مكالمة..
- الو اي معاك كيفك،، اي العرس بكرة ح امشي علشان اشوفها عاملة شنو،، يا بت اصبري هانت كلهم كم اسبوع وأكون ف عصمتو اصلا م فارق معاي لو هي ف حياتو او لا المهم سراج يعرسني،، طبعا ماشة الكوافير ألون شعري واكويهو واعمل ميكب اوك يا بت نتلاقى..
_
الليلة حنة إياد البيت ملان شديد ب أهل ابوهو وانا زهجت وروحي طلعت من الزهج طلعت بيت سلوان قعدت للعصر مع انو بيتهم ملان برضو لكن غرفتها فاضية انا وهي وبت خالتها ودي كانت فرصة جهزت ليها الشنطة وحجاتها البتحتاجها كلها قريب المغرب طردتني قالت لي دا عرس اخوانك طيري من خلقتي..
طلعت البيت لقيت حجات الحفلة جات والصالة كانت إضاءاتها كتييرة دخلت البيت عشوش نادتني قالت لي كنتي وين قلت ليها تعبت شوية مشيت رقدت عند سلوان قالت لي نسابتك جو من العصر قلت ليها غريبة م كلموني قالت لي منال ومها ومروة بس قلت ليها طيب النمشي اسلم عليهم ..
قعدت معاهم شوية مشيت شلت غياري ورجعت عند سلوان صليت العشاء ولبست فستان برضو مطقم احترت اعمل ل شعري شنو سراج ح يزعل طبعاً لو فكيتو سلوان حجبتني بطريقة خرافية🖤
صراحة طلعت بالحجاب احلى من اي يوم بالجد الحجاب هيبة🖤
الحنة خلصت وجا العرس المنتظر الحمد لله انو العزومة عشاء ف البيت كان شبه فاضي قضيتو نوم بس لحدي قريب الجمعة حتى صحيت لقيت مكالمات كتيرة من سلوان رجعت ليها قالت لي جاياني بعد العقد يعني قلت ليها جاية عليك م تكووركي فيني لبست لي توب مطقم بس الشبشب واطي بعديها مشيت سراج اتصل علي فيديو والعقد شغال سلوان استلمت التلفون مني لحدي العقد خلص عزومتهم غدا بعد اتغدينا قالت لي بعدا مفترض نمشي الكوافير قلت ليها ح اخلي سراج يجينا فعلا نص ساعة ووصل مشينا لي طل برضو ونزلنا ف الكوافير قبل امشي مسك يدي وقال لي ممكن م تلبسي فستان الليلة؟
قلت ليهو ألبس شنو وانت عارف م... قبل أتم كلامي طلع كيس اداني ليهو قال لي البسي دا كنت عارفك لو قلت ليك امشي السوق جيبي للعرس ح تتحججي لي علشان كدا جبت ليك بي زوق زينة قلت ليهو عارفني عندي تياب م لبستها قال لي م فرقت المهم ألبسيهو قلت ليهو طيب حبيبي قال لي اجيك الساعة كم قلت ليهو لمن يقربو يخلصو بتصل عليك قال لي اصلا في سيرة يعني ح اجي معاهم قلت ليهو طيب ل بعدين باس راسي قال لي ابقي عافية 🖤
حمام مغربي، مكوة شعر، ماسكات بأختصار جلسة عروس كاملة اتعملت ليهم خلصو زي العصر كدا حسيت بالجوع سبحان الله م فتحت الكيس القبيل خالص فتحتو لقيت فيهو اكل وتوب مطقم قلت اشوف التوب بعدين أكلنا السندوتشات جابو لينا عصير المغرب أذن صلينا حتى بدو ليهم ميكب،، ما شاء الله يدهم سريعة لمن العشاء أذن حتى الزفاف لبسوهو يعني حاجة كدا سبحان الله والعجب فستان طل بسيط لكن فظيع،، البت ست الكوافير سارة قالت م عندها حاجة تاني بعد نطلع ح تقفل اصرينا عليها الا تمشي علشان تساعدني بعدين ألبسهم التياب قالت م جاهزة اتذكرت الفستان الجبتو على أساس البسو اديتو ليها وهنا يداب اتذكرت التوب، قالت لي حتلبسي شنو وصحي انتي م عملتي شي للان أصرت للبت تعمل لي حاجة خفيفة مع لوني الأسمر فعلا الميكب خراااافي فتحت التوب كان كُحلي مشغول بالذهبي رهييب والحاجة السمحة طقم فستاني داك كان ذهبي ف لبست بسرعة لانو سراج قال لي هم قربو علينا بس شعري قالت لي اسرح ليك قلت ليها م بقدر اطلع بدون حاجة ف راسي قالت لي عندي فكرة سرحت لي بسيطة ودبست لي التوب ب دبوس شعري بقى ظاهر من قدام بس قلت ليها كدا ح اجازف..
