يهزمني الحُب وانا جاهل بدرب المُحبين

البارت الواحد والستين

رعد م رد وركب سيارته ومشى علطول بدون اي رد وسكتت هيام بحزن ومشت وركبت واخذت ايهم من محمد اللي كان مشابك يده بيد بشرى تحت نظرات هيام الحزيينة وهي عجزت تتعود ع رعد وكان دايم مرعب ومهيب اذا قرب منها ولا هي قادرة تتحمل بعده وفرقاه عنها ..
.........................
في بيوت اهل قاضي
دخلت سيارات كاسر ومحمد وفارس وحمد وسالم وابو ضاري وابو رعد وابو هيام ونزلوا كلهم وهم ناوين يكملون سهرتهم مع بعض وكانت هذي من عادات وتقاليد اهل قاضي غير الغداء اللي لازم يصير بعد كل زواج ..
" في سيارة محمد "
هيام قطبت وقالت : حمود ليه م وديتني بيتي مع رعد ؟
محمد ابتسم وقال : وانتي تحسبين رعد فالبيت انا من بعد م شفته متلطم وانا عارف ان وراه شيء ومستحيل يروح للبيت وبينفرد لحاله
هيام ضاقت وباست راس ايهم وقالت بهمس جنب راسه وهو نايم بحضنها : اخ ي ايهم ع انك جيت للدنيا وجيت مني والسبب الرعد لكن عجزت اجاريه وابادله عجزت الله يقربه ويقويني شوي واقدر اطيح لحب الرعد وابادله بكل جراءة
فجأة قاطعها بكاء ايهم
هيام ابتسمت بضيق وقالت : الله حتى انت ي هيمي معاد تتقبلني ؟
بشرى بحب : لييه وشفيه النونو ؟
لميس بصوت الاطفال : نونو
هيام ابتسمت وقالت : وزييينتس انتس نونو بعد !
بشرى ضحكت وقالت : لا حبيبي هي تشوف انها حرمة خلاص
هيام ضحكت معها ونزلوا ونزل محمد معهم ..
" في سيارة كاسر "
كاسر لف لوعد وقال : وعّودي يالله انزلي
وعد وهي تدور الزلة قالت بحدة : خييير تبيني انزل عادي قول انك ابي الفكة مني !!
كاسر توسعت عيونه وقال : وعد خير ؟ صاحية
وعد ابتسمت وقالت : امزح
نزلت ونزل كاسر معها بعد م طفى سيارته وقال : حموود معك ولاعة ؟
محمد ابتسم وقال : ايه ايه
" في سيارة فارس "
فارس ابتسم وقال : هاتي ليما شوي
حنين مدت ليما لأبوها ونزل فارس معها ونزلت حنين وقالت : فارسي وين بتوديها ؟
فارس : خليتس معي شوي واعطيتس
حنين بتعب : والله مقدر بدخل ودخلها انت بعدين
فارس تقدم لحنين وباس راسها وقال : وشفيتس ؟ عشان الولادة ؟
حنين ابتسمت وهزت راسها بنعم ومدت يدها تبي تاخذ ليما وعطاها فارس وقال : تكفين يحنيني انتبهي لتس
حنين م ردت وهي تبوس بنتها ومشت ودخلت داخل وابتسم فارس ولف لكاسر ومحمد وضاري وزايد وحمد وسامي وذياب اللي نزلوا اهلهم وتقدموا للمجلس
فارس بحدة : من الحين الزفت اللي يدخن يقلع مني برا !
كاسر لف لمحمد وطاحوا يضحكون وقال كاسر وهو يضحك : حمود نطلع بكرامتنا ؟
محمد ضحك وقال : امش امش الله يفشلك وش كرامته وهو بقى كرامه !
طلعوا محمد وكاسر ودخلوا باقي العيال مع فارس
فارس : عيال تكفون نبي جدول !
