ضرب كفوفه في بعض وقال..مش مرتاح للي قاعد يصير..
ربيع:من البدايه عارف ان طريقك ليها مش ساهله ياعبدو..
هز راسه وهو مضايق لدرجة حس روحه مش قادر يتنفس..
ناض وقال..
/بنعدي ندير برمه بالسيارة مادورونيش..
ومشي طلع من حداهم...
سامي:حسيته انفعل زياده عن اللزوم..
ربيع بضيق:هداكا اللي اسمه عدي ضاغط ع اعصابه وغير هكي ليه قريب شهر ماشافهاش تخلطت عليه..
سامي بأسف:مسكين والله مالقاش قلبه يحب كان وحده شبه مستحيل يوصل فيها..
ربيع:كان الموضوع بإيدينا ياصاحبي راك ماقعدتش سنين وحداني بعد توفت زوجتك..
ابتسم سامي بحزن وهز راسه بإيجاب...
🍃وفي عز حالة هالتوتر والغليان..
كانت طوبى ع موعد مع رحله جديدة لعالمها اللي كلها شغف بيه..
فم باب دارها واقفه وهي تقول..
/مانعرفش وحده تخش عليا ولا نقوللكم احسن شي نسكر الباب بالمفتاح..
سكرت الباب ولفت المفتاح لفه وحده بعدين التفتت وهي تقول بإبتسامه..
/هي تعالي قعمزي هني..
مشت فاتن قعمزت ع كرسي الزيانه اللي ماكانش قدام المرايه..
قدمتلها طوبى وهي تقول..
/تو تشوفي كيف تطلعي حنخلي كل من يشوفك يقول ماطلع العربي كان عليها..
ضحكت فاتن وقالت..
/زدتي شوقتيني..
ابتسمت طوبى وقالت..
/بسم الله عليه توكلت وبه استعين...
🍃وفي الدار اللي مقابلتهم..
غرفه بإستياء:قداش كنت نخمم فهاليوم..ماصدقنا ولى حالها باهي..
اريج بحزن وقلق:خايفه ترجعلها هديكا النوبات كان شافاته وهني اكيد خالتي سدرة حتعرف كل شي..
مطيره:خالتك حاسه ان في شي كبير مش خاش راسها اللي حكتهولها طوبى..
بقلق بالغ قالت اريج..
/يستر الله وخلاص ربي يكمل هالعرس ع خير..
ع خشة صفيه قالت..
/غرفه قالتلك فايزة وتي روحك جايه هي وصفاء توا..
مطيره:حتى صفيوة بتصدر؟
غرفه:ايه..
اريج:معناها انتي وصفاء وفاتن الصدارات..
غرفه:ايه..خسارة كان آلاء حاضرة راهي معانا..
مطيره بإبتسامه؛ياروحي عقولهم وقلوبهم هني وامها..
صفيه:ان شاء الله يعوضوه في فرح حسين..
غرفه بضحكه؛ناوياته خالتي..
صفيه بضحكه:خلاص ساده مانبيش يصير فيه زي خوه..
مطيره:ربي يفرحنا بيه قريب ان شاء الله..
غرفه:ويفرحنا بيك يامطمط حتى انتي خلاص اسبوعين وتخشي القفص الذهبي..
ضحكوا..
وهي قالت بضحكه؛ياقردة..
صفيه بإبتسامه؛هي تعالي عولي عليا نبي نطلع احلى من الصدارات..
مطيره:حقك اميمه العريس حتى انتي..ناضت ومشتلها وهي ترقص وتغني..
يااميمة العريس تعالي..فرحانه وعطاك العالي..
وهما يتفرجوا عليها ويضحكوا..لكن جمال هالأجواء ماقدرش يبدد مشاعر القلق والتوتر اللي حاسين بيها...
🍃🍃🍃🍃
بعد آذان العصر..
وقفت طوبى شغل ع فاتن بش تصلي..
صلت قدامها..وفاتن تتأمل فيها وهي متأثرة بيها ع الآخر كل مالها تزيد اعجاب بطوبى وتأثر بيها..
باطباعها الحلوة..وصفاتها المتناقضه..واكثر شي حباته فيها هو علاقتها بالله سبحانه وتعالى ثم بنتها...
كملت طوبى صلاة رفعت المصليه حطتها في مكانها بعدين حولت الملايه ومشت علقتها وهي تقول..
/هي نولوا مرة تانيه للجمال اللي ابدع فيه ربي..سبحان من عطاك هالجمال يافتون ناعم ومريح..
فاتن بإبتسامه خجل..
