#أنت_قلبي٤
_________
الحلقة ١١٢
في المستشفى.
خارجة سهر من غرفة آسر تلاقي مجدي قاعد بره.
سهر : مجدي أنت هنا يا حبيبي؟
مجدي : اه يا مامي.
بتقعد بجانبه : ايه يا حبيبي قاعد لوحدك ليه هو علي مشي؟
مجدي : اه هيبات الليلة في البيت وأنا هقعد مع حضرتك بابي عامل ايه دلوقت؟
سهر : كويس يا حبيبي.. نايم دلوقت عاوز تدخل تشوفه؟
مجدي : لا خلاص بقى طالما نايم.
سهر : ايه مالك؟
مجدي : مفيش.
سهر : هي زينة جات هنا النهاردا؟
مجدي : اه
سهر سكت..
مجدي : حضرتك كنتي جوه وهي احرجت تدخل جوه علشان الدكتور كان مع بابي والاوضة كانت زحمة قوي جوه فقعدت شوية وروحت علشان رهف كانت لوحدها مع الداده.
ركنت سهر دماغها على الكرسي وغمضت عينها التفت لها مجدي لما لاقاها ساكته.
مجدي : مامي أنا من رأيي تروحي البيت تستريحي حضرتك بقالك يومين قاعدة بالشكل ده.
سهر : أنا مش تعبانه يا ابني المهم بابي يخرج من هنا بالسلامة.
مجدي يُقبل ايدها : حضرتك حنينه قوي.
سهر : ايه المناسبة؟
مجدي : هو أنا لو تعبت كدا ممكن زينة تعمل معايا كل ده؟
سهر : بعد الشر عليك ايه اللي بتقوله ده؟!
مجدي : أنا بقول مثلا يعني لو حصل لي هلاقيها كدا جنبي.
سهر : زينة حنينه وبتحبك وبعدين بلاش مثلا بتاعتك دي أنا مش ناقصه وجع قلب.
بيقرب منها ويركن دماغه على كتفها.
سهر : ايه دا بقى؟ يا ابني عاوزه أخد راحتي..
وأنا قاعدة حتى كدا مش سايبني.
مجدي : من زمان مااخدتنيش في حضنك.
سهر : مجدي فيه ايه مالك أنت ناقصك حنان ولا حاجة؟
مجدي : هههههههههههه اه
سهر : طب بلاش الهزار دا هنا الناس حوالينا.
مجدي : خلاص اركني دماغك هنا.
سهر : أركن!
مجدي : هههههههههههه
سهر : أنا هركن دماغي على الكرسي بس مش عاوزه اسمع صوت.
مجدي : طب فيه كنبه جوه ولا نجيبلك سرير.
سهر : بتهزر حضرتك.
مجدي : مبهزرش بتكلم جد.
سهر : اششش بس بقى.
مجدي بابتسامة : حاضر.
__________
هارون : اتفضل يا ابني مراتي وابنك.
محمد : متشكر يا عمي.
هارون : على ايه أنا اللي آسف على اللي حصل ده.
محمد : حصل خير بس معلش متزعلش مني لو منعت ميرا إنها تيجي هنا تاني منعا للمشاكل دي.
هارون : لا مش زعلان وأنا اللي كنت هقولك تعمل كدا أنا لما بنتي توحشني أو أحب اشوفها هجيلها بيتها اتفضل يا محمد علشان الوقت اتأخر.
بيركب محمد العربية ويدوس بنزين ويبعد عن المكان.
هارون يدخل جوه بتنهيدة قوية.
فريدة كانت في البلكونة تتأكد إن محمد أخد مراته وابنه ولا لأ.
كريم : بتعملي ايه يا فريدة عندك؟
فريدة : محمد أخد ميرا ويزن ومشيوا.
كريم : طب كويس.
فريدة : حماه تقريبا هو اللي تدخل في الموضوع هو مكانش موجود هناك وقتها ولا ايه؟
كريم : معرفش.
فريدة : هو أنت ليه يا كريم مروحتش مع ابنك وسيبته يروح لوحده للست دي؟!
كريم : اروح اتخانق مع واحدة ست يا فريدة طب دي حماته أنا بقى اروح أعمل إيه؟
فريدة : تروح توقفها عند حدها تعرفها إن مش من حقها تمنع بنتها إنها تروح مع جوزها الكلام دا لما كانت لسه في بيتها لازم تفهم الكلام دا كويس الحنيه والطبطبه في المواقف دي بتخلي الظالم مفكر إن له حق طالما صاحب الحق واقف ساكت.
كريم : وفين بقى اللى وقف ساكت دي هو عمل ايه مش راح اخد مراته وابنه ولا روح من غيرهم؟
فريدة : لا يا كريم اخدهم بس بعد ما حماه هو اللي تدخل مفروض كان يبقى لك موقف في المهزله دي.
كريم : محمد كان لازم يروح لوحده لانه صاحب الحق ولو كانت الست دي اعترضت أنا اللي كنت هروحلهم.
فريدة : لا بجد؟
طب كويس كنت فاكرك انك هتسيبه وتنام!
كريم : فيه ايه يا فريدة انتي عاوزه تتخانقي وخلاص؟!
فريدة : لا مش عاوزه اتخانق بس بصراحة معجبنيش موقفك ده.
كريم : خلاص براحتك اقفلي النور خلينا ننام.
فريدة : نام يا كريم.
وبتقفل النور وخارجة من الغرفة.
كريم : انتي مش هتيجي تنامي؟
فريدة : لأ مش نايمه نام أنت تصبح على خير.
وخرجت فريدة من الغرفة وقفلت الباب.
_________
في غرفة زينة.
أمل : وبعدين معاكي يا بنتي بقى انتي هتفضلي طول الليل كدا حاطه تيست الحمل قدامك وعماله تعيطي؟!
زينة : أعمل إيه يا مامي أنا دلوقت؟
أمل : تعملي ايه فيه ايه يا بنتي.. دا رزق وجايلك افرحي يا حبيبتي.
زينة : افرح في الظروف دي وبعدين رهف لسه صغيرة أنا معرفش حصل دا ازاي؟
نظرت لها أمل بدهشه.
