أخي الغيور

﮼البارت،الثاني،ج٢

#أخي_الغيور
#للكاتبة_مهرة

ملاحظة: بنات اكتبولي شنو التغير الي ديصير بالشخصيات وهم تغيرت نظرتكم لبعض الشخصيات
انتظر تليقاتكم بعد القراءه

حلو ملگاك
بي ريحة درب بستان
توهه الدنيا مطرت بي

وأثناء ما هديل دتحچي لامها صاحني عزام من الطرم تركتهن وطلعت چان منطيني ظهره و وجهه ع الحديقة طبعا عزام المكان الي بي عمه رجاء او سمر ابد ميدخله من يوم المشكلة الي صارت 
هزار : حبيبي صحتني
لتفت عليه
: اي حبيبي ، منو يمكم بالمطبخ ؟
: ماكو بس اني و هديل و خاله ام شهم
: عجل خل ادحگ خالتي شگضت من الطبخ ، الزلم لتمت
: تعال حبيبي محد اكو وتقريبا خلصنه طبخ

: حچه ويا خالته و گللها شگد عدد الزلم حتى تحسب حسابها من تصب الاكل
لتفت عليه انطاني تليفونه
: حبيبي تليفوني گاضي شحنو خلي ع الشاحنه
: اخذته منه و رحت للغرفه داخلي ع الشحن لگيت سمر گاعده صافنه و بس الدموع تصب و شهگتها تكسر الگلب بصراحة متحملت اشوفها هشكل تقربت وگعدت مقابيلها وسألتها

: شبيچ سمر شصاير وياچ
اول شي بقت تباوع عليه و دموعها موگفن حسيتها حايره متردده تحچي الي بيها ، اخذت نفس و مسحت عيونها و گالت

: هزار تعبت وحق الله تعبت انه غلطت ما ناكره هل شي وعيت على الدنيا و اسمع سمر لعزام و عزام لسمر گرابتنا كلها تدري بهل شي ،وكل جمعه و يسئلني يمته تتزوجين وشمنتضرين والي بعمرچ خلفن وانتي مگابلتو لولد عمچ و ماماخذج ، سويت السويتو بطيش و ندمت بكثر شعر راسي والله ، والله يغفر بس البشر لا تنسي و لا تغفر ملامت الناس و مرض ابويه وانه ادحگو بكرسي عاجز انه سهله عليه ادحك ابويه عاجز وانه السبب بالي صارلو يول والله ليلي ما انامو من يوم مرض ابويه لليوم ، و بين كل هل الم و القهر اجاني حسام نتشلني من هذا كلو ساندني و واساني و ساعدني بعلاج ابويه ، حبيتو و تربع بگلبيو راد يحچي ويا جدي بس انه گتلو ، الا يمشي ابويه على رجلو ، بس عمتي ام شهم من سمعت بالي بيني و بين حسام تخبلت و گالتو ما اخليك تاخذها لو يصبونها الك ذهب حاول وياها ، و ما گدر يقنعها وهسع جايني يگلي راح يروح يگعد ابغداد تيكمل دراستو وانه ادري بي صار يتهرب مني

هزار : ليش تشوفي تهرب هو غير گلچ يريد يكمل دراسه
: يول انه حسام صرت اعرفو من عيونو بس ادحگ بيها ، حسام ما يطلع عن شور امو والدراسه حجه تيبعد عني

: بلكي ويا الوقت تهدأ النفوس . هذه امه ترا ، تبقى تريدله السعادة و الراحة لو مهما يكون وهي اذا تعرف هو يحبچ من كل گلبه و متمسك بيچ و سعادته يمج اكيد راح توافق بالنهاية

: تعبت هزار حسام ما أگدر بدونو مو بس حبيتو هو صار الشي الوحيد اليقويني و يخليني اصبر على عيشتي ويا اخوتي ، اوووف يول شحچي وانه الهم عشعش بگلبي

