سبحان الله وبحمده.. سبحان الله العظيم 🥀...
انا اسفه النت كان فاصل
وهحاول اعوضكم ببارت طويل🥺👇...
في شقه محمود...
محمود بحزن: اللي انكسر عمره ماهيتصلح ياساره، انا مش هطلقك عشان العشره اللي بينا ياساره، لكن من دلوقتي انتي مراتي قدام الناس وبس وتعيشي لواحدك في غرفه ملك وملك هتعقد مع عشق في غرفتها .
سارة باعتراض: لكن ياسي محمود..
محمود ببرود: ده اخر كلام عندى ياتنفذيه يااطلقك واخلص.
ساره بحزن: حاضر كلامك علي رأسي من فوق.
عشق بجديه: بابا انا عايزاك فى حاجه مهم يعني وتنظر لسارة الواقفه.
محمود ببرود: لسارة هتفضلي واقف عندك كتير، عايز اتكلم مع بنتي في حاجه مهمه.
سارة بحزن: انا هخرج ولو احتاجت حاجه، نادي عليا ياسي محمود.
محمود بتجاهل: اقعدي يابنتي واحكيلي، ايه الموضوع اللي شاغل بالك.
تخرج ساره للصاله تجلس علي الكرسي تقول: بقا دي اخرتها ياسي محمود، هنام لوحدي، انا يعني كنت عملت ايه، ربيت بنتك وكبرتها وخليتها ست بيت....
وفجا يفتح باب الشقه وتدخل ملك مع عمر....
سارة بغيظ: اخيرا شرفتي.
ملك بجديه: خير ياماما انا استاذنت من بابا محمود وبعدين كنت مع جوزي عمر.
ساره بغيظ جوزي ياذبالة انا غلطانه اني ماعرفت اربيك، اخريتها بتحملي من الحرام، وفرحانه انك اتجوزي، ده كويس انه قبل يتستر عليكي بعد اللي حصل،وبعد ده كله بتخربي بيتي ماشي ياملك، انا كنت دايما بعمل ده كله ليه مش عشانك، بعد ماابوكي مات، مين اللي سال فينا و...
ملك بدموع: لو سمحتي ياماما، انتي عملتي كل ده عشان بتغيري من طنط سعاد الله يرحمها مش عشاني.
عمر بحب:خدي المنديل ده و امسحي دموعك ياملك، لو سمحتي ياطنط ملك دلوقتي مراتي، ومش هسمح لك تهنيها ولو استمريني علي كده، هاخدها معايا.
سارة بسخريه: طبعا ليك حق تتشرط، ماهي الموكوسه اللي ماعرفت تحافظ علي نفسها هي....
عمر بغضب: انا مش هسمح لك تكملي كلامك، يالله ياملك لمي هدومك وتعالي معايا.
فجأ يخرج محمود وخلفه عشق...
محمود بجديه: عمر.. اتفضل اقعد يابني واقف ليه؟.
وبعدها ينظر لساره ويقول: صوتك كان عالي ليه ياساره، مش عيب جوز بنتك واقف كده، مش المفروض ترحبي بيه وتعزميه علي حاجه.
عمر بحب: شكرا ياعمي، لكن انا ناوي اخد مراتي معايا
محمود بصدمه ليه يابني، احنا اتفقنا هنعمل فرح علي الضيق وكل الناس هتعرف بجواز ملك.
عمر بحزن: انا متفق معاك ياعمي، لكن والدة ملك من ساعه مادخلنا، بتتكلم مع ملك بطريقه مش كويسه وانا خايف علي مراتي.
ساره بسرعه: انا...
محمود بصوت عالي: قومي ياساره اعملي حاجه نشربها
ساره بغيظ: حاضر وترحل للمطبخ.
محمود بحب: حقك عليا يابني، سارة ام برضو، وانت عارف اللي ملك عملته مش سهل برضو، ولازم تعذرها، اما ملك هتعيش هنا في راعيتي لحد مااسلمها لك يوم فرحها.
عمر بحب: حاضر ياعمي، انا كده اطمنت علي ملك، ولازم اقوم اروح، تصبحوا على خير.
محمود بحب: وانت من اهله يابني.
