علاقتي مع احمد بقت متوتره شديد بسبب مزاجي المتقلب ونفستني المن غير سبب نكون بنتونس عادي اقوم اجوطها واتشاكل معاو بسبب حاجه تافهه بالنسبه ليو وكبيره شديد بالنسبه لي غايتو الله يعينو😂
قبل حنه ملاذ بي يوم رقيه قالت لي اضربي لي احمد عشان يجي يوصلنا قلت ليها متشاكل معاي قالت لي عادي ما فيها حاجه خلي يجي يوصلنا وكملو شكلتكم بعدين😕وفعلا ضربت ليو وقال بجي يوم الاربع كان الحنه واصلا بنات بس لكن هناء قالت ما ماشه عندها شغل وهديل فاره الكتب مع مشروعها اما روان قالت عايزه تنوم ولا بتمشي ولا شتين قلت ليهم يخسي عليكم البت ما عندها اخوات قالن لي بنمشي نقيف معاها في العرس هسي مشغولين😴قلت ليهن طيب بي راحتكن وضربت لي احمد جاء ساقنا
رقيه:عصافير الحب متشاكلين
احمد:اختك حقاره شديد عايزة تغلط واعتذر منها
-وفيها شنو يعني😑
رقيه:هو الحب كدا مش بتحبها ح تراضيها
احمد:دا ما حب لكن دا استبداد😕
-لو ما عاجبك امشي😑
رقيه:نقفل السيره عشان بقت مسيخه
احمد:شايف كدا برضو
بقى يتونس مع رقيه وانا وكاني ما قاعده معاو😑ولا اشتغلت بيو طلعت تلفوني وقعدت اطبظ فيو لغايه ما وصلنا ولا قلت لي مع السلامه نزلت وخليتو دقيت الباب فتحت لي بت كدا ورقيه جات قالت لي دي بت عمهم سلمت عليها ودخلت لقيت كم بت من الحله وقاعدين يتونسو ومخلين الشغله ولا سو الفشار ولا الفنكوش والفواكه في حتتها وماف زول فكر يشوف الرز باللبن اصلا كنت ممغوسه من احمد وحركاتو وزادوها علي طرت فيهم وهجت قلت ليهم لو ما عايزين تشتغلو يلا كل وحده على بيتهم وما تزحمو لينا الحته😡رقيه قالت لي دا بيت ابوك لمن بطرديهن😂😂قلت ليها بطردهن قاعدات سااي يسون في شنو😡حتى ياداب قامو واتلحلحن مسكت كل وحده فيهم شغله وبقيت مراقباهن رقيه قالت لي والله بقيتي زي حضره الصول😂بعد العصر خلصنا الشغل كلو فضل الزينه بس جاء اخوها ياسر ومعاو ولد كدا الصلاه على النبي زي الناعم حلو حلااا🙈(احمد لو سمعني ح يطلقني😂)علقو الزينه والانوار وجهزو الكوشه
رقيه:سمرا شايفه الانا شايفاو دا😍
-شفتو وعمل لي طشاش من السماحه🙈
+شكلو شارد من الجنه😍
-ما بعيد والله عاان ليو سمح كيف🙈
+انت عارف والله انا شفتو قبل كدا كان جانا في الشغل ولمن طلع لقاني فايره ومدفقه قام عزمني قهوه لكن نهائي ما قال لي اسمو ولا اتكلم معاي دفع لخالتو ومشى معقوله يكون صاحب مستر ياسر
-احتمال ما بعيد طالما وصل البيت
والتقول عرفنا بنقطع فيو جاء وقال لي رقيه لو سمحتي يا راقيه يعني عايز مويه وانا متأكدة في قلبها بتكون قالت ليو هااك قلبي وانسى المويه😂بقت متنحه فيو الا لكزتها بيدي حتى انتبهت قالت ليو دقيقه بس مشت جابت ليو المويه بعد شرب حضنت الكبايه المعولقه😂وطلع دا ود عمها لي ملاذ واخو البت الفتحت الباب بعد صلينا المغرب جهزنا الصواني والحاجات كلها والفنانه جات اصلا الحفله كانت بعد العشاء رقيه لبست فستان كبدي وطقمتو بالفضي وانا اسود وبرضو مطقم بالفضي بعد عملت لي ميك اب جهزت نفسها والحفله بدت
بعد مسافه ملاذ جات واتزفت مع ياسر ورقص معاها ما خلى جبجبايه😂وامهم ما قصرت تاني انا ورقيه ودخلنا ومسكنا الساحه على حسابنا💃💃👏
