شرفي عندك

البارت هديه بمناسبة عيد ميلادي

عزة النفس ليست لسانًا ساخرًا ولأ طبعًا متكبرًا
عزة النفس ان تبتعد عن كل من يقلل من قيمتك

بقلم الكاتبة الزهيريه الزهيريه

آيسن/ اكو مثل يگول المبلل ما يخاف من المطر وهذا حالي صار آني غرگانه بالمي شنو أخاف من كم نقطة مطر بعد ما شفت الناس ما رحمتنه أني وأطفالي لا من ياسين ولا من رواد وأهمهم نيفين الحيه راح أصير مثلهم وأخلي بأسهم بينهم مثل ما ظلموني والشي بالشي يذكر

وهذا وكتنه صار عجيب غريب يعني من يشوفون إنسان محتاج ما يمدون أيدهم ويساعدوا لا يستغلوا ويدوسون عليه حتى يحققون غايتهم اني من عرفت من ربى انه فكرت رواد يخلف من وحده مزوجه چانت فكرة نيفين والله ما ابالغ إذا اگول لو انحرها ألف مره قليله بحقها خسرت كل شي اطفالي وحياتي والأهم سمعتي في سبيل حضرت جنابها متخسر كازانوفا رواد افندي واني وأطفالي شنو ذنبي

لهذا فكرت آني خسرانه بكل الأحوال يعني مثل ما گال رواد شيسوي بيه فتره ويعوفني وين انگبر وين انطي وجهي گلت أحسن حل أخذ فلوس من رواد واشتري بيت واجمع بي أطفالي بلغت ربى آنه تنطي خبر لرواد آني موافقه على عرضه

وهو فرح بموافقتي وچان مصور آنه خلاص اموره وراح تكون تمام ويه زوجته ما يدري اني چنت أناقش الشيطان حتى أشهر بيهم شهيره وافضحهم مثل ما فضحني أبنهم وخله سيرتي على كل لسان وچان السبب الرئيسي بدماري اني واطفالي ومن بلغته بالموافقه گاللها لربى لا آحد يجيب أي سيره لنيفين وما أريدها تتأذى

بگلبي گتله مو بس راح اذيها لا راح أخلص على أنفاسها الأخيره ومن دخلت للمطبخ الصبح چان بعده ماكو واحد گاعد خليت الجاي على النار ومنتظره يگعدون وبعدني واكفه واباوع من الشباك على الگراج وبي 3 سيارات وحده لأبو رواد وسيارة لرواد وسيارة لربى وإني أشوف معاملة اهلها لربى شلون يعاملوها صدگ ألي يگول الأهل عزوه وهاي المقوله عد أغلب الناس ومطبقيها بس حظي الاكشر وحظ أطفالي

ومن نزلت ربى وشافتني بالمطبخ نرسمت على وجهه ابتسامه خفيفة بس شنو من اناقة وجمال وعطر بعدها نزل رواد هم نفس وضع اخته على جمال واناقه وشياكه وعطر واني انتبه أكثر الرجال ما يلبسون حلقه بيدهم بس رواد لابس حلقه فضه وتبرج وعليها اسم نيفين وحتى المحبس الي لابسه هم عليه أسمها وگلاده هم نفس شي أسمها مكتوب عليها بيها شلون الناب مال ذيب بس فضه واسمها بي

وگعدوا على الكراسي وكل واحد يسوي حليب وچاي لنفسه وعلى الرغم ما الثلاجة مليانه آكل أشكال وألوان بس كل شي ما أكلوا أني ظليت واكفه هم حالي حالهم بس أشرب حليب وبعدين بده الحديث رواد / شوفي آيسن أنتي وافقتي من هسه نتفق وگدام ربى وهي عليچ شهود اول شي ما گتيلي شلون طريقة الحمل تريدها بعملية لو زوج وزوجه

بگلبي گلت اجى وقتي گتله / إني محتاجه كل فلس ربي يشهد عليه محتاجه أجمع أطفالي جوه سگف اذا عند طريق عملية راح تنطيني بس 25 وذني ما يكفن ويجيبن بيت بس كزوج وزوجه المبلغ أكثر يعني يجيبلي خوش بيت لهذا آني أفضل الطريقه الثانيه

گال / فهمت شنو قصدچ بس من هسه اگلچ آني مآل أسوي الطريقه الثانيه هنا بالبيت چذب لان نيفين تغار عليه بشكل مو طبيعي لهذا بيوم الي نمارس حقوقنه الزوجية نطلع خارج البيت ومن تحبلين نگول سوينه الچ عمليه واياچ آيسن نيفين تعرف انه صار بينه شي والله وروح أخويه اذا عرفت نيفين ساعتها طز بالطفل إني أهم شي عندي نيفين فهمتي