حمد ابتسم وقال : عيال عندي اطلق جدول
فارس عدل جلسته وقال : وش ؟
زايد قام بهدوء وقال : برجع البيت تمسوا ع خير
ضاري : افا اقعد اسمر معنا
زايد : تسمر معكم العافية
طلع والعيال يناظرونه
كاسر لف له وقال : ع وين يبو الشباب ؟
محمد : منجد وينك يبو عبدالله ؟
زايد ابتسم وقال : للبيت
كاسر : كان سمرت معنا
زايد رفع يده فالهواء لهم بدون م يلف وقال : تمسوا ع خير
محمد بهمس : اكثر واحد كئيب مدري شلون جاء اخو ذيب
كاسر ابتسم وقال : اووهووو يالذيب الحين طاير فالسماء
ضحك محمد وطفى سيجارته ودخل ولحقه كاسر علطول بعد م تعطر وجلسوا ع الفرشة اللي ببداية المجلس مع العيال
فارس : اسلم حمد
حمد : بتزوج
فزوا العيال وكلهم قالوا بصوت واحد : هااااااه !!!
حمد انفجع وقال : وراااكم !!؟
كاسر ابتسم ع جنب وقال : حبيبي اخيرًا بتتزوج ! وبعدين مين ؟
حمد ابتسم وقال : اوه انتوا مصدومين عشاني المهم غدي اخت هادي
فارس : وش طرا لك ؟
حمد : والله هو الموضوع اللي كان بيني وبين هادي ذاك اليوم
فارس ضحك وقال : وين الرعد بس
ضاري : صدق وينه الرجال ؟
فارس كان بيسحب جواله ويدق عليه بس سبقه محمد وقال : فروس بدق عليه انا
فارس : تم
قام محمد ووصله صوته الثقيل وهو يقول : هلا حمود ؟
محمد : رعد وينك يولد ؟
رعد : وش تبي ؟ ناقصكم شيء
محمد ابتسم وقال : ايه ناقصنا انت كل العيال متجمعين الا زايد وتعرفه يعني المهم تجي ؟
رعد : اخلص وابشر
محمد : انت اللي ناقصك شيء ولا حاجة ؟
رعد كح علطول وقال : سلامتك
محمد : وش تدخن ؟
رعد ابتسم ع جنب وقال : ايه
محمد : خلص وتعال
رعد : ابشر
محمد : تبشر بالجنة يبو ايهم
سكر رعد ودخل محمد وطلع ذياب من الحمام
محمد : ذياب امش تعال وينك من ليل
ذياب ضحك وقال : مدري اذا م تشوف لكن واضح اني جاي من الحمام
محمد ابتسم وضرب راسه بخفه وقال : امش بس
دخلوا محمد وذياب للمجلس وقعدوا
كاسر : ذياب سولف لنا سواليفك زينه وم نعرف عنك الكثير
سالم ابتسم وقال : ايه ذياب سولف
سامي صد وقال : عيال بنام انا فأخر المجلس لحد يصحيني
ذياب : افا تووي ببدأ اسولف
سامي ابتسم بكلافة ومشى وانسدح بأخر المجلس وغطى عيونه بشماغه وهو يقول بنفسه ( اه صدق قلبي يحرقني ع بيان م تستاهل ذياب ولا اقدر اقولها اني احبها وادري انها بترفضني عشان الخمس اشهر اللي بيننا بس ! ) هزم النوم عيون سامي ونام علطول ..
...........................
في سيارة رعد
مشى رعد من القاعة وهو يسمع صوت هيامه ومنقهر عليها بس كان جزء كبير من رعد يعاتبه ويقول ( احسن لك تبعد عنها وبتجيك وهي مشتاقة وبتبدأ تبادر وتبادل اصمل ! ) وجزء ثاني يقول ( حرام اللي تسويه فيها اكيد ان عندها عذرها اسمعه ولا تبعد ) بس الرعد قرر يمشي مع الجزء الاول وقرر ينسى كل شيء اول م وقف بمكان بعيد في برحة فاضية وحط سيجارته بين شفايفه وزفر براحة وفك اول زرارين من ثوبه وحط راسه ع المرتبة ووصله اتصال محمد ورد عليه وانهى الاتصال وطفى سيجارته ورماها وشغل سيارته ومشى لبيوت اهل قاضي..