بهل أثناء دخلت علينه هند من شافتنا خزرتنا ، و وجهت كلامها لسمر
: گاعد تتسامرين ويا هاي الدمرت حياتچ واخذت منچ خطيبچ
اني گمت بس ستوقفني كلام سمر حچت بعصبيه وقهر

: والله ما دمر حياتي غيرچ انتي يا بنت امي وابويه انتي الورطتيني وخليتني انفذ خططج ، كل ضني تردين مصلحتي ما چنت ادري كل هذه حقد و كره لعزام تاخذين ثارچ منو
هند وهي تتهدد على سمر

هند : يول لا تگومين تلوصين لا اجي افين حضچ

:هه عاد شلون حض هو وانتي تردين تفينينو

اني بعد تركتهن وطلعت مالي خلگ هند وحقدها

أذن لصلاة الظهر صلينا وبعدها صبينا الاكل و الولد نقلو ، النسوان همات صبينالها ، خلص الغده واجه بكر اخذ الچاي ،
وبلشنه غسل مواعين اني وهديل وسمر ويانه تنظف بالارضية
ولدنا مياكلون ويا الخطار بعد ما يغدون الخطار يله هما ياكلون
دخل علينا وليد
: يول مصاريني تتكاون منلجوع
هديل : صيح الولد تنصبلكم الغده
: عجل صبو و مدولنه سفره بالصاله هين لبين ما اصيحهم

مدينا السفره بالصاله ونقلنا الاكل و دخلو الولد گعدو دياكلون اخذت سراحيت المي انطيتها لوليد و دارجع عزام رفع راسه من الاكل گال
: تغديتي ؟!
: لا هسه نتغده اني وهديل
: عليش تاكلن وحدچن تعالن ويانه ماكو غريب سوالي سيف گاعد بصف عزام سوولي مجال بيناتهم
ليث صاح على هديل
: ام اسد حدري هين
فاتت هديل من اخوها شهم سحبها من ايدها وگعدها يمه
وگال مصدگ انت انه موجود وخليها تگعد يمك
ليث : يول لا تخليني أگوم اغرد تعرف اول وتالي مكانها وين ويئشر على صدره ( يقصد مكانها بحضني )
هديل خزرت ليث و دنگت ، تدوروها متلگوها من الخجل
شهم : غرد وشوف شلون افين حضك
هما يناكرون واحنا نضحك عليهم
سمر چان واگفه تسمع وابتسامة مكسوره رتسمت على وجهه
ستخطيتها بوقتها لان الموقف چان صعب اني وهديل ازواجنا و اخونا حايرين وين يگعدونه وهي بقت واگفه
اتدارك الموقف وليد و صاحها
: حدري هين يول عليش واگفه
هي ضلت واگفه وخجلانه گالها
يول حدري اعبرني اخوج اختچ بكيفچ ها بس لا تاكلين چثير
هو سواها بطريقه تموت ضحك كُلنه ضحكنه حتى
عزام مدنگ و بس چتافه تهتز من الضحك ليث گله
: يول انت حتى من تسولك شغله بيها حض ما تكملها إلا تچفص
حسام مقابلي صاير ، نتبهتله بس هو ما ضحك واحسه ديغلي من الغيره ، عثمان هم بين ماراضي بس ميگدر يحچي لان يعرف شهم اكثر من مره يوگف بوجه من يسمع ماذيها لسمر

خلصنا أكلنا بعدها وديان زوجة شهم صبت چاي للولد عزام خلص چايه و همسلي تجين وياي تنشوف الشارد ؟
گُتله بس خل البس ردائي واجي
: الفلح ما موجودين لاتلبسين
طلعنا اني ويا من الباب الورا تلاگت ويانا هند و زوجة عثمان سلمت على عزام
: شلونك عزام كل عام وانت بخير
جاوبها ببرود
: هلا ، وانتي بخير
باوعتلي بنظرة استهزاء وگالتله
: والله زحمه اسميك بسماك هسع لو مخلف چان سميناك ابو فلان
اني هنا احس نار وشتعلت بصدري من كلامها بس جاوب عزام ألها صفني ردت افهم شيقصد من گاللها

