#طوبى "جنة طوبى"
#جمان_فريد
#الجزء_السابع_والسبعين "إفك مفترى"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الصلاة_الابراهيميه
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
#رزقنا_اللــــــــــه_واياكم
شفاعته ومرافقته في الجنة..{ﷺ} ❤️🤍
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " بكيت ليلتين ويومًا حتى ظننت أن البكاء فالق كبدي"
- أمّنا عائشة أثناء حادثة الإفك🍃
__________________________________________
خشت للحوش ويدها اللي شاده تليفونها تتحرك مع حركتها..
وصلت في الصاله وخشت وهي تقول..
نجاة:السلام عليكم..
خديجه؛تعالي نجاة تعالي..
مشت طول وقعمزت وهي تشوف لمغليه وتقول..
/كيف حالك عمتي؟
مغليه وهي تشوفلها برفعة حاجب..
/في حاجة تعرفيها وداستها علينا؟
شافت نجاة لخديجه بإستغراب..
وخديجه تشوفلها بدون اي تعبير..
رجعت نظرها لعزوزتها وقالت؛زي شني عمتي!؟
مغليه؛حاجه ع طوبى..
ارتخت ملامح وجهها وشافت لخديجه بطرف عينها بعدين ردت نظرها لعزوزتها وهي تقول..
/كيف يعني زي شني!؟
خديجه؛ماتخافيش نجاة قولي كان في حاجه تعرفيها قوليها..
مغليه؛انتي فاهمه قصدي كويس يومها لمحتي قدامنا اني والحاج ع حاجه تخص طوبى وولد عمها حسين..
بدت ع وجهها ملامح الأسف المصطنعه ونزلت راسها لوطا..
مغليه؛نجاة تكلمي..
خديجه؛لو تعرفي حاجه مهمه قوليها يانجاة مرات تنفعنا وتنفعك حتى انتي..
رفعت راسها وقالت..
/بصراحه..اكثر من مرة هكي..بالصدفه لما جيت سكنت هني واني نشوف في حاجات غريبه بينها وبين ولد عمها زي ماتعرفوا في روشن في الشقه مقابل حوشهم ومرات واني نفتح فيه ولانسكره تجي قدامي هكي..تنهدت وقالت بضيق مصطنع..استغفر الله تو الواحد شن بيقول..
مغليه بعصبيه:كملي كلامك.
زفرت بضيق مصطنع وقالت..
/ياربي سامحني..نشوف فيها مع ولد عمها بروحهم اكثر من مرة وهو اللي يرفع ويجيب فيها لمشاويرها ومن كثر مااستفزوني كيف مستغفلين الجالي والعيله كلها وكيف هديكا قاعده تستشرف وهي دير في شي ماديراش الا...استغفر الله ياربي وخلاص..المهم صورتهم..
خديجه اتفاجئت..
ومغليه انصدمت وهي تقول..
/شن صورتي!
نجاة؛دقيقة عمتي..
رفعت تليفونها وقعدت دور ع الصورة..
وخديجه تشوفلها وهي مندهشه..
طلعت الصورة وناضت لعزوزتها وصلت فيها مدتلها التليفون وقالت..شوفي..
خدت مغليه التليفون..
وخديجه ناضت وقفت حداها وطبست وقعدت تشوف معاها..
نجاه؛هادي في رمضان قبل المغرب هما الزوز بس فوق السطوح..
مغليه وهي مصدومه؛الواطيه الصايعه !
خديجه رفعت عيونها لنجاة وهي مصدومه..
ونجاة رفعت حاجه واشرت بعيونها ع الصورة وكأنها تقوللها..
"هاه شفتي"
وقفت خديجه ع حيلها وقالت..
/الحق مصدومه..اني كنت شاكه ونكذب في روحي ونقول ماديرهاش لكن الصورة هادي شن معناها..
وقفت مغليه وهي تقول بإنفعال..
/يقولي خوك ديما تحب تمشي لحوش ماليها وتقعد بالايام وكان تلقى ماتروحش!!
نجاة:استغفر الله يعني..استغفر الله العظيم..احتمال العيل مايطلعش من الجالي اصلا..
مغليه وخديجه تقشعرت جلودهم من اللي سمعوه..
نجاة:مدام درقت خبر الحمل من الاول وماقالتاش الا بعد ما طلبت الطلاق..
شافت مغليه لخديجه وهي مصدومه ومنفعله للغايه..
وخديجه تشوف لنجاه وهي تفكر في كلامها بعدين قالت..
/لا..لو هكي حق راهو اول ماعرفت روحها تحججت بحكاية مرضه وطلبت الطلاق..علاش تنسب في العيل للجالي وتربط في روحها بيه لالا الكلام هدا مش منطقي..
سكتت نجاة وهي تحرق وتسحن ع خديجه اللي ماوافقتهاش في اللي قالاته..
مغليه فكرت في كلام بنتها وقالت..
/صح..لكن شن هدا اللي شفناه!؟
خديجه؛اكيد مخططه بعد تطلق من الجالي ياخدها..
مغليه:معناها تخون في ولدي وتغافل فيه من قبل بلاها هي رماته عليه هالكلبه..
نجاة:ع الاقل اني كنت مرته ع سنة الله ورسوله قبل ليعرفها ولاانتي خنت حد ولاهو..
شبحتلها مغليه بحده..
وخديجه بإمتعاض..
قلبت عيونها وقالت..
/المهم شفتوها بعيونكم وسمعتوا باللي داره ع خاطرها ولى واضح وضوح الشمس اللي بينه وبينها..
مدت مغليه التليفون لنجاة وقالت لخديجه..
/بري غليلي بردوشه راسي بينفلق..شافت لنجاة وقالت..
وانتي بري روحي..
نجاه بعد ماخدت تليفونها قالت..
/حاضر بالسلامه توا..
ومشت طول طلعت من الصاله وخديجه وراها..
🍃لحقتها وشدتها من ذراعها وهي تقول..
/شن قصتها الصورة هادي!
نجاة:والله زي ماحكيت بكري..
طلقت ذراعها وقالت..
/هالحقيره هادي! لكن باهي تو تشوف..وانتي تسكتي بكل معاش تلمحي وتلقحي وشن ماتشوفي صوري وابعتيلي..
نجاة بإبتسامه مكر:حاضر..سلام ديجا..
ولفت ومشت وهي فرحانه ع الآخر..
وخديجه معاها بعيونها ومازال في نفسها شك من اللي عرفاته لكن قعدت تفكر كيف تقدر تستفيد منه بس يكون في صالحهم هما وخوها..؟!
🍃🍃🍃🍃🍃🍃
مطار معتيقه...
يضرب ع ارضية المطار بعكازه وهو يمشي بقوة واعتزاز كعادته..
ملامح الصلابه ع وجهه قاعده زي ماهي..
ورجعتله قوته اللي كاد يفقدها بعد موت حبيبه ولد كبده...
كان في معاه واحد من اصدقائه اللي قعد معاه اخر ايام وجوده في السعوديه بعد مااضطر يرجع يوسف لسويسرا بسبب شغله..
علي الواعر؛اهو حسين ولد ولدي يراجي فيا..
:باهي الحمد لله ع السلامه ياعلي نشوفوك ع خير..
علي:الحمد لله ع سلامتك حتى انت وبارك الله فيك..
:فيك بارك الله..هي السلام عليكم..
علي:وعليكم السلام..
وتفارقوا هو والراجل وكمل بروحه...
قدمله حسين وسلم عليه بالحضن وهو يقول..
/حمد لله ع سلامتك ياجدي..
علي طبطب ع ظهره وقال؛سلمك سلمك..
خدي حسين ساكو جده"شنطة صغيره" وقال..
/شن جو الرحله؟
علي؛الحمد لله ارتحت فيها..
حسين؛باهي الحمد لله..هي تعالى معاي..
علي:ماشي بروحي..
ضحك حسين ومشوا هو وجده وطلعوا من المطار..
كانت سيارة عبد القيوم برا تراجي فيهم..
علي:التارقي جابك؟
حسين؛لا خديت منه السياره..
علي؛تعرف بنبيع الارض اللي قعدتلي وناخدلك سياره..
ضحك حسين وقال:خليها لحاجه اكبر ياجدي تو ناخد بروحي..
وحط الشنطه في السيارة من الخلف..
بعدين مشي فتح الباب القدامي لجده وساعده يركب..
وبعدين ركب هو وتحرك بالسيارة...
🍃🍃🍃🍃🍃
وفي الحوش..
كانت مطيره لاهيه طيب في الغدي وبنات فردوس يضموا في المربوعه الخارجيه..
اما طوبى كانت في دار المعيشه تجهز فيها لمرواحة غرفه عليهم تاني يوم..
كانت ترتب فيها بحب وهي فرحانه وبين عيونها ولاد اختها اللي من لما شافتهم ذابوا في قلبها زي قطع السكر..
طوبى هي تعلق في الزينه..
/امتى تجي حتى انتي ونزينوا الدار بالبودري ياجنونه..تشوقت لجيتك هلبه ياروحي..
كملت تعليق الزينه والتفتت وهي تمرر في نظرها ع الدار وتقول..
/ولت تهبل الله يبارك..شويه حست بحركة بنتها في بطنها ضحكت وقالت..باهي باهي..سلم بنتي الفالحه اللي عاونت امها شكرا قلبوشتي..كويس هكي!؟
وقعد تضحك..
ع خشة مطيره شافتها تضحك ابتسمت وقالت..
/كملتي؟
وقعدت تمرر في نظرها ع الدار وتقول..
/الله يبارك يتبعولك في جيبتك ان شاء الله..
طوبى:سلمك ياربي..زعمه جدي قريب يوصل؟
"جدي علي ياعمتي"
لما سمعوا صوت اريج وهي تنادي..
طول مطيره طلعت تجري..
اما طوبى مشت للدار التانيه بش تلبس ملايتها تحسبا لوجود حسين معاه..
🍃برا..
مطيره في حضن بوها ودموعها ينزلوا وهي تقول..
/حمد لله ع سلامتك ياغالي..
هو قعد يمسح ع شعرها ويقول..
/الله يسلمك..
وبنات فردوس واقفات حداهم يشوفولهم بإبتسامه..
وحسين واقف وراهم وعيونه عليهم وهو متأثر..
علي وهو حاضن بنته كان يمرر في نظره ع الجنان والحوش اللي قعد من بعد ولده...
ماقعدش منه الا الذكريات وطيفه اللي يشوف فيه في كل مكان...
و.....
"جدي حمد لله ع سلامتك"
شافها..وزاحمت ملامحه الجاده ابتسامه...
يشوف فيها جاياته وهي مبتسمه ولما وصلت فيه خشت في حضنه...
وين شمت ريحته ماقدرتش نتمالك نفسها سمعوا صوت عبراتها طول وهي تبكي..
هو قعد يطبطب عليها ويقول..
/ششش خلاص..خلاص بنتي..
واللي حواليها ماقدروش يشدوا دموعهم..
حتى حسين قعد يمسح فيهم وهو يداري في وجهه..
شويه طوبى هدت وتباعدت عنه وهي تمسح في دموعها وتقول بنبرة باكيه..
/ماتعتبش في المرواح؟
هو قال:لا الحمد لله روحت مع عيلة واحد صاحب..
مطيره؛باهي وبيي خش داخل تريح..
علي:نبي المربوعه..
مطيره شافت لبنات فردوس..
اريج؛كملنا تعالى خش جدي..
جاته مطيره تعنقت ذراعه ومشت بيه وهي تهدرز عليه..
والبنات معاهم...
طوبى كانت معاهم بعيونها وهي تمسح في دموعها..
وحسين واقف يشوفلها بضيق..
هي خدت نفس بعدين شبحتله بنظرات جاده حاده..
قدمت كم خطوة ووقفت بعدين قالت..
/وصلتلك اختك كلامي؟
هز راسه وقال:ايه..اني خشيت مع جدي بش مايحس بشي ويستغرب..
طوبى:معاش تخش مرة تانيه وكان استغرب وسأل تو نحكوله..
حسين كان يشوفلها وهو مضايق ومخنوق لأبعد حد ماتمناش توصل بيناتهم لهني بالذات وانه توا بدي يحس ناحيتها بالمسؤوليه بالأخوة اللي ياما طلبتها منه...مشاعره تجاهها تبدلت او بدت تتوضحله بشكلها الحقيقي..
طوبى بجديه:حسين اطلع..
هز راسه بعدين لف ومشي فتح باب الحوش وطلع وبدون مايلتفت سكره وراه..
تبدلت ملامح وجهها للألم ونزلوا دموع عيونها.
