#طوبى "جنة طوبى"
#جمان_فريد
#الجزء_108"كانون الثاني/2020"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الصلاة_الإبراهيمية
🌼وإذا لزمت الصلاة الابراهيمية واكتفيت بها عن باقي الأذكار فاعلم أنك لزمت أفضل الأذكار وأفضل الدعاء وأفضل العبادات
يكفي أن الصلاة على النبي هي العبادة الوحيدة التي تجعلك في إتصال مباشر مع الله والنبي والملائكة
فأي فضل يعادلها ؟!!
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إننا لا نستطيع أن نحب إنساناً إلا إذا ظل مختفياً عن نظرنا، فمتی لمحنا وجهه تبدد الحب🍃
_____________________________________
الساعه 9:00ليلا..
خش الجالي بسيارته مروح بمرته واخته..
خديجه ونجاه يهدرزوا وعقله مش معاهم..
لما جي فايت من قدام حوش المهدي شاف لمطعم ربيع..
مابانش عليه راجل اخته..رد نظره القدام وقعد محتفظ بصمته لين خش بسيارته لقراج الحوش..
🍃🍃🍃🍃🍃
الساعه 10:30ليلا..
حولت غرفه الحنه..وخدت دوش دافي بعدين صلت العشاء..
فاقت بنتها غيرتلها ورضعتها لين رقدت..وغيرت لولادها وهما راقدين..
بعدين مشت طلعت للصالون..
قعمزت قدام التلفزيون وحطت ع احدى قنوات الاخبار وانشغلت بالتغطيه اللي دايرينها عن وباء الكورونا..
...بعد مرور ربع ساعه...
سمعت صوت الباب الخارجي انفتح...هدا وين روح عبد الرؤوف..
دقايق..وخش للحوش..
لكن خشته ماكانتش عاديه وهاديه..
خش وهو يتكلم بالتليفون ونبرة كلامه كلها غضب وعصبيه..
قلبها انقبض من الخوف وبطنها بدت تمغص فيها..
ويبان عليها..شافت ملامحه اللي كلها غضب..ملامح فكرتها بأيامها الاولى معاه بعد زواجهم..
عبد الرؤوف بعصبيه شديده..
/تعرف شن قالي تعرف! قالي لا مش هو ومايديرهاش متخيل انه ولى غبي وساذج للدرجة هادي ياراجل!........تي لامش هكي وبس لما قعدت ناقش فيه شن قالي..قالي ياريت تطلع منها......لالالا ياربيع ماترقعش ماترقعش..اصلا اني الغالط اني..مالي وماله..ومالي ومال هالمعامع كلها!!؟اني اللي جبت وجع الراس لروحي اني..اني اللي ديما ندير في الخير للي مايستاهلاش واللي مايثمرش فيه...اخر شي طلعوني برا وهو اللي خش العين....معاش دخلي في حد خلاص الزم ماعليا نفسي فخار يكسر بعضه..
وفصل المكالمه...شاف لغرفه لقاها واقفه تشوفله بخوف.
بعد ماشافلها سألاته..
/شن في!؟
ضحك بسخريه وقال..
/شن في!؟ تبدلت ملامح وجهه للغضب وكمل يقول..في انه خوك ياهانم..خوك الفاسد اللي مافيش حد يخلط عليه ويجي من وراه خير لعب نفس لعبته الوسخه اللي لعبهالي مع التارقي وخلاه ينحبس..
غرفه بصدمه؛علاش!؟
هو بإنفعال وعصبيه..
/لأنه مريض وحقير وشيطان رجيم ماسلم حد من شره حتى العيل الصغير..وكمل يقول بتهكم..وحضرتك قالبتيلي وجهك ع خاطره وماليك خدوا مني موقف لأني قلت فيه كلمة حق..لكن تعرفي كيف..هي هكي الدنيا ماشيه امثال خوك هما اللي يندارلهم حساب اما اللي زيي اني مهما يديروا مايحصلوا شي..نستاهل نستاهل اني اللي جبته لروحي اني اللي قاعد ندفع في ثمن طيبتي الزايده اني اللي تخلي ديما ندير المعروف في غير اهله..