سمعنا صوت العربات والبووري شوية زغاريد طلعت برا لقيت قريب السبعة عربات صف إياد ورئال نزلو من اول عربيتين كانو سايقين مجتبى داك ومعاهو مروان دخلوا الكوافير ،، ريل نزلت من المقعد الورا ف عربية مروان النزل منها رئال وقعدت ف الكرسي القدام أما مشكاة اصلا كانت ورا لأنو مع مجتبى السايق قاعد واحد قدام...
اما العربية التالتة سايق أيمن معاهو زينة والرابعة مؤيد مع زينب ،، الخامسة سراج معاهو ميعاد بس شكلو متضايق نزل طوالي مما شافني جا باس راسي وقال لي بسم الله ماشاء الله، م شفتوهو يخوانا ب قميصو الكحلي وبنطلونو البيج عاينت ليهو وقلت في قلبي:
" أعيذك بالله من عين تراك سعادة لقلبها ولا تعلم أنك لقلبي حياة🖤"
مسك يدي وفات للعربية الوراهو قال ليهو عمار ممكن تسوق عربيتي؟
عمار ضحك وقال ليهو طوالييي نزل وانا ركبت معاهو قلت ليهو مالك غيرت العربية؟
قال لي ماف حاجة عايز اكون معاك براي بدون زول يضايقنا ابتسمت وقلت ف نفسي شكلو ميعاد دي عملت عملة😹
العرسان جو وركبوا أول عربيتين ،، ترتيبنا كان السادس والاخيرة الورانا كان واحد معاهو زلفة المجنونة 😹
الزغاريد والسيرة اتحركت عملنا عمايل ف الشارع 😹💔
حتى الاوت دور م خليناهو غزة لن تموت😹
سلوان همست لي يا كلبة انتي عاملة عرسين ماف زول اتغزا ف نصكم للصور مضايقانا مالك ف عرسنا الواحد دا قلت ب صوت عالي رئال سمعت مرتك؟ حمرت لي احترمت نفسي😹
والعجب زلفة وزينة ومؤيد شغلوها ليهم تشغيلات تقييلة ف حركات الصور الا المصور طردنا العربات😹
بعد مسافة حتى جو واصلنا للصالة لقينا الحفلة ف نهايتها خليناهم بعد دخلو كلهم حتى سراج مسك يدي ودخلنا مع بعض يداب لاحظت اننا مطقمين اتخيلو بسس ،، الحفلة خلصت دخلت غرفة الغيار انا وسارة مع العروسات غيرو الفساتين كنت مجهزة ليهم فساتين قصيرة تحت التوب بالأحمر كنت بساعد ف سلوان وسارة ساعدت طل..
بعد قفلت ليها سوستة الفستان ب ورا عضيتها ليها شديد علشان م تتفتح ليها كنت قاصدة بس هي م انتبهت لي😁
الجرتق خلص والعرسان اتحركو مروان كان سايق إياد وطل فندق حيقعدوا يومين ومسافرين كسلا وبورتسودان حسب طلب طل أما رئال مسافرين أديس بعد يومين طلعوا مع سراج ف العربية انا قعدت مع ناس خالتو منال عرفتني على نسوان اتونست معاهم شوية ومشيت لي هنوو قالت لي شنو المزمزة دي يا عسسل قلت ليها والله يا هنو التقول انتي العروس ما بتك ضحكت وقالت لي تعالي اعرفك على أمي واخواتي كانوا ظريفين قعدت معاهم جو ساقوني زلفة وزينب شغالين سيلفيهات اتصورنا كتييير ب تلفون مؤيد تصويرو رهيب عمل قروب فالواتس ورسل لينا الصور دا كلو وميعاد مراقبة من بعيد حتى أيمن وأيهم وزينة ومنى وزرابي اتصوروا معانا ما شاء الله عيلتهم حلوة شدييد 🖤🖤
_
عدّت فترة اسبوع بعد العرس الوضع راق شوية والضيوف كلهم فاتو البيت بقى نضيف والحياة رجعت ل روتينها اليومي العادي دخلت ف الخامس ب اسبوع بس لسة ف باقي وجع ظهر دا غير عشوش البدت تنق لي ف راسي ابدي اجهزي ح تمشي مع راجلك بعدا كنت م عارفة اعمل شنو م عايزة امشي الا بعد الولادة بس عشوش أبت تخليني والعجب سراج..