رفعت فوق وهي تمسح في دموعها وتقول..
"حسبي الله ونعم الوكيل"
بعدين نزلت عيونها وغمضتهم وخدت نفس عميق وزفرت..
فتحت عيونها ورسمت ع وجهها ابتسامه ومشت للمربوعه..
🍃🍃🍃🍃🍃
وبعد ساعه..
كانت عندهم فايزة ببناتها بعد ماروحوا من المدرسه...
وهما يوتوا في الكوجينه يوتوا للغدي..
🍃فايزة:امس رقدنا والله ماحسينا حاجه ومانندروا ع حاجه لين اتصلت بيا نسرين تسأل..
مطيره؛قوليلها بري انشدي خوك البصطاردي...
فايزة:ايه بعدين حكيتلها اللي صار وانصدمت..تعرفوا حاستها مقاطعه ماليها معاش تمشيلهم..
اريج؛وين معاش تمشيلهم يومها ريتها ماشيتلهم تقريبا اولامس..
فايزة وهي تفكر؛مش عارفه بش تبان ماتعرف شي..
مطيره؛بلعاني تبي طلع روحها منها قدامك بس..
فايزة بضيق:والله ماعارفه شن نقول..ندعي بس طوبى تخلص منهم ع خير...
مطيره تنهدت وقالت؛كلنا ندعوا..
وقعدوا يحطوا في القعاد في السفر بعدين فايزة قالت..
/نبي ناخد اذنكم في حاجه عمتي مطيره..
مطيره وقفت ع حيلها وقالت..
/في شني بنتي؟
فايزة بشي من التردد:في بنية تقرا مع بنتي مروة خوها بيعرس الاسبوع اللي بعد الجاي وامها كلمتني قالت تبيني نكميجها هي وبناتها الحق اني قلت باهي شفتها فرصة ليا نرجع نخدم بالشويه بالشويه بس بعدين ندمت..
مطيره بإستغراب:علاش!؟
فايزة بضيق:هما يبوني نمشي لحوشهم يعني بنخش عرسهم..
قاطعتها مطيره وهي تقول..
/بنتي هادي الخدمه متاعك وباب رزقك ساد ماقعد مسكر وهادي فرصه جاتك لعندك ماضيعيهاش وبعدين انتي ماشيه تخدمي..
فايزة ابتسمت بضيق وقالت..
/والله لولا اني نبي نرجع نخدم مرة تانيه مامشيت..
مطيره؛بنتي ماتعقديش روحك اخدمي وبري وتعالي ومادوريش مابتردي عمك لطفي كان شديتي الحوش ودرتي عليه حداد..لو كان هكي راهو مافيش وحده فينا عتبت برا الحوش ولاوقفنا بكي..
مسحت فايزة دمعه نزلت منها وقالت:الله يرحمه ويغفرله..
هما قالوا؛آمين يارب العالمين..
تنهدت مطيره وقالت؛هيا سقدوا خل بنطلع السفر لعبد الرؤوف..
☘وبرا الكوجينه..
في دار المعيشه كانوا مقعمزات الاء وطوبى يقروا لأن اخر امتحان عندهم كان يوم السبت..
طوبى كانت تحاول تهرب من اللي عايشاته شويه بالقرايه..
وفي نفس الوقت ماكانتش تبي ضيع شي تاني مهم بالنسبه ليها...كانت تبي تنجح ولو في حاجه وحده تعزز ثقتها بنفسها وترفع معناوياتها..ماكانتش تبي تفرط في حلم حياتها اللي تمناته من صغرها انها تكون معلمة رياض أطفال..
🍃🍃🍃🍃🍃
"صارحيني يااميمه بالله عليك خوك يبي وحده تانيه؟!"
اميمه بضيق؛وكان يبي وحده تانيه علاش يخبطك؟
حسناء بحزن؛بش ينساها..
اميمه زاد ضاق صدرها لأنها انجبرت تكذب وهي تقول..
/مافيش منها الدوة هادي بكل ياحسنا ..
تنهدت حسناء بألم وقعدت ساكنه..
اميمه بضيق؛حسنا كان مش مرتاحه افسخي..
دمعوا عيون حسناء..
اميمه بشي من الارتباك ؛كان حسيتي انه مافيش شي يحس بيه جيهتك سيبيه وربي يعوضك خير منه..
حسناء غلبوها دموعها وهي تقول..
/مش قادرة ياأميمه حبيته هلبه رغم انه يعامل فيا معامله مش حلوة بس ماقدرتش نطلعه من قلبي..
اميمه حست بوجع في قلبها وين سمعت كلامها لأنها مارة بحالتها برغم اللي داره فيها عمر قاعد في قلبها شي من الحب اتجاهه..
حسناء:متأمله اني نقدر نغيره بعد الزواج هلبه هكي كانوا زيه وبعد الزواج تغيروا.
اميمه؛وكان ماتغيرش!
حسناء بإصرار:لا تو يتغير وتو تشوفي..
اميمه في نفسها قالت..
"ياربي شن درت اني شن درت بس"
🍃🍃🍃
اصرار حسناء على حسين..شبيه الي حد ما اصرار نجاة ع الجالي..
مازال متأمله انه يرجعلها وقاعده تخطط لهالشي وبش توصل لهدفها لازم تنفذ خطتها خطوة خطوة..
هي عارفه كويس ان الجالي يحب طوبى بهوس وأي حب مهما كان ينتهي لما تتشوه صورة المحبوب..
وبعيدا عن الحب ممكن اي راجل يدير المستحيل بش يحافظ ع زواجه بالذات لو كان في صغار الا في حالة وحدة لو اكتشف ان زوجته باعت عرضه وخاناته هني ينهي كل شي تماما...
وهدا اللي قاعده تسعاله نجاه وهي مقعمزه في شقتها بروحها بعد مابعتت الصغار لحوش جدهم..
وقعدت ع رواق مع نفسها تفكر شن لازم دير....
وبعد تفكير دام لوقت طويل..
قامت تليفونها واتصلت بأختها صابرين..
🍃نجاة؛قبل قلتيلي ان عندك صاحبات في***** ولا؟
"ايه علاش؟"
نجاة؛نبيك تسأليلي عن دكتورة متدربه غادي اسمها حسنا..
"حسنا مني!؟"
نجاة؛مانعرفش غير ان اسمها حسنا بس اسمها مميز حيعرفوها..
"باهي في أي قسم ياهمي!"
نجاه بنرفزة؛مش عارفه جراحه باطنه حاجه زي هادي انتي قولي هكي وهما يعرفوها برواحهم..ايه حقه..قوليلهم صاحبة الدكتورة اميمه الواعر..
"قولي هكي من الاول نعرف قسم اميمه تمام تو نسأل ونرد عليك لكن قوليلي قبلها لشن قاعده تكتكي!؟"
نجاة:يجي وقته ونقولك...
🍃🍃🍃🍃🍃
الساعه 7:30مساءا..
في جنان حوش علي الواعر..
اميمه وهي حاطه راسها ع كتف جدها..
/قداش استاحشتك وفقدتك جدي..
علي:شكله ياما صاير واني غادي..
سكتت اميمه..
علي؛امك مامشتش لحوش لطفي ع الغدي حسين ماريتاش احكي شن صاير..
تنهدت.اميمه وقعدت ساكته..
علي؛هييه يابنت..اميمه نكلم فيك..
ع طلعة عبد المطلب وهو يقول..
/اميمه خشي ديري عصير الليم والنعناع اللي درتيه امس..
طلقت جدها وناضت وهي تقول..
/حاضر..شويه بس..
ومشت بسرعه خشت داخل..
علي قعد يشوف لولده وهو عاقد حواجبه..
عبد المطلب حك لحيته بعدين قعمز وحط القيلا حداه وقال..
/الجو اليوم خير من امس بوين..
علي قاعد يشوفله بنفس النظرات..
عبد المطلب:اكيد الجو غادي احرف من هني!؟
علي:شن صاير ياعبد المطلب.
شافله شويه بعدين قال..
/مشاكل عاديه..
علي:عبد المطلب احكي شن صار واني مهناش!
هز عبد المطلب راسه بإستسلام وقال..
/حاضر..حاضر..تو نحكيلك..
🍃🍃🍃🍃🍃🍃
"قالتلي بيجيب ماليه الاسبوع الجاي"
نجاح؛ع خير ان شاء الله..
نجمه بضيق؛مانيش متريحه لموضوع اختك هدا بكل..
نجاح:تفائلي خير يام..
نجمه:والله ديما ندعي ونبي نتفائل مش قادره حكاية الضرة هادي مخوفتني..
نجاح:ماتخافيش ع عواطف راهي فالحه وماتنقدر خافي ع المراة منها..
نجمه؛والله نتمناها تقد روحها وتعيش مرتاحه ومادخلها بحد هدا مانبي..
نجاح؛وان شاء الله هدا اللي بيصير يام..
🍃وعواطف في الكوجينه مع مصطفى ولد عبد الحفيظ..
ديرله في الجيلاطي وهو يتفرج عليها..
عواطف:شكلاطه ولافراوله..
قاللها:شكلاطه..
بضحكه قالت:نجيه ياربي..
وقعدت تزينله فيه بعدين عطاته حصته وحطت الباقي في سفره رفعتها وقالت..
/هي تعالى حبيبي..
ومشت طلعت وهو وراها..
🍃🍃🍃🍃🍃
"مش عارفه كيف بندير معاهم بحالي هدا!؟"
فردوس؛نعاونوك عليهم لين تشدي صحتك..
غرفه بضيق:تعرفي مضايقه لاني جبت اول بطن بالعمليه معناها بعدين مانقدرش نجيب الا بالعمليه عندها مضاعفات القدام..
فردوس:لامش شرط نعرف نساوين اول بطن بالعمليه وبعدين جابوا طبيعي..
غرفه:ان شاء الله يصير هكي..
فردوس:ياسرك تخميم معاش تخوفي روحك..
غرفه بضيق؛مانقدرش..تأففت وقالت..وبنطلع ونخليهم برواحهم هني مش قادرة نتحمل..ودموعها نزلوا..
ضحكت فردوس وقالت:عليك مهبوله وخلاص مش مطولين كم يوم ويطلعوا..
غرفه بنبرة باكيه؛مانقدرش نرتاح واني بعيده عن صغاري..
فردوس بضحكه:والله وكبرتي ودرتي صغار يافرخه انتي..
غرفه بزعل:تضحكي يافردوس!!.
وفردوس مش قادره تبطل ضحك...
🍃🍃🍃🍃🍃
"معاش حصلتوه؟!"
مغليه بضيق:عييت واني نتصل بيه ولاقال نرد..
نسرين:يستاهل ولدك هدا يستاهل تصرفاته كلها غبيه تصرفات مفرخ مراهقين.
مغليه بعصبيه؛اسمعي يابنت انتي بتقولي كلام يفور الدم توكلي لحوشك..
ناضت نسرين وخدت شنطة ولدها وقالت..
/حتى اني طالعه..
ومشت طلعت من حداها..
مغليه بغضب؛مناصرة الكلبه هديكا ع خوها المعفنه هادي تو تنفعها...
🍃وتطلع نسرين من الحوش وهي معصبه..
وتفوت من قدام قهوة خوها..
وولد خوها محمد المهدي يتبع فيها بعيونه كيف جي بيمشيلها شاف راجلها جاي ناحيتها قعد في مكانه..
شويه شاف يمينه لما سمع عمه نضال وهو واقف بعيد عليه شوي يتكلم بالتليفون..
نضال وهو مبتسم؛نعلي من صوتك ومن كلامك تغني غني....والله عسل باهي....نجك لي حتى انتي..اسمعي نبي نشوفك نبي نهدرزوا ع الطبيعه.....تمام نستنى منك في كلمة اخيره......نعليا نا...
محمد ابتسم بأسف وحرك راسه يمين ويسار بعدين غير عيونه لشقة فايزة وتبدلت نظراته لنظرات ضيق...
🍀🍀🍀🍀🍀🍀
ويعدوا يومين...
🌹وتطلع غرفه من العياده لحوش بوها..
وتقعد تمشي وتجي ع صغارها اللي قعدوا في الحضانه لأيام....
🌹وبعد ايام يروح المهدي هو وبوه ومعاهم االمسروقات وافراد العصابه ترحلوا لليبيا وقعدوا في الحبس بش يتحاكموا ويقضوا عقوبتهم وفي نفس الوقت افرجوا عن الافارقه اللي تم تلفيق تهمه السرقه ليهم وهالخبر فرح بلال ع الآخر وكأنه بعث فيه الحياة..