زينة : أنا كنت عامله حسابي ومش في دماغي احمل خالص دلوقت قبل تلات اربع سنين لما رهف تكبر وكمان أنا نفسيا مش مستعده للحوار ده.
وقعدت تبكي.. قربت منها أمل وأخدتها في حضنها.
أمل : يعني لما تجيلنا هدية نرفضها ولا نقول..الحمد لله.
زينة : الحمد لله
بس....
أمل : بس إيه.. انتي يعني فاهمه إن الحمل دا مكانش هيحصل طالما عامله حسابك.. دا رزق ومكتوبلك هتاخديه هتاخديه.
زينة : مامي أنا ومجدي احتمال كبير منكملش مع بعض تفتكري أنا في ظروفي دي مؤهله اراعي طفلين؟
أمل : ليه يا حبيبتي بتقولي كدا هو صحيح غلط بس بابي هيشدهولك من ودانه علشان ميعملش كدا تاني.
زينة : وأنا بقى نفسيا أعيش معاه تاني ازاي؟
أمل بابتسامة : لما تقعدوا مع بعض قعدة رومانسية كدا ويقولك كلمتين حلوين هتنسي.
زينة : لأ مستحيل.
أمل : طب عيني في عينك كدا.
زينة : مامي دا حب واحدة غيري مش واحدة كمان دا ممكن يكون خمسه ولا عشرة أنا بقى كرامتي فين من كل ده؟
أمل : أنا عارفه ان اللي عمله غلط بس انتي متأكدة من موضوع إنه حبهم دول؟
زينة : مش مهم المهم إنه فكر في حد غيري.
أمل : في دي معاكي حق تزعلي مقدرش أقول غير كدا بس معلش اعتبريها غلطه ومش هتتكرر وانتي مش هتروحي معاه كدا لأ بابي هيقعد معاه وهيشد عليه جامد علشان لو اتكرر اللي حصل دا مرة تانية هيبقى فيها كلام تاني خالص بس اصبري يومين كمان نشوف انكل آسر هيخرج امتى من المستشفى.
زينة : والحمل دا اعمل فيه إيه؟
أمل : هتعملي ايه يعني؟!
زينة بتبكي : مش عارفه.
أمل : اقولك ابقى هاتي الواد ولا البنت دي اربيهم أنا ملكيش دعوة.
زينة : ايه اللي بتقوليه دا يا مامي؟!
أمل : امال أعملك إيه بس يا بنتي؟
زينة : هو حرام لو نزلت الحمل دلوقت؟
أمل : إيه اللي انتي بتقوليه ده حمل ايه اللي عاوزه تنزليه؟!
زينة : امال أعمل ايه؟
أمل : كلمي مجدي وقوليله.
زينة : اكلمه ليه هو ايه علاقته بالموضوع؟!
أمل : متأكدة إنه ملوش علاقة؟!
زينة : أنا أقصد إن الحمل دا هيتعبني أنا هو عادي بالنسبة له.
أمل : طب نامي بس دلوقت ومتفكريش في أي حاجة غير لما بابي يقعد معاه ويكلمه.
زينة بتبكي : مش هعرف أنام.
أمل : طيب أنام أنا جنبك الليلة؟
زينة : وبابي؟
أمل : هقوله هو مش هيمانع ادخلي اغسلي وشك كدا وروقي وأنا خمسة وجيالك.
زينة : حاضر.
_________
في شقة إياد.
إياد : وبعدين معاكي يا بنتي بتعيطي ليه دلوقت عاوز أفهم؟
سهر : بابي مازن مبيحبنيش وأنا بفكر أحفظ كرامتي وابعد عنه خالص.
إياد : تبعدي!
سهر ادخلي نامي دلوقت والصبح نبقى نتكلم.
سهر : محدش فيكم حاسس بيه.
إياد : محدش حاسس بيكي ازاي.. انتي يا حبيبتي اللي بتكبري المواضيع الراجل بيكلمك يسألك أخته جاتلك ولا لأ هو غلط في إيه دلوقت؟!
سهر : طول المكالمة مبيكلمنيش غير عنها مفيش غير إنه سألني كدا انتي عامله ايه انتي والبنات بس وباقي المكالمة كلام عنها.
إياد : طيب يا حبيبتي انتي مسألتهوش ليه عن اخباره؟
سهر : سألته بيكلمني باختصار.
إياد : طيب يا حبيبتي مش يمكن انتي من اسلوبك وطريقة كلامه على أخته خلتيه مش عاوز يتكلم معاكي؟
سهر : اه ما هو دا بقى اللى بتكلم فيه.
إياد : غيري طريقتك انتي يا سهر يمكن يا بنتي يرجع زي الأول ولا هو كان معاكي كدا من الأول؟
سهر : لأ.
إياد : شوفتي بقى إنك انتي اللي محتاجه تراجعي نفسك وتشوفي الغلط اللي عندك وتصلحيه يمكن تقدري ترجعيه ليكي تاني.
سهر : بابي هي عايشه مع جوزها بيسألني عليها ليه؟
إياد : شوفتي كلامك عنها عامل ازاي هو ايه علاقة إنها عايشه مع جوزها بـ إن اخوها يسأل عنها وعلى كلا يا ستي هو غلطان ابقي قوليله كلمها متسألنيش عنها وبس.
سهر : بابي دا نزلني مصر مخصوص علشانها.
إياد : سهر يا حبيبتي دي أخته مش واحدة يعرفها عليكي وبعدين انتي كنتي عايشه معاه واخته ملهاش علاقة خالص بحياتكم مجاتش شاركتك فيه مش عارف افهمك ازاي بس اللي بينكم غير اللي بينه وبين أخته اللي بينهم دم عمر ما في يوم هيبقى حاجة تانية فهماني أخته هي أخته لكن مرات الواحد ممكن في يوم ميبقاش في حاجة ما بينهم لكن الأخوة دي غصب عني وعنك هتفضل موجودة وأنا شايف إن البنت في حالها حتى مبرراتك وزعلك منها حاجات تافهه ملهاش أي سبب غير إنك مش حابه وجودها في حياة اخوها وبس كإنك اشترتيه فوقي لنفسك يا حبيبتي ويمكن كلامك الكويس عنها وإنك تحاولي تحنني قلبه على أخته إنه يسأل عليها يشوفها محتاجة حاجة في حد مزعلها ما هي برضو محتاجة لـ اخوها يا سهر زيك يا حبيبتي.
