بيوتات اهلنة

البيت الثامن

#بيوتات_اهلنة

( البيت الثامن )  بيت اهلنة

الصبح وزقزقه العصافير بحديقة بيتنه الي مساحتها 100 متر مزروعه من كلشي ورد جوري احمر ورد جوري بنفسجي ورد جوري وردي شجرة الجهنميه المتسلقة الي تنفض ورد بنفسجي زغار وتترس الكراج

والورد الاحمر الي شكلة مثل البوق او ورد القداح
ابويه جان كلش مهتم بالحديقه وزراعتهة وكل فترة يجيب فلاح يعتني بيهة

وشجرة النبك  الي بالسنه مرتين تذب نبك واحنه ما رحمناها ههههههه نحب النبك
واشجار الرمان الاربعه  ومن يكبر واكطع واكل منه صح بيه حموضه بس طيب

وشجرة جوز الهند بس مال زينه اكعد الصبح ما اقبل اتريك اله اغير مزاجي اروح اكعد بالحديقه تحديداً جوة شجرة جوز الهند وهية مظلله عليه وصوت العصافير وزقزقتهم

اوشجرة الموز الي تثمر موز بس يبقه زغار ميكبر لان درجة الحرارة مو كافيه حته يكبر  ويصير اصفر
وشجرة الزيتون وريحته الطيبه والزيتون اسود

ونبته  الشبوي وعطرهة الفواح هاي النبته بيه ميزة الورد مالته يغمض بالنهار ويفتح بليل والعطر يدخل للبيت من فتحات الباب والشبابيك ومرة جارتنه دخلت علينه وشمت ريحتهة وسالت منيلكم هذا العطر امي كلتلهة هاي الشبويه وهية شهكت وكالت شون ريحة طيبه وماتت حرامات النبته ههههه ما تحملت نضربت عين

والثيل الي مغطي الحديقه دوم بمكينه قص الثيل انضفهة

وشجرة العنب الله يا شجرة العنب كان ابويه مسوي قمريه الهة ومغطيه نص الكراج والعنب مالته لونه اصفر طعمهة كلش طيب اخلي الدرج وصعد وبمقص الاشجار اقص عنگود عنگود وترس الطاسه عنب وكعد اكل لو من نتركة زايد منقطعه يصير طعمه حلووووو لان يتاخر

الله يا بيت اهلنه وناسه وتنور امي الطين الخالته ورة البيت والخبز الحار

والعبات الحلوة الي جنه نلعبهة بالشارع طمة خريزة

وسبع سيفونات والتوكي  كبي نو  والورق ابو الصور والصگلة  والاناشيد الحلوة الي ننشدهة من نلعب الحبل

شمس قمر نجوم غيوم
شمس قمر نجوم غيوم

اخوتي وخواتي ابويه وامي  جوارينه شارعنه منطقتنه مدرستي  صديقاتي سروبه صديقه طفولتي

اني جنت ضحية ههههه لان  اجيت ورة اخويه وقبل اختي يعني صايرة بنصهم اخوية يغار مني لان اجيت ورا يعني رويسيه واختي الزغيرة تغار لان هية ازغر وحدة وهم تعتبر رويسيه واني صايرة بنصهم هههههههه

ورا زواج اخوية الكبير طلب اخوية الاخ زواج وهم ابويه ما قصر كلة يجرالك جانو الشباب قبل اهاليهم همة يتكفلون بزواجهم من مصاريف وشي مو مثل هسة الشاب يبقه سنين يجمع الزواجة لو يكفي لو ميكفي اذكر اخوتي من طلبو زواج ابويه تكفل بكلشي من ذهب ونيشان وغرفه ومصاريف كلشي هوة دفعه

وخطبناله وبهاي الفترة اختي الجبيرة تعينت بوزارة ال(  ....... ) صح مو اختصاصهة بس فتحو مجال للي تخرجو وفتحو باب التعيين وجتي عليهة جوارينه صديقتهة الروح بالروح جيران العمر وكلتلهة فاتحين باب تعيين امشي نقدم

صح اخوتي ما قبلو لان بذاك الوقت قليل بنات يتوضفن وخاصه بوزارة مثل هاي بس ابويه وكفلهة وكلهم مالكم دخل اني موافق

وسبحان الله طلع اسمائهم من ظمن المقبولين اختي وصديقتهة وباشرو بالدوام

وهاي الفترة جانت امي تحضر الزواج اخوية او ورة شهرين من دوام اختي اجانه الخاطوب هههههههه

طبعاً هية جانت رافضة لان ما قتنعت بي بس الي غير رأيهة  اجاها خاطوب لاخ

بيوم اجانه للبيت خال ابويه هذا الرجال كلش احبه اني خوش انسان وهادئ وسوالفه حلوة

امي من شافته كامت وحضرت الغدة اني اشوف الرجال يباوع عليه ويكصني كص رحت اركض للمطبخ امي تركب واختي الجبيرة اسوي  زلاطه كتلهم