لكن بتدخل من مختار وخدمة معارف المهدي طلع منها ولد خديجه زي تطلع الشعرة من العجين...
🌹وبعد حسين وطلع من طرابلس كلها ومشي لسرت في مهمه عمل تستمر اسبوع كامل...
هالابتعاد ريح صفيه اللي خلاها تفكر انه هكي حيبعد عن مشاكل بنات عمه ويفكر بروحه بصفاء ذهن وياخد قرارات صح في مصلحته...
🍃وهكي طوبى ارتاحت بعض الشي...
بعد ماكملت امتحاناتها في الكليه..قعدت يوميا تمشي للمدرسه في اخر ايامها..كانت تبي دير اللي عليها لأخر لحظه بش تريح ضميرها....
☘زهره بألم؛والله ماني مسامحه روحي ع اللي صار في المدرسه من وراي..
طوبى وهي تحاول تتماسك وتبان قويه..
/قضاء الله وقدره يازهره ربي هكي كاتب والخيره فيما اختاره الله..المهم توا انتي قوليلي شن صار فيك..!
زهرة بتهكم وحسرة:طلقني..
طوبى بفرح:باهي طيب فيك!
زهره:بعد ماشوهوا هو وماليه سمعتي عند القريب والبعيد..امه وخواته يدوروا من حوش لحوش ويدووا بيا ويقولوا مصاحبه واحد من المليشيات يصرف عليها..
طوبى بإستنكار:الحق.راء هادم!
زهرة بألم:الدوة وصلت لأقاربنا يومها جو لأمي وماخلوا ماقالوا..اقسم بالله ساعتها تمنيت الموت ياطوبى..
دمعوا عيون طوبى وهي تقول..
/وهما فيسع صدقوا!
زهره؛يصدقوا علاش مايصدقوش الناس يتكلموا و يصدقوا من غير مايشوفوا بالذات ع المراة كل شي يتصدق..
طوبى بأسف:ويحسبونه هينا وهو عند الله عظيم..
زهره؛الناس معاش تعرف ربي بش يخافوا منه..
سكتت طوبى وصدرها ضايق ع الآخر...
زهره:ان شاء الله يكون هدا حدها ومايديروليش خارقه تانيه بش ياخدوا مني الصغار..
شبحتلها طوبى بنظرة خوف وتلقائيا حطت يدها ع بطنها...
🍃روحت هداكا اليوم والهواجس مرافقتها...
بس تلاشت اول ماخشت للحوش ولقت صغار غرفه منورينه...
فرحت بجيتهم هلبه وكملت باقي نهارها جنبهم وهي تتأمل فيهم وتتفرج ع غرفه كيف تعاني معاهم وفردوس تساعد فيها...
🍃وفي نفس اليوم..
دار عبد الرؤوف عقيقة ولاده كبشين املحين وصدق اللحم متاعهم وخلوا منه ماطيبوا بيه عشي حضروه صحابه المقربين...
🍃🍃🍃🍃
في الكوجينه..
والنساوين يغسلوا في الماعين..
مطيره:ماجانا حد كان نجمه وعواطف والزوز حسيتهم زي اللي جايات يجاملوا مجامله وماهناك ماقعدوا وروحوا طول..
فايزة:الحق اني ليا وقت معاش كلمت حد منهم حتى نسرين ليها فتره معاش اتصلت بيا واني ماعنديش ليها خلوق..
كفت فردوس السفره وقالت؛لكن حال باقي الجيران يحير الصراحه معاد في حد سأل حتى بالتليفون!
فايزة؛الناس معاش دور زي زمان اللي هدا لاهي في روحه..
فردوس:ع ناس دون الناس! اليوم وحني مروحين بالصغار ريتهم افواج ماشيين لحوش شنيبه..
مطيره:العشيه قصدك!؟
فردوس:لما روحنا بالصغار..
سكتت مطيره وهي تفكر وفايزة حتى هي سرحت بتفكيرها..
فردوس:الناس مع الواقف واللي مصالحهم عندهم..
مطيره خدت نفس بعدين قالت..
/هيا سقدوا ارواحكم خل نكملوا بسرعه نبي ندوش ونرقد..
وقعدوا يشتغلوا في الكوجينه وكل وحده فيهم عقلها مشغول بالتفكير..
🍃داخل..
طوبى بلهفه:ياعمري محلاهم كيف فاتحين عيونهم ينزمطوا زمط ياناس..
آلاء؛اني ماعنديش ع الصغار في العمر هدا نحبهم لما يكبروا شويه ويولوا ناشطين..
غرفه:تعرفوا اني بنقعد 4سنين مش جايبه صغار..
طوبى؛مانقوليش هكي حرام عليك خليها ع الله..
أريج:لالا عندها حق زوز يابيبو يبوا معاناة..
تاله وهي تتفرج عليهم؛يشبحوا فينا زين!؟
طوبى بضحكه؛لالا مازال مايشوفوا في شي..
مروة؛راهو في بينهم ميزة هدا شكله بيجي اشقر وهدا لا..
غرفه وهي مركزة فيهم؛زعمه!؟
صفاء وهي تشوفلهم؛صح هكي يبانوا..
آلاء؛باهي كان كملتوا فحص ومعاينه خلونا ناخدوا صورة معاهم تقعد ذكرى..
ورفعت كاميرا التصوير متاعها ودارتها بوضعية "السيلفي"
وكلهم تجمعوا حوالين مهاب واواب وامهم وخدتلهم آلاء الصورة...
🍃🍃🍃🍃🍃
"ماما تليفونك يرن"
نجاة وهي في الكوجينه ضم فيها..
/جيبيه ياجوري..
جت جوري تجري بالتليفون للكوجينه..
ومداته لأمها..
خداته نجاه وقالت؛خلاص ماما بري....
مشت بنتها طلعت من حداها..
وهي فتحت الخط وردت..
نجاة:ايوه صابرينه..
"ياهلا شن جو؟"
نجاة؛تمام شن جوك انتي مع المقابله..
"باهي ماشي الحال تقدري تقولي تريحت"
نجاة؛باهي ان شاء الله خير..
"المهم..جبتلك رقم حسنا"
نجاة؛الله عليك صابرينا ينعبا عليك..
"مالاشنو حبيبتي"
نجاة:باهي ابعتيه..
"لا ياعيوني ماحزرتي مش عاطيتهولك قبل لتحكيلي شن بديري بيه..
تنهدت نجاة وقالت..
/باهي ياحشريه..
ومشت طلعت من الكوجينه لدار النوم خشتلها وسكرت عليها..
🍃وفي الحوش اللي في جنبهم...
حوش الصيد..
تحديدا في دار الصيد ونجمه..
نجمه:الكذب حرام النساوين كويسات وهدرزتهم باهيه وقعدوا يطمنوا فيا من ناحية الراجل بس اني هكي مدايرتني قصة الضرة هادي..
الصيد؛مادام كل وحده في حوشها وحياشهم بعيده عن بعض تمشي امورها ان شاء الله..
نجمه بشي من القلق قالت..
/ياربي اللي فيها الخيره جيبها..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
(هاليوم من اصعب ايام حياتي..هاليوم مش عارفه كيف نعديه..نكتبلك عنه واني متأمله من ربي ان يجي يوم وتقري كلامي هدا...اليوم هدا اخر يوم للمدرسة سدرة ووالله كأنه اخر يوم في حياتي..سامحيني والله حاولت نحافظ اللي بنيتيه سنين من عمرك لكن ماقدرتش سامحيني ياسدرة سامحيني وخيتي)
وحطت البيرو ع المذكرة وقعدت تبكي ودمعوها اختلطوا بحبر كلماتها اليائسة الحزينه الخجوله...
🍃هداكا اليوم كان ثقيل بشكل غريب...
واقفه في المدرسه وهي تشوف في الغفير كيف يسكر في بوابتها بعدين ربطه بسلسلة حديد وجابلها المفتاح..
خداته منه وهي تقول بحزن..
/سامحني ياعمي بركه..
:ربنا يسامحنا جميعا يابنتي السلام عليكم..
ومشي وخلاها وهي واقفه تشوف للبوابه وقلبها قاعد ينعصر من الألم..
التفتت ومشت لسيارة عبير...
فتحت الباب وركبت..
عبير بحزن:ربي يعوضكم خير.
هزت طوبى راسها بصمت وحزن الدنيا كله في قلبها...
🍃وصلت بيها عبير للشارع قالتلها..
/كملي للسوبر ماركت في حاجه وصتني عليها غرفة وتوا تفكرتها..
عبير:حاضر..
وكملت بيها للسوبر ماركت..
درست قدامه وقالت..
طوبى:سامحيني تعبت معاي المده اللي فاتت كلها..
عبير؛ماتقوليش هكي طوبى صاحبة عمري انتي..
ابتسمت طوبى وقالت؛تسلميلي يارب..في امان الله..
فتحت الباب ونزلت..
وعبير قالت؛سلام..
بعدين تحركت بالسيارة...
خشت طوبى للسوبر ماركت..
واول ماخشت جو زوز شباب من الشارع طالعين نظراتهم ليها كانت غريبه..هي تجاهلاتها وخشت داخل وقعدت دور ع الشوفان اللي وصت عليه غرفه..
وين وصلت فيه شافت زوز من جاراتهم..
ابتسمت وقال..
/السلام عليكم..كيف حالكم..
الزوز شافولها بنظرات مريبه ويدوب ردوا السلام
وتباعدوا عنها شويه وهما دايرات رواحهم يدوروا على حاجه..
هني استغربت..
خدت علبة الشوفان ...ومشت بيها للكاصه..
وقفت ع البنت اللي تبيع واللي كانت من شارعهم حتى هي..
طوبى بإبتسامه:شن جو شن الاخبار..
البنت بجديه؛اهلا حبوبه..ترا هاتي..
مدتلها طوبى العلبه وهي حاسة انها تعامل فيها فوق من نفسها...
ع جية وحده من الجارات تكون من حوش الجعفري قالت..
/شن جوك اموله..
ببشاشه ردت عليها..
/تمام شن امورك انتي؟
:الحمد لله ماشيه..
طوبى وهي تشوفلها بإبتسامة؛شن حالك تهاني عاش من شافك..
شبحتلها بنظرة غريبه فيها شي من الاستنكار وقالت..
/اهلا..
البنت اللي تبيع..
/تفضلي..15..
خدت طوبى الكيس وطلعت الفلوس وقعدت تعد فيهم وهي مازال مستغربه وتفكر..
مدتلها الفلوس وقالت:ربي يعاون..
وخدت الكيس ومشت طلعت...
بعد ماطلعت..
:اللي تحشموا ماتوا بجديات..
:استغفر الله وخلاص..توا بس عرفت علاش غيرت طريقة لبسها بين يوم وليله..
:استغفر الله واتوب اليه فكينا من سيرتها..
🍃وطوبى طلعت السوبر ماركت وهي تمشي ع رجليها بإتجاه الحوش وتفكر..
هل اللي تشوف فيه ولاالحزن اللي هيا فيه خلاها تشوف مجرد هواجس وبس!
وهي ماشيه وتفكر سمعت صوت باب انفتح..
شافت جيهته لقاته واحد من الجيران..
لما لقاها تشبحله غير عيونه عنها وقال..
/اللهم استرنا فوق الارض وتحت الأرض ويوم العرض..
ومشي في طريقه..
طوبى في نفسها..
"لاهلبه هكي ياطوبى الراجل يدعي عادي وين المشكله!؟"
وقالت بلسانها..
/اعوذ بالله من الشيطان الرجيم...
وفتحت باب الحوش بعدين خشت وسكراته وراها...
#افك_مفترى
#طوبى
....يتبع....
"قطاطيسي فايقين"
غرفه بإبتسامه؛من بكري وهما يبلحقوا..
ضحكت طوبى وهي تشوفلهم بحب ودموعها في عيونها..
وغرفه مركزة فيهم وهي تشوف في اثر البكي عليهم شويه قالت..
/جبتي الشوفان؟
طوبى وهي تحول في عبايتها:ايه حطيته في الكوجينه بعد نصلي نديرلك الشربه..
غرفه؛تريحي وبعدين ديريها..
طوبى وهي ماشيه بتطلع؛لالا عادي تو نديرها حتى توا..
ومشت طلعت من حداها..
تنهدت غرفه بألم...
🍃وهي مشت طول خشت للدار وسكرتها عليها...
حطت عبايتها وشاربتها ع الكرسي..
ومشت بطلع حوايج من الدولاب بش تاخد دوش...
لما فتحت الدولاب..جو عيونها ع وشاح سدره..
قعدت تشوفله بنظرات ألم...ودموعها فاضوا من عيونها..