ويرحل عمر..
محمود بحب لملك: ما تاخدي علي كلام والدتك يابنتي، انتي عارفه طبعها كويس.
ملك بحزن: انا عارفه اني غلط، لكن كنت عايزها تقف جنبي انا محتاجها الفترة دي جنبي يابابا.
محمود بحنان: انا معاكي واختك عشق معاكي ومن النهارده هتعقدي مع عشق في نفس الغرفه، عشان تراعيك وتاخد بالها منك.
ملك بحرج: يعني بلاش اتعبها معايا يابابا.
عشق بحب: ولا تعب ولا حاجه، والف مبروك علي الجواز والبيبي ويارب تقومي بالسلامه، وطبعا انا مش هسيبك الا ماتولدي انشاء الله وكمان هساعدك في تربيه البيبي ههه.
ملك بحزن: بعد كل اللي عملته ماما معاكي وانا كمان، هتاخدي بالك مني و...
عشق بحب: احنا اخوات ياملك، يالله ادخلي ارتاحي وانا هحصلك.
ملك بحب: انا لو خلفت بنت هسميها عشق علي اسمك، ونفسي تكون جميله وطيبه زيك.
عشق بفرحه: هتسميها علي اسمي، بس ده كتير و..
ملك: ولا كتير ولا حاجه، انا هدخل ارتاح، وتدخل لغرفتها تغير ملابسها وبعدها تذهب لغرفه عشق..
تاتي ساره من المطبخ حامله صنيه، فتضعها على الطاوله وتقول بسرعه: انت سيبته يمشي يامحمود وياخد البنت معاه.
محمود ببرود: بنتك جوه في غرفة عشق بنتي، يالله ياسارة ياريت تسبيني عايز اكمل كلامي مع بنتي.
سارة بغيظ لنفسها: من امتي في اسرار بينك وبين بنتك....
محمود بصوت عالي: انا قولت ايه ياسارة؟.
سارة بسرعه: حاضر انا هقوم اهو،وتقوم بسرعه وتدخل غرفة ملك بنتها وتغلق الباب خلفها وتقف خلف الباب تحاول التنصت عليهم.
محمود بجديه: وانتي رايك ايه يابنتي؟.
عشق بحيره: انا مش، عارفه يابابا، عشان كده باخد رايك في الموضوع.
محمود بحب: انا شايف انها فرصه يابنتي،وفي مجال دراستك كمان ومن رائي لازم توافقي،وانا هكون مطمن عليكي وانتي بتشتغلي مع خطيبك، اسمعني كويس ياعشق انا لما وافقت الاول علي شغلك عشان اخليكي تكتسبي خبرة يابنتي والشغل في شركه كبيره، هيكون ليكي مستقبل عن الشغل في محل.
عشق بتوتر: لكن مش عارفه هسيب الشغل ازاي، مستر مدحت انسان محترم وساعدني كتير يابابا.
محمود بحب: عادي يابنتي اتكلمي معاه بصراحه وهو اكيد هيفهم.
عشق بحب: انا هكلم زين قبل ما انام واعرفه موافقتي علي الموضوع وبكرة بعد مااتكلم مع مستر مدحت، هاورح مع زين استلم الشغل.
محمود بحب: ربنا يوفقك يابنتي، ابقي كلميني عشان اطمن عليكي.
عشق بحب: حاضر يابابا، تصبح علي خير.
محمود بحب: وانتي من اهله.
في شقه عمر...
يجلس عمر مع صديقه عادل...
عمر بجديه: انا هتصل بابا الاول وهعرفه....وفجأة يمسك الهاتف ويجري اتصال...
علي الجانب الاخر يجلس زاهر مع زيزي علي الشاطيء وفجأة يرن هاتفه..
زاهر بدهشة: غريب جدا، عمر بيتصل بيا.
زيزي بدلع: اكيد عايز منك فلوس.
زاهر : عمر عمره ماتصل بيا عشان فلوس يازيزي ودايما ببعت اي موظف عندي بالفلوس كل اول شهر.
زيزي بفضول: انت هتفضل تتكلم والتليفون بيرن يالله رد عليه وبعدها هنعرف بيتصل ليه.
