بيوتات اهلنة

البيت العاشر

#بيوتات_اهلنة

(البيت العاشر )  بيت اهلنة

كلشي يجي صدفه هوة حلو واله اثر مميز بداخل النفس

اهل خطيب اختي ما حبو يتسرعون ويخطبوني الابنهم الثاني لأن ابنهم الاول بعدة ما عاقد فجانو منتضرين يعقد رافد على اختي وراها يخطبوني حته اذا اكو رفض ميأثر على  زواجة

وعقدت اختي مهر محكمة والحفله هالمرة صارت بيت اهل العريس جانو مجهزين كلشي واخذنونه بسيارة جبيرة البيتهم احنه اهلهة وشكم وحدة من صديقاتهة واقاربنه

جنت كلش فرحانه بزواجهة  ومسجل واغاني وركص وهم ما قصرت ذبيت لحم هههههههه اشو اشوف اختي كل شوي وتكلي ثكلي

وج كعدي كافي ركص

وج خزيتينة هههه عجيب ليش ولج هيج تحجين كالت بعدين افهمج اني بطبعي اجتماعيه بسرعه اخذ عالشخص فاندمجت ويه اقاربهم البنات بس لاحظت وحدة من اقاربهم جانت عينهة مني وكل شوي تشاور الي بصفهة وترجع تباوعلي اني نوعاً ما نخمش كلبي وصارت بي رعشونه زغيرونه ههههههه مو مرات الشخص يصير عندة حدس ينبأة بشي يجي على باله اني كانت عندي هذا الحدس وحدسي كلي هذي موضوعهة مو خالي ورا شي

المهم ورة ما خلص العشة وتعبت من الركص وكعدت شاورتني اختي

انخطبتي اجاج خطاب باوعت عليهة كتلهة وينه كالت موجود وينتضر الجواب

كتلهة لا تكولين اخو رجلج من هسة اكلج ما موافقه

كالت لا ولج هالمرة غيرر ومتتوقعين منو

كتلهة اطيتيني راس الخيط لا اظمين ذيله منو هذا اخاف خالهم وهم ترة ما موافقه

كالت لا هذا ولا هذا بعدين افهمج عيب اهلة كاعدين وديباوعون علينه

😳😳😳😳 اني رأساً دك عندي جرس وحسيت منو اهلة الي جاي يباوعون علينه هههههههههههه

المهم كملت الحفله وقبل لا نطلع  شفت هاي الي جانت تباوع علية شاورت  عمتهة الاختي وهية هم هزت راسهة ومادري شجاوبتهة المهم طلعنه ورجعنه للبيت

من رجعنه للبيت وبليل وبفراشاتنه سألتني اختي

ليش رافضه حمايه اشوفه اني خوش ولد والله حباب  وهادئ وطبعه مرح وحلوو اذا اثنينه بيت واحد

كتلهة انتي كلتيهة بيت واحد خل نشوف اول انتي شنو حياتج وياهم حتكون وبعدين نقرر بحياتي يا اختي منو يكول راح ترتاحين لو راح يبقون على اطباعهم وثاني شي انتي ما اجة ابالج عمتج ليش تريدني

لا والله بس اني شفت موسى  عيونه ادور وراج ومرات يسألني عنكم يعني عن خواتي احسة يريد يسمع اخبارج بدون ميذكر اسمج

شلون بالله يريد اخباري

مثلاً ذاك اليوم سألني خواتج الزغار بيا صف واصلين دراسه ومرات يراوغ يكلي انتو كولكم هيج عشريين لو بس انتي ميكدر يوجه السؤال مباشر عنج وتعاي كوليلي شنو ابالج انتي عن تفكير عمتي

عمتج انسانه عمليه بما انه هية موظفه وانتي موظفه وابنهة موظف فأكيد تحتاج چنه بالبيت وين اكو احسن من اختج تكعد بالبيت وانتي بالوظيفه وهيج تعادل الميزان وستفادت من الطرفين وخاصه دائماً تسالني شتعرفين تسوين انتي وتشجعني من تعرف اني اعرف شغلات ومواهب عندي

نسيت احجيلكم احنه بالمدارس علمتنه المدرسات عن الحياكة والتطريز والخياط وهيج اشياء بدروس الفنيه والاسريه شلون انمي قدراتنه على الاعمال اليدويه

وبصراحة اكثر اني من جوة ايدهم كلشي تعلمت تعلمت احوك بالصنارة وبالشيش مال الحياكة وتعلمت التطريز وشون اقفل نهاية الخيط وتعلمت شلون ابدع اشتغل نقشات  بالبولك والنمنم  جنت امي تفصلي الكلبيه واني اطرزهة عالنقشة الرسم وهية تكمل خياطه وتعلمت شلون اخيط بالإبرة

المهم جنت فاهمة تفكير عمت اختي بهاي الصورة تستفاد من الاختين وحدة موظفه او وحدة بالبيت

