تفرقنا ورى الكلية … اني رحت بمكان و غيري راحو بمكان ثاني … تطشرنا و جانت علاقتنا بالبداية عن طريق التلفون الارضي و بين فترة و فترة نسأل واحد عالثاني .. لحد ما شوية شوية انقطعت الاتصالات بيناتنا و كمنا نتشاوف لو بدائرة حكومية صدفه لو بسوك لو بشارع لو بأزدحام بأشارة مرورية …
جنت بهل السنين افكر … اكول مثلا فلانة ام ريحة الطيبة و الشعر الحلو و القوام الاسطوري الي جانت الكلية كلها توكف على رجلها من تفوت شصار منها اكيد تزوجت واحد طاك لو واحد بالحكومة لو مسافرة بالخارج …
لو مثلا فلان الي جانت احلامه اكبر من الكليه و اكبر من الناس و اكبر من الدنيا كلها شصار بي … و فلان الي جان ناوي يسافر وين صفى بي الدهر … و فلانه الي حبيتها و ما قبلت بيا من رحت صارحتها شصار منها … لو مريم و احمد اشهر قصة حب بالكلية شصار منهم اكيد تزوجو و عايشين اسعد من السعادة نفسها … زين حسن الي جان يحجي هواي بالانتحار و دائما يبجي كبالنه و يكول حياتي منتهية و يشكي من ابوه الي جان معيشه بجحيم مثل ميكول شصار منه بس لا انتحر المسكين … و افترت الدنيا و عرفت اخبارهم عن طريق كروب سوينا للكلية بنفس العام الي جنا نداوم بي … اول شخص حجيت وياه فلانة الحلوة .. فلانة الحلوة (بدون ذكر اسماء) … فلانة جانت من تجي للكلية .. البنات يضوجون منها و عدها بس صديقات ثنين … صديقاتها شلون الوصيفات بمسابقات ملكات الجمال .. يمشون وياها لو تملق لو همه هيج وصيفات من صدك .. دائما هي تتوسطهم بالكلية .. بالكعدة بالكافتريا و بالكعدة برى عالمسطبات و حتى بالمشي هم تتوسطهم … خطية هواي شباب جانو يتمنون ياخذون منها كلمة .. بس جانت متقبل تحجي وياهم و على اساس هي تحب واحد اصلا مو طالب كلية و ابن تاجر .. جانت ماشية عليها هالسالفة … او هي مطلعة هالدعاية حتى تخلص من سالفة (المصارحة) … و مجان صعب عليها تنشر هالدعاية لان عدها وصيفات ثنين … عالعموم .. هي دخلتلي عالخاص ..
جانت مخلية صورة وردة و عالوردة فراشة … و مسميه نفسها اسم بعيد كل البعد عن اسمها الحقيقي … زهرة التوليب .. وبالمناسبة اذا احد يسوي بحث على هالاسم راح يطلع نص بنات الوطن العربي تواليب .. كتبتلي انته مو فلان الي جنت تمشي وي فلان و فلانه … كلتلها اي … كالت عرفتني .. كلتلها منين اعرفج يرحم امج .. اذا مخلية صورة وردة و عليها فراشة هي وحده من الاثنين لو انتي الوردة لو الفراشة .. و اسمج زهرة التوليب .. بحياتي و ما اتذكر جان عندي وحده بقسمي اسمها زهرة .. كالت لا لا هذا اسم مستعار اني فلانة .. من كالت اني فلانة طبعا جنت متمدد و اكتب وياها بالتلفون .. كبل كمزت كعدت … و حتى ظهري طك .. عندي الفقرات لاعبة بيا طوبة .. العمر راح و صرنا سكراب … المهم .. عدلت كعدتي و كلتلها مستحيل … كالت اي ولله … كلتلها حقج متخلين صورتج تخافين من الحسد .. كالت لا وين … جان تدزلي صورتها … وجهها مو ذاك الي جان يلمع … وجهها تعبان و الدمعة بطارف عينها … و طبعا الصورة اخذتها بنفس الوقت الي داحجي وياها … الحايط الي وراها الصبغ مالته مكشط .. و مبين البيت او المكان