عشقت انفاسك
الحلقه 15
عشقت انافسك فباتت لي أقرب الي قلبي من انفاسي
عشقت عيناني تبوحاني بااسرارا وترويان أحاديثا ادمنتها قبل أن اسمعها
ياله من حب يعطينا الكثير لياخذ أكثر
لم أعد أشعر بوجودي إلا بقربك لم اعد اشعر بقوتي الامعك بضعفي الا بين احضانك
نعيش لنقسوا ام نقسوا لنعيش ..تأملوها
~~ خواطر بقلمي safa Abdullah ~~
رديت علي هشام
أحمد ** الو
هشام 😢** أحمد ولاء
أحمد / نطيت من مكاني وقفت
أحمد ** كنها
هشام **😢 خشت في غيبوبه
أحمد ** لاحول ولا قوة الا بالله. وسع بالك ياهشام مديرش في روحك هك أن شاء الله خير
هشام ** اتصلت نبيك اتخبر ليلى . وانا خبرت امها
أحمد ** باهي. بس شن قالوا الدكاتره
هشام ** قالوا غيبوبه مؤقته خشت فيها بسبب التعب ومضنيش أطول فيها يعني اسبوع وتنوض
أحمد ** أن شاء الله
سمعت صوت ليلى اتنادي فيا صكرت من هشام ومشيتلها
خشيت القيتها تنفض في شعرها من الدقيق بحتت فيا
ليلى ** هك حبيبي انهون عليك
مشيت شورها نجري تعنقتها
أحمد ** سامحيني
وقعدت متعنقها بالقوه . خايف من ردت فعلها بعد تسمع الخبر هي اتحب اختها واجد
ليلى / متعنقني بالقوه لين معاش قدرت نتحرك يدي ملويه بيني وبينه حسيتها
ليلى ** اييي حبيبي يدي
أحمد / فطنت لروحي عاصرها عصر بين يديا
وخرتها ومسكت يدها بست علي المكان الي حساته
أحمد** هك صحت
مسكتني من لحيتي
ليلى ** صحت ياعسل
سيبتها ومشيت لصاله
ليلى / استغربت من حركته سيبني واقفه ومشئ
لحقته وقعمزت جنبه
ليلى ** أحمد كنك في شئ صاير
أحمد / مسكت ايديها
أحمد ** ليلى نبيك قويه ان شاء الله خير صدقيني مش هيصيرلها شئ
ليلى **😢 أحمد شن في
أحمد ** ولاء أختك خشت في غيبوبه
ليلى / معاش تحكمت في روحي قعدت انعيط واندف فيها وهو بيتعنقني
ليلى ** 😢حول نبي نمشيلها
أحمد / مسكتها بالسيف ** اهدئ ياروحي ان شاء الله خير
ليلى ** 😢😢 هذي ولاء ياأحمد ارفعني تو ليها
أحمد ** هششش حبيبي خلاص اهدئ . عشاني باهي عشان اسلومه حرام عليك العيل في بطنك يتأثر هك
قعدت انهدئ فيها ركحت في حضني بس ادموعها موقفنش . رفعتها ومشيت بيها لدار حطيتها ع السرير
أحمد ** حبيبتي تريحي اشويه . انا ماشي بنجيب امك رن عليا علاء قالي أمك تبي اتجيك وسيارته في الورشه
طلعت من الحوش مشيت جبت عمتي فاطمه
ومشيت للعمل
/
/
/
(عند ياسر )
خشيت للمطعم القيته زحمه 😍 فرحت يعني زبائن يعني ربح يعني افلوس
رشا وخوها امدايرين ايكال يجنن وهذا الشئ الي خلى الدنيا تزحم قعدت في المحل لعند 8 في الليل بعدين رجعت للحوش
خشيت القيت سمر اتجهز في العشئ فاصوليا
قربت بستها علي خدها
ياسر ** مساء الخير ياسمحه
سمر ** مساء النور
قالبه وجهها عليا وتكشخ
