يهزمني الحُب وانا جاهل بدرب المُحبين

البارت السابع والاربعين

دخلوا البنات البيت وفسخوا العبايات وجلسوا بهدوء مع بعض وسوالف وضحك مع بعضهم وينتظرون سلمى تجي وتكمل جلستهم
حنين : هيام
هيام لفت لها بهدوء وقالت : لبيه
حنين ابتسمت : لبيتي حاجه باقي عندتس تشوكلت ؟
هيام ضحكت : ايه مخزن فوق بروح اجيب
حنين قامت : لا والله ان تجلسين ولا ناسية انتس دخلتي السابع
هيام : م دخلته باقي اسبوع وشيء
حنين : انطقي بس
مشت حنين وطلعت فوق اول م قالت لها هيام مكان التشوكلت
وعد ناظرت بلين اللي سرحانه بعيد وقالت : لين وين وصلتي ؟
لين لفت بقوة وقالت : هااه موجودة
وعد ضحكت : شفييتس طييب
لين قربت من وعد وهمست لها : وعد اهجدي ترا م انتي عاجبتني هالفترة !
وعد انصدمت وقالت : افا وش سويت !
لين بحدة : تحسبيني غبية ؟ ترا واضح انتس م تبيني اتزوج ذيب لكن اهجدي
وعد بعدت لين عنها واستحقرتها وقامت من جنبها تحت صدمة لين وهي م تدري وشفيها وعد قلبت وم كانت تدري ان شوق ورا حركات وعد الغريبة
هيام بهمس : لين قربي
لين قامت وجلست جنب هيام وقالت : لبيه يهيام الرعد
هيام : شسالفة ؟
لين : بعدين بقولتس
سكتوا البنات وشوي ودخلت سلمى ع نزول حنين من الدرج ومعها الشوكلت بيدينها
سلمى : اووه حننيين هلا بالحامل والمحمول
حنين ضحكت وقالت : يعييونها
سلمى نزلت عبايتها وتقدمت وسلمت ع البنات وجلست وماهي الا دقايق ودخلت شوق وقالت : هااااااي
البنات بصوت واحد : هلا ، اهليين
سلمى بحدة : سلمي وش هاي !
شوق ضحكت : اف سلمى لاتصيرين حساسة
لين قامت وقالت : شوق ليه جيتي من باب الرجال ؟
هيام فزت : ولين صادقة !!
حنين بصدمة : لا عاد
شوق ابتسمت بأستفزاز وقالت : وش اسوي ذيب جابني من هنا
لين شدت ع الفنجال اللي كان بيدها وانكسر وطار القزاز بيدها وانكبت القهوة عليها
البنات صرخوا بصوت واحد عكس لين اللي كانت نظراتها حادة في شوق وم تأثرت ابدًا
حنين بصراخ : لييين بسسم الله عليييتس
هيام كانت ماسكه بسلمى اللي واقفة عند لين وتصارخ عليها وهي تقول : ليين غبييية انتي يدتتس !!
لين قامت وبان فرق الطول بينها وبين حنين وسلمى اللي كانوا اطول منها وقالت بحدة : ابعدوا م فيني شيء
تجاهلتهم لين ومشت بينهم واتجهت للحمامات وحطت يدها تحت المغسلة وانصعقت من قوة الالم وقالت بنفسها ( اااه كل ذا قهر وغييض من شوق اصلاً كيف تتجرأ تتكلم بثقة وهي تخونه والدبشة ذا م يدري عنها !!! )
لفت يدها بمنديل ودخلت للصالة وقابلتها هيام معها شنطة الاسعافات وقالت بحذر : ليين يعيوني تعالي اعقم لتس جرحتس ولا تخلينها بخاطري
لين ابتسمت بحب لهيام وقالت : من عيوني يهيام الرعد
كانت هيام تنهار من الفرحة اذا احد شبك اسمها بأسم رعّودها وكأنهم يوضحون ملكية رعد وانتماء هيامه له وقالت : اجلسي
جلست لين ومدت يدها لهيام اللي عقمت الجرح وخلصت ولفته بشاش وقطبته وانتهت وقالت : سلامتتس والله عساه بعدوينتس ولا فيتس
لين فكرت بشوق علطول وابتسمت وقالت : اميييينن
ضحكت هيام وقاموا ورجعوا للجلسة بعد م نظفت سلمى القزاز وحنين مسحت القهوة
العنود : نتابع فلم ؟
هيام بملل : اف تذكرت الفلم اللي حطيته اليوم يويلي يبنات يجيب الضيييم
ضحكوا كلهم وقالت سلمى : والله محد حدتس
حنين ضحكت : لاااا لايفوتكم طار عقل رعد اليوم واخرتها الدبشة ذي نايمة بالصالة والتلفزيون شغال
هيام انفجرت ضحك وقالت : يخي وش اسوي يجيب النوم
شوق بضحك : وش اسمه ؟
هيام قطبت : هل الغباء عندتس وراثة ولا عن جهد ؟ اقولتس يجيب الضيم وتبين اسمه
الكل طاحوا يضحكون وقالت شوق بحدة : اللي هو م يضحك
وعد وهي تسمح دموعها : الا والله يضحك
شوق صرخت : ووعععدد !!!
الكل ناظر بشوق وقالت بشرى : ومرض يمرضتس سدي حلقتس ياللي م تستحين
لين بحدة : وراتس كليتي البنت بسم الله !!
شوق بحدة : مالتس شغل انتي وهي اختي وبكيفي
هيام استغربت وقالت : يمه شفيها ذي ؟
سلمى اعتلى صوتها وهي تقول : هيييه انتي بسس عاااد احترمي اللي اكبر منتس وانكتمي !
وعد بحدة : خلاص بنات شفييكم م قالت شيء !
لين توسعت عيونها وقالت : وعد تستهبلين ؟
وعد ناظرت بلين واستحقرتها وقربت من شوق وقالت : شوق
شوق ابتسمت بكلافة : هلا ؟
وعد همست لها قدامهم كلهم وهي تقول : معليتس منهم
شوق ضحكت بأستفزاز وقالت بهمس : م اهتميييت اصلاً
الكل كانوا يناظرون وعد اللي انقلبت بيوم وليلة وقالت لين بهمس : وربي م يعرف لها الا كاسرها لكن هييين يوعد
حنين ضحكت : صااادقة
سلمى ابتسمت : ايه كلنا ندري والله
لين ابتسمت بخبث وقامت تنادي كاسر ودقت عليه ووصلها صوته يقول : عيوني
لين : تقدر تجي ورا البيت ؟
كاسر : ليه عسى م شر ؟
لين ابتسمت وقالت : لا لا بس ابيك
كاسر : ابشري
سكر كاسر وطلعت لين ورا البيت وقام كاسر تحت انظار اخوه الرعد وقال بحدة : ع وين يبو محمد ؟
كاسر ابتسم : شويات واجيك يبو ايهم
رعد قام ومسك يده وسحبه برا وقال : انطق وش العلم !
كاسر : والله اني م اعلم لكن بروح اشوف وش تبي لين واجيك وانت خلك عند ضيوفك
رعد ترك يده وضبط شماغه وقال : اعجل علي
كاسر اشر بيده ع خشمه وقال : على ذا الخشم
دخل رعد للمجلس وانطلق كاسر رافع ثوبه ويركض وحصل لين ورا البيت وقال : ليونه وشفيتس ؟
لين لفت له وقالت : وعد وشفيها ؟
كاسر دب الرعب بقلبه وقال : هاااه وشفيييها !!
لين مسكت كتوفه وقالت : لا لا اقصد متغيرة وصايرة تحب شوق فجأة انت قايلها شيء ؟
كاسر مسح وجهه وقال : يااذا الشووقق وش لعنتها ذيي !
لين تخصرت : اافف مدررريي قاههرتننيي
كاسر كانت نظراته حادة وقال : خلاص ادخلي ونادي لي وعد
لين انصدمت وقالت : لا لا لا مو الحين ناقشها فالبيت
كاسر ابتسم ع جنب وقال : م بسوي لها شيء هاتيها
لين : وعد ؟
كاسر : وعد اني م اسوي للوعد شيء
لين ابتسمت ودخلت وقالت : وعد
وعد لفت بكرهه وقالت : خير ؟
لين كانت ماسكة نفسها م تقول وتصفق وعد وقالت : كاسر يبيتس
وعد فزت وقالت : ويينه ؟
لين مرت من جنبها وهمست لها وهي تقول : اشوفتس طرتي لأخوي احسن لتس تعقلييين !
