#طوبى "جنة طوبى"
#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃يا ترى هل سأخرج من هذه المعركة منتصرة؟!🍃
___________________________________________
فتح باب مكتبه بقوة كاد يخلعه..
جو عيونه ع طاولة الشطرنج..سكر الباب بقوة ورمي الشنطه بغضب ع الرقعه متاع الشطرنج..
طاحوا كل القطع اللي عليها..كلهم ماعدا قطعه وحده الملك الابيض..
قعد يتمعن فيه بنظرات كلها غضب وهو يتفكر في كلامها..
《 لأنك ماحاولتش قبل هكي تواجه نفسك وتوقفها عند حدها..
لما جيتك كنت عارفه انك انت اللي وراها حاولت نعطيك فرصه وحتى حني ناخدوا فرصتنا..وللأسف انت ضيعت فرصتك..》
مشي بغضب جارف ناحية الطاوله خدي قطعة الملك البيضا بعنف ورماها ع الأرض...
وقعد بنظراته الغاضبه عليها وهو يتنفس بسرعه وكأنه كان يجري في ماراثون...
🍃الاستغفال والخيانه..ذنبين مختار لايمكن يغفرهم وعقابه عليهم يكون عسير قاسي مافيشي رحمه..واللي زي مختار ظالم شايف روحه ع حق كل شي يديره..كل شي عنده مباح🍃
☘☘☘☘☘
درست سيارتها قدام الجردينه..نزلت منها وسكرتها..
ومشت بإتجاه الجردينه بش تخشلها..
وهو وصل بعدها مباشرة...درس بعيد شويه ونزل من سيارته ولحقها...
☘هي لما خشت للجردينه قعدت دور عليهم بعيونها..
شافت جدتهم وهي تتمشى حوالين الجردينه ومعاها شغاله افريقيه الجنسيه شاده كرسي من الكراسي اللي يسهل طويها ..
غيرت نظرها عنها وقعدت دور ع صغار اختها..لين لقتهم..
عند الدراجيح"المراجيح"
جوري راكبه الدرجيحه..وحمزة واقف حداها..
ابتسمت من قلبها ومشتلهم طول...
☘وهو وراها كان مدرق عيونه بنظاراته السود..شاف مقعد مقابلهم من بعيد مشي قعمز عليه وعيونه عليهم..
☘هي خلسة قربت منهم ووقفت ورا درجيحة بنت اختها وقعدت دف بيها..
حمزة بفرح؛خالتي!
جوري بفرحه؛خويله! وقفيني وقفيني..
قعدت تضحك صابرين ودموعها في عيونها..شدت الدرجيحه وقفتها..نزلت منها جوري وخشت حضنها مع حمزة وهي كانت ضم فيهم بشوق وتبوس ع رووسهم..
وهو بنظره من بعيد يتأمل فيها...
🍃🍃🍃🍃🍃
"يابنتي في حاجه مش طبيعيه صدقيني"
نجاح بقلق:لاحول ولاقوة الا بالله..يام سميره قاعده عندك؟
"ايه لكن خوك رفعها يعاينها محصله بردة"
نجاح؛باهي لما تروح خبريني واني تو نتصرف..
"باهي باهي..انتي شن حالك اليوم باهيه"
نجاح:مشيت للموعد والدكتورة قالتلي لازم نرتاح ومانتحركش هلبه حتى الخدمه خديت منها اجازة..
"ايه بنتي صحتك اهم.."
نجاح؛لكن هلبه يام نقعد شهرين راقده..
"لا سلم بنتي اسمعي كلام الدكتورة ماتشغليني حتى انتي"
نجاح؛حاضر يام حاضر..المهم لما تجي سميره عطيني علم وانتي ماترعشيش روحك ان شاء الله مافيه كان الخير..
"يارب يابنتي يارب..هي بالسلامه توا"
نجاح؛في حفظ الله..راجت لين امها سكرت..نزلت التليفون ورجعت تسبح ع صوابعها وهي تفكر بقلق...
🍃🍃🍃🍃🍃
"هو ماقاليش ماتخدميش بس اني حنبدا في مشروع خاص مع نساوين العيله هو عنده علم بيه وماقال شي"
:مايبيش يتحكم فيك زي نضال مخليني ع راحتي ولا مرة قالي ديري وماديريش..
خطر ع بال الاء كيف حاول يمنع اختها من الخدمه من غيرته عليها ولما خلاها تخدم قعد ملاحقها كل يوم..للحظه الاء انوجعت ع البنت لأنها تأكدت ان نضال مايكنلهاش اي مشاعر وان وجوده معاها سببه الغيظ والقهر..
🍃زي مادرات هي قبل..وزي ماقاعد يدير مهند توا اللي معاملته مع آرام تغيرت 180درجة..مش طايق منها شي..