قعمزت تعشيت انا وياها بعدين ناضت
سمر ** تصبح على خير
ياسر / لحقتها ووقفت قدامها
ياسر ** كنك
سمر / كان حاط ايديه ع الباب نزلت من تحت ايديه وخشيت لدار
** مكنيش بنرقد بس
لحقني وقعد يتحنط . رقاهلي انفجرت فيه
سمر ** تبي تعرف كني. مليت ياياسر مليت خنقتني كل شئ عندك افلوس افلوس
ياسر ** ماهو علي شانك علي شان راحتك . اتزوجتك فقير وانت ملكه عايشه عيشت عز وانا من صغري نجري وراء القرش لين انحصله وتو لما حصلته متبينيش نفرح بيه
سمر / رقدت ع السرير وغميت وجهي بالورغان
** افرح ياياسر افرح بيهن بس حابه انقولك انك تغيرت انت مش ياسر الي حبيته ياسر الي كان يعشئ فيا خبزه وجبنه بس محسسني اني ملكه ومهمه عنده . تو عشاء من احسن المطاعم بس حاسه اني ولا حاجه عندك
ياسر / طريقتها في الكلام استفزتني تحكي من تحت الورغان مش معبرتني بكل قربتلها وحولت الورغان من عليها
ياسر ** انت شن تفترشي معقوله تفكيرك يوصل لهدرجه . اتغاري وقلنا عادي تبي افلوس وحصلت افلوس شن تبي اخره شن مشكلتك انت
سمر / قعمزت حرقلي دمي
سمر ** تبي تعرف مشكلتي .مشكلتي انت ياياسر خايفه منك وفي نفس الوقت خايفه عليك .خايفه الفلوس اتغيرك تسرقك مني .خايفه عقلك يخطرله انك تتزوج وحده تانيه بعد كترن افلوسك
ياسر ** انت تعرفيني مستحيل انديرها لاني انحبك
سمر ** ياما رجاله يحبوا نسوانهم ويموتوا فيهن بس لما حصلوا في يدهم افلوس طلعت عينهم لبره لأن مايملا عينكم إلا كمشت اتراب
ياسر ** سمر زودتيها . وانت تعرفي ان الكلام هذا مستحيل انديره ومستحيل نبحت في غيرك
سمر ** وليش مستحيل اصلا انت من لما روحت من المطعم وانت تشكر في الست رشا .رشا قالت رشا حطت رشا دارت . طلقني وعدي اتزوجها وانا تو نتزوج يزن ولد عمي
سمر / حبيت نحرقله دمه بالكلمه هدي يزن يبيني من زمان ولحد توا متزوجش
ياسر / تجمد الدم في اعروقي بعد سمعت كلامها
محسيتش بروحي إلا وأنا رافع يدي وضاربها
سمر / ضربني كف لين معاش شفت قدامي
قعدت مصدومه انبحت فيه وهو مصدوم يبحت فيا وفي يده
سمر ** ياسر شن درت
ياسر / خلاص قعدت نرعش
ياسر ** حبيبتي مش قصدي والله اعصابي ناضن
سمر ** حول هك معاش اتحط يدك عليا اطلع برا
قعدت اندف فيه لين طلعته من الدار وصكرت عليه وقعدت نبكي
هو قريب قرفع الباب من الدق
ياسر / خلاص هبلت قعدت اندق بالقوه
ياسر ** سمر افتحي الباب خير منكسره فوق راسك .قتلك افتحي .سمر مش قصدي انت استفزيتيني تعرفيني منحبش سيرته الزفت الي اسماه يزن هذا
مردتش عليا عديت رقدت في الصاله
/
/
/
(عند هشام )
ولاء ليها اسبوع في غيبوبه
ياسمين جارتنه جت زارتها . طبعا انا منهار تمام مش فاهم شئ بكل مش قادر نتنفس بلاها
