عشقت انفاسك
الحلقه 5
وصلت قدام الباب
أحمد ** ليلى هي انا برا
ليلى** باهي طالعه
صكرت وطلعتلي ليلى وكانت لابسه عباية سمحه ومش امكتره مكياج بس طالعه سمحه
ليلى** السلام عليكم
أحمد ** وعليكم السلام .ها وين نمشؤ توا اوصفيلي الطريق وانا نمشئ
ليلى** ع اساس متعرفش طرق البلاد توا ماهو كنت ساكن هنا انت
أحمد ** هههه مطول السانك هدا كله وقالوا هاديه .هيا غير اشريلي ليا زمان ع البلاد
ولعت السياره ومشيت
وليلى كانت اتقولي امشئ ايمين خش ايسار
وانا كنت نعرف الطريق بس مش عارف ليش كدبت عليها يمكن لاني كنت نبيها تدوي ومتسكتش لأنها لما تدوي جوي يروق
ليلى ** لا لا وين مش الفتحه هدي الي قبلها
أحمد ** ماهو قولي من الاول. ها فتناها
ليلى** ماهو انت متعرفش اتسوق
أحمد ** والله
ليلى** هههه والله
درست السياره وبحتت في ليلى
أحمد ** تعالي سوقي مادام هكي
ليلى** لا لا انبصر عليك
أحمد ** وانا نحكي جد تعالي سوقي
ليلى .....
أحمد ** هههه خايفه
ليلى** لا يابارد مش خايفه بس منعرفش انسوق
أحمد ** باهي خلاص مرا اخره نعلمك
ليلى ** أن شاء الله
ولعت السياره ودهورنا انا وليلى واجد
كنت فرحان وكأني اول مرا نمشئ للاماكن هدي
مع اني نعرفهن بس عمري ماحبيتهن هكي
مرت الأيام وانا كل يوم نتقرب من ليلى اكتر واكتر قعدت انحس انها شئ مهم في حياتي
تهتم بيا ونهتم بيها . انحس امعاها بشعور تاني
ونحس انها حتى هيا تعودت عليا معاش تتحشم مني واجد
بعد مافات اسبوع وانا علي نفس الحاله يومي كله عند ليلى
نضت الصبح علي صوت نقالي يضرب مسكته وبحتت في ليلى الي مزالت راقده
أحمد ** الو
هناء** حمودي حبيبي انا روحت من طرابلس هيا تعال روح بيا
أحمد ** خمسه ونكون عندك ياهناء
وطلعت
(عند ليلى)
لما ضرب نقاله مكنتش راقده بس امغمضه اعيوني وسمعته وعرفت ان ماشي بيروح بهناء
يعنى خلاص اكيد معاش هيجي عندي مرته وروحت
بس انا تعودت عليه واجد تعودت علي نرفزته ليا وابصارته وحنيته في الأيام الي قعدهن عندي كان يهتم بيا واجد
كان لما زياد ينوض في الليل أحمد يقولي خليك راقده وهو يعدي يشده لين يرقد .وحتى مريم تعودت عليه
نضت من السرير بعد طلع أحمد ومشيت للمطبخ
اشويه وخشت عليا مريم كانت كيف نايضه منظرها يضحك شعرها مشفشف
مريم وهي اتحك في عيونها** ماما عمو أحمد وين
طبست عليها بستها علي خدها ** عمو أحمد طلع بعدين اشويه يرجع
كنت عارفه ان الكلام هذا مش هيصير
لأن هناء معاش هتخليه يجئ عندي
(عند ولاء أخت ليلى)
نضت كالعاده بدلت ومشيت للكليه نقرأ طب
اول ماخشيت مسكت نقالي ورنيت علي هشام
ولد متعرفه عليه من 5 اشهور ع النت ويقرأ مع في نفس الكليه تطورت علاقتنا لين قعدنا نحكوا مع بعض ع النقال
رنيت عليه بس القيته مشغول صكرت وخشيت للمحاضره
(عند هشام )
