مؤيد ••
كنت ماشي بيت خالتي مها اجيب حجات بيبي أيهم وزرابي واوديهم المستشفى ،، اتحركت من جمب لقاء وركب عربيتي الأبت تدور لي
العربية ليها فترة بتعمل لي كدا من يوم فطرت مع ناس سمر ف بيتهم داك شغالة على كيفها مرة تدور ومرة تبطل
أثناء م كنت بحاول ف العربية شفت لقاء طالعة مستعجلة ملامحها اتغيرت وشنطتها وقعت منها حاولت الحقها بس م لحقتها كل العملتو اني شلت الشنطة من الأرض وسبحان الله العربية اشتغلت معاي طوالي لحقت العربية الكانت فيها لقاء
م كنت متطمن م عارف لي وبحاول ف رقمها بديني غير متاح ،، العربية وقفت قدام مبنى ولقاء نزلت مستعجلة انا لقيت باركن بالجمبة بركنت العربية ونزلت وراها بس م عارف هي دخلت ياتو شقة بالتحديد
فضلت أفتش طابق ورا طابق وبحاول ف رقمها برضو غير متاح ،، لمن وصلت الطابق الثالث كنت داير افتشو بس وقفت لمن لمحت دبوس طرحتها الما بغباني واقع ف درجات السلم البودي الطابق الرابع
م اترددت نهائي شلتو وواصلت الطابق الرابع وبالتحديد قدام باب الشقة رقم 10 كان واقع تلفونها ف الارض وبرن
" حظي الحلو 🖤 "
رفعتو ف يدي المكالمة فصلت وتاني اتصل المرة دي
" غنمايتي الرايحة 🤭 "
دي سمر لانو بتزكر طوالي بتشاكلو ف اسماء التلفون لي تسجليني ب كدا وغيري الاسم وما بغيرو
كنت ح ارد عليها بس وقفني صوت صرخة قوية هزتني دخلت التلفون ف جيبي يداب انتبهت لي اني واقف قدام شقة ومتأكد انو لقاء جوا الشقة دي ضربت باب الشقة بطريقة عشوائية وبقيت بنادي فيها بطريقة خلت الناس الفي الطابق كلهم يطلعوا
باب الشقة فتح وشفت منظر يا ريتني مت وما شفتو لقاء واقعة من طولها ملانة دم وملابسها مشرطة عبايتها مجدوعة ف الارض جريت عليها بلهفة شلت العباية ولبستها ليها
لقاء انتي كويسة ..! ردي علي كويسة انتي ..!
لقاء م تسكتي الجابك هنا شنو ..! ومنو العمل فيك كدا ..! لقاء اتكلمي م تسكتي لقاءاااا...!
اكيد منظر زي دا م داير ذكاء اني اعرف حصل ليها شنو ،، لقاء كانت داخلة ف صدمة م بتتكلم ولا بترمش حاولت اقومها كانت بتمشي وتعتر لمن قربنا نطلع من الشقة يداب انتبهت لي وجود البنت والولد الفي الشقة
من دون احس فكيت لقاء ومسكت الولد وقعت فيهو ضرب ب كل ما املك من قوة ،، م حاول يقاومني ولا حاول يضرب كان مستسلم تماما ،، ضربتو لمن بقى بنزف من انفو وفمو البت الكانت معانا بقت تصرخ وترجف
- فككوو قتلتوو ،، يا ناس الحقونا قتل ود الناس فكوو يااخ...
م كنت شايف ولا سامع شي بس ف بالي انتقم منو على العملو ف لقاء ،، ضربتو ضرب الموت وانتبهت لي انو لقاء ماف فكيتو طوالي وبقيت انادي
