تكملة باقي حلقات الجزء الرابع من أنت قلبي

الجزء الرابع /الحلقة ١٢٢

#أنت_قلبي٤
_________
الحلقة ١٢٢

في شقة حازم.
ندى : رايحه فين يا فريدة؟
فريدة : مروحه يا ندى.
ندى : مروحه فين بس باتي والصبح ابقي امشي.
فريدة : لا معلش جميلة عندها مدرسة الصبح.
ندى : وايه يعني يوم تغيبه ميجراش حاجة.
فريدة : مش هتوافق تبات
يلا يا زين.
زين : يلا يا مامي ما أنا أهو مستني.
ندى : ما تبات يا ابني هيجرا إيه يعني؟!
زين : هبقى اجي الصبح يا طنط.
ندى : يعني هو المهم متباتوش هنا وخلاص على فكرة دا بيتكم برضو.
زين بابتسامة : ما أنا عارف.
فريدة : عاوزه حاجة يا ندى تصبحي على خير.
________
في شقة هشام..
مراد : ها كنتي بتناديني ليه عاوزه حاجة؟
مريم : شوف النونو.
مراد : اه جميل يا مريم ما أنا شوفته يا حبيبتي.
مريم : مش عارفه الواحد لما بيشوف بيبيهات نفسه بتتفتح.
مراد : بتتفتح ازاي يعني عارفه لو كان اللي في بالي هزعلك.
وتركها وراح قعد مع أخواته.

ليلى : ايه يا مريم واقفه لوحدك ليه؟
مريم : أبدًا يا ليلى أنا قولت اشيل عبدالله شوية علشان كان بيعيط.
ليلى : امال فين ياسمين؟
ياسمين : أنا هو.. هاتي يا مريم معلش اتأخرت عليك يا حبيبي.
وتاخد الولد من مريم.
ليلى : ما تقعدي بقى محبكش المطبخ يعني دلوقت وبعدين يا بنتي انتي مش مفروض تعبانه
استريحي يا ياسمين أنا هدخل أساعد طنط وفاء.

بعد شوية..
هشام(الابن) : يلا يا جماعة اتفضلوا اتفضل يا عمي.
يقوم عمار معاهم.
هشام (الأب) : اتفضل هنا يا أستاذ عمار.
عمار : دايمًا عامر يا دكتور هشام.
هشام (الأب) : البيت بيتك احنا ضيوف هههههه
هشام (الابن) : ازاي بقى هو احنا لنا مكان هنا من غيرك يا بابي اتفضل يا عمي.
عمار : لا هقعد هنا.
هشام (الأب) : يا راجل اقعد هنا جنبي الستات لهم سفرة تانية متقلقش.
عمار بابتسامة : لا بس علشان الولاد ياخدوا راحتهم.
شادي : اتفضل يا عمي احنا كل واحد فينا حجز مكانه هههههه اتبقى بقى المكان اللي جنب بابي اتفضل استريح.
بيقعد عمار ويجي مراد يقعد وياخد ريان على رجله.
شادي : ليلى خلي تيم معاكي وهاتي يزيد يقعد جنبي.
ليلى : يزيد روح اقعد جنب بابي.
يزيد : حاضر.
شادي : اقعد يا عبدالرحمن.
عبدالرحمن : ماشي بس هات يمان هنا جنبي.
هشام(الابن) : لأ سيبه جنبي واقعد بقى علشان كلنا واقعين من الجوع هههههههه
أمل : هشام هو الأستاذ مجدي مشي؟
هشام(الأب) : مسكت فيه يقعد مرضيش أبدًا... يلا
بسم الله..

ياسمين : ايه يا مريم مبتاكليش ليه هاتي مريم هنا جنب ريتاج.
مريم : لا سيبيها يا ياسمين.
أمل : منى تعالي هنا يا حبيبتي جنبي.
ياسمين : محتاره تقعد فين.
منى : أي مكان يا ياسمين.. خلاص هقعد هنا.
ياسمين : ليلى أكلي تيم.
ليلى : ياريت بس مبيرضاش عاوز ياكل لوحده.

