قلت ليو ياسر استهدي بالله خالتو امل مالها الجاها شنو لمن معلي صوتك وبتكورك كدا قال لي وانت فاضيه لمن تعرفي ملالا شنو طلعت برا لقيتها راقده في السرير وجمبها جارتنا خالتو سهام اول ما شافتني صرت وشها وقالت لي ياسر بي سبب عديمه التربيه دي امك كان لحقت الصالحين وانت عامل لي فيها راجل ولسه مخليها على ذمتك يمين لو راجل تاني كان قطع فيها كف وجدعها في بيت ابوها عشان تتأدب لكن عاد يسو ليك شنو انت يا ابو قلبا مكفي قلت ليها خالتو سهام انا عملت شنو لمن بتتكلمي عني كدا قالت لي والما عملتي شنو ما فضل الا ترفعي يدك وتدقينا قلت ليها الله يسألك انا قلت حاجه غلط غير اني دافعت عن نفسي قالت لي قليله حياء وتربيه كمان بتردي في وشي اضايقت منها شديد وقلت ليها لو سمحتي اطلعي من بيتنا لانو دا موضوع يخصنا نحن وانت ما ليك علاقه بيو ردت لي ياسر شايف قليله الادب لو صحي امك ادبتك ما كانت اتكلمتي مع الاكبر منك كدا الدموع ملت عيوني قلت ليها الحمدلله امي ربتني وكويس شديد والا كانت اتصرفت معاك تصرف تاني ويلا اتفضلي بيتك ومشيت فتحت ليها الباب قالت لي خالتو امل الله يعوضك ما جبتي ليك مرت ولد لو سمعتي كلامي من الاول دا ما كان حصل وهسي ما فات شيء اخير يشوف ليو وحده تانيه وطلعت قفلت الباب وراها ودخلت جوا ياسر قال لي دا تصرف ليك مع مره قدر امك قلت ليو ياسر انا المرا دي ما غلطت معاها من جات بتنبذ وتشتم فيني وانا ساكته احتراما لي خالتو امل لكن طفح الكيل انا ما جابوني هنا ملطوش عشان تتكلم معاي كدا وبعدين هي منو لمن تدخل في حياتنا الخاصه وتقول ليك طلقني ولا عرس فيني فهمني هي منو قال لي دي جارتنا ليها سنين معانا وبختها في مقام امي قلت ليو جارتكم على عيني وراسي لكن ما تدخل في حاجه ما بتخصها قال لي انت بتشاكلي امي قدامها لمن ضغطها يرتفع وتقع في الارض كيف قلت ليو انا شاكلتها بصدمه كدا قبلت على خالتو امل قلت ليها انا شاكلتك ولا رفعت صوتي عليك ابت ترد قال لي خالتي سهام ضربت قالت لي الحق امك ح تروح مني وانا ما عارف وصلت هنا كيف لقيتها راقده في السرير ولا بتجر يد ولا كراع وطلعت ما فطرت ولا اخدت الدواء قلت ليو انا اي ما فطرت معاها عشان كنت زعلانه من خالتو سهام مشيت غرفتي شلت اكل معاي لكن من الغبينه ما قدرت اكلو خليتو في الطربيزة ورقدت ونمت وقبل ما امشي قلت ليها ما تنسى الدواء لكن حكايه اني شاكلتها دي الله يكسر رقبتي هسي لو قلت ليها كلمه سااي ولو خالتو سهام بهتتني الله يطلع لي حقي من عيونها الليله قبل بكره ما عافيه ليها وان شاء تشوفو في الدنيا قبل الاخره قال لي يعني عايزاني اكذب خالتي سهام والمنظر الشفت فيو امي قلت ليو ما تكذب ولا تصدق لو عايز دي مشكلتك دخلت غرفتي لبست عبايه وطرحه وشلت تلفوني وشاحني وطلعت قلت ليو طالما اصلا