والود السمح جاء رقص مع رقيه عاااد تمام ماف كلام حلوين حلااا😍❤رقصنا لغايه ما الحفله خلصت(الحفلات حرام الله يتوب علينا) والناس قعدت وراقت تاني بدينا نوزع في الضيافه لغايه ما خلصنا الوقت اتأخر وضربت لي احمد قال عندو شغل ما بقدر يجي عواليق خلاص عارفاو زعلان عشان كدا ما عايز يجي ضربت لي ابوي وقلت ليو انو ما عندي محاضره قال لي ما مشكله بيتو مشينا غرفه ملاذ لقينها اتملت اي زول حاجز سرير قلت لي البت خليني ارقد معاك قالت لي ما متعوده انوم مع زول(وبعدين راجلك دا الا تنومي في الارض😒)رقيه قالت لي خلينا نخت مرتبه في الصاله وننوم في الارض بس جات ملاذ ساقتنا غرفه اخوها قالت لينا ياسر نايم عند جيرانه ومفضين لي الغرفه تعالن نومن معاي
حظو عندو سرير دبل قدر الضربه😂نمنا نومه سمحه خلاص
تاني يوم قمت بدري على غير العاده صحيت البنات كلهن واي وحده خليتها تمسك حته وتنضفها ورقيه عملت الشاي ادت ملاذ عشان ماشه ترسم بعد خلصنا نضافه قبلنا على الفطور وموال طويل
العصر كدا قلت لي رقيه نرجع البيت عشان نجيب لبسنا قالت لي خليك قاعده عشان لو احتاجو مساعده انا بمشي قلت لي طيب وطلعت
على لسان رقيه:-
مشيت على الظلط وبقيت منتظرة المواصلات خالد ود عم ملاذ جاء
خالد:على وين يا جميل
-ماشه البيت والله لكن ما بتأخر
=المواصلات هنا صعبه خليني امش اجيب العربيه واوصلك
-ما تتعب نفسك هسي بتجي
=ولا يهمك تعبك راحه
مشى جاب العربيه وساقني والحقيقة اول مره اشوف لي ود حلو وظريف دا مكس اول مره يقابلني كان بتونس معاي وكأنو لينا سنين بنعرف بعض لمن استغربت من نفسي وصلت البيت ونزلت سلمت عليهم وشلت ملابسنا وطلعت لقيتو لسه منتظر قلت ليو لي تعبت نفسك قال لي اعيد الكلام تاني ما قلت ليك تعبك راحه ورجعنا البيت لقيت سمرا محننه يدينها الاتنين
+خير ان شاء الله انت العروس
-ما حاليا لكن قريبا🙈
نرجع لي:-
بعد رقيه مشت بت جيرانهم جابت كيس بتاع رسم وقالت بتعرف ترسم وخالتو امل ما قصرت ادتنا تلاته فتايل بتاعت بيقن انتظرت لغايه ما رسمت للبت القدامي عشان ما اتسمبك وتبشتن لي يدي سااي لكن طلعت حريفه ما زي روان طبعا لكن ما بطاله قعدت ليها ورسمت لي حلو ما قصرت💛
الوكت داك كان ملاذ جات راجعه مسكتها من الباب ودخلتها غرفه اخوها قلت ليها ما تطلع الشرابات والجونتات ولو جاها زول قال عايز يشوف الحنه يستنى لمن تلبس الزفاف ما يقومو يسحروها ساااي عين البني ادم قسمت الحجر😴
بعد المغرب كدا رقيه جات عملنا قعدت وونسه كدا نحن الشباب برانا عشان ملاذ قالت لينا اخر يوم ابيت فيو في بيتنا ما عايزاو يكون عادي قلت ليها ولا يهمك هسي نعمل ليك احلى برنامج دورنا الجبنه مع الدلوكه والبخور حاجه كدا رهييبه شديد💛
تاني بقو جوز جوز كل اتنين مع بعض بتونسو براهم ورقيه كلبه الحر عاجبها الونسه مع خالد ولا شغاله بي الشغله😑ضربت لي احمد مرتين ما ردا قلت ليو حريقه فيك(برري يا يمه تبرى) ودخلت نمت
تاني يوم العزمه حقت ملاذ طبعا وكانت فطور مشينا بيت جيرانهم استحمينا وجهزنا ورجعنا بيت العزومه لقينا ناس هنويه جو وديناهن لي خالتو امل وباركو ليها تاني بقينا مع الفطور وجوطه قريب الضهر كدا خلصنا من الموضوع والرجال مشو الجامع عشان يعقدو (واااي قاعده احلم باللحظه لمن احمد يقعد علي شكلي ح اغمر من الفرح🙈)بعد الصلاه سمعنا صوت الزخيرة والزغاريد ما تديك الدرب طبعا رقيه حلقها متبري منها عندها زغرودة تجيب الطاشي😂ما شاء الله وروان برضو زيها قعدو زغردو زين لغايه ما ناس العقد جو شتتو لينا البلح جاء ياسر اخوها باركنا وقلنا ليو عقبالك وباركنا لي خالتو امل تاني وقالت لينا عقبالكن قلت ليها اميين عاجلا غير آجلا يااارب💛