نزلوا دموع غرفه هو لما شافهم قال بسخريه..
/ايوه ابكي ابكي كلام الحق وجاع هلبه..اشر ع الباب وقال..بري لماليك عاوديلهم اللي قلته بالحرف راك تنقصي كلمه بالنسبه ليا اني..خبط كفوفه ببعض وقال..خلاص ما يهمني شي..
ومشي من قدامها لدار النوم..
وخلاها واقفه جامده في مكانها..
مش مستوعبه شي من اللي صار حاليا..
من الصدمه لسانها انشل حتى بملامح وجهها مش قادرة دير ردة فعل..
لأخر لحظه كانت متمنيه لو تطلع غالطه في ظنها فيه..
لأخر لحظه كانت متخيله لما تواجهه باللي يدور في نفسها تشوف منه العكس..تشوف حبه وتمسكه بيها وندمه ع غلطه ف حقها..
🍃هي هكي ديما..مرات تكون عندنا فكرة سيئه عن شخص غالي مقتنعين بيها تمام الاقتناع لكن يقعد في شي في داخلنا لأخر لحظه متأمل فيه شوية خير..متأمل يطلع غالط في الفكرة اللي واخدها عنه...🍃
غيرت نظرها من الفراغ ليه هو وهي تشوف فيه كيف واخد حوايجه ومتوجه بيهم للباب الفاصل..فتحه وطلع وسكره وراه..
غيرت نظراتها اللي كانت كلها خيبه عن الباب ومشت بخطوات ثقيله لدار النوم...
🍃🍃🍃🍃🍃
وياقلب اللي يحبك ديما يكون عليك ويحس بيك مرات من غير مايعرف شن صاير معاك..
طوبى ماقدرتش ترقد وهي شايله هم غرفه..
استغفرت..صلت ع النبي..قرت قرآن..صلت ركعتين..
ماباش شعور الغم اللي في قلبها يتبدد..
رفعت عيونها للأعلى وقالت بقلق وحزن ورجاء..
/يارب خير..يارب..
🍃وسدرة اللي كانت تتبادل في الاحاديث الجميله وسط جو كله حب مع راجلها..حست بشي غم عليها فجأه لكن مابتش تبين للمهدي..
على من ياسدرة..ع من بدرقي على المهدي اللي يحس بيك لو كنتي في اخر الدنيا!..
🍃"سلطانة قلبي خيرها!؟"
هي بتعجب مصطنع..
/خيرني!؟
المهدي:مش عارف حسيتك تكدرتي فجأه.
تنهدت بضيق وقالت..
/حتى اني مش عارفه ممكن لان هدرزتنا ع ايام زمان خطروا عليا بوي وامي..
خداها لقلبه وقال..
/الله يرحمهم ويغفرلهم..
سدرة؛مهدي..
هو قال؛روح المهدي..
سدرة بضيق..
/لو في مرة هكي صار شي..شي هكي يشبه اللي داره مختار ايام زمان شن دير؟!؟
المهدي:كيف شن ندير في شني يعني مافهمتش!؟
سدرة ودموعها في عيونها..
/قصدي انت كيف يكون موقفك مني بعدين حتندم انك خدتيني!؟
مسح ع شعرها وقال..
/شكلك قاعده فاقده الذاكرة!؟ مش زمان سألتيني سؤال زي هدا؟متفكرة شن جاوبتك وقتها!؟..سلطانة قلبي اني مايهمني حد في الدنيا غيرك انتي وصغاري بالدرجة الاولى ماعليا في حد غيركم..سدرة راني ماصدقت حصلتك..مانسيبكش الا بالموت بس..
مسحت دموعها وهي تقول بأنزعاج..
/بالله ماتجيبها سيرة الموت بكل تربح..ضماته بقوة وقالت..حتى اني ماصدقت حصلتك.
ضحك عليها وقال..
/متخلفه..
عضاته..طلعت منه آه كتمها في نصها وهو مفنص عيونه وهي تضحك عليه..
🍃🍃🍃🍃🍃
ويعدي الليل..
وتنطوى صفحة يوم فات وتنفتح صفحة يوم جديد مش معروف شن جايب معاه من احداث وحوادث ممكن تغير مجرى حياة البعض..