انت ما مصدقني ولا واثق فيني البقعدني معاك شنو اتذله واتهان من الغريب والقريب ولو سمحت ورقتي تصلني في بيت ابوي احسن لي ارجع واقعد معززة ومكرمة زي ما كنت طلعت هو بكورك لي ارجع حلفت كان ارد عليو اجرت اقرب امجاد وانا البكا شقاني شق وبتاع الامجاد قايل جابو لي خبر بكاء وصلت البيت قلت ليو دقيقه بس اخش اجيب ليك قروش عشان ما شايله معاي دخلت جوا لقيت سمرا في المطبخ قلت ليها شايله قروش لمن شافتني اتخلعت من وشي المورم قالت لي انت مالك قلت ليها عندك ولا لا مدت لي محفظتها شلت القروش وطلعت برا لقيتو ماف اتلفت يمين وشمال ماف ليو اثر رجعت جوا
على لساني:-
بعد دخلت جوا كنت عايزة اطير من الفرح احساس كنت مشتاقه ليو شديد لكن مكابره وما عايزة اتكلم معاو لكن هو جاء وراضاني طرحتي ما طلعتها فتحت العلبه لقيت جواها بتاعه كدا زي الحجر فتحتها ولقيت خاتم رهييب رهابه ما عاديه😍❤بقيت اتبسم واتكشم شلت تلفوني وقعدت اصور فيو ميه صورة اخترت اظبط وحده وختيتها في الاستوري وكتبت عليها
" أحبّك أكثر، في كل مرة نوشك على الإنتهاء و لا ننتهي، أحبّك بقدر هذا التشبث، بقدر رغبتي في البقاء معك رغمًا عن كل هذه الكوارث و كل أسى"
ختيت التلفون في الطربيزة ودخلت المطبخ اشرب مويه الحب عطشني😂شربت وانا طالعه شفت رقيه جات ووشها ما بتفسر صوتها كان مخنوق شديد قالت عايزة قروش سألتها من السبب ما ردت علي اديتها الجزلان طلعت وجات قعدت في السرير تبكي
-رقيه مالك ما توقفي قلبي في زول جاتو حاجه...بتكلم معاك يابت...ياخي ما تفتحي بوزك دا😠ابت ترد ولا تتكلم معاي مشيت ضربت لي ابوي قلت ليو رقيه جات بتبكي وابت تتكلم معاي ما اخد نص ساعه وشفتو في البيت كان واضح من ملامح وشو الخلعه والخوف قعد جمبها وقال ليها بتي مالا زعلانه وبتبكي حضنتو وزادت في البكا تاني ما سالا خالص خلاها لمن كملت بكا وغسلت وشها قعد وسالا الحصل شنو حكت ليو عن المشكله وكم نقاش حصلو انها ما بتقدر تطبخ لي راجلها وياسر ما مواقف على شغلها قال ليا كدي صلي على الرسول(عليه افضل الصلاة وأتم التسليم)نحلها نقاش نقاش...قلتي في الاول انو ما بتقدري تطبخي...انت عارفه انو امك أمل متعوده من زمان تاكل اولادها من طبخها وهم اتعودوا على نفسها في الاكل وكل أم بتشوف الطبيخ دا ما مجرد مهمه عشان تسد بيو جوع اولادها بل طريقه توصل ليهم كميه الحب والحنان البتحس بيها تجاهم وانت ممكن تطبخي لكن ما بصورة يوميه مره مره لغايه ما يتعودوا ياكلو من تحت يدك اتفقنا ردت ليو اي قال طيب نجي لي قصه الشغل انت عارفه انو لمن قلت لي عايزة تشتغلي ما اعترضت لاني عارفك راغبه في الشغل دا من زمان وعايزة تكوني سيده ليها شأن في المجتمع وممكن بالسياسه والكلام الحلو الهادي تقنعي ياسر بالموضوع بدل تعانديه وتعملي قوة راس وما توصلوا