نفس العيون ،، نفس الشعر ،، نفس اللون ...
معقولة يكون ،، قطع تفكيري صوت واحد منهم بقول
* احم ،، سلام عليكم
انتبهت لنفسي ورديت عليكم السلام اتفضلوا ،، خليت الباب فاتح ومشيت قدامهم لاقتنا خالتي ف الحوش سلمت عليهم سلام حار وفضلتهم لحدي غرفة إياد وبقينا في موال عصير وقهوة وما أدراك لحدي ما اخدو قعدتهم واستأذنوا فاتو بعدها دخلت لي إياد ف غرفتو
* إياد عايزة اقول ليك حاجة لكن م متأكدة منها
- احكي لي سامعك
* حاسة اني بعرف الناس ديل ،، أصواتهم أسمائهم طريقة كلامهم وحتى الشبه مبالغ فيه ما عارفة لي خايفة اعترف بالحاجة الحاسة بيها دي يا إياد ،، صدقني خايفة شديد من فكرة انهم يكونوا ...
- اخوانك؟!
رفعت راسي عاينت ليه في عيونو شديد لأني م أتوقعتو يقول لي كدا واصل كلامو
- عارفة يا سمر انا من اول مرة شفتهم فيها عرفت الحاجة دي بالذات الود الساعدتو لانو بشبهك في كل حاجة حتى تصرفاتو ،، كنت متردد من الحكاية دي لحدي م اثبت لي الليلة لانو كان سرحان طول الوقت ولمن عاينت ف عيونو شفتك ،، صدقيني شفت عيونك شفت استفهامات كتيرة في عيونو ،، نفس الاستفهامات الكانت في عيونك قبل شوية ،، وقطع لي الشك اخوهو القال ليه في شنو يا رئبال سرحان كدا اشرب الشاي خلينا نمشي ورانا جامعة ،، بعدها اتأكدت تماما انهم رئال ورئبال اخوانك ...!
كل كلمة كنت بسمعها كأنها خيال بالنسبة لي م رديت على إياد وطلعت جريت غرفتي قفلتها علي غمضت عيوني وشفت امي وقت كانت عيانة ،، شفت تعبها ،، شفت معاناتها ،، شفت دموعها الكانت بتخفيهم مني ،، شفت موتها بعيوني ،، كل دا بسبب منو ؟! اكيد بسببهم هم وامهم ،، م بنكر انو السبب الأكبر هو ابوي بس كمان هم برضو سبب ،، هم الشالو ابوي مني ،، هم الحرموني اعيش طفولتي زيي زي اي طفل مع ابوهو ،، امهم حرمت امي من راجلها حرمتها تتهنى مع ابو بتها ،، شالو كل حاجة ف حياتنا وتاني دايرين شنو؟! جايين لشنو اصلا اكيد عشان يدمروا باقي الفضل من حياتي بس معليش كفاية لحد هنا تاني م بسمح ليهم نهائي وانا البعرف ليهم ...
تاني م طلعت من غرفتي لا لي اكل لا غيرو حاضنة مخدتي علي ورجعت شريط حياتي لورا واتفقعت بالبكاء نوم زاتو م عارفة نمت متين ...
_
* تعالي هنا يا بت بتكلم معاك اوع تطلعي برا الغرفة دي حبوبتك وعماتك برا ما ناقصين فضايح
- اجي لشنو بس يا امي وريني دايرة مني شنو سألتيني
وجاوبتك عندنا حصص ومرات بمشي مع صحبتي بيتهم بنتغدا هناك اها في حاجة تاني ؟!
* شفتي هووي لف ودوران م بنفع معاي سامعة اخير ليك توريني الحقيقة صحبتك منو ولي م بتجي معاك
- هه دي انتي البتتكلمي عن اللف والدوران ،، انتي اخر وحدة مفروض تتكلم عنهم
* يا بت انتي م عندك أدب ولا شنو ناسية اني امك؟!
