طلعت من مكتب أبوي مشيت غرفتي لقيتها فعلا حالتها صعبة شديد قلبي وجعني على حالتها واكيد ح تموت لو قعدت يوم زيادة بالطريقة دي، كانت سرحانة بشباك البلكونة اتقدمت خطوات فتحت الشنطة شلت عباية وقفت ف راسها قامت بسرعة قالت لي سسسراج!!!
م كنت طايقها وبرضو م قادر اخليها كدا قلت ليها البسي عبايتك طالعين قالت لي ماشين وين قلت ليها منتظرك برا طلعت قفلت الباب كنت واقف جمب الغرفة خمسة دقائق جات طالعة قالت لي ماشين وين؟؟
قلت ليها ح تشوفي براك،، نزلنا وقلت ليهم طالعين كلهم كانو مصدومين الا امي بتبتسم وانا متضايق،، طلعت فتحت ليها باب العربية وقفلت الباب بعد طلعت سقت واتحركنا على المستشفى..
بعد فحوصات كنت مع إيمان قالت لي الحمل ف شهرو التاني والجنين حالتو مضطربة شوية لازم تتغذى اكتر محتاجة فيتمينات ح اكتبهم ليها والتوتر ح يخلي الجنين يسقط لازم تبعد عنها التوتر قدر الإمكان ،، بس دي منو يا سراج؟؟
قلت ليها مرتي يا إيمان بس عليك الله م تسأليني من شي طيب لأني ف اللحظة دي م طايق ولا نفسي،، مجتبى سمع جملتي الأخيرة دي قال ليها ايمان تعالي بفهمك
انا رجعت الغرفة بعد شلت الروشتة ساعدتها تركب العربية مشيت شلت الأدوية وف الطريق قالت لي سراج عارفة انك م طايقني بس انا زاتي م طايقة ولا نفسي انت م مجبور تتعامل معاي بالغصب خليني ف حالي لمن اموت واريح اي زول
قلت ليها وأنا واصل اخري الفي بطنك دا ولدي برضو وم بفرط فيهو وقفت العربية ف مطعم سمك قلت ليها انزلي، كان باين انها مبسوطة نزلت طلبت الأكل بس م كنت باكل هي اكلت وكويس كمان طلبت ليها عصير واديتها الحبة كانت مستسلمة تماماً م ناقشتني بعديها طلعنا اتحركنا..
ف الطريق تلفوني اتصل كانت سمر وقتها العشاء أذن صمتو وختيتو بالجمبة قالت لي رد ليها ساي قلت ليها م حاجة بتخصك سكتت طول الطريق لمن وصلنا البيت قبل تنزل قفلت التأمين عاينت لي قلت ليها
شوفي يا ميعاد انا م عندي عداوة معاك ماف حاجة بتربطنا غير الفي بطنك دا يعني م تتوقعي مني حاجة غير اني التزم بمسؤليتي تجاهك كدا ح امشي معاك عديل بس يوم التتعرضي ل حياتي الشخصية وقتها ح تشوفي سراج غير القدامك دا وانا وإنتي عارفين حياتي الشخصية دي منو يلا انزلي..
نزلنا دخلت البيت قلت ليهم انا ماشي تصبحوا على خير امي قالت لي هاك ودي دا ل سمر معاك ،، كانت فطائر من النوع البتحبو عملوها ف البيت شلتو وطلعت
وقفت شوية ولعت سيجارة كنت متضايق شديد من نفسي بعديها مشيت البيت سمر كانت ف الهول وقفت مما شافتني قالت لي سراج لي م بترد؟؟
قلت ليها مسا النور قالت لي انا جادة على فكرة اديتها الكيس قلت ليها امي بتسلم عليك وادتك دا شالت الكيس ختتو ف الكرسي ضربتني ف صدري وصرخت انت لي بتتعامل معاي كدا؟؟
قايلني م ملاحظة ليك يا سراج من قبل نرحل انت بتشرب سجائر وريحتها فايحة كل يوم زي ما حاليا فايحة،، كنت بتجاوز وبقول م ازيد عليهو همومو يمكن يحكي لي براهو بس انت كل يوم بتمادى طيب فايدتي شنو لو م عايز تشاركني همومك؟؟
