طبيعي إن الشيطان يكون له أبناء.
بس عمرك سمعت عن ابن شيطان ويكون إنسان؟!
راهب روسي اسمه (راسبوتين).
كتير قال إنه الشيطان في صورة إنسان.
وكتير قال إنه ابن الشيطان.
وغيرهم قال إنه راهب السحر الأسود.
وكان واحد من أسوأ رجال الدين سمعة في التاريخ.
جاهز تعرف ليه قدر يكسب كل الألقاب دي؟!
يلا بينا.
يا عزيزي (راسبوتين) من الشخصيات اللي حصل عليها جدل كبير جدًا، لدرجة إن ناس صدقت بإنه مش إنسان، وقالوا عنه شيطان، أو شيء خارج عن الطبيعة، المشكلة إنه فعلًا شخصية حقيقية، كانت موجودة، بكل الظواهر الغير طبيعية اللي حصلت بسببه، لدرجة إن فيه ناس كتير استخدمت شخصيته في كتابة الروايات والأفلام والمسلسلات واستندت فيها على أحداث حقيقية، وطبعًا كان فيه أوفر في الوصف وبعض الإضافات علشان تكون الحبكة قوية ومنطقية.
وزي ما احنا متعودين، تعالى أعرفك على (راسبوتين) الحقيقي من غير أي بهارات ولا زيادات.
(راسبوتين) اتولد سنة 1869م في سيبيريا، وكان بيقدر إنه يروض حصان من لمسة واحدة بس، فاشتهر بسرقته ليهم، ولما سُمعته بقت سيئة جدًا في بلده، وبقى يتقال عنه حرامي، خرج منها وقرر يتجه للرهبنة والتعبد في الكنيسة.
وفي مراهقته سموه (راسبوتين)، ومعناها الفاجر، ودا بسبب علاقاته الجنسية، فكانت الستات بتتعلق بيه وتقع في حبه بمجرد نظرة واحدة منه، يا عزيزي دا فيه رجالة مكنوش بيقدروا يقاوموا نظرته وإنهم يبصوا في عينيه لوقت طويل.
خد لقب راهب، وبعدها انضم لجماعة اسمها "خاليستي" معروفة بممارساتها الجنسية الشـ* ـاzة.
في مناسبة من المناسبات (راسبوتين) أعلن إن السيدة (مريم) العذراء ظهرت له وأمرته إنه يتوجه للعائلة المالكة في روسيا ويقدم لهم المساعدة، وفعلًا راح للعيلة المالكة اللي استقبلته بشكل حلو جدًا بسبب إنهم عارفين عن مميزاته، ودا لأنه اشتهر وقتها بشفاء المرضى وممارسته للسحر والشعوذة، والأسرة المالكة في الوقت دا كانت مهتمة جدًا بالغرائب والسحر، وبعد ما قابلهم وأبهرهم بمهاراته في السحر، قرروا إنه يعيش معاهم في البلاط الملكي.
هنا بدأت نفوذ (راسبوتين) تكبر وتتضخم، وقد إنه يكون شبكة ضخمة من الأصدقاء والمعارق من الطبقات العليا، دا كمان اعتبروه في موسكو مرشد روحي أو رجل مقدس، واللي ساعده في دا سحر شخصيته وقوتها، حتى إن الإمبراطورة استعانت بيه في تخفيف الألم عن ابنها وريث العرش، ودا لأنه كان مريض بمرض سيلان الدم، والمرض دا ورثه من والدته، وبيتسبب في سيلان الدم، ولو اتجرح هيفضل ينزف لحد ما يموت، أو ينزف تحت الجلد فتتجلط الدماء وتعمل له مشاكل صحية.
(راسبوتين) قدر يعالج وريث العرش، واتقال إنه عالجه بالتنويم المغناطيسي، وبعدها خفض تدفق الدم من القلب، ومع الوقت قدر يتحكم في السيلان، بعد فشل كل الدكاترة في علاج الوريث. وهنا كانت الصاعقة!
أثبت (راسبوتين) إن عنده قوة خارقة، خصوصًا إن علاج سيلان الدم في الوقت دا كان مستحيل، فعينته الإمبراطورة مستشارها وأمين أسرارها، وكل ما زادت نفوذ (راسبوتين) من ناحية، كانت بتزيد أعداءه من ناحية تانية، وخصوصًا بعد ما اشتهر بإنه بيعيش حياة السكر والعربدة خارج القصر الملكي، وبيتردد على منازل الدعارة وغيرها من الفجور.
هنا قرر اتنين من الرهبان كانوا أصدقاءه، بعد ما اقتنعوا إقتناع تام إنه تجسيد حي للشيطان إنهم يخلصوا البشرية منه ويقتـ* ـلوه، وفعلًا حاولوا، بس فشلوا، ولما نجى (راسبوتين) منهم بلغ الإمبراطور اللي لما عرف نفاهم خارج البلد.