الي عايشه بي تعبان … كلتلها بس بعدج معانيج حلوة .. كالت تدري شكد ارتاحيت هسه من شفتك و داشوف طلاب من قسمنا بذاك الوكت .. اني تعبانة و شايفة الظيم … كلتلها شكووو … كالت والله يوميا بدائرة الرعاية اركض عالراتب .. اني هسه منفصلة و عندي ابني ضرير … و مدخلته مدرسة مختصة و الراتب ميكفي .. و جنت اشتغل بمركز مال تجميل و بطلوني .. و هسه دادور شغل .. فدوة اذا لكيتلي شغلة منا منا حتى لو تنظيف اني قابلة .. كلتلها وشهادتج وين .. كالت مو اني بذاك الوقت متوظفت و هسه ماكو توظيف شسوي قابل ابقى كاعدة و بركبتي هالطفل … و اني اصلا كاعدة ببيت اهلي و اهلي وضعهم هم تخربط بسبب مرض امي و ابوية باع الوراه و الكدامه و هم مفاد راحت فلوسنه و راحت امي عمت عيني عليها … طبعا لزمتني العبرة و معرفت شجاوبها و بنفس الوقت اجاني اشعار ثاني من انمار … انمار جان عنده احلام و افكار و اهداف كلها مرقن قيدها (على كولته) لحد ما يتخرج … رأسا جاوبته .. و ترخصت من البنية و رحت جاوبته و كلتلها راح تبقين على بالي و تبشري خير هالفترة اشوفلج شغل … بقت تدعيلي و رحت .. كلتله هااااا … طبعا حسابه بأسمه بس مو الكامل …
اني بذاك الوكت ما جنت اعرف عشيرته .. جنت اعرف اسمه و اسم ابوه بس .. لذلك من جنت ادور ما الكاه … و حسابة مسمي بأسمه الاول انمار … و الاسم الثاني عشيرته .. كلتله هااا و كالي ادك عليك .. كلتله دك .. اتصل كامرة عليا … جان كاعد بمحل اسواق … بصفه ابنه كاعد و كاله ابني روح سوي فلان شغلة … و بقى يسولف وياي … و ورى شوية صاح ابنه كاله تعال اريد اطلع … و كل هالحجي فاتح كامرة وياي … كلتله احجيلي توظفت … كال اي الحمدلله … و اجه ابنه وخر شغلات بالمحل و اجه يدفع ابوه … من شفت ابنه وراه عرفت انمار مقعد على عربانه … استحيت اسأله ما ادري انقهرت … بس كلت خلي اسأله .. طبعا هو بيته بصف المحل مالته … بس هو راد يكعد برى يحجي وياي و ابنه رجع الغراض لمكانهم لان طلع المكان مال المحل ضيق و علمود هالشي اجه ابنه وخر الغراض المعروضة حتى يسوي مكان يطلع العربانه … كال خوية اني قبل كم سنة ردت اموت و صار عندي اصابة بالحبل الشوكي بسبب انفجار بسوق شعبي … جنت راجع من الدوام و داتسوك للبيت و صار انفجار … استشهدو بي ثنين و عشرين عراقي منهم نساء و اطفال و رجال و جرحى كومة و اني جنت من ضمن الجرحى … طبعا لزمتني العبرة و عرفت كل احلامه تكسرت … هالولد انمار … جانت احلامه تمشي كباله … تمشي وياه … قبل ميحجي تحجي احلامه … حتى الدفاتر مالته جان يكتب بيها شغلات عن الاحلام الي عنده … جان يتوقع راح يصير شي جبير بعد التخرج … و راح يخترع شي (بأختصاصنه) يختصر هواي امور … و بقيت اسولف وياه و جان كل حجيه عن ولده و بناته الي كلهم طلاب بس عنده واحد من ولده متعبه لان يدور مشاكل … و اني هم حجيتله عن وضعي و عن جهالي و مرتي و سلمت عليه و رحت … رحت و بقيت ادور بالاعجابات الي على صور الكلية و لكيت اسم الولد الي جان يحجي بس بالانتحار … و جان يشكي من ابوه .. ضفته و اتصلت عليه … عرفني … و طلع متغير و صاير احوال … كلتله تدري اني عبالي انته انتحرت …. كال لك يا انتحرت … اني موجود … كلتله وين .. كال داشتغل بعيد عن الشهادة … كلتله شنو … كال بالسيارات و البيع و الشراء … و طلع وضعه صاير كلش كلش زين …
