#أنت_قلبي٤
_________
الحلقة ١٣٥
في فيلا كريم..
فريدة حاضنه زين وبتبكي..
لسه داخل محمد يقوله يخرج علشان مستنيه هو ووالده بره يشوف المشهد ده فيرجع تاني.
كريم : ايه يا ابني فين أخوك؟
محمد : جوه.
كريم : مستعجلتوش ليه كل دا بيلبس؟!
محمد : لأ مامي جوه بتعيط.
نزل كريم من العربية بتنهيدة ودخل جوه.
قعد جنب فريدة يطبطب عليها وهي لسه حاضنه زين..
فريدة : متخلهوش يسافر يا كريم.
كريم : وبعدين معاكي يا فريدة قولنا إيه بلاش اللي بتعمليه ده وخليه قلبه يجمد كدا.
ويخبط على كتف زين.
كريم : قوم اغسل وشك يلا عندنا ميعاد مهم الطيارة مش هتوقف تستناك.
زين وهو بيمسح دموعه : حاضر يا بابي.
فريدة : استنى لما جميلة تيجي زمانها جايه متزعلهاش.
كريم : جميلة لسه قدامها ساعة واحنا كدا هنتأخر يلا يا ابني.
زين من جوه : حاضر جاي.
فريدة بتبكي : قلبك جامد قوي.
كريم : ولا جامد ولا حاجة انا زيك بس اعمل إيه اقعده يعني جنبي؟!
خليه يشوف مستقبله يا فريدة وقومي كدا اغسلي وشك عاوز ارجع الاقيكي رايقه كدا.
فريدة : أنت اللي فايق ورايق!
كريم : يلا يا ابني مفيش وقت.
زين : حاضر يا بابي جاي اهو.
فريدة : هتمشي وتسيبني يا زين؟
كريم : ااااه هنفتح بقى في العياط تاني يلا يا ابني
جهزي الأكل عبال ما اجي يا فريدة.
واخده كريم من ايده وخرجوا.. فريدة تجري تلحقهم وهي بتشاور لهم وبتبكي.
_______
في شقة إياد.. في المطبخ.
منة : خلصتي السلطة يا سهر؟
سهر : اه يا مامي خلصتها.
منة : عارفه وشك منور وبيضحك أنا فرحانه قوي إنك مبسوطه.
سهر : طبعا مش مازن جه.
منة : هههههههههههه طيب طلعي بقيت الأطباق بقى وادخلي قولي لبابي الأكل جهز.
سهر : حاضر.
تجري بسرعة تخبط على الباب.
كان إياد ومازن قاعدين في الليفنج.
إياد : ايوه.. يا سهر تعالي.
سهر : مامي بتقولك الأكل جاهز على السفرة.
إياد بيقوم : كدا.. طيب اتفضل يا دكتور.
مازن : حضرتك الأول يا عمي.
إياد بابتسامة : ماشي واهو كذلك.
جات سهر بسرعة ووضعت ايدها في ايد مازن : يلا يا حبيبي.
مازن : سهر معلش خُدي بالك علشان باباكي ميضايقش.
سهر : وبابي هيضايق من ايه بالعكس.. يلا بقى علشان ناكل مع بعض..
مازن : طب مش كنا روحنا شقتنا أحسن.
سهر : هنروح يا حبيبي بعد ما نخلص أكل هدخل ألبس ونمشي.
مازن : طيب.
سهر : يلا بقى.
مازن : حاضر.
______
في شقة مراد.
مراد لاقى مريم سرحانه بيسألها : ايه يا مريم مبتاكليش ليه؟
مريم : ها..
مراد : بقولك مبتاكليش ليه؟
مريم : هاكل أهو.. بقولك ايه يا مراد.
مراد : نعم يا حبيبتي.
مريم : بقول أعزم مازن عندنا ايه رأيك؟
مراد : البيت بيته يجي في أي وقت.
مريم : يعني لو بكرة هينفع؟
مراد : هههههههههههه الراجل لسه راجع من السفر ومحتاج يستريح سيبيه يومين كدا ولا حاجة.
مريم : طيب.
مراد : عارف إنه واحشك بس معلش استحملي شوية علشان مراته متضايقش مش من أولها كدا.
مريم : عندك حق.
مراد : ايه زعلتي ليه؟
مريم : لا وهزعل من ايه أنت فعلا معاك حق.
مراد طب كملي أكلك بقى.
مريم : حاضر.
_____
في التليفون.. 📞
فريدة بتبكي : حاسه إن قلبي هيوقف يا ندى.
ندى : يا فريدة ادعيله متعمليش في نفسك كدا هو راح فين يعني ما هو لما يوصل بالسلامة هيكلمك يطمنك عليه.