بعد لمينا العده وقعدنا غسلناها العصر كدا بدينا نجهز عشان الحفله بعد المغرب طوالي وما هنا في امدرمان يعني بعيده والناس دي تطاقش سااي التقول هم العرسان😂لبست فستان رمادي سادة وطقمو طرحة مشكله هديل سرحت لي شعري ورقيه عملت لي الميك اب بعد جهزنا لقينا الناس فاتونا😂ضربت لي أحمد قال لي مشغول كالعاده تاني جاء خالد قال مشى وصل ناس وجى راجع على حظنا السمح قام وصلنا لقينا عربيه العروس جات دخلنا كدا بس والعروس خشت مع راجلها وزفوها ما شاء الله تبارك الله حلوين حلاا💛الله يبعد عنهم عيون الحساد
الحفله كانت ظريفه رقيه قضتها كلها رقيص مع خالد عملتها ظاهره العواليق😂تاني عملو الجرتق وملاذ ودعتها اهلها بالدموع ومشت مع راجلها ربنا يوفقها في حياتها الجديده💛
ياسر ودا ناس هناء البيت ونحن رجعنا مع خالد عشان نساعد خالتو امل في نضافه ما بعد العرس من وصلنا رقدنا سلطه
وتاني يوم انتهى نضافه في البيت ورجعنا عده الجمعيه لي ناسها قريب المغرب كدا رقيه قالت لي خالتو امل بعد كدا نحن ماشين قالت لينا ما قصرتو نجازيكم في الافراح قلنا ليها امين وطلعنا وصلنا ياسر ودخل سلم على ابوي وقعد شويه وطلع انا من التعب ولا جريت ولا يد ولا كراع نمت طوالي😂
صحيت قريب 1ص كدا اتذكرت المسلسل اعادتها بتكون هسي فتحت التلفزيون وقعدت احضر ابوي جاء لقاني صاحيه قال لي انت جن التلفزيون دا ما بتخلي قلت ليو والله يا ابوي المسلسل حلو شديد احضرو معاي واريتو لساني اتقطع قبل ما اتكلم جابو لقطه كدا غايتو بس الحمدلله الاتنين تحت المطره ورومانسيات فوق طاقتي وهو التقول ما حلت ليو ال💋 الا هسي قلت لي ابوي عشان اتدارك الموقف قبل ما يحصل شئ انت عارف انا نعست وقفلت التلفزيون وغمضت عيوني والخجل عاين يكتلني😂
تاني يوم لميت هدومي في شنطه عشان ماشه بيت عمي عبدالله عندي امتحانات وهناك البيت هادي بقرا بي رواق بقيت بفرز في ملابسي اشيل شنو واخلي شنو
رقيه:هسي الردا دا ماشه بيو وين
-اشتريتو لي سنه وما حصل لبستو
+عايزة تلبسي هناك يعني
-اي فيها شنو اصلا عمي بكون مافيش النهار كلو لمن يجي بلبس توب ويوسف مسافر وحمد وعمران في مأموريات
+احسن تخليو
-ابيت ما بخليو لمن يصغر علي يعني
+براحتك
بعد فطرت ودعت اخواتي وطلعت وقلت ليهن نتلاقى وانا عروس(دي نفسنه الامتحانات بس😂)
مشيت لي ابوي في المدرسه لقيتو واقفه مع مرا كدا شكلها زميلتو لانو لابسه توب الأساتذة الابيض عبد الوا داك😂سلمت عليها وسقت ابوي قلت ليو ماشه ناس عمو عبدلله عشان اقرا قال لي خير لكن ما تنسي تاكلي كويس وما تساهري في المسلسلات والتلفون فاهمه قلت ليو فاهمه باسني في جبيني واداني قروش قلت ليو والله مصروفي لسه ما خلص ومعاي قروش قال لي ما مشكله عشان لو احتجتي حاجه قلت ليو ربنا يخليك لينا وطلعت
وقفت في الشارع مسافه تاني لقيت مواصلات
"بري الدرايسه"
مشيت دقيت الباب وعمتو نعمات فتحت لي
نعمات:ما بتجيبك الا الامتحانات يا كعبه
-اجيي يا نعومه من متين بتجبيني الامتحانات😂جيت اتونس معاك
+بطلي كذب