كلتله و ابوك وينه .. كال ابوية مات الله يرحمه و يسامحه … كلتله و تزوجت ؟ كال اي ٣ … اني عبالي ما سمعت الكلمة زين كلتله شنو شكلت … جان يكول تلاثة تلاثة اتزوجت تلاثة .. كلتله والله تحجي صدك … كال اي والله … كلتله وعلى ذمتك تلاثتهم …. كال لا بس وحده هسه .. ثنين طلكتهم … كلتله و شصار عندك جهال … كال تريد الصدك … سبب طلاقاتي هالسالفة …. و بعد ما اطلق ابد … كلتله شلون … كال الاولى غريبة … تزوجتها و تأخر موضوع الاطفال و من رحنا فحصنا طلع الصوج مني … و راحت كالت لاهلها و طبعا هي الي رادت تنفصل و انفصلنا … و الثانية كلتلها من البداية ميصير عندي جهال و قبلت … بس يوم ورى يوم كمت احسها عبالك داخله وياي على موضوع بيع و شراء … يعني مرات تصفن كبال التلفزيون على موضوع يحجي عن الاطفال … و فجاة تكول اريد نروح لتركيا … طلبات طلبات طلبات … هم اخر شي اني رحت بكل برود كلتلها اكلج انتي تستاهلين يصير عندج جهال و اعرف بالبداية قبلتي لان ما جنتي عايشة الحالة و من عشتيها حسيتي … كالت لا والله انته شدتحجي بس هالشي اني عرفته مية بالمية … و انفصلنا … و اخر وحدة الي هسه على ذمتي هاي الي مراح انفصل عنها ابد … و لا هي تنفصل عني لنفس السبب … لان هي كرايبي من بعيد اولا .. و ثانيا هم جانت متزوجة و طلكها رجلها لان متخلف و راح تزوج غيرها و الله رزقه بذرية … كلتله زين انته مراجعت شي … كال حتى سفر سافرت و مترهملي اي عملية و اغلب الدكاترة الي بالخارج كالولي اذا دكتور يكلك انته تخلف او تصيرلك جاره معناها يريد يسحب منك فلوس و يستغلك … كلتله خوية ماعرف شكلك بس الله يحفظك و يرزقك .. و طبعا حجيتله على اخبار فلانه و على انمار .. انقهر على انمار و على فلانه و ضافها و كال راح ادبرلها شغل بأسرع وقت … و سلمت عليه و طفيت التلفون و كعدت صفنت … كلت احسن شي امسح حسابي عالفيس لان ما اريد انصدم بأخبار الباقين … لان هذولة ٣ من الي اعرفهم هيج وضعهم … لعد الباقين شراح يطلع بيهم و جان يجيني اشعار .. فتحت التلفون لكيت واحد ضايفني …
قبلت الاضافة جان يطلع صديقي الي جانت نيته و حلمه السفر … صورته الشخصية على جدسكي هاي الي تمشي بالبحر (ماطور المي) و مبين مرتاح … كلت اي هذا مبين سافر و حقق حلمه … كتبتله … جان يكلي يسلم عليه و هم اتصل عليا صوت … وطلع عايش بالدنمارك … كلتله ها شلونه وضعك … كال ياخوية مو زين … كلتله هاي شنو مو بالخارج ؟؟ كال اني مداحجي عن وضعي كعيشة او بيت او سيارة … كل شي عندي بس جهالي مو يمي … كلتله شنو شصار تزوجت اجنبية ؟؟؟