وقتي كله معاها في المستشفى انهدرز امعاها مع انها مش هتسمعني بس انحب انخبرها علي يومي كيف فات بلاها 😢
كنت في المستشفى ماسك يدها ونهدرزلها
هشام ** ولاء حبيبتي اليوم مشيت مع ياسمين لمصحة مرضى السرطان شفت اعيال غادي كانوا مرضى بس متفائلين وجوهم منوره نظراتهم بريئه تبرعت بمبلغ ودعيت أن ربي يتقبله مني وترجعيلي ياروحي
قعدت نبكي نزلت دمعه علي يدها بحتت فيها كيف الي اتحاول تفتحت اعيونها
نضت نجري لدكتور ناديته هو خش وصكر الباب اشويه وطلع
الدكتور ** الحمد لله علي سلامتها ناضت بس مزالت متعدتش مرحلت الخطر
هشام ** بارك الله فيك
من الفرحه دفيته وجيت بنخش هو مسكني
الدكتور ** معليشي خليها تتريح توا
هشام ** حاضر حاضر علي راحتك بس المهم ناضت😊
طلعت نقالي و
/
/
/
(عند أحمد )
ليها اسبوع جوها متعكر طول الوقت ادموع وخلاص . وانا نفس الحاله مضايق عشانها انحس بروحي مخنوق
كنت امقعمز انا وياها ومريم علي الفطور
رن نقالي ( هناء ) شن تبي الزح ليا ايام مش طايقها مش عارف مخنوق منها
درته صامت وكملت فطوري
خشت هيا للمطبخ بتضم الحوسه .
اشويه رن عليا هشام فرحااان
قالي ان ولاء ناضت
مشيتلها للمطبخ نجري
أحمد ** ولاء ناضت ياحبي
ليلى ** كذاب 😀
أحمد ** في مرأ اتقول لراجلها كذاب زعلت
ليلى / فرحت واجد وتعنقته . اشويه وصله مسج
فتحه
أحمد / فتحت المسج هناء
( عليش متردش قاعد عند الحقيره صح . عموما قبل بنقولك امك عازمتكم علي الغدئ)
خبرت ليلى أن امي تبينه ع الغدئ وهي وافقت طبعا مزاجها تعدل حاولت تتصل بي ولاء واتكلمها بس هشام قاللها انها قاعده تتريح وطمنها عليها
مشينه للغدئ
ليلى / خشيت للحوش طبعا خوله أخت أحمد روحت من دبي ليها يومين كانت هي وراجلها عايشين غادي بسبب العمل وقاعده عند هلها لعند يفجرون حوش . صحبه مع هناء ومش طايقتني بكل . بارمه وجهها عليا
زينب / بعد الشئ إلا صار مع ولاء طلبت من حسام يأجل موضوع الخطبه اشويه لعند يهدئ الوضع
وهو وافق
خوله ** نوضي اغسلي المواعين
زينب ** وانت خيرك معندكش ايدين
خوله ** انا ضيفه ياكلبه. بعدين افروخي اعيطوا تبني انسيبهم ونوض خلاص عادي بس انت امسكيهم
زينب ** لا لا أعود بالله نايضه مهون الغسل علي اصغارك / ونضت
لحقتني ليلى في المطبخ
ليلى ** نغسل امعاك
زينب ** لا ارتاحي حياتي انت حامل مش باهي ليك التعب
ليلى **😄 حياتي ...شكله سوما مأثر عليك
زينب ** مسكتها منه ديمه ايقولي فيها
ليلى ** باهي شن قررتي بتلبسي في عرس منير ولد عمتك
زينب ** مش عارفه بالك القفطان الاحمر
خشت علينا هناء اتكشخ غسلت يديها وطلعت
زينب / عنجد منظرها قعدت نضحك
زينب ** ههههه ليلى مش ملاحظه انها شبه فاطمه الحمصه
ليلى ** هههه اسكتي تو تسمعك
/
/
/