🍃نزلوا الجالي ونجاة من الشقه وتوجهوا للقراج..
الجالي:اسبقيني للسيارة جايك..
هزت راسها ومشت طول للقراج وهو كمل طريقه للجنان القدامي..
شاف نضال وعمر ومحمد المهدي واقفين مع بعض يهدرزوا..
قرب منهم وقال..
/صباح الخير..
شافوله وقالوا..
"صباح الخير"
لاحظ ملامح وجوههم كلها ضيق قال..
/خيركم صايرة حاجه؟
عمر بضيق:جارنا التارقي حبسوه..
عقد حواجبه وقال..
/شن داير!؟
عمر:ع كلام ربيع قالوا تاهمينه بالخنبه..
الجالي:اختلاس قصدك!؟
نضال؛لا قالوا سرقة محولات وخيوط كوابل وحاجات تانيه..
الجالي:اها يبزنس بيهم..
محمد المهدي:مايديرهاش في حد لاعبهاله..
تنهد وقال..
/الله اعلم..ماعلينا..اني طالع توا..
عمر:في أمان الله..ردبالك وخود احتياطتك مرات الوباء يكون خاش قداش ليه..
الجالي؛ماتوصيش حريص..وانتم نوصيكم ع خديجه وع امي كان روحت..
نضال؛قنعتوها تروح؟
الجالي؛تفكر قاعده..هي اوينا..ورفع يده حياهم ومشي..
وهما ردوله التحيه وقعدوا معاه بعيونه لين درق عنهم..
🍃خش للقراج..ومشي ركب السياره وهو يغني..
بنت الجيران شغلالي أنا عنيا
وأنا في المكان في خلق حواليا
مش عايز حد ياخد باله من اللي أنا فيه
شاف لنجاه لقاها تشبحله بطرف عينها...
ضحك وكمل غني...
شوفت القمر سهرني لياليا
وهموت عليكي ربي العالم بيا
سيبي شباكك مفتوح ليه تقفليه
بهوايا أنتي قاعده معايا عنيكي ليا مراية
ياجمال مراية العين..
خلاها تضحك غصب عنها..وهو كمل وشغل سيارته وطلع بيها من القراج...
🍃وفات بسيارته من قدام حوش عبد الرؤوف..ألقى عليه نظره بعدين غير نظره للطريق..
🍃وعبد الرؤوف في هالوقت نزل من الشقه..فتح الباب الفاصل ومشي لدار ولاده..
لقاهم فايقين يشربوا في الحليب..يدوب ابتسم وطلع من حداهم ومشي للكوجينه..
لقي فيها غرفه دير في الفطور..
قعد واقف يشوفلها..تبان عاديه جدا ولاكأنه صارت حاجه امس..
لاباين عليها زعل ولافرح ولاباين عليها اثار دموع..
ماباش يكلمها حتى صباح الخير ماباش يقولها..
مشي طول خدي مق..بعدين خدي بكرج القهوة صب منه في المق وخداه وطلع من حداه..
وهي تقص في شرايح الطماطم بشي من الانفعال..
بعد ماسمعت باب الحوش انفتح وتسكر..طلقت الموس وحطت ايديها ع الرخامه وانهارت بالبكي...
🍃وطوبى..
مقعمزه مع اريج وهي توكل في بنتها وعقلها مابطلش تفكير في غرفه...
اريج لاحظتها وقالت..
/بيبو..
شافتلها بصمت..
اريج؛خيرك من امس جوك متكهرب من لما روحتي من حوش خالتي..
طوبى تنهدت بحيره وقالت..
/معاش فهمت الحب ولاعرفته يااريج..
اريج قعدت تشوفلها بإستغراب..
طوبى:قصدي الراجل لما يحب ضروري يجرح المراة اللي يحبها!!؟ وعلاش يتقصد يجرحها بالحاجه اللي تقهرها!؟
كلام طوبى هدا فتح جروح اريج وفكرها بالمواجع اللي جتها من نضال..
طوبى بضيق..