بس هزيت راسي موافقه وهو گام يغسل ايده ويفرش اسنونه حتى تعجبت عليه وهو شنو اكل حتى ساعة يفرش اسنونه ويغسل أيده بس صدگ لو گالوا البيئه تحكم وهمه بيئتهم حكمتهم على النظافة بس سبحان النظافه مو نظافة الشكل النظافه نظافة النفس وبعدين رواد اخذ سويچ سيارته وطلع

گلت لربى / اگلچ اخوچ ليش هلگد مخلي اسم نيفين بكل استكسواراته شنو اسمها حصن لو حرز من السحر والعين

گالت / ما تعرفين رواد شلون يعشق نيفين تدرين يگول احب وأعشق نيفين آكثر من الله سبحانه تعالى

وهي اخذت سويچ سيارتها وطلعت بگلبي گلت هسه اشوفه الي يحبها أكثر من ربه شراح أسوي بيها انتي چنت مخليه بالي خطه الي اقلب بيها حياة رواد ونيفين بس من اغتصبت رودينا النار الي بگلبي ما يوگف عند حد گمت أفكر أقلب حياة ربى كذلك بس شلون ما اعرف ردت رواد ينفضح وينكسر بعرضه مثل ما صار بيه وباطفالي

بعدها أجى أبو رواد تريگ وطلع والمسعدات نايمات إني منتظره نيفين تگعد بس ماكو انتظر وحضرتها للظهر يله گعدت هي وام زوجها المصون وگاعده وراحت ام رواد جيب صمون والخاتونه نيفين گاعده يا سبحان الله على نفس الكرسي الي چان گاعد عليه رواد وتگلب بموبايلها والچاي على النار وهي كل شي گدامها محضر بس باقي الصمون اجيت تقربت على الچاي لگيته يفور وهو المطلوب شلته وبحجة دى
أريد اصب چاي سويت نفسي عثرت ونشمر اكثره عليها والله عاطت عيطه بس الله يعلم بيها

ومن شفتها تگمز وتحير وين تروح سويت نفسي أريد أساعدها ومن وجع روحها من الحرگ نزعت التراك مالتها طلع هواي من جسمها متأذي هواي وحتى اكو أماكن صاير بيها مثل النفاخات وبيها عبالك مثل المي وهي مدري سب بيه مدري تبچي يعني مزيج عجيب غريب ودخلت ام رواد شافتها وظلت دگ على وجهه

اني صرت حنين يا شيخ
اگللها/ خالة خطيه ما عدكم كريم مال حرگ

وهي تگللها/ عمه والله هي حرگتني ومتقصده

اني هنا نزلت دموع التماسيح واگللها/ وداعتچ عمه ولا وصلت يمها شسويتلچ حبيبتي ترى دى اساعدچ يعني الحق عليه غيري وحده تعوفچ انتي ضرتي ومع هذا وگفت وياچ وما عفنچ بس أني إلحق عليه بعد عيني ما ألي دخل بيچ

وهي ظلت فاكه حلگها على حيلتي وياها وظلت تعيط وتغلط عليه اني دموع التماسيح نزلتها گدام عمتي وعفتهن وصعدت لغرفة ربى بس شنو الفرحه مالتي والله ما سايعه صدري وافتر بغرفة ربى وأردد ويه نفسي ذوگي شي بسيط من الوجع هذا وجع جسدي بعد وجع الروح والله لا اشبعچ قهر لا أطلع الي صار برودينا عليچ هذا ولا شي من الي راح اسوي بيكم

بعدها ما گمت أسمع صوت الهن خليت راسي بنوم عميق ما گعدت غير على واحد يدفر بيه برجله دفرات مو قويه بس مجرد يريد يگعد شخص

آني أصلًا من اجيت ويه رواد همه فرشولي بالگاع بغرفة ربى وبقيت بهذا المكان لهذا من حسيت على دفرات رواد بس فتحت عيني
گالي / گومي بسرعه اسوفچ واگفه گدامي

اني هم وگفت بس شنو بتملل حتى استفزه وما خيب ظني
گال وهو يعظ بشفته ويحچي / شوفي لچ أنتي شنو البارحه اجيتي العصر وتريدين القصر ترى تحلمين الي يدوس على طرف لنيفين والله اخلي جوه قندرتي وادوس عليه فهمتي بعدچ متعرفين رواد منو شلون حارگه نيفين

گتله ونزلت دموع الكذب واشهگ هم
وگتله/ شنو احرگها قابل هي طفله شو اكبر مني لو مخلفه چان هسه بنتها بطولها يعني اني غلطانه من ساعدتها وما عفتها بدافع الشعور الإنساني

