رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
أدم ضحك بتعب وقاللها : خشي
خشت جهان وهي متحشمه وماسكه الكتاب ف يدها وضاغطه عليه
خشت للصاله لقت الدنيا مقلوبه .....دبش علي وكال علي دخان و اوراق وشيتات ف كل مكان
قعمزت ع الكنبه وأدم عزق روحه ع الكنبه المقابلتها
جهان حركت شفايفها : كيف حالك
أدم هز راسه وغمض عيونه وقال : ماشي برده بسيطه ماتخافيش وابتسم ع جنب
جهان كتبت ف الكتاب امتاعها " جيت لانه قلت اكيده تستحق مساعده او حاجه " ورفعت راسها لقت ادم يبحت فيها برمتله الكتاب
أدم قرأ المكتوب وقاللها : لا عادي متعود نمرض ونصح بروحي
جهان اتفرج ع الشقه وساكته
تحرك ادم وكان بينوض .....بس فجأه حس برأسه داخ وقعمز ف مكانه
جهان بحتت فيه بخوف وشيرتله بمعني شن تبي ؟
أدم رفع عيونه فيها وهو حاط يده ع رأسه : نبي اميه
جهان هزت راسها وصبت للمطبخ اللي كان مقابلها خذت كوب من ع المرمره غسلاته وصبت فيه اميه وطلعت للصاله وصلت لأدم لقاته متكي ع الكنبه و راقد 💤😴
ابتسمت جهان ع شكله وهو راقد لفت وردت للمطبخ حطت الكوب ولقت المطبخ حايس والمرمره معبيه اماعين مسخه بدت تغسل فيهن وترتب ف المطبخ بشويه عشان ادم ماينوضش..... وبعدها طلعت للصاله بدت تلم ف الوكال والكواغط حطتهن ف الكناسه ومسحت الطاوله ولمت الاوراق والشيتات وأدوات القرايه وخذتهم للدار المقابلتها كانت فيها مكتبه خشت للدار اللي هيا دار أدم حطت الكتابات وطلعت طول ماحبتش تضمها او تحرك حاجه فيها ............طلعت للصاله كان ع الكنبه معزوق دبش امتاع أدم جاكيت ...سوريه ...وسروال قدمت جهان ورفعتهن وكل ماترفع حاجه كان ريحة العطر امتاع أدم يفوح ♥..حطتهن ف الدار وطلعت
وقفت ف الصاله تفكر شن ادير ....وبعدها خطر ف بالها انها ادير حاجه لأدم عشان ياكلها خشت للكوجينه وبدت ادير بشويه ...وبصعوبه قدرت تلقا الحاجات الاساسيه اللي تقدر اطيب بيهن لانه كل اللي كان ف المطبخ هو معلبات ووجبات سريعه وبطاطس وعصائر ومشروبات الطاقه
بدت جهان اطيب ف شربة خضروات ...
فجأة سمعت نقال يرن مسحت يديها وطلعت للصاله وتبعت الصوت استوعبت انه نقال أدم ...كانت بطفيه بسرعه عشان مايزعجش أدم وينوض
بس المشكله انه النقال كان ف جيب السروال الجينز اللي لابسه أدم ..خذت نفس وقدمت بهدوء ع أدم وهي متوتره وخايفه كيف بتاخذ النقال من جيبه
وفجأه ...
وبحركه سريعه من أدم كرها من يدها وفجأه لقت روحها ع الكنبه تحت أدم
جهان لو فيها صوت ف اللحظه هذي لكانت عيطت عيطه لمت الدنيا من الخوف بس هيا كل اللي داراته انها فتحت فمها بس ماطلعش صوت .....قعدت تبحت ف أدم بخوف وتترجى فيه بعيونها ...اول مره تشوفه بالقرب هضا اول مره تركز ف ملامحه الحاده عيونه ولونهن الجذاب رموشه الكثيفه و لحيته.. الخبطه اللي ف جنب عينه اللي زايدته جمال كلهن تفاصيل ماكانتش تشوف فيهن
أما أدم سرح ف عيونها العسليات وحمرت خدودها وشفايفها الورديه شعرها اللي تناثر ع وجهها ....ثواني وفطن لروحه واستقام بطوله وحول من فوقها وهو يقول : تي فجعتيني الزح
جهان مازالت يابسه ف مكانها من الخوف
أدم مسح ع وجهه ووخر شعره ووقف جنب جهان ومدلها يده
جهان مسكت ف يده وهي بتموت من الحشمه والتوتر ....جبدها أدم جت امصبيه ف جنبه.. أدم تلفت ويشوف للصاله كيف نظيفه ابتسم وبحت ف جهان : انتي نظفتيها ؟!