تنهدت من وسط قلبها بألم..
بعدين رشفت وقعدت طلع في الحوايج اللي تبيهم..
بعد ماطلعتهم..سكرت الدولاب..
ومشت خدت العبايه والشاربه وطلعت من الدار بإتجاه الحمام..
ع نزلة عمتها واختها من فوق السطوح وهما منزلات فرشات صغيرة كانوا غاسلينهم..
فرشوهم في مكاناتهم..
بعدين مشوا الزوز يشوفوا غرفه...
🍃فردوس:روحت؟
غرفه بضيق؛ايه..
مطيره بحزن؛شن جوها؟
غرفه؛مدايرة روحها عاديه..
فردوس بضيق:لاحول ولاقوة الابالله..هذا باب كنا نطلعوا منه في فلوس علاج سدرة وتسكر..لأمتى خالي بيقعد هو اللي يدفع!
مطيره؛مش تقولوا نعبي في روسكم عليه بس حساته هكي بيقيم يده من كل شي..
غرفه؛خالي خايف من مختار...
فردوس:صح من اخر مرة جانا فيها لاحظت خالي ساكت ونادرا مايدوي وباين فيه الخوف..
مطيره بعصبيه:عطيه مايرفعه هالبوشرينتا هدا شن مازال يبي!!؟..
فردوس:حاط عينه ع الحوش والمطحن مش طمع ولاهو في حاجه..لكن هكي مكر نقمة...
مطيرة؛مريض هدا مش طبيعي بكل..
غرفه:ربي يكفينا شره..
سكتوا شويه وهما يفكروا بضيق بعدين مطيره قالت..
/اني في حاجة تانيه شاغلتني..
فردوس؛اللي في بالي ولا!؟
غرفه؛شن في!؟
مطيره بقلق:الجيران قطعوا بكل معاش في حد يجي ولايسأل ويومها تلاقيت اني ومرت خليفه ومرت الجفايري في العطريه داروا رواحهم ماشافونيش ومشوا طلعوا من العطريه بكل..
فردوس:اشبح شن مطلعين من دوة عيت شنيبه بعد المشكله اللي صارت بين حسين وهداكا الحقير..
غرفه؛قصدكم زي الدوة اللي قالتها صفيه يومها!؟
مطيره تنهدت بقلق وهزت راسها بإيجاب..
فردوس بخوف:غبارة سودا كان هكي ..
غرفه وهي تفكر بضيق قالت..
/قبل نبيله حكتلي عن هلبه نساوين رفعوا قضايا طلاق ع رجالتهم الرجاله اتهموا نساوينهم في شرفهم وفي دبرولهم مكايد..
فردوس بإستنكار؛نهار اسود ع روسهم!!
مطيره:مالا شني ياماما يديروا فيها بس يطيح عن المراة حقها ومايخلوهاش تشوف نصيبها بعد تطلق..بس اني توا نبي نعرف شن اللي انقال للناس بش يديروا هكي!؟
فردوس:فايزة تطلع وتخش وتواصل في بنت شنيبه مليون في الميه تعرف..
سكتوا وهما يفكروا بقلق..
🍃وطوبى طلعت من الحمام وهي تنشف في شعرها بالفوطه..
سمعت آذان الظهر قالت..
/صدق الحق وزهق الباطل..
وصلت في الدار فتحتها وخشت بعدين سكرتها وراها
لمت شعرها وهي ترد ورا المؤذن
بعدين خدت ملايتها من ع الشماعه لبستها
ومشت خدت سجادة الصلاة وقعمزت ع كرسي عند القبله وفرشتها
تنهدت بضيق..وغمضت عيونها وبدت تستشعر انها واقفه توا بين ايدين الله وكأنه مافي حد غيرها قدامه...
فتحت عيونها وخدت نفس..بعدين رفعت ايديها
وقالت من وسط قلب محروق..
"الله أكبر"
وحطت ايديها ع صدرها وبدت تقرا في دعاء الاستفتاح..
وبعده بدت صلاتها بسورة الفاتحه..
كانت وقتها خاشعه لدرجة حست بيها ان الله سبحانه وتعالى قاعد يطبطب عليها ويمسح ع قلبها المقهور...
بعد ماركعت..ونزلت راسها وكأنهاساجده...
سبحت وبدت تدعي...
"ياربي وانت عالم باللي مريت بيه اليوم وعشته هون عليا ياربي هون عليا..اني مش معترضه ع شي من اللي قدرته عليا لأني عارفاتك ماتقدر الا الخير..بس نبي منك تخفف عليا حزني وتقويني قوي ظهري بش نقدر ع هالحمل.."
خدت نفس وقعدت ترشف ودموعها يقطروا بعدين قالت بكل تسليم وضعف واحتياج...
"ماليا حد غيرك انت بس سندي ياربي كلهم يمشوا ويجوا كلهم مرات يتخلوا عليا لكن انت لامستحيل تخليني..."
تنهدت من وسط قلبها بعدين قالت...
"سبحان ربي العلي الأعلى"
ورفعت راسها من السجود ومازال دموعها ينزلوا غصب عنها...
🍃🍃🍃🍃🍃
"بناخد اذنك ياعمي وحده صاحبتي عازمتني لحوشها وبنمشيلها العشيه"
محمد شنيبه وهو مقعمز وحفيده معاذ ع رجله..
/وين تسكن؟
نجاة؛في *******
محمدشنيبه؛مش بعيد..
نجاة؛بنرفع معاي جوري بنت صاحبتي هادي تقرا مع جوري في المدرسه..
محمد شنيبه؛وامتى تروحي؟
نجاة:نتعشا ونروح هكي مع التسعه..
هز راسه وقال؛خلاص يطلع وراك نضال ويروح بيك..
نجاة بإبتسامه؛صحيت عمي..هي تعالى معاذ نروحوا..
قاللها؛لالا خليه..
وهي مبتسمه قالت؛باهي ع راحتك السلام عليكم..
محمد شنيبه؛وعليكم السلام..
ولفت نجاة ومشت طلعت من المربوعه متوجهه لباب الحوش..
طلعت من الحوش..
ع خشة محمد المهدي من باب الحوش الخارجي..
هي ابتسمت وقالت..
/شن الجو محمد ..
شبحلها بنظرة ازدراء وتعالي وفاتها وتوجه لشقتهم..
هي تبدلت ابتسامتها لملامح التعجب والغضب وحاجبها مرفوع..
بعدين هزت راسها بوعيد..
ومشت بإتجاه شقتها وهي تفتح يدها اليمين وتسكر فيها من العصبيه...
🍃🍃🍃🍃🍃
"هو هدا ماما قالت مكتوب عليه ماشاء الله هونا شوفيها"
فايزة وهي تسوق وتشوف للحوش..
/ايه هو هدا..
اتصلت مروة بمناسك وخبرتها انهم وصلوا...
شويه انفتح الباب السحاب..
وفايزة ومرة شافوا واحد لابس تيشرت ابيض ع سروال جينز ازرق وع راسه طاقيه زرقا واقف حداه..
ماكانش باين شكله..
ومروة وفايزة ماركزوش فيه..
خشت فايزة بالسياره..
درست داخل ع طلعة فوزيه ومناسك بش يستقبولهم..
مروة ومناسك ضموا بعض بحراره..
هو اللي كان داير روحه يسقي في الغرس كان يسرقلهم في النظر وهو يقول..
/الجو اللي يديروا فيه امس بس بدت العطله!
☘مناسك بفرح؛واخيرا جيتيني..
ضحكت مروة وقالت؛الله يبارك حوشكم يجنن..
مناسك؛مازال كان تشوفي داري..خدت مروة من يدها وقالت وهي تمرر في نظرها بينهم...
/بنمشوا لداري ماما خالتي فايزة..
ضحكت فايزة..
وفوزيه وهي مبتسمه قالت..
/انطلقوا..
وجبدت مناسك مروة وخشت بيها تجري..
فوزيه:بالشويه ع البنت!
☘وهو قال..
/متخلفه اختي هادي..
🍃ودخلت فوزيه فايزة للحوش..
وهو وخر عن الغرس ومشي خش للمربوعه الخارجيه بش يقعد فيها لين يروحوا..
🍃🍃🍃🍃🍃
"تو نكلمك يوميا بإذن الله لما نفضى"
نسرين وهي ترتبله في شنطته:ان شاء الله
ربيع وهو واقف حدا الدولاب..
/ويوميا هاه يوميا نبيك تبعتيلي صور يويو..
ابتسمت وقالت؛حاضر..
تنهد وقال:ان شاء الله تفرج والمرة الجايه نسافروا مع بعض..
هي التفتت عليه بعدين قعدت تمشيله وتقول..
/ماتخممش فينا حني هني امورنا تمام صفي ذهنك لشغلك وبس..
قرص خدها وقال:بنستاحشكم يابنور..
عقدت حواجبها وضرباته بيدها ع صدره..
وهو ضمها لقلبه وقعد يضحك..
نسرين وهي تضحك بعصبيه؛بارد..
🍃🍃🍃🍃🍃
الساعه 4:00قبل العصر..
تشوف للمرايه وهي تقول..
/الله يبارك ع ايدياتك جبتي اللون زي مانبيه بالزبط.
فايزة بإبتسامه؛هدا اللي نبيه الحمد لله..
فوزيه بضحكه؛حي كان يشوفوه بناويتي لما يهبلوا ويندموا اللي صبغوا عند غيرك..
ضحكت فايزة..
فوزيه؛يعطيك الصحه يافايزة..ضحكت بحماس وقالت..صغرتيني يعطيك الهني..
فايزة بضحكه:شن صغرتك هادي مازلتي صغيره نهاري..
فوزيه بإبتسامه؛سلمها ياربي..
"امي"
فوزيه؛هدا ولدي شويه وجايتك..
وناضت ومشت طلعت من حداها..
وفايزة تشوفلها وهي تقول..
/خودي راحتك..
🍃برا..
فوزيه وهي جايه لمالك قالت؛خيرك شن تبي!؟
مالك؛اشيه اشيه اشيه شن هدا فوزيشن شاكيرا رقم 2
فوزيه بضحكه؛جديات قنين؟
مالك غمزلها وقال؛تو يقولك الحاج..
ضرباته ع ذراعه وقالت:ياللي ماتتحشم..شن تبي جاي مش قتلك شد المربوعه وفكني من طروحك..
مالك؛والله شديتها وماجيت الا بالغدي..
فوزيه بفرح؛الله! سلم وليدي والله كنت نخمم فيه..
ابتسم وقال؛هي غدي ضيوفك ولما يروحوا كلميني طول..
فوزيه وهي تشوف في الغدي..
/باهي باهي..برا انزل تحرك..
هو مشي وفي طريقه شاف لدار اخته مناسك ابتسم ع جنب بعدين غير عيونه القدام وكمل طريقه ونزل من الدروج..
🍃🍃🍃🍃🍃
وفي حوش المهدي قدام شقة عبد القيوم..
ربيع؛اني وصيت خوي ع المطعم لكن الحق وبيني وبينك ماينعباش عليه هلبه مرة مرة دير دورة عليه..
عبد القيوم هز راسه وهو مبتسم وقال..
/حاضر..حط يده ع بطن ربيع وقال..حط في بطنك بطيخه صيفي..بعد يده وكمل يقول...وان شاء الله ترد وامورك كلها تمام وراهو ماعندك وين تهرب من الزردة نبوها عليك هالمرة من ألف للياء..
قاله؛غير اعبى..
فنص عبد القيوم..
ضحك ضحكته المميزة وقال..
/حاضر حاضر والله حاضر هي ماتبي شي؟
عبد القيوم وهو مبتسم:سلامتك يانصي..
ابتسم ربيع وحضنه وهو يقول..
/شد روحك ورد بالك..
وتباعد عنه بعدين مشي نزل بسرعه وخلاه في حالة عدم استيعاب...شن قال!؟...وشن قصده باللي قاله!؟
🍃وفي مكان بعيد عنهم..
كان مختار في فيلا لأحد معارفه..
تغدا عنده وبعد الغدي قعمزوا تكلموا مع بعض في مشاريعهم المستقبليه وشغلهم مع بعض..
مختار وهو مبتسم؛هي بس هالخدمه تخلي الورقه هادي تتوقع..توقيع بس وصدقني حنتفاهموا هلبه القدام وحيكون في بينا شغل اكبر من اللي باديين فيه توا..
:خدمة بسيطه جدا لواحد زيك يامختار بصراحه توقعت طلبك يكون اكبرمن هكي..
مختار:لالالا..اني نبي هالخدمه وبس مش طالب لاأكبر ولاأكثر من هكي..
