رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
نص ساعه ...💠
وتفاجأة جهان بأدم اللي قعمز ف جنبها وف يده كوبين قهوه مدلها وحده وشرب من الاخره
لكن جهان خلت يده ممدوده وهزت راسها بمعني لا
ادم عقد حواجبه بتساؤل : ماتشربيش فيها؟!
جهان هزت راسها
ادم حط الكوب ع الكرسي وابتسم ابتسامه جانبيه وهو يبحت قدامه وقال : حتي انا قلت اكيده الملائكه هذي ماتكلش ف نفس اكلنه 😏♥
جهان انحمرن خدودها اللي كانن ف الاصل منحمرات من الصقع
رفعت يدها مسحت بيها ع مقدمة انفها و ردت شبكت يديها ف بعض وقعدت تبحت فيهن ومارفعتش عيونها ف ادم
ادم قعد ساكت وهو يبحت قدامه ومره مره ياخذ رشفه من كوب القهوه امتاعه .....تلفت لما حس بجهان تتحرك بحت فيها ولقاه تحك ف يديها ف بعضنه وتنفخ فيهن وتعاود تمشي فيهن علي جسمها من شدة البرد
ادم بحت فيها وبعدها اشر بحواجبه ع كوب القهوه اللي جابه لها وقال: اشربيه يدفيك راه 🍵
جهان رفعت عيونها فيه بتردد ومدت يدها خذت كوب القهوه رشفت منه رشفه بسيطه ......و غمضت عيونها بالقوه وهزت راسها من طعم القهوه اللي بلا ذرة سكر
ادم ضحك ع شكلها وردت فعلها الطفوليه وقال : مره ؟!
جهان ابتسمت بخجل وهزت راسها بالموافقه
ادم بحت قدامه وهو مبتسم
جهان كتبت ف الدفتر اللي كان ف حضنها :" اول مره نشربها "ووجهت الدفتر لادم
ادم قرا المكتوب واكتفا ببتسامة نصر ع وجهه وحس انه بدا يتحكم فيها ويأثر ولو ف جزء بسيط من حياتها
ــــــــــــــــــــــــــــــــ
ف مكان بعيد شويه 💠
مقعمزين رضا ومها ورويدا ع الوطا تحت الظل جنب بعض ومقابلينهم مهاب وزيد💫
مهاب يبحت ف ادم وجهان وقال : بعد يكمل بيها ادم نبيها البنت هذي انا😍
زيد ضحك : مصح خلقتك ...تحلم وطموحك عاليه الفتره هذي 😂
رويدا تبحت ف جهان بحقد وكره وتتوعد لادم ف خاطرها
مها نفخت بملل : كم مازال علي المحاضره؟!
رضا رفع يده وشاف للساعه وقال : مازال خمس دقايق
مها ناضت وهي تنفض ف دبشها : هيا نخشوا انا صقعت هنا ❄
رضا صبا ومشى قدامهم ولحقوه زيد ومهاب و رويدا مدت يدها لمها وصبتها ، ورويدا مركزه بكل حواسها مع ادم وجهان اللي صبوا حتي هما وخشوا للمحاضره 🍃
(طبعاً ادم وزيد كانوا راسبين ف سنتين ، ورضا راسب ف سنه ، و مهاب ومها ورويدا وجهان كانت هذي السنه الاساسيه لهم وكانوا كلهم نفس التخصص لذلك كانت اغلب المحاضرات يحضروها مع بعض لانهم نفس السنه ونفس التخصص )
خش ادم وجهان للقاعه
قعمزت جهان ف مكانها المعتاد وهو ف نهاية القاعه
وقعمز ادم ف مكانه اللي كان متركن وقعمزوا امعاه زيد ومهاب ورضا وقدامهم مها و رويدا
ثواني وتعبت القاعه وخش الدكتور وبدا يعطي ف المحاضره
قعدت جهان مركزه مع الدكتور و تسرق ف نظرات لادم ..... ادم اللي كان حاط البرنوص ع راسه وحاط يديه قدامه وساند جسمه ع يديه ويبان من بعيد انه شبه راقد لا هامه محاضره ولا بطيخ 😂
ف جنبه زيد اللي قاعد ع نقاله ومهاب يضحك ويسفتر امعاه وبعدها رضا اللي يبحت ف الساعه بملل وينفخ و رويدا سارحه وتفكر ومها تكتب ف شرح الدكتور ومركزه ♥
ــــــــــــــــــــــــــــــــ
الساعه 10:42 م⌛
كانت جهان مقعمزه ع سريرها وقدامها كتاباتها واللبتوب امتاعها وتقرا
دق الباب وخشت مريم وقالت : كنت نبي نطمن عليك ...محتاجه شي !؟
جهان ابتسمت وهزت راسها بمعني لا
مريم ابتسمت : تمام انا لوطه ف غرفتي لو احتجتي شي كلميني
جهان هزت راسها وطلعت مريم وسكرت الباب
ردت جهان تقرا ....ثواني وسمعت صوت مسج ع نقالها
كان مسج من رقم مكتوب فيه " اهلا "
عقدت جهات حواجبها بأستغراب وكتبت " من؟!"