* سمررر!!
- معناها الموضوع جادي لمن بتناديني ب اسمي،، احكي سامعاك ف شنو؟
* الأحد عاملين لينا لمة ف البيت ف ح اجي اسوقك بكرة نبيت وبعديها نرحل بيتنا طوالي م بصبر تاني ولا ثانية تميتي شهر عديل كفاك
- سراج مش قلت ليك برحل بعد الولادة؟؟
* بدون مقدمات جهزي نفسك بعد نستقر متى م جاية بجيبك بس خلينا نرجع سوا..
م لقيت فرصة أرد عليهو لقيت عشوش واقفة ف راسي قالت لي سمعت كلامكم لمي هدومك ح ترحلي مع راجلك بدون نقاش ،، زعلت واتحمقت شديد قلت بس عايزين يتخلصو مني نهائي م عايزة ارجع بس الناس ديل م بريحوني ..!
من الزعلة قمت لميت ملابسي كلها فالشنطة أصلها م كتيرة لأنها سلفاً ف الشقة بهناك وابيت اخلي ولا شي قلت م بجي هنا تاني ولا بطيخ😑
رسلت ليهو رسالة " انا جهزت ومنتظرة جيتك "
بعد المغرب سمعت صوتو بتكلم مع خالو عبد الرحيم وابوي وبشربو ف شاي،، شكلو ابوي جا يودعني لان طيارتو ٥ صباحاً طلعت سلمت عليهم بس م عاينت ل سراج مرتين شوية ابوي استأذن ودعني ووعدني انو ح يخلص شغلو هناك وينزل نهائي خلال السنة دي وخالو عبد الرحيم نفس الشي قالوا بعدا يخلو الشغل ل اولادهم..
بعد ابوي طلع سراج قال لي مشينا؟
قلت ليهو الشنطة ف الغرفة شالها وطلع العربية رجعت الغرفة جبت تلفوني عشوش قالت لي زعلانة مني قلت ليها مش دايراني امشي خلاص ح امشي وبس قالت لي والله لو علي م تفوتي شبر من قدامي كل م اشوفك بتذكر بت امي في ملامحك اصلو ريحتها لسة فيك بس يا بتي المرة بعد تعرس م ليها غير راجلها وانتي هنا م قاعدة بتعملي حاجة احسن تشوفي بيتك وراجلك ولا شنو؟
م قدرت امسك نفسي انفقعت بالبكاء خصوصاً انها ذكرتني ب أمي حضنتني عليها ومسحت على راسي قالت لي ابقي عشرة على بيتك وراجلك ما تزعلي ولا تخلي المشاكل تأثر على علاقتكم اصلو بريدك بالحيل وباين في عيونو زي م شالك ف عيونو شيليهو فوق راسك ،، ما تزعلي مني ووقت م حبيتي تشوفيني البيت فاتح ليك لو م شالك اشيلك فوق راسي ونحن كدا سمعنا صوت مشكاة بقول الحضن دا لي سمر بس !!
ضميتها وقلت ليها لو م ضميتك أضُم منو أنا، بعد مسافة قلت ليها خلي بالك من قرايتك بتنفعك أوع تباري لي درب الحب ف الجامعة بضيعك ولو وقفت ليك اي حاجة اتصلي علي طوالي قالت لي حاضر يا أحلى أخت ف الدنيا قلت ليها غصون وين؟
قالت لي بتحل ف مسائل رياضيات قلت ليها نيوتن دي هم نازلين بعد بكرة يداب متين لحقت المسائل قالت لي حالتها نازلة تانية يداب قلت ليها طيب ح اودعها وامشي ..