سهر : أنا عمري ما طلبت من عمار حاجة من ساعة ما اتجوز يا بابي وأنا سايباه في حاله كفاية عليه المسؤلية اللي شايلها.
إياد : طيب يا بنتي وهي بتعمل إيه مشارككي في جوزك هي اصلا مبتشوفوش انتي اللي كنتي عايشه معاه وانتي برضو السبب في إنه ينزلك مصر مفيش راجل يا بنتي يستحمل كدا أنا لو مامتك عاوزه تعمل معايا اللي بتعمليه مع جوزك ده لو بموت في التراب اللي ماشيه عليه سامعه لو بموت كدا في التراب اللي ماشيه عليه مش عاوزها أنا حد يبعدني عن اخواتي ويحاول يكرهنا في بعض وهحبه؟!
سهر : ما أنا مكرهتوش في أخته يا بابي بالعكس دا بيحبها قوي أكتر مني.
إياد : ما هو لازم يحبها يا بنتي دي أخته ومتنسيش إن والدهم متوفي من وهما صغيرين ووالدتهم لسه متوفيه من قريب وهو مش عايش معاها بقالهم قد ايه يا سهر مشفوش بعض؟
سهر : مش فاكره.
اياد : طيب يا بنتي بدل اللي عملاه في نفسك ده حاولي تبقي طبيعية كدا وتشوفي إن طبيعي يحب أخته ودا ميقللش من حبه ليكي لكن هتفضلي كدا صدقيني استحاله يعيش معاكي مفيش حاجة تجبره على كدا حتى لو بينكم أولاد راجعي نفسك يا سهر لمصلحتك واستقرار بيتك يا بنتي.
سهر : يا بابي دا...
يقاطعها إياد : شوفي يا بنتي الظاهر كدا مفيش فايدة وأنا مش هقضي الليل كله في المناهده معاكي أنا راجع من بره تعبان ومحتاج استريح وانتي بقى اعملي اللي تعمليه بس تتحملي النتيجة.. تصبحي على خير.
وخرج إياد من غرفة سهر ودخل اوضته علشان ينام.
في التليفون.. 📞
ملك : لأ بابي مش لوحده مامي ومجدي معاه.
مليكة : والدكاترة قالوا إيه؟
ملك : قالوا إن بابي هيقعد كام يوم كدا في المستشفى وبعدها هيخرج
بس يتابع بقى في المستشفى كل فترة ما تفتحي الكاميرا دي.
مليكة : معلش يا ملك أصل شكلي مش لطيف دلوقت.
ملك : هههههههههههه يا بنتي افتحي الكاميرا اشوف يحيى.
مليكة : هبعتلك صورة ليه استني.
ملك : اممم شكلك كدا مش عاوزاني اشوفك.
مليكة : لما اظبط نفسي الأول.
ملك : هههههههههههه ماشي..
مليكة : افتحي الواتساب كدا.
ملك : يا روحي مسمسم خالص زي حلا مش طالع للواد يوسف ده.
مليكة : اه لو يوسف صاحي وسمعك.
ملك : هههههههههههه
يتربى في عزكم يا ملوكه سيف عامل ايه؟
مليكة : سيف تعبان قوي معانا اليومين دول.
ملك : معلش خليه يستحمل مفيش حاجة بالساهل المهم خلي بالك من نفسك ومن الولاد اوعي تسيبي يحيى مع يوسف.
مليكة : لا متقلقيش دا بيخاف عليه قوي.
ملك : بيتهيألك بكرة يغير منه اصبري بس.
مليكة : لا لا مبيغرش خالص بالعكس دا علشان شايفني تعبانه بيقعد يقولي هاتي يحيى يا مامي اشيله علشان ترتاحي.
ملك : ما هو كدا غيران من شيلك ليحيى اسأليني أنا سليم بيعمل كدا ولما أقوله خلاص ألعب مع اختك وادخل أعمل حاجة الاقيه سابها المهم مقعدش أنا بيها.
مليكة : مش عارفه بقى لسه هنشوف الموضوع ده بس يوسف كبير وفاهم لكن حلا هي اللي ممكن تغير دي زعلانه وعاوزاني اجيب لها أخت تلعب معاها.
ملك : وماله هاتيلها ههههههه
مليكة : لا خلاص يا ملك الموضوع دا استحاله أفكر فيه تاني كفاية اللي شوفته المرة دي.
ملك : كل مرة بتقولي كدا هههههههه
مليكة ' لأ المرة دي غير كل مرة أنا تعبت قوي دا غير إني نفسيتي وحشه قوي اليومين دول.
ملك : لا عادي هرمونات الحمل والولادة والمسؤولية اللي زادت عليكي كل دا بيأثر في نفسية الأم خلي سيف يساعدك.
مليكة : بالعكس دا سيف اليومين دول يعتبر شايل كل حاجة وصعبان عليه قوي.
ملك : يا حنينه.. ويصعب عليكي ليه يا حبيبتي هما مش ولاده امال مين يعني اللي يراعيهم كفاية عليكي الحمل والولادة والرضاعة ولسه كمان خليه يساعدك وبلاش تقعدي تتكلمي كدا معاه علشان ميروحش سايبلك المسؤلية كلها ويشوف إن اللي بيعمله دا حاجة مش مفروضه عليه لأ لازم تلزميه يساعدك.
مليكة : مفيش حاجة بالاجبار يا ملك لو عملت اللي بتقولي عليه ده هيزهق ووقتها مش هيساعدني دا هيقولي مسؤليتك لكن لازم كلمتين حلوين كدا علشان ميزهقش ويسيبني لايصه لوحدي.
ملك : براحتك كل واحده ادرى بجوزها... ايه اللي سمعته ده دا صوت يحيى؟
مليكة : قام من النوم شكله جعان.
ملك : هههههههههههه وماله فتح على الرابع كدا على طول قوليله بالراحة على نفسك شوية.
مليكة : تعال يا يويو جعان؟
ملك : هههههههههههه اسيبك مع يويو واروح اشوف سوسو وجوجو علشان انام.
مليكة : تصبحي على خير.