/تسلمي حبيبتي كلك ذوق..
خدت طوبى اداه من ادوات الزينه وبدت تشتغل وهي تقول..
/مش مجامله حبيبتي..اني نحب نشكر الجمال اللي خلقه ربي هلبه..ارفعي راسك فوق شويه ايوه كويس هكي..انتي نوعيتك ماتحبيش تحطي مكياج هلبه وهادي احلى حاجه فيك بش وين تجي ديري مكياج ثقيل يبان عليك ويغيرك هلبه..
ابتسمت فاتن وهي تقول..
/بصراحه مانحبش المكياج يدوب نحط رتوش بسيطه بس..
طوبى:حتى اني زيك نحب الحطه البسيطه لو تتفنني فيها شوي تبرز جمالك وانوثتك اكثر من المكياج الثقيل الكامل..
🍃ومن الكلام في عالم الأنثى الجميل..
لعالم الطفوله الزاهي بألوانه المبهجه كان مسافر فيه مختار وهو يلعب مع جنه في الخيمه..ناسي نفسه معاها وناسي كل الشي الزمان والمكان..
بس في من خلاه يرجع لعالمنا القاتم لما وقف عليه وقال..
/السلام عليكم..
رفع عيونه فيه وقال..
/وعليكم السلام..
شاف لجنة وقال بإبتسامه..
/ربي يصون ويبارك..
مختار:يصون عرضك..
وهو مبتسم قاله..
/معليشي نبي ناخد من وقتك شويه..
شاف مختار للكرسي القريب عليه وقال..
/تفضل.
قعمز وقاله:اول شي عرفتني اني ايمن الفاندي خوي المرحوم ان شاء الله ايهاب الفاندي كان نسيبكم..
هز مختار راسه وقال..
/ايه ايه..نعرفك شفتك في العزومه..
ابتسم وقال؛كويس..نخش في الموضوع طول..
مختار وهو رافع حواجبه هز راسه وقال
/تفضل..
🍃🍃🍃🍃🍃
"الحمد لله ع السلامه حبيبي الحمد لله ع السلامه ياغالي"
الجالي وهو حاضن خديجه..
/الله يسلمك..بعد عنها شويه وباس راسها بعدين قال..شن اخبارك شن دايرة..وين محمد وراما والعزري الصغير..
خديجه؛محمد في الخدمه مع بوه..وراما في حوش جدها..اما تيومي توا كيف رقد..قعمز جللو قعمز..
قعمز الجالي وهي قعمزت مقابلاته وقالت..
/نجاه قاعده عند اختها؟
الجالي:ايه قالت بتبات يوم تاني خالاتها يبوا يشوفوها..
خديجه عقدت حواجبها وقالت..
/تعرف مش خاشتلي راس القصه متاع موت اختها حاسه في شي تاني اختها هادي استغفر الله ديما ماشيه في طريق مش ولابد وشكلها لقت فيها نهايتها..
الجالي بإنزعاج؛بالله فكينا منها الدوة هادي المراة ماتت توا خلاص..
خديجه ؛ع قولتك الله يرحمها..ايه خبرني عنك شن اخبارك شن امورك احكي احكي..
ابتسم وقال:اول شي نوضي ديريلي قهوتك استاحشتها وبعدين احكيلي انتي علاش قاطعه الحوش..
بدت ع وجهها ملامح الضيق ولون وجهها انخطف ناضت وهي تقول..
/حاضر من عيوني..ومشت بتطلع وهو معاها بعيونه لين طلعت..
🍃🍃🍃🍃🍃
"بالله عليك اليوم بس "
هادي مروة تترجى في راجلها يرضى يخلي اختها تبات عندها يوم تاني..
هو بإستياء قال..
/اليوم بس يوم تاني زياده نلزك انتي وياها..
وخدي مفاتيحه وهو يقول..بنبات في حوش خليل"صاحبه" الليله ردي بالك ديري حاجه من وراي..
ومشي طلع من حداها وخلاها دمع بألم وصمت وفي عيونها نظرة خزي وكسر..
☘في قانون بعض البشر تزر وازرة وزر اخرى..بالذات وزر التفريط في الشرف والسمعه يديره واحد تحمله معاه عيلته كلها لأخر العمر☘
بس غالبا في مجتماعتنا هالقانون يمشي ع المراة بس يعني لو تابت وغيرت من نفسها بعدين لايمكن تقدر تغير نظرة الناس ليها..لكن الراجل ينسوله وبالاخص لو جرت في يده العمله وولى من اصحاب النفوذ زي مختار...