/من اللي قريت عنه في الكتب ومن السيرة نفسها فهمت ان الراجل ع خاطر المراة اللي يحبها يتحمل في نفسه كل شي حتى لو شاف منها شي وجعه فيسع ينساه ويغفرلها ويولي معاها خير من قبل...يعني رجالة هداكا الوقت مافيش منهم بكل توا..بكل!!؟
تنهدت اريج وقالت..
/مانعرفش..لكن نقولك ان حني في زمان الحب فيه يدي يتلاشى مش بس بين المراة والراجل..حتى بين الصحاب والخوت والاقارب..اغلب الناس توا شعارهم نفسي نفسي...ضيقت عيونها وقالت..انتي علاش قلتي هكي في شي تاني صار بين خالتي وراجلها!؟
طوبى بحسره..
/ع قد مانعز عبد الرؤوف ومش قادرة ننساله اللي داره معاي..ع قد ماتوا حاسه بندم قريب ناكل الجيفه اللي استعنت بيه يوم من الايام ودخلته في مشاكلي بسببي اني اكثر شي قاعده غرفه تعاني معاه..
اريج:غير شن دخلك انتي بس!؟
طوبى بضيق..
/بعد اللي معاي لما انخطفت جنه حسيت عبد الرؤوف مخطط لشي بش يوقف بيه مختار عند حده هو بروحه لمح للحاجه هادي اكثر من مرة..واللي عرفته بعدين انه لم معلومات خطيره ضيع مختار هدده بيهم..
اريج بصدمه؛غبارة!
طوبى:للأسف اللي عرفه بشكل او بأخر خلاه يهزا علينا بالذات بعد مارجعنا دخلناه للحوش وقعدنا نواصلوا فيه..
اريج بحمقه؛قصدك توا هو هازي علينا!؟
طوبى بألم؛هكي فهمت من غرفه وان شاء الله نطلعوا غالطات..
سكتت اريج وهي معصبه..
طوبى بقهر؛كله منه هو بفعايله قصر رقابنا وكسرنا بوي مات وفي عينه كسره لين نموت ماننساها..ونزلوا دموعها..
اريج بحزن:ان شاء الله المهدي مايخيبش خالتي ويندمها اللي عطاته فرصه..
طوبى:لا..المهدي مش هكي بكل لو هكي حق راهو بعد اللي صار معاش يفكر في سدرة حتى التفكير...
اريج؛يستر الله وخلاص..
تنهدت طوبى بضيق وشافت لجنه لقتها ملوثه بيجامتها بالطماطم شهقت بصدمه وقالت...
/حي!
حطت جنه ايديها ع خدودها منفجات وقالت تقليدا لأمها..
"حي"
خلت اريج تضحك عليها من قلبها وضحكت طوبى معاها..
🍃الضحكه المغصوصه بالوجع...
حاليا غرفه قاعده تتوجع بصمت..تذرف في دموع الالم وهي تفكر...تفكر تاخد قرار نهائي لارجعة فيه..
القرار هدا يبي تفكير مطول..يبي تأني..لازم يتاخد بحكمه...
لأول مرة غرفه في حياتها تفكر في مصلحة غيرها ع حساب كرامتها وعزة نفسها...
لأول مرة تحس انها لازم دير شي بش تجنب اهلها الشوشرة وكلام الناس اللي مايرحم..
وتفكر في مستقبل صغارها ومشاعرهم لأنها تعرف كويش مدى تعلقهم ببوهم..
من غير شي واجعها حال جنه..كيف بتتحمل يعيشوا صغارها نفس الحاله!؟
🍃انشغلت بالحوش وصغارها ضم وتغسل توكل وتشرب وطيب..دير في هدا كله وهي غارقه في التفكير..
حاولت وهي تفكر ترجع شريط الذكريات الحلوة بينها وبين راجلها..
وللأسف كل ماتحاول تسترجع المشاعر اللي عاشتهم وقتها قلبها يرفض الاستجابه..
وعقلها يعللها سبب رفضه لما يفكر باللي صار امس في الليل...
من كتر ماتعبت من التفكير وهي تكد في الحمام..
لوحت كل شي من يدها وقعمزت ع حافة الحوش وانهارت بالبكي..