هز راسه وهو يقول؛اعتبره صار خلاص..
مختار وهو مبتسم قال؛بعد ساعه طيارتي بنسافر واني نراجي منك في خبر تقولي فيه تم وبس..
:في أقرب وقت إن شاء الله..
هز راسه وهو مبتسم ويقول..
/إن شاء الله..إن شاء الله..
🍃وطلع من عنده طول للمطار..
ولما وصل غادي..
السواق متاعه نزل الشنطه وقاله..
/توا جاني خبر من هدوكا الجماعه الموضوع هداكا تم..
مختار ابتسم وقال:كويس كويس.. Aufwiedersehen!
" الي اللقاء بالألمانيه"
وخدي منه الشنطه ومشي..وبعدين طلع السواق من المطار...
🍃🍃🍃🍃🍃
"طوبى..طوبى"
فتحت عيونها وشافت قدامها بنت اختها اريج..
ضيقت عيونها وقالت..
/اريج!
اريج:العصر يذن..
عقدت حواجبها وقالت..
/شني!!؟
اريج وهي تحول في وشاحها..
/قتلك العصر العصر يذن تسمعي فيه؟
ناضت قعمزت بالشويه عليها وهي تقول بإندهاش..
/قصدك اني رقدت للعصر!
اريج بإستغراب؛علاش من امتى راقده!؟
مسحت ع وجهها وهي تقول..
/بعد صليت الظهر حسيت روحي تاعبه شويه قلت نتكا شويه ونوض ندير شربة شوفان لغرفه..حطت ايديها فمها وهي تثاوب بعدين قالت..ورحت فيها للعصر..
اريج:سعدودك كيف قدرتي ترقدي في هالجو..
طوبى حطت يدها ع فستانها جهة الظهر لقاته مبلول..
/نقطر..تعرفي والله ماحسيت بحاجه!.
اريج في نفسها.."مش منك"..بعدين قالت..
/خلاص نوضي خودي دوش نستناك..
طوبى ناضت وهي تقول..
/ياحي ياقيوم لاإله إلا انت..
ومشت بتطلع من الدار وهي تقول..
/كملي جميلك روجه ودوريلي حوايج..
وطلعت من الدار..
ضحكت اريج ضحكة خفيفه ومشت بدورلها ع حوايج..
🍃وفي هالوقت..
في الطريق..
فايزة ومروة مروحين من حوش اهل مناسك..
ومالك وراهم يوصل فيهم بسيارة تانيه غير سيارته..
وقعد وراهم لين خش بيهم للشارع..
فايزة وهي تشوف من المرايا..
/الوليد قاعد ورانا ..
مروة بضيق؛وعلاش مفروض لفم الزنقه ولف ورجع ناقصين حني..
فايزة بشي من الغضب والانفعال..
/طز فيهم ناس ناقصه كلهم احقر من بعض..
استغربت مروة في رد امها الانفعالي وماعلقتش..
🍃وقدام القهوة..
كان محمد مقعمز مع صاحبه...
شافهم...
وركز في السيارة اللي ورا سيارتهم..
خشت فايزة بسيارتها للحوش..
ومالك بعدين لف..ونزل مرش الباب متاعه وخطم من قدام القهوة..
هو لما شافه فار دمه..قعد يتبع في عيونه وصاحبه يقول..
مؤيد وهو يشوف للسيارة؛شكلهم عيلة معبيه...
محمد بضيق:فوت..في شن كنا نحكوا؟
مؤيد ابتسم ع جنب وقال:ع مبابي...
🍃🍃🍃🍃🍃
ماشيه في ممر القسم اللي فيه صاحبتها..
لقتها واقفه بروحها وتبكي..
اميمه بضيق:ان شاء الله مش حسين بس!..
وصلت فيها ووقفت عليها وهي تقول...
/حسنا خيرك تبكي!؟
مسحت دموعها وقالت..
/تعاركت اني ودكتور قصي..
اميمه:علاش!؟
حسناء:اني لبزت شويه وهو ماخلا ماقالي قدام الدكاترة مسح بيا الأرض..
اميمه:شن درتي!؟
حسناء تأففت بضيق:اني الفترة هادي دماغي مش عليا نفكر ناخد اجازة ولانسيب بكل..
اميمه بصدمه؛علاش هدا كله!؟
تنهدت حسناء بضيق وقالت..
/خوي شدوه..
اميمه بفجعه:علاش شن دار؟
حسناء ودموعها ينزلوا..
/والله ماعارفين كل مرة حد يقول حاجه معاش عرفنا هو بريء ولامظلوم..ولامعاد عرفنا حاجه..
اميمه بضيق:لاحول ولاقوة الا بالله باهي امتى صار هدا..
حسناء:ليه تلاته ايام لتوا..
اميمه بعتب:وداسه عليا ياحسنا!؟
حسناء بضيق:الحق خفت نقولك تعاودي لخوك وهو يكلمني بش يتشمت فيا..
اميمه:شن تقولي انتي!حسين صح متعصب شويه للتوجه متاعه لكن ماتوصلش بيه لهني!..
حسناء:يعني كان اتصلت بيه وقتله مرات يساعد..
اميمه؛وشن تراجي كلميه واحكيله يحرج منك هلبه كان يسمع من برا..
حسناء مسحت دموعها كويس وقالت..
/باهي تو بعدين نكلمه ونحكيله خل نمشي نشوف شن وراي قبل لنحصل هزيبه تانيه..
ومشت وخلت اميمه وهي موجوعه ع حالها وضميرها يأنب فيها..
🍃🍃🍃🍃
"والله ماني عارفه كيف رقدت هكي!؟"
فردوس:خشيت عليك نوضتك تقلبتي وفتيني..
ضحكت وقالت؛والله ماحسيت بيك..
مطيره؛نوم العوافي بنتي ..
طوبى:شكلي بنولي نرقد مرة تانيه الدار بارده..
غرفه؛الحمد لله الضي اليوم هرب سبعه ساعات في النهار معناها الليله بنرقدوا وحني مرتاحين..
طوبى؛حيي! شربة الشوفان!
فردوس بضحكه؛درتهالها..
طوبى شافت لغرفه بأسف وقالت..
/اسفه روفي..
غرفه بضحكه:عوضيني عليها غدوة...
طوبى:ان شاء الله...
🍃ع خشة فايزة ووراها آلاء اللي فتحتلها الباب..
فايزة:السلام عليكم..
هما ردوا عليها؛وعليكم السلام..
مشت قعمزت جنب طوبى وقالت؛شن حالكم اليوم.
كلهم بأصوات متقطعه..
/الحمد لله...
مطيره؛كنتي عند الزبونه؟
فايزة؛ايه..
طوبى:شن درتيلها؟
فايزة:صبغتلها ودرتلها فتله وتوابعها..
مطيره:الاسبوع الجاي عرسهم..
فايزة:ايه تفاهمت معاي ع تلاته ايام..الكسوة ليها ولبناويتها والحفله ليها هي والمحضر هي وياهم..
طوبى:خلي هناء تمشي معاك امس كلمتها وقالتلي استاحشت الخدمه..
فايزة:والله ديما في بالي هي اكثر وحده امورها تمام؟
طوبى:تمام الحمد لله ماناقصها شي..
فايزة؛باهي الحمد لله..اني اصلا هكي ولاهكي كنت ناويه نقوللها بس فكرت في حكاية المواصلات..
طوبى:تجيك هني وتمشي معاك وفي المرواح نروحوا بيها حني حوشها مش بعيد في *****
فايزة:ايه صح هي غادي نحطها في طريقي وحني مروحين..
طوبى:خلاص شوفيها..
مطيره:امتى بتفتحي المزين مرة تانيه؟
فايزة:بعد العرس هدا ع طول توا موسم اعراس فرصه..
آلاء:تو نديرلك اعلان..
غرفه؛الاء للدعاية والاعلان..
ضحكوا فايزة وطوبى وامها ومطيره قعدوا مبتسمات..
الاء:والله جديات نفكر نخلي صفحتي للآعلانات..
ع خشة اريج وهي ترفع في شعرها المبلول..
/شن جو فزفز..
فايزة؛تمام..نعيما..
قعمزت اريج وهي تقول:الله ينعم عليك..
غرفه؛قتلك فايزة..
فايزة:نعم ؟.
غرفه؛اني حكيت لرؤوف قصة المركز وشن صار فيه قالي قوليلي امتى بتولي تفتح بس واني نديرلها حل في حكاية الامن..
ابتسمت بإحراج وقالت..
/غير علاش ياغرفه مشكله ومشت ع حالها..
مطيره:لاياحنه لازم تاخدي احتياطك..ماتعدليش عليها غرفه قوليله يديرلها حراسات..
ضحكوا..
غرفه:صاحبه اسكندر احلى بادي قارد يافايزة..
مطيره:خو سموره الله يبارك عليه عليك زين عنده مواليد كم هو..
غرفه؛روفا قالي اصغر منه بسنه معناها مواليد 81
مطيره؛مش صغير هلبه شراده..
فنصت فايزة وقالت؛تدوي من جدها!!؟
قعدوا يضحكوا..
واريج وهي تسمع فيهم يحكوا عنه تفكرت الموقف اللي صارلها معاه انحرجت..
مطيره:والله سميره قريب تهبل تبي تزوجه قالت هالكتيبه معاش خلاته يفكر في حياته بكل..
طوبى:قوليلها خليه ع راحته كان مايبيش يتزوج ماتجبراش وتحصل بنت الناس فيه..
سكتوا وهما يشوفولها للحظه بعدين فايزة قالت..
/صح كلام طوبى..الحاجه هادي مايغصبوش عليها
مطيره؛مزبوط..المهم..قالتلي الايام هادوا بنجي نهدرز..
طوبى:مرحبتين بيها..
مطيره بإزدراء؛خير من جيران العازة والقهرة شوفي من بعد العيد من دورنا ولاعدل علينا..
بدت ع وجه فايزة ملامح الضيق..
وتفكرت المكالمة اللي دارت بينها وبين حماة بنتها عواطف..
🍃《"والله هكي سمعنا يافايزة قالوا تبي تطلق ع خاطره"
فايزة بغضب؛قلل قولهم ان شاء الله شن هالناس اللي
ماتخافش ربي كيف يطلعوا دوة زي هادي ع طوبى مايعرفوهاش هادي بنت شارعهم بنت لطفي الواعر!
"ماهو يافايزة الدوة طالعه من حوش شيابينها "
فايزة بكره؛حوش شيابينها هادم مش عارفه ربي شن
بيديرلهم..
"علاش خيرهم شن دايرين"
فايزة:الله لايربحهم وخلاص هدا اللي عندي نقوله معليشي عواطف بنسكر بالسلامه 》
🍃استاقظت من سرحانها ع صوت مطيره وهي تقول..
/معاش ريتي حد من الجيران!؟
فايزة:الحق لا معاش ريت حد ولاقابلني حد..
هزت مطيره راسها وهي مضايقه..
غيرت فايزة نظرها لطوبى لقتها سرحانه..
ووقتها طوبى وهي تسمع فيهم تفكرت اللي صار معاها لما مشت للسوبر ماركت وقعدت تفكر فيه...
🍃🍃🍃🍃🍃
"تفضلي"
خدت نجاة فنجان النسكافيه وهي تقول..
/صحيتي..
ابتسام:خودي حلو خيرك!
نجاة؛حاجه وحده ع خاطرك مدايرة رجيم الفترة الهادي..
ابتسام:لا اليوم خودي اجازة ..
ابتسمت نجاه وخدت حاجه حلوة وقالت..
/صحيتي..
حطتها ع حافة صحن الفنجان..
ابتسام حطت السفره وقعمزت وهي تقول..
/قداش ليك دايرة رجيم..
كيف جت بترد عيلها طاح طرف الحلو قالت:ايااح..
ومدت يدها التانيه بتاخده ينكفي فنجان النسكافيه ويتبزع ع سروالها..
عيطت بوجع..
وابتسام ناضتها وخدت منها الفنجان وقالت..
/نوضي حبيبتي نوضي للحمام..
ناضت نجاه وهي تقول بضيق واحراج..
/عليك عمله..
ابتسام؛صار خير حبيبتي..
🍀ورفعتها للحمام..
خشت نجاه...وهي مشت لدارها طلعتلها بنطلون ليها بش تلبسه..
حطاته ع السرير وطلعت من الدار..
لقت نجاة طالعه من الحمام قالت..
/غسلتيه؟
نجاة بضيق وهي تشوف لسروالها؛ايه..
ابتسام؛تعالي معاي..
مشت ونجاة مشت وراها..
