السلام عليكم
نور ال زياده
تجبرنا الحياة نتخذ قرارت مصيريه باوقات صعبه دون ان ندرك اذا كانت صائبه ام خاطئه
فيان : كلام علاء وصل مسامعنا وكان كلامه كالصاعقه بالنسبه الي كل جسمي صار يرجف من الخوف ماتقبلت اللي سمعته
بعدها صرنا نسمع بس اللصياح الى ان طلعوا علاء
لان كان مو بوعيه شارب
وهل تصرف منه انحسب ضده مو ويا والكل حجى علي
قروا الفاتحه كانما شيء لم يكن وطلعوا
وخلال اسبوع تم العقد وبدت التحضيرات واتفقوا الزواج يتم بعد الامتحانات
سوينا خطوبه بسيطه بينا احنا واهله ولبسنا الحلقات والذهب اللي رحنا اختارينا كان طقم ذهب وحلقه بس فخمات
كان امير يوميه يتصل وفرحان كلش واني هم فرحانه بس خايفه واحس انجبرت على الاختيار واني ماالي نية زواج حاليا،،
اني ووالدي واخوتي كانما اغراب صرنا
والدي وافق بس ماخذ موقف مااعرف ليش
بس ماكنت اعرف هل الموقف راح ينهي علاقتي بوالدي الى الابد
بلشت الامتحانات واني كنت كلش مركزه بحيث حتى ابتعدت عن امير نهائيا بهل الفتره
بعد ماانتهت الامتحانات بلشنه التجهيز للزواج بس المشكله كانت الاجواء متوتره
والدي ووسام وميثم ورنا وبيت عمامي وعماتي رافضين
وحسيت ام امير هم مارايدتني لابنها
بعد ايام طلعت النتائج وهنا كانت اكبر فرحه عشتها بحياتي حلمي تحقق ونجحت وطلعت معدل يئهلني
ادخل طب
كان هذا الشي الوحيد الي اختاريته ونفذته بحياتي بكامل ارادتي
امي من فرحتها ماخلت شي ماوزعته بس مع الاسف ماسمعت كلمة مبروك من والدي واخوتي
احس بنضراته مفتخر بيه وفرحان بس يكابر
بعد النتائج تحدد موعد العرس كانت فترة الخطوبه قصيره لان والدي ماكان يسمح لامير يجي لبيتنا
صار موعد الحنه ووالدي رفض اسوي حنه امي توسلت بي بس رفض تماما
بوقتها كلش انقهرت
ثاني يوم الزفه حضرت نفسي ورحت للصالون
بعد ساعات خلصت وطلعت مثل ما اريد واحلم بدله فخمه وشكلي كلش حلو كانت هاي احلامي المضاهر كان شي مهم بحياتي
الان اني بهل توقيت حققت كل احلامي نجاحي ومعدلي وزواجي من الشخص الصح صاحب نفوذ ومال وشكل وسيم
بس ليش احس نفسي خايفه ومجبوره
رجعت للبيت ومن دخلت ماكان ببيتنا بس امي واختي ووالدي وعزمت كم وحده من صديقاتي
دخلت للغرفه بهل اثناء دخل والدي وسد الباب
باوع عليه نفس النضرات اللي ماعرفت افسرها
وكلي
ابو وسام :اليوم عرسج راح تزوجين اللي اختاريتي
فيان :انته هم وافقت علي
ابووسام :خلي اكمل كلامي لتقاطعيني ،وبعدين اني ماوافقت بدون سبب
كل مره كان يطلبج ارفضه ومااقتنعت ولاراح اقنع بي بيوم من الايام
لان هل شخص ميكدر يسعدج
بس انتي اللي اختاريتي وتتحملين عواقب اختيارج
لتصدكين اني نايم على اذني ومادريت باللي سوا امير بعلاء
عرفت هو اللي ورا مشكلته وسجنه
وصرت متاكد هذا امير مستعد يسوي كل شي حتى ياخذج
ومو بعيد يئذي اخوتج واني كنت مستعد اضحي حتى باخوتج علمودج
بس انتي انسانه انانيه
وتفكرين بس بمصلحتج لهذا تستحقين واحد مثل امير لهذا راح اعوفج تواجهين مصيرج وحدج
وتعرفين الله حق
بس خلي ببالج شي من تندمين
ماكو عندج اهل ترجعيلهم لان من هل الدقيقه انتي موبنتي ولااني ابوج وبابي مسدود بوجهج انتي وامير
ما اريد اشوفكم حتى بجنازتي من اموت اعتبرينا متنا وانتي هم من هل دقيقه بالنسبه الي ميته
وصدكيني مراح تتوفقين وراح تضلين ملعونه بحياتج لان اني ما راضي عليج
فيان :بدموع )لا بابا لتكول هيج الله يخليك كلشي ولاغضبك عليه مستعده هسه انهي كلشي واعوف امير وحتى اتزوج من علاء بس لتغضب عليه وتلعني