وعد انصدمت وطلعت بهدوء لكاسر وقالت : لبيه
كاسر فك اللطمة من وجهه وقال : تعالي
وعد تقدمت ووقفت قدامه وقالت : امرني
كاسر بحدة : وشفيتس ؟
وعد : هاه ؟ م فيني شيء
كاسر : وعد احد يحشي راستس ؟ م هقيتتس تمشين ورا كلام الناس يوعد الكاسر
وعد توسعت عيونها وقالت : ماشاءالله لين تشكي لك ؟
كاسر احتدت نظرته وقال : واذا تشكي لي تحسبين اني م لاحظت انقلابتس !
وعد ابتسمت بأستفزاز وقالت : الظاهر عرفنا من اللي ينحشى راسه ويمشي ورا كلام الناس
صدت تبي تمشي وانصدمت ومن سحبة كاسر لها وهو شّادها عليه وقاطع المسافة بينهم وبان فرق الطول وقال بحدة : يالوععدد لاتحدييني ع شيء اناا م ابييه
وعد كان قلبها يدق بقوة وقالت : كاسر شفييك علي
كاسر ابتسم وذابت وعد وهي تعشق ابتسامته وقال : انا اللي شفيني ولا م ركزتي ع كلامتس لي قبل شوي
كانت خطة كاسر الثانية انه يجيب راس وعد وتنصاغ له وفعلاً نجحت وهي م تقدر تقاوم كاسرها وقالت بحب : اسفه والله اسفه كنت معصبة ومدري وش فيني
كاسر تركها وقال : ماش زعلت خلي شوق توصلتس معها لبيت اهلكم
مشى كاسر واستوقفه حضن وعد له من وراه وهي تقول : لا والله مالي رجعة الا معك تكفى يالكاسر لا تخلي وعّودك
كاسر استوجع من عزوتها فيه بس كان ناوي يلوي ذراعها ويرجعها للصواب وقال : ابعدي مني زعلااان
وعد : ناظرني طيب
كاسر ابتسم ع جنب وقال : ببوستس ترا لو الف
وعد توسعت عيونها وقالت : كاااسسر !
كاسر ضحك ولف لها وقال : ادخلي واعقلي ووالله اذا عاد وصلني شيء ولا انتس متغيرة وضاربة شوق براستس اني لا اتصرف معتس تصرف م تبينه
وعد : م سويت شيء اصلاً لكن ابشر
بعدها كاسر منه وطلع لمجلس الرجال ورجعت وعد وهي فعلاً راسها مليان من سوالف شوق اللي كانت تقول لها ( ترا لين بتخرب بينكم اني وكاسر لازم تطردينها من بيتتس ) وكلام كثييير ع نفس الصياغ
ماهي الا دقايق واعتلى صوت الرجال يرحبون بضيوفهم
رعد وكاسر والعيال كلهم : ارحببوواا
سعود ابتسم : الله يبقيييكم يعيال قاضي
دخلوا الرجال بعد م سلموا ع بعض وبدت الدلة تلف فالمجلس عليهم وقال رعد : سعود شحالك ؟
سعود : بخييير جعلك بخيير
فارس : يعيال بلا رسميات تكفون خلونا ندخل ببعض علطول انا فارس بن نادر بن قاضي
سعود ابتسم : وانا سعود بن همام بن عبدالعزيز
الكل : ونععمم
سعود ابتسم : م عليكم زود
ذيب : ايييه وش الاخبار والعلوم بشرنا عنك ووش صار ع معاملتك
سعود : يهلا والله يالذيب
كانت معرفة ذيب وسعود معرفة شغل وذيب هو اللي حول سعود ع رعد وتعارفوا علطول وصار يقص عليهم اللي صار
ذيب ابتسم : حمدلله يارب انها عدت ع خيير
سعود : والله انه من تحت اوامر ذا الرجال اشهد بالله انه رجااال ابن رجاال ومعرب الجد والخال
كان سعود يأشر ع رعد اللي ابتسم وقال بصوته الرخّيم : معلييك زوود نفداك
صاروا العيال ياخذون ويعطون مع بعض وقام سعود وقال : رعد تعال شوي
قام رعد له وقال : سم ؟
سعود : ابي الحمام الله يكرمك
رعد ابتسم وقال : برا جنب المشب
ابتسم سعود وهز راسه بمعنى " فهمت " وطلع للحوش ومشى ورا البيت وهو م شاف المشب اللي كان ورا الجدار واتجهة للباب حصله قدامه ودخل وصقع في لين اللي كانت طالعة تبي تجيب جوالها بعد م نسته برا
سعود وقف وصنم فيها وكان قلبه يتراعد من جمال لين وبنفس الجهة كانت لين مرعوبة وتناظر بصدمة وقال بصوت مسموع : لا اله الا الله والجمماااال سبحاان من سواس !
لين كانت ترجف وواقفة ولا قدرت ترجع خطوة وحدة ورا وانفجعت زيادة من ذيب اللي فز اول م تعرف ع ملامح لين وشاف سعود قدامها وطار لهم وغطاها بشماغه وهو يقول : يووولدد محاارممنااا
شوق سمعت صوت ذيب وناظرت وشافت جينز لين الاسود والتوب الوردي اللي كانت لابسته وكانت بين احضان ذيب اللي حاط يده ورا خصرها وشّادها عليه كانت لين بتنهار من قرب ذيب وريحة شماغه وقرب صوته وحركاته وملامسة كفه لخصرها اللي كانت تموت وتعيدها
سعود برعب : وربي م دريت كنت ابي الحمام
ذيب بحدة : حصصل خيير توكل الحمامات ورا
مشى سعود يركض وهو قلبه ولا عقله معه كانت لين مستحلة كل تفكيره
لين بهمس : ذيب وخر كتمتني وبعدين وش محارمك تستهبل انت !
ذيب سحب شماغه من عليها وتلطم وصد عنها وتوسعت عيونه اول م شم ريحة عطر لين بشماغه كله وقال بحدة : لين كم مره بقولتس لعاد تطلعين برا !!
لين كانت بتموت وتشوف عيون ذيب باللطمة وقالت : ذيب
ذيب لف لها وكانت معها بطانية سحبتها من الصندوق اللي جنب الباب وقال : لبيه يعيونه وروحه وقلبه
دق قلب لين وقالت : ذيب لازم اقولك شيء عن شوق ووالله اني م اكذب بحرف واحد ولا اقصد اني اخرب بينكم
ذيب سكر الباب عشان محد يشوفهم وسحب لين له وقطع المسافة بينهم وقال بحدة : انطقيي وش شايفة في شووق !
لين انصدمت من قرب ذيب وريحة عطره اللي كانت مزيج بين الدخان والعود وقالت : ذيب تكفى صدقني
ذيب : اعنبوتس انطقي !
لين سمت بالله وتكلمت وهي تقول : شوق تخو..
قاطعها كف من شوق اللي طلعت علطول وقالت بصوت عالي هز روح لين : اعنببوتتس م فييتس حياااء الرججال مخطووب وتتلزقيين فيييه !!
ذيب مسك فك شوق بقوة وقال : وكسسر م يجبرر ييحيواانه !!
لين انفجرت ودفت ذيب ولفت شوق وصفقتها كفين مو واحد وقالت بحدة : انتيي الحيووانه وبعديين م اني انا اخت الرعد اللي تضربيني وتروحين وخطيبتس هو اللي سحبني له يعني تفاهمي معه مو معي
ذيب كان ماسك يد لين بس لا لين حست فيه ولا ذيب حس بنفسه وقال : لين
لين لفت له وناظرت بعيونه وقالت : الله يعينك ويقويك يارب
سحبت يدها وهي ترجف ومصدومة من اللي صار وقال ذيب : لين انتظري شوي
تجاهلته لين وكملت وهي تشوف اللي صار اشارة انها تسكت عن خيانة شوق لذيبها
شوق كانت مصدومة وقالت : خييير لييه م دافعت عني !