........................
في بيت ابو محمد
البنات كلهم دخلوا وتجمعوا بالصالة
حنين بحزن : وجع منصور م جاء ولا جاب سلمى !
بشرى ابتسمت وقالت : ايه يعنني م يبيها تتعب !
وعد ضحكت وقالت : وشفيكم عليه يمكن يبي ينفرد بزوجته
بيان : وعد ماشاءالله والتفكير ؟
ضحكوا البنات كلهم ع رد بيان وقالت : والله اني صادقة خيير
وعد : بيونه تراني متزوجة يعني عادي ترا
بيان : ماله دخل متزوجة ولا لا انا افهم بالأشياء ذي كلها وانا توو دخلت ٢٠ يعني م يفرق بس م نبي نفتح ذي المواضيع الحين
هيام : والله وبيان صادقة
العنود عدلت جلستها وهذا دليل حماسها وقالت : طيب اسمعوا شرايكم نلعب غميضة ؟
هيام بفرحة وهي تبي تغيير مود الحزن وتنسى رعد شوي وقالت : ايييه يلا !!
حنين قامت وقالت : بجيب موية واجي
وعد وقفتها وقالت : اصبري بنعد وشفيتس !
وعد صارت تعد وبدؤا يطلعون البنات ويروحون وكل وحدة منهم تدور لها مخبأ من اللي بتعد
وعد وصلت لأخر ثنتين وكانوا " بيان وعهود " وعدت وطلعت بيان وقالت وعد بصوت عالي وحماسي : يبننااااات علىى عهووود
وعد مسكت يد بيان وطلعوا ركض اول م اعتلى صوت عهود تعد ووصلت لأخر رقم وهي تقول : ثلاثيييينن جيييتكممم !!
مشت عهود والبنات اختفوا في ارجاء بيت ابو محمد اللي كان من اكبر البيوت في اسوار بيوت اهل قاضي
حنين طلعت بهدوء من المطبخ وهي معها مويتها وشافت هيام تطلع من الباب الخلفي ولحقتها بسرعة وكانت هيام بتصرخ بس كتمتها حنين وهي تقول بهمس : انا حننيينن يغبييية اص !
هيام بهمس : ااافف خرشتتييننيي
حنين رفعت بنظرها وشافت سيارة رعد داخله من البوابات وقالت : شرّف حبيبتس
هيام لفت بكل لهفة وقالت : يالله انك تحييه
حنين سمعت صوت عهود قريب وركضت لسيارة رعد وهي ماسكة يد هيام وتسحبها وراها وقالت : يويلي عهود ورانا
لفت هيام وقالت : لا لا مو ورانا ارجعي !
رعد نزل بعد م طفى سيارته وكان فاك لطمته وهو ناسي من روج هيام اللي كان مسحوب من شفايفه لخده الايمن
حنين سحبت هيام ودفتها ع رعد وركضت راجعه للحوش الخلفي
رعد انصدم من الجسم اللي ضرب في ظهره ولف علطول لهيامه وهي مصدومة وتدعي ع حنين بنفسها وقالت برعب : بالغلطط
رعد مسكها مع خصرها وحطها قدامه وغطاها وقال بحدة : وش مطلعتس كذا والبيت مليااان رجال !!
هيام كانت ماسكة ضحكتها
رعد قطب وقال : ضحكيني معتس ؟
هيام رفعت رجولها عشان توصل لطول رعد بس فشلت وقالت : ممكن تنزل لي شوي ؟
رعد م كان فاهم شيء وقال : ادخلي داخل يمره !