مااكدر اعيش بدونك انته تعرف شكد احبك
ابو وسام :فات الاوان انتي اختاريتي طريقج وكلتي عليه ضالم مع انو انتي اكثر وحده حبيتج ودللتج
ماخليت شي بنفسج وهسه راح اصير صدك ضالم
وسواء تزوجتي ولا لا ماعاد الج مكان بهل بيت
وديربالج تفكرين فديوم ترجعين لوتدكين بابي
ما اريد اشوفج للموت
فيان :حجى هل الكلام وطلع واني دموعي صارت تنزل بحركه كان كلامه سهام تنبت بنص كلبي
حكمه كان قاسي
بهل الاثناء دخلت امي الغرفه وشافتني ضلت تسال على اللي صار سولفتلها كل شي
ام وسام :كومي مسحي دموعج وعدلي مكياجج تخربط ولتخافين
ابوج لان هسه ضايج هيج حجى بس يهدء كل شي يتغير
فيان :بطلت مااريد اتزوج
ام وسام :هو لعب جهال وبطلتي اهل العريس جايين بالطريق تريدين تفضحينا كومي عاد وابوج موضوعه يمي
تعالي نرجسسسس وينج تعالي شوفي اختج
نرجس :نعم ماما
ام وسام :تعالي رتبي وجها المكياج تخربط
نرجس :هاي شكو شنو الصاير ؟
ام وسام :عوفن اللغوه الزايده الناس جايين بالطريق رتبيها
نرجس :الجواريين اجوي كلهم
ام وسام :اي هم زين اني عزمتهم لان ماكوا احد اجى من الكرايب
شيكولون علينا مكطمين من يجون اهل العريس همزين بيت خالي هم اجوي حتى يزيد العدد
فيان :رتبتني نرجس وفعلا الاستقبال انترس ناس بس تقريبا كلهم غربه
بس مجرد عدد كانما مكطمه وماعندي اهل حتى اختي اخذت موقف وماحضرت عرسي بس نرجس
وبعدين عرفت وجودها بعرسي مسببلها مشكله وياعمتي وزوجها
اجتي الزفه واني كلبي بدى ينبض مثل الطبل من التوتر
بهل اللحضه بالتحديد تمنيت الغي كل شي
حسيت نفسي ندمانه بس كان فات الاوان
لكن من دخل امير وشفت ابتسامته ولهفته عليه
حسيت بالامان
تمسكه وحبه اليه كان بالنسبه الي هو الامل اللي نطى لحياتي فرحه ومعنى
طلعت من بيت اهلي كدام الناس مرفوعة الراس بس بداخل نفسي مكسوره وحزينه
تاملت البيت اللي
عشت بي طفولتي وايامي الحلوه مع عائلتي ومع الاسف هذي كانت اخر مره اشوفه بي
مشيت خطواتي خارج هل المنزل باتجاه حياة جديده غريبه وغامضه ماكنت اعرف اني رايحه باتجاه المجهول
توجهنا باتجاه الفندق صارت الزفه كان اهله واقربائه كلهم حاضرين واصدقائه عساكر ويا جايين زفونا للفندق
حاولت اكون طبيعيه بس الخوف والتوتر وحتى الحزن كان مسيطر عليه
حققت احلامي بس كانت اكو غصه بداخلي تمنعني من الفرح
رغم كل اللي عشته بيومها بس امير حاول انو يغير مودي
حسيت شكد حابني ومتعلق بيه وفرحان
وماردت اكسر فرحته وحاولت اكون طبيعيه
بيومها صرنا زوج وزوجه وبدت حياتنا الجديده
ثاني يوم رجعنا لبيت اهله اول مادخلنه استقبلونه اخواته وزوجة اخو
كانت هذي ثاني مره ادخل بيتهم من بعد العقد لان بيومها عزمونا على الغدا
كعدنا شويه وصعدنا لغرفتنا
ثاني يوم اخذني امير للحبانيه نغير جو ضلينا اسبوع ورجعنا
مرت الايام وامير يعاملني احسن معامله
يحسسني اني اميره
واني فرحانه بحبه ومعاملته الي
اتصلت باهلي،، ردت امي ومع الاسف سمعت قرار والدي ماتغير
صرت اسمع كلام من عمتي اللي ماطايقتني
لان لابينوا اهلي للان ولاعزمونا
وفعلا كان الوضع يدل اكو شي غلط
وبيوم قرر امير ياخذني لبيت اهلي رفضت وضل يلح وانجبرت اكله اللي صار
ومع ذلك اصر نروح ونصالح والدي وناخذ رضا هل شي فرحني بس كنت خايفه من رد فعله
رحنا فتحت الباب امي دخلنا الكراج بس طلع والدي
وهنا كانت الصدمه !!