اللي حاليا مقعمز في قهوة نضال بروحه وهو يفكر في طلب ولد الفاندي..
شويه وجاه نضال بطلبه...
/تفضل..
مختار بإبتسامه..
/اووو صاحب القهوة بطوبته يخدم فينا..
ضحك نضال..
مختار:قهوتكم؟
نضال:ايه زي ماطلبت..
رشف منها مختار بعدين قال..
/امم..شافله شويه وقال..خسارة والله..
عقد نضال حواجبه بعدم فهم..
مختار؛خسارة بنت اختي فيك خسارة كبيرة..
قلب نضال بدي يدق بقوة ويوجع فيه..
مختار:للأسف رحت بجريرة غيرك وحتى هي مسكينه حظها شويه
نزل نضال راسه وهو يشوف للطاوله وقال بضيق..
/نصيبات
مختار ابتسم وقال..
/صح..نصيبات..والنصيب كان قال كلمته تم..
تلميح مختار برغم ان ضايق نضال لكن حسسه بشعور حلو في نفس الوقت..هز راسه وقاله
/تبي حاجه تانيه..
مختار بإبتسامه
/لا شكرا..
مشي نضال ومختار يمرر في نظره ع هيئته وهو يقول في نفسه..
"حتى هو خش ع جو الشيوخ! الكآبة ياما دير"
وبدي يشرب في قهوته ع رواق..
شويه وانضموله تدريجيا محي الدين..بعدين المهدي..واخر شي ربيع اللي لما شافهم خطرت عليه ايام زمان وفي نفس الوقت كان عنده فضول يسمع هدرزتهم..
ع الطاوله كانوا مقعمزين..
مختار وربيع مقابلين بعض..ومحي والمهدي مقابلين بعض..
وهما يهدرزوا..اكتفي مختار بالإستماع وهو يشرب في القهوة..
مرر نظره عليهم واحد واحد..وشبح الذكريات رجع جاه ورفعه للماضي المقيت...
🔺️🔺️🔺️قبل اكثر من 20عاما🔺️🔺️🔺️
مقعمزين في مستراح حوش الباني ع ع حصيرة كبيره كانوا مقعمزين ع الارض نفس التقعميزة"الجلسة" يقروا لإمتحانات السنة ثانيه ثانوي النهائيه..مادة الفيزياء..
المهدي يشرح..وهما مركزين معاه..او مختار كان يحاول يركز معاه..
المهدي:هاه شني فهمتوا لتوا..
ربيع:خشت راسي..
محي الدين؛سهلتها بالشرح متاعك..
شافوا لمختار اللي قعد ساكت..
المهدي:هاه شني!؟
عقد حواجبه وقال..
/باهي..
المهدي تهكما:يبهي ايامك!
ربيع بضحكه:فهمت اللي كان يهدرز فيه توا ولالا..
محي وهو يضحك:والله مافاهم راسه من رجليه..
المهدي؛العقل مش معانا بكل..في شني تفكر..
مختار وهو محرج بعض الشيء..
/من بيمشي معاي..
محي الدين:تو انت شن عندك غادي نبي نفهم!؟
مختار:وانت شن دخلك اللي عندي عندي..
محي الدين؛ زعمه بوك يطلقك!
مختار بغضب:ماتخلنيش نوضلك..
المهدي:لاتنوضله لاينوضلك الهى بقرايتك خيرلك بوك ياخد ويوصي فيا وراهو شكله متحلف فيك..
ربيع:ياراجل اقرا شويه وعدي هالسنه زي اللي فاتت..
تأفف وقال:معناها مافي حد فيكم بيسايرني!؟
ربيع:اللي يسمع يقول مشوار من هني للمدينه..
مختار؛خلاص خلاص اني الغالط اللي عبيت عليكم تو نشوف غيركم يمشي معاي..
محي الدين بضحكه..
/غير خود شور بوك مايعباش عليك في مشوار من هني ل*****
المهدي:خلاص فوته عقله في راسه يعرف خلاصه..خلونا نكملوا قرايه معاش في وقت..
ناض مختار وهو يقول..
/اوينا ربيع..ولبس شبشبه ومشي طلع من حداهم..
🔺️🔺️🔺️في الوقت الحاضر🔺️🔺️🔺️
"بوي"
التفت مختار وشاف ولد محي الدين واقف بعيد شويه..
محي ناض ومشي طلعله..
ومختار معاهم بعيونه والمهدي يسرقله في النظر..
