تكملة باقي حلقات الجزء الرابع من أنت قلبي

الجزء الرابع /الحلقة ١٢٤

#أنت_قلبي٤
________
الحلقة ١٢٤

في فيلا مراد.
مراد : قاعدة لوحدك ليه؟
مريم : الولاد بيلعبوا جوه.
مراد : ايه مالك؟
مريم : منمتش بالليل كويس.
مراد : اطلعي نامي في اوضتي.
مريم : لأ مش عاوزه أنام.
مراد بيقرب وبيحاوطها بـ ايده : بقولك ايه يا مريم.
مريم بابتسامة : نعم.
مريم ص : بابي يلا شيلني واقلبني هوب.
وطلعت الصغيرة على كتفه.
مراد : وانتي مبيحلاش ليكي اللعب غير وأنا ومامي قاعدين مع بعض؟!
مريم : مراد!
مراد : ما هي حاجة تطهق.. مريم انزلي من على كتفي يلا.
مريم ص : لأ إلعب بقى.
مراد : مرة واحدة بس.
مريم ص : مرة واحدة بس.
مراد يقعدها على رقبته ويقلبها لتحت فتنزل في الأرض وتطلع تاني.

بعد شوية..
مراد : احنا ما متفقناش على كدا دي خامس مرة وانتي مبتزهقيش كفاية بقى علشان تعبت.
مريم ص : مرة واحدة بس يا بابي.
مراد : شوفتي كمان قومتي مامتك يا مريم.. مريم تعالي شوفي بنتك دي.
مريم : حاضر يا مراد بعمل الرضعة لريان وجايه.
مريم ص : بابي مش ريان كبر؟
مراد : يعني شوية.
مريم ص : خلاص يبطل يشرب لبن.
مراد : لأ انتي اللي تشربي لبن سامعه؟
مريم ص : بابي.
مراد بتنهيدة : نعم.
مريم ص : العب مرة واحدة بس.
مراد : كل مرة تقولي واحدة بس وانا رقبتي وجعتني.
مريم ص تضغط على رقبة والدها.
مراد : انتي بتعملي إيه؟
مريم ص : اسمه ايه ده؟
مراد : اللي هو ايه؟
مريم ص : اللي بعمله ده.
مراد : تقصدي مساج؟
مريم ص : اه هو المجاس ده.
مراد : هههههههه تعالي يا مريم اسمعي.
مريم : ضحكوني معاكم.
مراد : قولي يا مريوم بتعملي ايه؟
مريم ص : بعمل مجاس لبابي.
مريم : هههههههههههه شاطرة يا حبيبتي.
مراد : فيها الخير مش زي ناس.
مريم : طب اتفضل شرب ريان اللبن.
مراد يمسك ايدها : تعالي هنا رايحه فين؟
مريم : هطلع أقعد مع زينة شوية.
مراد : سيبيها زمانها نايمه.
مريم : مين قالك أنت طلعت شوفتها؟
مراد : لأ بس بقول يعني تلاقيها نايمه دلوقت اقعدي شربي الأستاذ دا اللبن.
مريم : طب أنت رايح فين؟
مراد : راجع الشغل.
مريم ص : شغل شغل هو كل يوم شغل؟!
مراد : لما يجي جدو عاوزك تقعدي جنبه تقوليله الكلام ده.
مريم : هههههههههههه أنت بتحرض بنتك على إيه؟!
مراد بتنهيدة : عاوزين حاجة؟
مريم : لا يا حبيبي سلامتك.
مريم ص : اه أنا عاوزه.
مراد : عاوزه ايه؟
مريم ص : عاوزه اجي معاك مش جدو هناك؟
مراد : ايوه هناك عاوزه جدو في ايه؟
مريم ص : اروح ألعب معاه واساعده في الشغل.
مراد : هههههههههههه لا خليكي مستريحه مش عاوزين نتعبك.. سلام.
_________
في شقة علاء.
فريدة : خلااااص مش قادرة.
ندى : قومي يا فريدة بطلي دلع نشفي الأرضية دي.
فريدة : مش قادرة يا ندى أنا روقت الأوض والمطبخ كملي جميلك بقى ونشفي الأرض.. جميلة.
ندى : سيبي جميلة دلوقت وقومي يلا.
جميلة : نعم يا مامي.
فريدة : هاتيلي يا بنتي بوق مياه.
جميلة : بوق واحد؟
ندى : هههههههههههه
فريدة : انتي اتعلمتي الخفه والظرافة دي من طنط ندى صح؟
ندى : هههههههههههه احترميني قدام العيال.
فريدة : عيال!
وبعدين ما هي اتعدت منك يا حبيبتي هاتيلي يا بنتي كوباية مياه.
جميلة : حاضر.. بس فاضية ولا مليانه؟