ظل مركز بنظره عليه وهو
يگلي / شوفي لچ هذا الفلم ما يعبر عليه شنو قابل نيفين چذب

گتله/ وداعتك رواد هي ضوج مني

گال / بداعتي شنو قابل داعتي راس بصل وتحلفين بيها واني اعرف انتي چذابه وبس فتره والله لااذبچ بالشارع

وعافني وراح خطيه هذا المسكين بعده ما شايف شي وظلت نيفين متهستره لكون محروگه ويومية يجيبون يمنه وحده ممرضة تجي ضمدها بالبدايه تغسله للمكان بماده مثل تخلي يفور وبعدين بقطن وتعقيم وتمسحه بس شنو ظل تعيط وتستريح واني والله استلذ بوجعها وبعدين شسوي تخبط عصارتين وتخلي على حرگ وتلفه بشاش وتنطيها مسكنات وتروح وهذا الحال أستمر ما يقارب اسبوعين واني بهاي الأسبوعين بلغتها أنه زوجها يريد يتقرب مني وهي تخبلت وكل ما يدخل رواد لغرفته ويطلع منها هي صوتها ويا لسابع جار يوصل واني من أسمع مشاكلهم أفرح فرحه مو طبيعية اتمنالهم نار جهنم التحرگهم هنا رواد بعد هاي الأسبوعين

بالليل اتصل رواد على ربى آنه إنزل جوه يريد يحچي ويايه
واني هم نزلت لگيته گاعد بالصالة ويجر بنرگيله من شافني دخلت للصاله اشرلي اگعد گباله
واني هم ما گلت لا گعدت گال / أيسن شوفي وجودچ هنا يوتر نيفين لهذا راح نفذ اتفاقنه وبعدها انطيچ الفلوس وروحي الله ومحمد وعلي وياچ اني ما مستعد أخسر نيفين على مود طفل طز بالطفل الي ياخذ نيفين مني لهذاباچر نروح لآي فندق ونزوج ونرجع لان هنا أعتبرها خيانه لنيفين وآني اموت وما اخون نيفين بس مجبور

اني رديت عليه بتصنع الطاعه وگتله/ تآمر واني باچر أحضر روحي من الصبح

گال/ شبيچ يمعوده شكو من الصبح ولا ما صدگتي شنو أسمك رجل ياهواي وترد عني وحشة الليل للعصر وترى هي حسبة ساعه ونرجع شنو بعد محضره روحچ شنو قابل وراچ زفه

كتله بصوت بي خضوع / بكيفك
وعفته وصعدت واني اظاهرله بالخضوع دى اتمسكن لما اتمكن ومن أتمكن عليكم والله لا أمسح بخيركم الگاع من دخلت لغرفة ربى وهي نايمه مرات انقهر عليها ومرات اگول أخوها السبب لهذا من ناحية ربى متردده بس من أذكر بنتي شنو صار بيها اگول رودينا هم عزيزه مثل مابنتهم عزيزه عدهم والله الا ينفضحون مثل ما فضحني أبنهم

ذاك الليل ما نمت وقريب الصبح يله نمت أريد أوصل لموضوع لنيفين ومن گعدت الصبح ماكو كلهم رايحين عدهم دوام
بس عمتي ماكو لهذا كهنت لو بغرفة نيفين لو رايحه للسوگ لو للممرضة الي ساكنه ويانه بنفس الفرع

اني رحت وگفت قريب على الباب مال غرفتها ما سمعت صوت عرفت هي وحدها لهذا بدون أستأذن دخلت وهي چانت مطلعه أماكن الحرگ
شافتني وبسرعة البرق جرت فرشه يمها وغطت نفسها وحچت بنتر
وگالت / شعندچ داخله لغرفتي

گتلها/ اريد اگلچ اليوم ليش ما تروحين لهلچ لما اليوم نزوج اني ورواد بغرفتچ هنا أحسن ما نروح لفندق

وهي تخبلت على أنتي گح... لو بيچ خير لمي جهالچ

باوعت عليها وهي مفرفحه من سمعت هذا الشي وشلون زوجها يتفق من وراها
گتلها / اي وربچ راح الم جهالي بعد ما اطشركم يله اروح منا
ودخلت عمتي وياها الممرضه ونيفين تخبلت ما قبلت حتى تتعالج على المن اتعالج وابنچ يريد بحضنه وحده ثانيه اي مو نيفين احترگت

وطلعت الممرضة وهي نفس خبالها وعمتي إتصلت برواد وهو گاللها وره الدوام يتفاهم ويايها