فريدة : تعبانه يا ندى وقلبي واجعني جميلة لسه جايه من بره سألت على أخوها وبعدين لما عرفت إنه مشي طلعت فوق وعماله تعيط.
ندى : طب اطلعي اقعدي معاها وحاولي تهديها كدا حصل إيه يعني لكل ده ما هو أكيد شافتك مموته نفسك من العياط فعيطت على عياطك.
فريدة : لأ أنا قعدت ماسكه نفسي لحد ما طلعت اوضتها بس طلعت علشان اقولها تنزل تاكل سمعتها بتعيط قلبي وجعني نزلت تاني وسيبتها.
ندى : اهدي يا فريدة واطلعي هدي بنتك قوللها إنه هيكلمها بعد شوية لما يوصل بالسلامة.
فريدة : هطلع لها بس اخد الدوا واهدا كدا علشان حاسه بهبوط..
ندى : ايوااا.. موتي نفسك يا فريدة علشان زعلانه إن ابنك سافر أصلك أول واحدة يعني ابنها يسافر ويسيبها يا أختي اعتبريه اتجوز ولا بيشتغل في محافظة تانية واهو هتكلميه وتشوفيه وتطمني عليه بس متنسيش توصيه كدا يشوفله واحدة من هناك أهو العيال تطلع شقر وعيونهم ملونه هههههههه
فريدة : اقفلي يا ندى.
ندى : أنا الحق عليه اللي بحاول افرفشك.
فريدة : مع السلامة علشان دايخه وتعبانه.
_______
في فيلا مراد.
هشام : تسافري تروحي فين هو إيه اللي جرا لعُمر بالظبط؟!
نورهان : معرفش يا هشام فجأة كدا كره القعدة هنا وبيقول إن ملوش حد علشان يقعد عشانه ولاده هناك وبيقول هيعمل بيزنس ويستقر معاهم وأنا مش عاوزه اسافر وفي نفس الوقت عاوزاه جنبي أنا مقدرش اعيش لوحدي.
هشام : خلاص اقعدي هنا معانا وسيبيه براحته.
أمل جايه بالقهوة : ازاي بس يا هشام اتفضلي يا نور اتفضل يا هشام..
نورهان : شكرا يا أمل.
هشام : زي الناس يا أمل تسافر فين دا مكانا نسافر ليه اللي بيسافر دا شاب صغير لسه بيبدأ حياته لكن دا له شركته هنا ووضعه مستقر ولاده اختاروا يعيشوا بره مصر اوك براحتهم هو بقى نفسيته تعبانه بعد وفاة أخته محتاج يروح عن نفسه شوية مفيش مانع يسافر ويرجع لكن ايه يهاجر دي لأ متوافقيش يا نور.
أمل : يا هشام..
يقاطعها هشام بانفعال وغضب : مش هتسافري يا نور سامعه مش هتسافري.
قعدت نورهان جنبه وحضنته وهي بتبكي.
______
في شقة إياد.
إياد بانفعال : متقاطعنيش وأنا بتكلم.
سهر بـ استسلام : حاضر يا بابي.
مازن كان بيسمع وهو ساكت.
إياد : هتروحي مع جوزك لا تقوليله أختك راحت ولا جات يروحلها تجيله يكلمها ملكيش علاقة بيهم نهائي.
مازن : عمي أنا بس مش عاوز الموضوع يمشي كدا هو مش إجبار دي حياتي ودا وضعي وبراحتها عاوزه تعيش معايا على النظام ده تمام مش عاوزه هي أكيد عارفه ايه اللي بيتم في الحاله دي.
سهر قامت وهي منفعله : أنتم ليه بتضغطوا عليه بالشكل ده؟!
إياد : محدش ضغط عليكي جوزك قالك براحتك.
سهر : ما هو براحتي دي معناها اخبط دماغي في الحيط مش كدا؟!
مازن : انتي ايه مشكلتك مع مريم يا سهر بالظبط قوليلي لو هي غلطت في حقك أنا هجيبهولك لكن حوار إنك مش عاوزاني اتكلم معاها قدامك ومجبش سيرتها دا صعب قوي هي مش واحدة اعرفها عليكي دي أختي من قبل ما أعرفك ولو بعتها علشانك ممكن ابيعك برضو مع واحدة غيرك على فكرة سهل قوي أصل مش هتبقي أغلى من أختي.
سهر : برضو بتقولها؟!
مازن : ايوه بقولها يا سهر وهفضل اقولها ومتفكريش حبك ليه هيخليني اقاطع أختي لا عادي تروحي ويجي غيرك لكن أختي هي واحدة بس مش هيجلي غيرها علشان اقاطعها بسببك.