🍃وتعدي ساعة ورا ساعه وعبد الرؤوف ماروحش..
غدت صغارها ودستله غداه..وقعدت هي ع لحم بطنها زي مايقولوا ماعندهاش رغبه في شي...
🍃وهو قاعد عند اخته..
تغدا عندها بعدين قعمز يهدرز هو وياها في نفس الموضوع..
نبيله استاءت منه هلبه وصار بينها وبينه نقاش حاد..
ع خشة المحجوب للحوش..سمع اصواتهم العاليه استغرب..
مشي بإتجاه مصدر الصوت وهو يسمع فيهم شن يقولوا..
🍃نبيله بإنزعاج..
/اني من البدايه بكل لما عرفت انت علاش واخدها طارتلي منك هلبه لأني ماتوقعتكش مهما كان توصل بيك دير هكي بعدين سكتت لما شفت علاقتكم تحسنت والود كبر بيناتكم وشكلي طلعت غالطه هلبه..من الاخير خوي انت خلاص حسيتك عايف ومعاش تبي..طلقها خيرلك وخيرلها..
وجهه تغير لونه ولمعة الدمعه بانت في عينه وهو يقول بمكابرة..
/صح مزبوط كلامك صح..لكن مازال نبي نعمل بأصلي معاهم مانبيش نزيدهم على مابيهم سادهم فضايح..
نبيله جت بترد عليه وهي في قمة الغضب شافت المحجوب واقف في الباب معاش قدرت تتكلم..
لاحظها عبد الرؤوف..التفت للباب وشافه...
نظرة عيون المحجوب كانت صعبه جدا..
ابتسم بعدها بأسف وقال..
"الحاج علي طلع عنده حق"
قال هالجمله بكل هدوء ومشي طول بإتجاه دار النوم..
نزلوا دموع نبيله وهي تشوف لخوها بأسف..
وهو ماباش يشوفلها ناض طول ومشي طلع من حداها..ومن الحوش كله...
🍃🍃🍃🍃🍃
بعد العصر..
جاب الاقجم فاتن لحوش طوبى..
بعد ماوصلت بعشرة دقايق طلعوا هي ومطيره وهاديه في سيارة اريج..
حطتهم قدام حوش شنيبه طلعت سميرة استقبلتهم..
واريج روحت للحوش وعيون نضال كانت تسرق في النظر لسيارتها...
🌼🌼🌼🌼
استقبلوا سدرة الكبيره وسدرة الصغيره ضيوفهم..
مطيره لاحظت وجه سدرة ناير والفرحة تتناثر من عيونها..
وفاتن لاحظت كيف نبرة صوتها باينه منها السعاده..
اما هاديه لتوا مش عارفه علاش تشوف في الفرحه في عيون سدرة من لما عرفتها تبان ناقصه...
🍃وغرفه في حوشها قاعده راقده ع الصالون التلفزيون قدامها مفتوح وهي فعالم تاني..
سمعت باب الحوش انفتح ناضت قعمزت وهي تشوف لمدخل الصالون..بعدين ناضت وطلعت منه..شافاته متوجه للباب الفاصل..
"بنمشي نهدرز ع اختي"
رفع يده وحركها من الامام للخلف بمعنى ..
"بري"
بعدين فتح الباب الفاصل وخش سكره وراه..
بلعت ريقها وبدت ع وجهها ملامح الحزم..ولفت ومشت لدار النوم...
🍃🍃🍃🍃🍃
طلعت من الحوش بسيارته وصغارها معاها...
وصلت بيهم لحوش اختها..نزلتهم ونزلت معاهم زوز شناطي صغار فيهم حوايجهم وحوايج اختهم..
فتحت الباب لقت اريج تراجي فيها..
عطتها خبر انها جايه وطلبت منها تراجيها في الباب...
خدت اريج منها الصغار وهي تشوف فيها كيف ماقامتش الخمار عن وجهها..
غرفه:شويه وجايه..
طلعت وسكرت الباب..ركبت السيارة وولت بيها لحوش عبد الرؤوف دخلتها..بعدين نزلت منها ومشت طلعت من الحوش ع رجليها لحوش اختها...