بيومها طردنا والدي من البيت ومنعنا نهائيا من الدخول
حاول امير يحجي ويا بس كان رد فعل والدي قاسي جدا طلعنا بخيبة امل كبيره
ابويه حتى ماباوع بوجهي وطردني
بيومها عمتي هم درت باللي صار وصارت تسمعني كلام على الطالعه والنازله
من امير موجود متحجي شي تخاف منه وتريد خاطره بس من يلتحق يبدي كلامها
صرت اتصل على اهلي ومره طلعتلي وفاء الضاهر راجعه لبيتنا ومن بعدها من اتصل ماكو رد
سمعت من امي وصل الخبر لوالدي ومنعها من التواصل ويايا وحلف عليها بالطلاك اذا حجت ويايا
كانت هذي اخر مره وصلتلي ر سالة ابويه ونهت الاتصال وكانت هذي اخر مره اسمع صوت امي
فقدت الاتصال ويااهلي خصوصا بعد مانرجس زوجها هم رفض تواصلها ويايا
صرت مقطوعه من شجره منبوذه ماعندي احد بس امير
مرت الايام ومر على زواجي كم شهر وهنا اكتشفت جانب جديد من شخصية امير مزاجي ومتقلب وعصبي جدا كل شويه اله شخصيه
بس مع ذلك كان حنين عليه ،، خواته مو كلش ويايا وامه هم
بس زوجة اخو اوس اسمها ساره زينه ويايا
واخو اوس للان ماشفته مسافر حاليا
بايامها وضع العراق بدى يتخربط وصارت امريكا تهددنا بالحرب
ودخل الجيش بانذار ودعنا امير وراح التحق
واني روحي راحت ويا ماضل عندي احد غيره كلش خفت علي
ضلينا على هل الحال الى ان اجى اليوم اللي سمعنا بي صوت صافرات الانذار اللي تنذر ببدء الحرب على العراق
كان صوتها مرعب الى درجه مخيفه جدا
انحبسنا بمنازلنا وانقطعت الاخبار بالاهل والاقرباء
عشنا برعب حقيقي شكد نحاول نوصفه بس حقيقته مختلفه
كنا نجلس وننتضر المجهول وقلوبنا مليانه خوف من المستقبل وخوف على احبابنا وانفسنا
مرت ايام اقل مايقال عنها صعبه جدا ومرعبه
بهل الايام ننتضر خبر من امير اللي اختفى
وصارت عمتي تسمعني كلام ثكيل واخرها كلتلي
انتي فكر بس دخلتي حياتنا اتخربطت وابني منعرف شنو حاله
كان عمي للامانه يدافع عني بس هي وبناتها يعاملني معامله ابدا مو زينه
وصرت عبالك خادمه الهن اشتغل ويريدن مني طبخ واني مااعرف ويبدي الغلط والتجاوز حتى اهلي تسبهم
وبيوم بالنهار الوضع يكون اهدء وصل النا خبر وفاة ابن اخوها لعمتي
كانوا قريبين بالمنطقه يمهم بس للان ماشفتهم بعدين عرفت علاقتهم منقطعه من فتره
مشاكل عمتي واخوها
كان ولد شاب يشتغل بمصفى البصره وصار حادث
واحترك صار فتره يعالجوا بس تعب وباخر عمليه توقف قلبه ومات
راحت عمتي وبناتها للفاتحه واني وساره زوجة اوس ضلينا بالبيت
ساره تصير بنت عمهم عدها ٣ بنات وحسيت علاقتها هي وزوجها بيها فجوه كبيره
حتى نادرا مايتصل عليها ويحجي وياها
ضلت عمتي ٣ ايام الفاتحه ببيت اخوها وعمي يروح ويرد علينا
شويه بهل الايام خلصت من المشاكل وعشت ايام نوعا ما هادئه
بس بالي مشغول على امير وبعد مارجعت رجعت المشاكل بعد اكثر وصارت متصيحلي باسمي تصيحلي الفكر بنت الفكر
شبعت أهانه وذل الى ان بيوم سمعنا خبر سقوط بغداد على ايد الاحتلال الامريكي
ثاني يوم الفجر سمعنا صوت الباب تكسر علينا كعدنا من نومنا وفتحناها وكانت المفاجئه
امير رجع بس كان في حاله يرثى لها وضعه مخربط
وضعفان وصعب
دخل للبيت كان كلش تعبان واحسه مصدوم
طلعتله ملابس وسبحته وبدل وحضرتله اكل
بس كان ياكل كانما ماماكل بحياته بشراهه
مع انو كان مجرد بتيته وبيض بس حسيته عبالك مشايف اكل من الجوع
فرحت برجوعه كلش واهله هم
ام امير :الحمد الله على سلامتك يمه توه مانور البيت
هسه يله ارتاحيت
امير :الله يسلمكم لوتدرون شلون بالي يمكم رغم التعب والصعوبه اللي كنت اواجها بس بالي يمكم
ام امير :الحمد لله من رجعت لوما سقطت بغداد ماكان شفناك خلفله على الامريكان خلصونه من الطاغيه وحكمه ورجعت سالم النا
واخيرا العراق راح يصير مثل دبي ونعيش حياتنا
ابو امير :اي صدك راح نرتاح ونعيش وماكو بعد ضيم العراقين راح يعيشون امراء وكل اللي اذاهم صدام راح يرتاحون
امير :انتو تحجون صدك ؟احنا صح خلصنه من صدام وجماعته
بس لتصدكون الامريكان جايين وجايبين وياهم الخير
بالنهايه يبقون محتلين والمحتل هدفه الاول اخذ خيراتنه ومصلحتهم هي الاولى والاخيره