هيام مدت يدينها وسحبت وجه رعد وقربته من وجهها وصارت تحاول تدمج الروج مع بشرته اول تخفيه بقدر الامكان وحركتها ارتعد الرعد منها وكان مصدوم وعيونه مفتوحة بشكل مرعب ويناظرها وهي تعض شفتها السفلية وتحاول بجهد كبير تخفيها كان رعد ينتفض من قربها وحركاتها كانت هيام ع صغر حجمها بقرب الرعد الا انها تقدر تقلب موازينه وتلعب بحسبته
هيام رفعت عيونها لعيون رعّودها وشافته يناظر بشفايفها هيام حست انها فرصتها وحست انها بتقدر تعدل وضعهم وبتخلي رعد يليّن ويسامحها وقربت علطول ورفع رعد راسه علطول وتلطم وقال بصوته الرخّيم : ادخلي داخل اعجلي !
هيام انصدمت من حركته وتراجعت الف خطوة ورا وبنّت بينهم الف مليون جدار وحاجز بعد م صد رعد من بوستها وكانت مصدومة وتناظره ببراءة
رعد لف بحدة وقال : وبعدييين معتس انتي ؟
هيام بصوتها الطاغي قالت : رععد اناا تصّد مني ؟؟
رعد تقدم وقرب منها ورجعت هيام خطوتين ورا وقال : شفتتيي ؟ كييف ترجعيين مني وكييف تخافيين هذا وانا زوجتس وابو ولدتس !
هيام علطول تكلمت تبي تبرر وقالت : لا انا مصدومة عشانك صّديت مني بس تكفى يالرعد م كنت اقصد ان...
مشى رعد من قدامها ولا كأنها تتكلم صح انه م يرضى يخليها كذا لكن كان هو بعد م مستوجع منها
هيام ركضت علطول وحضنت رعد من وراه وقالت : رعّودي ترضى تزعلني وتروح حتى اسمي م تنطقه لييه يالرعد ليييه ؟
رعد كان يتأمل يدينها الصغيرة اللي حاوطت اعلى بطنه واسفل صدره وابتسم بخفه ومسك يدينها الصغار وقال : وش تبين اسوي فيتس ؟
هيام تركته ومشت ووقفت قدامه وقالت : انا اللي كيف اراضيك ؟
رعد اول م شافها جات قدامه بدّل ملامح وجهه للجدية وقال : تبطين عظم ارضى والان ابعدي قبل اوجعتس بالكلام ومعا..
قاطعته هيام اللي رفعت رجولها وباست مبسم رعد وبعدت وابتسمت وكان رعد يناظرها بصدمة ورجعت ترفع نفسها بس المرة ذي تركها تكمل فعلتها بس علطول لف وجه بنص بوستها وقال : نرجع لتس حركتتس وادخلي خلصي
بعدها رعد وهو يرجف وقلبه يتراعد بعد جراءتها معه لف وم شاف هيام اللي ركضت علطول ودخلت الحوش الخلفي ووزت نفسها وصارت تتنفس بسرعة وقالت بنفسها ( ادري انه اعجبه وادري انه بيرضى بعدها لكن رعد يقاوم واخرتها بيستسلم ويجيني ع وجهه ) قالت كلامها واول م حست انها هدت دخلت علطول ..
" عند البنات "
عهود صارت تمشي بأرجاء البيت وجذبها همس حنين وهيام وطلعت راسها وم شافت احد ورجعت دخلت للبيت وم خلت مكان فالدور الاول الا ودورت فيه وكان بيت جدهم قاضي ٣ ادوار وملحق كان كبيير بشكل مبالغ فيه
وعد ابتسمت وقالت : هطف والله قدامها ولا تشوفنا
بيان ضربتها بخفه وقالت : انطمي !
وعد : سمي طال عمرتس
عهود لفت وقالت : وعععدد !
وعد شهقت وركضت علطول وبيان وراها وهي تتحسب ع وعد وتقول بصوت عالي : الله حسبيي علييتتس يوعد يبقرة !!
وعد ضحكت وقالت : ييخيي وش !!
عهود وهي تركض وراهم قالت بصوت عالي : وقفوا خلاص بمسكتس انتي وياها
بيان ابتسمت وقالت : تستبقين الاحداث انتي ؟ امسكي اختتس
لفت بيان وطلعت ع المصعد وضغطت الزر للملحق علطول
عهود ركضت وكانت بتوقف المصعد بس الحظ قرر يوقف مع بيان وضربت عهود باب المصعد برجلها وقالت : ااافف لعننه !
