بيوتات اهلنة

البيت الرابع

#بيوتات_اهلنة

( البيت الرابع )    بيت السكران

الطفل اكو امور حت لو كانت بسيطه يعتبرة فد شي مهوول ومخيف

بنهايه فرعنه بيت يصيحوله بيت السكران هذا ابوهم 24 ساعه سكران حرفياً وبكل للكلمه من  معنى

اذكر اطلع الصبح للمدرسه اني زغيرة اشوفه كاعد عالرصيف ودشداشته رافعهة على رجلي ويغني لو الي يفوت يدكلة تحيه ويصيحلة ودوم اشوفه بطريقي اني يكتلني الخوف مجرد ما المحة هوة الشهادة لله الرجال ابداً مو مؤذي

بالعكس خدوم وصخي ويحب كل الناس والرايح والجاي يتمنة يخدمه بس عيبه الوحيد سكران ماكو دقيقه تمر من عمرة اذا مو شارب مرات افوت من يم بيتهم اشوف بابهم مفتوحة اشوفه كاعد بالكراج مال البيت وبطله بايدة

لااااا والمصيبه الاكبر يشتغل بالبلديه سايق سيارة مال تنظيف يعني يلم الزبل مال بيوت الناس

الشغل مو عيب بالعكس شرف لكن الطركاعه الي مصفنة العالم كله شلون البلديه مسلمة سيارة للسكران ههههه هوة اسمة ابو مهدي بس من ورة السكر ماله يصيحولهم بيت السكران نكسرت سمعت بيتهم بسبب ابوهم

ومرة طلعت من بيتنه ابويه دزني اجيب ببسي من الوكاله الي بنهاية الفرع مالتنه

هاي الوكالة عدة ترخيص من الحكومة ببيع صناديق الببسي

صندوق بلاستك لونه اصفر او ازرق وبيه 24 بطل ببسي من هذا الكزيز بس شنو من ببسي الله الله على طعمه مو مثل ببسي هسة لا يابه لا غير شكل فابويه ينطيني دينار اروح اجيب نص صندوق بس نطيهم اول بدل فارغ ينطونه مليان

فطلعت اتمشه وبيت السكران صاير قريب على الوكالة وشفته كاعد عالرصيف دشداشته صايرة صفرة هالكد ما ضاربته الشمس وصوته عالي جهوري وخشن ومن يحجي ميبقه واحد ابيته ميسمعه

يمة هوة شافني وجان يصيحني ( ولج انتي تعاي شسمج ) يوووومه واني كمت اطكطك يامن يعبرني من يمه كلي مو حاجيج ابوج الرجال الطيب وينه هههههههه خرب يسألني على ابويه واني كتلني الخوف كتتتل كتله ابويه بالبيت وطكيته ركضه

ماعرفت بعد شكال مكال ومن رجعت ما رجعت من يمه لاااا فتريت من الفرع الثاني الي بظهر بيتنه ودخلت على اهلي يعني الطريق طريقين صار عليه  ولا افوت من يم السكران

دوم اسمعه يحجي ويه ابويه شتأمر وشتطلب اني بالخدمه واسمع ابويه يحاجي امي يكلة ماعرف شلون البلديه مسلمته سيارة متخاف عالناس لا يدعمله واحد ويكتله خلاص

ومرة ابويه عطلانة سيارته وظال حاير منو اقرب شي  اله تالي داك على بيت السكران وطالب منه يجي يسحب سيارته والرجال ما مقصر رايحلة وساحب ابويه

هههههه وديسولف الامي وسمعه يكول والله هالرجال شكد صخي وطيب حرامات من ورة الشرب سمعته راحت

وامي تكلة ونته بربك ماخفت من سحبك بسيارته لا يفلش سيارتك وسيارته

يكلهة سكتي غير ايدي على كلبي ههههههههههه المهم الرجال ظل على هالوضع وكانت عندة بنات ثنين او ولد بناته حلوات يخبلن

وبيوم سمعنه الخبر السكران مات لكو ميت بفراشه الله يرحمة ويغفرله  عسى ولعل اعماله الطيبه تشفعله عند رب العالمين وتخفف من ذنوبه

رغم هالشي كان مظلل على بيته وبناته واقامولة مأتم ونصبوله جادر وسووله عزة

وراها بدت المطامع تظهر اول شي واحد من المنطقه سوةعلاقه ويه بتهم وزوجهة وسكن ابيتهم لان بيت اهلة ميكفي والثانيه كذلك نفس الحال والبيت اصبح للنسايب الكعيديه اخوتهن زغار ولا يحلون ولا يربطون