والبنت صادمها حاله اللي تغير وبتنجن بش تعرف السبب ولقت روحها غصب عنها ماشيه تشكي لبوه منه..
☘في باحة المصحه..
إياد:مرات صايرة معاه مشكله مايبيش يقولك عليها.
آرام ودموعها في عيونها..
/زي شني! نبي نعرف بالك نقدر نساعده ونطلعه من الحاله اللي هو فيها..
اياد وجعه قلبه عليها قاللها..
/خليه بنتي ع راحته وماتضغطيش عليه حني هكي الرجاله مش كل شي نحكوه وتجينا مرات حاله تخلينا نبوا نقعدوا برواحنا لين نهدوا ونروقوا..
تنهدت بحزن ونزلت عيونها للأرض..
هو طبطب ع كتفها وقال..
/ماضايقيش روحك بنتي فترة وتعدي..
هزت راسها وقالت؛ان شاء الله..قامت عيونها فيه وقالت..بارك الله فيك عمي وسامحني لهيتك وشغلتك..
اياد بإبتسامه؛ماتقوليش هكي انتي توا بنتي اي شي يصير معاك كلميني طول بدون تردد..
ارام بإبتسامه؛تسلم يارب..نستأذن توا..
اياد؛خودي راحتك..مع السلامه..
ارام بإبتسامه:سلام....
ولفت ومشت طلعت من المصحه وعيونه بنظرات الاسف تلاحق فيها..هو شبه عارف سبب تغير ولده معاها وهدا اللي كان حاسب حسابه وصار...
تنهد بضيق بعدين مشي خش للمصحه...
☘وفي المصحه نفسها..
كانت اميمه واقفه مع الدكتور خالد ومعاهم دكتورة تانيه..
اميمه تستفسر منهم ع بعض المعلومات اللي تخص قرايتها..
شويه ومشي خالد يشوف شغله..
وهو ماشي فاتت من جنبه هناء شافت لاميمه واللي معاهم حيتهم بإستعجال وكملت طريقها..
الدكتورة اللي واقفه مع اميمه قالت..
/وليتي قريبه هلبه للدكتورة هناء..
اميمه بإبتسامه..
/إنسانه راقيه ومتواضعه لأبعد حد..
تنهدت الدكتورة وقالت..
/صح ومتفهمه بس حظها مش حلو تعرفي ان الدكتور خالد طليقها؟
اميمه هزت راسها بأسف..
:خدمت في المصحه قبله هو اللي لحقها..
اميمه قعدت ساكته مابتش تعلق..
:خشوا بيناتهم ناس ماتخافش ربي..عمري ماننساها هديكا الليله لتوا وين نشوفهم نتفكر فيها وكأنها صارت توا قدامي..
اميمه عقدت حواجبها وقالت..
/علاش شن صار فيها!؟
:بيني وبينك الدوة ردي بالك طلعيها..
اميمه هزت راسها وهي متخوفه من اللي حتسمعه..
:كنا نخدموا في مستشفى ****** وفي دكتورة كانت حاطه عينها ع الدكتور خالد وياما حاولت فيه بطرق غير مباشرة ماعطهاش وجه..تنوض هي شن دير..تخطط بش تخرب بينه وبين مرته واستغلت اكبر عيب في الدكتور غيرته الزايده..
في طبيب جديد وقتها كان يحب يحتك بالدكاترة الناجحين ومن بينهم هناء وهناء كانت تساعد فيه هلبه الحق لكن بحسن نيه..هو في النهايه اصغر منه ويتعامل معاها بكل احترام..بس طبعا الدكتورة اللي حكيتلك عليها بدت طلع في دوة عليهم..سكتت شويه لأن في حد فات من حداهم..لما تباعد قالت..المهم الدوة هادي وصلت لخالد لكن كان زي اللي مايبيش يصدق ويهتم لان قبلها صارت هلبه مشاكل بينهم بسبب الغيرة وكانت حتوصلهم للطلاق..لين في ليلة كان في عندنا ديوتي..اللي نتفكره يومها شكل هناء وهي مخلوعه وخالد يجر فيها جر من ذراعها وهما طالعين من المستشفى والطبيب اللي حكيتلك هني كان يجري في جرتهم وع وجهه اثار ضرب وينادي ع خالد ويقوله خليني نفهمك اسمعني وهكي..ومن بعد هدا اليوم معاش شفنا هناء بس هو بعدها فترة رجع للخدمه وبعدين عرفنا انهم اطلقوا..
بدت ع وجه اميمه ملامح الألم لما تفكرت حالة هناء لما كانت تحكي في قصتها معاه وكيف انهارت بالبكي وماقدرتش تكمل من كثر ماكان هالجزء من القصة مؤلم بالنسبه ليها..