ملك : وانتي من اهله.
________
في شقة إياد.
إياد : لا لا يا منة بنتك دماغها صعبة قوي أنا بقولك محتاجه علاج نفسي بجد مش هزار.
منة : طب أنا بقول يمكن لو بعتلها أو نزل قعد معاها هنا الوضع يتغير.
إياد : لا لا تروح فين ويجي يقعد هنا فين دي لو قعدت معاه هتكرهه في نفسه مفيش راجل طبيعي هيستحمل تفكير بنت ده خالص.
منة : طب اعمل إيه كدا هتخرب بيتها بـ ايديها الغريبة إن لما جات مريم قالت ضيفتها عادي ورحبت بيها وقعدنا اتكلمنا مع بعض شوية يا مامي والبنت مشيت على كدا لا راحت مثلا اشتكت لـ اخوها من سهر ولا أي حاجة خالص ما هو لو في حاجة ضايقتها كانت قالت لمازن.
إياد : مش شرط يا حبيبتي وبعدين ما ترحبش بيها ليه دي البنت جايلها لحد هنا تشوفها وتشوف بناتها مقالتش هي اللي تجيني يبقى تشيلها فوق دماغها.
منة : طب ممكن تهدا ومتتكلمش مع سهر دلوقت خالص سيبها أنا كمان مش هتكلم معاها ولا هعلق على أي حاجة وهسيبها كدا مع نفسها يمكن تحس إن تصرفاتها غلط.
إياد :"أنا بس عاوز أفهم ايه اللي حصل لها سهر مكانتش كدا ولو دا طبعها ما هي عندها اخوها أهو ممكن تعمل نفس التصرفات دي مع ملك لكن دا مبيحصلش غير مع جوزها ايه السبب مش فاهم؟
منة : ارتاح يا إياد ونام يا حبيبي الصبح توصلني المستشفى.
إياد بتنهيدة : حاضر.
منة : لو تعبان بلاش أنا هروح لوحدي.
إياد : هو أنا قولت حاجة يا منة ما أنا بقولك حاضر.. معلش اعصابي تعبانه من حوار بنتك ده.
منة : كل حاجة ولها حل أنا شوية كدا هطلب منها نروح لدكتور نفسي يمكن محتاجة تاخد أدوية تهديها شوية.
إياد : صدقيني بنتك مش محتاجة أدوية عقلها هو اللي محتاج يتظبط شويه.
منة : هعمل إيه يعني يا إياد ادعيلها.. تصبح على خير.
____
الصبح.. في فيلا كريم.
كريم : صباح الخير.
مردتش فريدة.
قرب منها : بقول صباح الخير.
فريدة : صباح النور.
كريم : يااااه للدرجة دي خارجة منك بالعافية.
قامت فريدة ودخلت المطبخ.
في المطبخ..
كريم : مالك يا فريدة؟
فريدة : ماليش.
كريم : ملكيش ازاي وانتي مش طايقه تتكلمي معايا؟!
فريدة : أنا!
كريم : معلش يمكن أنا مش واخد بالي ولا حاجة.
فريدة : هتشرب القهوة دلوقت ولا تفطر الأول؟
كريم : مش هفطر ولا شارب قهوة يا فريدة.
فريدة : مين فينا بقى اللى مش طايق التاني؟
كريم : وأنا مش هطيقك ليه يا فريدة عامله فيه حاجة؟
فريدة : معرفش.
كريم : خلاص لما تعرفي كلميني أنا ماشي.
فريدة : متخرجش من غير فطار.
كريم : أفطر ازاي وانتي مكشره بالشكل ده؟
فريدة : اه أنت بقى بتجرني علشان اقولك اللي مضايقني منك مش كدا؟
كريم : لا يا فريدة براحتك لو مش عاوزه تتكلمي بلاش.
فريدة بتبكي قام قرب منها كريم وحاوطها بدراعاته : مالك بس يا فريدة حصل إيه لكل ده؟
فريدة : مخنوقه يا كريم ومش طايقه نفسي.
كريم : طب تعالي نتكلم بره.. تعالي بقى.
يشدها ويخرجها من المطبخ.
كريم : اقعدي... ما تقعدي بقى يا فريدة متتعبنيش.
فريدة : حاضر واهي قاعدة.
كريم : كدا يعني مش عاوزه تقعدي جنبي.. خلاص اجي أنا اقعد جنبك.
نظرت له فريدة ومتكلمتش.
كريم بابتسامة : تكشيرتك وحشه قوي.
فريدة : الظاهر مبقاش حاجة فيه عجباك.
كريم : ازاي بقى هو في واحدة في الدنيا تعجبني غيرك يا فراولة.
فريدة : خلاص كبرنا وعجزنا وبقينا فروع شجر ناشفة هتوقع.
كريم : على فكرة كلامك ده بيزعلني وهو أنا يعني محبكيش غير لو كنتي صغيرة؟
فريدة : ايه دا يعني أنا عجزت حقيقي؟
كريم : ههه مش انتي بتقولي؟
فريدة : أنا أقول أنت متقولش.
كريم بابتسامة ويُقبل ايدها : خلاص متزعليش انا اللي كبرت وعجزت وانتي وردة زي ما انتي ونفسي اشمها.
فريدة : كريم اوعى بقى حد من الولاد ينزل يبقى شكلي أنا وأنت إيه.
كريم : ههه مش بصالحك.
فريدة : ما روحتش ليه مع محمد للست دي؟
كريم : ااااه هو دا اللي مضايقك بقى؟
شوفي يا ستي.
فريدة : بلاش ستي دي.
كريم بابتسامة : حاضر شوفي يا حبيبتي هقولك نفس الكلام اللي قولته امبارح أنا مليش كلام معاها وفي النهاية ابنك اتصرف وراح اخد مراته وابنه لكن أنا كلامي يبقى مع جوزها دا لو ماأخدش موقف وقتها والأمور اتحلت ورجعوا البيت مع بعض انتي بقى عامله مشكلة ليه؟
فريدة : علشان اوقات يا كريم مبيكونش ليك رد فعل
على حاجات بجد بتكون مستفزة.
كريم : طب ما انتي أوقات بيكون ليكي ردود فعل على حاجات كتير مبتكونش مستاهله كل ده.