ياخوفي ليجي اليوم اللي تندمون على هذا كلامكم
وتصيرون تترحمون على هاي الايام
اني عسكري واعرف العراق الى اين،، وصدكوني احنا باتجاه الهاويه
طلعنا من حفره ووكعنا بوادي عميق ماكو احد يعرف يطلع منه مليان غموض والله اللي يستر
ام امير :لتخاف ماكو شي يصير بالعكس بس سولفلنه شنو اللي صار وياك
امير :بعدين لان كلش تعبان اريد انام وارتاح صار ايام مانايم ولاماخذ دوايا
فيان :سمعت كلامه واستغربت يادوا شنو السالفه؟
صعد لغرفتنا واني غسلت المواعين وصعدت ورا لكيته نايم
مددت بصفه الى ان غفيت كعدت امير ماكو من نزلت
دريت رايح لبيت خاله ياخذ من خاطرهم لان همه فرق فرع عنهم
بلشت شغل الى ان اجى
بس حسيته تعبان كلش ما اعرف شنو بي صعدت ورا ردت اشوف شنو بس اول مادخلت للغرفه
دار وجهه عليه كانت عيونه حمر ودمرات وجها ورقبته بارزه بالرغم هادئ بس وجها محتقن وانتبهت
جسمه بي رجفه
بس سالته شبيك ؟جاوبني بعصبيه غريبه وشال ملابس كنت مرتبتهن على السرير ورماهن عليه بغضب
بلحضتها كلش خفت منه كان كلش متوتر
صاح عليه بغضب طلعي من الغرفه بسرعه وبدون كلام طلعت والدمعه محصوره بعيني والعبره خنكتني
على اثر صوته صعدت امه وابو ودخلو للغرفه طلبوا مني انزل اجيب مي
دخلو وسدوا الباب صراحه الفضول كتلني اني زوجته ومن حقي اعرف شنو بي
تقربت من الباب وسمعت اول صدمه وكذبه من الشخص اللي امنت حياتي عنده
ام امير :شبيك يمه شجاك ؟
امير :تعبان دوايه خلص واعصابي تعبانه
ابو امير :راح اطلع ادور بالصيدليات بلكي الكى
امير :يابه الوضع موزين الناس عزلت لان النهب صار بفلس
ابو امير :بس الدوائر والمؤسسات الحكوميه نهبوها القطاع الخاص شعليهم بي
امير :الناس خافت وغلقت كل شي
ام امير :وهسه شلون اخاف تجيك نوبة الصرع
فيان :كانت اول صدمه اتلقاها من امير امير مصاب بالصرع!!
المشكله مو بس هنا شلون ضم عليه وشلون كان يداوم وشلون سمحوله وهو هذا حاله اني سامعه ميصير معقوله حتى على الدوله ضحك
اكتفيت باللي سمعته ونزلت
ودموعي نزلت ويايا رحت جبت مي ورديت صعدت بعد ما مسحت دموعي طرقت الباب اجاني صوت عمتي
دخلت وقدمت المي وماخليت عيني بعينه مااعرف ليش يمكن لان الشخص اللي بنضري مثالي ماعاد بهل مثاليه
اللي اني مفكرتها او يمكن لان كذب عليه
مااعرف شنو اللي صار بداخلي لكن ماحاولت افهمه اني دريت بمرضه كنت طبيعيه
بعدها نزلت عمي وعمتي بقيت بس اني وهو
مااشوف الاتقدم اتجاهي وباس راسي واعتذر من تصرفه ويايا
واني سامحته مباشرتا وهذا كان احد اخطائي اللي خلته يتمادى ويايا كل مره وبسهوله ورغم اخطاءه
يريدني اسامحه واني مباشرتا اسامحه
نزلنه على العشا وبعد العشا حسيته كلش تعبان وهنا شفت امير بموقف لايحسد عليه بوقتها بجيت من كل كلبي وعطفت على حاله
اجته نوبة الصرع وعمي ركض علي وصار البيت هوسه خله بفمه شي حتى ليعض لسانه
ضل جسمه ينتفض الى ان توقف وغاب عن الوعي ونزل من فمه سائل
شكد كنت ضايجه منه من سمعت ضم عليه مرضه
بس بهل لحضه عطفت علي وقررت اوكف ويا مهما يكون هذا زوجي
وهذا قدري ولازم اتقبله مثل ماهو
صحى بس كانت عيونه حمره دم ووضعه تعبان بس ماخلى عينه بعيني بعد مافهم اني دريت بوضعه
اتصلت عمتي بابن اخوها طبيب دبرله علاجه ورجع ياخذه وتحسن بس من يومها امير ابتعد عني حتى صار ينتضر انام حتى يدخل الغرفه
اخر شي وبعد ايام ماتحملت واجهته وكتله
اعرف دتتهرب مني لان عرفت بمرضك اكذب عليك اذا كلت ماضجت بس ضجت لان ضميت عني وماصارحتني مو بسبب مرضك
اني ميهمني اذا كنت مريض هل شي موبيدك واني مستعده اكون وياك بكل شي ومرضك ميغير منك شي تبقى بنضري امير
بس انقهرت لان ماصارحتني بالحقيقه
امير ؛اني حبيتج من كل كلبي وخفت اخسرج اذا سمعتي بمرضي وترفضيني ومااكدر اعيش من دونج
سامحيني حبيبتي
فيان :اني اكيد مسامحتك بس اترجاك بعد لتضم عني شي
مااريد انصدم بيك ولاتتغير نضرتي الك
امير ؛خلص ياعمري اواعدج ما اضم شي بعد عنج
صدكيني احبج ومحتاجج ويايا ومشتاقلج كلش هوايه
فيان :يااا هاي وين حولت الموضوع
امير :اذا مسامحتني لترفضيني
.