مراد : أكلت.. خلاص روح لمامي.
هشام(الأب) : سيبه يا ابني علشان تعرف تاكل تعال يا ريان هنا جنبي.
مراد : سيبه يلعب يا بابي هو أكل خلاص.
هشام(الأب) : لا خلاص سيبه معايا.
_______
في شقة سيف.
مليكة : يعني ايه؟
سيف : زي ما سمعتي يا مليكة.
مليكة : القضية دي بقى هتقعد كتير ولا هيتحكم فيها امتى؟
سيف : معرفش المحامي شغال في القضية وقال لي هيبقى يكلمني يقول لي الأخبار أول بـ أول.
مليكة : طب وبعدين مش كنت بتفكر لما تاخد كل حقوقك من الشركة تعمل مشروع هنا؟
سيف : اعمل مشروع ايه بقى دلوقت مش لما اخد حقوقي الأول يا مليكة.
مليكة : طب فكرت هتعمل إيه الفترة دي عبال ما يتحكم في القضية اللي بتقول عليها دي؟
سيف : بفكر ارجع تاني اشتغل في شركة دكتور هشام بس مش عارف ارجع ازاي أو هو هيقبلني عنده تاني ولا لأ.
مليكة : ممكن مامي تكمل طنط أمل و...
يقاطعها سيف بغضب : نعم!
مامتك تكلم مين؟
مليكة ملكيش دعوة بالموضوع ده.
مليكة : طب خلاص بابي يكلم انكل هشام هو مش هيقول حاجة.
سيف : انتي قاصده تستفزيني صح؟!
مليكة : خلاص يا سيف براحتك أنا قولت اساعدك.
سيف : اطفي النور دا علشان أنام.
مليكة : حاضر.
سيف : رايحه فين؟
مليكة : خارجة علشان اسيبك تنام براحتك.
سيف : يحيى هينام فين؟
مليكة : هاخده انيمه في اوضة يوسف.
سيف : سيبيه نايم هنا.
مليكة : بيصحى كتير وأنت بتضايق.
سيف : خليه يا مليكة امال عاوزه تنامي في اوضة يوسف صح؟
مليكة : مش علشان اسيبك براحتك.
سيف : أنتي فاهمه بتقولي ايه يعني ابقى لسه جاي من السفر الليله وانتي رايحه تنامي في اوضة ابنك.
مليكة : أنا مش عارفه احلها ازاي معاك شوف أنت عاوز ايه يا سيف.
سيف : روحي يا مليكة نامي مكان ما انتي عاوزه.
مليكة : خلاص هجيب يحيى واجي بس متضايقش بقى منه.
سيف : انتي اصلا قفلتيني حسستيني اني مش فارق معاكي.
مليكة : ازاي بس يا سيف أنا بدور على راحتك وبجد مش عارفه ازاي ارضيك.
سيف : خلاص هاتي يحيى وتعالي.
مليكة بابتسامة : حاضر.
_____
في شقة مراد.
مراد : مش عارف أنا زعلتك في ايه.. مالك يا مريم؟
مريم : مفيش.
مراد : يعني قاعدة زعلانه ومبوزه في وشي وتقولي مفيش!
مريم : ايوه علشان قولتلي هزعلك.
مراد : أنا!
امتى ده؟
مريم : لما قولت لك إني وحشني قوي البيبهات قولت هزعلك.
مراد : عادي يعني أنا كنت بتكلم بهزار.
مريم : لأ مكانش هزار.
مراد : طب تعالي بقى اقعدي وخلينا نتكلم بصراحة.
مريم : اتفضل.
مراد : بيبي ايه يا مريم دلوقت.. ها؟
انتي يعني مستعده للموضوع دا دلوقت ولا حتى بعدين عندنا مريم وريان بالدنيا كلها ليه بقى نجيب طفل تالت يتعبنا أكتر أنا مصدقت يا حبيبتي ريان كبر شوية وانتي عارفه أصلا إنهم جم ورا بعض ملحقناش نشم نفسنا.
مريم : على فكرة أنا كنت بهزر عادي ردك هو اللي كان غير متوقع.
مراد : بتهزري معايا في الموضوع دا ليه وانتي عارفه إن طالع عيني أنا وانتي علشان نقدر نربي العيال دي دا احنا قعدنا سنتين عند بابي لحد بس ما مريم تكبر وتبدأ تعتمد على نفسها شوية وكمان ريان يكون كبر شوية ونرتاح من السهر والزن طول الليل.
مريم : هزار يا مراد قولتلك.
مراد : خلاص متزعليش حقك عليه أنا كمان مكانش قصدي ازعلك.
مريم : خلاص مش زعلانه.
مراد بابتسامة : طب اطفي  النور اللي جنبك.
مريم بابتسامة : حاضر.
______
في شقة علاء.
قاعد كريم على سجادة الصلاة ومن خلفه حازم وأنس وعلاء وأولاده
رفع كريم يده بالدعاء بعدها فاضت عيناه بالبكاء.
علاء طبطب عليه فالتفت كريم له بابتسامة وهو بيمسح دموعه واكمل الدعاء.