وصلوا في دار النوم قالت ابتسام..
/البسي هدا لبين مانشرت هداكا وجف..
نجاة:لاصحيتي بارك الله فيك يجف هكي..
ابتسمت وقالت؛جديد اول لبسه..
نجاة:لامش قصدي هكي..سكتت بعدين قالت..باهي تو نلبسه..
ابتسام بضحكه؛خلاص خشي فيسع بش نلحقوا نهدرزوا..
نجاة بإبتسامه؛تمام..
خشت للدار..
وابتسام سكرت الدار...
🍃بدلت نجاة السروال وهي تتفحص في الدار بعيونها..
لين جو ع اطار صورة محطوط ع الزيانه..
قربت منه وقعدت تشوف فيه..
كانت صورة عائليه حلوة..بس اللي لفت انتباهها ليها الراجل..
قالت وهي مستغربه..
/شكله مار عليا! مش عارفه وين شايفه زيه؟
مررت نظرة اخيرة ع الصورة بعدين مشت طلعت...
🍀خدت منها ابتسام السروال ونشراته..
وولوا قعمزوا مع بعض وضيفتها من جديد..
ابتسام؛الصغار منسجمين في اللعب..
نجاة بإبتسامه:اممم..حوشك عجبني ذوقك واضح فيه كل شي نازك وراقي..
ابتسام؛كلك ذوق حبيبتي..
نجاة:تسلمي..قداش ليك متزوجه ابتسام؟
ابتسام؛من 2012..
نجاة:عن حب ولاتقليدي؟
تنهدت ابتسام وقالت:قصتنا قصه..ضحكت وقالت..اني وعبد الفتاح زمان من سنين طويله كنا نبوا بعض وكان في بينا علاقة جديه لما جي فتح مع ماليه الموضوع امه رفضت وسكرت راسها..
نجاة:علاش؟!
ابتسام:قالت ماناخدش لولدي وحده مش متحجبه..
نجاة؛اها..
ابتسام:حني كنا منفتحين بس بحدود مادرناش الغلط ولالينا فيه بس هي حكمت عليا من برا ومن علاقتي بولدها ..
نجاة؛باهي وهو شن دار!؟
ابتسام؛ماقدرش يغضبها وسيبني..وبعدين اني جاني واحد واقفت عليه طول كانت حركة طيش هبله ع اساس اني بنقهره..
نجاة؛يعني انتي كنتي متزوجه قبل!؟
ابتسام:ايه وعشت معاه وماكانش في بينا غير الاحترام وزوز صغار..لعند ماجت 2011 طبعا هو كان عسكري مات تحت قصف الناتو..
نجاة بأسف:لاحول ولاقوة الابالله.
ابتسام؛انوجعت عليه هلبه مهما كان بو صغاري..
نجاة:باهي راجلك اللي توا امتى تلاقيتي انتي وياه؟
ابتسمت وقال؛ف2012صدفه هدرزنا وخدانا الكلام وحنينا لبعض وكأننا ماتفارقناش حسيت قلبي كان ميت ورجع عاش مرة تانيه لما ريته..تكررت اللقاءات ورجع الحب اقوى من قبل ولما قال نبيك مرتي وافقت طول..
نجاة وهي متأثرة:ماتزوجش بكل هو؟
بإبتسامة اسف قالت؛لاتزوج وصغاره كبار اكبر من صغاري من راجلي الاول لأني عطلت هلبه على ماحملت..
نجاة بتعجب:قصدك خشيتي ع مراة تانيه؟
ابتسام بضيق؛برضاها..
نجاة بدهشه؛تعرف!
ابتسام؛ايه تعرف ماتزوجناش الا بعد ماهي وافقت..
نجاة؛مسلمة فيه لهالدرجه!
ابتسام؛حسيته استسلام ظروفها ماتساعدهاش تاخد موقف..
نجاة:مش ظروف كذب عليك كان تحبه والله ماتسلم ولاتخليه ولاترضى وحده تشاركها فيه..انتي كيف متحمله؟
تنهدت وقالت؛غصب عني كل همي اني نكون معاه وبس..
نجاة؛مافكرتيش تخليه ليك بروحك؟
ابتسام؛اكيد فكرت لكن كنت نبعد في الفكرة اني مش خرابة بيوت..
تعبوا عيون نجاة بالدموع وهي تقول..
/لو خشت عليك هي راهي فرقت بينك وبينه ولاتحركت فيها شعره..
ابتسام وهي تشوف للدموع في عيونها قالت..
/صارت حاجه زي هادي معاك ايام راجلك المتوفي؟
ابتسمت نجاة بألم وقالت..
/لا..هو كان يحبني هلبه ومايشوفش في غيري..
ابتسام؛قصدك تزوجتوا عن حب؟
نجاة:علاقه قريب 10سنين كان حنين هلبه عليا وحاطني في عيونه يغار هلبه وكان يلقى مايشوفني حد غيره..حبيت حبه ليا واهتمامه بيا هلبه..الله يرحمه.مادارش معاي الا كل خير..
ابتسام:باهي علاش يبان عليك من عيونك انك متليعه!؟
نزلت دمعه مسحتها بعدين قالت..
/بعد ماتوفى عمي اللي هو بوه كان متكفل بيا اني والصغار ولما طلبته منه يخليني نخدم وافق وحماتي توسطتلي عند..تنهدت وقالت..عند خوها مدير شركة هندسيه خدمني عنده..علاقتي بخوه هدا كانت مش حلوة بكل ايامه هوالله يرحمه لاكان يطيقني ولا اني كنت نطيقه وحسيت انه وافق.يخدمني شفقه منه وفي نفس الوقت ع خاطر بوه..
حمحمت ونزلت نظرها لأصابع يدها اليمين اللي يفركوا في راحة يدها اليسار وقعدت تقول بنبرة مرتعشه..احتكينا ببعض في الخدمه مانندريش ع روحي لقيت روحي حبيته حبيته هلبه..مانقدرش نتحمل يفوت يوم ومانشوفاش فيه وهو نفس الشي تغير معاي هلبه وحسيت ان في شي منه جيهتي وطلع صح..ابتسمت بألم وقالت..صارحني وقالي نحبك ونبيك وعرض عليا الزواج وتزوجنا..لكن في السر..
عقدت ابتسام حواجبها..
ونجاه حكت حاجبها وقالت؛بوه مايقبلش فكرة السلف يرد مرت خوه ممنوعه كانت عندهم فهو قالي راجي عليا لين نقنعه وبعدين نتبثوا الزواج..
ابتسام؛وانتي كيف رضيتي حاجه زي هادي؟
بلعت ريقها وقالت؛قتلك حبيته هلبه قعدت نمشي وراه زي العميا شن مايقول حاضر..
ابتسام بضيق؛باهي بعدين شن صار؟
تبدلت ملامح وجهها للكره وهي تقول..
/عنده اخته شيطانه رجيم من البدايه ماكانتش تحبني وحاربتني هلبه ومن بختي عرفت بزواجنا..
ابتسام؛شن دارت؟
نجاه؛هدداته..
ابتسام؛يايطلقك ياتقول لبوها.
نجاة ابتسمت بتهكم وقالت..
/دارت احقر من هكي بمليون مرة..قالتله يتزوج غيري في العلن وضغطت عليه هلبه بش يوافق..
ابتسام وهي مستاءة:وهو دار ماتبي..
هزت نجاة راسها وقالت
/ايه خاف من بوه هلبه ماقدرش يضحي ع خاطري...وهي الشيطانه مشت خطبتله وحده اصغر منه ب13سنه..ع فكره اني اكبر منه..
ابتسام هزت راسها وقالت؛كملي..
نجاة تنهدت بقهر وقالت:دارلها عرس كبير وولت مرته في العلن قدام الناس واني بالدرقه وفي الظلام..بلعت ريقها وقالت بكره...هي كانت تبيها تجي مني تبيني نسلم فيه ونخليه للفرخه اللي خدتهاله..لكن مش اني اللي يندار فيا هكي..قعدت وراهم لين وصلتهم للطلاق..
ابتسام بضيق:طلقها!؟
نجاة:عن قريب..
ابتسام بريبة؛شن درتي بش اللي وصلتيهم لهني!؟
ابتسمت وقالت؛مادرت شي خليتها تعرف بس..
ابتسام بضيق؛الحق انتي توجعي وحتى هي توجع..
نجاة بشي من الانفعال؛في شن توجع! هادي ابليسه مش بريئة بكل..
ابتسام؛علاش في شن غلطت فيك!؟ اللي غلطوا فيك هما حماتك وراجلك نفسه..نجاة انتي خشيتي خاطري ومانبيش نكذب عليك..واحد زي هدا مايستاهلش تتمسكي بيه لو منك لما سلم لأخته لصقته ع الحيط..شن بندير بواحد مش مستعد يضحي ع خاطري زي ماضحيت ع خاطره وقبلت ع روحي نعيش وضع بايخ اللي زي كنتي عايشه فيه!
نجاة ودموعها ينزلوا؛انتي رضيتي ع روحك تكوني زوجة تانيه..
ابتسام؛رضيت لكن بالأصول مرته تعرف بوه يعرف خوته عارفين مافي شي فالظلام يا نجاة والله لو طلب مني نعيش نفس الوضع اللي عشتي فيه لو روحي فيه ماخديته..
نزلت نجاة عيونها ودموعها مازال ينزلوا..
كلام ابتسام ماعجبهاش بكل..
ابتسام؛صدقيني يانجاة مايستاهلش..
رفعت عيونها فيها وقالت؛نسألك سؤال؟
هزت راسها وقالت؛اسألي..
نجاة؛صغارك من راجلك الاول وين؟
بدت ملامح الحزن ع وجه ابتسام وهي تقول..
/خدتهم جداهم ام بوهم..
نجاة؛ع خاطر تزوجتي ولا؟
هزت ابتسام راسها وهي مضايقه..
نجاة؛يعني ضحيتي بيهم ..
ابتسام ماعرفتش ترد ع نجاة..
نجاة برفعة حاجب؛شفتي ياابتسام ع خاطر الراجل اللي تحبيه شن درتي..واني ع خاطره مستعده ندير كل شي واي شي بش يكون معاي ليا بروحي اني بس..
🍃🍃🍃🍃🍃
الساعه 10:46ليلا..
في حوش حسناء..
كانت مقعمزة جنب امها اللي رقدت ودمعتها ع خدها..
شويه جتها وحده من نساوين خوتها ونخصتها من كتفها واشرتلها تلحقها..
ناضت طول ومشت وراها..
🍃خشوا لدارها ..
سكرت مرت خوها الباب وقالت..
:خيره خطيبك لاسأل ولادور ولاجي!؟
حسناء بضيق واحراج؛مش في طرابلس قاعد في سرت ليه اسبوع..
؛باهي ياستي يتصل ويسأل راهو بوك وخوتك طايرتلهم منه هلبه..
حسناء بضيق؛ماهو مايعرفش..
هي بإستغراب؛كيف مايعرفش!؟ ماقلتيلاش!؟
حسناء هزت راسها وهي مضايقه ع الآخر..
:كيف ماتقوليش ياحسنا وتحطيه في هالموقف!؟
قعدت حسناء ساكته وهي منزله عيونها للأرض ماعرفتش بشن ترد..
تنهدت مرت خوها وقالت..
/اني كلمتك بش تلحقي تتصرفي وماتصيرش مشاكل اتصلي بيه خبريه ياحسنا..
ولفت فتحت باب الدار وطلعت..
وحسناء تمنت وقتها لو تموت وتخلص من حياتها من كثر مانفسيتها كانت تاعبه من اللي صاير معاها..
فجأه..
سمعت صوت رساله جت لتليفونها..
مشت للكامدينو وخداته..
شافت الشاشه كانت الرساله واصله من رقم غريب..
فتحتها طول..
(نصيحة لوجه الله سيبي حسين الواعر
راهو دايرك غطا ع علاقته ببنت عمه سيبيه قبل لهو يسيبك بعد ماتطلق بنت عمه)
حسناء حست بجسمها ثلج وهي تقرا في الكلام اللي مش قادره لاتصدقه ولاتستوعبه من أصله..
لعند ماتوصلها رساله فيها الصورة..
بلعت ريقتها من الخوف..
وباصابعها المرتعشه كبرت الصورة بش تشوف اللي واقفه معاه...الهيئه والشكل لطوبى..
وين عرفتها طوبى..
عقلها طول استدعى كل المعلومات المخزنه فيه اللي تخصهم هما الزوز ...
لما نساها في المستشفى يوم رفع طوبى للمصحه لما تعبت اول مرة..