.
.
.
فيان :سامحته وعشت طبيعي ويا كنت اشوف حبه ولهفته الي
بس المشكله مزاجي ومتقلب واحسه كل ساعه بشخصيه مره مثل الملاك ومره يتحول شيطان
كنا مابين مد وجزر
اما عمتي فكارهتني كره العمى
هل سنه ماداومت كليه بسبب الوضع الي كل يوم يتحول اسوء
بلشت اعتقالات الامريكان للضباط والشخصيات المهمه اللي بالجيش السابق واكيد الدور قادم على امير
هنا امه ذبت الصوج كله بيه على انتي فكر فكرتي ابني من شافج بعد ماشاف الخير واني اسمع واسكت
قررنا نترك البيت طلعنا فتره لبيت اقربائه وكانت ايام صعبه
بس ماكان اكو حل غير نترك العراق وفعلا
طلعنا بطرق غير نضاميه بعد مازورنا مستمسكاتنا
طلعنا للاردن تاركين ورانا اهلنا وناسنا وبلدنا
كانت الخطه بالبدايه نطلع للناصريه يم عمامه بس خفنا ليعرفون مكانه ويضر اقربائه ويا
لهذا كان الافضل نترك العراق كله رحنا للاردن وتبهذلنه هناك
والطريق كله على اعصابنه وكل شويه توكفنه سيطرات اللي بيها امريكان عشت اوقات وخوف مستحيل انسى
اختاريت حياة جديده على امل اعيش السعاده اللي احلم بيها واحقق احلامي
لكن القدر كان اله راي اخر
غير كل مخططاتي اللي خططتها
اجرنا شقه بالاردن بسيطه وكنت طول الوقت محبوسه بالشقه مااطلع
وفلوسنا بدت تخلص طلع امير يدور على شغل
ومن اشتغل بدى مزاجه كلش يتعكر وكل مايغضب
يرجع عليه
وصار يردد كلام امه ويكلي انتي فكر وملعونه ياريت ماتزوجتج
وصار يتذمر مني ويتحجج وانتي متحبيني ومشاعرج بارده وفوكاها حتى متعرفين تطبخين
كل يوميه يطلعلي شغله يسوي عليها مشكله
صرت احس بالذل المشكله ماعندي حل سوى السكوت والصبر وخصوصا اني ويا وحدنا ببلد غريب
مر على زواجي سنه ونص واني عايشه ايام بس الله يعرف بيها
حياتي ويا امير في مد وجزر حسب مزاجه يعاملني زين
وحسب مزاجه يجرحني بالكلام بس كان من يزعلني ميطول زعل ميخليني انام زعلانه
ومرضه من ياخذ العلاج واعصابه مرتاحه هو مابي شي
خلص كل شي وصارت هنا مشكلته الطفل اريد اصير اب
راجعت دكتوره وطلع مابيه شي مسالة وقت لا اكثر
صار اكثر من سنه واحنا بعيدين عن العراق
وهنا اقرباء امير سوله شغله من خلالها نكدر نرجع للعراق
وهي انو احنا تضررنا من النضام السابق وطلعنا قبل السقوط وامير تارك عمله من قبل يعني ماكان بالجيش
صار وقت نرجع للعراق وخصوصا كان عمي حالته كلش تعبانه
فرحت بخبر رجوعنا للعراق وامير هم كلش فرح وصار يعاملني كلش زين من فرحته بدينه نحضر نفسنا واغراضنا
وقبل لنرجع للعراق بيوم وصلنا
خبر وفاة عمي ابو امير هل خبر دمره لامير اعصابه انهارت اول مره اشوف امير بهل حال
اول مره شفت دموعه بحيث من كثر ماتاذى اجته نوبة صرع مع انو ملتزم بالعلاج
واني وحدي ماعرفت شلون اتصرف الى ان انتهت وفصل عن العالم
ثاني يوم رجعنا بس كان كلش تعبان وضعه ووجها اصفر وكل شويه يستفرغ
وصلنا بالويلات والعذاب
استقبلنا على حدود بغداد اخو امير اوس وويا ابن عمه
كانت هذي اول مره اشوف بيها اوس
سلم عليه بطريقه محترمه كان مبين يختلف عن باقي اهله كله وقار
،واني سلمت علي وعزيته بوالده
صعدنا وياهم بالسياره ورحنا للبيت كان الشارع مليان سيارات وزلم وجادر بالفرع نزلنا ودخلوني للبيت
داخل البيت مليان نسوان سلمت على الكل