طلب محمد من بوه مفتاح السيارة بحجة ان في طلبيه يبي يوصلها لزبونه وهو عطاه المفاتيح وولى قعمز مع ولاد شارعه..
المهدي:شن يبي؟
محي الدين؛الوليد متاع خدمة التوصيل عنده ظرف ماجاش هو بيمشي في مكانه..
مختار؛ع حسب مانعرف ولدك عمره16سنه عابي عليه لدرجة تعطيه سياره يسوقها ويوصل طلبيات لزباين!؟
محي الدين بإبتسامه..
/العمر مش مقياس محمد ولدي ينعبا عليه حتى انشد خاله عنه..
غير مختار نظره للمهدي وهو مبتسم بتعجب ساخر وحاجبه اليسار المرفوع..
المهدي ركز بنظره ع محي الدين هز راسه وقاله..
/مزبوط..
ضحك مختار ضحكه خفيفه..
شافوله التلاته..
خدي شيشة الميه وهو يقول بضحكه..
/Sorry..اسف..اسف..فتح شيشة الميه وبدي يشرب..
وربيع يشوفله بنظرات ضيق وانزعاج..
لكن محي الدين شاف للمهدي بنظرة ضيق وتساؤل لاحظ ع وجهه ملامح امتعاض..
نزل مختار شيشة الميه وسكرها ..حطها في مكانها بعدين رفع شويه من الكاط للركبه وحط رجل ع رجل وشاف لمحي بعقدة حواجب وقال..
/ايه قتلي بكري تبيني في موضوع يخص البضاعه اللي حاجز فيها من ****** شن صار فيها..
بلع محي الدين ريقه وبدي يحكي..
وربيع والمهدي يمرروا في نظرهم بيناتهم بإستياء وضيق...
🍃🍃🍃🍃🍃
"هاتي الشنبير"
مدت طوبى الشنبير لعمتها..
خداته مطيره وبدت تلبس لفاتن وهي تلالي عليها...
تستاهلي التخليلة
وتستاهلي الباشا اللي بتمشيله
وتستاهلي الشنبير بشناقيله
تستاهلي سوق الربع برحيله
🌸ابتسمت فاتن من قلبها وهي تسمع فيها...
وتستاهليها الحوتة
وتستاهلي الشنبير بالياقوتة
وتدرجي مابين امه وخوته
بتليك فضة نقشته منعوتة
كملت مطيره ورفعت فاتن للمرايه بش تشوف الشكل النهائي ومازال تلالي عليها...
🌸تستاهلي الخلخال والشعريه
تستاهلي حزام الذهب يابية
وتستاهلي يااللا...
زغردت مطيره..وطوبى تشوف لردة فعل فاتن لما شافت نفسها في المرايه..بانت ع وجهها ملامح الانبهار والفرحه..
دقت سدرة الباب وهي تقول..
"هيا نبوا نشوفوا حتى حني"
ضحكت طوبى ومشت فتحت الباب..
ويخشوا سدرة واريج وفايزة بدت ع وجوههم ملامح الاعجاب والذهول وهما يقولوا..
"اللهم بارك..تبارك الرحمن"
سدرة:لالا السلطان مختار لازم يشوفك توا توا..
ضحكوا..
وفاتن اللي كانت فرحانه من قلبها تحمست تشوف ردة فعله..
طلعت سدرة من حداهم بش تتصل بيه..
🍃وهو مازال في القهوة يهدرز مع ولاد شارعه وتليفونه محطوط ع الطاوله جنبه..
لما رن..المهدي تلقائيا وجه نظره للشاشه..
وجهه ولى احمر لما شاف اسم المتصل..
"سدرة المنتهى"
لاحظه مختار لكن مابينش خدي التليفون وناض وهو يقول..
/نستأذن..
هما بأصوات متقطعه..
"خود راحتك"..
مشي طلع من القهوة ورد ع سدرة..
/ايوه..
"وين ماانت تجي نبي نوريك حاجه توا توا تجي"
ضحك وقال..
/ياودي باهي هاني جاي..
نهي المكالمه ومشي طول لحوش طوبى...
*******
مختار بضحكه:غير شن في!؟
سدره وهي حاطه يدها ع ظهره....
/غير خش خش لدارك خش..
ضحك ومشي للدار فتحها وخش..
☘لما خش عيونه جو عليها كانت مقعمزه ع كرسي..
هو لحظتها مافهمش شن صار فيه..عجباته لدرجة ماعرفش يقول كلمه..
حط ايديه في نصه وقعد يضحك..