ذيب مشى متجاهل شوق تمامًا وقلبه يحترق ع لين و ع موضوع شوق اللي ضرب بنص راسه مشى للمجلس ودخل وجلس بهدوء وهو يراقب سعود اللي واضح انه انخبص وكان قلب ذيب لهيييب يحترق وقال بنفسه ( اعنببو من لامك ولا احد يشوف لين ولا ينخبص ! )
ماهي الا ثواني وقال سعود : يالرعد ادري اني غلطان يوم اكلمك بالموضوع وادري اني مفروض استشير ابوك لكن انا اطلب قربك
رعد فز لسعود اللي كان رجال وكل بنت تتمناه وقال : ابشر والله بعزك
انصفق ذيب وهو يسمع كل كلمة قالها سعود وقال بحدة : يالرعد تبي قهوة ؟
رعد لف لذيب وفهم مقصده وقاله : لا والله اكرم بس ابيك انت تعال شوي
قام ذيب وطلع ولحقه رعد وهو يقول : ولا اقاطعك ي سعود ثواني بس
سعود وقلبه يدق للين قال : ابد خذ راحتك
طلع رعد لذيب وطار ذيب ومسك ياقته وقال بحدة : شككلك نااويي تعطييه ليين !!
رعد ابتسم وقال : والله انك تخسي ماهو انا اللي اثني كلمتي لكن اذا م مشت الامور معك انت ولين انا مستعد ازوجه لين
ذيب كان يفور وقال : وقسسم بالله ان تحرم علييه وانا ولد عبدالله !!
رعد : ونععمم
ذيب كانت عيونها ترجف بخوف انه يخسر لين وقال : انا طالبك يالرعد انا ناخيك م تعطي لين احد غيري
رعد بحدة فك يدين ذيب ومسك راسه من ورا وقال : انت في وجهي وشنبي وابشر والله باللي يطيب خاطرك
ذيب ارتاح لرعد بس م كان مطمن لسعود اللي دخل فجأة لحياتهم بدون سابق انذار
دخلوا للمجلس وقال سعود : هاه وش قلت ؟
رعد بحدة : زي م قلت لك الرأي رأي شيباننا وم نعطيك كلمة من وراهم ونخالف شورهم لكن ابشر ان شاءالله خير
سعود توتر وقال : ان شاءالله
سكتوا فجأة وقال فارس بهمس : وراه ذا ؟
رعد : اندري عنه !
فارس : من يبي لين ؟
رعد : مدري م قالي بس م عندي الا لين بيت ابوي فاضي معاد الا لين
فارس : يخسي ياخذها وذيب طالبها قبله
رعد : عارف والله لكن النصيب وبنشوف ابوي وجدي وش ردهم واهم من ذلك لين
محمد كان يسمع كلامهم وقال : لا يخسي ماهو من سلومنا البنت تتزوج غريب
فارس ورعد : صادق
محمد : خلاص مفروض عارفين ان شيباننا بيرفضون ليه تعطيه كلمة ؟
رعد احتد صوته وقال : م عطييته كلمة قلت له ان شاءالله خير
كاسر ابتسم اول م توتر الجو وقال : تبون قهوة ؟
الكل مدوا فناجيلهم وطار سامي يجيب البلوت وبدؤا يلعبون متناسين سالفة سعود
....................
في بيت ابو محمد
ابو رعد : ماشاءالله العيال عندهم عزيمة ببيت رعد ؟
ابو محمد بعصبية : اللي م يستحون حتى شيبانهم م يعزمونهم !!
ابو هيام ضحك وقال : خلهم ينبسطون والله انهم يتضايقون اذا جلسوا معنا
ابو رعد ابتسم : والله وسيف صادق
ابو محمد : اصلاً مدري انا اعاتب الصغار ولا الكبار قوموا لا بارك الله فييكم برراا
ام محمد بحدة : وشفيييك عليهم
ابو محمد : وانتي معهم اطلعوا منيي
ابو رعد قام ومسك امه وهي تتحسب وتدعي ع ابو محمد وقال ابو رعد : خلاص يميمتي خليه يرقد
ام محمد : جعله معاد يصحى
ابو هيام بفجعة : استغفري يممه نفداتس !
ابو رعد : تكفيين يمه استغفري
ام محمد : استغفر الله
ارتاحوا العيال وسكروا النوم ع ابوهم وطلعوا من بيته تاركينه وراهم ينام عشان م يرتفع الضغط عنده
......................
في بيت رعد
هيام تثاوبت وقالت : اف نعسااانه
حنين كانت منسدحة ع بشرى اللي نامت وقالت : شكلي انا وانتي بنلحق بشرى
هيام انسدحت وقالت : اي والله
بيان : اف وش الجو ذا قوموا نرقص
هيام توسعت عيونها وقالت : تستهبلين والرجال ؟
بيان : بيتتس مو معزل ؟
هيام : الا بس صوت السماعة قوي
بيان ضحكت : لا لا نقصر عليه مو لازم نرفع الصوت
سلمى : جوووي بيان يخي
لين : خلاص نخلي البنات ينامون ونروح بأخر غرفة فالبيت
هيام ابتسمت وقالت : خلاص خذوها شوفوها فالدولاب الاسود
لين فزت بحماس وهي تتذكر لمسات ذيب وصوته وشكله وطوله وعرضه كان يفتن وقالت بصوتها الشجي :
ما ضاق صدري من وليفٍ عشقته
لو يضيق الفضا و الكون ما ضاق صدري
شوقي لخلي واضح فالعيون
يبين مهما كتمته بيَن حب خلي
دخل معها صوت ذيب وهو يقول :
ابو العيون الوسيعة سجن قلوب برية
صفة رموشه تروع صفة جنود السرية
خصره مع الريح يومي مثل الرسم فالعبية
كنه لا منه تمايل الورد فالمزهرية
انفجعت لين وصرخت بصوتها وهي تقول : بسسم الله
ضحك ذيب وكاسر اللي كانوا ورا الحوش يجيبون حطب
كاسر بضحك : الله يقلعك يالذيب
ذيب بحب : اعنبو غييرهاا والصووتت تلت قلبي من اقصاااه
كاسر بحدة : ااعقببب وانا اخو الرعد
ذيب فز : والنععمم
كاسر سحب حطبه وصار يركض ورا ذيب فيها
لين كانت تناظر فيهم وميتة حب كان عشق ذيب يتأكل وسط قلبها ويهلكها اكثر واكثر وقالت بنفسها ( يارب اكتبه من نصيبي يارب )
كاسر تقدم للبيت وقال : لين
لين فزت : هلا
دخل كاسر وقال : جاتس خطاب ترا
لين ارتعبت وقالت : هاه ميين ؟
كاسر حك راسه وقال : مدري اسمه سعود واحد من الضيوف
لين : لا لا م بوافق
كاسر ابتسم : محد بيوافق بس قلت اقولتس
لين : ابو ثوب بني ؟
كاسر احتد صوته وقال : وش عرفتس ؟
لين : شفته من بعيد
ذيب مر وقال : شافته الله ياخذ نفسه
كاسر لف لذيب وقال : ولد وش العلم
ذيب مشى ولحقه كاسر ولين وراهم قلبها يدق وتدعي يختفي سعود من حياتها لأنها ماهي ناقصته ابدًا
سلمى قاطعت تفكيرها وهي تقول : لين كنسلنا رقص بنتابع فلم تعالي
لين : اوه براحتكم
جلسوا البنات كلهم يتابعون فلمهم بينما بشرى وهيام وحنين نايمين
بعد ساعات انتهت العزيمة وطلعوا كل البنات لأخوانهم ولأزواجهم
هيام بتعب قالت : رعد
رعد سكر الباب بعد م ودعهم وقال : لبيه يعيوونه
هيام فتحت يدينها لرعد اللي سارع بخطواته لها وحضنها وشالها بين يدينه وحاوطت رقبته وقالت : وحشتني
رعد باس مبسمها وقال : الله يكثر خيرتس ع كل شيء سويته واسف والله تعبتتس معي
هيام حطت وجهها ع كتفه بخجل وقالت : تعبي لك راحة
رعد ابتسم ومشى فيها لغرفتهم ودخلوا وانسدحوا بحضن بعضهم وناموا
.........