نظرت فريدة لندى.
ندى : وأنا مالي منك لبنتك يا حبيبتي مليش دعوة.
فريدة : أنا هقوم اجيب لنفسي مش عاوزه حاجة من حد.
جميلة : لأ أهو اتفضلي.
فريدة : بلاش ظرافة ماشي؟
جميلة : ماشي.. بس الزرافة في جنينة الحيوانات.
ندى : هههههههههههه
فريدة نظرت لندى.
ندى : خير أنا مش عارفه عماله اضحك كدا ليه.
جميلة : زي مامي كل أما تضحك تخاف.. هو الناس ليه بتخاف تضحك بجد؟!
نظرت ندى لفريدة.
فريدة : حد يقومني علشان نخلص قبل ما يجوا.
جميلة : بابي جه.
فريدة : ايه!
جميلة : اهو بيركن العربية تحت.
فريدة : طب بسرعة بقى يا ندى نشفي الأرض.
ندى : حاضر.. ما انتي قعدتي تدلعي وتضيعي في الوقت.
فريدة : يعني بعد كل اللي عملته ده وكنت بتدلع؟!
ندى : اخلصي يا فريدة.
فريدة : هاتي الاسدال اللي متعلق عندك ده يا جميلة.
جميلة : حاضر.
______
في فيلا عُمر.
نورهان : تعتذري ليه أنا ليه روحي اعتذري لخالك اللي اتهمتيه ظلم ودافعتي عن المجرم وبررتي له قتل خالك ولا روحي اعتذري لـ ابن خالك وقوليله باباك هو اللي غلطان القاتل كان بيدافع عن نفسه بس لو كل دول سامحوكي في أموات لسه هياخدوا حقهم منك.
مايا : ليه القسوة دي يا مامي؟!
نورهان : أنا!
انتي اللي بتقولي ليه الكلام ده.. يعني أنا اللي قسيت عليكي لما قعدت اضغط على جرحك وادوس عليه بكل قوتي أنا اللي نهشت لحم ناس ميته وطعنت في أعراضهم تعرفي ايه انتي على اللي حصل زمان علشان تقولي كلام زي ده كنتي موجودة وقتها وشوفتي وسمعتي بودك كل ده ولا كلمتين سمعتيهم من ابن القاتل اللي بيحاول يبرأ والده وانتي بمنتهى الجحود سمعتي له وصدقتي صدقتي قاتل بيقول أي كلام يبرأ بيه نفسه ورفضتي تصدقي أهل اللي اتقتل اللي اتقتل ابنهم مرتين يوم ما مات وتاني مرة يوم ما اتحكم على القاتل بكام سنة وخرج بعدها يعيش حياته عادي يحب ويتجوز ويبقى عنده طفل يربيه ويكبره ويجوزه وأنا ابن اخويا يعيش عمره كله يتيم واللي يربيه عمه مش باباه أكيد انتي مش هتحسي بكل ده علشان معشتهوش جايه تقولي أنا آسفة يا مامي كدا بكل بساطه والمفروض أنا اسامحك وانسى كل اللي قولتيه!
مايا : مع حضرتك في كل اللي قولتيه بس إيه الحل دلوقت هتفضلي كدا زعلانه مني؟
نورهان : ايوه.. لحد ما قلبي يصفى من ناحيتك.
مايا : امتى يعني؟
نورهان : معرفش بس اللي عاوزاكي تعرفيه إن معنديش أغلى من اخواتي واللي يمسهم بيمسني أنا وكلامك وتلميحاتك اللي كانت فيها نهش لعرض خالتك دي عمري ما هنساها غلطت وعد الوحيدة إنها حبت البني آدم ده لكن عمرها ما راحت معاه أي مكان وكان لازم يتحاسب على اللي عمله قتل وخطف دي مصيبة كفيله إنها متخرجوش من السجن طول عمره مش يخرج ويبقى جوز عمة ولادي كمان انتي مدركه اللي أنا فيه العمر دا كله؟!
مايا : أنا آسفة يا مامي.
نورهان : مش هقبل أسفك اتفضلي امشي وسيبيني لوحدي.
______
في التليفون.. 📞
سيف : أنا بخير أخبار حضرتك ايه؟
هشام : أنا تمام ايه مش عاوز تيجي نشوفك ولا ايه؟
سيف : اجي لحضرتك طبعا يا دكتور هشام دا شيء يشرفني.
هشام : طب مستنيك بكرة في الشركة الساعة حداشر صباحًا فاضي بقى ولا مشغول؟
سيف : لا حاضر اجيلك في أي وقت.
هشام : تمام وأنا منتظرك.. سلام عليكم.
سيف : وعليكم السلام.
وقفل سيف مع هشام.