كنت امقعمز جنب حسام صاحبي ونكلم في سرور بنت متعرف عليها جديد وفجأه خشت ولاء ع الخط الآخر مقدرتش انصكر علي سرور
هشام ** تلا ياعيوني مش هكي
هشام ** هههه
هشام ** باهي خلاص ياروحي بعدين نرن عليك
صكرت وبحتت في حسام الي كان يفنص فيا
هشام ** ولاء خشت ع الخط الآخر
حسام ** باهي رد عليها
هشام ** لا بعدين توا انكلمها توا ادوخلي راسي من كنت اتكلم وين قاعد بكل البنت هذا شكاكه
حسام ** لأنها اتحبك ياهشام
هشام ** وحتى انا انحبها ياحسام
حسام ** اتحبها باهي وسرور وعائشة ونسرين وخوله
هشام ** تي هذينا ع الجو يارا
حسام ** الجو هذا اسمه خيانه ياهشام
هشام ** تي فكني من الكلام الفاضي وخليني انعيش اشويه في الاخر بنتزوجها ومعاش نقدر اندير شئ يعنى بننسجن ياحسام خليني توا حر
حسام ** علي راحتك نتكلم علي مصلحتك بس
(عند حسام )
كنت نسمع في كلام هشام وانا مضايق
لأن بنت زي ولاء تستاهل كل خير .صح نعرف أن هشام يحبها بس طريقته في الحب غلط
هو شايف ان هو ولد ومن حقه يدير علاقات قبل الزواج .ياريتك عرفتي تختاري ياولاء اه لو تعرفي قديش انحبك.بس عارفك اتحبي هشام لهذا بنسكت ومش هنتكلم
(عند هشام )
سيبت حسام ومشيت اندور في الكليه ومسكت نقالي انرن علي ولاء
هشام ** الو ياعمري
ولاء** ها وينك من الصبح انرن عليك مشغول
هشام ** كنت انكلم في حسام
ولاء** ايه ايه
هشام * مش مصدقتيني
ولاء** لا خلاص انسى
هشام ** ولاء
ولاء** صدقتك خلاص صدقتك
هشام ** باهي ياروحي انا توا في الكليه شن رأيك نفطروا مع بعض
ولاء** 😍 باهي موافقه
هشام ** يانا علي من العسل نا
(عند أحمد )
وصلت عند باب حوش هل هناء وكلمتها قلتلها تطلع وطلعت
هناء** خير ياحمو
وباستني علي خدي
أحمد ** 😍 رايفت عليك
هناء** حتى نا
وصلنا للحوش نزلت وانا درست السياره ولحقتها
سلمت علي اهلي وركبنا
أحمد ** هنو رايفت عليك
هناء** انا اكتر بس وخر توا .بندير قناع علي وجهي حاسه بيه رايح شاحب
ومشت فاتتني .تمنيت هدرزت امعاي علي جو طرابلس وشن دارت غادي بس قعدت ساكته وهي اترتب في الدبش الي شاريته
في دولابها انا طارتلي مكنتش معبرتني بكل نضت طلعت وصرفقت الباب ورايا
موعيتش بروحي إلا وأنا اندق علي ليلى
وفتحت وأول ماشبحتني ابتسمتلي ابتسامه نستنى كل الي صار
ليلى** بتقعد ع الباب
أحمد ** كان في قهوه بنخش هههه
ليلى** اشويه وتكون عندك
خشت ليلى للمطبخ وانا لحقتها قعدت نبحت فيها من الباب وهي متندريش عليا
كانت سمحه لابسه قفطان حوش واصل لعند ركبتها وعليه رسمت اسبونج بوب
قربتلها بدون ماتحس وحطيت ايديا علي كتفها
رعشت
ليلى ** 😲 بسم الله الرحمن الرحيم رعشتني
أحمد ** هههه
ليلى ** اضحك اضحك
أحمد ** هههه خلاص تو نسكت
حاولت نمسك ضحكتي بس مقدرتش بديت نضحك مرا اخره
ليلى حطت فنجان القهوه في يدي ومشت