برا بيت رعد
سعود : ذيب
ذيب لف له بحقد وقال : سم امرني
سعود ابتسم : م يامر عليك عدو بس ابي اخذ رقم ابو رعد منك اذا عندك
ذيب م قدر ينكر بحكم ان ابو رعد خاله وقال : ابشر
وهو ينحسر من القهر ولو بيده ذبح سعود وفجأة طرا عليه كذبة جوالي طافي وقال : العن ابوها حالة الجوال طافي
سعود ضحك : ماهو من حظي لكن اشهد بالله ان عندكم قمر ياهل قاضي
ذيب بحدة : اعقبب وانا ولد عبدالله
سعود ضحك بقوة وقال : بالله من هي عليه
ذيب : خطيبتي
سعود انلجم من كلمة ذيب وتفشل وقال : اسألك بالله !!
ذيب ابتسم : ايه نعم
سعود : اسف وربي م دريت اسفف
ذيب دق ظهره بقوة وقال : حصل خير
صد ذيب عنه وقلبه يدق وهو يتمنى لو ان لين خطيبته صدق اما سعود من الفشلة ركب سيارته وحلف معاد يقابل رعد في بيته او بيت واحد من اهله
.................
في بيت كاسر
كاسر بتعب : بدخل انام انا
لين : وانا بعد
وعد : وانا معكم
ضحكوا كلهم وفصل بين لين ووعد حضن كاسر لهم وقال : انفدا بناتي الشطورات
لين ضحكت وبعدت يده وقالت : بنتك وعد انا مالي
وعد ضحكت وحاوطته وقالت : راضييية والله
كاسر شالها من الارض وقال : انننن موتي ي لين شوفيني بنام معها وانتي لحالتس
لين كانت تحاول تخفي رغبتها بذيب وقالت : انننن موت يالكاسر انا سريري لي لحالي
طلعت لجناحها تحت ضحكات وعد وكاسر وناموا الكل في بيت كاسر
..................
في بيت ابو محمد
ام فارس : اف وين حنين !!
فارس بضيق : رعد قالي م بتاخذها
ام فارس : خير ان شاء الله وش صاير ؟
فارس دخل وقال : يمه تعبان بعدين اقولتس
طلع لغرفته وهو ميت حسرة ووده ياخذ حنين عنده وقام جلس واخذ جواله وارسل لها رسالة طويلة ع امل يوصله رد من حنينه وكان يقول فيها :
حنيني انا اسف اذا ضيقت عليتس وانا اسف اذا زعلتي مني وحز بخاطرتس شيء صغير وانتي والله ادرى باللي بقلبي لتس وتدرين قد ايش انا اعزتس اللي صار اليوم لوى ذراعي فيتس رجعت البيت وانتي مو موجودة والبيت والله موحش بدونتس يكل اهلي وطوايفي بحاول قد م اقدر اختصر لتس السالفة واللي هي ....
قال لها كل شيء بينه وبين بيادر وانه مستحيل يفكر بأنثى غير حنينه وانهى كل شيء وضغط ع ارسال وغط في نومه
..................
في بيت رعد
كانت حنين تبكي وهي ضايق صدرها من فارس وتمنت انها بين يدينه الحين وفزت ع صوت رسالة كانت تتمنى انها من فارس وفعلاً كان الاسم " فارسي " معتلي الاشعار فتحت جوالها وقرت كل حرف كتبه فارس وردت عليه :
في داخلي عتب وكلام واجد ودي اقوله واعاتبك ي فارسي وانهي الزعل لكن الصمت والحزن كاسيني وملجمني ولا اقدر اتكلم واقولك اللي بخاطري لكن القلب م وده بشوفك فترة وخلك بعيد مني قبل لا يطب قلبي منك ويعيفك واللي بينك وبين الهانم ذي م يهمني بس اللي يهمني انك م قدرت حبي واسمي كزوجة لك وحملي بأول اولادك ورحت تكلمها بذاك الاسلوب اللي اتوقع انك تتذكره للحين بس سلام اشوفك ع خيير .
ارسلتها ودموعها مغطية عيونها وحاجبه الرؤية تمامًا وبعد بكاء طويل غطت حنين بنومها
................
في سيارة ذيب
ذيب : شوق يالله انزلي
شوق : شفيك اليوم ؟
ذيب تنهد وقال : وش سالفتس ؟
شوق قطبت : ايش ؟
ذيب : ليه لين تحذرني منتس وش مسوية انتي ؟!
شوق دب الرعب بقلبها وهي تدعي ان لين م سمعتها وهي تكلم هادي وقالت بتوتر : مدري لا يمكن تبي تخرب بيني وبينك عشانها تحبك !
ذيب بحدة : لين تحبني ؟؟
شوق بعصبية عشان تبعد الشكوك : ايييه وواضح ترا وبعدين انت تعطيها ع جوها اكيد بتحبك الرخيصة !
انلجمت شوق بكف من ذيب وهو يصرخ عليها ويقول : احتررمميي نفسستتس ولعااد تغلطييين علييهاا !
شوق بصراخ ودموعها تنزل وكل ذا عشان ينسى ذيب الموضوع الاساسي : بكررا ملكتنا وانت باقي تتأمل بليين وبعدييين انساااها انا زوجتك خلاااص !!
ذيب بحدة : ماا قلنا شيء وانززلي دام النفس عليتس طيبة
نزلت شوق وعلطول تغيرت ملامحها وضحكت وقالت : واااه حمدلله طلعت منها اعنبوها الكلبة لاتكون سمعتني !
ذيب حرك من قدام بيت ام شوق واتجهة لبيت كاسر ووقف وراه تحديدًا شرفة لين وانصدم اول م نزل وشاف لين واقفه ع الشرفة ومعها اللابتوب حقها وتشتغل عليه وقالت بصوت شبه مسموع : حمدلله خللصصتت اخر اختببااارر !!
ذيب ابتسم وطلع البوكيت واخذ سيجارة وحطها بين شفايفه وشغلها وهو يتأمل معشوقته وقال : بطلة حبيبتي عسى الله يعطيتس مرادتس واشوفتس في اعلى المناصب
لين سكرت اللابتوب وقالت : اافف لييت ذيب معي ونحتفل سوا واقوله اني صرت دكتورة طب وجراحة
ذيب توسعت عيونه وقال بصوت عالي : والله ان ذيبتس معتس ومحتفل معتس ي دكتورة قلبيي
فزت لين وطاحت عينها بعين ذيب وقالت : ذذييبب !!
ذيب ابتسم وزفر الدخان بحب وقال : يرووحه
لين فزت وغطت نفسها ببطانيتها وقالت : وش تسوي هنا !!
ضحك ذيب وقال : قصدتس وش اسوي هنا كل ليلة ؟
توسعت عيونها وقالت : هااااه
ذيب غنى بصوته الثقييل وهو يقول :
ودي اني اضمتس
واخذتس ثم المتس
واتشافى بيمتس
زييين حظي عليتس
-
لين كانت ترجف بفرحة ومن البرد زادت رجفتها وقالت بحب : ذيب احبك
ذيب دق قلبه بقوة وقال : وقسم بربي وربتس اني اهيمتس يبنت محمد
لين كانت تتأمله وماهي قادرة تشيل عينها من عينه وقالت : انتبه من شوق تكفى
ذيب توه يتذكر وقال بحدة : لينني تكفين قولي لي وش عرفتي تكفين لاتضيعيني من يدينتس وعطيني لو طرف خيط وانا بطلع علومها
لين : ركز ع مكالماتها وخلك هادي
قالت اسم هادي وهي ناويه تخليه يركز بأسمه وفعلاً ذيب حس انها اشارة ودخلت لين غرفتها ومشى ذيب لسيارته وتحرك من بيتهم وهو باله في شوق وبلاويها واسم هادي اللي قالته لين
...............
