بيوتات اهلنة

البيت الأول

#بيوتات_اهلنة

( البيت الأول ) بيت الخبازة

قبل جنة كعدتنه الصبح كلة من وكت ماكو نوم للساعه ثمانيه لو ساعه تسعه لان جنة انام من وكت اذكر ابويه من تصير الساعه ثمانيه رأساً كال يالله بفراشاتكم اذا بالصيف نومتنه بالسطح واذا بالشته لا بالغرفة جانت امي جايبتلنه جربايه حديد ام النفرين ونام اربعتنه احنه الزغار اما الكبار لا فراشهم بالكاع رغم بيتنه جبير بس ماكو تنامون منعزلين ماعرف ليش هذا القانون بس هذا الي اذكرة

فمن جنت اني اكعد من وكت ابويه ينطيني فلوس ويكلي روحي جيبي خبز حار

جان فرعنه بي خبازة بيتهم يصير ركن اول بيت بفرعنة والصبح كلهة تلتم على خبزهة يخبل طيب من اطلع من بيتنه واوصل نص الفرع اشم ريحة الخبز الحارر رغم امي تعرف تخبز وعدنه تنور بس امي متخبز من الصبح لان متلحك يا دوب شغل البيت والسوك والطبخ ونوب تخبز الظهر فأبويه مرات يعجبه الخبز الحار الصبح فيدزني بحكم اني زغيرة اروح اتمشه اوصل الكاهم سراوين الناس واكفه على بيت الخبازة بيتهم ركن وما بي كراج بي طرمه زغيرة ومسكفين الطرمة وبانين تنورين كبار وتوكف الخبازة ام ابراهيم تخبز ومرت حماهة تدولك العجين وتناوشهة الصواني

اوكف سرة الى ان اوصل اخذ الخبز ورجع البيتنه

الخبازة جانت چنة بهذا البيت هية ومرت حماها يخبزن ويبيعن للعالم لان رياجيلهم بالعسكريه وعدهم چنه لاخ بالبيت ذيج رجلهة شهيد هاذ الحجي بدايه الثمانينات ماكو بيت مابي رجال عسكري لو شهيد لو اسير

طبعاً بيتهم مزدحم بالسكان هههههه جبير وكل چنة مخلفه مدري شكد وكلهم مجمعين بهذا البيت همة مخلين بردة على باب المدخل مال البيت مرات من افوت وتنزفع البردة اباوع داخل البيت مثل خليه النحل يتحركون هههه هالكد ما اكو كثافه سكانيه بهذا البيت عدهم بنت زغيرة بعمري بس علاقتي بيهة مو هالكد فجنت اضطر العب وياها من ننجمع للعب احنه الزغار هية اكثر شي صديقة سروبه وهية هم مو هالكد تستلطفني هههههه شعور متبادل المهم

بيت الخبازة اذكر ماكو عائلة طلعت من هذا البيت يعني الحد ماكبرنه وهم بي ولا واحد من ولدهم عزل وطلع بيت وحد كلهم بقو مجمعين فاولادهم كلهم كبرو سوة بنات او ولد واحد من ولدهم جان يحب اخت سروبه صديقتي هذا الحجي سمعته منهة فجان رايدهة بس اهلة ما قابلين مو علمود شي بس همة بيهم طبع بنات العم الولد العم فهذا خطيه شكد حاول يخطب الي يحبهة بس اهلة كلوله بت عمك محجوزة الك

هوة جانت عندة اخت كلش حلوة يعني وهوة شكلة يعني مو قبيح ولا حلو شكلة عادي وبت عمة الي رادوهة الة مو حلوة كلش واخوهة جان حلو

فالمفروض هذا المو حلو ياخذ الموحلوة واخوهة ال حلو ياخذ الحلوة ههههههه ماعرف اذا فهمتو قصدي لان اصلا شربكة الاهل سووهة