تكملة باقي حلقات الجزء الرابع من أنت قلبي

الجزء الرابع /الحلقة ١٢٩

#أنت_قلبي٤
________
الحلقة ١٢٩

في مركز العلاج الطبيعي..
مجدي : رافعه قضية كمان!
علي : ما أنا اتفاجئت زيك كدا لما عمي مجدي كلمني مش عارف الست دي عاوزه ايه؟
يخبط مجدي على دماغه.
علي : مجدي قول لي بصراحة أنت روحت عندها البيت؟
مجدي : روحت عندها البيت ايه بس يا علي أنت كمان؟
علي : امال ليه بتتهمك بالاتهام البشع ده؟!
مجدي : أنا كدا معنديش مشكلة واحدة بس
أول مشكلة انكل هشام لو عرف وزينة هتطربقها فوق دماغي دا غير إن الست دي وتشهيرها بيه مصيبة ليه في شغلي ووسط العيله وصحابي و... بُص أنا مبقتش عارف أفكر اللي مسيطر عليه دلوقت وبفكر فيه اني اروح اجيبها من شعرها وافضحها في الدنيا كلها واعرفهم إنها مش بس كدابه دي كمان بجحه وقليلة الأدب.
علي : مقدمه الصور اللي متصورينها في عيد الميلاد بتاع حضرتك ودا طبعا هيبقى دليل إن في حاجة ما بينكم ما هو مش طبيعي لما يكون اللي بينكم مجرد شغل إنها تعملك عيد ميلاد وتكلفه التكلفه دي وتهاديك كمان وحضرتك باين إنك كنت مبسوط.
مجدي : دا أنت مستفز يا أخي وعاوز...
علي : عاوز ايه؟
هتضربني ولا ايه؟!
مجدي : امشي يا علي  علشان أنا مش طايق نفسي وممكن ارتكب جريمة دلوقت.
علي : طب اهدا بس واطمن هي معهاش دليل إن في حاجة بينكم أصلا غير شوية صور ودي مش دليل إن حصل بينكم حاجة.
مجدي : أنت بتقول حاجة وعكسها على فكرة بس
هي متقدرش تثبت دا أصلا لكن هي معندهاش مانع تشوشر على نفسها عادي المشكلة عندي أنا اللي هروح في ستين داهيه من ورا الحوار الخايب ده هقول ايه لمراتي ما هو لو معرفتش مني هتعرف من بره دا غير إن انكل هشام مش هيعدي الموضوع ده ولو قولت ايه مش هيصدقني وهيقول اكيد إن مفيش واحدة تسوء سمعتها بالشكل ده.
علي : أنا بس مستغرب اصرار الست دي إنها توقعك في المشاكل حتى لو شوهت سمعتها اصرار عجيب وغريب ليه كل ده معقول حبتك علشان كدا بتعمل كل دا بس دي بتضر نفسها وأنت عمرك ما هتحبها بطريقتها دي.. لإنك أكيد كرهتها دلوقت.
مجدي : أنا عمري ما حبتها اصلا أنت بتقول ايه؟
علي : بس نيتك مكانتش كويسه من الأول يا مجدي اعترف بده وحظك بقى وقعك في واحدة مش هاممها أي حاجة خالص علشان تفوق.
مجدي : دا وقت نصايح يعني قولي اخرج من الورطة دي ازاي ومن غير ما زينة تعرف.
علي : مش أنت متأكد من نفسك؟
مجدي : طبعا.
علي : خلاص يبقى مشكلتك مع زينة إنها ممكن تشك فيك.
مجدي : ممكن ايه!.. دا أكيد هتشك فيه.
علي : خلاص يبقى يا حبيبي تقولها قبل ما تعرف من بره لإنها لو عرفت من بره مش هتصدقك وتقولك لما أنت برئ مجتش قولتلي ليه وقتها زي حوار إيصالات الأمانة كدا.
مجدي : يعني خايف تعرف أقوم أنا اللي أقول لها؟!
علي : سبق أنت قبل ما تعرف من حد تاني لإن الست دي ممكن تبعت لها صور مفبركه أو شات بينكم في كلام من اياه طبعا أنت فاهم ووقتها هتبقى الجريمة لابساك ومش هتقدر تدافع عن نفسك يبقى تتشجع كدا وتقولها على طول.
مجدي : أنت شايف كدا؟
علي : مفيش حل غير كدا وقوفها جنبك هيفرق كتير معاك في الخروج من المحنه دي صدقني.
مجدي : كلامك حلو ومقنع بس التنفيذ صعب.
علي : مش صعب أنت بس اتشجع صدقني أنا حاسس انها المرة دي هتصدقك وتوقف جنبك.
مجدي : تفتكر يا علي؟
علي : طالما مظلوم يبقى اتفائل خير هتعدي صدقني..
مجدي : ادعيلي يا علي أنا خلاص توبت.
علي : اهي دي بقى الفايدة اللي نخرج بيها من كل ده.
مجدي : هتشجع واقولها بس أنت خليك واقف تحت عند البوابة.
علي : ليه؟
مجدي : علشان زينة لو حبت تمشي تمنعها.
علي : هههههههههههه متقلقش مش هيحصل.
مجدي : أنت بتضحك على ايه دلوقت وأنا متورط الورطه السودة دي.
علي : هههههههههههه فرحان فيك.
مجدي : طب امشي ياله من هنا.
علي : هههههههههههه
مجدي : معندكش دم أنا دقات قلبي سريعة ومرعوب وأنت عمال تضحك يا غلس يا رخم غور بقى.
