عشقتانفاسك
الحلقه 2
الراجل ** يااختي هادى منزل عماد ال. ..
انا قتله ايه من انت وين عماد
الراجل ** عماد داير حادث ومقلوبه بيه السياره وهو توا في المستشفى
اليوم التالي
كانت الدنيا زحمه في خيمة العزئ كانت عمتي عفاف تبكئ وحتى اني بكيت فمهما كان الي دايره فيا عماد الا أن في النهايه يكون راجلي وبو اصغاري وندعيله بالرحمه
قعدت تلات ايام في العزئ وبعدين خوي علاء جئ بيرجعني للحوش اهلي مرا اخره لأن ميبيش الناس يحكوا عليا .قاعده في حوش بروحها ولا سلفي أحمد رجع من فرنسا وهادى بيزيدهم دافع انهم يتكلموا
أحمد رجع بس انا مشبحتاش لاني رابط
***عند أحمد***
أول ماسمعت بخبر وفاة خوي عماد رجعت طول لي ليبيا انا ومرتي هناء وولدي محمد عمره 3 اشهور وانا عمري 30 سنه ومتزوج من 4 سنوات
انا وهناء طولنا مجبناش اصغار مش علشان محصلناش بس هادى كانت رغبة هناء تبي اتعيش حياتها حتى لما عرفت روحها حامل في محمد جت تبي اطيحه بس انا موافقتش وهي سمعت كلامي بس قالتلي واحد بس والفترة هادى انسى الصغار بعدين ساهل
هناء اتحب تهتم بروحها هلبا دبشها من أغلى الأسواق وعطورها أغلى نوعيه وهادى الصراحه
عاجبني لأنها مدلعتني وديمه اتغير في لون شعرها ولوك مكياجها 😍
كانت هناء مرتي امقعمزه مع بوي وامي في الصاله قربت منهم
أحمد ** هنو وين احميده
شبحتلي وكشخت وقالت **راقد في الدار
انا عرفت ليش حامقه تبي ترجع لفرنسا ليها كم يوم اتنق تبي اتولي غادي
قربتلها ومسكت يدها نسيت ان بوي قاعد يشبحلي يمكن لاني تعودت على جو برا كل شئ عادي
أحمد ** هنو حجزت التذاكر بكره راجعين لفرنسا
شبحتلي وكانت طايره من الفرحه وتعنقتني وهي اتقول ** نايضه توا انوتي الشنطه
شبحت لبوي القيته يفنص فينا امتع تحشم انت ومرتك دفيتها بالشويه ** خلاص عدي وتيها
ناضت هناء وانا جيت بنلحقها بس بوي نادى عليا
سالم ** أحمد قعمز نبيك
رجعت قعمزت ** خير ان شاء الله
سالم ** لا خير
سكت بوي اشويه كأنه يرتب في كلام
سالم ** ياولدي انت تعرف ان ليلى مرت خوك عماد هلها روحوا بيها
هزيت راسي
سالم ** وانت تعرف انها رفعت الاصغار معها
هزيت راسي
سالم ** يعنى الصغار بيقعدوا مع امهم ديمه واحنى الصراحه تعودنا عليهم ولما عدوا الحوش قعد امظلم علينا
هزيت راسي
مكنتش عارف شن قصده بس حاولت انسايره بالشويه بش يعطيني الزبده
سالم ** ياأحمد مرت خوك توا ارمله وهي اصغيره في العمر يعنى غدوه بعد غدوه يجئ حد يتقدملها وانت عارف هيكون يااما واحد شايب يااما واحد متزوج وعلاء خو ليلى هيوافق طول زي مادار معانا وليلى بترفع الصغار امعاها يعنى مريم وزياد بيعيشوا مع راجل غريب والله اعلم شن هيكون طبعه
بديت نفهم علاش بوي يلمح وقفت وقلتله
** هات من الاخر يابوي شن ناوي اتقول
وقف بوي امقابلني
سالم ** رجع مرت خوك يااحمد اتزوج ليلى انت ورجع الصغار لحضن هلهم رجعهم لحوش بوهم
انصدمت انا من كلام بوي معقوله يبيني نتزوج مرت خوي
عليت صوتي اشويه بس بااحترام
أحمد ** مستحيل يابوي انا منديرش هكي في هناء وبعدين كانك علي اصغار خوي تقدر تاخدهم انت من امهم وتخليها هيا في حوش هلها