من بكرا الصباح الكل كان مستنفر لملكة شوق وذيب
ابو محمد : يولدي اخلص علي
فارس ابتسم : بدري يجدي والله بدري والملكة محد قالك تحطها في بيتك وش فايدة عمي عبدالله ؟
ابو محمد بعصبية : ياللي م تنتخي ولا تستحي !
فارس ضحك : سم بس بنمر ع بيت رعد اول
ابو محمد : طيب
مشوا ووراهم الكل يركضون ويضبطون ويردون ع الضيوف والمنسقين وكل شيء
ام شوق : هاه كيف ؟
ام رعد : ماشاءالله حلووه والله واسمائهم احلى
ام شوق ابتسمت : الله يتمم يارب
الكل : اميين
كانت ام شوق مجهزة مراية كبيرة عليها اسم ذيب وشوق ويحفها الورد من كل جهة كان التزيين يجنن وكل شيء مثالي وبمكانه
......
في بيت كاسر
كاسر وهو لابس ثوبه : يالله بخريني وامشي نطلع
وعد وهي تلبس حلقانها : اصبرر
سكرت الحلق ومشت واخذت المبخرة وحطت عليها البخور وفتح كاسر شماغه وحضنها فيه وتبخروا وباس خدها وقال : تبيين تذبحييني بالأحمر ؟
وعد ضحكت : وش اسوي لوني المفضل
كاسر بحب : اشهد بالله انه محظوظ وانه م لاق الا لتس
طلعوا بعد م هجدت وعد كاسر اللي اذا بدأ يمدحها مستحيل يسكت
وعد : لييين خلصتي ؟
لين طلعت بفستانها الاصفر : ايه
كاسر بحب : اوووه كذااا كثييير ع قلببيي
لين ابتسمت وهي مرتاحة انها اعترفت لذيب وسمعت رده لها وقالت : يخيي بدونن احراااجات
كاسر : ابشري يالزييين كله ويالله مشينا
طلعوا كلهم واستوقف كاسر اتصال رعد ورد
كاسر : ارحب
رعد : الله يبقييه سلام عليكم
كاسر : عليك السلام يالرعد
رعد : كاسر اسمعني مر بيتي واخذ هيام وحنين معك انت بطول
كاسر : ابشر يعيون اخوك
رعد ابتسم وقال : تبشر بالجنة يسندي
سكر رعد واتجهة كاسر للسيارة ومشوا لبيت رعد
لين استغربت الخط وقالت : وين بنروح ووش قالك رعد ؟
كاسر : بنروح لبيت رعد نأخذ حنين وهيام
وعد : غريبة وين رعد ؟
كاسر : بدوامه
كانت هذي اخر كلمة قالها كاسر وعم الصمت ارجاء سيارته وماهي الا دقايق ووصلوا لبيت رعد نزل كاسر ودق الجرس ووصله صوت حنين : مين ؟
كاسر : حنيني انا كاسر
حنين ضغطت الزر وانفتح الباب ودخل كاسر وقال : يالله ؟
حنين كانت تلبس نقابها وقالت : يب خلصنا
هيام طلعت وقالت : كاسر ؟
كاسر لف لها : ارحبي يهيام الرعد
هيام ابتسمت : الله يبقييك شخبارك ؟
كاسر تقدم لهيام ومد يده لها وصافحت رؤوس اصابعه وسحب يده وحطها ع صدره بمعنى الاحترام وقال : بخيير جعلتس بخير
هيام : دوم يارب غريبة وين الرعد ؟
كاسر : م دق عليتس ؟
هيام طلعت جوالها وشافت اتصالين فائتة من رعد وقالت : الا والله بس م رديت
كاسر ابتسم : عموم انه في دوامه وبيلحقنا بعدين
هيام : اها استودعته ربي
كاسر ابتسم وطلع لسيارته وركبوا حنين وهيام ومشوا لبيت الجد قاضي اللي صار معروف ان العزايم سواء كبيرة او صغيرة تصير ببيت الجد
......................
في بيت منصور
فز منصور بقوة من النوم وقال : كمم الساااعة !!
سلمى فزت برعب وقالت : وجعاااااه خرشتتننيي
ضحك منصور وقال : يراسي فاتني الدوام
سلمى : طيب ؟ قم البس ورح الحق
منصور : معاد يمدي باخذه غياب من الاضطراري حقي
سلمى ابتسمت وبعدها شهقت : ككمم الساااعة !!!
منصور فز برعب : وججععيينن يحييووانهه
سلمى : ملكة شوق وذييب !!
منصور فز يركض للحمام وقال : اايي والله !
قامت سلمى ركض للدولاب وهي تروشت امس وطلعت بنطلون طويل ووسيع من اطرافه وتوب ابيض يجنن وماسك عليها ولبست وخلصت وجلست تضبط شعرها ومكياجها
طلع منصور ولبس علطول وقال : البخورر ؟؟
سلمى : تعال حبيبي
قرب منصور وباس خدها وقال : عييوون حبيبتس
سلمى ابتسمت وقامت وبان فرق الطول بينها وبين منصور وقالت : يحبي انزل شوي
ضحك منصور ونزل لها وغطاها بشماغه وتبخروا وقال بهمس : ارفقي بي ي سلومتي
سلمى ابتسمت : احبك
منصور : اهيييمتس
خلصوا ولبست سلمى عبايتها وطلعوا ركض من البيت وهم من اهل قاضي ولازم يحضرون قبل الضيوف
...............
في سيارة فارس
فارس وقف عند باب بيت جده وقال : يالله ؟
نزل جده بعصاته وقال : ع الله توكلنا
نزلوا وساعد فارس جده بالأغراض واللحم والذبايح وهو باقي م تكشخ وكان فارس بثوب كحلي وشعره طايح ع جبهته وكان يفتن وماهي الا ثواني ووقفت سيارة كاسر ونزل وقال : عساك ع القوة يفروس
حنين لفت لفارس اللي قال : ويااااك يالكاسر
حنين م تحملت شكل فارس وقالت : فارس
فارس لف لها بهدوء وقال : روحه
حنين قربت منه وقالت : شفيك م لبست ؟
فارس بزعل وعتب واضح : سهلة لأن اللي تكشخني وتلبسني ماهي موجودة
حنين بزعل : اطلع لي الان
مشت وفارس قلبه يدق بفرحة وخلص الاغراض وسكر سيارته وطلع لحنين فوق بغرفتهم
هيام نزلت : لين كيفتس ؟
لين بزعل : زي الزفت نفسيتي تعبانة ومدري كيف تكشخت اصلاً
هيام ابتسمت بزعل وقالت : يروحي عليتس قالي رعد عن سعود بتوافقين ؟
لين احتدت نظرتها وقالت : طبعًا لاا
هيام : يمكن نصيبتس ؟
لين : نصيبي ذيب ولا بقبل الا بذيب
هيام ضحكت وقالت : الله يجمعكم ع خيير
لين : امييين
دخلوا وهيام راحمة لين وملاحظة عليها انها ناحفة وان حب هيام ذيب اهلكها
ام رعد : كوويس جيتيي وين رعد ؟
هيام ضحكت وسلمت عليها وقالت : م جيت مع الرعد يعمة
ام رعد : والله ؟ ليه عسى م شر
هيام : الله يبعد الشر معليتس بيجي هو في دوامه
ام رعد ابتسمت : اهااا ع خير ان شاءالله
هيام دخلت داخل وقالت : الله وش الحلاوة ذي يعمة عبير
ام شوق : والله م الحلو غيرتس يهيام الرعد
هيام ابتسمت بحب من الاسم وسلمت عليها وجلسوا البنات في انتظار الضيوف والعرسان
.................
في مجلس الرجال
كاسر : كييف حال عريسسنا
زايد : بخيييير صح ؟
ذيب بحدة : انلجم انت وياه !
كاسر قرب منه وقال : لو خذيت لين بتكشر كذا ؟
ذيب ضحك : بخطفها بدون زواج ولا شيء تستهبل انت
كاسر ضربه وقال : يالخفيييييفف
ذيب صد عنه وهو يضحك وجلسوا ينتظرون الضيوف وكان اهم الحضور رعد اللي للحين مختفي عن الانظار
.................