فاتن بضحكه؛خيرك!؟
سكت وهو يشوفلها بإبتسامه..بعدين نزل ايديه وبدي يمشيلها وهو يغني...
🌸عيني من غيات علم
تنزح و تجم
ديمه ديمه تشغل في
☘سدرة تسمع فيه وهي تضحك اما مطيره علقت تقول..
/اهو طلع يعرف غنانا..
سمعوها فايزة وبناتها وصفيه ضحكوا.. وغرفه حداهم مش طايقه روحها..
عكسها طوبى اللي حبت معاملته لفاتن هلبه وأريج اللي كانت تسمع في صوته بإنسجام..
🌸عقلي فايت فيه و تم
غير يخمم
من الشوق اللي جار علي
ولكن عندي فيه عشم
وعزيز يهم
معايا مايبخل في شي
يطمني و يقول نعم
نشيل الهم
عارف حمل الصوب قوي
☘وصل فيها نزل راسه وطبع قبله ع راسها..
وهي غمضت عيونها وقلبها يدق بقوة..
بعد عنها شويه وقعد يتأمل في عيونها وهو يقول..
/اللي نشوف فيه يبي شاعر يوصفه..
فاتن بضحكه؛ديما تفاجئ فيا اول مرة نعرف انك تسمع للأغاني هادي..
مختار:عاد قداش ليك تعرفيني فتونه اني صندوق عجايب مايفضاش كل مرة نطلعلك حاجه نفاجئك بيها ونخليك تزيدي تموتي فيا اكثر واكثر...
ضحكت وضرباته ع ذراعه..هو خدي يدها ورفعها وطبع عليها قبله وفاتن مسحوره بيه وضايعه فيه...
☘☘☘
ويجيب حسين نوبة قلبت الشارع كله..
اريج وطوبى اللي كانوا مش ماشيات للكسوة ركبوا لدار الخزين وقعدوا يتفرجوا ع الاجواء من ورا الشباك..
شافت طوبى عبد القيوم واقف مربع ايديه ويتفرج وهو مبتسم..غيرت عيونها بعد تعبوا دموع عنه لولاد عمها اللي كانوا يرقصوا مع بعض..
اريج بضحكه:الله يبارك عليهم يهبلوا..
طوبى بإبتسامه:ياربي نجيهم اوبا وهوبا..
☘كان عبد الرؤوف رافع ولاد الزوز في حضنه يرقص بيهم شويه جاه حسين خدي اواب وقعدوا يرقصوا مع بعض داروا جو حلو بالمرة خلوا العيون عليهم..
لكن مختار كان يطيق العمي ولايطيق عبد الرؤوف حاقد عليه حقد شديد غير ظاهر..
اريج بضحكه:جو ولاد الشارع..
طوبى قعدت دور بعيونها ع نضال لقاته واقف بعيد يتفرج بإبتسامه..ابتسمت وشافت بطرف عينها لأريج لقتها تشوفله ودموعها مغرقات عيونها..
وفي هاللحظه الحلوة..
حدث مالم يكن بالحسبان..طلع الجالي من حوش اهله ووقف في الباب..
اريج لما شافاته جبدت طوبى وهي تقول..
/هي انزلي نضموا الحوسه هيا..
طوبى بضحكه:باهي بالشويه..
وطلعوا من الدار للدروج ونزلوا مع بعض واريج ترجف من الخوف..
🍃وطلعة الجالي هادي كانت لسيارته..
شافوه فيها عبد القيوم وعبد الرؤوف وحسين تبعوه بعيونهم لين ركب السيارة وشغلها وتحرك بدون مايوجه نظره حتى بالغلط جيهتهم..
تبع عبد القيوم بنظره السيارة وقلبه والعه فيه النار..
رد نظره لجماعة النوبه لقاهم وقفوا ومشوا بيركبوا سيارتهم وجماعة الشارع انتشروا...
فهالوقت وصلوا سيارتين فيهم عيلة صفيه خوتها وخواتها بيطلعوا معاهم طول وهما رافعين الكسوره..
🌸حطوا اريج وطوبى ومعاهم بنات فايزة السوابيت جزء في سيارة مختار وجزء في سيارة حسين..وفي سوابيت رفعوهم لسيارات اهل صفيه بش يرفعوهم...
هاديه واميمه اللي قعدوا في حوش الحاج علي باقي النهار بش يجهزوا انفسهم..ركبوا مع حسين ومعاهم مطيره..
وفي سيارة مختار ركبوا فاتن وسدرة وصفيه..
غرفه بتمشي مع راجلها..وفايزة وبناتها بيرفعهم اشرف...