سالم ** تي حرام يااحمد مستحيل انفرق الأم عن اصغارها
أحمد ** زواج مش هنتزوج على هناء.انا راجل متريح مع مرتي وانحبها ومنبيش نجرحها وبعدين احنى مروحين بكره لفرنسا
بوي رفع صوته عليا وكأنه قريب يضربني
سالم ** مرتك حبها زي ماتبي بس ليلى ترجع لحوشها هيا واصغارها ومافيش حل الا انك تتزوجها وتستر عليها
أحمد ** لا يابوي هناء مستحيل توافق وحتى انا مش موافق
سالم ** لو مادرتش الي قتلك عليه بنغضب عليك ليوم الدين وهناء خليها عليا
انا بعد سمعت بوي قالي بنغضب عليك رعشت من الكلمه الحق منقدرش انكمل حياتي وهو غاضب عليا كيف ربي بيوفقني واني عاق لوالديا
خديت نفس وقتله
** انت تبي ليلى واصغارها يرجعوا لحوشهم ويعيشوا جنبك
سالم ** ايه
أحمد ** انا موافق نتزوجها بس نكتب عليها وبعدين انسافر اني وهناء ومحمد لفرنسا ونخليهلكم هنا هادى شرطي لو وافقت عليه فاانا موافق
سالم ** وانا موافق وبالنسبه لسناء خليها عليا
انا معرفتش كيف وافقت يمكن لاني خفت من غضب بوي لاكن كنت خايف اكتر من غضب هناء لما تعرف
بوي مشئ نادى هناء وجت وقفت جنبي
سالم ** يابنتي أحمد راجلك يبي يدير خير ويحصل عليه أجر أن شاء الله من ربي انت شن رأيك
هناؤ ابتسمت ** والله ياعمى من ميتمناش ايحصل أجر
سالم ** بارك الله فيك .بس نبي انقولك أن الخير هادى مرات ميرضيكش
هناء** شن تقصد ياعمي
سالم ** أحمد بيستر علي مرت خوه وبيرجعها علي ذمته شن رأيك
هناء شبحتلي وكأنها قريب تعيط
هناء** لا أكيد مش موافقه اصلا أحمد كيف وافق
انا جت وقفت جنبها ومسكت ايديها
أحمد** لا الموضوع مش هكي انا بنكتب عليها بس
وقبل مانكمل كلامي بوي قالي
سالم ** أحمد اطلع خليني بروحي مع هناء
طلعت وهما صكروا الباب وقعدوا يهدرزا قريب نص ساعه
بعدها طلعت هناء شبحتلي وقالت
** انا موافقه اتزوج ليلى خلاص
شبحتلها وانا متفاجأ من ردت فعلها كان عندي أمل انها ترفض وبالهطريقه انكون تخلصت من المشكله هادى بس هيا وافقت بعد كلام بوي تمنيت سمعت بوي كيف قنعها وشن قاللها لأن طبعها عنيده ومتحبش حد يشاركها في ممتلكاتها فكيف بيا انا
حاولت نعرف سبب اقتناعها بس مردتش عليا
***سالم مشئ لمرته عفاف خبرها علي كل شئ
عفاف ** كيف ادير هكي ياحاج ليلى متستاهلش ماسد كانت متحمله عماد تبي أحمد توا يتزوجها بعدين يرميها في الشقه ويمشئ مع مرته لفرنسا مرا اخره
سالم ** في الوقت الحالي مش هنخليه يسافر انت ديري روحك مريضه وهكي يقعد كم يوم امعانا
***عند ليلى***
كملت العده وفاتن الأيام نفس الروتين نفيق انفطر الصغار ونفطر انا وامي واختي ولاء بعدين ولاء تمشئ لكليتها تقرئ طب وانا وأمي نكملوا الحوسه طبعا بعدين تنزل خديجه مرت علاء خوي وتلقى كل شئ واتي تتغدئ امعانه وتقعد لين يرجع علاء من العمل بعدين ترجع لحوشها ومعاش نشبحوها لليوم التاني
كنت في الأيام هادى ديمه نتعارك امع علاء ومرته كانوا متسبلين عليا انا واصغاري مرا اصغارك اشواطين ومرا الحوش ضاق وديمه فيه دوشه وانا مكنتش نرضى في اصغاري شئ وعلاء مد يدى كم مرا علي مريم بنتي هادى السبب الي خلاني معاش انكلمه بكل
في يوم من الايام علاء رجع بدري من العمل وكان باين عليه فرحان جئ خدئ امي وخش امعاها لدار