حسيت بروحي زوتها اشويه لحقتها كانت في الدار ومصكره الباب فتحت بدون ماندق
ليلى** هيييي صكر صكر انبدل
صكرت الباب وقلت من وراه
أحمد ** اسف اسف
مشيت لصاله ولعت التليفزيون وبديت انقلب
مريم جت تجري عليا
مريم ** عمو أحمد
تعنقتها
أحمد ** ياعيون عمو أحمد
اشويه وجت ليلى لابسه سروال وقميص طويل
ليلى** أحمد ترفعني لحوش أهلك
أحمد ** انت تأمري بس سامحتيني
ليلى وهي ترفع في مريم مني ** عليش مش مذكرة انك درت شئ
أحمد ** والله اتهبلي
صكرت فمي طول بعد الكلمه هدي معرفتش كيف طلعت مني
ليلى بحتت فيا وابتسمت وطبست رأسها تحشمت
فتشجعت بش انقول شئ تاني
أحمد ** يانا علي نا
ليلى** نوض نوض هيا وصلنا
(عند ليلى)
كنت جنبه في السياره انحس بروحي طايره فوق اول مرا حد يكلمني باللطف هذا
كنت انبحت في الطريق ومبتسمه اشويه وسمعت أحمد يصفر يعني يلحن بالتصفير
بحتت فيه
ليلى** شكلك رايق
أحمد ** 😍 مش غير
وصلنا للحوش نزلت سلمت علي عمتي وزينب
وقعمزنا كلنا في الصاله حتى أحمد
وكنا نضحكوا علي كلام مريم في كلام تدوي فيه امخلبط
أحمد ** ههه سمعتي ياليلى
فجأه نزلت هناء وخشت
هناء بتكشيخ ** ايه سمعت ياأحمد
وبحتت فيا
ليلى ** خير ياهناء كيف حالك
هناء بحتت فيا من فوق لعند لوطه ومردتش
ومشت شور أحمد كراته من يده ونوضاته
هناء** حبيبي تعال نبيك في موضوع
(عند أحمد )
مشيت مع هناء خشينه للمطبخ وردينه الباب رد
أحمد** هكي معقوله ياهناء مترديش ع المرأ
هناء** اي مرأ
أحمد ** ليلى
هناء** ياعيني ياعيني حمقت عليها وجعاتك مرتك حبيبتك
أحمد ** هناء شن اتقولي افطني
هناء** ماعلينا خلينا في موضوعنا
فرحت في الاول نحسابها بدت تهتم وتغار بس بتصكر الموضوع بدري بدري
أحمد ** ها شن الموضوع
هناء** نبي نرجع لفرنسا
أحمد ** ييييي رجعنا لنفس الموضوع
هناء** مدخلنيش انا
أحمد ** باهي راجعين اقريب أن شاء الله اصبري كم يوم
(عند ليلى )
سمعت كلام هناء وأحمد بالصدفه وانا نلحق في مريم
وانصدمت يعني بعد كم يوم أحمد بيرجع لفرنسا
قعدن ادموعي يصبن بلا راده مقدرتش نتحكم في روحي قعدت انعيط بعبرتي
جت زينب القتني بالحاله هذا جت مسكتني بيديها
زينب ** لولو خيرك شن في
ليلى وهي تبكي**😢 أحمد راجع لفرنسا بعد كم يوم
زينب** باهي تعالي تعالي
خدتني زينب لدارها وصكرت علينا الباب وانا مزلت نبكي
زينب ** ليلى اهدي خلاص
ليلى😢😢😢
زينب ** اسكتي خلينه نتفاهموا
ليلى**😢 عليش بنتفاهموا قتلك أحمد راجع بعد كم يوم
زينب ** يعني متبيشي يروح انت
هزيت راسي وانا نبكي بمعنى لا 😢
زينب ** باهي جاوبيني أحمد قرب عليك
هزيت راسي اخره بمعنى لا 😢
زينب ** معقوله ياليلى وعليش مقلتيليش.باهي هو ميبيش والا انت مانعتيه
ليلى** 😢نحن الزوز
زينب ** لا هكي ميصيرش
ليلى** 😢شن قصدك
زينب ** ليلى انت مرأ ومفروض تعرفي .