الله يرحمة ويغفرله رغم هوة كان غاضب ربه بسكرة بس كان سد البيته وعائلته

( نهوة العمام )

طلعنه من بيت السكران وراح نسير يم بيت ابو مقداد ناس بابة عرب  عدهم بنات ثنين والباقين كولهم ولد او ولدهم هوااااي صديقتي بتهم الي بعمري  هاي البنيه مميزة عن اهلهة

شلون مميزة اهلهة كولهم سمران وشكلهم عادي او اقل من العادي حته اختهة سمرة وتشبه امهة بس يعني ما تملك من الجمال شي

اله هية بييييضه وعيونه زررق وشعرررة اصفررر وجسم وجمال تكولون عبالك مو بتهم يعني من يوكفن بالباب الخوات يم امهم نهائياً الي يشوفهة يكول بتهم

جانت حديقتهم عبارة عن دجاج وزرع يزرعون بيه انواع المخضر  ويربون الدجاج والبط وندخل اني وياها نلعب بحديقتهم وتفرج عالبط والدجاج خوش بنيه حبابه واني علاقتي بيهة زينه

وفد  يوم نسمع هوسة ابيتهم وقبل جنه اذا صارت طلابه محد يبقه ابيته كلهة تطلع تفزع  وجنه عادي نوكف بالبيبان نتفرج ونسمع قبل العشرة مو مثل هسة

المهم طلعنه على صوت الصايح شكو شكو الصوت ابيت ام مقداد  ولان بابهم مزدودة محد كدر يدخل لان الظاهر بينهم وثاني يوم عصريه شفنه ام مقداد واكفه او واكفه بناته وياه طبعاً احنه وحدة اصيح الثانيه تعالي نلعب  ههههه وكعدنه نلعب احنه البنات ابابهم طمة خريزة وصارت المة يم بيت ام مقداد ابابهم وسمع الجارات يحجن وياها ويسالنهة

خير ام مقداد البارحة صايح ابيتكم ولان بابكم مسدودة ماكدرنه ندخل خفنه السالفه بينكم

اي والله هاي بيت اخو ابو مقداد اجو تعاركو ويانه

ليش يا ستارر

شكلج والله طلابه  صارت من ورة بتي الجبيرة ابن عمهة رايدهة وابن عمهة الاخ هم رايدهة وتعاركو بيناتهم هذا يريدهة وهذا يريدهة والبارحة اجوي هوسوو علينه دير بالك تطوهة لفلان احنه رايدينهة

طبعاً اني وجهي فلت ☹️☹️

ولد العم يتعاركون بيناتهم علمود بت عمهم هههههههههههه يمكن ما سامعين بيه بس بالقصص بس اني شفته بالواقع

المشكلة البنيه ما تملك اي مقومات تخلي ولد العم يذابحون عليهة  هسة لو على اختهة الحلوة الشكرة ام عيون زرك تكول اجنبيه لو تركية جان كلنه حقهم اله هاي على شنو يتعاركون

وسمع الجارات يسالون اي ام مقداد ونتو المن تردون تطون

جاوبتهم والله همة ثنينهم زينين وخوش شباب بس زحمة نفضل واحد على واحد خل تصفه بينهم وياهو الي  تصير من نصيبه حي الله

من سولفت الاختي الجبيرة ظلت تغم  بگصته امداني امداني ههههههههههه

لا والكارثه سالوهة والزغيرة

كالت لا هاي ميردوهة يردون الجبيرة 🤦‍♀️🤦‍♀️

ومرة سالناها وحنه نلعب انتي ليش مشبهين اهلج ليش تختلفين عنهم كالت اهلي يكولون اني اشبه بيبيتي جدي جان مزوج ثنين وحدة شگرة وحدة سمرة  واني الوحيدة الي طلعت اشبه الشگرة

سبحان الله وزوجت بت ام مقداد الجبيرة اخذت ابن عمه بعد ما راضو ابن عمه الاخ وهدوه بنيه من عدهم اله ساكت

غريبه موو اي اي اعرف غريبه بس واقع وشهدت علي اني بنفسي واني العب طمة خريزة 😅😅

( بيت ابو جواد )

هذول ناس بحالهم ابوهم مزوج ثنين نسوان وكعدهن فد بيت وهم حديقه بيتهم مسويه للزرع وللدجاج