وبالفعل حدود الساعه 3 العصر أجى رواد وبلشت الحفلة بغرفة رواد طلع على اثرها رواد و بسرعه دخلت بالفراش دخل

وهو دخل يصيح على اني مو اكلت خ....وگلت ما اريدها تعرف بس اني ظليت مغطيه راسي عافني وراح رجع لغرفته بعده لصياح واصل عبرالقارات بعدين هدأوا شنو الي صار ما اعرف
چنت احوس أريد اعرف ليش سكتوا

وحمد لله ما انتظرت هوايه لان اجتي ربى صاحت عليه وتگلي تعالي رواد يريدچ بغرفته اني هم لبست ثوب الحمل الوديع ورحت اول ما شافني گام يرزل بيه گدامها
اخير شي گال / اسمعي نيفين شنو شروطها ولا تجادليها وتنفذين كل حچيها فهمتي

وهو واگف منتچي على الكنتور يسمع الخاتونه شراح تگول ويباوع لحلگها والله

آخر شي نطقتها للجوهره وچان تگول / شوف رواد أني قبلت بيها والله بس لعيونك حبيبي حتى يصير عندك طفل بس أكثر من هيچ لا تضغط عليه

وهو هم اجى يبوس براسها وبگصتها وشلون يراضي بيها گلت والله لو غيره واحده مرته ما تخلف چان هسه بالقندره يعاملها مو يبوس بيها

بس شنو ساحلته سحل وراها مرات اگول مو معقوله اكيد هاي ساحرتله بس أريد أشوف شگد اخذ منچ لان ما شاء الله كله يگللها اي ما يعارضها أبد

اما هي گالت/ شوف رواد تدخل عليها بعشر دقايق بس وتطلع هذا شي الشي الثاني هي حزينه على زوجها تبقى حزينه يعني لا تعدل ولأ تنظف
وها قبل ما تروح يمها لازم تآكل ثوم يله تروح

هنا ردت اعيط بيها بس هو حچى قبلي
وگاللها/ حبيبتي شنو القصه گليلي أستشهد أفضل شنو هذا لعبان النفس خليها عملية تلقيح ولا هذا الي تگولي يصير شنو اني حيوان

وبعد مماطلات بالحچي بينهم وافقت اشيل فقرة الثوم واتفقنه على نفس الليله يتم الاتفاق بقت شغله آنه بآي غرفة ننجمع وكان الاتفاق على غرفة ربى وبنفس فراشي إلي بالگاع ألي أنام بي

ومن سمعت ربى بالبدايه اعترضت بس بعدين قبلت وگالت / يوم الجمعه يجون عليه خطابه وهو زميل يحبها وياها بنفس القسم

وبالفعل بذيچ الليله بعد ما هدئ نيفين رواد وهو يتوسل بيها انه ما راح يغيب عنها غير عشر دقائق

إجى دخل يمي بالغرفه وهو يگلي / يله بسرعه ما أريد نيفين تنقهر

ظليت متعجبه على عشقه الها بعدها طلب اغرب طلب وهو انه كل شي ما أنزع من ملابسي بس الداخلي وهو يگلي / اني محرم على عيوني النظر الى جسم اي بنيه غير حبيبتي نيفين اني ملك الها وحدها

وسويت مثل ما گال وحتى الضوه طفى هم والله يمكن عشر دقايق هوايه لان بسرعه كمل وحتى بدون ما يفتح الضوه راح

بوسط ذهول عجيب غريب من تصرفاته وبعدها الأيام هم نفس الوضع يتكرر واجى يوم الجمعه ومن الصبح راحت ربى للصالون ويه بنات خالتها والخاتونه نيفين نايمه بغرفتها تستحي تطلع منها لكون محروگه وبس اني وعمتي بالمطبخ والغريب مو هنا الغريب الأغرب من الخيال يشيعون آنه نيفين حامل واني وحده تطلب المساعدة مقابل فلوس ماكو واحد جاب طاري انه آني زوجة رواد

من راحن للصالون ربى نست موبايلها اجيت لزمته بيدي وعرفت شلون راح افضحهم وانتقم منهم عن طريق ربى

يتبع
ملاحظه الى كل متابعيني الاعزاء الي احبهم ويحبوني وينورون صفحتي بتعليقاتهم الحلوه تحية لكم من القلب الى القلب

اختاريت هذا التعليق لان دعتلي واريد بعد تدعيلي وكل واحد يتابعني يدعيلي دعوة مسلم بظهر مسلم مستجابه ادعولي الله يفرجها عني

دمتم في أمان الله وحفظه
اختكم الزهيريه الزهيريه
تصويتكم يسعدني