🌙حسناء القايد🌙
👑oumaima mega 👑
⚡187⚡
غير نطقت و خرجت الكلام من شفايفها ....كلشي هز فيها الشوفة .... سلطانة حمرت فيها عينيها تتشوف في بنت الهجيج مخرجة السرار تاع الدار اوا لي معندو هم كتولدو لو حمارتو ...أما ثورية و بنتها شروووق ...هزو فيها عويناتهم كي البارووود مكرهوش يزهقو روحها بين يديهم ...بمسبت لسانها الطويل ...ولاو دافنين ريوسهم بين العباااد و الهدرة فوق راسهم مرمية ....أما سي اسماعييل فحدووو هز فيها العين و تصدااام مسكين منين عرفها مرت سيد القايد لي عملت العملة حيت عيالات القايد مكانوش يوشيو بسرار الدار...و رجع وطااا راسو ماااعندو مايعمل مرت سيد القايد هادي ماخص حد يكلمها و لا يعيب فيها هدرة ....حسناء شانقة على لحافها و تتدور عويناتها بيناتهم و هما تيشوفوفيها يلاه بغات تنطق و تطلب السماح و هي تجي عينيها في عينين سيد القايد لي كانو كي الجمر عليها ... ركب فيها الخلعة من صبعان رجليها ...تمن الحروف لي غيعاونوها قجوها في حلقهااا و هربو ليها ...و نزلت عينيها للرض و مزيرة على لحافها و قلبها يضرب يضرب يضرب كيبان ليها بلي فتشت على جوا منجل مشات فيها و موحالش يشفع ليها ...اش عملت اسيدي ربيي ...ديما لسانها خارج عليها ....ايوا تما سلطانة و ثورية و شروق وقفوو و كيساينو الفراجة فيها حيت عااارفييين سيد القايد هادي مغيدوزهاش ليها بالنقطة تيحمل الواد....و كان تخمامهم في موضعوو ...بحرااا علااا القايد راسووو و هو مطلع الشوكة و غيطلق حلقووو عليهااا تا لمح من وراها محمد واااقف ...و خاشي وجهو بيناتهم وودانو مليووووحيين عندهم غير دهن راسو بالعسل وخشاه في غار النمل ...شاف فيه فخر الدين شوووفة حااارة و قنديشتوووو مطوعة لسما العالي ...محمد غير شافو شاف فيه تلف معرف يتقدم ما عرف يتوخر ....هو يبدا يتمشى سيد القايد و يديه من وراه و صدرو نافخوو ... حتى وصل لكتف اسماعيل و حط يد وحدة على كتفوو ...و عينو الحرشة على اسماعيل لي هز فيه الشوفة : بلاما يكثر اللغا وتزيد الهضرة كلامنا غيسالي هناا (كلشي جاتو الطرشة و دارو يشوفو في القايد كيفاش يساليو هنا و بنت الهجيج عاملة فضيحة قد راسها ) غنكملو كلامنا من بعد ا سماعيل و ليني ماشي هنا قبالت البرانيي ....غير سمعو البراني كلشي تعجب على اشمن براني تيدوي عليه سيد القايد و تما كين غا مالين الدار
القايد دار غابنص عين عند عرشية و صوتووو مزعزع القصر مكينش لي يدويي ولا يتكلم في مقامووو دفلتو حاارة : عرشيااااا دييي الضيف لموضعووو ...و دار ليها غا بشارة بيدو ...عاد كلشي دار جيهة محمد و لمحووو خيالووو ... محمد معرف باش تبلااا بقا مجمد في مكانو ....و عرشية غا لمحاتو مشات تتجارا عندو ...حسناء تاهيا هزت الشوفة فيهم و دارت تشوف هاد البرانيي ...غير لمحت محمد و هي تدور دغيا دغيا في ساع و شدت على لحافها ...هادا اش باقي يعمل هنا ....عرشية خدااات الضيف داتو البيت الضيافة
فخر الدين رجع ودار يدوو من وراه و علاااا الصوت مخلي كلشي يقفقف و يترعد و غوبااااشتووو طالعة السماااا باينة فيييه كاعي ونفسو نفس سلطان عالية ومسموعة : كل وااااحد في موضعووو فرتكو علياااا هاد الجقلة ... توحد معاود معاه الكلام ...اسماعيل حدر راسو و مشا اللي غلب يعف ...و ثورية بقات تشوف في سيد القايد لي منصفهاش ومعطاهاش حقها جيهة كبدتها المشوية ....و هي تدور عند لالة سلطانة ...لي غير شافتها و هي تقلب وجهها معندها ما تعمل ليها ولدها لي دارها لراسووو ...ثورية تمااا حلات فيها عينيها و هي تتشوفها تتقلب عليها وجهها ... كبدتها مشوية و كلشي عطاها بضهرو تمن راجلها حنا راسو و مشا عارفين ولدهم طايش و جابها في راسو و ليني راه خلا لي سوا و لي ميسواش يلوح الكلام من وراهم ....و هي تجرها بنتها شروووق تدخلها و عينيها ا على حسناء ...كتشوف هاد بنت الهجيج من نهار حطت رجلها في هاد القصر و لمصايب تيجيو وحدة من ورا وحدة وكاع البلا من تحت راسها...وهي ماشية و جارا يماها معاها
