21/2/2021
#فـينـوس ♒♥
للكاتبه:sαℓeмα🔏
ــــــــــــــــــــــــــــــــ
المـقدمه ....
الحلـقه الاولـى....
السـاعـه 10:30ص⭐
في الجامعه 🏫
كان واقف (ادم )مع اصحابه زيد ، رضا، مهاب
ورويدا حبيبة ادم مع مها حبيبة رضا ♥
كان ادم يهدرز ويضحك امعاهم وفي نفس الوقت مش مفوت ولا بنت تمر من قدامهم الا ويعاكسها وينابشها
رويدا كانت تبعد ف مها و رضا من علي بعض وتضحك وهي تقول : وسعووووا نبي انقعمز هنا بينكم
مها ناضت من علي الكرسي وهي تنفخ وتضحك : افففففف يارويدا.... بحتت ف ادم وشيرت بعيونها لرويدا عليه
رويدا برمت وفنصت وقالت بغيض : ااادددم😡
ادم برم عليها وهو يضحك ببلاده بعدما كان ينابش ف بنت ماره من قدامهم هو وزيد
رويدا وهي متعصبه : شن ادير
ادم ضحك وغمزلها : انشوف ف البنت 😉
رويدا ضحكت بقلت حيله وقالت : شارب حاجه يـ....
مهاب قاطعها وهو يضحك ع جنب: حتي انا كنت بنسأله نفس السؤال رايق بزياده اليوم
ادم رفع يديه وقال بصوت عالي شويه وهو مبتسم : لااااااه ماقربت حاجه .....اسألوا زيد اهو كان امعايه ف الصبح ☺
زيد وهو يبحت ف نقاله : كذاب
ادم بحت ف رويدا وهو يوخر ف خصلات شعره من علي جبهته ضحك : شوووويه بس ...عشان نقدر نتحمل محاضرات استاذ فرج
رضا خبط ادم ع ظهره : شارب وجاي للجامعه
ادم حط يديه ف جيوبه : إيزي بيب
رويدا : به خلاص ابرم وجهك هنا
ادم ابتسملها وعض شاربه : حاضر من عيوني 😌
رويدا ضحكت وشقلبت عيونها
ــــــــــــــــــــــــــــــــ
(ادم): شاب عمره 25 سنه موصفاته طويل ومش عريض واجد بشره حنطيه وعيون كبار بلون نادر اللي هو اخضر هادئ او لون (كريستالي✨) ولحيه خفيفه جذاب ف شكله وشخصيته ،جريئ ومستفز ، باته توفي من لما كان عمره سنتين امه عطاته لعمته وجدته (ام باته)وتجوزت رباته عمته وجدته ، توفت جدته لما كان ف الاعدادي قعد مع عمته بس عمته اجوزت بعد فتره فستقل ادم ف سكنه بروحه ،يعتبر من الناس الاغنياء بحكم انه باته كان رجل اعمال معروف ومسيبله فلوس وعقارات 🔥)
(رضا): شاب عمره 23 سنه موصفاته متوسط الطول شعره لونه بني فاتح عنده لحيه خفيفه و عيونه لونهن عسليات ، باته من اكبر المسؤلين ف البلاد عايش ف الدلع والفلوس والسفر يسكن مع اهله باته ،امه ، اخ ،اختين ،يعشق مها حبيبته ومرتبطين من ايام الثانوي ✳)
(زيد): شاب عمره 25 سنه اقرب اصحاب ادم واقدمهم ، حالته الماديه مش نفس مستوى رضا وادم بس متريحه ،الولد الوحيد مع ست بنات ويسكن مع امه وباته وخواته بس اغلب وقته مع ادم💫)
(مهاب): شاب عمره 20 سنه ملامحه عاديه ،حالته الماديه متريحه 💸،هو اللي كان الوسيط ف تعرف رويدا ومها علي باقي الشباب ⬆تعرف عليهن لما كانن يقرن امعاه ف المدرسه الثانويه✨)
(رويدا _مها): عمرهن 20سنه هنا الاثنين من دار الايتام تربن وعاشن فيها ، رويدا بنت غير شرعيه وهذا حسب الورقه اللي لقوها امعاها قدام دار الايتام ، اما مها باتها وامها ميتين ف حادث ماكانش عندها حد من عيلتها الا جدتها (ام امها) قالت حالتها الماديه صعبه فحطتها ف دار الايتام ولما كبرت مها طلعت تسكن مع جدتها وطلعت معاها رويدا تسكن معاهم💠)
(مها): مواصفاتها بيضه شعرها طويل لونه بني هادي وملامحها طفوليه ،هاديه واطيب وحده ف الشله ⬆😁هي ورضا يعتبروا احسن وحدين )
(رويدا): مواصفاتها بيضه شعرها لعند اكتافها اسود وملامحها حاده ،حقوده وطبعها واعر وشخصيتها عكس مها تماماً)
ــــــــــــــــــــــــــــــــ
مهاب وهو يحك ف يديه ف بعضهن قال : الزح البنت هذي بتهبلني!