ونهاية الحديث ذكرتهة وكتلهة
مكتيلي منو الخاطب الجديد الخفي الي ماعرفته

كالت شفتي اليوم كرابتهم شلون تباوعلج

اي شفتها

هية ابنهم  رايدج

وابنهم وين شافني

شافج بيوم النيشان

هاااا واني شلون ما منتبهة الة وشون حعرفه

هههههه اليوم هوة وصلنه للمحكمة وحجة كدامي ويه رافد عنج

نعم نعم نعم ممكن توضيح اكثر

اليوم بالسيارة كله الرافد الموضوع الحجيتلك عنه رافد اريدة من شاربك ورافد كلة الله كريم سهلة بس انطينه صبر واليوم راد يحجي وياج رافد بالموضوع بس ما صارتله فرصه

اي ونتي شفتي الولد شو بالله وصفي الي يجوز اذكرة

ولج اني  من سمعته حجة ويه رافد شاورته وكتله ياا موضوع اليحجي عنه

كلي يريد اختج أمينه  من ثولي كتله شيريد منهة كلي بربج شيريد منهة يريد يخطبهة

اني لزمتني الضحكة وكتله يحجي صدك هذا كلي اي والله واليوم بلكي افتح موضوع وياها

ونتي شنو رايج بما انو شفتي

والله ما قتنعت لان انتي بعدج زغيرة واحسة ما موالمج لان هوة خشن ونتي مو بحجمة

مممممممممممم

هاا اخذتيلج صفنه

هههه لا والله بس شوقتيني اعرف منو شو ما اذكر هيج واحد أصلا بيوم الخطبه هواي جوي شباب شلون راح اميزة

اعتقد هسة يبينون ويجون يخطبون عاد تعرفي ولو اني كتله الرافد مو مناسب الاختي  ويا ريت تسد الموضوع بس خاف من ورايه ويحجي وية ابويه

ومرت يومين ثلاثه واجة اخوية الي خاطب طبعاً بعدة ما مزوج لان الموافقه تاخرت كلشش ما طلعت بسهولة ومنتضرين

وحجة الامي كال رافد اليوم فتح موضوع ويايه جماعه راح يجون علمود امينه  وكتله  ترة بعدهي زغيرة بالمتوسطه

وكال شوفوهم ونتو بعد وياهم وترة الولد بضمانتي خوش ولد والله ولا عندة زايدة ولا ناقصه

كتله الله كريم يتفضلون وسهلة

وامي اجت كالت ناس راح يجون عليج كتلهة يمه عفيه شسالفه من كبري اني فدوة خل ابويه يرفضهم

كالت اني هم ما مقتنعه خوما ثنينكم ترحون مني فد روحة  واخوج يكول ندى جبيرة وموضفه ومستحقه زواج بس امينة بعدهي زغيرة بس عمت اختج تكول الجماعه صار شكم مرة يجوني  يردون اجيبهم عليكم بعد ستحينه خل يجون والله كريم

وتحدد يوم الجيه الخطابه

هههههه اني بنفس اليوم تعمدت لا ابدل ولا اشسور ولا كلشي اسوي اصلاً نمت الظهر وما حسيت اله امي تكعدني

وج كومي الجماعه جوي وج كومي مشطي عزة بعينج ليساعج نايمة

واني معبسة كتلهة ما اطلع الهم

كالت عيب يمة كومي بدلي اقلها وشسوري يوميه الكذله مصعدتهة للسمة اليوم شبيج حظي

هههههه طبعاً بوقتنه جانت موديل الكذله القاتله وجنت اسويه تخبل ورفعه زايد وثبته بالسبري

عاد جتي اختي وكالت كومي بدلي عيب تقدير للناس وسوي بس كذلتج ولو

كتلهة ابد والله ولا اشسور وعن العيب لبست تنورة سودة جلد توصل الجوة الركبه بشويه وتيشيرت فوكاها وطلعت الهم سلمت وكعدت

شفتهم ثلاث نسوان ورابعتهم عمت اختي وبناتها وياها

وهنة ظلن يتفحصن بيه واني ابدي اخش بهدومي وفاتحو امي بالموضوع انو جايين خطابه البتكم

عاد اني هنا خجلت وگمت ☺️☺️

بس وكفت اسمع عليهم ورا الباب 😂

كالو

شتأمرون احنه حاضرين هوة بس هذا بقه عدنه بله زواج امة متوفيه واحنه خواته ومتكفلين بي  وخو رافد وام رافد معاشرينه ويعرفونه   واي شي تردون تسالون احنه حاضرين

والله شكلكم حبايب يعني امينة ترة بعدهي زغيرة وهية حالياً شايله البيت بالنسبه الندى موظفه ومتعلمين عليهة نص النهار بالدوام والله الصراحة الموضوع صعب

ترة هية البنيه اول تالي تزوج واذا عالزغر فهية ماشاء الله ممبين عليهة ونتي خو تذكرين احنه كلنه ازوجنه ازغار هاي مو حجة انتي شوري ابوهة واخوتهة وحنه نريد جواب منكم

اني البنت عجبتني من يوم دخلت سلمت علينه من جينه خطابه وية ام رافد  بس كلت ما احجي هسة لأن شغلت رافد ما كملانه فما ردت هالشي يأثر بس بعد رافد وگطع مهر بعد احنه شننتضر