اللي حصل يا عزيزي إنهم جابوا عاهرة وادوها فلوس وطلبوا منها تقرب من (راسبوتين) وتغرز سكين في جسمه، وفعلًا وقفته في الشارع وهو ماشي وخرجت السكينة وغرزتها في بطنه، كان هيموت لولا إن دكتور قدر يعالجه.
والدكتور بيعالجه وبيخيط جروحه رفض ياخد أي مسكنات لدرجة إن وجهه شحب في الوقت دا وكان هيموت، ولما فاق من اللي حصل له رجع أقوى من الأول، الإمبراطور زود من مكانته وبقى يقدر يعين أو يشيل من الوزراء، وبقى له مكانه كبيرة جدًا في الدولة.
الإمبراطور في الوقت دا فكر في إنه يصنع حرب كبيرة، كانت سبب في الحرب العالمية الأولى، فحذره (راسبوتين) كتير جدًا من إن دا هيكون خراب على روسيا وهيتسبب في قتل كتير من الأبرياء، ولكن بريطانيا كان تأثيرها أكبر على الإمبراطور، فكتب (راسبوتين) رسالة أخيرة وبعتها للإمبراطور بيقول فيها:
"مرة أخرى أقول:
هناك غمامة، عاصفة مريعة تسري في سماء روسيا. أرى كارثة، ظلامًا، حزنًا، ولا ضياء. إنه بحر من الدموع والدماء. ماذا أقول؟! لا أجد كلمات تصف ذلك الرعب، جميعهم يريدون منك الاندفاع نحو الحرب، لكنهم لا يعلمون أن الدمار ينتظر.
إنك أنت القيصر، والد هذا الشعب، لا تدع المجانين ينتصرون ويدمرونك ويدمرون شعبك. وإذا هزمنا ألمانيا، ماذا سيحدث لروسيا؟ سنغرق جميعًا في الدماء، والكارثة ستكون كبيرة، والأسى دون نهاية."
وكأنه كان عارف إيه اللي هيحصل، وفعلًا الحرب اتسببت في موت الملايين، وبعدها اللوم كله بدأ يقع على (راسبوتين) بسبب الأوضاع السيئة اللي بقت فيها البلد، لدرجة إن مدينة سان بطرسبرغ خدت لقب مدينة الشيطان.
وفي ليلة 16 ديسمبر 1916م، وصل دعوة لـ(راسبوتين) علشان يحضر قصر مويكا بحجة إن (إيرينا) اللي بيتقال عنها إنها أجمل ست في سان بطرسبرغ عاوزة تقابله، فقبل (راسبوتين) الدعوة، وفعلًا راح القصر، استقبله الخدام ودخلوه غرفة جانبية فيها مائدة مليانة بكل أنواع الحلويات والفواكه وقوالب الكعك، اللي كانت مليانة بمادة سيانيد البوتاسيوم "سم".
ودا لأن الدعوة كانت خطة لقتله، ولو المادة فشلت في قتله مفيش مشكلة السم موجود في كؤوس الخمر وهيقوم بالمهمة.
قعد (راسبوتين) على المائدة، وفضل منتظر ظهور (إيرينا) لحد ما دخل عليه خادم وقدم له قطعتين كعك وزجاجة خمر فيهم سم، شرب كاسين من الخمر المسموم ولكن مظهرش عليه أي أثر للتسمم، يا عزيزي دا حس بعدها بالشوق أكتر علشان يشوف الأميرة.
فات الوقت ومفيش حاجة بتحصل، وحس المتآمر "الأمير زوج إيرينا صاحب خطة القتل" بالخوف لما بان على (راسبوتين) إنه مُحصن ضد السم، فطلع الدور اللي فوق علشان يقول لباقي المتآمرين، فظهر عليهم التوتر والخوف.
الساعة بقت 2:30 بليل، الأمير قاعد قدام (راسبوتين) اللي شرب سم كتير جدًا ومفيش أي تأثير عليه، وخلاص مبقاش فيه وقت إنه يمثل على (راسبوتين) إن زوجته بتشوف الضيوف التانيين، فاستأذن من (راسبوتين) علشان يطلع ينادي الأميرة.
ولما طلع الأمير مقدرش يسيطر على نفسه، واتفق مع المتآمرين إنه هيضربه بالرصاص، وفعلًا جاب مسدس ونزل وهو مخبيه، وأول ما دخل الغرفة (راسبوتين) طلب منه خمر زيادة، شاور للخادم يجيبله كاس، وبعد ما شربه، قال للأمير إنه هيخرج يزور الغجر ويقضي معاهم وقت لطيف.