مشت تدور وعد اللي اختفت من الانظار علطول
عهود تخصرت وقالت : حلويييين عدنا لنقطة البداية !
ومشت بهدوء وصارت تدور البنات وشهقت اول م شافت نفسها بأنعكاس المرايا بأحد الغرف المظلمة وضحكت وقالت : وجعااااه ذي انا
لفت علطول وصارت تدور وتعبت وقالت بصوت عالي بحيث يسمعونها البنات كلهم : ااااه بناااات وجع خلاااص تعبت اطلعوا
شوق ضحكت وقالت : يغبية وراتس
وركضت بس كانت شوق الغبية فالموقف ذا خصوصًا انها شوي مليانة عكس عهود اللي كانت طويلة ونحيفة وركضت وقدرت تمسك شوق وضحكت بصوت عالي وقالت : يحماااارة وبعد شاده حيلها وتقول غبية شفنا من الغبية الحين
شوق ضربتها بخفه وقالت : خييير استحيي ع وجهتس اختتس الكبيرة !
عهود : دزي بس م عندي الا اخو واحد وهو ذياب
وعد طلعت وقالت : شف الوسخة جحدتنا !
شوق ضحكت وقالت : المصيبة لا هي تدري عن ذياب ولا ذياب يدري عنها
عهود ضحكت وقالت : شوووقييي حبيببيي لا تغييرين السالفة وانقلعي عدي
شوق كشت بوجهها وقالت : مااالت عليييتس
مشت وعهود ووعد متماسكين ويضحكون عليها
شوق بصوت عالي : بنااات عهود الحمارة مسكتني علي ترا
هيام دخلت علطول وقالت : كويسس لحقت عليتس يالله موفقة
شوق ابتسمت وقالت : يالله روحي بسرعة
مشت هيام تركض وهي تحاول تدور حنين وتطيح فيها ضرب ع حركتها اللي سوتها وورطت هيام بالرعد ..
.............................
عند عرساننا
وصلوا الفندق ونزل ذيب وفتح باب لين ونزلها بهدوء وقال : بشويش يحبيبي
لين كانت ترجف رعب بس كانت تتجاهل ذا الشعور كل م شافت ابتسامة ذيبها
مسكوا يدين بعضهم ودخلوا الفندق واخذ ذيب البطاقة وطلعوا للمصعد ومشوا للدور ١٧
ولف وقال : مقدر اتحمل اكثر من كذا مقدر حاولي تستعجلين
لين لفت له بقوة وبصدمة وقالت : ايييششش ؟
تذكرت لين كلام بشرى وقت ملكة شوق وهادي وشهقت وقالت بنفسها ( معقووولة من اولها !!! لازم اكذب واقول علي عذر لازم )
ذيب م صدق يوقف المصعد وطار للغرفة وفتحها ورجع ركض للين ودخلها وقال : لينيي ثواااني نزلي وبدلي وبجيب العشاء واجيتس
لين ارتاحت انه بيطلع وقالت : ابشر
دخلت لين الغرفة وسكر ذيب الباب وراه وراح يجيب العشاء ودخلت لين علطول الحمام واخذت شور سريع وطلعت اول م جففت شعرها وفتحت الباب بهدوء وم كان لذيب حس ضحكت بنصر وقالت : حمدلله باقي م جاء
طلعت للغرفة ولبست بجامتها الوردية واللي كانت مصنوعة من الحرير وماسكة ع جسمها وسامحه لنا نشوف تفاصيلها تقدمت للمراية وسحبت شنطتها الصغيرة وطلعت مرطب ورطبت شفايفها ورطبت جسمها بكريم بريحة السوسن والكشمش الاسود وتعطرت بالمسك ومشطت شعرها وسدلته ع ظهرها وجلست بالصالة تنتظر ذيبها وماهي الا دقايق ودخل ذيب بالاكل وسكر الباب ولف علطول ووقف بصدمة من جمال لين الحاد اللي كانت تعكس تفاصيل وملامح حنين اختها اللي كانت تتميز بالجمال الهادي والناعم عكس لين اللي كانت ملامحها قوية وحادة ابتسمت وقالت : وشفيك ؟
ذيب تقدم ونزل العشاء ومشى لها ونزل عند رجولها وقال بصوته الثقييل : كذا كثييييير ي ليني كثيييير
لين ضحكت بخجل وقالت : ذيب نتعشى وبعدها امدح الجوع ذابحني
ذيب ابتسم وسحب العشاء وجلس قدامها وقال : انتي تعشي وانا بشبع تأمل
لين : لا والله اكل معي خير !