الدكتورة:ياما من دوة طلعت عليها وياما انقال بس اغلبنا عارفين انه كله كذب وافتراء..
اميمه بكره:والحقيره اللي كانت ورا هدا كله!
تنهدت وقالت؛حاولت معاه لين آيست منه وتزوجت غيره وطلعت برا البلاد مرة وحده..
اميمه بحقد:بعد ماخربت بيت وشتت عيل..الله ينتقم منها ومن اللي زيها..
:اللهم آمين..غير زي ماقتلك بيني وبينك اميمه..
هزت راسها وقالت:ماتخافيش مايطلع مني شي..
🍃🍃🍃🍃🍃
"قتلك بردة عاديه ماتستاهلش معاينه"
عبد الفتاح؛كيف ماتستاهلش صوتك رايح بكل..
سميرة:مش اول مرة نمرض ببردة ويريح صوتي..
عبد الفتاح؛تعرفيني في الصحه ماعنديش لعب مش جديد عليك..
سميرة تنهدت ولفت وجهها للروشن..
هو شافلها بطرف عينه..بعدين وقف السيارة ع تركينه..
لفت وجهها ليه وقعدت تشوفله..
هو قال:لازم نتفاهموا..
هي بتهكم:هدا علاش..
عبد الفتاح:سميرة خلينا ندووا جديات..
هي قالت:باهي ندووا جديات..عبد الفتاح اسمعني وحاول تفهم..اللي انت فيه هدا مش زيي ماانت فاهمه..انت مش متعود علي معاملتي هادي مش متعود ع الوضع الجديد ومش قادر تتقبله انتم بطبعكم هكي روتين الحياة اللي يعجبكم ماتحبوش تغيروه..الحكاية مالهاش علاقة بشي تاني..لو اني وليت معاك زي قبل انت وقتها حتعرف انك ماحبيت حد غير ابتسام ومشاعرك عندها هي بس واني مجرد نظام في حياتك ماتبيشي يتبدل ولايتغير..
هو قال:من امتى تفهمي في النفسيات وتحللي فيها!
هي قالت:ماتتسهوكش هدا الحق..اصلا بالمنطق طول السنين اللي فاتت هادي كلها ماحسيتش ان عندك مشاعر جيهتي وتوا بس فهالكم شهر حسيتها! عبد الفتاح لاانت صغير ولااني صغيره..خلينا نتعاملوا مع وضعنا هدا بحكمة..
هو قال:وضعنا يرضي ربي؟
غيرت نظرها القدام وهي عاقده حواجبها..
وهو يراجي في اجابتها..
وجاته الاجابه اللي رعشت قلبه..
"طلقني"
شافتله وقالت؛الطلاق احسن حل ليك وليا..اني هدرزت مع خوتي وهما راهم شادين رواحهم عنك بالسيف لانهم شافوني راضيه وقالولي ولادك ولادنا..
هو شاف القدام وبلع ريقه بعدين قال..
/الطلاق انسيه والله مانطلقك لو شن يصير ياسميرة..
سميره:خلاص تقبل الوضع اللي حني فيه والهى بمرتك وصغارك..
شغل السيارة وتحرك طول وقعد يسوق بعصبيه..
وهي جنبه كانت خايفه لكن مابتش تكلمه خوف يزيد يعصب اكثر..
وكملتها دعاء لين وصلها لحوش اهله..
دخل السيارة داخل..نزلت بشنطته وشكارة الدوا..
ومشت خشت داخل..وهو طلع بالسيارة طول...
🍃🍃🍃🍃🍃🍃
بعد مالعبت هي وياهم قعمزوا ع واحد من المقاعد وقعدوا يهدرزوا مع بعض
جوري:ونضت الصبح لقيت ماما تبكي في الدار لما شافتني سكرت عليا الباب..
صابرين تنهدت بحزن وقعدت ساكته..
حمزة:عمي الجالي يحبنا هلبه وكويس معاها لكن هي ديما تبكي ديما..
صابرين في نفسها..
"ياروحي عليكم مافي حد واجعني غيركم"
شويه جي ولد عمره من عمر حمزة وكان شاد في يده زوز كياس..وحده معبيه شكولاته وكيكات والتانيه عصير..
هما شافوله بإستغراب..
الولد حطهم ع الطاولة وطلع حاجه من جيبه الخلفي كانت وردة وحطها قدام صابرين وقال..
/الراجل المقعمز غادي بعتهم..
هي والصغار شافوا وين ماهو يشوف..
لقوا رضا مقعمز ع كرسي وهومتكي بمرافقه ع رجليه وشاد تليفونه يلعب..
شدت ابتسامتها وقلبت عيونها بعدين غيرت نظرها للشكارة فتحتها وطلعت منها طرف شكولاته ومداته للولد وقالت..
/شكرا..