علي : حاضر حاضر بس هدي نفسك هههههه معرفش  ليه قالبه معايا بضحك هههههههه بجد هموت هههههه
نظر له مجدي بغضب.
علي : طب أنا ماشي.. سلام.
_________
في فيلا آسر..
يوسف : اوعي بقى سيبيني.. يا مامي... مامي.
تخرج مليكة من المطبخ بسرعة : ايه يا يوسف بتزعق ليه.. سيبيه يا ملك قفشه فيه كدا ليه؟
ملك : ابنك بيعلي صوته وكمان ضرب جودي.
يوسف : أنا مضربتهاش سليم قالي احدف الكورة حدفتها جات حلا بتجري هي وجودي فالكورة جات فيهم.
ملك : لأ أنت نشت على جودي أنا شيفاك.
مليكة : أكيد ميقصدش يا ملك سيبيه بقى.
ملك : ماشي هسيبك بس عارف لو عملتها تاني هيحصلك ايه.
تركها يوسف وخرج بره.
سهر : فيه ايه يا بنات مالكم؟
مليكة : انتي ليه يا ملك دايماً تتخانقي مع يوسف دا عيل صغير.
ملك : عيل صغير ايه يا مليكة دا عنده عشر سنين.
سهر : برضو صغير.. ايه الحكاية بقى قولولي؟
كانت مليكة خرجت ليوسف اللي كان قاعد على البسين.
مليكة : قاعد لوحدك ليه؟
يوسف : كدا أحسن مش عاوز اقعد مع حد مامي يلا نمشي أنا عاوز أروح اقعد في بيتنا.
مليكة : خالتو كانت بتهزر معاك.
يوسف : لأ خالتو مبتحبنيش.
ملك : مين بقى اللى قال لك الكلام ده؟!
التفتت مليكة ويوسف لملك اللي كانت واقفه وراهم.
ملك : مين قال لك الكلام دا يا يوسف في واحدة برضو مبتحبش ابنها؟
وقعدت جنبه وحاوطته بذراعها : طب لو محبتكش هحب مين ها قولي؟
أنا بس بضايق من شقاوتك زي مامي بالظبط.
يوسف : لأ مامي مبتقعدش تزعقلي كتير كدا وكمان مسكتيني جامد من ايدي ووجعتني.
ملك تُقبل يده : خلاص متزعلش حقك عليه.
يوسف : مامي يلا نمشي بقى.
ملك : ما خلاص بقى مش صالحتك وبعدين أنت مالك ومال مامتك هي قاعدة في بيتها.
يوسف : لأ دا مش بيتنا
بيتنا عند بابي.
ملك نظرت لمليكة : أقوله ايه دا بقى دماغه ناشفة زي دماغ أ... ولا بلاش.
مليكة : خلاص يا يوسف خالتو صالحتك وباست ايدك كمان.
ملك : اه علشان بس يفضل فاكرها أنا مبعملش دا مع أي حد بس علشان أنا بحبك هبوس كمان خدودك دي..
يوسف : آي انتي بتعضيني.
مليكة : هههههههههههه
ملك : تعال هنا رايح فين مش هسيبك.
كانت ملك بتجري ورا يوسف قام جري علشان يهرب منها.
سهر : حاسبي يا بنتي هتوقعي.
مليكة : هههههههههههه ياريت توقع في البسين علشان تاخد شاور في الهواء الطلق ده.
سهر : هههههههههههه لا يا مليكة بلاش الجو برد.
_______
في شقة علاء..
فريدة بصوت ناعس : ايه يا كريم مبتنامش ليه؟
كريم : هنام أهو يا فريدة.. انتي عامله ايه دلوقت؟
فريدة : الحمد لله.
كريم : اقيسلك السكر تاني؟
فريدة : لأ طالما حاسه اني كويسه.
كريم : طيب تصبحي على خير.
فريدة : كريم.
كريم : نعم.
فريدة : احنا هنقعد كام يوم؟
التفت لها ونظر لفريدة من غير ما يتكلم.
فريدة : أنا مقصدش حاجة بس كنت بشوف هنمشي امتى يعني.
كريم : كام يوم كدا يا فريدة.
فريدة : أنا آسفة لو سؤالي ضايقك.
كريم : لا مفيش حاجة تصبحي على خير.
فريدة : وأنت من أهله.
____
خارج الغرفة.. في الصالة.
جميلة : لا يا زين أنت بصتلي بصه وحشه قوي وكإني أنا اللي قولت له يجي هو أنا مالي اصلا بالموضوع ده؟
زين : أنا مبصتلكيش يا جميلة انتي اللي عاوزه تزعلي براحتك.
جميلة : يعني لما ازعل من نظراتك ليه وقتها ابقى غلطانه؟!
زين : لأ مش غلطانه بس أنا بصتلك عادي يعني معرفش ايه اللي فيها؟!
جميلة : أنت فاهم كويس قوي بس مش عاوز تقول اللي جواك مفكرني مش فاهمه.
زين : يووووه انتي دماغك دي ايه فاضية للدرجة دي مش حاسه بالظروف اللي احنا فيها؟!
جميلة : ولما هو كدا ايه كان لازمته بقى ولا أنا اللي غلطانه دلوقت.
زين : تعرفي انتي واحدة فاضية.. روحي افتحيلك كتاب بدل ما انتي شغاله دماغك بيه.
جميلة بغضب : مين دي اللي شاغله دماغي بيه يا زين؟
زين : انتي عارفه كل حاجة بلاش تعملي نفسك مش فاهمه.
جميلة : بقى كدا طيب أنا الصبح هقول لبابي على كل اللي قولته ده.