مازن قايم يمشي.. إياد يمسك ايده.
إياد : استنى بس يا ابني احنا لسه بنتكلم..
يدخل عمار : سلام عليكم.
يرددوا : وعليكم السلام.
وبعد السلام على مازن يقعد..
إياد : ما تقعد أنت كمان يا ابني خلينا نوصل لحل بقى.
مازن : الحل أنا قولته يا عمي لنعيش حياه طبيعية زي كل الناس لـ كل واحد يروح لحاله تختار هي بقى.
عمار نظر لوالده وهو مش فاهم الحوار على إيه.
إياد : ها يا سهر قولتي ايه؟
سهر : خلاص ياخدنا معاه لما يجي يسافر.
مازن : ظروفي متسمحش بحاجة زي دي قدامي سنة واحدة وارجع مصر ونستقر هنا مع بعض عاجبك الوضع كدا تمام مش عاجبك براحتك.
سهر : أنت ليه مش عاوز تاخدنا معاك؟
مازن : يا بنت الناس أنا تعبت من المناهدة معاكي بقالنا ساعتين عمالين نتكلم وموصلناش لحاجة وأنا راجع من سفر وتعبان ومطبق بقالي ليلتين منمتش انتي عاوزه مني ايه؟
إياد : خلاص يا سهر تروحي مع جوزك وتقعدي في شقتك الفترة اللي جوزك فيها هنا وبعدين هيجيبك تقعدي معانا السنة دي ولما يرجع بالسلامة تبقي ترجعي معاه شقتكم.
سهر نظرت لمازن..
مازن نظر لها بتنهيدة : محتاج رد دلوقت علشان امشي.
سهر : حاضر يا مازن هاجي معاك.
قعد مازن منتظرها تخرج هي والبنات.
مازن : ازيك يا عمار اخبارك ايه؟
عمار : أنا كويس طمني عليك؟
مازن بتنهيدة : تمام.
قرب عمار من مازن وقعد جنبه : اسمع يا مازن أنا عارف إن سهر مزوداها حبتين معلش استحمل الفترة دي ولما تسافر احنا هنقعد معاها ونحاول نغير تفكيرها ده واهو الفترة اللي هتقضيها هناك كفيله إنها ترجعها عن تفكيرها ده.
مازن : ولو مرجعتش يا عمار براحتها..
خرجت سهر ومعاها البنات اخدهم منها ونزل وهي فضلت فوق شوية سلمت على أهلها ونزلت.
_______
في فيلا كريم.
كريم : وبعدين معاكي بقى يا فريدة.
فريدة : طب مكلمنيش ليه؟
كريم : قولت لك وصل متأخر وكان تعبان يدوب كلمني كلمتين وقالي هنام والصبح هيكلمك.
فريدة : طب هو طمنك يعني إنه كويس واستقبله صاحبك ده في بيته ولا بايت فين دلوقت؟
كريم : وصل هناك وقاعد في البيت وليه اوضة لوحده فيها كل حاجته متقلقيش بقى وسيبيني أنام.
فريدة : الاوضة فاضيه يا كريم.
كريم : روحي نامي فيها يا فريدة.
قايمه فريدة يمسك ايدها : رايحه فين انتي صدقتي؟
فريدة : هروح اقعد هناك شوية.
كريم : لأ بلاش خليكي هنا أنا مش ناقص هتروحي هناك تقعدي تعيطي وبعدين تتعبي وتقولي الحقني نامي يا فريدة.
فريدة : متطفيش النور.
كريم : مش هعرف أنام غمضي عينك بس وانتي هتروحي في النوم على طول يلا.. تصبحي على خير.
________
في شقة مازن.
مازن : يا بنت الناس أنا تعبت كلام معاكي يا سهر انسي أنا مش هقاطع أختي لا علشانك ولا علشان أهلك ولا أي حد في الدنيا ياريت تفهمي كدا كويس.
سهر : ما خلاص بقى يا مازن قولتلك.
مازن نظر لها بتنهيدة : خلاص إيه عاوز أفهم؟
سهر تقرب منه : خلاص بقى قفل على الموضوع ده علشان أنت وحشني.
نظر لها بتنهيدة وسكت..
وبعد لحظات من الصمت.
سهر : هنفضل كدا يعني ما تقول حاجة.
مازن : أقول ايه أنا خلصت كل الكلام معاكي.
سهر : بس أنا لسه عاوزه أقولك كلام كتير مازن أنا بحبك وبصراحة بقى أنت قلبك قاسي قوي عليه.
مازن : أنا؟!
سهر تقرب منه أكتر : خلاص أنا اللي قلبي قاسي ووحشه.