مارفعت معاها شي ليها..ولاحاجه غير اللبس عليها والعبايه والخمار....
🍃🍃🍃🍃
اول ماخشت للحوش تلقتها طوبى..
رفعت خمارها وارتمت في حضن اختها وقعدت تبكي..
وطوبى ضم فيها وطبطب عليها وهي تقول..
"معليشي..قدر الله وماشاء فعل وإنا لله وإنا إليه راجعون"
*********
غرفه ببكي:مالحقتش نفتح فمي ونتكلم..من لما خش من الباب نسمع فيه يعيط ويكشخ وقعد يقول فكلام مافهمتاش من الاول وماعرفتش ع من يتكلم بالزبط..بلعت ريقها وطلعت منها عبره بعدين قالت..بعد ماسكر سألته شن في..غمضت عيونها بشده وهي تقول..انفجر فيا وقالي كلام قتلني قتل..وكله من مني..من هالحقير خوك الله لايربحه..
طوبى ودموعها ينزلوا..
/شن دارله!؟
مسحت غرفه دموعها وهي تقول..
/قبلها قوليلي من امتى مختار والتارقي اصحاب!؟
توسعوا عيون طوبى ع الاخر بصدمه..
وزادت تسارعت دقات قلبها من الخوف واريج تشوفلها بقلق..
طوبى بنبرة فيها شي من الرجفه..
/منك نسمع!
غرفه بنبرة باكيه..
/هو قال دبرله مصيبه حبسه بيها..
حطت طوبى يدها ع صدرها لماحست قلبها وكأنه بيوقف..
واريج بصدمه قالت..
/كيف!!؟ عبد القيوم محبوس!!؟
غرفه بإستغراب..
/قصدكم ماتعرفوش!؟
اريج؛لاوالله مانعرفوا حاجه! حتى جدي علي امس حسيته عادي..
طوبى بصوت مرتجف..
/علاش حبسوه شن دار!؟
لاحظت غرفه شحوب وجه طوبى المفاجئ ولون شفايفه اللي ولى ابيض بخوف قالت..
/طوبى خيرك!؟
طوبى بنبرة مخنوقه..
/قوليلي علاش حبسوه!!؟ شن دار!؟
غرفه وهي مصدومه في حالتها..
/مانعرفش عبد الرؤوف قال دبرهاله مختار مش عارفه كيف!
طوبى حست روحها بفشل في جسمها..عيونها ذبلوا وبدت تتنفس بسرعه..
اريج بخوف؛طوبى!؟
وبعد ماكلمتها اريج فقدت الوعي...
🍃🍃🍃🍃🍃
فتح باب السيارة وركب وهو يقول بإستياء..
/ممنوع الزيارة..
سامي بأسف:غير المهدي عريس والواحد مايبيش يفسد عليه فرحته..
ربيع بضيق:حتى هو تدبيسه سودا دبس روحه فيها..
سامي؛باهي كيف بيصير توا!؟
ربيع بغضب:هداكا الميكافيلي المريض دار هدا كله لغرض واحد بس بش يطلعه ويبان هو البطل المنقذ..
سامي؛مريض لهالدرجه الراجل هدا!؟
ربيع:واكثر من هكي..تعرف غير مش خايف نديرها معاه ونلبزها مرة وحده راني مشيتله بش يطلعه لكن عارف روحي واصلتلي منه لوين وين مش متحمله بكل..
سامي سكت شويه وهو يفكر بعدين قال..
/من رأيي نمشوا للحاج علي هو بس اللي يقدر يحلها..
ربيع؛ولو اني عارفه مختار هدا ماعنداش كبير لكن هيا نجربوا ونشوفوا..
شغل سامي السيارة وتحرك طول...
🍃🍃🍃🍃🍃
"علاش هكي علاش..علاش البني آدم عايش ع آذية غيره ماسلم منه حد شر طال الكل اعوذ بالله منه اعوذ بالله منه"
غرفه وهي تبكي..
/مش نادمه ع شي قد ندمي ع اللي درته في سدرة قبل ع خاطره..تعرفي مرات مانلومش عبد الرؤوف الراجل لما يلقى مرته مالهاش ظهر وخوها اللي مفروض يحميها هو اللي يعادي فيها طبيعي جدا يستوطى حيطها ويهزا عليها..