في غرفة فارس وحنين
دخل فارس وقال : لا اله الا الله يالحنيين ارفقي بفارستس وشذا الزيييين
حنين م لفت له وقالت بهدوء : لاتحاول تعال البس واطلع للرجال
فزت اول م حست بيدين فارس من وراها وراسه ع كتفها وكان شّادها عليه بقوة وقال بهمس : خلاص عاد
حنين كان زعلها شين وم ترضى بسرعة وقالت : فارس ابعد
فارس انقض ع حنين يبوس فيها تحت صدمتها وبعدته عنها وكان فارس مشتاق ولاهو قادر يمسك نفسه وقال بصوت مرعب : حنيينن اعقلليي
حنين كانت ماسكه وجهه بيدينها وقالت وهي ترجف : فاررس شفيييك !
فارس حط يده ورا خصرها وشّدها عليه وقال : ابيتس بين يديني شوي بس
حنين : فاررس الملكة !
فارس بحدة وبصوته الرخّيم : ولعنة في ملكتهم
سحبها فارس لمبسمه وم قوت حنين عليه واستسلمت له وبعد دقايق طويلة تركها فارس وقال بتخدر : اسف يحنيني اسفف والله م كانت نيتي وسخة ولا اني اخونتس وجعلني افقد عافيتي اذا فكر بيوم اخونتس
حنين بهدوء كانت متمسكة برقبته وقالت : بسم الله علييك خلاص يالفارس حصل خيير
فارس بزعل : حنيين عاتبييني بس لاتقولين كذا تكفيين
حنين حطت وجهها ع خده وقالت : احبك مقدر اعاتبك ولا اقوى اصلاً
فارس لف بوجهه وباس طرف شفايفها وقال : اهيمتس يروح فارستس
قام فارس من عليها ودخل يتروش واتجهت حنين تجدد روجها وضحكت وقالت : يالله وش صار خدودي تحترق كيف بنزل لسلمى وهيام والله معاد يسكتون !
طلع فارس بعد مده ولبس وخلص وبخرته حنينه وعطرته وطلع للرجال وطلعت حنين للحريم
هيام : حنيين وين اختفيتي !
حنين بخجل : فوق اجهز فارس
هيام شهقت : تراضيتوا !!
حنين هزت راسها بنعم وسكتوا وشوي ودخلت سلمى مستعجلة وقالت : العهد قريب ي اهلي " بمعنى م يحتاج اسلم عليكم توو شفتكم قريب "
هيام ضحكت : وشفيها ذي ؟
حنين : مدري بس كاشخة التبن
سلمى : سمعتتس يكلبه
ضحكوا الثلاثي وقاموا مع بعض عند المرايا
هيام بزعل واضح : وربي م كسر خاطري الا لين تمنيت انها م جات بسلامتها
حنين ابتسمت بضيق وقالت : عادي لا توضحون لها وان شاءالله تتخطاه
سلمى بصوت مرتفع : ليييه يحبيبي تتخطاه وربي لا ازوجهم وم اكون انا اخت الذيب
هيام فزت ورفعت رجولها وكتمت سلمى وحاوطت سلمى خصر هيام وقالت : يمزه
هيام بعدتها وقالت : يعع سلمى !!
سلمى ضحكت : اقوول انتي معي كذا وقصيرة اجل مع الرعد ؟
هيام بضحك : ي تبن وقفي تنمر ! يارب عيالتس يكونون قصار
سلمى ضحكت : ومن من بيورثونه امهم طويلة وابوهم اطول
هيام : اص وجع
حنين ضحكت : يزينتس يهيام الرعد تهايطين ع اللي اطول منتس
هيام : بناااات وين وعد اللي تحسسني بالأنتماء
وعد ضحكت وجات : وش يتنمرون عليتس ؟
هيام : اييييه انصفيني
وعد : ودي بس كلنا قصار
طاحوا حنين وسلمى يضحكون عليهم وجات بشرى : شسالفة ؟
سلمى بضحك : بشرى انتي جربتي طول رعد ووقف قريب منتس كيف طويل ؟
بشرى تذكرت وقالت : يووووه مرره يخوووف
هيام بقهر وغيرة : طيب انا م زلت اجرب ليه م سألتيني ؟
حنين : اوووه غاااارت
هيام مشت داخل وشافت حنين جالسة بهدوء وجلست جنبها وقالت : الحلوه زعلانننه
لين لفت بحب وقالت : لا والله كثر م اني اشوف ذيب م يستاهل شوق
هيام : شكلها تخونه وشكلتس قفطتيها
لين شهقت : كييف عرفتتتيي ؟
هيام فزت : اسألتتس بالله !!!
لين : وربيي
هيام : يمهه انا تحلمت فيها !! عشان كذا قلته
لين برعب : يويلليي يهياااام
هيام بهمس : خلااص اص ماله داعي نلفت الانتباه اهم شيء نعلم ذيب قبل يملك
لين : وهذا اللي لاوي ذراعي مقدر اوصله
هيام : اف يارب يصير شيء وتتفركش الملكة
لين : اميييييين
جلسوا البنات بعد م سلموا ع الضيوف اللي بدؤا يدخلون
...........................
في مباني هيئة الضباط
رعد : ايييه غايب الوسخ
خالد ضحك : بتطلع انت الحين صح ؟
رعد : يب بس بخلص توقيع كن معاملة وبطلع
خالد : يالله حضرة العميد بالتوفيق
طلع خالد بعد م دق التحية لرعد اللي خلص اخر معاملة وطلع وكتب اسمه والتوقيت ووقع وطلع لصالح
صالح فز ودق له التحية وقال : في امان الله يالرعد
رعد ابتسم : استرح وانتبه لنفسك
طلع رعد من المباني ركض لسيارته وركب وطار لبيته ودخل وطلع مفاتيحه وفتح الباب ودخل وطيران للحمام اخذ دش سريع ولبس ثوبه وحزامه وسلاحه وتعصب بشماغه وتبخر وتعطر ولف وشاف حوسة هيام الخفيفه وقال بحب : اه م لحقت عليتس ولا شفت كشختتس وغيري سبقوني لتس يالهيام
طلع رعد وهو يشّد حزامه عليه وركب سيارته ودعس لبيت جده وماهي الا دقايق ودخل اسوار البيوت الثلاث
كاسر فز : رعد جاء اخييرًا
فارس : ايي والله م بغى
رعد نزل بعد م طفى موتره وقال : سلاام
كاسر : العهد قريب ادخل بسرعة
رعد بحدة : رد السلام وشدخل العهد قريب !
كاسر : افف عليكم السلام اممشش
رعد : شسالفة ؟
فارس : قصده الضيوف وكذا
رعد فز : وصلوا !!
فارس ضحك : بدري م شفت السيارات انت ؟
رعد دخل ركض وقال بصوته الثقييل : سلاام علييكم
الكل بدون استثناء فزوا لـ الرعد وسلموا عليه السلام الحار
وصل لذيب وقال : هلاا بعريسسنا
ذيب : ابلش يخوي اذا م خذيت لين لا تسموني عريس !
رعد ابتسم : معليه خير ان شاءالله
جلس رعد جنب محمد وقال بحب اول م شاف لميس بحضنه : هاتها اعنبوها
محمد ضحك : وشدخلني !
مد محمد لميس لرعد واخذها بين يدينه وكانت صغييرة مقارنة برعد وقال : يزييينه النونو الحلو
لميس ضحكت علطول وانهار رعد من ضحكتها وقال : افديييها بنت اخو الهيااام
محمد : اهم شيء الهيام
رعد ثقّل صوته وقال : طبببعًا !