-والله بعد الامتحانات تخلص ح اقعد معاك تلاته ايام حتى ارجع
+ان شاء الله ما يكون كلام خشم😒
-اديني مويه عليك الله السخانه فسختني وكتلتني
+اقعدي في الحوش شويه عشان جوا المكيف شغال ما يجيك التهاب
-حااضر
جابت لي مويه شربت وبقيت بمشي في الحوش غسلت وشي من الوضايه ودخلت رتبت ملابسي وطلعت شيتاتي خليتها برا ودخلت ادوشت ولبست الردا مع فنيله اطول منو😂(هو ردا اسود مخطط بالابيض والفنيله ورديه اوعى تعملو زي وتلبسو كدا اقسم بالله بجدعوكم بالحيطه)طلعت لي عمتو وقلت ليها نعومه رايك شنو😂
نعمات:يا بت دا شنو اللابساو دا ولا الاصح انت ما لابسه اصلا😂
-انت عارفه الردا دا من شفتو وقعت في غرامو واشتريتو لي سنه ياداب الليله حللت قروشو ولبستو
+البسيو سااي عمك ما بجي هسي واولاد عمك كل واحد في بلد
-عمتو صحي انتو قريب ما اتكلمتو مع يوسف
+برري والله قلبي ماكلني عليو طول شديد ما ضرب لي خايفه تكون جاتو حاجه😢
-ما تقولي كدا ما جاتو حاجه احتمال تلفونو اتسرق وان شاء الله ح يضرب ويطمنا عليو
+ان شاء الله😢
-الليله الشغاله ما جات ولا شنو
+برري والله قالت اختها عيانه ودتها الدكتور شايفه البيت عامل كيف مبشتن ووسخان وانا ما عندي ركب ادنقر وامسح
-سلامتها ياااه...ما مشكله وريني جردل المسح وين وانا بنضف
+وانا في الوكت دا بعمل الغدا
-بعد اخلص بجي أساعدك
طلعت لي الجردل مشيت الوضايه مليتو وقيت اسمح واغني
"اخاصمك ااااه.....تي را را را
اسيبك لاااا....تي را را را
ما انت حبيبي اللي انا بهواااااه ...
اللي انا بهواااه...."
(ما حافظه الغنيه😂وما تحفظو زاتو حرام)
وقفت في الوضايه واتذكرت غنيه نانسي لمن بتغسل في الملابس وود جيرانهم السمح دااك بعاين ليها
"ابن الجيران اللي هنا قصادي مش عارفه بس اعملو انا ايه
عمال يبحلق كدا وينادي وفي اي حته يناس بلاقيه ولا حاجه كدا
ما متذكراها برضو😴ومصرت القطعه وانا برقص زي الصارقيل😂تاني شلت جردلي اكان اتخلع بي زول واقف جمب الباب لابس لبس الجيش داك مع الطاقيه وشايل شنطه في كتفو عايزة اجر وعايزة اقيف جريت واريتني ما جريت اخدت لي وقعه من الموت والمويه اتدفقت فيني💔
نعمات:يا ساتر يا ساتر
-خلاص يا نعومه اتكسرت خلاص بقيت مشلوله الليلة ووب علي البعرس ليو مشلوله منو الا كان يعرسني عشان يشحد بي😢💔
نعمات:الله يكملك بعقلك يابت😂
عمران انت جيت متين
عمران:هسي دخلت يا امي
جاء حضنها وباس راسها ويدها وخلوني في الواطه
-ارفعوني اول بعد داك كملو سلامكم دا ما طايرين من بعض😒
نعمات:مدي يدك خليني اقومك لكن ما ترميني معاك
-لالا انت ما فيك حيل تقومي تقعي ونتكسر الاتنين😂كوماندو جيب يدك
عمران:كوماندو؟؟!
-بوريك معناو بعدين
مدا لي يدو ورفعني من الارض لكن رجلي زي الاتلوت ما قدرت امشي عليها وقعدت ابكي لانو وجعتني شديد💔
عمتو جابت لي ملح بي زيت سمسم ومسحتو لي بس برضو ما نفع لمن رجلي ورمت وزدت في البكا قامت عمتو جابت لي مسكن عمران قال ليها خليها ما تبلعو قلت ليو رجلي واجعاني لكن💔قال لي دقيقه بس هو كان بتكلم معانا وهو في الغرفه جاء بلبس في قميصو قال لي رجلك دي ما اتكسرت اتلوت بس مسك كراعي وقولت كرررج دي لو ما مكسوره خلاص اتكسرت🙂💔
"يَوماً مَا سَنلتَقي و نَحكِي كَيْف سَارت بِنا السُّبُل حَتى اللِّقاء"
💜ابقوا عافيه💜