ذيب ضحك وتقدم وباس خدها وقال : اوووه مسسسك
لين ابتسمت وسمت بالله ومدت يدها وبدأت تاكل وذيب لحقها علطول وهو يشمر اكمامه وبدأ ياكل وشوي وقال ذيب : ليني عندتس قطعة لحم عطيني ياها
لين اخذتها وقالت : افتح
ذيب ابتسم وقال : بعضتس ترا
لين تجاهلت وهي تحسبه يمزح وفعلاً مدت يدها واخذها ذيب من يدها وعضها وشهقت لين وقالت : يدددي يحلللو !
ذيب ابتسم وقال : الذ لحمة بحياااتي كلها
ضحكت لين وهي تمسك يدها وتضغط عليها وقالت : يدي والله !
سحبها ذيب وباسها بكل قوته وقال : عساااها بضللووعي
لين ابتسمت وقالت : بسم الله علييك الا عسااها بضلووع عدوينك يحبيبي
كملوا عشاهم وخلصوا وقام ذيب للحمام يغسل وشالت لين الصحن والسفرة وغسلت وخلصت وتقدمت للحمام وقالت : ذيب ادخل ؟
ذيب كان يغسل يدينه وقال : ايه يحبيبي تعالي
دخلت لين وحطت يدينها فوق يدينه وقالت : انننننن ابلع الان تغسل من جديد
ذيب ابتسم وسحبها قدامه وحاوطها ودخل يدينه وسمح لها تلامس خصر لين وقال : غسليها انتي الان
لين كانت مصدومة وقالت بنفسها ( تستاهلين احسسسن ) مدت يدينها وصارت تجاري ذيبها وشابكت يدينهم ببعض وصارت تغسل يدينه وكانت يدين ذيب ضخمة مقارنة بيدينها ضحكت وقالت : يدينك كبااار !
ذيب ابتسم بخبث وقال : كلي كبير
لين توسعت عيونها وضربت بكوعها بطن ذيب وقالت : شرايك تستحي ع دمك شوي ؟
ذيب انفجر يضحك ورفعها من الارض وقال : انتهى وقت الدلع وبدأ وقت الجد
لين شهقت اول م رفعها وقالت : ذيب وييلك مني والله لا اضربك ابعد
ذيب نزلها ع السرير وقال : تسمحين لي ؟
لين توسعت عيونها وقالت : تستهبل اول ليلة لنا !
ذيب حاوطها بيدينه وقال : ابيها من اول ليلة طيب
لين : منجدك ؟
ذيب وقف ومسح شنبه بيده وقال : وشو ؟ م ودتس ؟
لين : طبعًا م ودي
ذيب قرب وهمس بأذنها وقال : بسويها الليلة وم بتحملين فكري  شوي
لين برعب : حتى ولو
قاطعها ذيب اول م قرب منها واستسلمت لين وهي م تقدر ع ذيب وو🌚..
..............................
في بيت ابو محمد تحديدًا الحوش وقدام النافورة
العيال كانوا جالسين فالحوش ويلعبون بلوت
رعد بحدة : كاااسسر اعنببوو غييييرك لايفوزوون عليينا !