☘☘☘
وتحركت سيارات الكسوة ورا بعض متوجهين لحوش اهل جهينه..
🌸في حوش اهل جهينه كانوا بانيين صالة كبيره لمناسباتهم جابوا شركة تنسيق مناسبات دارولها ديكور ثراتي مميز وجابوا زمزامات...
الصاله كان مزحومه بالمعازيم خلوا تلاته طاولات بس لأهل العريس..
وفي عز جو الصخب اللي كانوا فيه خشت ام جهينه وهي تقول..
"اهل يوسف جو"..
وقفوا الزمزامات وصلتهم..وقعدوا يراجوا في عرب الكسوة يخشوا..
وبدوا يخشوا بسبوابيتهم وهما يزغردوا..والزمزامات رحبوا بيهم..
"العين قالت يامرحب بيه..اللي جانا وجاب كساويه"
☘بعد مادارو شوط حلو ع الكسوة...دخلوا السوابيت داخل..
وخالات وعمات جهينه رحبوا بعيلة الواعر ورفعوهم لطاولاتهم..
اميمه بس اللي مشت للحمامات بش تلقي نظره ع طلتها..
بعد ماحطت لمسات بسيطه عليها طلعت للقاعه..
ولما جت خاشه بفستانها الأخضر الناعم اللي كان واصل للركبه لفتت الانظار ليها..بس في الطاوله المعازيم اللي فيها علت وجوههم ملامح الدهشه لما شافوها..
وحده فيهم قالت:اميمه ولا..
التانيه ضحكت بمفاجأة وقالت..
/ايه هي..
النساوين الكبار حداهم مستغربات بس وحده فيهم قالت..
/قصدكم الشقرا اللي خشت توا نفسها اللي يبيها وسيمه!؟
بنتها بضحكه؛ايه..
اللي ع الطاوله كلهم بانت عليهم الفرحه..
اما انه ناضت وهي تقول..
/اضرب الحديد وهو حامي..
ومشت طول بإتجاه الطاوله المقعمزة عليها اميمه..
☘اهل اسامه عرفوا بقصته مع اميمه ومافي حد عنده مانع لفكرة الزواج بمطلقه..ناس متعلمه وثقافتهم عاليه وتفكيرهم جدا راقي.. مالا لمن بيطلع اسامه !؟☘
🌼وصلت امه في الطاوله ابتسمت وقالت..
/السلام عليكم..
كلهم ردوا..
/وعليكم السلام..
هي اللي كانت تسرق في النظر لأميمه قالت..
/شن تقربوا للعريس!؟
بدت ع وجوههم ملامح القلق بالذات صفيه اللي جاوبت..
/اني امه وهادم بنات عمه وهديكا اخته..
ضحكت لما شافت لاميمه وقالت..
/سبحان الله ع النصيب..يعني انتي ام الحلوة اللي لابسه قفطان اخضر..
وجهوا انظارهم لاميمه اللي احمر وجهها خجلا..
صفيه؛ايه..
بإبتسامه قالت..
/باهي ممكن شويه لوسمحتي..
ناضت صفيه وهي مستغربه ومشت لأم اسامه ومشوا مع بعض شوي بعيد عن الدوشه..
سدرة:تعرفيها ميمو؟
اميمه بإستغراب:اول مرة نشوفها..
هاديه بضحكه:هادي الحاجه الحلوة اللي قتلك عليها..
قلب اميمه دق بقوة..
سدرة؛حاجه حلوة شني!؟
هاديه بإبتسامه؛نصيبها الحلو من الفرح اللي قداش ليه يراجي فيها..
مطيره شافت لاميمه بإبتسامة فرح واميمه بلعت ريقها وقلبها يدق بقوة..
🌸ومن بعيد شويه في صفة الصدارات..
كانوا فاتن وغرفه وصفاء يهدرزوا مع بعض..
غرفه تسأل فيها عن اهل جهينه وصفاء تسمع فيهم وامها اللي مقعمزه مع اهل صفيه في طاولة بروحهم عيونها عليها..
بينما اهل صفيه عيونهم ع مروة ام فستان احمر قاني طالعه فيه قمة في النعومه والجمال..
☘☘
بعد هدرزة دامت لبضع دقايق ولت صفيه للطاوله واللي معاها يشوفولها بترقب..
صفيه وهي عاقده حواجبها وابتسامتها ع وجهها شافت لاميمه وقالت..
/في واحد زمان كان يقرا معاك اسمه اسامه!؟
فتحت اميمه عيونها ع وسعهم من الصدمه..