هو ضحك بإحراج وقال..
/لاليكم هادم خدالنا حني
.ومشي الولد بسرعه وهي تبعاته بعيونها..شافاته مشي لعيلته وقعمز معاهم..
غيرت نظرها بسرعه لحمزة اللي خلا قلبها يفر لما سمعت سؤاله..
"هدا راجلك خالتي؟"
هي قعدت تشوفله بصدمه حست لسانها ارتبطت..
فهمت ان الصغار فاهمين انها تزوجت وقاعدة مع راجلها..
جوري بضحكه:حلو هلبه خالتي..
هي قلبها كل ماله يزيد في الدق..
تنهدت وقالت بصوت يدوب طالع..
/باهي..حمحمت وقالت..خل ناكلوا توا وبعدين نولوا نلعبوا..
ووزعت عليهم الشكولاته والكيكه والعصير..
لقت الشكولاته المفضله ليها ابتسمت ابتسامه خفيفه وعيونها مليانات دموع وطلعتها وفتحتها وقعدت تاكل.
وهو بعيونه اللي مدرقتهم النظارات معاها...
☘مش هو بس..حتى لطفيه اللي كانت مقعمزة بعيد وحداها الشغاله متاعها تشوفلهم وهي مش راضيه لولا توسلات جوري اللي قطعت قلبها ماخلتهم يشوفوها...
🍃🍃🍃
ظلمت الدنيا..والصغار نادتهم جداهم...
ودعوا خالتهم اللي كانت شاده دموعها غصب ومجرد ماغابوا عن عيونهم طلقت سراح دموعها ومشت لسيارتها وهي تبكي..
وهو كان مقعمز في سيارته يراجي فيها..
شافها كيف جت لسيارة وركبت ولاحظ انها تبكي..بدت ع وجهه ملامح الاسف..بعدين شغل سيارته..
وهي تحركت وهو وراها...
🍃🍃🍃🍃
"علاش خيرني شن فيا مافيا شي!"
سميرة:مش عارفه حسيتك زي اللي مريضه ولابتمرضي..
عواطف بشي من الحده..
/مافيا شي قتلك..
سميرة بحسن:مازال مش مروحه؟
رفعت حاجبها وجاوبت بحده..
/وشني قاعده في حوشك! حوش بوي نقعد لأمتى مانبي ونروح امتى مانبي..
سميرة بصدمه؛خيرك عواطف والله ماقصدي اللي فهمتيه نسأل عادي..
عواطف؛معاش تسألي ع شي مايخصكش وياريت تطلعي وتخليني نرقد راسي مصدع ومش ناقصاتك..
ورقدت ع السرير وهي عاطيتها بالظهر..
وسميرة تشوفلها بقلق..ناضت من حداها ومشت طلعت من الدار وهي تفكر في اللي حيكون صاير مع عواطف موصلها لهالحاله...
☘وفي حوش جيرانهم اللي جنبهم ع اليمين..
كان صاحبه مستقبل نسيبه اللي جاه زيارة بموعد مسبق..
🍃"خليهم معاك بش ندير العشي ع راحتي"
عبد الرؤوف وهو رافع ولاده في حضنه..
/تمام غير لحقي بالحليب..
غرفه وهي واقفه ع طاجين "بايروكس" تحط في الدجاج..
/باهي..
مشي عبد الرؤوف بصغاره للمربوعه..
وصل فيها وخش وهو يقول..
/انستنا افندينا..
حسين وهو يشوف للولاد بإبتسامه..
/الله يأنسك..الله يبارك الله يبارك..جيبهم جيب..
جاه بيه عبد الرؤوف وهو مبتسم..
خداهم منه حسين وضمهم ليه الزوز..وعبد الرؤوف قعمز جنبه..
حسين:الافطح اواب..وهدا مهاب..
عبد الرؤوف بضحكه؛مزبوط..اواب حرنيف عكس مهاب هادي..
حسين وهو يشوف لأواب:واضح من منظره مشراني..
ضحك عبد الرؤوف..
حسين؛ربي يحفظهم ويفرحك بيهم..
عبد الرؤوف:آمين..نشوفهم عندك..
ابتسم حسين..
عبد الرؤوف:ماباش يقول لاآمين ولا ان شاء الله..
ضحك حسين وقال:ياسيدي ان شاء الله...تنهد وقال..نبيك في موضوع مهم..
عبد الرؤوف خدي منه الاولاد وقال..
/ايه شن هو.؟
"رؤوف"
عبد الرؤوف:لحظه بس..حط الصغار ع الارض..
ومشي طلع لمرته..
وحسين قعد يتفرج ع الصغار وهو مبتسم ..
ولى عبد الرؤوف وهو شاد مراضعهم والعابهم...
طرح العابهم ع الأرض...