فريدة : يعني ايه؟
كريم : يعني مش لازم يكون تفكيرنا زي بعض يا فريدة انتي متعرفيش غرضي بيكون إيه وقتها وأنا كمان لازم أحترم رد فعلك
لإن ردود أفعال الست بتكون غير الراجل.
فريدة : محدش بيقدر يغلبك في الكلام يا كريم.
كريم : هههههههههههه لا مش حكاية إن مفيش حد بيقدر يغلبني علشان مش لازم أكون دايمًا صح ممكن تكون وجهة نظرك برضو صح.
فريدة : يعني مين فينا اللي غلطان دلوقت علشان توهت؟
كريم : هههههههههههه محدش غلطان انتي مضايقه من اللي حصل زي ما أنا اضايقت أكيد رد فعلك وتفكيرك مختلف عن رد فعلي أنا في النهاية دي وجهات نظر.
فريدة : ماشي يا دكتور بس برضو مش هتخرج من غير فطار.
كريم بابتسامة : وأنا موافق فطريني قبل ما اخرج يا أم محمد.
فريدة بابتسامة : تعرف أنت نادرَا جدًا يعني لما بتناديني باسم حد من الولاد.
كريم :خلاص بلاش لو زعلانه.
فريدة : لأ وهزعل من إيه يا أبو محمد.
كريم : تصدقي بقى إن كدا أحسن.
فريدة : طب بقولك إيه.
كريم : نعم.
فريدة : كريم أنت ليه مقرب مني كدا؟!
كريم : ابعد يعني؟
فريدة : لا يا حبيبي خليك جنبي.
كريم : طب إيه هنفطر ولا امشي اروح أشوف شغلي.
فريدة : حاضر هخلص أهو بس ابعد خليني أعرف اشتغل.
كريم بابتسامة : اتفضلي.
___________
في شقة محمد.
محمد : ميرا.. ميرا.
ميرا بصوت ناعس : ها يا محمد.. في حاجة؟
محمد : أنا نازل عاوزه حاجة؟
ميرا : لأ سلامتك.
ييلتفت وقايم مسكت ايده.
محمد : ايه فيه ايه؟
ميرا قامت وقعدت على السرير.
ميرا : خلاص خلصنا من الموضوع ده ولا لسه عاوز تقول حاجة تانية؟
محمد : خلاص يا ميرا بس زي ما قولتلك عاوزه تروحي لمامتك هنزلك قدام البيت استحاله ادخل معاكي ولو مش عاوزه تيجي البيت عندنا براحتك.
ميرا : لأ ليه مروحش عندكم البيت محدش عملي حاجة.
محمد : أنا بقولك كدا منعا للمشاكل مامتك تيجي هنا براحتها لكن كمان لو جات وأنا في البيت مليش علاقة بيها تماما علشان منرجعش ننكد على بعض.
ميرا : محمد ممكن أسألك سؤال.
محمد : اتفضلي.
ميرا : الكلام دا قولته امبارح ايه لازمة بقى إنك تعيده تاني؟
محمد : علشان متنسيش يا حبيبتي.
ميرا : كدا.. طيب شكرًا.
محمد : العفو.
نظرت له ميرا بحزن.
محمد : ليه محسساني اني ظالمك يا ميرا؟
ميرا : مش ظالمني يا محمد مين قال كدا؟
محمد : نظراتك ليه.
ميرا : لا يا حبيبي مفيش حاجة من دي اطمن.
محمد : طيب كملي نوم بقى وأنا نازل عاوزه حاجة؟
ميرا : لأ سلامتك.
________
في شقة علي.
رُقية : علي علي مش هتقوم بقى.
بيفرد دراعاته ويتثائب : صباح الخير يا حبيبتي.
رُقية : صباح النور.. الساعة حداشر أنا بصحيك من تمانيه.
علي قام بسرعة : يا خبر معقول يا رُقية تسبيني نايم كل دا؟!
رُقية : فين اللي سيبتك ده انا بصحيك من تمانية بقولك.
علي : ما أنا يا حبيبتي مكنتش حاسس بنفسي من التعب.
رُقية : خلاص حصل خير.. الفطار جاهز ادخل خُد شاور يلا وتعال.
علي : مجدي اتصل؟
رُقية : معرفش.. شوف كدا تليفونك.
علي : يا خبر وعامله سايلنت كمان.. دا متصل فوق العشر مرات.
في التليفون.. 📞
علي : سلام عليكم.
مجدي : وعليكم السلام.. صحي النوم يا حبيبي.
علي : عارف اللي هتقوله من قبل ما تتكلم.
مجدي : اخلص تعال يلا.
علي : حاضر جاي هفطر بس الأول.
مجدي : أنت عندك دم أنت.
علي : هههههههههههه ليه بس؟
مجدي : علي متهزرش تعال يلا ابقى افطر هنا.
علي : طيب بقولك ايه بابي عامل ايه النهاردا؟
مجدي : كويس تعال يلا علشان عاوزك.
علي : عاوزني بجد هو قال لك كدا؟
مجدي : اهو مش صح يا بابي حضرتك عاوز علي.
آسر : مقدرش استغنى عنكم يا ابني.
مجدي : اهو سمعت؟
علي : ولا احنا كمان نقدر نستغنى عنك يا حبيبي هلبس واجي بسرعة سلام.
مجدي : مع السلامة.
______
في المستشفى.
آسر : مامتك فين يا مجدي؟
مجدي : مامي قاعدة بره.
آسر : ليه مالها هي تعبانه؟
مجدي : حضرتك عرفت منين؟
آسر : حسيت.
مجدي : بتقول تعبانه وجسمها كله مكسر بتشرب حاجة سُخنه بره واخدت دوا للبرد.
آسر : علشان مبتسمعش الكلام ومش عاوزه تروح البيت تستريح.
داخله سهر من بره وبتقعد على الكنبه.
سهر : مجدي هات ازازة المياه دي.
مجدي : حاضر.
آسر : ايه يا سهر مالك؟
سهر : مفيش.
مجدي : على فكرة حضرتك مش هينفع تقعدي هنامع علشان البرد اللي عندك ده ممكن بابي يتعدي.
سهر : خلاص هقعد بره.