وهما يشوفولها ويراجوا في جوابها..
سدرة بضحكه؛ حي ع وجهه كيف راح!..شن قصته السي اسامه هدا!؟
صفيه بإبتسامه؛هادي امه وقالت كان يبيها من ايام القرايه وكان ناوي بعد يتخرجوا يخطبها..
سدرة بإمتعاض:سبقه ولد العيله المدوشنة..
ضحكوا..
صفيه بضحكه؛المهم قالت انه كان برا ولما سمع باللي صار معاها ولى ع خاطرها..
هاديه بأعجاب:الله ع الحب الله..
واميمه بذوب من الخجل وقلبها وادت ربكته...
صفيه:ياحنه قالت عرس اخته كان الاسبوع اللي فات وكان ناوي بعده طول يبعت ماليه..
رفعت اميمه عيونها في امها وهي مندهشه..
مطيره بضحكه:قوليلها لازم ياخد التأشيره من كبير العيله كان ماعجباش ينسى..
سدرة بضحكه؛ياناري عليه من توا..
اميمه خلعت ثوب الخجل وقالت بشي من الغرور..
/والله اللي يبي الورد..
مطيره؛اقوى عليهم..
سدرة؛بنت الواعر حق..
وهاديه وصفيه يضحكوا...
🍃🍃🍃🍃🍃🍃
في هالأثناء..
ضموا اريج وطوبى الحوش كله..بعدين داروا قهوة وحلويات وقعمزوا مع الصغار في دار المعيشه..
اريج؛ماما خاطرها هني..
طوبى:ان شاء الله الافراح جايه معاش يفوتها شي..
اريج؛إن شاء الله..
سكتوا شويه وهما يرشفوا من القهوة..
اريج كانت تشوف لطوبى بنظرات طويله بعدين قالت..
/بيبو..
قامت طوبى عيونها فيها..
خدت اريج نفس وقالت.
/انتي عارفه ان الجالي حيروح ولا..قاطعتها وقالت..
"روح امس.."
فتحت اريج عيونها ع وسعهم بصدمه..
طوبى:نسرين بعتتلي رساله خبرتني فيها..
اريج بدهشه:نسرين!؟
طوبى:اني قلتلها لمايروح عطيني علم..نبي نهيئ نفسيتي..
اريج:قصدك عادي ماخفتيش!؟
غيرت طوبى نظرها لجنه وقالت..
/خفت هلبه مش شويه لكن نحاول نهرب من خوفي هدا مانبيشي يشوفني خايفه وضعيفه..مانبيشي يشوف الأثر البشع اللي داره فيا..
فاضوا عيونها بالدموع وطاحت..شدت بإيديها الزوز طرف فانيلية البيجامه بقوة وهما يرجفوا..
اريج خافت لما شافتها هكي حطت اللي في يدها قربتلها بسرعه وضمتها..وعيون طوبى اللي يدمعوا بخوف وحزن ع جنتها وهي تلعب وماتندري ع شي...
🍃🍃🍃🍃🍃🍃
"فرحتني شوفتك هكي ياصاحبي حسيتك متغير هلبه"
الجالي بإبتسامه؛الحمد لله لاعاد في نوبات ولاكوابيس ولاادويه..
ابتسم حكيم..
الجالي؛تعرف ندمت اشد الندم اللي مادرتش الخطوه هادي بكري..لوكنت رضيت نتعالج في مصحه وقتها راهو ماصار شي من اللي صار..
حكيم؛يقولوا ان تأتي متأخرا افضل من ان لاتأتي ابدا..
الجالي:هو هدا..
حكيم؛شن مشاريعك توا ع شن ناوي؟!
الجالي:الشهر اللي فات كنت في تركيا تلاقيت مع رجال اعمال من ****** تفاهمنا ع المشاريع بنبدوا بتنفيدها الفتره الجايه..
حكيم:يعني بتقعد غادي فترة..
هز راسه وقال:اكيد..
تنهد وقال؛حني قعد حالنا واقف بسبب هالحرب..
الجالي:شن صار فيك قاعدين في حوش عمك؟
حكيم:لا اجرنا اني وعيلتي وامي..
الجالي بضيق:مش باينلها نهايه الحرب هادي..
حكيم :يستر الله من اخرتها..تنهد وقال..باهي قولي ع شن ناوي في حياتك الشخصيه..
الجالي:شي..اني توا في رقبتي مسؤولية صغار خوي حتقوم بواجبي جيهتهم وفي نفس الوقت بندير واجبي اتجاه بنتي وهو هدا..ياسر خلاص..ياسر مشاكل ووجع راس...