(عند هشام )
الدكتور سمحلي انخش نشوف ولاء خشيت القيتها فاتحه اعيونها . أول ماشافتني ابتسمت
قعمزت جنبها ومسكت ايديها
هشام ** الحمد لله علي السلامه ياعمري
ولاء / نتكلم بصعوبه ** الله يسلمك
هشام ** هيا نوضي بسرعه بش ترجي لشقتك تعرفي مظلمه بلاك وكسدت
ولاء ** اكيد فوت الوقت معا ..../ ودرتله بعيوني
هشام / نضت من جنبها ** زعلت منك . تي قريب متت وانت بعيده عليا
ولاء / جيت بنقعمز ** انبصر حبيبي
هشام / مسكتها مخلتهاش اتنوض ** ولاء معاش اتعاوديها انا انموت بدونك
ولاء ** حلوه معاش اتعاوديها تي شن انا مشيت في غيبوبه باارادتي
هشام ** ههههه وحتى انت مريضه تتحنطي ياسامطه
ولاء ** ههههه زيدني ملح
هشام / نزلت عليها وحطيت خشمي علي خشمها ** انسميها خفت دم هذي😕
ونزلت بستها . دفتني
ولاء ** الدكتور ياهشومي تو يخش علينا
هشام ** الله غالب نصبر لين انروحوا وخلاص . كرهته الدكتور / ودرتلها بعيوني قعدت تضحك
/
/
/
(عند ياسر)
في اليوم التاني من عركتي انا وسمر نضت الصبح ملقتهاش القيت ورقه كاتبه فيها ( حسام جاء رفعني لحوش هلي . ومش ناويه نروح في اليومين هذينا )
وتوا ليها اقريب اسبوع محبيتش نزعجها بس رايفت عليها
بدلت دبشي وولعت السياره ودرست قدام حوشهم جيت بننزل شفت سمر نازله من سيارة حسام وخشت داخل
نزلت من السياره وعديت لحسام
حسام / شفت ياسر جاي شوري مشيت بنباركله
حسام ** اوووه بونسيب شج
ياسر ** وعليكم السلام ورحمة الله وبركاته حد الله بيني وبين جماعة الشج ههههه
حسام ** هههه دعاك الشيخ يوسف
ياسر ** هههه رسمي
حسام ** عاد تو بدير عقل بتريح بابا
ياسر / استغربت مفهمتش شئ
حسام ** تو كيف روحت انا وسمر من العياده .والبيبي صحته ميه الميه
ياسر / سمر حاااامل 😍
ياسر **تو كيف عرفت هي
حسام ** لا ليها يومين بس اليوم ماشيه مراجعه
قصدك انت معندكش العلم
ياسر / سكتت معرفتش شن انرد
حسام ** ياسر شن قصتك مع سمر ليها اسبوع عندنا متعارك انت وياها ولاشن
ياسر ** متشغلش بالك موضوع بسيط غير توا عدي ناديهلي نبيها اشويه
مشئ حسام بينادي سمر اشويه ورجع
حسام / رجعتله متحشم ومواطئ راسي الكلبه مبتش تتطلعله
حسام ** ياسر سمر توا في الحمام
ياسر / فهمت متبيش اتشوفني
سلمت علي حسام وركبت في السياره
راقيلي اتصلت بيها في الاول مردتش بعدين بعد كترت ردت
سمر ** الو
ياسر ** الو 😠 مبروك يامدام قالو حامل
سمر ** الله يبارك فيك
ياسر ** 😠 باهي وبعدين
سمر ** ولا ابلين
ياسر ** مش ناويه اتروحي لخربتك😠
سمر ** حاليا لا
ياسر ** سمر متخلينيش نرتكب جريمه 😠
كنت حامق ونسوق بسرعه خشيت في سياره وشديت فرينوا
ياسر ** ياساتر ياساتر 😨
سمر / سمعت صوت السياره رعشت خلاص قعدت انادي فيه وهو ميردش