وضمته ليها : متزعلش نفسك بقى وانسى كل حاجة دلوقت.
مازن : انسى ايه؟!
سهر : انسى أي حاجة مزعلاك مني.
مازن : يا سهر أنا..
وضعت يدها على فمه : خلاص بقى قولتلك.
سكت بتنهيدة..
سهر : خلاص.. أوك؟
مازن : خلاص يا سهر.
سهر : ايوه.. كدا
ههههههههههههه
_______
في شقة سيف.
سيف : مليكة.. مليكة.
مليكة : ايوه.. يا سيف عاوز حاجة؟
سيف : انتي مش قولتي هتنيمي يحيى وتيجي علشان نسهر مع بعض شوية؟!
مليكة بصوت ناعس : اه ما أنا جيت أهو.
سيف : جيتي ايه بس انتي نايمه يا مليكة.
مليكة : لأ مصحصحه أهو.
بيقرب منها : طب بقولك ايه.
مليكة : قول يا سيف.
سيف : ما أنا مش هعرف أكلمك وانتي نايمه كدا لتنامي لتقومي تغسلي وشك وتفوقيلي بقى شوية.
قامت مليكة وهي تاعبه وشبه نايمه.
قعد سيف منتظرها حوالي نص ساعة مجاتش قام يشوفها بيخبط مردتش خرج بره لاقاها نايمه على الكنبه..
سيف بيقومها.
مليكة : سيف بس بقى ايدي وجعتني.
سيف : طب قومي نامي جوه.
مليكة : طيب شوية كدا.
سيف : شوية ايه وانتي نايمه أصلا قومي يا مليكة يلا.
مليكة : حاضر.
قامت كانت هتوقع فسندها ودخلها تنام في السرير وهو قاعد جنبها نظر لها بتنهيدة وبعدها قفل نور الابجورة اللي جنبه ونام.
_____
الصبح في شركة مراد.
هشام : واقف ليه مش خلاص سلمتني الشغل بتاعك روح بقى شوف شغلك.
مراد : بابي.. بابي.
هشام يوقف كتابة ويقفل الملف اللي كان شغال فيه : نعم يا أستاذ مراد وبعدين مش قولنا بابي دي في البيت؟!
مراد : أنا متأسف يا دكتور هشام.. اتفضل.
هشام : ايه دي؟
مراد : شوفها بنفسك.
هشام بيقرأ : اجازة!
مراد : عاوز اجازة أسبوع أخرج مريم والولاد يشموا شوية هوا بقالهم كتير مخرجوش.
نظر له والده بتنهيدة.
مراد : مريم زهقانه ولازم اخرجها علشان متحصلش مشكلة وساعتها العيال دي هتتشرد احفادك هيتشردوا في الشوارع يا دكتور هشام.
نظر له هشام بدهشه..
مراد قرب من والده وقعد نص قعده على رجل والده وكمل كلامه : وأنا كمان هتشرد في الشوارع يرضيك ابنك يتشرد في الشوارع ما هي هتاخد الشقة علشان حاضنه وأنا مش هيبقى ليه مكان اروحه اجي أنام في وسطكم يعني ولا ايه؟!
هشام : قوم يا مراد رجلي مش مستحمله.
مراد : أنا بقول تمضي على الاجازة ويا دار ما دخلك شر علشان موجعش دماغكم واروح لمامي بقى اشتكلها ولما ترجع من بره تتخانق وتقولك متدتلوش اجارة ليه فالمشكلة تكبر وحضرتك تتعصب فمامي تخرج من البيت وتجري تدور عليها متلقهاش بس هي هتبقى عارفه مكاني كويس هتيجي نقعد أنا وهي على الرصيف ونشحت فالبوليس يجي يقبض علينا تسول وحضرتك اسمك وسمعتك يبقوا على كل لسان يرضيك كدا؟!
هشام : قوم يا مراد وبطل الهبل بتاعك ده.
مراد : طب امضي هنا.
هشام : هنا فين؟
مراد : هنا في الحتة دي.. ايواااا
تمام متشكر قوي.
ويُقبل رأس والده ويقوم.
مراد : مريم هتدعيلك والولاد اللي كانوا هيتشردوا دول هههههههه هقولهم ادعو لجدو إنه حافظ على اسرتنا السعيدة من الضياع والتشرد.
نظر له والده بابتسامة : روح شوف شغلك يا مراد.
مراد : ايه دا أنا كنت طالب اجازة أسبوع حضرتك شاطب هنا ليه وكاتب أربعة؟!
هشام : هما أربع أيام مفيش غيرهم.
مراد : طب ما تبحبحها شوية يا دكتور.
هشام : هما أربعة لو كترت في الكلام هلغي الاجازة خالص.