🌙حسناء القايد🌙
👑oumaima mega 👑
⚡188⚡
سيد القايد زاح عينو عليها و دار غا نص دورة جيهة لالة سلطانة : الحاجة
لالة سلطانة تمشات عندو توقفت في جنبو ...و هو ميل راسو و حرك غا شفايفو كيخبرها في ودانها ...سلطانة معودتش معاه الكلام : واخا ا ولديي ...و دارت شوفة ناقصة للحسناء و دارت فحااالهااا ....ايوا الدنيا خواااات و اللغا مشا و بقاااات غير حسناء واقفة تما بحيكها حادرة راسها و سيد القايد واقف تما على الجمر ....حسناء منزلة لعين و غااارقة في تخمامها ماحيلتها لحصلتها مع يماها ماحيلتها لمحمد لي غا تبان في حياتها ...و هي تهز شوفتها زينة و درويشة ...و قلبها تنخض من مكااانووو و هي تتشوف القايد قاصدها و المقصووود الله و غا هي وياه لي كينين ....و عينووو حمرا غرية و شوفتو حارة تدوب الحجر عاد بنادم ...حسناء يديها ورجليها بردو عليهاااا تما جمدت في موضعها و نزلت عينها دغيا دغيا ....و زيرت على حيكها و عضت شفايفهااا ... باش تبقا تابثة نابتة قبالتووو ...حتى لمحت بلغتووو في لرض وقفت عندها ...وجدت راسها لعقابها و هي تتسمع نهجوو تيسوووط فوق راسها هاديي لخرة ليها مافيهااش...تلمحاتو من تحت العين دازها و فاااتها ...عاد هزات راسها شافتووو ماشي عاطي بضهرو لجيهة لقواس ...عاد رجعت بقلت حيلة اش عملت يماها هادي غا علمتها باش تخبي على الغاشي ...و هي تنهد و دارت راجعة فحالاتها للكوزينتهاا
~~~~~~~~~~~~~~~~في الصالة تاع الضيافة ...كان محمد جالس فوق الصدادر و يدووو ملوية تحت الصداري و بارك يدك فيها شي حاجة ...يخشي و يدك و يخبييي ....تاهز عينووو و شاف السبع ديال سيد القايد داااخل ويديييه من وراااه و معلييي الشوووكة طاااايرة ليه تاع الصح ....محمد ناض مخلوووع من مقااااموووو ووقف كيساين سيد القااايد يوصل عندوو : سلااام سيد القايد
القايد تمشا لعندووو بشوية و هو قارم الشوفة و عينو علييه و نطق بحروف حرشين : أش جابك لهنا ؟
محمد حادر الراس : ءءء؟ سيدي انا هو محمد لي مسيفطو سي عباس على قبل داك المضا
القايد عينو مقوسة كيف النسر ميدورها لا هاه لا هاه : تيبان ليا مرسول عباس معارفش مكان غرفة دالتجارة ؟
محمد : لا اسيدي عارفها فين جاات و دزت تما و ليني مالقيتش سيادتكم هي باش جيت لقصركم
القايد كينهض ماشي تيتكلم : غرفة دالتجارة عندها وقتهااا باش تقضي شغالك لازمك تجي في وقتو....هنا تقادا الكلام ديال محمد معرف مايجاوب و لا يرد بقا غير حادر راسو و يلوي في عينيه فحال النمس ...و سيد القايد علا راسو و رفع حاجبو هادو هما عوان عباس يدورو و يتلواو و معاندهم جواااب ...حتى سمع الدقة من برا
عرشية : سيدي ....فخر الدين بلاما يدور عطاها شارة تدخل ...و محمد هز فيه العين ....توصلت عندو عرشية و عطاتو ورقة (هي لي خبر سلطانة باش تجيبها حيت هي لي عندها السوارت ديال الشادة و الفادة ) و عطاها لمحمد لي شدها في ساع تيحنزز فيها
القايد رجع يديه وراه : ها المضا دياليي
محمد تيشوف في المضااا و مخرج عينو : ل للهلا يخطييك اسيدي
القايد عملو غا براسو يخرج : يلاااه ....محمد معاودش معاه لكلام هو مبارك فرج عليه الله حيت عيون سيد القايد كيف البارود مغتسلتش منهم تا لعتقك سيدي ربي
~~~~~~~~في الكوزيينة ....كانو واقفييين العبدااات مصااافاااات و حدرات الرااااس و تيطلو غا من تحت العييين ...و واقفة بيناتهم شافية ...لي تتشوف في داكشي لي طايب و محطوط و متول و مقاد .... و حسناء واقفة قبالة هاد الخير و ساكتة غا تتشوف ما تتنطق ماتتكلم و بااااااينة من وجههها عاملة فضيحة
شافية : لالة راه كلشي واجد
حسناء طلعت فيها عويناتها كوحل زينين فحالا باغا تطلب و لا تنجد شي حد : عايني ا شافية انا ماجية ....و دارت هازا جلايلهااا خارجة من الكوزينة و هي تتنزل حايكها من فوق راسهاااا ...تبين على سالفها الكحل لي ضارب تال تحت ضهرها و غادا تمشا و دبالجها و خلاخلها يتحركو معاها