ياسر / نزلت وخليت النقال شفت الراجل الحمد لله الخبطه بسيطه ومفيشي شئ
رجعت خديت النقال القيتها اتنادي عليا وتعيط
ياسر ** هبلتيني طلعتيني من عقلي اشوي ورحت فيها
سمر **😢 ياسر شن صار انت وين صارلك شئ
ياسر ** حبيبي روحي للحوش انا مرايف عليك واجد بعدين نبي نفرح بولدي بندير انا وياك احتفال
سمر ** يسو انا تو حالتي النفسيه مش تمام نهدأ ونرتب أفكاري بعدين نتكلموا فيه الموضوع هذا
ياسر ** باهي انحبك
سمر ** هي سلام
صكرت
/
/
/
( عند يوسف )
اليوم جمعه العيله متجمعه في حوش العيله خواتي وعيالهم خوتي ونسوانهن . زحمه
طلعت من الشقه ونزلت ساره قتلي تلبس وتلحقني
قعمزت انا وباتي وخوتي
صلاح ** والله الشئ شايط فيه النار حتى الكراسات غلوهن الزح
يوسف ** استغفر الله
صلاح ** هههه تي انسيتك ياشيخ
اشويه ونزلت ساره منظرها 😲
لابسه سروال HD وقميص قصير
خلاص تحشمت قدام خوتي وباتي درتلها بعيوني امتع اركبي ركبت ولحقتها هزبتها ومسحت كبدي فيها
ساره / مش متعوده حد يهزبني هي مره بس ياسر وباتي يهزبوني فيها وقت مسكوني انكلم في طارق قعدت نبكي
معاش خلاني ننزل وقعد حتى هو
رنت عليا يسرى اخته
يسرى ** سرو وينك
ساره ** اه يوسف خاطره في عجه انديرله فيها
يوسف / كنت مقعمز في الصاله ونسمع فيها تكذب علي يسرى مشيت لدار القيتها مقعمزه ع السرير وفي اعيونها أثر ادموع
وجعتني زي العيل قعدت اتعيط
قعدت انقرب منها ** استغفر الله وخلاص .خلاص اسكتي ساد
ساره ** حول بعد هزبتني جاي اتسكت فيا
يوسف ** ياودي انا اسف بس انت الي خليتيني اندير هك شن المنظر الي نازله بيه حشمتيني قدام هلي انت مراتي حبيبتي نبيك اتكوني احسن وحده في نظري ونظر الناس كلهم بس بالطريقه هذي نزعل را
ساره ** باهي فهمت
يوسف ** هههه هك الناس يردوا
قلدتها** باهي فهمت . تي قوليها بحنيه وعادي را كان زدتي معاها كلمه عادي / ودرتلها بعيوني
ساره / فهمته بس حبيت نستعبط
ساره ** باهي فهمت يا......يوسف
يوسف / درتلها بعيوني امتع زعلت
ساره ** هههه باهي فهمت ياحبيبي
يوسف / مسكتلها ايديها ** من قلبك
ساره ** تبي الحق مش عارفه
يوسف ** باهي مع الايام تو تعرفي ياروحي
ساره ** من قلبك
يوسف ** من وسط وسط قليبي تي انت مراتي وام العيال هي نوضي ديريلي عجه ههههه
ساره ** يوسف لاااا
يوسف **ههههه انت قلتي وتو انساعدك فيها
/
/
/
(عند أحمد )
اليوم فرح منير ولد عمتي نضت الصبح بايت عند هناء القيت مكالمه من ليلى
تبعدت من هناء ورنيت عليها
أحمد ** الو قليبي متصله بيا
ليلى ** احميده نبي فستق اتجيبلي
أحمد ** هههه تي انا الي انجيبلك انت غير ادلل ياعسل . تتوحمي عليه صح
ليلى ** صح
أحمد ** اشويه وافتحيلي الباب