آسر : وليه معذبه نفسك كدا يا سهر روحي البيت يا حبيبتي ترتاحي وتريحيني أنا كمان ما هو طول ما أنا شايفك كدا هتعب أكتر.
سهر : هو أنت مفروض يعني هتقعد هنا قد ايه؟
آسر : معرفش.. انتي بقى هتفضلي قاعدة هنا لحد ما أخرج؟!
مش معقول يا حبيبتي إذا كان ولادك بيبدلوا مع بعض انتي عاوزه تواصلي الليل بالنهار كدا شوية على الكرسي بره وشويه هنا على الكنبه مش هتقدري أنا نايم على السرير وتعبان انتي بقى مستحمله كدا ازاي؟
سهر : مش تعبانه يا آسر خلاص.
آسر : مش تعبانه ازاي ما هو باين اهو عليكي روحي يا حبيبتي يلا يا مجدي وصل مامتك البيت.
سهر : مش ماشيه يا آسر متحاولش.
مجدي : أنا بصراحة تعبت اقولها يا مامي مش هينفع كدا لازم تريحي جسمك مفيش فايدة شكلنا كدا هنشوف لك اوضة هنا جنب بابي هههههه
سهر : أنا هطلع بره علشان متتعديش مني.
مجدي : طب احنا دلوقت عملنا إيه ما تروحي البيت تستريحي الناس هنا شايفين شغلهم نامي وارتاحي وابقي تعالي براحتك تاني.
آسر : خلاص يا مجدي سيب مامتك براحتها.
سهر : أنا طالعة اقعد بره.
نظر مجدي لوالده وسكت.
_____________
بعد مرور اسبوع..
في شقة أكرم.
علي : ملكيش دعوة يا ندى.
ندى : يا ابني أنت إيه بتحب يعني تعيش كدا عاوز الناس كلها تكرهك وتبقى منبوذ من الكل مش قولنا يا علي خلاص نبطل الحاجات دي ونبدأ صفحة جديدة وقولت لك كمان تعال اقعد هنا في شقة بابا ووفر فلوس الإيجار علشان تكفي بيتك روحت عملت مشكلة في الشغل لحد ما طردوك ورجعت قعدت في البيت تاني هتبقى فرحان لما مراتك هي اللي تنزل تشتغل وتصرف على البيت؟!
علي : ندى أنا مطلبتش منها تنزل تشتغل ولا طلبت مساعدة من حد.
ندى : ما هي لازم هتعمل كدا علشان اللي هيساعدك يوم اتنين شهر حتى مش هيساعدك باقي العمر ارجع عن الطريق اللي أنت ماشي فيه دا يا علي.
علي : مرجعتش للشرب يا ندى وإن كانت علياء قالت لك يبقى متعرفش حاجة هجيب منين أصلا بالعقل كدا؟
ندى : كويس إنك عارف بس أهم من إنك هتجيب منين إنك تبقى عارف إن صحتك أغلى من القرف اللي خايف تشربه علشان معكش تجيبه.
علي : حاضر يا ندى وأنا مش طالب مساعدة منك ولا من غيرك ومن الصبح هنزل أدور على شغل والشغل اللي بتقولي اتطردت منه ده علشان عملت مشاكل هناك أنا مكنتش هكمل فيه علشان الست صاحبة الشغل طلعت واحدة مش كويسه وكان لازم اسيبه.
ندى : متظلمش حد يا علي أنت عندك بنت.
علي : يا بنتي شوفت بعيني محدش قالي وكانت عاوزه...
ندى : بس متكملش وطالما سيبت الشغل علشان السبب ده يبقى اللي جاي خير بس أنت اسعى يا علي متكسلش.
علي : حاضر يا ندى اقعدي اشربي الشاي.
ندى : لا معلش علشان الحق بس اجهز الغدا حازم زمانه جاي.. سلام عليكم.
علي : وعليكم السلام.
_______
في فيلا آسر.
علي : على مهلك يا بابي واحدة واحدة.
مجدي : اركن عليه بس متخافش.
آسر : لا أنا كدا مستريح متمسكش ايدي بس جامد.
مجدي : هههههههههههه حاضر.
ملك : نورت بيتك يا بابي.
آسر : البيت منور بيكم يا حبايبي.
منة : امال سهر فين؟
ملك : مامي تحت..
منة : ايش معنى؟
ملك تهمس لعمتها : هقولك بس مش هنا.
منة : ليه؟
ملك : كدا علشان دي مفاجأة.
منة : اممم مفاجأة.. طيب.
علي : جهزت اللي قولت لك عليه؟
مجدي : كله تمام بس بقولك إيه بلاش مامي تعرف علشان المفاجأة متبوظش.
علي : حاضر.
رُقية بتخبط وتدخل..
علي : تسلم ايدك يا روكه اتفضلي يا عمتي اتفضل يا بابي وأنتم بقى مش ضيوف علشان اعزم عليكم.
ملك بتاخد كوباية العصير بابتسامة : تسلم ايدك يا روكه.
رُقية : بالهنا والشفا.
منة : تعرفي يا رُقية أنا لحد دلوقت معرفش سميتي البيبي إيه.
علي : هههههههههههه معقول يا عمتي؟!
سمينا يونس.
منة : يا حبيبي يتربى في عزك مبروك يا آسر دايمًا فرحان بولادك واحفادك.
آسر : اه احفادي العيال كبرونا يا منة.
منة : هههههههههههه يعيشوا ويجيبوا يا حبيبي عقبالك يا مجدي امال زينة فين صحيح؟
نظر مجدي لعلي وسكت.
آسر : أنا فعلا مشوفتهاش خالص هي زعلانه مني ولا إيه؟
مجدي : لا أبدًا يا بابي هتيجي تشوف حضرتك بس رهف كل فترة كدا بتتعب وهي بتنشغل بيها.
ملك : يعني النص الساعة اللي هتيجي فيهم هما اللي هيعطلوها.
علي يهمس لملك : متولعيش الدنيا وخلينا في حالنا.
ملك : ما هو كلامه مش منطقي بصراحة.
علي : برضو ملناش دعوة.
_________
في فيلا مراد.
أمل : مش هينفع يا بنتي حماكي خرج من المستشفى ولو مروحتيش كلهم هيزعلوا منك دا لو مكنوش زعلانين اصلا.