مراد : لا وعلى ايه أربعة أربعة.
هشام : لو أخدت يوم زيادة متجيش الشركة اليوم اللي بعده.
مراد : امال اروح فين؟
هشام : تنام في السرير يا حبيبي ولا اقولك عارف الرصيف اللي كنت هتقعد عليه احجز لك مكان من دلوقت.
مراد : لا خلاص أربعة أربعة حد طايل شكرا يا دكتور نجاملك في الأفراح يا حبيبي.. سلام.
هشام : أنا مش عارف الواد دا طالع مين... نعم عاوز اجازة أنت كمان؟!
كان شادي داخل المكتب.
شادي : لا اجارة ايه أنا جاي اسلم حضرتك الشغل ده.
هشام : طب متشكر اتفضل ارجع لمكتبك.
شادي واقف.
هشام : ايه يا ابني مش سامعني بقولك اتفضل روح على مكتبك.
شادي : هو مراد اخد اجازة بجد؟
هشام : ايه عاوز تاخد اجازة أنت كمان وتسيبولي الشركة؟!
اتفضل روح لهشام اخوك كمان قوله.
شادي : لأ مقصدش بس مراد كان واخد اجازة من قريب وأنا من حقي اخد اجازة أنا كمان.
هشام : حاضر يا شادي لما البيه يرجع من إجازته ابقى خُد اجازتك في حاجة تاني؟
شادي بابتسامة : لأ متشكر بعد اذنك.
هشام بتنهيدة : اتفضل.
في التليفون.. 📞
هشام : ايوه.. يا أمل.
أمل : فيه ايه يا هشام مالك؟
هشام : ولادك هيجننوني.
أمل : طيب معلش هدي أعصابك شوية.
هشام : كنتي متصله عاوزه حاجة؟
أمل : اه.
هشام : اتفضلي قولي عاوزه ايه؟
أمل : عاوز يومين اجازة.
هشام : انتي كمان؟!
أمل : ايه يا اتش مش من حقي؟!
هشام : حاضر يا أمل لما مراد يرجع من إجازته ووراه شادي وبعده هشام حاضر هتاخدي الاجازة بتاعتك.
أمل : الاجازة بتاعتي!
هشام : اجازتي أنا وانتي يا أمل حاضر.. عاوزه حاجة تانية؟
أمل : لأ يا حبيبي بس الاجازة دي هتكون امتى؟
هشام : لما اخلص شغل يا حبيبتي هاجي اقولك.
أمل : هشام.
هشام : عندي شغل يا أمل ابوس ايدك انتي وولادك خفوا عني شوية.
أمل : لأ بس كنت بفكرك إنك هتعشيني الليله بره زي ما وعدتني.
هشام : أنا وعدتك امتى ده؟
أمل : دلوقت هتودعني إنك تخرجني علشان اقفل التليفون واسيبك تشوف شغلك.
هشام : دا أنا بتهدد النهاردا.. هو فيه ايه؟!
أمل : مش هعمل أكل علشان رايحه الكوافير مستنياك بالليل علشان نخرج مع بعض.
هشام بابتسامة : حاضر يا أمل مش فاهم فيه ايه النهاردا؟!
أمل : في عروسة جديدة.
هشام : عروسة!
أمل : اه عروسة..
هشام : هههههههههههه متهزريش.
أمل : مبهزرش العروسة بنفسها بتكلمك دلوقت.
هشام : أوك يا عروسة تسيبي بقى عريسك يشوف شغله ولا ايه؟
أمل : لأ اسيبك تشوف شغلك بس توعدني الأول.
هشام : حاضر يا حبيبتي هخرجك وهتتبسطي الليله.
أمل : وعد.
هشام : وعد يا أموله.. سلام بقى.
أمل : مع السلامة يا حبيبي.
يقفل هشام مع أمل.
هشام بيكلم نفسه : أنا مش فاهم فيه ايه؟
بعدها يتفاجئ بهشام بيخبط..
هشام (الأب) : اهلااا أنا برضو بقول لسه في حاجة نقصاني ادخل يا هشام.
هشام (الابن) دخل وهو مش فاهم الكلام على ايه.
هشام (الأب) : اقعد استريح.. عاوز اجارة؟
هشام (الابن) : لأ.
هشام (الأب) يتنفس بـ ارتياح : طب كويس.. هات ما عندك بقى.
هشام (الابن) : اتفضل.
هشام (الأب) : ايه دا؟!
هشام (الابن) : محتاج سلفه بس لشهر واحد وهسددها على طول.
هشام (الأب) : ممكن أعرف السبب ولا مينفعش.