اشويه وامي جتني وهي مبتسمه
فاطمه ** ليلى نبيك في موضوع
أنا ** اتفضلي
فاطمه ** عمك سالم كلم خوك علاء اليوم وقاله جاين بيزورونه
أنا** باهي يتفضلوا
فاطمه ** راهو مش زياره عاديه
أنا مفهمتش ** شن يعنى مش زياره عاديه
فاطمه ** عيت عمك سالم جاين بيردوك لسلفك أحمد
انصدمت وحسيت الدنيا اتدور بيا
أنا ** كيف صار أحمد هادى مش متزوج
فاطمه ** متزوج وعند ولد
أنا ** باهي كيف تبيني نتزوجه ونخرب حوشه
فاطمه ** يابنتي هو موافق يعنى مافيش منه الكلام امتع اتخربي حوشه وبعدين انت توا ارمله واصغاره يعنى هادى نصيب اكويس ليك احسن من يجيك شايب وانت تعرفي خوك علاء مش هيرفض
شبحتلها وانا دمعتي قريب تنزل
أنا ** علاء شن قاللهم
فاطمه ** علاء وافق وهما جاين اليوم في الليل
نزلت دمعتي علي خدئ حسيت بروحي بضاعه يبيعوا فيها بدون مايسئلوني
أنا ودمعتي علي خدئ ** يعنى اكملين الامور ومخططين مع بعض وانا اجعني ماوليت
أمي قربت تعنقتني
فاطمه ** متبكيش ياليلى صدقيني هادى احسن ليك تتفكي من خوك ومرته وبعدين انت مش هتخشي علي حد غريب هاديمه عيت عمك سالم
سلمت أمري لله وفوتت باقي اليوم وانا نبكي لحد ماجئ الليل خشت عليا ولاء أختي
ولاء** ياهبله الناس قريب يجو وانت مازلتي موتيتش روحك
كنت قاعده بالتوته نوضتني بالسيف لبستني قفطان حفله ودارتلي اشويه مكياج خفيف
وانا كنت في عالم تاني كنت انفكر ياترى أحمد زي خوه عماد وبعدين خطر عليا عماد قعدت نبكي
ولاء في هاديك الوقت طلعت لعيت عمي سالم جت زينب وعمتي فاطمه بعد اشويه رجعتلي ولاء فرحانه
ولاء ** وحق ربي شبحته يالولو ايهبلللللل 😍😍 طويل وعضلات وابيض ونقشه سمح
أنا** مش كل شئ الجمال حتى عماد كان سمح بس شبحتي كيف كانت عيشتي امعاه
ولاء** غير كنك طايرتلك افرديها اشويه وصدقيني باين عليه اكويس وبكرا اتقولي ولاء قالت
** عند أحمد **
كنت امقعمز مع بوي وعلاء في مربوعتهم وانحس بروحي مخنوق مش مصدق الي يصير كل الي كان شاغل بالي هناء وشن وضعها توا
جابو القهوه وحلويات وعصير وشكلاته بعدين الشيخ قعد يكتب في الكتاب وجابوا العشئ
في كل لحظه اتمر انحس في موس يرتشق في قلبي
نبي انكمل الليله علي خير ومروح طول لهناء
بعد اشويه رنت عليا أمي
** أحمد خلاص بنروحوا
زادن دقات قلبي طبعا من كتر الخوف احنى بنروحوا وطبعا حتى هيا امعانه
مشيت ولعت السياره وركبت انراجي فيهم وبوي ورايا بسيارته
طلعت أمي وركبت مع بوي قلت أكيد زينب بتركب امعاي قدمتلهم اشويه بالسياره
وطلعت زينب ماسكه مريم ومشت حطتها عند امي في سيارة بوي ورجعت داخل اشويه وطلعت وفي يدها زياد ونفس الحركه الاوله حطاته عند أمي ورجعت طلعتها مشبحتش وجهها ومكنتش نبي نشبحها كانت طايرتلي عرفت الحركه الي يبوا يديروها اهلي
فتحت زينب باب السياره الي جنبي وركبتها ومشت ركبت مع بوي اني نزلت حامق ومشيت شورهم طبست كلمت بوي من الروشن
**لشن تبي توصل
سالم ** شن قصدك
أحمد ** لامهم كلهم في سيارتك وواخد الصغار هادى شن يعنى
سالم** يعنى روح انت ومرتك لحوشكم والصغار خليهم عندنا اليوم
ومشئ بالسياره انا قعدت انسب ورقتلي للقاز