بعدين رفعهم بالواحد وحطهم ع المنادير وحطلهم مرضاعهم..
ورجع قعمز وحسين يشوفله بإبتسامه..
/اللي يشوفك توا مايصدقش انك نفسه عبروف اللي كان آمر في*******
عبد الرؤوف بضحكه..
/تو ديرهم حتى انت ويصير فيك نفس الشي وتنسى انك عسكري..
حسين بضحكه؛باهي خل نطلعوا من هالموضوع اللي مايبيش يتسكر..ونخشوا في الموضوع اللي جاي ع خاطره..
عبد الرؤوف ابتسم بجديه وقال..
/نسمع..
حسين:زي ماتعرف اني وامي غدوة مسافرين وناووين البلاد اللي قاعده فيها اختي..
عبد الرؤوف:قالتلي غرفه..
حسين تنهد وقال..
/لكن بنمشي وقلبي مش مرتاح..
عبد الرؤوف عقد حواجبه وقال:من اي ناحيه؟
حسين؛موضوع المطحن..من رايي يسكروه وينهوا شراكتهم مع التارقي مش حيجيهم من وراه خير بكل..
عبد الرؤوف سكت عن شي عرفه مؤخرا ومايبيش يقوله وسأل حسين قاله..
/تعرف حاجه؟
حسين:لا مانعرف شي..بس الوضع هكي مش مريح..
عبد الرؤوف هز راسه وهو ساكت..
حسين:حاول في عبد القيوم بش يفضها ومايقعدش مسكر راسه..
عبد الرؤوف:رايي من رايك وحاضر تو نقعمز معاه ونحاول نقنعه..
حسين:هو هكي ولاهكي هدا اللي بيصير بس نتمناه يصير بسرعه..تنهد وقال..وفي حاجه تانيه..
ضيق عبد الرؤوف عيونه وهويشوفله..
حسين:الجالي مش متريحله وعندي احساس انه ناوي على شي..عندك علم انه باعت جماعه ضاربين عبد القيوم!
عبد الرؤوف:من البدايه شكيت،وحسيت وقتها عبد القيوم زي اللي يدرق في شي..
حسين:واحد زي الجالي الواحد مايعرفش في شن يفكر ولاتقدر تتوقع هو شن ناوي يدير..
عبد الرؤوف قعد ساكت وهو يفكر في كلامه..
حسين:اني عابي عليك اكثر من خالهم بنمشي واني مطمن عليهم معاك..
عبد الرؤوف؛حتى خالهم مش مقصر معاهم وهمه كله مصلحتهم..
حسين؛مانعرفاش زي ماانت تعرفه لكن بردو نقولك اني مش مأمن عليهم مع حد اكثر منك..
عبد الرؤوف ابتسم ابتسامه خفيفه وقال..
/كون هاني وسافر وانت مطمن..
حسين هز راسه وهو مبتسم بعدين شاف للصغار قال بضحكه..
/بياخدها منه..
ناض عبد الرؤوف وقال..
/قتلك حرنيف...
وحسين يشوفلهم ويضحك...
🍃🍃🍃🍃🍃
كملت كوي شاربتها بعدين خدتها وعلقتها في الدولاب مع الجلابيه اللي اختارت تلبسها غدوة وهي ماشية للجامعه..
سكرت الدولاب ومشت لسرير جنة...
طوبى بضحكه:نضتي ياكلبوزتي نضتي..
طبست عليها ورفعتها بعدين خدت اللعبه متاعها وهي تغني..
/هالصيصان شو حلوين...
بانت ع وجهه جنة ابتسامه ضحكت طوبى لما شافتها وكملت غني..
/عم بيدوروا حولا امن مبسوطين....ياعمري قاعده تكبري بسرعه ياطبوشتي غدوة بإذن الله تسكري 3شهور ونخشي الاربعه..
ومشت بيها للباب فتحاته وقالت..
/وغدوة بندير لبنتي لمة صغيرونه ونقعد نديرلك هكي كل ماتكبري لين توصلي صبيه وتحاديني..
خشت لدار المعيشه..
لقت اميمه مقعمزه مع عمتها واختها فردوس وبنات فردوس مجتمعين يتكلموا عن مشروعهم واميمه مستمعه..
طوبى:ميمو..
اميمه وهي تشوفلهم بإبتسامه..
/بيبو..مدت ايديها وقالت..جيبي السموحه جيبي..
جتها طوبى وعطتها جنه وقعمزت مقابلتهم..غيرت نظرها اللي عاقدين اجتماع العمل وقعدت تسمعلهم وهي تفكر..
ياترى حيخليهم مختار في حالهم ولاحيقعد وراهم لين يوصل لمبتغاه؟..