ليلى انت المفروض تربطي أحمد بيك اتخليه يجرئ وراك زي المجنون .احمد خوي نعرفه اشويه اهتمام منك ايحطك فوق راسه
ليلى** 😢 لا هو يحب هناء ومستحيل يفكر فيا
زينب ** خلاص كيف ماتبي خليه يسافر ويسيبك ويمشئ مع هناء وانت تقعدي تأكلي في روحك هنا
ليلى😢😢
زينب ** ليلى صدقيني أحمد خوي يستاهل وحده زيك انت مش زي هناء اصلا هيا تكسر الرقبه وكل الي شاغل بالها شكلها ولبسها
ليلى**😢 وهذا الي يبه الراجل
زينب ** صح الشئ هذا مهم ونعرف ان أحمد اتزوجها عشان هك بس هناء مستغلتش الشئ هذا صح ومخلتش أحمد يتعلق بيها واجد بس انت تقدري
ليلى** زينب بلاش كلام فاضئ أحمد متعلق بهناء ويحبها
زينب ** يتهيألك زي ما يتهيأ لأحمد أن يحب هناء .ياليلى هناء مش من النوع الي يحب أحمد احمد طول عمره يحب الوحده الي تهتم بيه وتشوف طلباته ويحس امعاها أن راجل وليه كلمه .وللأسف هذا مش حاسه مع هناء لاني ملاحظه أن احمد يمشئ وراء كلام هناء وعارفته مش راضئ
انا بعد سمعت كلام زينب زدت تضايقتك وقعدت نبكي
زينب ** ليلى خلاص عاد .اسمعيني زين نبي انقولك خلي أحمد يجرئ وراك انا عارفه انك انت وأحمد لايقين علي بعضكم خليه يهبل فيك انت قادره اديري هكي اشويه مكياج قدامه علي كم روب واهتمام يطير عقله
ليلى** مستحيييبيل
زينب ** علي راحتك خليه لهناء امالا
طلعت زينب وخلتني نبكي في دارها
اشويه ودق أحمد وخش قعدت نمسح في ادموعي بسرعه
أحمد **😲ليلى خيرك شن في
ليلى** مافي شئ
أحمد ** تبكئ ومفيش شئ غير قوليلي من امزعلك ونا انكسرله اسنونه ههههه
في هذاك الوقت كنت حامقه ومش متحمله حد يبصر عليا وقفت كشخت عليه
ليلى ** قتلك مافي شئ وهيا روح بيا ولا انروح علي رجليا(حوشها كان اقريب)
أحمد ** لالا هيا نضت اركبي في السياره ولاحقك
(عند أحمد )
معرفتش ليش ليلى كانت تبكئ
خليتها تركب في السياره وعديت قلت لهناء اني ماشى انوصلك في ليلى وراجع عندها وهي وافقت
ركبت ومشينه وطول الطريق ونا كنت ساكت نسمع في صوت اعياطها كانت اتحاول تمسك صوتها بس عبرتها تطلع غصب عنها
وصلنا قدام باب الحوش درست السياره وليلى جت بتنزل بس مسكت يدها مخلتهاش تنزل
أحمد ** ليلى شن في قوليلي توا
ليلى** مدخلكش
أحمد بتحذير **ليلى شن مدخلكش
ليلى ** أحمد روح لمرتك وتريح كم يوم وراكم سفره لفرنسا
ونزلت وهي تبكى
معقوله اتكون حامقه عشاني عشان بنمشئ ونسيبها لا لا هي متعلقتش بيا لها الدرجه هذا اعياطها ايدل علي أن شئ تاني صاير بس ممكن عشاني
قعدت حاير ونا في الحوش جنب هناء كنت اتهدرزلي وانا مش امعاها انفكر في حالت ليلى وشن صاير فيها
جت هناء بتقرب مني مش عارف ليش تخطيتها مكنتش معاها بكل وهيا حمقت ورقدت
قعدت فتره انفكر بعدين القيت روحي ماشي قدام حوش ليلى
(عند ليلى )
مريم وزياد رقدوا ونا قعدت انفكر كلام زينب قعد في بالي مش عارفه ومش فاهمه شئ كل الي نبيه أحمد يقعد امعاي لاني تعلقت بيه عمري محسيت اني نبي نملك حد زي ماكنت نبي نملك أحمد
فكرت في كلام زينب مشيت شور الدولاب فتحته وخديت روب لبسته كنت انشوف فيه عليا وكنت ناويه نقلعه لاني مستحيل اندير هكي أحمد توا عند مرته وحتى لو جئ غدوه ونا نعرف أن مش هيجى مستحيل نلبسه قدامه