شبحت لسياره لقيتها امقعمزه اتراجي
ركبت ولعت السياره ومشيت
طول الطريق وانا ساكت انفكر في هناء
بعد وصلنا نزلت فتحت باب الحوش هو نفسه حوش خوي عماد خشيت وخشت هيا ورايا
صبت في الصاله شبحتلها وهادى كانت أول مرا انشوف ملامحها
كانت رقيقه وطولها متوسط شعرها لاماته في تسريحه فوق الواضح ان طويل عيونها سود داكنات
وبشرتها بيضه
قعدت نشبحلها وهي واقف ومطبسه راسها لوطه
عرفتها متحشمه
أحمد ** أنا طالع انت بدلي دبشك وخودي راحتك
هزتلي راسها
فتحت الباب وطلعت وطول ولعت السياره ومشيت لهناء بس مكانتش قاعده في الحوش رنيت عليها
هناء** الو
أحمد ** هنو وين انت
هناء** بايته اليوم في حوش اهلي بكره الصبح مروحه
أحمد **تي انا قدام باب حوشنه
هناء**مش مشكله حبيبي بكره تعال روح بيا
وصكرت حمقت من معاملتها ليا .مسئلتنيش وين ليلى ولا بينت انها غايره عليا وحامقه اني اتزوجت ولا حتى نبهت عليا اني منقربش من ليلى ولا نلمسها
انا طارتلي بجد من هناء تمنيت لو انها كانت في الحوش راني فوتت الليله هادى امعاها ونسيت المصيبه الي قاعده في الحوش التاني
حسيت هناء وكأنها اتمهلي في الطريق وتساعد فيا علي خيانتها
طارتلي من اهلي الي دارو هالحركة امعاي وطارتلي أكتر من هناء الي موقفتش امعاي ومرفضتش هالموضوع من الاول
درت اشويه بالسياره بس مزاجي متعدلش
رجعت للحوش الي فيه ليلى مرا اخره
دقيت الباب قبل ماانخش
وبعدين خشيت ملقتهاش في الصاله شبحت دار النوم من بعيد القيت الباب مفتوح مشيت شوره
دق دق دق
وخشيت شبحتلها القيتها لابسه بجامه وفاكه التسريحه شعرها كان طويل هلبا وماسحه المكياج وتفأجأة انها احلى بلاش مكياج جمالها كان هادئ ومريح للعين
**عند ليلى **
شبحتله لما خش عليا في الدار كان طويل وعضلات ونقشه ع الأسود وفيه لحيه خفيف كيف ماوصفاته ليا ولاء بالضبط
قعدت نقرأ في أية الكرسي وندعي وهو كان يقرب .قرب بس مش شوري مشئ لدولاب طلع مخده وورغان
انا فرحت لاني فهمت ان مش هيقرب عليا وان بيرقد لوطه
بس تفاجأت بيه رمئ المخده والورغان لوطه علي الارض وجئ مسكني من يدئ ورماني جنب المخده والورغان الي رماهن
شبحلي وكان باين عليه حامق
أحمد بعصبيه ** انت بترقدي ع الوطئ وانا ع السرير وإياك تزعجيني فاهمه ولا انفهمك بطريقه اخره
انا هزيت راسي ومسكت ادموعي لفيت روحي بالورغان ورقدت ع المخده لوطه
قلبت وجهي لناحيه الاخره بش ميشحنيش وانا نبكي قعدت غامه النفس امتاعي بالورغان لأن لو مدرتش هكي هيطلع صوت العبره امتاعي
ياربي ليش صار فيا هكي في الاول عماد وتوا خوه شكلي مكتوب عليا الشقاء لآخر عمري
ربي يسامحه خوي علاء لو كان اكويس امعاي لكان متزوجتش اصلا انا مزلت اصغيره والحياه قدامي بس انكتب عليا الهم في بداية عمري
**عند أحمد **
كنت راقد ع السرير وعارفها قاعده تبكي معرفتش ليش درت امعاها هكي يمكن لاني حامق من هناء فجت فيها هيا بس تستاهل اعلاش مرفضتش الزواج من الاول
قعدت انفكر في هناء ونسيت موضوع ليلى انسيت بأانها قاعده في الدار اصلا
زعمه شن ادير هناء خلى انرن عليها
رنيت عليها القيت نقالها مقفل
حطيت النقال جنبي ورقدت
يتبع
Safa Abdullah