أول ما (راسبوتين) اتحرك ناحية باب الغرفة، وكان خلاص هيخرج، رفع الأمير المسدس وصوبه لضهره، فجأة لف (راسبوتين) جسمه وبص له، فضربه الأمير بالرصاصة فدخلت في صدره، عين (راسبوتين) وسعت بشكل مرعب، وفتح فمه كأنه هيتكلم، سمع المتآمرين صوت الرصاص، دخلوا كلهم الغرفة، وكانت الساعة 3:00 الصبح، وأول ما دخلوا شافوا (راسبوتين) واقع على السجادة مبيتحركش والدم نازل عليها ومغرقها.
بدأوا ياخدوا وضعية الترتيبات لنقل الجثة، لموا حاجات (راسبوتين)، معطف، طاقية، وغيره علشان يحرقوهم، وبالصدفة انحنى واحد من المتآمرين قريب من الجثة، وفجأة حس برعب كان هيتسبب في وقوف نبضات قلبه، ودا لأنه شاف (راسبوتين) فتح عين من عينيه الاتنين، وبعدين فتح التانية، وفجأة قام وقف ومسك الشخص اللي كان جنبه وهجم عليه زي الوحش، والتاني فضل ينادي بصوت عالي مليان رعب:
- يا فيلكس. فيلكس.
الراجل قدر يفلت منه، وهرب وفضل يجري للدور اللي فوق، وبلغ الباقيين، خرج (راسبوتين) لحديقة القصر وهو بيهذي بصوت عالي:
-فيلكس. يا فيلكس. سوف أخبر زوجة القيصر.
وبصعوبة مشى (راسبوتين) على رجليه الضعيفة وكان خلاص هيخرج من حديقة القصر، إلا إن واحد من المتآمرين كان بيستعد إنه يمشي لما عرف إن (راسبوتين) مات، أول ما شافه قدامه عايش اتفاجئ فطلع مسدسه وضربه بالنار من غير تردد، وقع (راسبوتين) على الأرض، مسكوه المتآمرين كلهم وربطوه، وفضلوا يضربوه برجليهم في جسمه وراسه، ولسوء حظهم إن كان فيه شرطي بيتحرك في المنطقة، قرب من المنطقة لما سمع صوت الرصاص، الأمير شافه، ففتح البوابة، وقال للشرطي إن ضيوفه بيحتفلوا وبيشربوا خمر وإن حد فيهم ضرب نار على كلب. وبعدين قال له لو حابب تدخل القصر اتفضل، اتفاجئ إن الشرطي قبل الدعوة، وفعلًا دخل القصر، ولما دخل الأمير قال له "أنا قتـ* ـلت راسبوتين"، لسان الشرطي اتربط وقرر إنه ميتكلمش في سبيل مصلحة القيصر والوطن.
شالوا جثة (راسبوتين) ورموها في نهر نيفا المتجلدة، ولما الشرطة عثرت على جثته بعد يومين اتصدموا صدمة مرعبة.
لما شرحوا الجثة لقوا الرئتين مليانين مياه، ودا دليل على إنه كان لسه حي لما رموه في النهر، ولكن برودة الماء المتجلد قتـ* ـلته.
وبعض العلماء فسروا عدم تأثير السم فيه إنه كان مصاب بنقصان الحمض المعوي، وفيه بعض المفسرين التانيين بيقولوا إن خلط السم بالخمر أبطلت مفعوله.
ولكن انتشرت إشاعة بإنه كان بيتعاطى كميات ضئيلة من السم كل يوم علشان يحمي نفسه في حالة لو حد حاول يقتـ* ـله.
الغريب يا عزيزي واللي بيثير التساؤل لحد وقتنا هذا، إن (راسبوتين) قبل قتـ* ـله بأيام أرسل رسالة للإمبراطور (ألكساندر) بيقول فيها:
"إذا قتـ* ـلني أقاربك فلن يبقى أي فرد من عائلتك حيًا لأكثر من عامين، وتستطيع أن تقول أي من أولادك أو أقاربك، فسوف يقتـ* ـلهم الشعب الروسي. سأُقتـ* ـل، لم يعد لي وجود في هذه الحياة، صلِ أرجوك، صلِ، وكن قويًا، وفكر في عائلتك المصونة."
وفعلًا بعد ما (راسبوتين) مات، اتعدم قيصر روسيا هو وعائلته على إيد الثوار البلشفيين!!
ولحد وقتنا هذا مفيش تفسير منطقي للرسالتين اللي أرسلهم (راسبوتين)، ولا تفسير كامل لشخصيته اللي كانت مليانه بالغموض وحيَّرت المؤرخين والعلماء على مر التاريخ.
-
المصادر:
- تاريخ الإطلاع: 10 أكتوبر 2015
- عشرون اغتيالًا غيرت وجه العالم – لي ديفيز.
- 1000 شخصية عظيمة – ترجمة د.مازن طليمات.
دوس على النجمه عشان التقيم
وادخل خد لفة في البروفايل هتتبسط. ♡