هشام (الابن) : لا طبعا هقول لحضرتك كنت عاوز اطور المطعم بتاعي وبفتح فرع جديد.
هشام (الأب) بفرحه : بجد؟!
مبروك يا حبيبي.
هشام (الابن) : طب ايه هينفع اخد السلفه بقى ولا اتصرف؟
هشام (الأب) بابتسامة : أنت تاخد اللي أنت عاوزه دي فلوسك يا هشام.
هشام (الابن) : مينفعش لازم استأذن حضرتك الأول.
هشام (الأب) : تمام... اتفضل اهو امضتي تقدر تستلم اللي أنت عاوزه من مدير الحسابات.
هشام (الابن) : متشكر يا بابي متحرمش منك يا حبيبي.
______
في شقة مازن.
سهر : مازن قوم يلا.
مازن : ايه دا فيه ايه يا سهر انتي بتعملي ايه؟!
سهر : قومي يلا يا حبيبي هنتأخر على ميعاد الطيارة.
مازن : طيارة ايه؟
سهر : مسافرين الغردقة الساعة سته يلا بقى.
مازن : ايه!
طيب ابقي صحيني لما تجهزي.
سهر : مازن أنا مبهزرش قوم يلا.
مازن : اقوم اروح فين يا بنتي طيارة ايه وسفر ايه انتي نايمه؟!
سهر : لأ أنا مصحصحه أنت اللي لسه نايم
حجزت لينا أسبوع في الغردقة.
مازن : نعم!
سهر : هههههههههههه بجد دا حصل كلمت بابي الصبح حجزلنا يلا بقى.
مازن : سهر متهزريش.
سهر : امال أنت فاكر ايه عاوز تضيع علينا الاجازة يلا ياحبيبي مش كفاية عاوز تسافر وتسيبنا أنا بقى لازم استغل كل لحظة قاعدها معانا هنا.
مازن : سهر أنا عاوز استريح سيبيني بس أنام شوية ولما أقوم هخرجك.
سهر : أنت لسه فاكر اني بهزر.. قوم بقى يا مازن.
مازن : يعني ايه؟
سهر : يعني يا حبيبي الليله هنكون في الغردقة يلا أنا جهزت الشنط.
مازن : دا الموضوع بجد بقى.
سهر : هههههههههههه ايوه
يلا بقى.
مازن : حاضر بس هروح مشوار الأول وبعدين هرجعلك.
سهر : مشوار ايه ده؟
مازن : مشوار كدا مش لازم يعني تعرفي.
سهر : كدا طيب مش مهم أعرف معاك حق بس ترجع على طول متتأخرش.
مازن : حاضر.
______.
في الصيدلية.
معتز : يعني ايه يا عمي؟
كريم : زي ما سمعت كدا يا معتز مش هينفع اشتري الشقة كدا هيبقى معايا جزء من الفلوس مش كلها وأنا معرفش إنك هترفع سعرها كدا.
معتز : فين يا عمي دا حضرتك بس علشان عمي ومش عاوزين نبيعها لحد غريب ريحتك على الأخر لو حد تاني مستحيل كنت انقص ولا جنيه.
كريم : خلاص يبقى مبروك على اللي هياخدها.
كريم ص جاي ناحيتهم : محدش هياخدها غيرك يا عمي.
معتز : كريم عمي عاوز ياخدها بتمن قليل خالص ودا مش سعرها الحقيقي.
كريم ك : أنا مش عاوز اخدها بتمن قليل ولا حاجة دا سعرها فعلا بس أنت طالما عاوز أكتر يبقى حقكم محدش يقدر يقول حاجة أنا كنت بحاول احل المشكلة بس.
معتز : معلش يا عمي بس مش علشان حضرتك تحل المشكلة اللي هي مش موجودة اصلا على فكرة لكن ماشي هنقول إن فيه بس متزعلش مني دا مش هيبقى استغلال للموقف؟
كريم ص :معتز أنت بتقول ايه؟!
كريم ك : سيبه يا كريم يقول اللي هو عاوزه وأنا من حقي أوضح ليه برضو إني مستغلتش الموقف ولا حاجة بدليل إني جايب الفلوس كاش بس براحتك يا ابني.
كريم ص : عمي استنى... استنى بس رايح فين حضرتك طب نتفاهم.
_________
في البلد.. في منزل العمدة.
محمود فاتح الباب في الدور الأرضي وبيشيش وقاعد براحته.
يدخل حامد بعد ما يخبط.
محمود : خير.
حامد : هو الباب ده ملوش قفل؟
محمود : ايش معنى؟
حامد : عيب عليك في حريم في الدار وأنت قاعد وواخد راحتك على الأخر.
محمود : اني قاعد في الدار مطلعتش عندك كدا علشان تيجي تتكلم معايا.