ليلى ** باهي
مشيت شريت ليلي فستق ورفعتهلها اطمنت عليها هيا واصغار ومشيت للعمل مع باتي
بديت نتعود ع الجو في ليبيا خشيت في السوق درت أصحاب وشغلي ماشي ميه ميه
قيس 5 رنت عليا هناء قالتلي هيا واتين بنمشؤ للعرس
ولعت سيارتي ودرست قدام شقت ليلى
خشيتلها نجري
ليلى / فتح الباب وجاني رفع مريم
أحمد ** هيا حبي بسرعه نبيك تركبي لقدام. تي هيا بسرعه
ليلى / قعدت نضحك عليه ** تي باهي يامهبول سباق هو تبيني نغلب هناء ذكرتني باايام المدرسه
ايام نسبقوا في المقاعد الاولى
أحمد / تضحك عليا الشفشفه لا ومزالت ملبستش عبايتها لابسه لبسه اتهبل وكالعاده مكياج خفيف ويهبل قربت منها ومسكتها من وسطها
أحمد ** هي شن رأيك انفوتوا المشيه ونخشوا داخل / وغمزلتها بعيني
ليلى ** أحمددددد هيا وقت
أحمد ** واااو حاضر اطلعي
طلعت ومشينه لهناء
/
/
/
(عند زينب )
حسام مصكر راسه ميبينيش نمشئ عشان قلتله علي موضوع حسن خو منير ولدت عمتي زمان جي خطبني بس انا موافقتش قالي عرس خوه واكيد ببتلاقي معاه غادي بالصدفه
صكر راسه تعاركت انا وياه
ليلى وأحمد جو بيرفعوني انا وهناء
طلعت نقالي وبعتله
حسام / من يوم عرفتها متعاركتش انا وياها بس توا تعاركت وعركه كبيره هي غلطت فيا وانا غلطت فيها راقيلي بكل اندور بالسياره في الشوارع
وصلتني رساله زينب
( حسام انا عديت )
اتصلت بيها وانا قريب ننفجر
حسام ** 😠كان بتمشئ تنسيني يازينب سمعتي تنسيني تنسي واحد اسماه حسام وعدي كان بتعدي
زينب ** حسام كنك الزح حرام عليك انا خاطري
نمشئ
حسام ** 😠معاش بنعاود كلامي
زينب ** انت مليكش الحق تتحكم فيا انا بنمشئ ياحسام
حسام **😠 خلاص امشئ درقي وجهك
وصكرت
راقيلي . خايف نخسرها بعد لقيتها خايف حد يخطفها مني . المره هذي مش هنسمح يصير فيا كيف مصار فيا مع ولاء خداها مني هشام وربي يهنيهم معاش عندي اي مشاعر اتجاه ولاء لأن زينب عبت الفراغ الي في حياتي
قعدت اندور في الشوارع بالسياره سبسي وراء سبسي مندخنش الي لما انكون مخنوق
رن عليا عصام ولد عمتي حشاش وسكار وامتع مشاكل
كان صاحبي انا وهشام زمان بس لما عرفناه هك سيبناه مرديتش عليه بس سكن معاش با يبطل
رديت عليه
عصام ** الو حسومه وين ياراجل من بكري انرن مش فاضئ شكلك
حسام ** لا فاضئ اتفضل خير ان شاء الله
عصام ** قتلك نبيك في موضوع بس مينفعش ع النقال تعالي في المربوعه الي في المزرعة
حسام / صوته كان صافي يعني واعي قتله باهي ومشيتله
خشيت القيت الدنيا تدعدع سكاره وحشيش امخلطه
جيته
حسام ** كنك شن تبي
عصام ** تي غير قعمز يارا
كرني من يدي قعمزني وقعد يحكي يبي يدين مني افلوس وكلام من هالقبيل انا مكنتش امعاه كنت انفكر في زينب زعمك مشت ولا لا