لي حل وانت عايني للموضوع من وجهة نظرو ما عايز مرتو تتعب فكري فيها بالطريقه دي اتفقنا ردت ليو اتفقنا قال ليها نجي لي اخر موضوع انا متأكد انو انت ما بتعلي صوتك ولا تقلي ادبك على زول اكبر منك لكن عايني للموضوع من وجهة نظر ياسر اشتكوا ليو انو امو تعبانه وصحتها ما تمام عشان اتناقشت معاك من الطبيعي بعد شاف المنظر يكون زعل وما عرف يضبط اعصابو ويحكم عقلو عشان يتصرف معاك بي حكمه لكن بغلطتك عشان طلعتي وهو طلب منك تقعدي عايز اسألك انا علمتك ما تسمعي الكلام هزت راسها يعني لالا قال ليها حتى لو زعلتي وبكيتي ما تطلعي من بيتك من غير اذن راجلك اي نعم دا برضو بيتك تجي وقت ما عايزة لكن ما تحت الظروف دي فهمتي كلامي دا هزت راسها بالإيجاب جيت قعدت جمب ابوي وقلت ليو يشهد الله انت لو في زيك ميه بس الدنيا دي ما بتجيا عوجه كنت معجبه ومتأثرة بي كلامو شديد😍❤قال لي الزول لو حكم عقلو وفكر قبل ما يتصرف نقاشات كتيره ح تتحلى قبل ما تكبر وتبقى مشاكل وعقد قال لي رقيه الليله تقعد وبكره ترجع بيتها وتعتذر عن تصرفها دا وردت ليو بي حاضر انا دخلت المطبخ سخنت الغدا مسافه ابوي يستحمى هديل وروان جو اول ما شافو رقيه روان قالت خير ياطير الجابك شنو قلت ليها اشتاقت لينا تخيلو😂هديل قالت لي كضابه عايني وشها مورم كيف الا ما تكون اتشاكلت مع ياسر قلت ليها عبقرينو عقلك دا ح يوديك في داهيه😂جوني في المطبخ حكيت ليهم الحصل ومشو قعدو جمبها وحاولو يغيرو ليها مود الكآبه الكانت فيو ختيت الاكل لكن رقيه رفضت تاكل ابوي قال لي خليها بي راحتها رقدت نامت بعد العشاء كدا صحيتها لانو تلفونها ضرب وكانت ملاذ
ملاذ:مرت اخوي السمحه
-ميمي ازيك
+ما كويسه قالو لي زعلانه ان شاء الله خير
-ماف شيء نقاش بسيط وح نحلو
+امي قالت لي دي خالتو سهام العملت المشكله دي
-قالت كلام ما عجبني وما قدرت ما ارد عليها وشكتني لي ياسر
+اصلا المرا دي غير الفتن ما عندها حاجه سواطه الحله محل ما تمشي تعمل مشكله وتطلع كم مره وكم مره خلت امي تشاكلني وتهرج فيني نهائي ما بطيقها
-لو من البدايه وقفتوها في حدها ما كان اتجرأت للدرجه وادخلت في حاجات ما بتخصها
+يابت دي اصلا حشريه واقول ليك حاجه هي ممغوسه عشان كانت دايره ياسر يعرس بتها ام وش زي طربيزة اللحام دي😂لكن قلت ليها كان تموتي ما بعرسها
-يابت انت حامل بطلي تتنمري في خلق الله عشان الفي بطنك دا ما يقطع لسانك😂
+برري سكت تب
-اي احسن ليك😂
+ارجعي البيت ياخي ما تخليها تعمل مشاكل بينكم
-راجعه لكن بعد ارتاح شويه واهدي اعصابي