جهان هزت راسها وتهرب بعيونها من نضرات أدم
تحرك أدم للمطبخ وجهان لحقاته ....خذا أدم كوب اميه وشرب وهو يشوف للمطبخ ويراقب ف جهان اللي وقفت تكمل ف شغلها ....وتقرض ف الخضره عشان تحطهن ف الطنجره اللي قاعده ع النار 🔥
أدم وقف ف جنب جهان ويشوف للطنجره ويشوفلها وقال : عندك علم ليه شهور ماطيبتش !!
جهان رفعت عيونها وبحتت فيه وهزت راسها بمعني" ليش"
أدم رفع كتوفه وخطم من وراها وتعمد يلصق فيها مع انه المطبخ واسع
جهان توترت من حركت أدم حولها بس اعتبرتها حركات عفويه
كملت جهان تطييب و قعمزت تاكل هي وأدم بعدما اصر عليها انها تاكل امعاه وماتروحش ....مقعمزين ع طاولة الاكل مقابلين بعض وياكلوا ف هدوووووء
جهان مره مره ترفع ف عيونها وتشوف لأدم اللي كان وجهه اصفر وفعلاً باين عليه المرض ...حتي انه صوته تغير وقعد مبحوح وحاد وحركته قعدت بطيئه
وأدم يسرق ف نضرات لجهان ويتأمل فيها كيف تأكل ويتأمل ف سكونها
ــــــــــــــــــــــــــــــــ
الساعه 8:00 م⌛
مها منطرحه ف سريرها ومتغطيه بالباطنيه ....وتحكي مع رضا ♥
مها نفخت وشقلبت عيونها : تي عدي رووووح يارضا..مش طالعه مش طالعه
رضا بترجي : باهي حبيبي بنشوفك خمس دقايق
مها تنهدت وضحكت بقلت حيله وقالت: صقع يارضا صقع ...تبي اطلعني من تحت البطانيه ف هالصقع
رضا ابتسم وقال : انا قاعد ف الحديقه انراجي فـيك ....بسرعه تعالي وسكر ف وجهها الخط
مها ناضت وهي متنرفزه وتخبط غيرت دبشها ولبست سروال جينز ازرق عليه بلوزه صوف بيضاء وكبوط بالون البيج لمت شعرها ذيل حصان وطلعت لقت رويدا مقعمزه ف الصاله ع نقالها
مها تعدل ف شعرها : رويدا انا طالعه للصيدليه
رويدا منسجمه ف النقال شيرت بيدها بمعني عدي
مها : وماتطلعيش وتخلي جدتي بروحها اوكي ....لو بتطلعي رني عليه قبل
(قالتلها هكي بيش اتأكد انها مش حتطلع وتشوفها مع رضا )
رويدا وهي تشوف للنقال تعصبت : تي عدي درقي وجهك باهي خلاص
مها طلعت وهي تضحك .... طلعت تمشي ع كرعيها للحديقه اللي ورا حوشهم اللي اتقابل فيها هي ورضا ديما
وصلت للحديقه 🌸
خشت وهي تتلفت وادور ع رضا
رضا من وراها : بسس بس
مها برمت وهي تضحك وتحك ف يديها ع بعضهن من الصقع و قالت لرضا : اهلين يابارد😄
رضا ضحك وقرب منها : شن الجو
مها عقدت حواجبها : الجو صقع وف واحد بارد وصامط طلعني من تحت بطانيتي عشان انشوفه
رضا حط يده ع راسه من لاوره وقال : امممم وبلكي يحبك هضا عليش
مها حطت يدها ع فمها وهي تمثل ف الصدمه وقالت : ازعمك ؟!
رضا فنص فيها : شن ازعمك هذي ...قصدك انتي مازلتي مش متأكده
مها ضحكت
رضا مسكها من يدها ومشوا لي مكانهم المعتاد اللي يقعمزوا فيه ،وهو ف تركينه تحت شجره 🌴
قعمزوا ع الارض ....وعم السكوت فترة ورضا يشوف لمها وماسك يدها
مها توترت من نضرات رضا وحبت تفتح موضوع
مها بتوتر : هو يعني انت ااا شن اسمه
رضا تكلم ووجه قريب من وجهها : شن اسمه
مها خذت نفس ومسحت بيدها ع خدها تحاول تخفف التوتر : قصدي انت عليش يعني ...
رضا بدت ترتسم ع وجهه ابتسامه خفيفه بعدما لاحظ ارتباكها وقال : يعني
مها نفخت : اوووووف رضا معش ادير هكي وانا مانعرفش نحكي وانت لاصق فيه
رضا ضحك وهو يلعب بصبع يدها الصغير قال : نحسابه بيقعد اسهل الحكي وانا لاصق فيكي
مها وهي معصبه : لا مش اسهل
رضا ضحك وغمزلها : باهي تره الصقي فيه انتي ...وانا نجرب نحكي
مها زرتها الضحكه وخبطاته ع كتفه : ياصايع وكرت يدها منه
رضا ضحك
مها ضيقت عيونها: عليش جايبني ....شن تبي
رضا رقد ع العشب ف جنبها وغمض عيونه وقال: شي نبي انشوفك بس
مها استغلت فرصة انه رضا مغمض عيونه قعدت تشوفله وتتأمل فيه
رضا وهو مغمض عيونه مد يده مسك يد مها وقعد ع نفس الوضعيه...اما مها فقعدت تبحت ف رضا وتملا ف عيونها منه
رضا : مها !!