: هذا رزق ربچ يابنت عمي الله ما قاسملنه مثلچ ازوجتي وبعد ٧ اشهر خلفتي ولد سبيعي وهو بصحة و سلامه حتى خدچ ما احتاجيتو

اشو هاي ضلت تبلعم وتركتنا ودخلت جوه بقت اباوع لاثرها گُتله
: هاي شبيها نخطف لونها هو انت شگتلها
لتفت عليه
: ول حبيبي انتي ضلي مطفيه
: اييي يا عزام شنو مطفيه غير تفهمني !!
: اخذ ايدي ومشا گال امشي حبيبتي من تكبرين تفهمين ههه
: ياااا شنو هاي شبيك شنو اكبر قابل اني صغيره
لتفت عليه باوع داير ميدور ودنگ سكتني بطريقه المعتاده ههه نساني حتى على شنو چنت اسأله

للعصر رجعنا للبيت صعدنه لغرفتنا هو دخل للحمام سبح وبعدها لبس ملابسة وطلع يعايد اصدقائه اني گلت خل اخذي غفوة شويه لان احسن نفسي دايخه من النعاس

ندگ الباب فتحته سيف بس من وجهه مبين ضايچ
:ها سيوفي صاير شي اشو مبين ضايچ
: هزار هم اتصلتي على بيت خالچ
: اي الصبح عايدتهم
: هم حچيتي ويا سما
: اي ليش شكو قلقتني
: عجل عليش من اتصل عليها ما تجاوب
: اخاف مشغوله او يمهم خطار انت يمته اتصلت عليها
: هسع اتصل و ماتجاوب
: أگول سيوفي اخاف مزعلها ؟!!
: لا يول والله حتى البارحة ما خابرتها رجعت تعبان وغفيت بدون ما ادري
: اي لعد هاي هيه البارحة ممتصل واليوم اكيد بعدك ممعايدها وهاي المخبله تلگيها زعلانه
حچه بنفاذ صبر
: وهسع شلون
: خل اتصل بيها اني
اتصلت شويه وجاوبت بنتر

سما: خير شكو اخوج گلج تتصلين مو
هزار: لج على كيفچ هاي شبيچ تنترين
سما : هزار تره مالي خلگ گولي شتردين

سيف
اخذت التليفون من هزار وطلعت خليت السمعه على اذني وهي معصبه وتتكاون كل ضنها هزار بعدها وياها ع الخط
گتلها
: ول حبيبي يسماي وكوني ليش معصبه ؟!
هي سكتت ما جاوبت
ول حبيبي مشتاگ من امس ما سامع صوتچ
حچت بعصبيه
: اي لعد متگول لنفسك من البارحة لليوم اتصال متصلت حتى ما عايدتني
: وعيونچ الأعشگن البارحة غفيت بدون ما احسن من التعب
واليوم مصارلي مجالي خطار و ناس غربه وهسع رجعنا للبيت
: اي حقك مشغول و ناسيني
: ول حبيبي شلون ناسيچ ، بس انه حضي اغبر عجل عمچ ممفكرلو بمره گبل ويوم فكر ؛ عجبتو مهرة !!
لو ما هو چان هسع انتي يمي وبحضني بس شگول

سما : وشنو الحل يا سيف جدي قافل واخذها مسئلت كرمه شلون ينطوني وهما من اجوكم على مهرة رديتوهم
: يول هو منهو الردهم !! غير هي و اخوها ماقبلو عجل نجبرها ؟!!
: والحل ؟!!
: جدي تكفل بالموضوع هسع وان شاء الله خير