كاسر شاش راسه وقال : اابشششرر بعززك
فارس ضحك وقال : حمود جاهز ندعس عيال محمد
محمد ابتسم وقال : ازهلللل
رعد وكاسر بصوت واحد لفارس قالوا : اععقببب
ذياب كان يسجل وفجأة انقلب اللعب ودعس كاسر وفاز وفّوز رعد معه وضحك رعد وفز له وحضنوا بعض
ذياب بصدمة : العن شكله شلون !
فارس م كان اقل من ذياب وقال : غشوا ؟
ذياب : لا يحبيبي لعبهم نظيييف بس مدري شلون قلب النتيجة
محمد ضحك وقال : محد يقدر ع كاسر اصلاً
فارس مسك يد محمد وقال : هاردلك حمود ومبروك يالرعد والكاسر
كاسر ابتسم وقال : حبيب حبيب
رعد ضحك وانسدح وقال : عيال عندي جدول خطييييير لكم
ضاري عدل جلسته وقال : اسلم يالرعد ؟
رعد : من بكرا بعد غداء ذيب ولين نبدأ نجهز لسفرة للجنوب ونروح ع الجمس حق جدي والجمس حق ابوي ونتقسم فيه وشرايكم ؟
فارس ضحك وقال : واحلى حشرة وطاش ماطاش صصصصح
ضحكوا العيال وقال كاسر وهو يضحك : بس والله جدوووول
فارس : تم م قلنا شيء
رعد ابتسم اول م سمع رد فارس وقال : جعلني قبلك يالفارس
فارس فز وباسوا خشوم بعض " سلام الرجال " وقال : مجار لبى عينك يالرعد
ذياب : اجي معكم ؟
رعد : اللي ودك
ذياب : والله انه ودي
رعد : اجل تخاوينا ؟
ذياب ابتسم وقال : تم والله انه تم
واخذتهم السواليف والعزمي وكل واحد يحلف ع الثاني وقرارت لسفرة الجنوب ..
.............
" عند البنات "
هيام بتعب : بناااات وجع وينكم ! الله يقلع وعد لييه تمسكني !
وعد بصوت عالي من الدور الثالث : عشانتس نفس وضعي وماخذه واحد من عيال خالي محمد
هيام ضرب راسها بخفه وقالت : يغبية وشدخل !
وعد : اسمعي ترا بشرى تحت الدرج
هيام ركضت علطول وطلعت بشرى تصارخ وتقول : لا لا غغشش
هيام مسكتها وقالت : اص مالي شغل
بشرى : حننيييين انصفييني
حنين تقدمت وجلست وقالت : بنصفتس وننهي اللعبة خلاص مرت ساعتين !
وعد جات هي وبيان وشوق وعهود وجلسوا وقالت وعد : ساعة وربع بالاحرى
جلسوا البنات بتعب وقالت هيام : وين العيال المجلس م فيه حس
بيان ابتسمت وقامت بحماس وقالت : بروح اشوف
هيام بحذر : انتبهي
حنين : ايه والله
بيان بطيش وعدم اهتمام قالت : معلييييكم
مشت ودخلت المقلط وطلعت راسها وكانت انوار المجالس طافية ابتسمت ودخلت وم كان فيه احد ودخلت داخل المجلس اول م شافت صحن مليان حلويات تقدمت له وفتحت وحدة واكلتها وقالت : ااممم لذييييييذة !
سحب سامي شماغه من عيونه وفتح نص عين وقال بصوته الثقييل بسبب انه صاحي من النوم : بيان !
بيان فزت برعب وصارت تتلفت وقالت : مميين !!
سامي فز وهو تأكد ان بيان قدامه ووقف قدامها وقال : بيان اسمعيني تكفين
بيان كانت مرتعبة وركضت علطول وركض سامي وراها ومسك يدها وهو مو مستوعب ويرجف وقلبه يدق سحب شماغه وغطاها وقال : بييياان لاتخليينيي وتروحين لذياب تكفين محد بيحبتس كثري
بيان برعب سحبت يدها منه وقالت : وش اخليك م ابيك لا انت ولا ذياب !