اكوللكم ترة اكو حاله غريبه والله اعلم خال ابويه يمكن اليوم جاي خاطوب

امي كالت شمدريج

كتلهة يمة يباوع عليه كصني كص

يمة اني كلت هيج واختي كامت اطك اصبعتين وتغني ودك وتضحك عليه

هنوب اجة اخوية الي خاطبيله وامي سالته

صدك خال ابوك اليوم عدة سالفه

كللهة اي اسمعه يحجي وي ابويه على خطبه يمكن جاي خطاب

واني طكيت بچي هههههه واختي واخوية ثنينهم هية اصفك وهوة يدك عالباب ويصنفون علية لان ابجي

هههههه ابنة الخال ابويه كلش مو حلوو فد مرة مو حلوو رغم هوة شاب وشاغول بس مو حلو ههههه واني عيوني ورمت من البجي وهذول يضحكون علية وامي كل شوي وكالت عيارة

اخر شي اجة ابويه وكلتله امي اليوم خالك شعدة من سالفه

كللهة والله اجة خطب ندى مني يووووومة طلع جاي يخطب اختي الجبيرة ونقلب الدور عليهة

ههههه اباوع وجهة صار اصفر واني كمت اطك اصبعتين وضحك عليهة واخوية عالواهس يغنيلهة ههههههه  وما قبلت تطلع من الغرفة وخلصته بجي الى ان تغدة الرجال وراح

عاد فتهمنه الموضوع من ابويه جاي خاطب اختي منه وابويه من يمة صارف الموضوع لان يعرفنه منوافق علي لان كلش موو حلوووو  مو بس هيج امه من نوع وكحة كلش يعني ماكو چنة ما مكتوله من جوة ايدهة

فابويه كايله والله خالي جان كتلك كبع وخذ بس البنيه جايين عليهة خطابه واني نطيتهة طبعاً جنه بعدنه ما مرجعين الرفض للولد الي اجة على اختي الي موظف وياها بنفس الوزارة بس ابويه لكاها حجة حتة يرفض

وخال ابويه كايله ليش تطيهة للغريب خو مرگتنه على زياكتنة وابويه كايله زحمة ارجع خبر رافضين بعد ما وافقنه  وكايله اذا تريد اختهة الزغيرة ما مخطوبه واشوفهة الك وخال ابويه ما قابل كايله زغيرة على ابني وهوة اختار الجبيرة المهم الموضوع عبر سلامات ههههههههه اختي ورا ما راح خال ابوية كالت حوبتج هلكد مضحكت عليج

ومرت الايام وحجينه وي اختي ورغبناها بالموضوع مدام اجة خال ابوج خاطب معناه سبب حته توافقين بالولد الجاج المهم بعد تقنيع واقناع وافقت اختي عالولد الخطبهة وفعلاً رجعت موافقه اله وتحدد موعد جية اهلة حته يشوفوهة ويخطبون

بهاي الفترة اني جنت بعدني متوسطه واخوية الاكبر مني اعدادية واختي جانت متخرجة وتوظفت واخوية الجبير مستقر بزواجة وعدة اطفال واخوتي الباقين مدارس  واخويه الاخ من بعد الجبير هم خاطب

ولمتنه الحلوة ابيت اهلنه

وتحدد موعد جية النسوان وفعلاً تحضرنه وتهيأنه وحضرنه الضيافه وجوي النسوان

وعادتاً العروس تكون خجولة فمتدخل اله ورا ما يصيحوهة ههه فاول ما دخلو رحت اني قدمت الضيافه وسلمت عليهم همة شافوني اشو ذول ابتسمو وكلهن اندارن علينه ويباوعن باعجاب هههههه اني شكرة بيضه لا طويله ولا قصيرة وحلووة صراحة  اني وخواتي كولنه حلوات بس كول وحدة وجمالهة مميز بس اني الوحيدة بينهم شكرة همة خواتي سمر بس حلوات فهمة اول مشافوني عبالهم اني العروس هههههه

وكعدن يسألني

شمخلصة دراسه

كتلهم بعدني بالمتوسطه هههههه هنة ظلن وحدة تباوع عالثانيه  لان يعرفن العروس  موظفه شلون متوسطه بعدهي هههههههه ميعرفني اختهة

كالو شكد عمرج

كتلهم 15 سنه اشو هذول نصدمو يووومة نجلطوا اله شويه

عاد وحدة جايه وياهم سالتني حبابه انتي العروس

كتلهم لاا اني اختهة هسة تجي العروس خخخخخخخخخخخ فاجأتهم عاد شويه جرو نفس وكالو مثلج هيج حلوة اختج كتلهم لا اختي احلة مني وبهالاثناء دخلت امي وجايبه اختي وياها وهم عجبتهم اختي طويله سمرة بس مو طوخ حلو سمارهة ومعانيها  تخبل عيونهة سود وساع مدورة ورموشهة واكفه وحلكهة مدور والشفه محددة من الله

تمت الموافقه من الطرفين بعد ما خطبو رسمي وتحدد موعد الخطبه عاد امة كالت الامي ام ندى احنه راح نجيب عمامنه واهلنه وراح نسويهة كعدة وحدة هية خطبه هية نيشان شتكولين امي كلتلهة كيفكم ماكو مشكلة

الله ونخطبت اختي ونخطبت اني بيوم خطبت اختي 😉😉

بقلم قمر الزمان 💋💋

( بيت اهلنه )