بابة عرب ويحبون الخلفه ومخلين تنور طين بالحديقه ومن يخبزن الشرايچ ثنينهن يوكفن سوة ولا ساعه لا ساعتين يخبزن لان العدد هائل هههههه نسوان ثنين ويخلفن

بس للامانه ما سمعنالهم صوت ابد ما عدهم هاي الاولى وهاي الثانية ماعرف شلون هالرجال مصيطر عليهن المهم حبابات جانن

عدهم واحد من اخوة ابو جواد جان اسيير ومن صار تبادل الاسرى ورة ما وكفت الحرب  رجع الهم الغايب وسكن مع اخوه ابو جواد لا وهم زوجوه

اذكر اول ما راحو وستلمو وجابو جابو المزيقة ويااا وادك والجكليت والعالم كلة فرحانه الرجعت الاسير الشاب

ورة فترة زوجو ومرة واني طالعه للمدرسه شفته يمشي سريع ومرته تمشي ورااا بس شنو تقريباً بعد بينهم ثلاث او اربع امتار وكل شوي يوكف ويصيح بيهة يالله فضيهة وهية عاضه عباته باسنانه وتمشي سريع وما ملحكة بي

ونتبهت الهة لافة شي جوة عباته يا الله يمكن طفل عدهة صايررر خطيه ههههههه وهوة يحاجيهة من ورة خشمة وعصبي

يووومه هذة رجع من الاسر حقنه اووف يمكن صاير نفسيه من الأسر

( بيت المعلمة )

ام  إخلاص معلمه بيتهم بفرعنه زوجة يشتغل بالتحليلات المختبريه بالمستشفى عائلته كلش زغيرة عدهة ولد وبنيه وبس  عائلة هادئة جداً

وجنة قبل كل ما نضيع كتاب امي تروح تركض عليهة ادبرلهة واحد جانو قبل نادر ما نحصل كتاب جديد كلة قديم ومشتعل اهل اهلة ولازم نعتي بالجلاد ولازم نضيف ولازم مملخ اذا هوة احنه اصلاً مستلمي هالكان

المهم علاقتنه بيهم محدودة غير السلام وعليكم السلام حته من احنه زعاطيط ونلعب بتهم مجانتزتلعب ويانه ولا شفت ابنهم يلعب ويه الولد   ولما دخلت المتوسطه انتبهت الشغله كل ما اطلع الصبح للمدرسه الكة ابنهم واكف ابابهم

هوة هم طالب واخته هم طالبه فما جنت اهتم الوكفته تكررت هواي هاي الحاله الى ان مرة انتبهت طلعت من بيتنه قبل لا اوصل بيت المعلمة ام اخلاص طلع ابنهة ركض فتح الباب او وكف اني عبالي تأخر عالدوام وهيج طلع مستعجل زين اذا هوة متاخر عالدوام ليش بقه واكف ما فهمت الموضوع الى بعد مدة من الوقت هااااا وكام يغير بتسريحات شعرة ويسوي فيكات واني اذكر علي شعرة كصه مالته تقليديه شنو الي غير هالولد

اثاااري جان يوكف ينتضرني ☺️☺️☺️☺️ افوت الصبح حته يشوفني من اطلع وروح للمدرسه 🙊🙊 ما عرفت وكتشفت هالشي اله بعد ما اكل رزاله غسل ولبس  بسببي

صبحية من صبحيات الدوام طلعت بهدوم المدرسه وقبل لا اوصل بابهم طلع هوة او وكف تقريباً وصلت  قريب علي وحان اسمعه يكول

( شلون اني بالشالع كلبي كل صبحية ) اني الثول ركبني باوعت يمنه يسرة ماكو احد باوعت ورايه هم ماكو احد هاي المن هاي الحجي جان يكول

اي اي انتي شالعه كلبي  وجان تجي الكفخة من ورة  😂😂😂😂😂

ثاري ابو دايطلع للدوام وسامعه من ديتغزل ماد راسه من الباب شافني اتلفت وسمعه يكول انتي وجابه ترس على علباته

بعد ما شفتة المعجب نهائياً 🙄🙄

مات الاعجاب قبل لا يبدي يالله كلشي نصيب 🙂🙂

وتستمر الحكايات مع بيوتات اهلنة وحكايه جديدة

( العرگ دساس )

بقلم قمر الزمان 💋💋