🍃🍃🍃🍃
ومختار في هالوقت كان مقعمز تحت مظله في المزرعه متاعه وكل تفكيره في اللي صار اليوم قاعد عايش فيه ومش قادر ينساه للحظه..
لعند ماجاته رساله من فاتن تفكر فيه بزردة الشوا او زي مايسمي فيها مجتمعهم المخملي.."حفلة الباربكيو"
هو بعدها كتب رساله وبعتها لرضا...
☘ورضا كان غارق في الشغل في شقته كان لازم يكمله اليوم..
وصلاته الرساله طول قراها عقد حواجبه وقال..
/ضروري!
تنهد بعصبيه بعدين رد عليه برساله من حرفين..
(تم)
واتصل بأمينه..
🍃اللي كانت مقعمزة في حجرة معيشة مع صابرين ويحكوا عن..
صابرين؛حباته زي المجنونه حب اعمى ماتشوف معاه في حد حتى صغارها تزهد فيهم ع خاطره..
امينه بأسف:الراجل لما يلاقي ست زي كده حيزهق منها ولا يستعبدها..
صابرين؛وهدا مع اختي دار الزوز مع بعض..
امينه؛ربنا يهديها ويفوقها ع نفسها قبل فوات الاوان .
صابرين تنهدت وقعدت ساكته..
ويجي اتصال رضا لأمينه..
طلعت تليفونها من جيب الماليه شافت المتصل فتحت الخط طول..
امينه؛ايوه..
"ارقدوا بكري غدوة عندكم مشية للمزرعه"
امينه بإستغراب:ليه؟
"حفله ما حفله"
امينه شافت لصابرين وقالت..
/بكرا رايحين المزرعه حيعملوا حفله باربكيو هناك..
صابرين بضيق:مش وقته بكل..
"المهم خبرتكم"..
وسكر عليها..
نزلت امينه تليفونها وقالت..
/ولاانا نفسي والله..بس نعمل ايه الاستاذ عايز كده..
غيرت صابرين نظرها للتلفزيون وقعدت تشوفله وهي تفكر شن بيفوته يوم غدوة!؟
قبل كانت تتشوق لهالحفلات بس توا مش متحملة حتى تسمع عنها...
🍀🍀🍀🍀
ويعدي هاليوم..ويجي اللي بعده..
15نوفمبر..سنة2018..
ومع الساعه عشرة الصبح..يطلع رضا بأمينه وصابرين للمزرعه..
الثلاته ماكانش عندهم رغبة في المشيه لهالسبب سيطر عليهم تعكير المزاج طول الطريق...
☘وبعد ماقطعوا مسافه طويله بعض الشي..
وصلوا..وخش رضا بسيارته وهو يشوف للمظله اللي كانت مقابله كانوا مقعمزين تحتها مختار واصدقائه وع راسهم اب فاتن..
رضا:تنزلوا وطول تمشوا من غادي..واشرلهم بيده ع الجهة المقصوده..
امينه؛حاضر..
وصابرين مااعترضتش حتى بملامح وجهها..
وبعد نزلت مشت طول مع امينه..
مختار قعد يشوفلهم بعدين التفت لواحد من صحابه اللي قاله..
/تخلع القلب البنت هادي يامختار
مختار رشف وقال..
/ردي بالك تعاودها..
اب فاتن؛محلك تعرف مختار..
ضحك وقال؛ماقلنا شي مجرد راي..
:احتفظ بيه لنفسك..
مختار تنهد وقال..
/نرجعوا لموضوعنا...
🍃وامينه وصابرين وصلوا للجهة اللي فيها النساوين..
لقوهم مقعمزات حوالين طاولة خشبيه..
اول ماشافتهم فاتن ناضتلهم طول..
كانت مبتسمه ابتسامه لطيفه لما جت ناحيتهم..
وصابرين هالمرة ماحستش اتجاهها ولاحاجه..
وصلت فيهم سلمت ع امينه سلام حار..بعدين سلمت ع صابرين مصافحه فقط..
فاتن:كيف الحال..
صابرين بإبتسامة مجامله:الحمد لله.
امينه:اما اخش اشوف المطبخ..
فاتن:لالا ماتخشي تشوفي شي ولاديري شي تعالي قعمزي معانا..
هي ابتسمت بإحراج وقالت:انا!؟
صابرين:ايه منمن هيا تعالي مش احسن منك اللي مقعمزات غادي..
فاتن بضحكه:يخي هي احسن منهم..
ابتسمت صابرين..
امينه بضحكه:ربنا يجبر بخاطركم..
ومشوا مع بعض للطاوله..وقعمزوا صابرين وامينه...
ماكانش في انسجام بين صابرين وامينه والموجودات..
كانوا يسايروا بس..وفاتن لاحظتهم واكثر شي لاحظاته هو التغيير الجذري في تصرفات صابرين معاها..