جزء من سامي انكسر بعد كلمتها وجزء ارتاح انها م تبي ذياب وابتسم وقال : والله لا ارضى برفضتس بس لاتفكرين بذياب مرره م يصلح لتس
لفت بيان وهي ترجف من الرعب وارتطمت بذياب اللي دخل يصحي سامي عشانهم بيروحون وانصدم بوجود بيان وعرفها من عيونها وشافها بشماغ سامي وسامي صاحي وواقف وراها كان هالمنظر كافي انه يقتل ذياب اللي كان يناظرها بحدة وقال بصوته الرجولي : وش تسوييين هنا !!!؟
سامي تقدم وسحب بيان وراه وقال : مالك دخل فيها !
ذياب توسعت عيونه وقال : ساااامي تستهبل صح !؟ البنت م تحل لك
سامي بحدة : حتى انت م تحل لك !!
ذياب قرر علطول يطلع رجولته ع حساب اخوه واعتلى صوته وهو يقول : ضاااري تعال لأختك !
ضاري فز ورعد فز معه وقال : وش السالفة
ضاري اشر لرعد يقعد وقال : مدري
دخل بسرعة للمجلس وقال بصوت عالي : بيااااان !
بيان ركضت وكانت بتدخل ورا اخوها بس ضاري كان مطوع ومستحيل يرضى بشيء زي كذا ورفع يده وكان بيصفق وجه بيان بس صد ذياب الكف بيده وقال : انا ناديتك عشان تسترها ماهو عشان تطلع رجولتك عليها !!
ضاري انصدم وقال : ووخرر مالك دخل !
ذياب سحب ضاري وقال : ادخلي انتي
فزت بيان ودخلت ورمت شماغ سامي ع الارض وهي ورا الباب وسكرته ودخلت ركض علطول وهي ترجف ومصدومة من المنظر اللي صار وقالت بنفسها ( ليه صد كف ضاري مع اني عطيته كف مفروض يعتبرها انتقامه ! وكلام سامي وهو يدري اني اكبر منه وذياب اللي للحين مدري وش سالفته !! )
ضاري بحدة : ذيااااب !!
ذياب ارتفع صوته وقال : ضاااري خييير تستهببل كييف تضربها قداامي
ضاري انصدم اكثر وقال : وشدخللك ابي افهم
سامي قاطع حديثهم وقال بحزن : عشان ذياب يحبها
ضاري توسعت عيونه وسدد لكمة ع خشم ذياب اللي طاح ع الارض وهو يتألم وقال ضاري : م تستحي ع وجهك !!!
سامي انفجع وقال : ضاااري استهد بالله يعيييااال
فزوا العيال من الفرشة وجاو ركض وقال كاسر : ذياااب !
ذياب كان يحاول يصحصح بس مقدر وطاح مغمى عليه بدون اي رد والسبب خاتم ضاري
رعد بحدة : وش العلم !!
فارس بعصبية : ضاااري وش سويت !
ضاري : اللي م يستحي يقول قدامي انه يحب بيان !
محمد بحدة : وش ذا كله طيب الحب امر قهري وانت تدري وترا م سووا شيء حرام هدها يبراعم التقوى !
كاسر طرطش بالقهوة ع العيال وهو يضحك وقال : حبيييييتت براعم التقوى
رعد وهو يمسح يده من القهوة ضرب رقبة كاسر بخفه وقال : الله يمغصك وبعدين ضاري يويلك ذياب لا يصير له شيء
حمد دخل متأخر وشهق وقال : وووش السسساالفة !!
رعد حكى له اللي صار وشالوا ذياب للمجلس وضاري طلع لبيته علطول بدون م ينتظر ذياب يصحى حتى ..
:::::::::::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( سلااااام يحباااااني رجعنا ببارت يعتبر قصيير ولا فيه احداث بس خفيف ولطييف م كانت النية كذا ابدًا لكن ان شاءالله نعوضكم يوم الخميس ببارت طويييييلل 💞💞 )