كانت لميس مبسوطة مع رعد وتلعب وتضحك ورعد في انهيار كان يشوف ملامح طفيفة لهيام عليها وهي فعلاً م كانت ملامح هيام كثر م هي ملامح محمد اللي كان شديد الوسامة نفس اخته
رعد مد لميس لأبوها وقال بهمس : شرايك توديها لأمها لأنها سوتها
محمد طاح يضحك وقام وهو يقول : الله يقططعك يالرعد
رعد ابتسم : والله العظييييم
طار محمد ببنته لبشرى وناداها وطلعت له : لبيه
محمد : لبيتي في منى يعيونه خذيها وسخت ع نفسها
بشرى : يروووحي عليها
اخذتها بشرى وراحت داخل ولف محمد بيطلع بس استوقفه صوت هيام وهي تقول : حمودي
محمد لف لها : لبيييه ارحبي دهر قلبي ورجعانه
هيام ابتسمت وحاوطت محمد وقالت : شخبااارك وحشتتنيي
محمد : م يوحشتس غااالي طيب وبخيير وانتي و امريني
هيام ضحكت : صدعت الف سؤال فالثانية المهم بخير بعد شوفك يسندي وابي اسألك رعد جاء ؟
محمد كان يضحك وقال : غريب م سمعتي اصوات الرجال اول م ارتفعت ؟
هيام ضحكت : اوه يعني الشيخ وصل
محمد : الله عليتس
هيام ابتسمت وقالت : رح ناده لي الله لايهينك
محمد : من عيوني
طلع محمد وقال : رعد تعال
رعد لف له وقام واتجهة له وقال : هاه ؟
هيام ابتسمت اول م سمعت صوته وقالت : رعد تعال
محمد ابتسم ومشى للمجلس وتقدم رعد لهيامه وقال : فيه احد ؟
هيام : لا تعال
دخل رعد وسكر الباب وراه وقال : بسسم الله علييتس والزيييين كله وش باقي لغيرتس ؟ وبعدين لا تلومين عذالتس اذا كثروا م خليتي من الزييين شيء ي هيااامي
هيام ابتسمت وقالت : احبك
رعد تقدم وباس راسها وقال : اهيمتس تكفين وشذا الزين
هيام بحب : انت اللي وشذا الزييين اهييم بالحزام واحسده لأنه حاضنك تحت نظراتي !
رعد ضحك وقال : احضنيني انتي طيب
هيام تذكرت سلمى وضحكت وقالت : يستحسن اني م احضنك بعد التنمر اللي جاني
رعد تقدم وشالها بين احضانه وقال : مفروض تعودتي
هيام شّدت عليه وقالت : يالله وشكثر الحبب
نزلها رعد وقال : اسمعي بطلع الحين وبجيتس بعد ساعة بعطيتس حزامي وسلاحي وانتبهي لها او عطيها حنين ترفعها بغرفة فارس
هيام : ابشر
رعد : تبشرين بالجنة يروحه
طلع رعد تحت انظار واعجاب هيام برجولته اللي كانت مرعبة وهيبة وقالت بنفسها ( اشهد اني خذيت لي رجال عن مليار رجال ! )
دخلت وشافت شوق تصور عند المراية وقالت : مبروك يروحي
شوق لفت وابتسمت بكلافة : الله يبارك فيتس يهيومه
هيام مرت من جنبها وشافت لين واقفة وراها وقالت : لين شفيتس ؟
لين نزلت جوالها وقالت : وشفيني ؟
هيام : تعالي نرقص ونستانس
لين بحماس : يالله
دخلوا وبدأت السماعات تدق النغم والالحان ع تمايل ورقص البنات وحضور هيام اللي كانت جالسة بهدوء وتصفق والكل اشتاق لرقصها المثالي بس كانت خليفة هيام موجود الوعد اللي كانت خاطفة الانظار برقصها وقالت سلمى بصوت عالي : عااااشت اخت العروسة
وعد بحب : عاااشت ايامتس ي سلومتي
بشرى كانت تمايل ببنتها وترقص معها تحت حب الكل لهم ولمنظرهم اللطييف
وماهي الا دقايق ودخلت لين واخذت كل الانظار والكل كان مصدوم من شكلها كانت فاتنة واجمل الحضور هي حنين ابتسمت وقالت : عاااشت ليين قلبيي
لين رجعت شعرها ورا اذنها وقالت : عششتتيي يحنينن عمري
تماسكوا باليدين وصاروا يرقصون قدام بعض كانوا يتشابهون بشكل كبييير وكانت لين انعكاس حنين والكل كانوا مندهشين منهم
انتهت فقرة الرقص واعتلى صوت حمد يقول : شووق تعالي وقعي
شوق قامت وراحت تركض وهي تبي تخلص كل شيء عشان تقوى خطتها وصقعت بلين وهي رايحة وقالت لين بحدة : عمى م تشوفييين !!
شوق : يعميتس يالمريضة يالحسودة يالمتخلفة !
لين احتد صوتها وقالت : ههييه بسس عنن الغللطط !
شوق ضحكت بأستفزاز وقالت : وش بتسوين هذا ذيب وطار من يدينتس
ع كلمة شوق جاء ذيب ووقف ورا الباب يسمع كل شيء وكان حمد عند الباب الثاني ينتظر شوق
لين بحدة : لا تحسبيني اجهل الحب اللي يصير بينتس وبين هادي ! ولا تحسبيني اجهل خيانتتس لذيب عشان كذا سدي حلقتس دام النفس طيبة لا افضحتس عند اللي يسوى واللي م يسوى !
شوق انلجمت وقالت برعب : ووش تقوليين انتي وكييف عرفتتيي !!!
لين : حبيبي نسيتي اني لين ؟
" كانت لين معروفة بطولة اللسان وبرضو تعرف كل خافية فالبيوت "
شوق بصدمة : انطميي طيب ! واللي يصير بيني وبين هادي مالتس شغل فيه !
حنين جات وقالت : ليين شفييتس ليه اصواتكم طالعة !
لين : ولا شيء بس في كلبة تحتاج من يربيها
شوق علطول صفقت لين كف وقالت بحدة : انتتيي الكلبببة !
اول م دوى الكف في مسامع ذيب دخل بكل قوته وصرخت حنين ودفت لين قدامه وركضت وهي تعرف لو يدري فارس بينحرها من غيرته وشهقت لين اول م ضربت يدينها وجسمها بصدر ذيب اللي كان يناظرها وعيونه شرار وقال بحدة : شوووق وش اللي سمعتته !!
شوق بكت وقالت : ولا شيء تفتري عليي الحقيييرة
ذيب لف وناظر بلينه وكانت تفتن وكل شيء فيها مثالي لدرجة توجع القلب نزل بشته ولف لين فيه وقال بهمس : لينيي م طفشتي وانتي تأخذين اغراضي ؟
لين برعب : هاه !
ذيب صد ولف لشوق وقال : انكرري بسسرعة قوليي م اعرفه قوليي م خنتك قووليي اي شيء !
لين انصدمت وقالت بحدة : وانتي باقي تنتظر منها شيء !!
ذيب بحدة : ليني لا تحشرين نفستس بيني وبين شوق
شوق زاد بكائها وقالت : مدري مدري
ذيب صرخ : هااااتي جوالتس !
شهقت شوق وجوالها كله مقاطعها مع هادي وصورهم مع بعض ومكالماتهم ورسايلهم كل شيء ملياااان وقالت : مدري مدري وينه
ذيب مسح وجهه وقرب ومسك وجه شوق وقال : شوقي ناظري بعيوني
لين كانت تحترق وتموت وقالت بهمس سمعها ذيب فيه : شوقي ؟!!!!
ذيب لف لها وابتسم وصد وقال : شوق
شوق بصوت مهزوز متصنع وواضح انه كذب : عيوني
ذيب : تخونيني ؟
شوق نزلت عيونها وقالت : هاه لا
ذيب همس لها وهو يصر ع اسنانه : اعترفي قبل اطلع فضايحتس وتعنسين عند اهلتس يالكلبة !
شوق بخوف : ايه ايه اخونك مع واحد احبه ويحبني وبيج..
الجمها كف ذيب وصرخته وهو يقول : انتي طالق بالثلاث طاللق طاللقق طااالللقق ساممعهه !!
ورجع يهمس لها وقال : وروحي لحبيبتس يالعاهرة !
لف بيطلع وكانت لين مصدومة وميته فرحة وقال : ليني البشت
كانت لين تنهار انه حتى بأسوء حالات ذيب م كان يناديها الا ليني وقالت : صد طيب
ذيب ابتسم : حافظتس م يحتاج
لين : وبعدين !