شويه..وناضوا النساوين ومشوا لجهة الرجاله..
ماعدا صابرين اللي قالت لفاتن.
/مانبيش نمشي غادي نبي نقعد هني..
فاتن بتفكير؛فهمت عليك..شن رايك نمشوا غادي لكن مانقعمزوش معاهم ع نفس الطاوله..
تنهدت صابرين بضيق..
امينه؛كده كويس..استاذ مختار ماطلبش نيجي عشان مايشوفناش حواليه!..
فاتن؛زي ماقالت امينه..
وافقت صابرين ع مضض ومشت معاهم للجهة التانيه..
ورضا كان جوفه ينحرق حرق مايبيهاش تبان ع صحاب مختار اللي هو ادرى بيهم..
مجرد ماقعمزت صابرين..ونظر صديق مختار معاها..
هي في الاول كانت ساكته بس بعدين انطلقت في الهدرزة وكل ماتسمع تعليق من امينه ع المشاوي والاكل تضحك ..
ورضا اللقمه تعلق في زوره وهو يمرر في نظره بينها وبين صديق مختار..
اما مختار كان ياكل ويهدرز ومش مركز ع شي..
☘صابرين بضحكه؛الجو يبي سليفيات..
وحطت يدها في جيب جاكيتها الطويل مالقتش تليفونها قعدت دور عليه بعدين سألت امينه عنه..
امينه:لا مش معايا..شكلك نستيه هناك..
صابرين بضيق:ايه صح..خل نمشي نجيبه ونجي..
وناضت ومشت طول..
فاتن انتبهت وقالت؛خيرها؟
امينه:نسيت تليفونها هناك..غيرت نظرها لرضا لقاته لاحقها قالت تلقائيا..رايح فين !؟
التفتت فاتن وشافت رضا في اخر لحظه قبل ليدرق عن عيونها..
🍃وصلت صابرين في الطاوله لقت تليفونها قاعد في مكانه..
خداته وجت بتمشي..لقت رضا جاي ناحيتها..
قعدت واقفه وهي مستغربه..
وقف عليها وقال:خليك هني..
صابرين:نعم!؟
رضا:سمعتيني اقعدي هني..
صابرين ابتسمت بعدم فهم بعدين قالت..
/حول من قدامي لوسمحت..
رضا؛قسما بالله كان وليتي غادي ندير جريمه وماني مدور فيها واحد..
هي بصدمه؛خيرك!
رضا قعد ساكت وهو يشوفلها بغضب وغيره..
صابرين:رضا مش وقت هبالك حول من قدامي..
رضا:اني اقسمت بالله..
صابرين بإنفعال؛باهي علاش شن درت!؟
رضا تهكما:لا مادرتي شي تضحكي وتتسهوكي بس..
صابرين بحده؛ماتزيدش تكرهني فيك..
رضا:تكرهيني ولاتحبيني مايهمنيش اللي يهمني تقعمزي هني ومعاش تولي غادي بكل..
"صابرين"..
التفت رضا..وصابرين قعدت تشوف لفاتن بإحراج وارتباك..
قدمت وهي مستغربه قالت..
/خيركم!؟
رضا وبكل جرأة:ياريت تخليها هني مانبيهاش تولي غادي..
فاتن بإستغراب اكثر..
/علاش!؟
رضا:نظرات الزفت هدا اللي اسمه جمال بتخليني ندير شي مايتحملاش عقل..
فاتن شافت لصابرين بنظرات فيها شي من الدهشه..
وصابرين هربت بنظرها عنها وهي محرجه..
رضا:لوسمحتي..
ابتسمت وشافتله وقالت؛حاضر وحنقعمز معاها..
ابتسم ابتسامه خفيفه وقال..
/شكرا..
ومشي ولى وين ماكان..
قعدت فاتن معاه بعيونها بعدين رجعت شافت لصابرين وقالت..
/اول مرة نشوف رضا هكي..
هي نزلت عيونها ومازال الاحراج مسيطر عليها..
فاتن بإبتسامه:قعمزي..
تنهدت صابرين ومشت قعمزت...وفاتن قعمزت مقابلتها..
صابرين:ياريت ماتفهميش غلط هو يعامل فيا زي اخته..
ابتسمت فاتن وهزت راسها موافقة لكلامها مسايرة..
ع جية امينه وهي تجري..
/رحتوا فين وسبتوني مع الطواويس اللي هناك لوحدي..
ضحكوا صابرين وفاتن..
وهي قعمزت معاهم..وبدوا يتبادلوا في اطراف الحديث واكثر من يحكي امينه وهما يردوا عليها..
شويه وناضت فاتن من حداهم..
امينه؛بحبها قوي الست دي..
صابرين؛راقيه..ومش ليه بكل..
امينه؛هو كمان فيه حاجات كويسه..