زين ميخالف مو المفروض يشوفهة وتشوفه

اي طبعاً الهة الحق تشوفه اما هوة فشايفهة زين وعاجبته ورايدهة

بهالاثناء ابويه راجع من شغله ودخل سلم عليهم وهمة هم رجعو فتحو الموضوع وياا وخطبوني منه وابويه جاوبهم

يصير خير حالياً ماكدر ارجعلكم خبر خل يفض زواج اخوهة لان البارحة طلعت الموافقه  وهالسبوع نزفه وراها يصير خير ليش من هسة نستبق الموضوع فخلي  هسة الى ورة زواج اخوهة وانتو هم تفضلو عدنه معزومين

تشكرو من ابويه وطلعو هذا الحجي ما سمعت صوت ام رافد هههههه

ورا ما راحو  سالت اختي عمتج مالهة صوت شعجب ما حجت ابد كالت مقهورة لان خطبو قبلهة تكول من جوني كتلهم رايدتهة الابني الثاني كالو اخذتي وحدة وخليلنه الثانيه عاد سكتت كلت يجوز همة يرفضون بلكي

وستحيت منهم شكم مرة جوي والبارحة بعد ماكادرة من جوي عليهة كايلتلهم باجر  نروح الهم

وتأجل موضوع خطوبتي الى اشعاراً اخر
وبدينه نحضر الزواج اخوية سويناله حفله بالبيت جبناله فرقة  وهولنة جبير كفا الحبايب كلهم اما الزلم فنصبولهم كراسي برة بالشارع وكل شخص غريب او جوارين كعدو برة بس اهلنه المقربين دخلو جوة للحفله والجوارين شاركونه صديقات ندى اختي وصديقاتي سروبه حبيبتي جانت حاضرة   والمفاجأة الكبرى

اخوية شايف الولد الخطبني ويا رافد وعازمه على عرسة

🙈 يعني راح اشوفة 🙈

سمعت اخوية يحجي ويه امي كللهة شفته واكف يم رافد وستحيت وعزمته على زواجي

وامي كلتله شكو بيهة هوة ظيف بكل الأحوال

طبعا احنه سوينه حفله حنه بس بيناتنه بس المقربين عزمناهم الباقين كولهم عالحفله مال العرس

وشون حنه وشون شبعت ركص ههههه وبيوم الزفه رحت للصالون سويت شعري اني وخواتي الزغار بس اختي ندى عمتهة اخذتهة ولبست بدله سودة عدله من فوك وللخصر تنزل نفش وبيه نقشة ورد

ومكياج بناتي خليت اني وبدت الناس تجمع والحبايب والجوارين كولهم بالكوسترات صعدو دنروح نجيب العروس 

من عادت اهل اقبل ام العريس من يزفون ابنهة متروح ويه الزفافه تجيب العروس
لا تبقه بالبيت اعتقاداً منهم انو اذا راحت بزفه ابنهة يقسه گلبه عليهة تبقه بالبيت حته من يرجع هوة وعروسه يحن گلبه على امة

ماعرف منين جايبين هذا المعتقد بس هذا الي جانت امي اسوي متروح بالزفه تنتضر بالبيت

ونتضرنه لما كلهم صعدو بالسيارات عاد اني بقيت وبت عمي كتلهة امشي دانصعد ويا ما صعدنه وكعدت جان تندك الشباك مال السيارة عليه انداريت شفتهة عمة اختي اشرتلي نزلي

كتلهة هاا خاله شكو كالت نزلي نزلي بسرعه

اني هم انداريت دا انزل جان اجلب بيه صديقة اختي وين رايحة كتلهة هسة اجي داشوف شيردون مني اشو هاي نزلت ورايه عادي شعليه

كتلهة هاا خاله كالت تعاي صعدي ويايه اني صفنت وين وياها جابتني من ايدي وجان تكلي صعدي اباوع من واكف يم السيارة صفنت كتلهة خاله صدك تحجين اهلي ميقبلون كالت معليج يدرون اصعدي

ما قبلت اصعد خوفاً من اهلي ليحجون عليه

عاد دا ارجع ورجعت جرتني وين ترحين تعالي صعدي انحرجت احراج لم ينحرجه المنحرجون من قبل ههههههههه عاد جريت ويايه صديقة اختي وهية ما مفتهمة السالفه وصعدنه وصعدت ويانه عمة اختي ولي جان يسوق

🙈🙈 الي خطبني ☺️☺️ صعدتني ويااا 

بس شنو عين عالشارع وعين على عمة اختي وكل شوي اكلهة عفيه خاله كتيلهم  وهية تكلي معليج يدرون

ونطلقت الزفة واني صعدتي صارت ويه الشاب الي خطبني وكعدني بالنص وعلى اليمنه عمة اختي وعلى اليسرة صديقة اختي واني بنص والمرايه الزغيرة متوجهة علية

وكلتله يالله خاله اطلع ورة الزفة

😉😉😉😉

بقلم قمر الزمان 💋💋💋

بيوتات اهلنة