واخذت من خاطر عمتي والبنات وصراحه بيومها استقبلني استقبال جيد من بعد الغياب الطويل
اخذت حقائبي وصعدت لغرفتي وساعدتني ساره زوجة اوس
دخلت غرفتي بعد غياب اكثر من سنه
سبحت وبدلت ملابسي بنطرون اسود وبلوز اسود لان كان شتا
ونزلت ارتاحيت شويه وبديت اتحرك ويا ساره وبنات عمهم وعماتهم على الشغل
وحسيت بنات عمهم وعماتهم مراغبات بيه بس موكلهن بس اللي اثار انتباهي تصرفات بنت اختها لعمتي
احسها تريد تاكلني بنضراتها عبالك قاتله ابوها كلش كارهتني ومااعرف شنو السبب
كنت اول مره اشوفها
كل شويه تتحجج عليه وتدور مشاكل بس ماانطيتها مجال ولاعبرتها
لان علاج الجاهل التجاهل واكفين بالمطبخ نشتغل وهذي اللي اسمها تماره
صارت تتمادى بحجه الشغل وقبل لااردها ردتها بنيه يطلع عمرها نهايات العشرين تطلع بعمر اخويه وسام بس كلش راقيه ومرتبه اسمها شيماء
واستغربت من عرفت تصير اخت عمتي الصغيره اول مره اشوفها وعرفت كانت مقطوعه العلاقه بينهم هي واخوانها
عمتي امراة متسلطه وكلامها مستفز لهذا دائما عدها مشاكل ويا اهلها
وقبل فتره تصالحوا من توفى ابن اخوها
شيماء ؛لتزعلين حبيبتي هاي تماره ماعدها اسلوب بالكلام والحجي بينا كانت خاله عينها على امير بس ماعبرها
واختها انتصار عينها على ابن اخويه حازم وهم هذاك ميكلبها
لهذا غيرانه منج فانتي لتنطيها وجه تجاهليها ولتزعلين من كلامها ترا من غيرتها
فيان :لاخاله ماضجت وبعدين مجبوره اتحمل حتى فاتحة عمي لتنكسر وتصير بيها مشاكل
شيماء :فدوه لهل الجمال والعقل صغيره بس عقلج كبير بالمناسبه اني اصير خالة زوجج واسمي شيماء ومااحب احد يصيحلي خاله ولاعمه
صيحيلي بس شيماء شمومه مثل ميناديني حازم لان احب اضل صغيرونه ههههه
فيان :خلص شمومه راح اصيحلج
شيماء :هو لواطخه لو اكسر مخه لوخاله لو شمومه
شيخلصج من الدكتور حازم بس هو يصيحلي شمومه
ممنوع احد يصيحلي بهل الاسم غيره
فيان :منو هذا زوجج ويدلعج؟
شيماء :اني زوجي شهيد وهذا ابن اخويه حازم اقرب انسان الي
يعني هو اخويه وصديقي ورفيق دربي
لهذا علاقتنه كلش قويه ويدلعني
فيان :الله شكد حلوه هيج علاقه انتي مبينه حبابه وكلبج طيب تشرفت بمعرفتج
شيماء :ياعمري اني اللي الي الشرف وتعرفت بيج
كنت اتسائل منو هي اللي خلت امير ابو خشم اليابس يحبها ويستقتل يزوجها
بس هسه من تعرفت عليج طلعتي تسوين ههه
خوش مزه صاكه
فيان :ههههه هاي شنو طلعتي تصجمين
شيماء :شسوي مكابله الولد ٢٤ ساعه وخصوصا حازم شصير غير ولد
فيان :هذا ابن اخوج لازم يدور علاقات ونقلها الج
شيماء :منوو حازم ؟!لا وين هذا انسان جدي بحياته وثكيل
مومال هل السوالف اوكفي دقيقه هذاك اجى خلي اصيحه تعرفي علي
فيان :لاعيب
شيماء :يمعوده دروحي لوتبقى على امير متعرفين احد وانتي صرتي منا وبينا لازم تعرفينا
حااااازم تعال دقيقه (بصوت)
تقدم شخص طويل وكتفه عريض رغم هو موسمين
ضعيف بس كتفه عريض جسمه رياضي لاشكله ولاجسمه مال دكتور عبالك عارض ازياء
شكله مرتب وحلو تقدم ودخل باب المطبخ وكال
حازم :السلام عليكم
الكل :وعليكم السلام
حازم :ها شمومه صحتيني خير شنو محتاجه ؟
شيماء :سلامتك ماكو شي ردت اعرفك على زوجة امير
فيان هذا ابن اخويه الدكتور حازم
حازم هذي فيان زوجة امير