+طيب بي راحتك وما تنسي اخوي بحبك شديد قلت ليها انا زاتي بحبو واشتقت ليو شديد🥺قالت لي خلاص بطلي دلع واضربي ليو يجي يسوقك قبل ارد ليها جات هديل قالت لي البسي توبك راجلك برا قلت لي ملاذ اذكر الكلب ووجهز العصا قالت لي يخسي عليك والله اخوي ود حلال قلت ليها ما ود حلال ود قلبي😍قالت لي انت دي ما بقدر عليك يلا مع السلامه وارجعي البيت فاهمه قلت ليها لا الا اادبو اول ضحكت وقال لي الله يهديك شلت توبي لبستو وقعدت مسافه حتى مشيت ليهم في الصالون ولا سلمت عليو قعدت جمب ابوي قال لي راجلك جاء يسوقك امشي جهزي نفسك رديت ليو عايزة اتكلم معاو الاول قال لي تكرم عينك طلع وخلانا قاعدين قام ياسر من حتتو وقعد جمبي وقال لي انا عارف اني غلطان عشان عليت صوتي عليك وما اديتك فرصه تدافعي بيها عن نفسك لكن لمن شفت امي بالمنظر دا خفت عليها شديد وما عرفت افكر بشكل مستقيم اعفي لي قلت ليو عادي اصلا ما فرقت قال لي يعني لسه زعلانه قلت ليو ويهمك في شنو مسك يدي وباسها وقال لي يهمني شديد لانو زعلك ما بهون علي وبقى يعاين لي في عيوني مسافه لمن فصلت😂طوالي نفضت يدي وقلت ليو ما راجعه معاك اشتقت لي ناس ابوي بعد اشبع منهم بضرب ليك تجي تسوقني قال لي عايزة تعاقبيني يعني قلت ليو اي تستاهل قمت ومشيت على الباب وانا ميته فيو ضحك😂عيوني ضلمت وبقيت ما شايفه كويس وما عارفه الحصل شنو تاني
رجعتو لي💃:-
قعدنا في الحوش بنتونس شويه كدا وابوي جاء قعد معانا وقال لينا رقيه عايزة تدلع😂قلت ليو اصلا لو ما عملت امورها دي ما بترتاح روان قالت لو فالحه ح تقولو ليو عشيني برا وبصالحك هديل ردت ليها اه رقيه دي قلبها ابيض زي اللبن هسي بتفصل وتمشي معاو😂جات طالعه وهي بتضحك قلت ليهم واهي فصلت عاينت لينا وعترت وقعت في الارض جرينا عليها صحيتها ابت تقوم ياسر قال لي لمن جات اكلت حاجه قلت ليو ابت والله قدر ما حنستها رفضت لمن تكون زعلانه ما بتاكل قال لي الليله من الصباح ولا فطرت ولا اتغدت رفعها من الارض وطلع بيها ختاها في العربيه مشيت معاو انا وابوي على اقرب مستشفى ركبو ليها درب لانها مهبطت وعملوا ليها فحوصات خوفا من الملاريا ولا التايفود بعد مسافه صحت ابو قال ليها ينفع دلع قدر دا قالت ليو والله ما دلع لكن ما كان نفسي اكل🥺قلت ليها انت كلك عضمتين مربطات مع بعض بالجلاله وفيهم حبت لحمه خلي ما عايزة اكل انت مفترض تتحشي مش تاكلي🙂قعدت تضحك الما عندها دم😂انا وابوي طلعنا برا خليناها مع ياسر
على لسان رقيه:-
ناس سمرا طلعو وياسر جاء قعد جمبي ومسك يدي قال لي ينفع تخوفيني عليك كدا قلت ليو ما كان قصدي والله حصل غصب عني قال لي حركه زي دي ما تتكرر تاني فاهمه قلت ليو حاضر جات الدكتورة داخله قال ليها الدرب خلص ممكن نطلع قالت ليو ايوا ممكن لكن تجوني راجعين بعد اسبوعين تاني الصراحه اتخلعت في شنو ما اكون عايزة اموت💔ملامح وشها زاتو ما كانت مريحه خوفتني ياسر قال ليها خير ان شاء الله الفحوصات طلع فيها شيء قالت ليو طلع فيها بيبي
"قليلا مني+قليلا منك=صغيرنا وبطل حكاية حبنا❤"
💜ابقوا عافيه💜