ابتسم حكيم وقاله:عين العقل ياصاحبي وفي النهايه كل شي قسمة ونصيب..
الجالي:ع قولتك..وخدي فنجان القهوة ورشف منه بعدين قال..شن جو الابوه معاك..؟!
ضحك حكيم وقال..
/معاناة ياراجل..
ضحك الجالي وقاله.
/ربي يعاون...
🍃🍃🍃🍃🍃
وطلعوا جهينه مغمومه بحولي البدله الكبيره والزمزامات يغنوا عليها...
" تستاهلي التخليلة
وتستاهلي الباشا اللي بتمشيله
وتستاهلي الشنبير بشناقيله
تستاهلي سوق الربع برحيله"
صفيه كانت فرحانه فرحة لاتوصف واخيرا ولدها بعد تجاربه الفاشله ربي عوضه عوض جميل..بنت ناس محترمه متعلمه مثقفه..حيستقر هو وياها في وحده افضل بلدان العالم والزوز عندهم مكانة مرموقه في مجال عملهم..
الفرحه نفسها كانت حاسه بيهم اميمه زياده عليهم تفاؤل وطاقة ايجابيه هائلة من ورا موضوع اسامه..
مافارقتش نظره اهله..واكثر حد متشوق للموضوع اخته العروس الجديده اللي كانت تعرف عن قصة خوها مع اميمه من بدايتها.. ☘☘☘☘☘
بعد ماعاشوا اجواء الفرح كلها فهاليوم المميز جي وقت مرواحهم..سقدوهم اهل العروسه بهدايا رمزيه واكدوا عليهم الجيه للصاله تاني يوم...
*********
"تي قتلكم لتوا نرعش مش مصدقه"
طوبى بضحكه ودموعها في عيونها..
/سبحانك ياربي ع الصدف..
اريج بإبتسامه؛باهي شن بديري توا انتي!؟
حطت اميمه يدها ع قلبها وقالت بضحكه..
/مش عارفه..حاسه روحي حايسه..نكشت شعرها وهي تقول..ملخبطه مش عارفه كيف..
ضحكوا اريج وطوبى...
اريج كانت عاديه تسمع وهي متحمسه لكن طوبى برغم فرحتها لأميمه كانت حاسه بغصه حاولت ع قد ماتقدر تخفيها...
🍃🍃🍃🍃
"مايطلع منك ياوسيمه مايطلع منك"
اسامه وهو واقف فم دار المعيشه اللي فيها امه وخالاته قال بإبتسامه احراج ممزوجه بالفرح..
/باهي ع شن تفاهمتوا..
امه بإبتسامه؛امها قالت يتم موال عرس خوها تفضلوا..
حط ايديه في جيوبه وقال بإبتسامه..
/ان شاء الله خير..هي..تصبحوا..
وطلع بسرعه وخلاهم يضحكوا عليه..
☘مشي بسرعه لداره..
خشلها وسكرها عليه وقعمز ع السرير ..
قام تليفونه وخش ع الماسنجر لقاها مسكرة..
مع هدا وبكل حماس كتبلها رساله وبعتها...
☘وهي سهرانه مع العيله هدرزة وتعليقات لين بدي ياخد فيهم النوم..وماقعد حد سهران غيرها هي وطوبى..
طوبى كالعاده في خلوتها ..
اما هي في فراشها كانت تقرا في سورة البقرة في الهاتف..
بعد ختمتها..خشت ع الفيس بش تشوف اخر الاخبار تجيها رسالته..
لما لقتها جايه منه..حطت يدها ع وجهها وهي تضحك بصمت بعدين حولتها وفتحت الرساله وبدت تقرا..
(شن رايك في امي عزوز متفهمه هلبه وزي العسل ولدها ولدها ماخلت من ولدها حاجه)
حطت يدها فمها وهي تضحك بكتمان...عاودت قرتها اكثر من مرة لكن مابتش ترد عليه..
شويه وبدي يكتب بعدين وصلتها رسالته..
(كناريه صفي النيه)
غمت نص وجهها بالشرشاف وهي تضحك..
وكذلك مابتش ترد عليه..
اخر شي بعتلها..
(تمام تمام..تصبحي ع خير يادكتورة)..
طلعت من الماسنجر وهي تضحك بعدين خطر ع بالها تنزل منشور يعبر عن حالتها...
دورت هلبه عن اقتباس يعبر عن اللي تحس بيه لين لقاته نسخاته ونزلاته..
"العوض..