فيان :الولد من دخل وحتى من سلم مارفع عينه وباوع على اي احد
بعد ماعرفتنه شيماء رفع راسه وسلم عليه
لما باوع بوجهي ضل صافن بوجهي وماحجى ولاكلمه
سلمت علي ردلي السلام ببرود وهو على صفنته بوجهي
شكد منحرف ولانزل عينه الا وعته شيماء ونبهته ترخص وطلع
لا وشيماء تكلي جدي بحياته وثكيل لاخجل ولااستحى صفن بوجهي
المشكله كانت تماره ضايجه مني هسه حتى اختها انتصار هم كلبت عليه بعد تصرفات هذا حازم لان خاله عينها علي كانت عايزه وتمت
رجعت لشغلي والنهار كله نشتغل ما ارتاحيت نهائيا واني منا جايه طريق طويل كلش تعبت
خلص ثاني يوم الفاتحه بطلاع الروح والباجر الثالث
اكيد الهوسه اكثر والشغل اكثر صعدت لغرفتي نمت مباشرتا من التعب
ماحسيت للصبح لكيت امير نايم يمي
كمت سبحت وبدلت ورتبت شعري لان هنا بعدني مومحجبه
كعدت امير كان كلش تعبان حضرتله ملابسه الى ان سبح ورتبت الغرفه ونزلنا
تلكتنا عمتي
ام امير :هلا بالمسعده نايمه للان ماكلتي فاتحة عمي نايمه للضهاري لاشغل ولاعمل
فيان :عمه ياضهر ساعه ٧ الصبح كلها هسه يله كعدت
وبعدين البارحه رغم جايه من طريق طويل ماكعدت ولالحضه بس اشتغل لليل
هنا امير اول مره يوكف ضدي كدام اهله وكلي كلام كلش جارح
امير :سدي حلكج واحجي عدل مره ثانيه ويا امي واحترمي واشتغلي بطلي تسخت وحللي خبزتج
موبس اكل ونوم
تعلمي شغل طبخ كافي جيفه
صار سنه مماكل لكمه بيها خير تعلمي طبخ
شيماء :صباح الخير كولو ياالله شجاكم على اللبنيه من صباح الله خير
اخذتوها حاصل فاصل منا العالم
وبعدين البارحه النهار كله تشتغل
ام امير :رجائا شيماء لتدخلين بامور بيتي اني احلها
شيماء :خلف الله عليج يااختي ماقصرتي
اوس :هاي شكو ليش صوتكم طالع ومنا الناس
شيماء :ماكو شي بس امك من الصباحيات مستلمه المسكينه ومن حجينا الحق كلبت عليه
اوس :امي الخير والبركه واكيد لان نفسيتها تعبانه هيج حجت لتزعلون مو صح يمه؟
ام امير : اي هم صح بس هي هم معاجبني وضعها
فاهيه ومابيها حظ
اوس :لايمه لتكولين هيج هاي مرت الغالي حاسبيها وعلميها وحدكم موكدام الناس
لان كرامتها من كرامتنا كلنا محسوبه علينه بنت هل البيت وبعدين بعدها صغيره تتعلم شويه شويه
موصح فيان ؟
فيان :اي صح اني اصلا دا اتعلم
اوس :اي عفيه بوسي راس الحجيه وانتي يمه على كيفج هاي هم بنتج
شيماء :اي هذا الكلام الزين اجى اللمعدل حلها
امير :شنو قصدج خاله اني مخربط واوس معدل
شيماء :لا انته خشمك يابس والكلام يجيبك ويوديك
متسرع بكل شي متفكر قبل متجاوب
امير :اشكرج ماقصرتي نطيتيها بالكصه
اوس :امشي امير يم الزلم برا وانتن تعوذن من الشيطان
وفيان روحي يم ساره هي تعلمج اي شي تريدين
فيان :عفتهم ودخلت المطبخ واني الغصه ببلعومي وبكلبي
امير جرحني بكلامه كان يكدر يجاوب مثل اخو لاكسر بيه ولابامه بس هو عبالك راد حجه عليه
حتى يتجاوز ويهيني
اخو عاملني باحترام وماكسر خاطري كان اوس اكبر واحد بيهم من بعده ابتهال وبعدها امير وبعدها سحر
ضليت بالمطبخ اشتغل النهار كله حتى اكل مااكلت
حتى من راحن تغدن ضليت اغسل مواعين ياريت لو احد راضي عليه
اني واشتغل لمحت هذا اللي اسمه حازم من بعيد باوع عليه
بس استغربت هل مره كانت نضراته كلها غرور وتكبر شايف حاله (اي يطبك مرض هو منو بحالك )