يفتح زاهر الخط ويشغل الاسبيكر ويقول: اخيرا افتكرت تتصل عليا.
عمر بسخريه: انا مش عايز اتكلم معاك عشان طنط زيزي ماتزعل مني، اني قطعت عليكم رحلتكم الجميله.
زيزي بغيظ: طنط.
عمر بضحك: هي طنط زيزي سمعتني، انا اسف ياطنط، هاخد خمس دقايق من وقت رحلتكم.
زيزي بغيظ: ولا يهمك ياعمر، برضو زاهر والدك، ومن حقك تكلمه.
زاهر بقلق: خير ياعمر طالبني ليه؟.
عمر بجديه: متصل بيك عشان اعرفك اني اتجوز وكمان مراتي حامل.
زاهر بغضب: اتجوزت من ورايا وازاي حامل، انا مش فاهم حاجه.
عمر بسخريه: عادي يابابا، فيها ايه لما اتجوز، هو انا مش حقي انا كمان اتجوز ولا الجواز حرام.
زيزي بسخريه: وكمان حامل، انت مش سهل ههههه ههههه.
زاهر بغضب: استني يازيزي، عايز افهم ايه اللي حصل.
عمر بجدية: مفيش يابابا انا كنت اتجوزت عرفي وهي حملت مني، وطبعا يعني مش هرمي ابني، وقررت اتحمل المسؤليه والاول لقيت شغل و روحت طلبتها من والدها وكمان يومين هعمل الفرح وقولت لازم اعزمك علي فرحي.
زاهر بصوت عالي: انت اتجننت ياعمر هتتجوز واحده، كنت متجوزها عرفي، انا لا يمكن اوافق علي الجوازه دي، انت تتطلقها و...
عمر بعصبيه: وايه وارمي ابني مش كده، اعمل زيك، لا يابابا انا لا يمكن اتخلي عن ابني زي ماعملت معايا....
زاهر: انا يابني..
عمر بعصبيه: انت ايه؟. دي اخرت تربيتك ليا هههه اقصد تربيتي لنفسي، انت اتخليتي عني وروحت اتجوزت بدل المرة عشرة، عمرك سالت نفسك انا عايش ازاي وبعمل ايه وتعبان ولا لا، بذاكر ولا بسهر ولا بشرب، تعرف في يوم كنت تعبان وحرارتي مرتفعه، مين كان جنبي، البواب اللي طلب الدكتور ليا وههه بواب يابابا، جاي دلوقتي تحاسبني علي جوازي منها عرفي، انا السبب استغليت ظروفها وواعدتها بالجواز وكنت هتخلي عنها، لكن رجعت لنفسي وقولت اربي ابني، لاني مستحيل اكون زيك، اب مستهتر كل اللي بيربطه بابنه، الفلوس اللي بيباعتها كل اول شهر، لكن من دلوقتي لا انا مش عايز منك حاجه، واقدر اصرف علي نفسي ومراتي وابني كمان.
زاهر بحزن: انا يابني..
عمر : انا اسف يابابا انا اتصلت بيك، اعرفك مش اكتر، مع السلامه... ويغلق الخط..
زاهر بحزن: انا اب مستهتر ومهمل... عمر قفل الخط في وشي.
زيزي بدلع: انت احسن راجل انا قابلته يازاهر وابنك غلط وبيحط غلطه عليك.
زاهر بأمل: يعني عمر مش زعلان مني يازيزي.
زيزي بدلع: ولا زعلان ولا حاجه، هو لما الفلوس اللي معاه تخلص هيرجع يكلمك تاني ههه.
زاهر باقتناع: عندك حق يازيزي.
زيزي بدلع: تعال نروح الشاليه وانا انسيك كل الزعل يازهورتي.
في شقه عمر...
عادل بجدية: انت عرفت والدك، لسه والدتك.
عمر بضيق: انا مش هكلمها ياعادل، هي من امتي بتسال عليا، انت شوفت بابا عمل معايا ايه، مش ناقص اسمع نفس الاسطوانه من ماما، من بكره هنزل اشتري فستان الفرح والشبكه لملك، لازم في اقرب وقت تكون ملك في بيتي..