وصلها مسج طول مكتوب فيه "ادم"
حطت جهان نقالها ع السرير وتنفست بعمق وهي تحس ف شعور غريب و ملخبط مش عارفه هل هيا فرحانه ؟! او لا ، متريحه ؟! او لا
قاطع تفكيرها وسرحانها مسج اخر من ادم "نتصل بيك ...لو فاضيه؟"
جهان شافت المسج وقعدت تفكر وهي مضايقه لو بيتصل بيها هيا كيف بتصرف وكيف بتعامل امعاه وهيا ماتحكيش
ثواني ودز ادم اخره "قصدي نتصل بيك مكالمه فيديو😉"
بينما جهان مازالت مااتسوعبت الموضوع رن ادم مكالمه فيديو
جهان انفجعت عزقت النقال ع السرير وصبت وهي اتنفس بقوه .....تلفتت وراها شافت روحها ف المرايه وعدلت شعرها وقعمزت ع السرير وخذت النقال وردت ع المكالمه اللي كانت حتفصل
ادم ابتسم لما شافها وقال : ياهللا
جهان ابتسمت بخجل وحولت عيونها من علي النقال
ادم عدل تقعميزته وقال : كيف الحال ؟
جهان هزت راسها بمعني تمام
قعدوا ساكتين ثواني وبعدها ادم قال : حركي فمك و احكي معايه حنفهم عليك
جهان حاولت تخفي ابتسامتها اللي بانت ع مبسمها وحركة شفايفها وقالت حاجه لادم بدون صوت
ادم عقد حواجبه وقال وهو مركز ع فمها : عاودي بشويه ...مافهمتش؟
جهان حركة شفايفها وعاودت الكلام مره اخره
ادم حك راسه وهو عاقد حواجبه وقال : اووووف مافهمتش شكله كلام واعر
جهان حاولت تمسك ضحكتها علي منظر ادم وهو حاير ومش فاهم لكن فشلت و انفجرت ضحك
وادم ابتسم وعض ع شاربه
جهان خذت ورقة من الاوراق اللي ف جنبها وكتبت فيها : انت كيف حالك !
ووجهتها لادم اللي اول ماقراها ضحك وقال : توا توا بذات ف احسن احوالي وغمزلها 😉
جهان سكتت وهي تبحت ف الورقه اللي بين يديها
ادم رشف خشمه وقال وهو يبحت قدامه : شن اديري !؟
جهان برمت الكاميرا ووراته الكتابات والمذكرات اللي كانت تقرا فيهن
ادم هز راسه
جهان شيرت عليه بمعني وانت ؟
ادم ضحك وقال : اانا اممم.... وبرم نقاله ووراها وين ما كان مقعمز ....
كان مقعمز ف الصاله امتاع حوشه يادوب فيها ضي خفيف والدنيا مقلوبه ف جنبه دبش معزوق ع الوطا والطاوله اللي قدامه معبيه وكال وشكاير وشيتاته معزوقات ع الكنبه و هو يتفرج ع التلفزيون
جهان ضحكت بستغراب ع الحوسه اللي جنبه
ادم تنهد ببتسامه وقال : خاطرني نسمع صوتك
جهان تعكرت ابتسامتها وعيونها تعبن دموع .........
ــــــــــــــــــــــــــــــــ
بعد اسبوع ...♥
نزلت جهان من الدروج وتوجهت لباب الحوش عشان تحل لأدم اللي قاللها انه جاي وهذي كانت ثاني زياره له ف الاسبوع هضا
حلت الباب وابتسمت لما خش أدم وهو ينفخ ف يديه من الصقع وقال : كيف الحال ؟!
جهان هزت راسها وخشت وشيرتله يخش
سلح أدم كبوطه وطاقيته وقعمز.... قعمزت جهان امقابلته وكانت بينهم طاوله مجهزه عليها جهان كل لوازم القرايه
بدت جهان تقرا وتشرح لأدم عن طريق الكتيبه وبعدها طلبت منه انه يعطيها الشيت امتاعه
أدم هز راسه وهو يلعب بالقلم بين صوابعه وقال: مش جايبه
جهان استغربت وكتبتله ف الورق اللي قدامها "كيف جاي تقرا ومش جايبه"
أدم يبحت ف القلم اللي بين صوابعه وقال ببتسامه : كأنه لسانك طول انتي
جهان طبست راسها وهي تكتب وتحاول تخفي ابتسامتها ....وادم بحت فيها وابتسم وهو يرشف ف خشمه
قعدوا ثواني ساكتين 🕛
ادم قدم يده وخذا من جهان القلم اللي كانت تكتب بيه وقال : وقفي شويه
جهان رفعت راسها من المذكرات وبحتت فيه بتساؤول
ادم وخر شعره بيده وقال : احكيلي ع عيلتك ؟!
سكتت فتره وهي تبحت ف عيون ادم ولأول مره
وبعدها طبست وكتبت ف الورقه "انت امك عايشه !؟"
أدم عقد حواجبه وملامح الغضب بانت علي وجهه من سؤالها برم وجهه وهو يبحت ف الروشن وهز راسه بمعني اها
طاحت من عين جهان دمعه وهيا تكتب " يابختك "
ادم ضحك بستهزاء وهو يلعب ع السلسله اللي ف رقبته
غمضت جهان عيونها وهيا تحاول توقف دموعها اللي ينزلوا
أدم بحت فيها وركز ع يدها اللي كانت ع الطاوله وترعش ....قدم يده بشويه ومسك يدها
جهان فتحت عيونها وحولت يدها بسرعه
أدم وخر بعد حسها خافت منه وقاللها :اهدي
جهان هزت راسها وهيا تحاول تتحكم ف يدها اللي ترعش
أدم مد يده وبحت ف جهان بمعني " مدي يدك "
مدت جهان يدها وهي متحشمه و حطتها علي يد ادم ...ادم مسك يدها بيديه الاثنين .....فجأه يد جهان اللي كانت ترعش وقفت
ادم رفع عيونه ف جهان وابتسم
جهان حطت يدها الاخره ع وجهها تمسح ف دموعها وهي بتموت من الاحراج ....ويدها مازالت بين يدين ادم
#يتبع ♥
user07555625 اول من جاب معنى اسم الروايه وانا وعدت اني نديرلها دعم ،تابعوها❤️