حامد : طب لم نفسك يا محمود شويه ولا عاوز تعمل مشاكل كل شوية.
محمود : اني مش فاهم ايه اللي مضايقك ملكش فيه يا حامد واطلع يا حبيبي شقتك.
حامد : لأخر مرة يا محمود اني بقولك تلم نفسك واعمل اللي تعمله براحتك بس الباب ده يتقفل ومتناديش على حد من العيال وأنت قاعد كدا.
محمود يتجاهله وياخد نفس.. ويخرج الدخان في وجه حامد.
حامد يكح : ايه القرف ده؟!
محمود : محدش قالك تيجي تشمه اطلع شقتك يا حامد وملكش دعوة بيه.
حامد : ماشي يا محمود هطلع بس اللي حصل ده ياريت ميتكررش تاني.
وطلع حامد فوق..
زوجته : عملت معاه ايه؟
حامد : هعمل معاه ايه يعني اديني اداته كلمتين بس يكون بيحس ويفهم.
زوجته : يحس!
وهو ده بيحس ابدا دا زي اللي قاصد يعمل كدا
أول ما قفلت الباب بتاعنا ونازله سمعت الباب تحت بيتفتح وشوفنا المنظر ده لأ وقعد ينادي على البنت وكانت عاوزه تدخل لولا اني اللي مسكت ايدها وطلعنا على طول طب لو اني مش معاها بقى كان حصل ايه اني مبقتش مأمنه على نفسي هنا ولا على عيالي من البلاوي اللي الواحد بيسمعها وكمان ابن عمك ده مش مظبوط وأنت بترجع البيت متأخر وهو بيكون جاي عينيه دي حمرا وماشي كدا بيتمطوح مش مظبوط ابدا.
حامد : اقفلي عليكي بابك وملكيش دعوة بيه.
زوجته : هو ده بقى الحل اللي عندك ؟!
حامد : ايوه.. لحد ما اشوف هعمل ايه وبطلي زن كتير في الموضوع ده اني هلاقيها منك ولا من الداهيه اللي قاعدة لنا تحت ده.
زوجته : خلاص خلاص هو أنت هتسيبه وتمسك فيه اني؟!
_______
في شقة حازم.
ندى : قليل الأدب طبعا ازاي يقول لعمه كدا كنت تدخلت واديتله كلمتين فهمته إن دا عمه وعيب يتكلم معاه كدا.
حازم : ميتفعش أتدخل يا ندى هيقول اني جاي أقف في صف أخوه علشان بنتي وتحصل مشاكل خليني بعيد احسن لو الموضوع بعيد عن القسمة والورث كنت اتكلمت.
ندى : أنت هتتكلم في الأصول والاحترام يا حازم ماله ده ومال الورث بتاعهم؟!
حازم : علشان الموضوع كدا فعلا يا ندى.
ندى : وبعدين كريم ابن عمك عمل ايه معاه؟
حازم : هيعمل ايه معاه يعني أنا قابلته وهو بيركب العربية وماشي وكريم جوز بنتك عمال يتحايل عليه يقعد فهمت منه بقى اللى حصل بس مارضيتش أتدخل هو عمهم في الأخر وأهو شوية زعل وهيروحوا لحالهم.
ندى : كريم ابن عمي دا طيب قوي عاوز يحل مشاكل الناس كلها المشكلة بقى إنه في الأخر مبيتشكرش بس عارف أحسن إن الواد معتز ده موافقش أنا برضو من رأيي إنه ميشتريش الشقة مش لازماه في حاجة يستفيد بفلوسه في حاجة تانية أحسن.
حازم : زين سافر وفريدة عامله مناحه في البيت كريم بيقولي.
ندى : اه مش مبطله عياط قعدت اهدي فيها مفيش فايدة.
حازم : معرفش عامله في نفسها كدا ليه هو يعني ابنها أول اللي سافروا؟!
______
في شقة مراد.
مريم : حاضر جايه.
مراد بياخد شاور : مين يا مريم؟
مريم : معرفش لسه هشوف.
بتلبس الاسدال وتفتح الباب : مازن.. اتفضل ادخل.
مازن : سلام عليكم.. ازيك يا مريم؟
مريم : وعليكم السلام.. أنا تمام ادخل
يا مازن واقف ليه؟
مازن : دي هدية كدا بسيطة علشانك.
مريم : يا حبيبي ومكلف نفسك ليه بس.
مازن : دا أقل حاجة يا مريم.. مراد هنا؟
مريم : اه جوه اقعد استريح.
مازن بيقعد : شوفت العربية راكنه تحت بس مكنتش متأكد إنها عربيته.