زينة : ما هو أكيد مجدي هيكون هناك.
أمل : مش شرط يكون هناك ما يمكن يبقى في المركز ولا في أي حته غير البيت وبعدين لو حتى هناك هتفضلي كدا مش عاوزه تعملي الأصول وتروحي تشوفي أهل بنتك طب حتى علشان شكلنا احنا اللي بقى وحش ده امبارح طنط سهر سألتني عليكي وملك وقبلها عمتهم لما بقيت قاعدة مش عارفه ارد اقول ايه ولا ابرر غيابك ده بـ ايه واكيد مخليه شكل جوزك كمان وحش.
زينة : شكله هو اللي وحش علشان رافضه اروح هناك واتقابل بيه بعد ما جرحني وعرف عليه ستات تانية يا مامي؟
أمل : ما قولنا باباكي هيحل الموضوع دا يا زينة وأهو انكل آسر لسه خارج من المستشفى النهاردا اصبري يومين كمان علشان باباكي يعرف يتكلم معاهم.
زينة : خلاص بعد اليومين دول نبقى نشوف.
أمل : لأ هتيجي معايا الليلة علشان الظاهر عاملين سبوع لـ ابن علي ولازم تبقى جنب رُقية زي ما هي كانت جنبك على طول ومسبتكيش خالص في ولادة رهف.
زينة : صعب قوي كرامتي يا مامي مش قادرة طب حتى ابقى اروحلها الشقة لكن ادخل البيت عندهم وهو موجود ازاي؟!
أمل : خلاص يا زينة براحتك علشان أنا تعبت معاكي.
_______
في فيلا كريم..
زين قاعد في الجنينة قصاد جميلة اللي كانت قاعد مع المدرس بتاعها.
فريدة خارجة بالقهوة وتنادي على زين.
زين : نعم يا مامي.
فريدة : قدم القهوة للمستر.
زين : وحضرته هيخلص امتى بقى؟
فريدة : الحصة خلاص ربع ساعة وتخلص مستعجل على ايه؟
زين : مش فاضي أنا كل يوم اتعطل بالشكل ده علشان دروس جميلة.
فريدة : خلاص ابقى أخرج أنت وسيبني أنا وأختك لوحدنا.
زين : اه ما أنا عارف لازم ادبس في الحوار بتاع الأستاذة ده.
تخبطه فريدة على كتفه.
زين : القهوة كانت هتدلق على فكرة.
فريدة : امشي يلا قدم القهوة للمستر وتعال علشان عاوزاك.
زين : خير!
فريدة : روح بس وتعال.
زين : حاضر.
جميلة : معلش يا مستر ممكن حضرتك تشرحيلي الجزء دا تاني علشان مفهمتوش قوي.
المدرس : حاضر.
زين بابتسامة : اتفضل يا مستر.
المدرس بابتسامة : وتاعب نفسك ليه بس يا دكتور.
زين بابتسامة : مفيش تعب ولا حاجة.. اتفضل.
بياخد المدرس فنجان القهوة وكوباية المياه : متشكر.. ايه الاخبار بقى طمني؟
زين : تمام يا مستر كله كويس.
المدرس : النتيجة ظهرت؟
زين : لأ لسه بيقولوا الاسبوع ده هتظهر.
المدرس : خير خير متقلقش طالما ذاكرت وتعبت يبقى متخافش سامعه يا جميلة أهو زين كان عندي في المدرسة وفي الدروس كمان وطول عمره من الأوائل عاوزك انتي كمان تاخدي بالك من دروسك علشان تبقي دكتورة زيه هو ومحمد.
نظرت جميلة لزين : حاضر يا مستر.
المدرس : دكتور محمد عامل ايه؟
زين : محمد كويس.
المدرس : ابقى سلملي عليه قوله مستر وحيد مدرس الكيميا بيسلم عليك.
زين : حاضر يا مستر يوصل بعد اذنك مش عاوز اعطلك.
المدرس : اوك.. اتفضل
كنا بنقول ايه يا جميلة؟
جميلة : كنت بقول لحضرتك مش فاهمه الجزء ده من الدرس ممكن حضرتك تعيدهولي؟
المدرس : حااااضر
اشرب القهوة بس قبل ما تبرد.
جميلة : اتفضل.
فريدة : بتعمل ايه كل ده؟!
زين : اعمل ايه يعني ما هو اللي عمال يرغي معايا.
فريدة : بيرغي اختصر أنت كل دا من وقت الحصة.
زين : حضرتك كنتي عاوزاني في ايه بقى؟
فريدة : خارج صح؟
زين : لما حضرته يخرج الأول.
فريدة : اتفضل.
زين : ايه ده؟
فريدة : ورقة بالطلبات اللي محتاجينها للبيت علشان متقوليش النت قطع عندي والواتساب مفتحشي وكل الحجج بتاعتك دي.
زين : ايوه.. أنا اروح ليه؟
فريدة : علشان مش قادرة أخرج وأختك مش هسيبها لوحدها ما هو لو حضرتك قاعد ومش خارج كان ماشي لكن طالما هتخرج يبقى اعملي مصلحة.
زين : على فكرة أنتم مستغليني في البيت ده أنا لو سافرت متعرفوش تعيشوا من غيري.
فريدة : هههههههههههه لا يا شيخ؟
زين : طب بجد أنا مش ليه دور كبير قوي في البيت ده؟
فريدة : اه يا حبيبي ليك دور كبير قوي بس لو تبطل تمجد في نفسك بالشكل ده وتعمل في صمت يبقى أحسن.
زين : هههههههههههه دعونا نعمل في صمت وهما مبيعملوش حاجة.
فريدة : هما مين؟
زين : اللي بيقولوا الكلام ده.
فريدة : المستر قايم ماشي.
زين بتنهيدة قويه : ياااه أخيراً.
فريدة : اه هو أنت دافع حاجة من جيبك.
زين رايح يسلم على المدرس اللي قايم ماشي : ما أنت قاعد يا مستر.
_______
في فيلا آسر.
في التليفون.. 📞
مليكة : مستنتش ليه كنا عملنا سبوع يحيى ويونس مع بعض.
علي : هههههههههههه انتي جايه قريب ولا إيه؟
مليكة : ايوه.