بعدين استكراده ليها بعد ماعرف بمشكلة طوبى مع الجالي..
واخر شي وين خشت طوبى المصحه بسبب اللي صار في المدرسه وكلامه ليها عن اللي صار مع طوبى بحرقه وقهر...
🍃هي كانت بدت تشك في وحده تانيه في قلبه بس اميمه باعدت هالشك لما نفاته تماما وهي عندها ثقة كبيره في اميمه..معقوله اميمه تخونها وتخذلها!!؟
حست الدنيا لقت بيها حست روحها بتفقد الوعي بتنهار..
لااراديا رفعت تليفونها وحطت ع رقم حسين واتصلت بيه...
نادى لين فصل..عاودت مرة تانيه...نادى مرة تنين تلاته..
وفي الرابعه رد...
"ايوه"
تمالكت نفسها وقالت؛ايوه بروحك انت!؟
"ايه اصلا طلعت من حدا الجماعه من قبل تتصلي كنت ناوي نكلمك..خبرتني اميمه ع اللي صار لخوك وسألت وشفت الموضوع للاسف خوك مداير شي كبير هلبه"
هي بصدمه:شن داير!؟
"خوك اللي داير روحه ثائر ويطالب بالحريه قاتل ناس من ***** حرق مسكر عليهم مخزن ووالع فيهم النار.."
هي حست بقلبها هبط مرة وحده..
وهو مكمل يقول..
"هدا اللبز اللي ياما حكيت عنه وقتلك قبل هادي مش ثورة هادي نكبة ع جميع الاصعده وخوك خير دليل بش تعرفي ان الدوة اللي قلتها قبل مش من فراغ"
شدت ع قبضة يدها بقوة ورفعت حاجبها ودموعها ينزلوا وهي تقول..
/متشمت انت!
"لااللهم لاشماته بس قاعد نوضحلك قصدي مش اكثر ع العموم تو نروح ونجيكم غادي ونهدرز ع بوك وخوتك"
هي قالت..
/وبالمرة انهي اللي بيني وبينك خلاص..
"نعم!!؟"
حسناء بغل:ماتستاهلش صبري عليك والله ماتستاهل فوق حقارتك قاعد تتشمت فيا وفي خوي هدا بدل ماتهون عليا..ضحكت سخريه وهي تقول..لكن طبعا مش اني اللي تهون عليها وتضايق ع خاطرها هديكا حبيبة القلب بنت عمك الحقيره اللي ينقاللها طوبى ياحقير انت وياها..
"ضمي فمك واسكتي ياتافهه خير مانبدا نخرط عليك شن الدوة المسخه اللي تقولي فيها هادي!؟"
حسناء بغضب وهي تبكي..
/المسخين انت وبنت عمك هادي اللي دايرة روحها ملاك نازله من السمي ويصلوا ع طرفها ولااختك اللي دايرتها صاحبتي درتوني لعبه ياكلاب..
"وربي المعبود ياحسنا تزيدي كلمة تانيه تشوفي مني شي عمرك ماشفتيه"
هي قالت:اكثر من هكي!! اكثر من اللي عرفته شن مازال بدير!؟ شن قالولكم عليا قولي بش دير فيا هكي ديرتوني لعبه بيناتكم تخطبني بش تغطي حقارتك انت وبنت عمك!؟..
قاطعها بصوت غاضب وهو يقول.
"اسمعي جاي اسمعي..اغلطي فيا وقولي فيا اللي بتقوليه لكن طوبى لا ردي بالك طوبى خط احمر"
هي بصدمه وبكي..
/معناها حق..! معناها انت تحبها وتبيها وناوي تاخدها بعد تطلق ياتافه!؟
"ايه باهي..ايه نحبها ونبيها وبناخدها بعد تطلق باهي هكي..وتوا بري اقلبي وجهك "
وسكر عليها..
وخلاها من الصدمه حست قلبها بيوقف..
شويه انفتح عليها باب الدار وخشت مرت خوها وهي تشوفلها بعدم استيعاب..
وحسناء جامده في مكانها ع نفس وضعها والدموع ينهمروا انهمار...
🍃🍃🍃🍃🍃
" سُورَةٌ أَنزَلْنَاهَا وَفَرَضْنَاهَا وَأَنزَلْنَا فِيهَا آيَاتٍ بَيِّنَاتٍ لَّعَلَّكُمْ تَذَكَّرُونَ ، الزَّانِيَةُ وَالزَّانِي فَاجْلِدُوا كُلَّ وَاحِدٍ مِّنْهُمَا مِائَةَ جَلْدَةٍ وَلا تَأْخُذْكُم بِهِمَا رَأْفَةٌ فِي دِينِ اللَّهِ إِن كُنتُمْ تُؤْمِنُونَ بِاللَّهِ وَالْيَوْمِ الآخِرِ وَلْيَشْهَدْ عَذَابَهُمَا طَائِفَةٌ مِّنَ الْمُؤْمِنِينَ ".
مقعمزه في الصاله بروحها تحت الشباك اللي كان مفتوح ويدخل في البروده..
يد حاطتها ع بطنها وتمسح عليها..
واليد التانيه شاده بيها المصحف وهي تقرا في سورة النور..
هالمرة ماكانتش خاشعة..
ماكانتش مطمنه كانت كلها قلق..
حاولت تتغلب ع شعور القلق ماقدرتش كان اقوى منها..
قعدت تقرا واغلب الكلام مش مركزة فيه..
قرايتها صحيحه بس من غير تدبر...
لعند ماوصلت في الآيات..
إِنَّ الَّذِينَ جَاؤُوا بِالإِفْكِ عُصْبَةٌ مِّنكُمْ لا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ
لَوْلا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَذَا إِفْكٌ مُّبِينٌ
لَوْلا جَاؤُوا عَلَيْهِ بِأَرْبَعَةِ شُهَدَاء فَإِذْ لَمْ يَأْتُوا بِالشُّهَدَاء فَأُولَئِكَ عِندَ اللَّهِ هُمُ الْكَاذِبُونَ
وَلَوْلا فَضْلُ اللَّهِ عَلَيْكُمْ وَرَحْمَتُهُ فِي الدُّنْيَا وَالآخِرَةِ لَمَسَّكُمْ فِي مَا أَفَضْتُمْ فِيهِ عَذَابٌ عَظِيمٌ
إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ
وَلَوْلا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَذَا سُبْحَانَكَ هَذَا بُهْتَانٌ عَظِيمٌ
يَعِظُكُمُ اللَّهُ أَن تَعُودُوا لِمِثْلِهِ أَبَدًا إِن كُنتُم مُّؤْمِنِينَ
وَيُبَيِّنُ اللَّهُ لَكُمُ الآيَاتِ وَاللَّهُ عَلِيمٌ حَكِيمٌ
إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ وَاللَّهُ يَعْلَمُ وَأَنتُمْ لا تَعْلَمُونَ
وَلَوْلا فَضْلُ اللَّهِ عَلَيْكُمْ وَرَحْمَتُهُ وَأَنَّ اللَّه رَؤُوفٌ رَحِيمٌ
يَا أَيُّهَا الَّذِينَ آمَنُوا لا تَتَّبِعُوا خُطُوَاتِ الشَّيْطَانِ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاء وَالْمُنكَرِ وَلَوْلا فَضْلُ اللَّهِ عَلَيْكُمْ وَرَحْمَتُهُ مَا زَكَا مِنكُم مِّنْ أَحَدٍ أَبَدًا وَلَكِنَّ اللَّهَ يُزَكِّي مَن يَشَاء وَاللَّهُ سَمِيعٌ عَلِيمٌ
وَلا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ
إِنَّ الَّذِينَ يَرْمُونَ الْمُحْصَنَاتِ الْغَافِلاتِ الْمُؤْمِنَاتِ لُعِنُوا فِي الدُّنْيَا وَالآخِرَةِ وَلَهُمْ عَذَابٌ عَظِيمٌ
يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ
يَوْمَئِذٍ يُوَفِّيهِمُ اللَّهُ دِينَهُمُ الْحَقَّ وَيَعْلَمُونَ أَنَّ اللَّهَ هُوَ الْحَقُّ الْمُبِينُ
الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَة وَرِزْقٌ كَرِيمٌ¤
وقفت عن القرايه وقعدت تتفكر في اللي صار معاها اليوم..
بعدين تفكرت كلام عمتها عن الجيران...
ويحس بين عيونها اخر موقف صار بينها وبين صفيه مرت عمها..
سكرت المصحف وحطاته ع الفراش اللي حداها وهي مازال تفكر بخوف..
شويه وناضت بعدين مشت بخطوات فيها شي من الثقل.
لين وصلت في الكوجينه..
خشتلها..لقت اريج فيها مطلعه باكو عصير مصقع تشرب فيه..
حست بحد خش عليها..التفتت شافت طوبى واقفه..
ملامح وجهها خلوها تخاف...
حطت الباكو ع الرخامه وقالت..
/تبي حاجه؟
بلعت طوبى ريقها وقعدت تمشي بإتجاه الكرسي جبداته وقعمزت..
اريج قربتلها وجبدت كرسي وقعمزت مقابلها وقالت..
/خيرك بيبو؟
شدت طوبى يدها اليسار بيدها اليمين وهي تقول بقلق وشي من الارتباك..
/اني..ليا فترة نطلع من الحوش..للجامعه ولا المدرسه بس قصدي ماخالطت حد من الجيران ولاشفت حد..بلعت ريقها وكملت تقول...لكن اليوم قلت لعبير وهي مروحه بيا تحطني قدام السوبر ماركت..المهم لما خشيتله..مش عارفه كيف حسيت ان في شي مش طبيعي..
اريج بقلق:كيف!؟
طوبى حكت رقبتها بالجنب وقالت..
/وفاء تعرفيها اللي تخدم غادي تعرفي جونا معاها مليح وديما تحب تهدرز وتبصر معاي قبل...اليوم حسيتها تكلم فيا من فوق نفسها وماتبيش تشبحلي حتى الشبح..مش هي بس..حتى بنت جارنا الجعفري دارت معاي نفس الشي..وبنات جارنا خليفه..هادم..داروا روحهم ماشافونيش بكل..
حكت يدها وقالت...مش عارفه ياأريج اني هكي نتوهم.!!؟ اني بديت نحس ان تفكيري ولى متغير هلبه اي موقف يصير ولاكلمة نسمعها نقعد نفسرها الف تفسير وتفسير وكلها تفسيرات سودا..معاش بدت عندي حسن نيه جهة حد بكل..الحاجه هادي مخوفتني هلبه..خايفه تأثر عليا القدام هلبه وتوصل فيكم حتى انتم..
اريج كانت تسمع وتشوفلها بحزن..
تفكرتها زمان كيف كانت وقعدت تقارن فيها باللي قاعده تشوف فيها قدامها..
طوبى زمان شكل..وطوبى اللي قدامها شكل تاني..
طوبى اللي قدامها مالهاش علاقه بطوبى خالتها واختها اللي تربت هيا وياها وتعرفها كويس...
طوبى الواثقه من نفسها اللي كانت ديما مشرقه والكلام معاها يطمن القلب ويريح النفسيه..
تحولت لوحده محطمه متخبطه..كلامها كله يوجع القلب ويخوف...
تأكدت اكثر لما سمعتها كملت كلامها بموضوع بعيد عن اللي كانت تحكي عنه بعد مامسحت جبهتها وقالت..
/كان تشوفي حال الابلات والناس اللي كانت تخدم في المدرسه اليوم كان تشوفي وجه الغفير..اني قطعت رزق الناس هادي كلها..خليتهم اليوم حايرين مش عارفين شن يديروا...
ضمت ايديها لبعض وقعدت تبكي بصمت وهي منزله عيونها..
واريج تشوفلها بألم..
وقفت بكي وهي تقول بنبرة باكيه...
/زعمه حق نية الجالي!! لما درقت خبر الحمل!..غلط اكبر غلط اصلا هذا ذنب وربي عاقبني عليه في اللي صار للمدرسه..طلعت من عبره..بعدين كملت تقول..حاسه المشكله فيا اني اصلا..اني فيا حاجه غلط يااريج لكن مش عارفه شن هي..!؟
"طوبى"
لما سمعت نبرة الصوت الحازمه تبعت مصدرها..
وشافت عمتها واقفه للباب تشوفلها بصرامه..
سكرت الباب...
ومشت خدت كرسى وقرباته منها وقعمزت وهي تقول..