مها وهي سارحه وتبحت فيه : امممم
رضا وهو مازال مغمض عيونه وع نفس الوضعيه : سادك وانتي تبحتي فيه ....وعارفك راه تفكري ف حاجات مش مزبوطه
مها انصدمت وانحرجت كرت يدها من رضا وصبت تدور ع حاجه تضربه بيها
رضا قعمز وهو ميت ضحك عليها
مها لقت حيطه صغيره حذفتها ف رضا وهي بتتفجر من الغضب ....رضا طبس وتفاده الحيطه اللي كانت حتجيه ف وجهه
وصبا لحق مها اللي مشت وهي اتمتم .....حضنها من لاوره وهو ميت ضحك
طبعاً الحديقه كانت شبه فاضيه و ليل ماايحقش فيهم حد
مها اتفك ف يديه من عليها وهي تعيط : تي حول ....حول من عليه
رضا يضحك : والله خلاص والله .....اسف اسف اوكي انتي مافكرتيش ف حاجات مش مزبوطه خلاص
مها فكت روحها وتلفتت عليه : مازلت تعاود فيها ياسخيف
فجأه انقلبن ملامح وجه رضا للجديه وقاللها : باهي هيا خلاص اقلبي وجهك لحوشك هيا روحي
مها فنصت فيه وهي عارفه انه يدير هكي عشان يخوفها وتسكت
رضا دفها مع كتفها : تي هيا
مها عضاته ف يده اللي دفها بيها ومشت تجري طلعت من الحديقه وسيبت رضا يضحك و يتألم 💢
ــــــــــــــــــــــــــــــــ
الساعه 10:22 م⭐
مهاب مقعمز ف داره .....هندامه مبهدل عيونه حمر خشمه احمر يديه يرعشن صبا وهو يبرم ف الدار ويحس ف راسه بيطربق من الصداع
فتح دولابه ....وقعد يقلب تحت الدبش لعند طلع كيسه صغيره فيها ثلاث حبوب فتحها وخذاهم دفعه وحده وقعمز ع السرير وهو يهز ف كراعه
بعد خمس دقائق🕖
الحبوب ماعطنش مفعولهن ...يحس ف نفسه يبي حاجه اقوى
خذا نقاله وهو متنرفز واتصل ع الشخص اللي يبيعله
مهاب : ايوا
الراجل : اهلين مهاب ... شن الامور
مهاب بنفتره : مزفته ....الخرا اللي اعطيته ليه معش نفع امعايه
الراجل : تبي صنف اخر اقوى ؟!
مهاب وهو مش قادر يسيطر ع روحه قال : نبي نبي اها
الراجل: اليوم مع الساعه 12 جيب فلوسك و تعال ف الاستراحه
مهاب صبا : بنجيك توا توا معش قادر انتحمل
الراجل ضحك : باه به هيا انراجي فيك
ــــــــــــــــــــــــــــــــ
ثاني يوم ✨
الساعه 9:30 ص 🕖
خشت جهان للقاعه عشان تحضر المحاضره
دورت ع ادم بعيونها لقاته مش قاعد .....كملت المحاضره وطلعت وهي ترن ع ادم لكن أدم ماردش ...خافت جهان من انه تكون صارتله حاجه وهي امس طلعت وخلاته مريض فطلبت من السواق انه يشيلها لحوش ادم ع اساس حوش صحبتها
الساعه 11:00ص 🕖
طلع أدم من الحمام بعدما دوش ....كان يحس ف روحه مرهق ومازال مريض فقرر انه مايمشيش للجامعه ويرتاح ......كان لابس شورت وماليه نص كم من كثر مايحس ف روحه ساخن من الحراره قعمز ع الكنبه ف الصاله وف يده منشفه ينشف ف شعره المبلول
فجأه سمع صوت جرس الباب🔔
استغرب أدم لانه ماعندش من يجيه ف الوقت هضا ....ناض وهو عاقد حواجبه متوجه للباب
ولما قعد يدق الباب عيط أدم : تي باهي جاي يا$@&#
وفتح الباب وهو ينفتر
كانت قدام الباب مصبيه مرأه ف نص الاربعينات من عمرها ف جنبها عيل صغير ممكن عمره سبع سنوات ....كان شكلهم يدل ع انه حالتهم الماديه متريحه ....أدم كان ف الاول يحسابهم غالطين ف الشقه لكن لما برمت عليه المرأه وشاف وجهها انصدم
#يتبع❤️