•
كانت متألقة بي الفستان والحجاب ح ياكل منها حتة ،، سبحان الله م كنت متوقع انها ح تتأثر بي كلامي للدرجة دي بالجد شكلها كانت محتاجة زول يدعمها ،، كتير مننا بكون عايز الحاجة بس بتصعب عليهو الا يلقى البدعمو ،، اتقدمت اخدت المايك وبدت تتكلم :
السلام عليكم ورحمة الله ،، مرحباً بكم في عائلة السالم ..🖤
اليوم هو يوم مميز جداً بالنسبة إليّ فهو اليوم الذي بدأ النجاح يعلو ويحلق حول عائلتي ،، عشرون عاماً من التألق والنجاح الهبوط العترات والعقبات كلها انقضت بفضل الله اولاً وبجهدكم وتكاتفكم ،، بفضل قدوتي ومصدر إلهامي عرفت معنى النجاح سأُريكم من هو قدوتي ...
وجهت ريموت البروجكترور واتعرضت صورتها هي وابوها ،، كنت مركز مع كل كلمة بتقولها مع انها كانت متوترة في البداية بس ثبتت ،، ملامح مستر سالم كانت م مفهومة فرح على صدمة على دموع محبوسة مشاعرو كانت مختلطة بس قدر يمسك نفسو ،، واصلت كلامها بعد الصورة اتعرضت :
نعم أنا طل سالم ،، إنه السالم الذي كان قدوتي وصديقي قبل أن يكون ابي كان وسيظل إلهامي ومصدر فرحي ومنبع طاقتي..🖤
هو الذي علّمني أن البداية لا تكون من الصفر بل البداية تكون من أنفسنا ،، حقاً أشعر بالفخر حين أقول بأنني ابنة السالم ..🖤
خطابها كان قوي جداً ونابع من قلبها لدرجة هزت كل الناس الموجودة ،، كل الناس وقفت بتصفق بحرارة وبتمتدح شجاعتها وأدبها واناقتها ،، موقف كان مؤثر لما المستر طلع المنصة واخدها في حضنو باسها ف راسها واخد المايك بيمتدح فيها ويعبر عن شكروا وامتنانو ليها
دقيقة ورا دقيقة الحفلة خلصت كنت ح اطلع بس صادفت طل وابوها جايين علي باركت ليهم وجا على أساس يعرفني عليها قال لي: دي بتي اظن انكم اتلاقيتو في موقف ما مناسب قبل كدا بس دي بتي الأنا بعرفها
سبقتني وردت عليهو : بابا المفترض انو الشكر يكون لي إياد لانو الفضل كلو بيرجع ليهو بعد ربنا