مريم : اه لسه جاي من شوية هعملك حاجة تشربها.
مازن : معلش يا مريم أصل مستعجل.
مريم : هو أنت على طول مستعجل كدا اقعد معانا ربع ساعة حتى أهو مراد جه أهو.
مراد بيسلم ويحضن مازن : اهلااااا ازيك يا دكتور وحشتنا يا راجل.
مازن : حبيبي وأنتم كمان وحشني اخبارك ايه؟
مراد : أنا تمام.. الحمد لله
طمني عليك.
مازن : بخير يا حبيبي تعالي يا مريم رايحه فين؟مراد : هتروح فين يعني هتعمل حاجة نشربها ولا جهزي العشا بقى يا مريم هنتعشا مع بعض.
مازن : لا عشا ايه أنا مش هقعد كل ده مسافر الساعة سته.
مريم جات بسرعة : مسافر فين أنت لحقت؟!
مازن بابتسامة : لا مش راجع إنجلترا دلوقت مسافر الغردقة أسبوع كدا نشم فيه هوا ونغير جو.
مراد : ايه دا أنت كمان هههههههه
مازن نظر لمريم : ايه دا أنتم مسافرين قريب ولا ايه؟
مريم : أنا اتفاجئت بمراد جاي بيقولي أخد اجازة ومسافرين بكرة الغردقة.
مازن : زي المفاجأة بتاعتي أنا كمان متقولوش بقى نازلين في نفس الاوتيل..
مراد : هههههههههههه ليه أنتم نازلين فين؟
________
في منزل صديق كريم..
بينادي عليه..
زين : حاضر جاي.
نديم : في بنت عاوزاك أنا سيبتها قاعدة في الجنينة بره علشان احنا اتنين شباب قاعدين لوحدنا ومينفعش يعني ندخل بنت البيت.
زين بابتسامة : حاضر مش هتتكرر تاني.
نديم : مش من أولها كدا يعني.
زين : هو ايه؟
نديم : علقتها امتى دي؟
زين : حضرتك فاهم غلط يا عمي دي خطيبة واحد صاحبي.
نديم : ااااه طب اتفضل اطلعلها بقى قبل ما تمشي.
يخرج زين لمرام اللي كانت جايه تشوفه.
مرام : كريم لما قال لي إنك هنا من يوم أنا مصدقتش نفسي..
زين : متشكر قوي يا مرام إنك اهتميتي تسألي عني أكيد المسافة كبيرة وتعبتي وانتي جايه.
مرام : لا بالعكس أنا كنت سعيدة قوي وأنا جايه أشوفك.
زين ارتبك من كلامها : تشربي ايه؟
مرام : لا مش عاوزه.
نديم جاي بالقهوة : اتفضلوا الشاي علشان الجو برد.
مرام : شكراً.
نديم : اسمي نديم مقولتيش ليه إنك مصرية؟
مرام : أنا نص نص معرفش إنك بتتكلم عربي.
زين : مرام باباها مصري ومامتها انجليزية.
نديم : اها علشان كدا بقى بس كويس بتعرفي عربي.
مرام : يعني نص نص.
نديم بابتسامة : خلاص اسيبكم بقى تكملوا كلامكم.
مرام : أنت تعرف الراجل دا كويس؟
زين : اه دا عمي نديم صاحب بابي.
مرام : راجل طيب.
زين : قوي.
مرام : المهم بقى كريم قال لي إنك هنا جيت اشوفك مفاجأة صح؟
زين : اه طبعا مفاجأة بالنسبة لي هو كريم مجاش معاكي ليه؟
مرام : كريم عنده شغل المفاجأة كانت حلوة ولا لأ؟
زين : اشربي الشاي بتاعك.
مرام : الكيك دا أنت اللي عامله؟
زين : أنا!
لأ طبعا معرفش عمي نديم اللي عامله ولا دا جاهز.
مرام : ايه جاهز ده حد اسمه جاهز عمله؟
زين : لأ جاهز دا جاي من بره يعني متعملش في البيت.
مرام : ااااه كويس أنت تعلمني عربي كريم مش بيعرف كتير في الكلام دا عاوزه اتكلم كويس علشان أنا أنزل مصر قريب.
زين : بجد؟
تشرفي وتنورني.
مرام : أنا أنور ؟!
زين : دي حاجة حلوة (compliment)
مجاملة.
مرام : اااه زين You are very beautiful
(أنت جميل قوي)
خجل زين منها وحاول يتهرب من نظراتها ليه.
زين : اشربي الشاي.
مرام : جود.. حلو قوي عم نديم دا طلع شيف كويس.
زين : شيف علشان عمل شاي هههههه
_______
نكمل الحلقة الجايه.