كال لااااا … كلتله شنو لعد … كال اني من ورى ما تخرجنا بكم سنة سافرت … طلعت تهريب و شفت الموت لحد ما وصلت لليونان و من اليونان سافرت لهنا … عشت هنا و صادقت اجنبيات .. بس جانو كلش فري … مو مال زواج .. و اخر شي قررت اتزوج و كلت احسن شي اجيب وحده من العراق … و جبت وحده من العراق .. والله العظيم صرت بالاربعين الف يورو مصاريف لحد ما وصلتها لهنا … و تزوجنا .. جانت حياتنا حلوة و عايشين و صار عندي طفل … و الطفل صارو ثنين … زوجتي كامت تضوج من سالفة اني اتاخر برى البيت … بس والله العظيم كل تأخيري جان علمود رزق البيت … يعني جنت اشتغل بمعمل و بنفس الوقت جنت شريك بمطعم عربي صغير … اتاخر من ارجع للبيت … كالت اريد اتدرب بنادي … كلتلها صار و طبعا هي بذاك الوقت جانت تحجي لغة تعلمت … و كامت تروح و تجي بالنادي و صادقت واحد عراقي … بالبداية جان مصادقها من باب عادي و احنا بالخارج و مجرد صداقة عادي … و بعدين كام يكلها شلون رجلج هيج يعوفج اليوم كله و شوية شوية بحجة مقهور عليها بس يزيد بالحجي و يدخل بالعمق .. و قشمرها … و كل هالشي طبعا عرفته و سمعته من بنية عراقية طليقتي حجته الها ورى ما كلشي انتهى و ورى حتى ما عافها هالولد … المهم .. سوت وياه علاقة و كشفتهم صدفه و ضربتها و خبرت الشرطة و المصيبة اني ضربتها كبال الجهال و اعترف طلع دم من وجهها و المنظر جان يخوف … انحكمت بوقتها و اخذوها و اخذو الجهال و راحوووو لمكان مجهول … و طبعا اكو هواي مثل حالتي من يفصلوهم بعد يحلمون يشوفون جهالهم يحلمون … و هسه اني اركض منا و منا بس اريد اندلهم و مدا اكدر اوصللهم … كلتله زين هي المرية كرايبك لو معارفكم ؟؟ كال لك بابا جانت طالبة ويانه بالكلية و جنت معجب بيها و هي بنت منطقتني … كلتله منو ؟؟؟ كال فلانة ههههههههههههههههه يقصد على نفس الطالبة الي اني رحت صارحتها و ما قبلت بيا … طلعت بنت منطقته و اني بذاك الوقت ولا ادري … كلتله بس انته مو تكول ورى ما تخرجنا بكم سنة يله تزوجت شنو جانت تنتظرك قابل … كال لك لا .. هي جانت تدور مواصفات و تأخرت بالزواج و اصلا جانت متوظفة … كلتله هااا بس ابد ما كلتله اني صارحتها … و سكتت و سلمت عليه و طلعت … وقررت امسح هذا الحساب مال فيس بوك نهائيا و اسوي حساب بأسم ثاني حتى لو اسوي بأسم زهرة التوليب و ما اضيف بي اي بشر بس اشارك بصفحات و اشوف فديوات و اخابر العالم و هاي هي …
مرات لو نبقى على صورة الناس الي راسميها براسنه هواااااي احسن ما ننصدم بالواقع … اني لو ما مشترك بالكروب و منبش على اخبارهم ولو ممجاوب احد .. جان هسه بعدها صورة البنية الي جان عدها وصيفات براسي و جان هسه متخيل هي عايشة احسن عيشة … و جان صديقي ابو الاحلام ابقى اتخيل راح اشوفه بتلفزيون فد يوم مسوي فد شي كل العالم تحجي بي … و جان ما عرفت الي رفضتني هيج خانت زوجها و زوجها الي جان حلمه يعيش بالخارج هيج صار بي و هسه يحلم يشوف جهاله … جان على الاقل بين كل الي عرفت اخبارهم ابقى خايف بس على واحد … على الي يفكر بالانتحار و هم جان ما عرفت هو شصاير بي و ما سمعت عن طليقاته .. لو باقي عالحلم احسن … و ما اريد انصدم بعد و اعرف مريم و احمد شصار منهم … خلي ابقى متخيلهم عايشين ببيت واحد و عدهم اطفال و مرتاحين بحياتهم … خلوني على حلم واحد … بسيط .. ما اريد انصدم …
(كروب الكلية)
انتهى
اخوكم ابو بغداد سايق التكسي
#ابوـبغداد