طلعت العربية بعد قدموني لحد الباب خالو عبد الرحيم قال ليهو م أوصيك عليها قرب باسني ف راسي وقال لي ربنا يسعدكم يا بتي ،، اتحركنا ودموعي م راضية تقيف خالص سراج كان ساكت بعاين لي بعد وقف العربية ف نص الشارع قال لي نرجع؟؟
عاينت ليهو وم رديت واصل كلامو لو م عايزة نرجع طوالي كلو ولا زعلك سكت وقبلت على الجهة الثانية بالشباك خت يدو ف يدي وقال لي حبيبي زعلانة علشان جيت سقتك؟
طيب قلبي اعمل ليهو شنو وهو مشتاق ليك، وعقلي الما بلقى فرصة الا وبستغلها ف التفكير فيك وروحي وحياتي الما ليها معنى بدونك؟
عاينت ليهو بدون مقدمات لقيت نفسي بين ايديهو، قلت ليهو مشتاقة لي أمي يا سراج والشي الوحيد الكان مصبرني على فراقها ريحتها وذكرياتي معاها ف البيت الخليتو وراي بالرغم من أني كنت صغيرة بس م قادرة أنسى💔
رفع يدي وختاها ف قلبي قال لي هي لسة عايشة هنا وهتفضل هنا، عارف ماف حاجة بتعوض فراق الأم بس بوعدك ح اكون ليك كل حاجة حلوة وانسيك كل ألم مريتي بيهو، م ح اخلي ليك مساحة تفكري فيها بالالم بس خليك واثقة فيني
" أخنقها بي اهتمامك وحبك ليها ما تديها نفس إحتويها وكرفسها ودخلها جوة جيبك🖤"
بعد هديت شوية واصلنا طريقنا ووصلنا بيتهم الكبير، م بعرف شكلو من جوا بس شفت تفاصيلو من برا ساعة جيت حنتو نزل وشال الشنطة ساعتها كان أذان العشاء صادفنا عمو عز الدين طالع للصلاة معاهو أيمن سلموا علي شدييد عجبتني حركة ابوهو باس راسي وقال لي حمد لله على السلامة حسيتو أبوي بحق وحقيقة 🖤
بعد فاتو سراج قال لي ارح ندخل علشان الحق معاهم الصلاة، دخلنا وكان البيت رهييب غرفو كلها فوق تحت كان ف جلسة ومطبخ وفي حمام كدا على يمينك مما تدخلي الصالة وفي جلسة كدا محل بلاستيشن شكلو لأن شاشتو كبيرة وفي مقاعد ف الأرض غير البلايستيشن، وأنتي واقفة تحت عينك للغرف فوق ولمن تكون فوق عينك للهول يعني زي الواقف ليك ف حفرة بس نفس الفهم،، لقينا خالتو منال ومنى مع أولادها بتونسو ف الهول وزينة ف المطبخ ،، خالتو دي حضنتني وسلامها كان حلوو شديد والعجب منى إنسانة هادئة كدا بحبها لله بس وطيوبة شديد ،، زينة المجنونة برضو جات واقعة ف حضني شويتين قعدنا سراج جا نازل من فوق شكلو متوضي قال لينا ماشي الصلاة بعد طلع ونستنا بدت وكانت حلوة شدييد إلا منال الصغيرة اتشبكت فيني وابت تنزل من رجولي كنت مبسوطة شديد بالحتة دي عمرها زي تلاتة سنوات ،، بعد مسافة زينة قالت هيييي القهوة نسيتها منى قالت ليها الحقي سريع قبل ديل يجو اسي بقولوا عايزينها..
شويتين كدا جو داخلين كلهم تبارك الرحمن عمو عز الدين مجاهد ايمن وسراج ومؤيد معاهم تووفي العمرو تقريبا ستة سنوات،، زينة كانت مجهزة الكبابي وجابت سيرميس شاي وقهوة هم جو قعدوا طوالي مجاهد انتبه سلم علي مؤيد كششر وشو وقال لي بإستهبال اووو اللصقة جات خلاص مجاهد عاين ليهو وقال يا ود احترم مرت اخوك مؤيد طوالي فصل😹💔
عاينت ليهو ب رفعة حاجب عمل لي حركة اصبري ديك ،، مجاهد دا بحس بيهو رسمي رسمي شكلو هتلر البيت م عارفة لكن بحس انو أي إنسان عندو علاقة بالسياسة والحكومة بكون هتلر رسمي..
كبيت القهوة وزينة كبت الشاي ،، سراج بشرب سكر كتيير بس اتعمدت م اخت ليهو سكر هو ومؤيد ف بقو بعاينو لي ب غيظ لانو م ح يقدروا يطلبوا سكر كتير ف وجود ابوهم وخصوصاً انو دكتور 😹
بعد شربو قهوتهم سراج وأيمن ومؤيد فاتو قعدة البلايستيشن مجاهد استأذن ح ينوم لانو قال شغال السبت وضروري يمش بدري،، تووفي مشى معاهم يلعب ومنولة اتشبكت ف ابوها خصوصاً انها نعسانة ف مما شالها رقدت ف كتفو أما منى قعدت شايلة محمد العمرو أربعة شهور ونايم اتونسنا مسافة بس وجع الظهر زايد ،، خالتو منال قالت لي يا بتي بعدا امشي أرقدي م يجيك وجع ظهر من القعاد صراحة م كنت قادرة أقوم قلت ليها والله ظهري ليهو فترة بيوجعني قالت لي م مشيتي الدكتور قلت ليها المفروض أقابل الاسبوع الفات بداية الخامس بس من التعب م قدرت اطلع قالت لي كدي بكرة امشي مع سراج شوفي قلت ليها ان شاء الله 🖤
حاولت أقوم بالغصب زينة قالت لي دقيقة أساعدك قامت مسكتني قلت ليهم كان نفسي اقعد معاكم اكتر بس منى قالت لي لالا امشي ارتاحي وخالتو قالت لي اعملي حساب السلم تصبحي على خير..