بهل اثناء ندگ الباب ومدت راسها هزار گالت
ها المخبله رضت هههه
وهاي سمعتها وتصيح
: لج حيوانه منو الخبله بسيطه هزار تتلاگه الوجوه
سيف : ههههه يول عليش تخلينها تعصب
هزار : هههه معليگ بيها اتركها ونزل ليث يگول اجوي جماعتكم اهل المحلات

: ماشي حبيبتي هسع انزل وراچ

هزار نزلت جوه لگيت هديل بالمطبخ شايله ابنها يبچي وتسوي چاي
هدوله روحي سكتي اسود واني احضر الضيافة
: اي فدوه هذا من يگعد من النوم يگعد متنحس مدري شبي
: اگول هديل لعد خاله وين ؟!
: خالتي نزلناها يم خالتي ام مثنى بالليل يجيبوها الولد

خلصنه العصريه بين الخطار وبين الضوجه مال العيد اني بأيام العيد عكس الناس تجيني ضوجه الناس فرحانه بالعيد واني عكسهم هههه

بالليل واگفين دنسوي عشا وليد دخل راجع من بره گال
: هذا المصرگع يمته يرجع
: هههه خوش لقب ما اعرف والله اسأل بابا وبعدين هما اليوم راحو وشوف الله اعلم ماما شگد ناويه تضل هناك ! بس اعتقد متطول مثل كل مره لان عدها دوام

: عجل خل اخابرو و أسالو
طبعا حيدر و وليد صارو ميتفاركون ، لان حيدر من اجه هنايه ما يعرف احد فوليد صار وين ميطلع ياخذ حيدر وهيچ صارو ميفاركون رغم وليد اكبر من حيدر وبيئاتهم مختلفه بس مقالبهم هي الي قربتهم احسهم كُلش متقاربه شخصياتهم

خلصنا عشا وكل واحد راح لغرفته لان الكل تعبان
اني اخذتلي دوش وطلعت وگفت امشط بشعري و اخذتني الصفنه لسمر كلامها ضل بفكري كُلش نقهرت عليها
فزيت من صفنتي من حضني عزام

بشنو صافن الحلو
لتقت عيونه بالمراية گُتله ماكو شي حبيبي، نداريت عليهوحضنته
حبيبي يله خل أنام لان ميته نعاس
رفع حاجبه وگلي
: اممم يعني قصدچ انام عقال
: اي حبيبي هسه مثل الشاطر انطيني ايدك وانام بحضنك وتصير عاقل لان تعبانه
: هههه تعالي حبيبي گلي الچ مو بس ايدي وحضني

نمت بحضنه بس بالي مو يمه تذكرت كلام
ماما
:دائما تحذرني انو المره متحچي يم زوجها بمره ثانيه ولا توصفله شكل مره وخاصتا اذا حلوه ههه ، محذرتني ما اذكر صديقاتي يم عزام ولا احچي بي يم صديقاتي ، تگول لان هواي عوائل تفككت و نهدمت بسب هذا الموضوع فما بالك موضوع سمر و كلامها ، اني عزام عندي اغلا من روحي ممستعده افرط بي ولا اخلي احد يشاركني بي ، دفنت راسي بصده وحضنته
هو قربني عليه اكثر وطبع بوسه على شعري وگال

: لا تفكرين بشي حبيبي نامي ورتاحي ...

خلصنا ايام العيد بين بيتنا وبيت عمو رشيد لان خطار هوايه يجون على جدو وخاله ام شهم چانت وحدها زوجة شهم راحت لأهلها فنروح اني وهديل نساعدها
بس رابع يوم طلعني عزام وشلون طلعه فرني بالسيارة و رجعني لان بصراحة من اطلع ويا منرتاح ، عزام معروف وكل شويه واحد مسلم عليه وبيهم الي يوگف ويا شويه ياخذله كم سالفه لهذا صرنه نفتر بالسيارة نجيب ويانه اكل من المطعم مرات اذا شتهينه فد اكله ونرجع للبيت