مجدي : ايه دا بجد؟
مليكة : ايه مش مصدق.
ملك : احلى ساندوتشات كبده لدكتور علي ودكتور مجدي.
مجدي : لا احنا تغيرنا قوي بصراحة.
ملك : هههههههههههه اتفضلي معانا يا مليكة كبده طازجة جايه من الدبيحة على المطبخ على طول.
مليكة : بألف هنا وشفا.
مجدي : علي دابح عجل بهذه المناسبة السعيدة ومن بخل حضرته خلا الاتنين مع بعض وقال بيقول العجل دا دابحه علشان بابي وهو هيأكله للناس في سبوع ابنه.
مليكة : هههههههههههه
علي : بقى كدا.. طيب شكرًا.
ملك : بجد اللمه دي ناقصاكي يا مليكة.
مليكة : بس بقى يا ملك أحسن هعيط فين رُقية يا علي؟
علي : رُقية قاعدة بيونس في اوضتي البيه من الصبح مقريف وعمال يعيط مبيحبش الدوشة.
مجدي : يا سلام!
خلاص يا حبيبي اتفضل خُد عيالك وروح.
ملك : هههههههههههه
مليكة : سلملي عليها يا علي.
علي : حاضر يا حبيبتي يوصل.
مليكة : وزينة ورهف فين يا مجدي مش شيفاهم يعني؟
مجدي : زينة ورهف في بيت انكل هشام.
ملك : هناك من وقت ما بابي دخل المستشفى شكلها طفشت من مجدي
ههههههههههههه
مجدي : تقيل على فكرة متحاوليش.
مليكة : هههههههههههه اخص عليك يا مجدي دي ملك يعني خفة الدم كلها.
مجدي : مين دي؟!
ملك : بس يا حبيبي علشان مزعلكش.
مليكة : هههههههههههه
تحت..
سهر : متشكره يا عمار اتفضلي يا وفاء اقعدي.
وفاء : طب تعالي رايحه فين متتعبيش نفسك.
سهر : يا سلام ودي تيجي ثواني بس وجايه.
وفاء : اقعد يا عمار مالك بتدور على مين؟
عمار : مش شايف إياد اخويا هنا.
وفاء : اهي منة جايه علينا ابقى اسألها.
مراد : مبروك يا دكتور يتربى في عزك.
علي : متشكر يا مراد اتفضل استريح امال فين شادي وهشام.
مراد : جايين ورايا.
علي : طب اتفضل يا حبيبي استريح.
هشام الأب : اتأخرت يعني أنا قولت هاجي الاقيك.
مجدي : لأ اسمع أنت لو حد سألك جيت امتى قوله جيت ورا مجدي على طول.
هشام : هههههههههههه ايش معنى؟
مجدي : كدا علشان أنا مفهمهم في البيت اني جاي على هنا من بدري.
هشام : وحصل ايه؟
مجدي : العربية عملتها معايا وأنا جاي.
هشام : طب وايه المشكلة ما تقول كدا.
مجدي : داليا مش هتصدق.
هشام : اممم ماشي.
مجدي : هو آسر منزلش.
هشام : لا مشوفتوش لسه.
مجدي : يلا عقبال عندكم قريب.
هشام الابن : الطريق كان زحمة.
مراد : كويس إنكم عرفتوا تيجو أنا جيت من طريق تاني خالص.
شادي : امال فين علي؟
مراد : معرفش كان هنا دلوقت.
هشام الابن : هي زينة مجاتش مع مجدي؟
شادي : تيجي فين زينة اصلا عندنا في البيت.
في الجنينة
أمل : يلا يا زينة بتعملي إيه؟
زينة : ثواني يا مامي حزام الدريس اتفك.
أمل : طب اوعى ايدك كدا اعمله أنا.
زينة : متضيقهوش قوي.
أمل : خلاص كدا كويس؟
زينة : اه تمام.
أمل : طب يلا. ..هاتي رهف وتعالي ورايا.
وليد نازل من العربية والسواق بينزل يساعده.
وليد : متشكر.
السواق : العفو.
وليد : خلاص اتفضل أنت.
السواق : ابقى اعدي عليك اروحك؟
وليد : ماشي.
السواق : الساعة كام كدا؟
وليد : حداشر.
السواق : ماشي يا باشا مع السلامة ولا ادخلك جوه؟
وليد : لأ أنا هدخل لوحدي بالسلامة أنت.
في غرفة آسر وسهر.
آسر : بلاش الكرفته يا سهر.
سهر : ليه يا حبيبي؟
آسر : مبقتش احبها بحسها بتخنقني.
سهر : بعد الشر عليك.. خلاص بلاش منها اللي بتضايقك دي.
آسر : ألف مبروك يا حبيبتي.
سهر بابتسامة : على ايه؟
آسر : على المولود الجديد.
سهر : هههههههههههه مبروك دي تقولها لبابي ومامي مش ليه أنت تقولي مبروك على خروجك من المستشفى
ورجوعك لينا بالسلامة.
آسر : أنا متشكر يا سهر.
سهر : على ايه؟
آسر : على وقوفك جنبي طول الفترة اللي فاتت.
سهر : آسر أنت بتتكلم في ايه دا واجبي يا حبيبي متشكرنيش على حاجة كان لازم اعملها المهم تاخد بالك من صحتك.
آسر : حاضر.
سهر : ايه فيه ايه؟
آسر قبل يدها وضمها ليه :
متشكر يا حبيبتي.
سهر : تاني يا آسر؟!
هو أنت كنت منتظر حد غيري يبقى جنبك؟
آسر : لأ مستحيل يكون جنبي
حد غيرك يا سهر.
سهر : طيب امال فيه ايه بقى؟
مجدي بيفتح الباب.
أمل : سلام عليكم.
مجدي : وعليكم السلام...اتفضلي يا طنط.
أمل : ادخلي يلا يا زينة.
مجدي : زينة!
نظرت له وهي داخله برهف ومتكلمتش.
وليد جاي بيتسند على العكاز وبعدها يخبطه في الباب : استنى متقفلش الباب.
مجدي : عمي!
وليد : اه عمك ايه شوفت عفريت؟!
_____
نكمل الحلقة الجايه