صد ذيب ومد يده وعطته لين البشت والكل بعد م طلع ذيب جاوا يركضون عن شوق اللي طاحت تبكي وتقول بصوت عالي : ليييين اللي خرربتت خطبتتتيي ليين اللي دمررتت كل شيء اغررت ذييب وطللقننيي عشااانهاا ليين خررببتت فرحتتتيي وهدمتت بييتتيي
الكل وقفوا يناظرون بلين اللي كانت واقفة وقفة رعد اخوها ورافعة راسها رفعة كاسر اخوها ومثبته يدينها ع طريقة حنين اختها وقالت بحدة جمعت كل صفات اخوانها : اقول يالمطلقة روحي لهادي وخليه يتقدم لتس ولا بس فالح يسويها معتس بالحرام ويهرب !
قالت كلامها تحت صدمة الكل وقال ام شوق : حسببيي الله فييتس ونعم الوكيل !
ام رعد وحنين بصوت واحد : سلاااااماات !!
الكل كانوا مصدومين وكيف انه تطلقت بيوم ملكتها وقربت هيام وقالت : حمدلله ع كل حال الله يعوضها ويرجع لتس الذيب
لين بحب : اميين يارب
وقفت شوق بعصبية وقالت : الله ياخذتس وعساتس م تتهنين بحيااتس !
لين : حبيبي انتبهي ترجع لتس الدعاوي لأنه انتي اللي تسوين اشياء فاسدة ومحرمة مو انا !
هيام ابتسمت وقالت : ولا كأنتس تطلعين قدام ذيب
لين همست : هو اللي يجي يخي وبعدين م صار بيننا شيء بالعمد
هيام : ادري يروحي
شوق انهارت تحت صدمة الكل بدون استثناء وبدأ حكي الحريم يطلع والكل صار يتشمت واللي يتحمد ربه
..................
في مجلس الرجال
دخل ذيب وقال : الله يستر علينا وعليكم الملكة انتهت بالطلاق والله يستر عليها راحت بخيرها وشرها
فزوا الرجال بصدمة وقال رعد : نععمم !!
كاسر برعب : وش صااار
ذيب : بقولك بعدين
حمد بعصبية : اععقبب يالحرمة تطلق اجل ليه تخطب من اول دامك م انت بقدها !
رعد بحدة : حمممد الفااااظظك ولا تحككم مشاعرك علييك بدون م تعرف السبب !!
حمد رمى فنجاله عند رجول رعد وقال : انتت بالذااات لا اسممع صووتك !
رعد فز وتقدم لحمد وضرب صدره في صدر حمد وقال بصوته الرخّيم : م جاابته امه اللي يسكت الرعد !
كان فارق الطول بينهم كبييير وانلجم حمد ولف عن رعد وطلعوا الضيوف وقال ذيب : معاد الا اهلي صح ؟
ابو محمد بعصبية : انطق !
ذيب : بنتكم ي حمد ياللي تقول اني حرمة طلعت تخونني مع واحد م تعرفونه
حمد بحدة : اعععقبب
سامي بعصبية : ووولدد !!!
ابو رعد : وشذا الكلام يالذيب
كاسر : ههيييه وشفيكم اشتطيتوا عليه مستحيل ذيب يتهم احد عبث
حمد فز للحريم واخذ جوال شوق غصب وقال : كم الررممزز يكللببة !
شوق بخوف : ٨٤٢٩٥٦
فتحه حمد وطلع له كل شيء من طقطق للسلام عليكم وقال بصرخة : الله لايوفقتس يالعار فضحتيينا عند اللي يسوى واللي م يسوى وظلمتي ذيب اللي والله استحي اسلم عليه الحين لكن هييين حسابتس معي ماهو بهين !
طلع حمد وهو يرجف من العصبية وقال : تكفون ي اهلي وقفوا معي واستروا عليها
ابو محمد انخفض الضغط عنده وطاح عليهم
فارس برعب : ججدييي
ابو هيام فز ومسكه قبل يضرب راسه فالأرض
ابو رعد بحدة : حصصلل خييير ي حمد وابشر بوقفتنا وبنستر عليها ونزوجها اللي يستر عليها
سامي برعب : رعد ساعدني بنشيل جدي
رعد تقدم وشمر اكمامه وشال جده بين يدينه وكان رعد اقوى العيال وقال : كاااسر السيارة !
كاسر طار مع ذيب للسيارة وفتحوا وقربوها للباب وركب رعد جده قدام وطاروا فيه للمستشفى وقال رعد : فارس خلك عند الحريم انت وضاري
فارس : ابشر طمنوننا
رعد : ان شاءالله خييير
ركب رعد مع ابوه سيارته ولحق ذيب وكاسر للمستشفى ووصلوا واخذوا جدهم للطوارئ وبدؤا فالعلاج وشويات وصحى وهو يقول : محممدد !
ابو رعد : لبيه يبه
ابو محمد : م اداني المستشفى رجعني البيت
رعد : يجدي يخلص المغذي ونوديك ابشر
ابو محمد بحدة : ومتى بيخلص
كاسر عشان يهونها قال : الحين
رعد ضربه بخفه وقال : لا يالدبشة مو كذا كان قلت عشر دقايق عشان تهون النص ساعة
كاسر ضحك : يسااااتر يالليلة الحافلة !
ذيب : بطلع ادخن شوي واجيكم
رعد بهمس : ابشر بالعوض
ذيب ابتسم بحب وقال : عوضكم جميييل وراضيي فييه دامه تل قلبي من اقصاه والله اني راضي وجايها ع وجهي
رعد ضحك وقال بنفس الهمس : لعاد ترجع عشان جدي م ينكتم خلص واقعد بسيارتك
ذيب هز راسه بنعم وطلع جواله واتصل ع ضاري وطمنه ع جده وقال انه بس يخلص المغذي بيرجعون
ضاري : حمدلله يارب
ذيب : توصي شيء ؟
ضاري : سلامتك ومعوض يبو عبدالله
ذيب ابتسم : العوض راسك يعضيدي
سكر ضاري وطلع ذيب ومسك البوكيت واخذ سيجارته واستقرت بين شفايفه واخذ له جرعة كبييرة وهو متضايق وزفرها براحة وقال : انا ينلعب علي وانا كنت بطير ليني من يديني عشان وحدة م تسوى اثر ليني فالارض !
كمل يدخن وتفكيره كان ٩٠٪؜ لينه و ١٠٪؜ كيف لعبت شوق فيه
...................
انتهت الليلة السيئة بحياة ام شوق لأنها انفضحت في بنتها وكانت ليلة سعيييدة بالنسبة لحلوتنا لين اللي كانت بتطير من الفرحة وحلفت م يروح عليها ذيب واي وقت بيجي يخطب بتوافق بدون اي تردد
هيام : رجعوا ؟
وعد ضبطت عبايتها وقالت : ايه
طلعت هيام وقالت : يالرعد
رعد لف لها بكل حواسه وقال : عيوونه
ام محمد بقرف : جدك توه سلم من الطيحة وانت جاي تتغزل وقدامي ياللي م تستحي !
ضحك رعد وسحب هيام لحضنه وباس خدها وقال : ااااه يجدة حفيدتتس ذي مدري وش سوت فيني
هيام حمرت وقالت بهمس : ررععدد
ام محمد تقدمت وضربت رعد بقوة وقالت : ياللي م تنتخي صدق !
رعد باس راسها وقال : احبها والله يجدة
ام محمد ابتسمت وقالت : الله يخليها لك ويخلي ولدكم يارب وتشوفونه ونفرح فيه
هيام الرعد بصوت واحد قالوا : امييين
ام محمد : يالله توكلوا
ضحكوا رعد وهيامه وركبوا السيارة وقال رعد : فارس وين حنين
فارس نزل زبيريته وقال : توووكلل
رعد انفجر يضحك وقال : سم طال عمرك
فارس ضحك ودخل البيت ومشى رعد متجهة لبيته والكل مصدوم من فعلة شوق واتهاماتها الباطلة للين
:::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( هااااي وحشتووونيي 😢 ، ابشركم كسرت حاجز الثمان الاف كلمة البارت طويييييل ويجنن ومليياااان احداث عطوني رايكم ع كل حرف ، شوق ؟ طاااارت 😂 ، لين وسعود ؟؟ ولا لين وذيب ؟؟ اشوفكم ع خيير ان شاءالله 🫦 )