صابرين؛مافيه شي كويس ولاشي ياأمينه..
ع جية فاتن وهي تقول..
/هي نوضوا كان بتروحوا..
صابرين بدهشه؛كيف؟
فاتن بضحكه؛هيا نوضوا فيسع رضا مايحبش يستنى..
~~~~~~
ركبت امينه السيارة وسكرت الباب وهي تقول..
/ازاي سابنا نروح بدري كده..
رضا:وانتي في شن يهمك المهم طلعنا..وتوا خل نمشوا نديروا جونا برواحنا ع كيفنا..
صابرين قعدت تشوفله من المرايه بإستغراب..
امينه بحماس:حتاخدنا ع فين؟
رضا:تو تشوفي..ايه حقه برنامجك هداكا يجي توا..
امينه بضحكه:اه..وحشني الولا حسام..
هو قال؛تحشمي بابنت..
وامينه تضحك..هو ابتسم وشغل الراديو..
"ومرحبتين بيكم ياغاليين في حلقة جديده من برنامج هدرزة حلقة اليوم مفتوحه اهداءات وبس"
امينه؛ياترى حيهدي ايه ولد البلاد النهارده..
هو قعد يشوف للطريق وملامح وجهه كانت عاديه جدا..
وامينه تشوفله بطرف عينها..
هو شاف للمرايه لقي صابرين تشوف للروشن وهي سرحانه..
قال بصوت عالي..
/خيركم سكتوا...
صابرين شافتله بعدين قالت..
/تحكم في تصرفاتك اليوم فاتن فهمت غلط راهو..
هو قال؛لا فهمت صح..وانتي عارفه انها فاهمه صح..
صابرين بحده:لامش فاهمه شي ولاعارفه شي ولانبي نعرف.
ماتجيبليش مشاكل ارجوك..
غير نظره للطريق وقعد يسوق بصمت..
اميمه قعدت تشوفله بضيق..
اما صابرين رجعت شافت للروشن وهي متكدرة وخايفه...
🍃🍃🍃🍃🍃
الكدر والخوف..
اللي كانوا مسيطرين ع نبيله والمحجوب وهما في طريقهم لحوش لطفي وحاملين معاهم لطوبى خبر يضيق الصدر..
☘زي الخبر اللي جايبه محي الدين لأخته عواطف بس هو كان في حالة غضب شديد..
🍃خش لحوش بوه وقعد ينادي في اخته..
خافت نجمه وهي تسمع فيه وتقول..
/قلتلكم ياسميرة في حاجه كبيره..
ع طلعة عواطف تجري من الدار مفجوعه فاتت من قدام الصالون اللي فيه امها ومرت خوها..
وصلت في محي الدين وقالت بفجعه..
/خيرك.!؟
مدلها ورقه وقال تهكما..تفضلي..
هي قعدت تشوفلها بخوف شديد...
محي الدين بغضب:علاش طلقك؟! تكلمي علاش يبعتلي فيها مع قريبه!؟ لوح الورقه قدامه وقال..قولي شن دايرة!؟
وهي بعيونها الجاحظه مع الورقه ودموعها ينزلوا زي السيل..
وامها في الصالون تبكي ع حالها وكنتها تحضن وتهدي فيها...
🍃🍃🍃🍃
اما طوبى اللي كانت تحتفل بدخول بنتها شهرها الرابع ماقدرتش نبيله تخرب عليها..واختارت تخبرها بعد الاحتفال..
🍃لكن المحجوب خبر جدها وراجل اختها..
المحجوب؛هدا امر محكمه ومن حقه مع الاسف..
علي؛كنت حاسب حساب هاليوم..
عبد الرؤوف:تشرط عليه الزيارة تكون في مكان محايد حوش العيله هني مستحيل وحوش اهله حتى هو لا..
المحجوب:فكرت فيها..وشرطت مكان الزيارة يكون حوشي..
~~~~~~~
امتنان؛شرط مكان الزيارة يكون حوشه..
"مش مشكله المهم نشوف بنتي.."
امتنان:مرتين في الشهر فقط لاغير ساعه وحده بس..
"بردو مش مشكله..المهم بعد الخطوة هادي تركزيلي ع الخطوة التانيه"
امتنان؛قداش ليها جاهزة..
"حلو..ينعبا عليك هلبه.."
امتنان بإبتسامة ثقه ؛اكيد ماكبرش اسمي من لاشيء...
🍃الجالي بإبتسامه..
/ع العموم بعتلك دفعة اولى..
"وصلتني"
الجالي:ولما يتم الموضوع حيجيك اضعافها..
"مشكور وان شاء الله توصل للي تبيه"
الجالي بإبتسامه ماكره..
/إن شاء الله..إن شاء الله...
#انتقام
#طوبى
....يتبع....