ماشة شوية شوية مع زينة دخلتني لحدي غرفة سراج الكانت مرتبة اكتر من حياتي وديكورها سماوي ب ابيض ف صورة كبييرة ضامة سراج واخوانو وصورتين ل امو وابوهو وف الواجهة صورتنا مع بعض من حقات عرس لندن كانت ف البحر ابتسمت تلقائياً من شفتها ورجعت ب ذاكرتي ورا شديييد..
قاطعتني زينة وهي بتقول لي عايزة حاجة تاني؟
قلت ليها زينة م عندك حاجة للألم دا م عارفة غلبني البعملو والله قالت لي عندي مووف دقيقة اجيبو غابت خمسة دقايق وجات قلعت عبايتي عملتو لي شكرتها بعديها طلعت وأنا رقدت م نمت بسهولة لأن المكان جديد علي م عارفة جاتني صحية بالليل لقيت سراج ضاميني عليههو هنا يداب حسيت بالأمان أكثر وغطيت ف نووم عمييق
_
الأحد جا واللمة كانت عائلية خلصت بسرعة يعني العصر البيت رجع طبيعي، بس عملت غلطة م انتبهت ليها ورفعت جردل موية فوق مسطبة المطبخ اتخيلو وانا م ركزت خالص بالرغم من حذري الشديد بس كانت سهوواً..
تاني يوم رحلنا الشقة أنا وسراج بعد الفطور كدا وكانت نظيفة كعادتها حتى البخور والمطبخ كان مليان يعني سراج مجهز كل شي وفي أكل مطبوخ جاهز ف البوتاجاز قلت ليهو اقنعني دا شغلك قال لي لو بعرف اشتغل كدا بعرس لشنو!
!
حدرت ليهو وقلت معرسني شغالة يعني!!
قال لي ايديك ديل م شبه شغل بس يستاهلو بوسة صباح ومسا قلت ليهو مرتين بس يا بخييل قال لي تعالي اوريك انا بخيل ولا لا قلت ليهو اسي بغير رأيي واقول عايزة بيتنا قال لي تاني ف الأحلام حبيبي أنا قلت ليهو سجن هوو!!
قال لي اي شي معاك سمح حتى لو سجن قلت ليهو سراااج يااااخ قال لي حبيبي البخجل مني قلت ليهو ح اسفهك بس يلا ضحك وقال لي انا طالع بس م ح اتأخر قلت ليهو ماشي وين قال لي المستشفى قلت ليهو طيب خلي بالك في الطريق باس راسي وقال لي ابقي عافية وخلي بالك من طفلنا لمن ارجع واخلي بالي منكم🖤
بعد هو طلع رتبت الملابس كلها ف الدولاب القديمة على الجديدة والعايزة غسيل غسلتها لانو البيت م عايز شغل حوالي العصر كدا اخدت دش ولبست فستان بيت عادي حد الركبة جرس الشقة ضرب لبست توب وفتحتو..
سلمت علي المرة كأنها بتعرفني معاها بنت كدا سلمت علي برضو فضلتهم وعملت ليهم عصير كانوا وناسين باركو لي العرس والبيت قالت لي يا انا خالتك زينب أم مجتبى ودي مي بتي الصغيرة قمت سلمت عليهم تاني شويتين استأذنو اصريت عليهم بس قالوا مرة تانية وطلعوا..
ونسوني شدييد وفرقوا علي ،، المغرب سراج جا راجع بس وشو كان م بتفسر من الضيق كان زعلان لأبعد الحدود كنت خايفة شديد قلت بكون حصل شي مما وصلت جمبو قال لي فقدت المريض المشيت علشانو بالرغم من نجاح العملية بس اتوفى 💔
قلت ليهو ربنا يرحمو انت خليك قوي بس ،، دا قدروا كدا وربنا أراد انو يمرض ويموت وان شاء الله يكون كفارة ليهو ضماني شديييد بدون يقول شي وبدوري بادلتو نفس الإحساس..
ثم يختفي قُبح العالم عندما تلتقي بالوجه الذي تُحبهُ🖤
دسو ياسمين في دعواتكم 🖤
ابقو عافية 🖤