/شدي روحك وخليك قويه راك بنت لطفي علي الواعر ورباية سدرة الواعر مش انتي اللي يكون هدا حالك...انتي ماغلطيش وحتى كان غلطي غلطك تتعلمي منه مايصغركش..وحطي في بالك ان اللي زيك انتي ربي يحبهم هدا علاش ديما يختبر فيهم وتعرفي شن اكثر حاجه ربي مختبرك فيها!؟ ظنك بيه يابنتي..يعني كان بتقولي ربي يعاقب فيا وانتي مش دايرة غلط حتعيشي روحك في عذاب لكن قلتي ربي يكفرلي في ذنوبي ويبي يعطيني اجر الصبر تعيشي في نعيم..وراهو هدا كلامك انتي اللي ديما تقولي فيه...شني طلع الكلام ساهل ياطوبى!
قعدت طوبى ساكته وهي تشوف في الفراغ وتفكر في كلام عمتها..
واريج تشوفلها...
مطيره:راهو بوك الله يرحمه كان يشوف فيك قويه وقد روحك تبي طلعيه غالط في نظرته ليك قولي!؟
غيرت نظرها لعمتها..
مطيره شدت ذراعها بقوة وهي تقول..
/مادام مادرتي شي غلط خليك شامخه رافعه راسك ماتخلي حد يشوفك هكي حتى حني ماتخليناش نشوفوك هكي كان تبي تبكي وتشكي خليها بينك وبين ربي قدام الناس خليك قويه وعاصيه مايقدر حد يكسرك..اما كانك ع كلام الناس حطيه تحت رجلك تعلي عليه..لادوريهم ولاتعدلي عليهم هادوا يراجوا في الباهي ع الغلط بش يطلعوه ماينفعش ويشوفوا ارواحهم خير منه..طز فيهم كلهم من اكبر كبيرهم لأصغر واحد فيهم..انتي طوبى الواعر ظفرك برقابهم كلهم..
🍀كلام مطيره اثر في اريج ورفع معنوياتها..
اما طوبى حست ان ربي بعتلها عمتها بش تعطيها جرعة من كل شي..
ايمان..قوة..ثقة بالنفس..طمأنينه..
وجمع بيها شتاتها...
لقت روحها في لحظه ضامه عمتها بقوة وهي تقول..
"نحبك"
مطيره بضحكه؛واني نموت فيك وانتي طوبى هديكا اللي مسحت بالعنقروفه الوطا وخلتها تطلع ملزوزه..
اريج بضحكه؛وووك عليا هداكا اليوم قداش مافتفتت..
طوبى وهي ضامه عمتها..
/عطوها حسناتكم عطوها..
مطيره:لاياوخيتي اني نشحت فيهم شحاته فكوناز من سيرتها العافنه اللي تركب الذنوب..
تباعدت طوبى عن مطيره وهي تضحك علي كلامها مع اريج...
🍃🍃🍃🍃🍃
الساعه2:14بعد منتصف الليل..
في الجنان جهة الكوجينه وسط الجو اللطيف..
كانت مقعمزه ع الكرسي بعد ماصلت القيام وهي تناجي في الله سبحانه وتعالى..
"ليك الحمد ياربي ع لطفك بيا ع كل شي درتهولي بش تخفف عليا..لكن اني ياربي قاعده خايفه ومش مرتاحه..ياربي آمن خوفي وريح قلبي يارب ماليش غيرك..ياربي"
🍃🍃🍃🍃🍃
تاني يوم..
الخميس...
12 من شهر يوليو...سنة 2018..
الساعه 12:35قبل الظهر...
خشت لمصحة القدس وهي مندفعه بغضب..
سألت عليها دلوها ع مكانها...
مشت وين ماقالولها لين لقتها واقفه مع زملاء ليها كانوا يتناقشوا عن حالة...
وقفت وراها وقالت..
/اميمه..
التفتت وشافتها ملامح وجهها ماتبرش بالخير..
حسناء بغضب مكتوم؛تعالي..
وتباعدت..
اميمه وهي تشوفلها بقلق تباعدت عن زملائها ومشتلها...
ووقفوا ع بعض..
اميمه؛ان شاء الله خير!
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
"وهادوا هوبي واوبي وهما يدوشولهم..وت عليا اني من جمالهم"
هادي طوبى تصور في عمتها وفردوس وهما يدوشوا للتوأم..
وامهم مقعمزه ع السرير تتفرج عليهم وتضحك..
طوبى بإبتسامه:عساسيلي ياناس..
نشوفولهم ولبسوهم...
طوبى وهي تصور:وتوا ولوا نظافه قطافه وريحتهم مسك..
مطيره بإبتسامه؛عقبال ماندوشوا لجنيوه..
طوبى بضحكه؛من توا خاطرها فيه من بكري وهي ترفس..
ضحكوا...
🍃وبرا..
درست سيارة اميمه قدام حوش جدها..
نزلت منها وهي تمشي بعصبيه..
خشت داخل وهي مازال تسمع في كلام حسناء..
《كانك عارفه خوك يبيها علاش ماقلتيش علاش خليتيني ع عماي!؟..والله ماني مسامحتك وان شاء الله ربي يدير فيك احرف من اللي صارلك ويفضحكم كلكم"
فتحت بقوة الباب الفاصل وخشت لحوش عمها وهي متوجهه للباب الدخلاني اللي كان مفتوح..
خشت منه...
وشافت طوبى طالعه من دار المعيشه ماشيه بطريقه الكوجينه..
شافتها طوبى قالت بضحكه..
/جيتي في وقتك خشي شوفي اواب ومهاب كيف طلعوا في اللبسات اللي خديتهم متاع الارانب..
خشت اميمه داخل ووصلت لطوبى وهي تشوفلها بحده..
طوبى لما شافت وضعها استغربت واختفت ضحكتها..
اميمه؛طوبى هو سؤال واحد ونبيك تجاوبيني عليه بصدق وصراحه..
ع طلعة مطيره سمعت اميمه شن قالت قعدت واقفه تشوفلها بإستغراب..
طوبى بعدم فهم:سؤال شني!؟
اميمه خدت نفس بعدين قالت..
"شن في بينك وبين خوي حسين!؟"
انصدمت مطيره في السؤال..
بس مش قد صدمة طوبى..
اللي مابتش تفهم قصد اميمه من السؤال ماهو مستحيل يكون قصد اميمه من سؤال زي هدا واضح هكي..
طوبى:كيف شن بيني وبينه مافهمتش!؟
اميمه طلعت تليفونها من شطنتها وحطت ع الصورة اللي خدتها من حسناء بعد النقاش المحتدم اللي صار بينهم في المصحه ع الملأ..واقنعتها انها ماتعرف شي وانها حتواجه بنت عمها وخوها...
مدت التليفون لطوبى..
خداته طوبى وقعدت تشوف للصورة..
ربعت اميمه ايديها وقالت..
/حني مش بنات عم حني صاحبات وخوات وماندرقوا ع بعض في شي تمام! علاش درقي عليا حاجه زي هادي وتحطيني في موقف قدام صاحبتي زي الزفت انتي اليوم خلتيني نعيش ابشع موقف ياطوبى وفوق حسين هدا اللي مش عارفه شن نقول عليه..
رفعت طوبى عيونها في اميمه..
وكان نظرتها ليها نظرة مطفيه...فاضيه...مافيهاش ولاتعبير..
اميمه:الصورة هادي تحكي هلبه حاجات ياطوبى تحكي هلبه حاجات سمعت عنها وكذبتها لأني نعرف كل شي او كنت نحساب روحي نعرف كل شي..
جت مطيره لطوبى وخدت منها التليفون وشافت الصورة وهي تتمعن فيها..
اميمه:ماكنتش نبي نصدق ياطوبى لكن الصورة وكلام حسين لبنت الناس ماخلوش مجال للشك ياطوبى..
مطيره شافت لأميمه وقالت..
/محصله ضربة شمس انتي ولا!؟ مش بوعيك..اكيد مش بوعيك..مش حنصدق انك انتي جايه لطوبى وتقوليلها في القطاف هدا!..اليوم هدا متفكراته كان كويس كان في اخر ايام رمضان كنت اني وياها فوق السطح ندوروا في فرشه للمربوعه وضبحت ع خوك وقتها بش ينزلها اني هني كنت في المخزن..يعني يافالحه بنت عمك مع كانتش مع خوك بروحهم!..
طلعت فردوس وهي تشوف لأميمه بأسف وتقول..
/توقعتها من الناس كلها الا انتي..صدمتي في امك ماتجيش شي قدام صدمتي فيك..
اميمه هداكا الوقت حست روحها وكأنها كانت منومه مغناطيسيا بعدين فاقت ع روحها..
قعدت تتسائل في نفسها بصدمه..
"اني شن درت"
طوبى هني تكلمت وقالت..
/انتي لو فكرتي شويه وانتي تشوفي للصورة الشك مايخطمش جنب قلبك خطوم..اميمه اني شقتك لما تزوجتي ممكن خشيتلها مرة وحده وقاعده خافظه تفصيلها لكن انتي اللي عشتي فيها نسيتيها!؟ نسيتي الروشن متاعها اللي يفتح ع سطوح حوشنا وحوش جدي علي!؟ تفكرتيه صح! باهي شقتك توا من ساكن فيها ياأميمه!؟
اميمه في نفسها.."يارب الارض تنشق وتبلعني اني شن درت شن درت!؟"
طوبى:لكن نقولك حاجه مشكورة وبارك الله ع المعروف اللي درتيه معاي..توا كان سمعت دوة عليا من حد براني مش حتأثر فيا حتى شويه صدمتي فيك انتي دارتلي مناعه..
اميمه بتلعثم:طوبى..افهميني خل..نحكيلك..
بحده قالت..
/ولا كلمه..مانبي نسمع منك شي..
خدت التليفون من عمتها ومدتهولها وقالت..
/خودي تليفونك وبري اطلعي..
مدت اميمه يدها وخدت التليفون وهي في حالة يرثى لها..
طوبى:ان شاء الله نقدر نبرر لنفسي اللي درتيه توا ان شاء الله...
اميمه لفت ومشت طلعت بسرعه بخجلها من اللي دارته هي نفسها مش مصدقه نفسها شن دارت وكيف دارت هكي من اصله..
بعد ماطلعت..
طوبى شافت لعمتها واختها..
وهي تتخيل في اللي صار الفترة اللي فاتت وهي غافله ماتندريش عليه..
تفكرت اللي قالاته زهره في اخر لقاء ليهم....
كانت حتنهار وتبكي..
بس هربت بضعفها وحزنها منهم ومشت لدار بوها..
خشتلها وسكرت الباب...
مشت قعمزت ع سرير بوها..
وهي تاخد في انفاسها بصعوبه وتقاوم في بكاها..
بعدين خدت مخده السرير..شدتها بين ايديها وهي تشوفلها وحزن الدنيا كلها في عيونها...
《 طول حياتك تعلمي تتكي ع الله ثم نفسك البشر هادم ماتعبيش عليهم مافي حد دايم كان ربك شدي فيه هو بس》
غمت وجهها بالمخده وانهارت بالبكي وهي تكتم في صوتها بش مايسمعوهاش وهي تبكي..
🍃برا..
مطيره وهي تلبس في وشاحها بعد مالبست عبايتها قالت..
/وصلت حدها خلاص معاش ينسكت عليه اللي قاعد يصير معاش ينسكت عليه..
ومشت طلعت من الحوش..
ووراها فردوس اللي كانت مضايقه وخايفه مني اللي بيصير..
بعد ماطلعت عمتها من الحوش بكل..
ولت خشت داخل وهي خايفه..
خشت ع غرفه الدار وقالت..
/ماشيتلهم..
غرفه بغضب؛خل تمشي تحطلهم حد الكلاب هادم السكات هو اللي خلاهم يوصلوا لهني.
فردوس:توا اني مش فيهم في اميمه معقوله اميمه اللي مرت بنفس الشي تصدق طول في بنت عمها مش بنت عمها بس تي هادي صاحبتها الروح بالروح..
غرفه:الصحبه هني تبان يافردوس..معرفتها باللي صار قبل لتعرفه طوبى وسكاتها عنه يبينلك ان اميمه ماتفرق شي عن امها..
🍃واميمه حابسه في روحها وهي منهارة بالبكي وقاعده تأنب في نفسها اللي خلت الغضب يسيطر عليها ومعاش خلاها تميز شي ولاتعرف روحها شن قاعده دير...
🌿عندما غضب موسى ألقى الألواح وفيها تعاليم الله ،
{ ولما سكت عن موسى الغضب أخذ الألواح }
الأعراف (١٥٤)
إذا تحكم فيك الغضب ،
يجعلك في لحظة تُضيع أغلى ماتملك !🌿
#افك_مفترى2
#طوبى
....يتبع....