اريج ودموعها ينزلوا..
/عندك حق الرجاله كلهم هكي..
طوبى بصرامه وحزم..
/لاخلاص اني معاش بنخليه يعفس الحوش ع جثتي مازال يخشله..
اريج؛غير اصبري شويه خليه في الاول يطلع الراجل بعدين ديري اللي بديريه..
رشفت طوبى وهي تفكر ف كلامهم بعدين قالت..
/صح صح عندكم حق..
"بنات"
بدت ع وجوهم ملامح الاستغراب..
اريج؛من روح بيهم!؟
ويخشوا عليهم بوجوه ضاحكه تنقلب ملامحها للخوف والقلق لما شافوهم يبكوا..
مطيره بخوف:خيركم شن في!؟
وهاديه في جنبها تشوف للصغار كيف يلعبوا بعدين شافت جنبهم شناطيهم..ردت نظرها لغرفه وركزت فيها..
غرفه اللي تحب لبس الذهب في كل وقت حتى خرصه"حلق" في وذانها مش لابسه!..
ووجها خالي من الزينه..
مطيره؛شن في تكلمي انتي وياها!؟
طوبى شافت لفاتن وقالت..
/قولي لراجلك يطلع عبد القيوم وين ماحطه قوليله اتقي الله في نفسك شويه..
فاتن مررت نظرها عليهم وهي مصدومه..
مطيره بصدمه:نهاره اسود شن دار للراجل وين حطه!؟
غرفه ببكي..
/دارله زي مادار لرؤوف قبل ياعمتي..
هاديه شافت لفاتن بنظرات اسف..
ناضت طوبى لفاتن شدت يدها وقالت برجاء..
/بالله عليك حاولي فيه وقوليله يطلعه قوليله اللي بينا يقعد بينا مايدخلش فيه ناس مالهاش ذنب ارجوك...
🍃🍃🍃🍃
وروحت فاتن مع الاقجم وعقلها مش معاها...
تفكر في اللي سمعاته منهم وتربط فيه مع اللي شاكه فيه ليها فتره..ان مختار ليه يد في خطف جنه والتسبب لأخته فآذى بالغ من طليقها المريض نفسيا...
🍃🍃🍃
وصل بيها الاقجم للفيلا..
مجرد مادرس السيارة نزلت بسرعه وتوجه للحجرة متاعه..
فتحت الباب طول وخشت عليه..
هو كان عنده اجتماع عن بعد..لما شافها كيف خشت ليه وركز ع ملامح الغضب في وجهها..اعتذر من شركائه ونهي الاجتماع..سكر اللاب توب وقاللها..
/خيرك خاشه هكي!؟
فاتن بحده..
/ليك علاقه بحبس التارقي عبد القيوم!؟
عقد حواجبه بصدمه وهو يقول..
/كيف!..عبد القيوم انحبس!؟
فاتن بإستغراب..
/ايه وقالوا انت اللي وراها!؟
ناض خدي تليفونه وهو يقول..
/من اللي قال!؟
فاتن؛اختك غرفه قالت راجلها قاللها هكي..
ابتسم تهكما ومشي لخزانه الصيدليه طلع منها شيشه الكحول وكمامه. ومشي طلع من حداها..
لحقاته وهي تقول..
/متأكد ان مالكش علاقه بحبسته!؟
وصل في الشماعه خدي بالطوه ولبسه وهو يقول..
/ماليش علاقه..
حط شبيشه الكحول في جيبه ولبسه الكمامه وطلع..
فاتن لحقاته وهي تقول..
/وين ماشي..
مختار بصوت عالي..
/اقجم..اشرله ع السيارة يجيبها..
الاقجم ركب طول وقدمله بيها..
فاتن:مختار وين ماشي!!!؟
ركب السيارة وشافلها وهو يقول..
/خشي داخل صقع..وتسكر الباب السحاب وتحركت السيارة..
فاتن بضيق..
/يارب احميه واحمي عبادك منه..
********
مختار:القصه مش واضحه بس صارت في وقت مريب شويه..