ويا موصلنا للبيت وليد وصل بسيارته ، عفتهم يدخلون سياراتهم واني دخلت لگيت هديل دتحضر العشا
هلو هديل
:هلا حبيبتي
ها تونستي لا
: مثل كل مره فره بالسيارة ونرجع ههه
: يله احسن من الماكو ههه
: هسه اغير ملابسي وانزل اساعدچ 
: على راحتچ ماعدنا شي يول
صعدت بدلت وصليت المغرب ونزلت عزام عفته بالحمام ديسبح

نزلت وگفت ويا هديل ع الطباخ لتفتت عليه وگالت
: حسام باچر يروح لبغداد امي خابرتني تبچي
: ليش تبچي قابل هو زغير وتخاف عليه
: لا يول حسام گالهم ما انزل بالعطل ويجوز استقر هناك وامي متخبله  تگول كله من سمر راح يهج من الديره
: لا هديل هي شعليها بدراسته اصلا هي تبچي عليه و تگول حيتركني وصار يتهرب مني
: يول والله خايفه على امي لا يصير بيها شي من وره حسام
: لا ان شاء الله ميصير شي لتخافين وتوهوسين
: ان شاء الله

گاعدين دنتعشا ونتبهت لبابا اكل لگمتين وگام
: الحمد لله ، هزار بابا من تخلصين سويلي چاي وجيبي انه راح أگعد بالحديقة

عزام همسلي
: حبيبي شبي ابويه اهاجسو ضايج
: والله حبيبي ما اعرف حتى ما أكل شي انتبهتله

: خلصي و احچي ويا دحگي شبي ادري بي مايضم عليچ
: ماشي حبيبي

خلصت وسويت الچاي
دزيت رسالة لماما
: زنوبه مروان كُلش ضايج شمسويتله ؟!
اخذت لبابا وهديل صبت للولد طلعت للحديقه انطيت لبابا الچاي و گعدت يمه

: شنو بابا ضايج من شي
: ول يابه امج حيرتني ما اعرف شلون اتصرف وياها خابرتها العصر تشوف يمته تچي تگولي عوفي ارتاح مروان ارجع ويا احمد
: بابا هي عدها دوام تره متطول مثل كل مره
: اعرف بابا بس احنه نضل هيچ كل ما تروح تطول يله ترد
: زين هي هسه وين يم بيت خالو
: لا يابه بالبيت مالتنه منظفتو بس واصله وگاعده بي
: زين خالو يمته يرجع
: گاصيه اجازتو بس يخابرونو يجي بس امچ شلون تضل هيچ
: بابا انت تعرف كلش زين ماما دتتأذه هنا وهي تشوفك بعينها مره ثانيه مشاركتها بيك ، تعرف قبل من تجي هنا واشوفها بالليل گاعده وتبچي اگول ماما هواية تبالغ على شنو هل بچي بس بابا والله صعب لان هسه يله حسيت بشعور ماما واني مو نفس وضعها لا بس مجرد الفكرة تدمرني ، وهسه صار الوضع اصعب انت صرت يوم هنا ويوم يمها

: بابا انه كبرت بعد مابيه اروح لبغداد و ارجع هين الطريق طويل هي لازم تقدر هذا الشي ، انه القاهرني هسع اهجسها تغيرت وياي امچ مو مثل قبل صارت ما تگلي شنو المضوجها ولا تعترض على جيتي هين ، بس انه اعرفها من عيونها شبيها ، هاي صارت تكتم بگلبها وانه خايف عليها حتى من تطول بغداد ما اعترض بس انه ما اگدر بدونها

بهل أثناءاجت  رساله لبابا ع النليفون فتحه وابتسم

#أخي_الغيور
#للكاتبة_مهرة
هلو حبيباتي شلونك ان شاء الله الكل بخير
طبعًا قبل ميخلص الاسبوع نزلت واتمنى ما اقصر وياكم ، يمته ميخلص البارت بايدي انزله
🥀دمتم في أمان الله و حفظه 🥀