لاحظ اني مش معاه ناض جابلي طاست وسكي
عصام ** تي خود انسى همك يارا
وكأني كنت انراجي فيه خديتها وقربعتها مره وحده وزدت وزدت وزدت لين معاش حسيت بروحي
روح بيا هو في نص الليل سكران ندعدع ونغني
حسام ** قولي أحبك كي تزيد وسامتي ههههه
تي انا وسيم ياعصام صح
عصام / نمسك فيه نبي اندخله من باب حوشهم
** ايه وسيم انت ياباشا
حسام ** تي باهي قوللها هي تبيش تسمع كلامي ههههه
دفيته وقعدت انصيح بصوت عالي
** زينب زينب ياحبي ياقلبي
عصام / غميتله فمه
** تي اسكت يارا الناس .الحمدلله اهلك مش قاعدين بايتين عند اختك سلوى
دخلته للمربوعه الي بره اقريبه من حوش عمه نفس الجنان
حسام / خشيت دايخ وصلت للفراش قلعت كندرتي وقميصي وينفتح الباب
حسام **😍 زينب
زينب قدامي لابسه بيجامعه وطالعه اتهبل
مشيت شورها مسكت ايديها
حسام ** حبيبتي كنت نعرف اني مستحيل انهون عليك
وجيت عليها وااااااااا
مش عارف شن صار كنت دايخ
/
/
/
( عند زينب )
ممشيتش درت سبله اني مريضه مشت هناء وليلى وامي
بش انا مقدرتش نكسر كلام حسام
قعدت امكسده ع النت نتصل بيه مقفل بعتله رساله
ليلى / رجعنه من العرس طبعا نزلت علي حوش اعيالي
خوله تقلع في ذهبها قلعت الساعه
خوله ** ييييي هذي ساعة هناء توا شن بيركبني ليها معنديش كرعين . ليلى تركبيهلها
ليلى / مقدرتش نرفض هي مسبله عليا ومع اني حامل وافقت وركبت مديت الساعه لهناء ولما انا نازله من الدروج 😲😲😲😲😲 في حد دفني من وراء ودرهبت ع الدروج و...
/
/
/
(عند حسام )
نضت الصبح علي بوسه فتحت اعيوني وبحتت زيييييين 😲😲 انا شن درت كانت هديل بنت عمي جنبي والمنظر يدل علي اني داير معاها شئ
نضت نرعش انلم في دبشي وخلاص معاش عرفت شن اندير
جت هي شوري وبتتعنقني بس بعدتها
هديل ** سوما كانت احلى ليلة في عمري
حسام / دفيتها ومشيت لميت دبشها رميتهلها علي وجهها
حسام ** 😠اطلعي برا ياحقيره
هديل ** سوما انا حقيره شكلك ناسي شن درت انت أمس. انت الي بديت تتلصق فيا دفيتك بس انت بديت اتقولي اهدئ وانا نبيك ونحبك ذوبتني بكلامك وسلمت نفسي ليك وهذا الي صار تو خلاص معاش ينفع الندم
حسام ** كنت شايفك زينب تخايلتك زينب
هديل ** 😠من زينب هذي
حسام / قعدت اندف فيها ** اطلعي برا برا
طلعتها وقعمزت ع الفراش
خنت زينب خنتها انا واحد حقير واطى منحط دمرت حيات بنت عمي وخنت حبيبتي
زينب فطنت لروحي خديت نقالي فتحته وصلت رساله زينب
( حبيبي سوما الباشا ميهونش عليا زعلك حتى ولو زعلتني اشويه بس عادي انت راجلي نتحملك يامعلم ياعصبي انحبك وااااااجد واجداااات ورا ممشيتش لأنه ميهونش عليا نكسر كلمة الباشا )
قريت الرساله كم مرا ودموعي علي خدئ
بعدين فتحت الباب و....
يتبع