الاقجم؛تبي تقول انها مؤامرة؟
مختار:هي مؤامرة من غير كلام عبد القيوم انسان نزيه وأمين وراجل عينه شبعانه مستحيل يدير حاجه زي هادي..
الاقجم:تو ندوروا ورا قصة حبسته هادي هي اللي حتوصلنا للي دار فيه هكي ونعرفوا اسبابه..لكن في معلومه وصلتنا اليوم تخص نسيبك والجالي شنيبه عرفنا ع شن ناويله..
رفع مختار حاجبه وقال..
/القتل؟
الاقجم؛لا الخطف..
ضيق مختار عيونه وهو يفكر بعدين هز راسه وقال..
/تمام..المهم نبيكم تعرفولي اللي صار مع التارقي بالتفصيل ما نبيش معلومه تغيب عليكم.. وتوا ارفعني وين ماموجود عبد القيوم..
الاقجم؛تم..ايه حقه معلم.. واخيرا اخترنا اسم..
مختار ؛شني ترا!؟
الاقجم؛جاد..
مختار بضحكه:حلو جاد الاقجم اسم فني..
الاقجم؛فني شني بس..مايطلع الا اسم لزعيم مافيا ..
ضحك مختار وقاله..
/تشوفه صحيح ان شاء الله وتفرح بيه..
الاقجم بإبتسامه:إن شاء الله يامعلم إن شاء الله
🍃🍃🍃🍃🍃
"قسما بالله ماتسوي بارا يابنت خوي كان مازال توليله.."
غرفه ودموعها ينزلوا..
/لاخلاص معاش فيها..
مطيره بقهرة..
/واني اللي كنت مستخسراته فيك ونقول بيني وبين نفسي كيف راجل زي هدا يكون نصيب غرفه..سامحيني ياغريفه لكن انتي تعرفيني عمتك صريحه ومانحب نجامل..
غرفه بألم..
/مازعلنيش كلامك بكل..صح ربي قاعد يخلص مني اللي درته في حياتي قبل وعطاني في النهايه ع قيس نيتي..
سكتت مطيره وخاطرها واجعها ع غرفه..
ع خشة اميمه اللي كانت كيف مروحه من الخدمه سمعت باللي صار من اول ماخشت لحوش طوبى وشافت جدها واقف في الجنان مع طوبى وهما يتناقشوا في موضوع التارقي مابوش يزيدوها ع الحاج علي ويحكوله اللي صار مع غرفه حاليا...🍃
قعمزت اميمه جنب غرفه وقالت..
/خيرك غرفه علاش وجهك هكي علاش تبكي!؟
غرفه وهي تشوفلها بألم..
/كيف ماكسرت قلبك يوم من الايام ربي ردهالي كسرة قلب وخاطر ونفس يااميمه..انهارت بالبكي واميمه تشوفلها بصدمه ودموعها نزلوا طول..
قربت مطيره لغرفه ضمتها وهي تقول..
/خلاص بنتي خلاص..
وصوت بكي غرفه اللي كله قهر زاد وجع قلوبهم وخلاهم يبكوا معاها غصب عنهم...
🍃🍃🍃🍃
"اول ماسمعت تحديت الاهوال والمخاطر وجيتك هني"
عبد القيوم بضحكه؛يعني مش انت اللي وراها..
رفع حاجبه اليسار وقال..
/ No..وانت عارف هدا كويس..
عبد القيوم هز راسه وقال..
/عارف..واحد معاي في الخدمه..
مختار:ايوه خلينا هني احكيلي علاش فكرت فيه شن صار بينك وبينه..
عبد القيوم:قبل كل شي..لو كنت ناوي تساعدني لازم تعرف حاجه مهمه..انا راجل ماينساش المعروف لكن مانخليشي يأسرني خليك متفكر انك جيت طول بش تساعد من غير ماتعرض مساعده اساسا..
ابتسم مختار وقال..
/انت خليتني مصر نساعدك..
عبد القيوم؛مادام انت اللي تبي مانيش رادك..
ضحك مختار وقال..
/هات ماعندك هات...
#كانون_الثاني
#طوبى
...يتبع....