قعدت نبحت في روحي في المرايه ونعيط
فجأه دق الباب
انا استغربت من جاي في هالوقت المتأخر
ليلى** من ايدق
أحمد ** أنا أحمد ياليلى افتحي
😲رعشت بحتت لروحي وشن لابسه 😲
معاش عرفت شن اندير هو كان يدق بالقوه ويقول
** افتحي ليلى ولا انكسر الباب
معاش عرفت شن اندير فتحتله وعقلت وراء الباب وطلعت راسي
ليلى** نعم
أحمد ** شن نعم حوشي ونبي انخش
دف أحمد الباب وخش
(عند أحمد )
خشيت وبحتت فيها كانت عاقله وراء الباب مسكتها من يدها وطلعتها ولقيتها لابسه شى غير كل مرا
هي حطت يدها علي اعيوني وغطتهن
ليلى** عيب ماتبحتش فيا
أحمد ** هههه باهي حولي ايديك ونا نبرم وجهي
حولت ليلى ايديها ونا برمت
ليلى** نمشئ انغير دبشى ونرجعلك
مسكتها من يدها
أحمد ** قوليلي ليش كنت تبكى قبل
ليلى** قتلك مدخلكش
أحمد ** عشاني صح متبينيش انسافر ولا احكي
ليلى😢😢😢
أحمد ** ييييي رجعنا من البدايه معاش تبكئ واحكيلي
فجأه القيتها متعنقتني بالقوه وتبكئ بصوت عالي
أحمد ** ليلى شن في شغلتيلي بالي
ليلى** 😢😢 انت بتسافر وبتخليني بروحي بعد تعلقت فيك بتمشئ وتسيبني
انا فرحت مش عارف ليش بعد سمعت كلامها يعني هي تبكئ علشاني نا
أحمد ** هسسسس ياهبله من قالك انا قاعد هنا امعاك
ليلى**😢 سمعتك اتقول لهناء انكم راجعين بعد كم يوم
أحمد ** هههه يعني قعدتي ام محمود انت تصنتي علينا
زادت ضغطت عليا بي ايدها وهي متعنقتني كأنها خايفه اني نهرب
ليلى** أحمد مش وقت ابصاره
وخرتها من عليا وبحتت في عيونها ومسحت ادموعها
أحمد ** ونا منبصرش قتلك انا قاعد امعاك يعني مش امسافر
ابتسمت ليلى وهي اتقول
** حقه
أحمد ** ايه حقه
فطنت ليلى لروحها وأنها قاعده هكي قدامي غطت اعيوني مرا اخره
ليلى** انا شن قتلك مش قلت عيب. انعدي انغير ونجي اقعد امغمض اعيونك
جت ليلى بتمشئ مسكتها من يدها وكريتها لصقتها فيا
أحمد **😍😍 لا متغيريش عجبني واجد الي لابستيه خليه .وبعدين مش ساد لينا كم متزوجين خلاص عاد
ليلى** أحمممممد
أحمد **😍 بلا أحمد بلا بطيخ .تعالي نبيك داخل
(عند حسام )
كنت كيف مروح من سمر اختي عازمني راجلها ياسر ع العشئ وحكالي علي صاحبه محمد الي مروح من فرنسا مليشي واجد
وصلت للحوش خشيت ع النت والقيت منشور علقت عليه كان موضوع علي كيف تهتم بي البنت الي اتحبها المهم كتبت عرم حاجات وبديت انقلب في التعليقات القيت وحده حاطه ( كلهم كدابين ) خشيت ع الردود وكتبتلها(شن قصدك) كتبت (يعني الرجاله كلهم كدابين ) كتبتلها ( مش شرط يعني لو انت في حد كدب عليك مش شرط انكونوا كلنا كدابين ) كتبت ( لا عيوني كلهم زي بعض وبعدين انا مش مجربه بس افعالكم تحكي عليكم )
كتبتلها (شكلك متاثره من وراء علاقه فاشله سببتلك عقده ) كتبت ( لا مش هكي بس انا عمري ماصدقت واحد لانكم كدابين) كتبتلها ( علقت الدسكه كلكم كدابين كلكم كدابين هذا كله ومش معقده ) كتبتلي(شن رأيك نتبتلك كلامي ولو انا فزت ناخد كرت 10 ولو انت فزت نعطيك كرت 5) كتبتلها (5 هههه عليك عنصريه باهي موافق شن تبي اديري )
يتبع