طلعت شيماء ضلت تسولف ويا وتضحكه وهو وجها ميكصه السيف على كد مو حقنه وغثيث شكد كرهته
دمه ثكيل
ورا شويه دخلت شيماء باوعت عليه
شيماء :ليش ما اكلتي من الصبح لسه اخاف زعلانه من اختي؟
بابا لتعبرين صيري مثلي اني هسه وقت الاكل انسى امي وابويه حتى من ازعل ااجل زعلي بعد الطعام هههه
فيان :شكلج تحبين الاكل
شيماء :والله هسه تاكدت انته صدك فاهيه وفطيره
فيان :ليش؟
شيماء :بربج تساليني احب الاكل مو الكتاب مبين من عنوانه
يعني بنضرج هذا كرشي شنو حامل بالتاسع مثلا لو زنودي اشيل حديد لووجهي مورم من ورا اسناني
بالعقل غير من الاكل
فيان :بس انتي تعتبرين مليانه شويه مو سمينه
شيماء :لا لهنا وحدج هذي اهانه الي صار سنين اربي بكرشي تربيه صالحه واعلم ماخليت لحمه ولاشحمه ولاكيكه ولاصينيه دليميه ها وام العراويه مو هيج
تعتب عليه وبالتالي انتي تجين تهينين وزني وتكولين موسمينه
هاي عليها فصل ومربع هم
حضري نفسج حولي علينه نلتقي بالانبار هناك الفصل
فيان :هههه لاهنا حقج عليه ضلمتج بس سؤال اشو بالانبار مو بالناصريه
شيماء :لان اصلنا من الانبار مومن الناصريه احنا
فيان :صدك !والله هسه يله عرفت يعني عمتي من اهل الانبار ولافد يوم سمعت بهل شي
شيماء :اهل قبل ماعدهم سنه وشيعه ولاجنوب وشمال وشرق وغرب كلنا واحد ولهذا الله مبارك بينا
وعايشين على حب الله
فيان :اني هم والدي من اهل ديالى وامي تركمانيه
شيماء :حلووو واكول شكلج عبالك تركيه طلعتي خليط بين تركمان والعرب السنه وجهالج هسه يجون خليط سنه وشيعه وتركمان لك شنوو هل الميكس الحلو هاي شراح يطلعون خلطه عراقيه تخبل
فيان :هههههه والله انتي الحجي وياج يشيل الهم
بهل الاثناء دخلت الحاقده تماره وباوعت بغيض
تماره :شنو السالفه صوتكم وضحكم واصل اللي جوا
كلها كامت تحجي وخالتي ام اوس كلش ضاجت
شيماء :شنو هل الكذبه العوجه اصلا صوتنا ناصي كلش
بطلي هل المكر بنت اختي وعاجنتج وخابزتج على ايدي واعرفج حنطه سياله ومابيها حظ استجني وانعدلي ولتحوصين يمي احسن الج لان كاشفتج
فيان : ههه خجلتها بحيث وجها صار احمر خلت وطلعت من المطبخ من فشلتها
شيماء :هاج هاي لفه اكليها اسندي روحج لتضلين بلا اكل
فيان :ما اريد والله مااشتهي
شيماء :ولي لج تاكلين وغصبن عنج وهذا امير الااطيح حضه قهرج همه اهل الناصريه حاروكه خبيث
بس صراحه عدهم غيره مو طبيعيه على بلدهم يصيرون ولسانهم ينكط عسل
فيان :اي صح امير كلش يحب بلده كل المحافضات
خير وبركه كل محافضه بالعراق بيها ميزه تختلف
عن غيرها بس اللي يجمع كل العراقيين اهل غيره وكرم
الله لايفرقنا ونبقى ايد وحده ونخلص من الاحتلال
شيماء :اميييين الله يسمع منج فعلا كلهم خير وبركه
يله اكلي وهذا عصير هم اشربي ماكو احد يفيدج
وامير ترا يحبج بس نفسيته تعبانه واختي لتاخذين
بكلامها مره كبيره تحمليها
فيان :الله كريم ،،،اكلت وصراحه شيماء ضهورها بحياتي كان نعمه هواي غيرت من نفسيتي
وكانت دائما توكف ويايا وتشيل عني الهم ولاعبالك اختها لعمتي فرق شاسع شي ميشبه شي
خلصت الفاتحه بخير وسلامه بس ياريتها ماخلصت
يتبع
مساء الخير على كل شخص يتابعني حبيت انزل بارت الكم حتى تشاركوني فرحتي بنجاح بنتي
متابعه ممتعه ياحلوين