زيد عقد حواجبه: اها والله رافعه خشمها لين خلاص
مهاب وهو يبحت ف البنت: عندهاا حق حتي هيا جمال وفلوس وعلم مقطع بعضه
زيد : عندك علم ان الشباب نهارتها حاولوا يطيحوها محدش قدرها تي حتي الكلام ماردتش عليهم
رويدا وهي قالبه وجهها : مش عارفه عليش متكبره بس !
ادم وهو يبحت ف البنت اللي يحكوا عليها قال : سساهله
كلهم شافوله وعلي وجههم علامات استفهام
رضا هز راسه بتساؤل : شنو !؟
ادم بحت فيهم وابتسم : ساهله قتلك ماتاخذش يومين الا هيا طايحه بوجهها
مهاب ضحك بستهزاء
ادم بحت فيه ورفع حاجبه : وكان كلمتها؟
مهاب بتحدي : تاخذ السياره الجديده اللي موصي عليها من بره ...لكن كان ماقدرتش بتعطيني مفتاح الاستراحه لمدة اسبوع
زيد يضحك بحماس
رضا خبط ع كتف ادم : اووووو فيها سياره ياطيري
مها : حرام عليكم البنت
رويدا بعصبيه : تي حولي من قدامي حرام عليكم شن .....ادم لا ماتكلمهش
ادم ضحك وقاللها : فيها سياره يابيبي نكسدوا عليها اسبوع وبعدها خلاص....وبحت ف مهاب وقال ..خلاص تم
مهاب رقصله حواجبه : عدي توا هيا
ادم عدل جاكيته ومشا بتجاه البنت اللي مقعمزه ع كرسي ولاهيه ف شيت ف يدها
ادم قعمز ع نفس الكرسي بس ف بينهم مسافه
هي طول بحتت فيه ووجهها انحمر من الحشمه
ادم بحت فيها وابتسملها
هي نزلت عيونها بسرعه وقعدت تفرك ف يديها ف بعضهن من التوتر
ادم وهو يوخر ف خصلات شعره النازلات قال : شن تقري
هيا بكل توتر وجهت الشيت اللي ماسكته لادم بحيث يقدر يقراه
ادم بحت ف الشيت📰 شويه وبعدها قال وهو يبلل ف شفايفه : امممم....ماتبيش تحكي امعايه
هي هزت راسه بـ اها وهي متحشمه ووجهها محمر😳
ادم صبا وقال : تمام بس مزال بنتلاقوا راه وضحك ومشى
هي تنفست بعمق وتفكر ف اسلوب ادم اللي ركبها التوتر وكيف يحكي بثقه هكي وزاد ختمها بضحكته الجذابه اللي تخلي ف البنات يتكركبن تحت كرعيه
اما ادم لما ناض توجه لنفس المكان اللي جا منه وهو يمشي بثقه
مهاب ورضا يضحكوا عليه بستهزاء
زيد مبتسم ويعلق امعاهم
اما رويدا كانت معصبه من ادم (مع انها عارفه كويس انه يكلم ف غيرها ومستحيل يكتفي ببنت وحده بس هي ديما لها الاولويه عنده وهي الوحيده الي علاقتها بأدم ثابته الباقي كلهن علاقات عابره)
ومها شابكه يديها ف بعضهن وتشوفلهم وتراقب ف الوضع
مهاب بطل ضحك وبحت ف ادم وقال : كيف صار؟
ادم حك مقدمة انفه بطريقه عفويه وقال : خليها اطيب ع نار هاديه 😏
رضا ضحك : امنور يا الشيف حسن😂😂
ادم خبطه ع ظهره وقال : هيا يا%#&$ المحاضره بدت 😄
ــــــــــــــــــــــــــــــــ
الساعه 1:30م⭐
طلعوا الشباب من المحاضره و روحوا زيد ومهاب ، ورضا روح بـ مها ورويدا كالعاده ، وادم مازال ماروح لانه يبي يطبع شيت بعد كمل وطلع شاف البنت اللي حكا امعااها ف الصبح ابتسم ومشالها
ادم وهو مبتسم ع جنب قال : ياهلا
هي بحتت فيه وسكتت وبدا وجهها يكتسي بالون الاحمر
ادم رفع حاجبه : بتروحي !؟
هي هزت راسها بالموافقه وهي ساكته
ادم مسح علي لحيته وعقد حواجبه وقال : كنك ماتحكيش؟
هيا غمضت عيونها وخذت نفس وبعدها فتحت عيونها طلعت دفتر من شنطتها وقلم
و #يتبع♥
°شن تتوقعوا يصير ف الحلقه الجايه ؟!
°من هي البنت هذي وشن قصتها ✨؟!
°و وين التفاعل ♥؟!
°وشن معني اسم فـينـوس ♥♒، اول حد يجيب معناه حنديرله دعم ونكتب اسمه ف الروايه .
انحبكم واجد واجد 😚